2008 年 1 月 7 日 星期一 【陰】

今日個天好陰，令到個人既精神同情緒都唔多好咁．．．今日雙手同腳都仍然痛，不過已經明顯冇琴日咁痛了，好了一點點啦．．．不過行路仍然好似機械人咁，d關節好唔順暢呀，好似硬晒咁，手都一樣係咁，完全不能舉起同伸展，好慘．．．

今日朝早同同事都係得閒就聽下電話，一係就上下網玩下facebook，因為近日不斷玩緊一個”起樓”既遊戲，真係好好玩．．．哈！而家已經破左自己琴日既紀錄了．．．如果A仔都玩埋呢個遊戲就好了，當然更多朋友一齊玩就更加好啦，因為大家可以黎個大比拼了．．．

下午同左同事去沙爹王食lunch，發生左一件趣事，當我地坐低時，我同事發現身邊兩個人都係識既，係佢既同學，而剛好佢兩個朋友當中我又識其中一個喎，而我識呢個人其實A仔又識架喎．．．所以話呢，世界真細小架，哈，咁都可以兜個圈識到一點人！

聽日同後日我都被安排返土瓜灣，其實，真係有點唔捨得觀塘，因為呢度好free，同埋好開心，同事又好玩好傾呢．．．返到土瓜灣會好悶既，因為果度又靜又多大粒走來走去．．．唉！而且，又唔會得閒有好野食，好似今日咁，又有好野食，整包師傅又整左一個意大利包過我地食了，真係好食呀！！好正！不過．．．今晚返到屋企終於上左磅了．．．wow．．．完全不能接受，回到我一生中最重既時期既磅數了．．．天呀！！唔可以再係咁，要減肥了．．．鬼咩，而家去左觀塘，餐餐同同事食飯都大魚大肉咁，得閒下午又有蛋糕面包食，加上近日腸胃真係好差，完全係有入冇出．．．唉！唔肥就奇了．．．真係有什麼方法可以讓腸胃好點，有得”出”下呢？

>>January 8, 2008 at 2:34:40 PM GMT+8

2008 年 1 月 6 日 星期日 【晴】

嘩．．．x 100次．．．真係想死呀！琴晚沖涼時比我發現左對腳好多瘀傷，我已經數過了，共有二十多處瘀傷呀．．．SHIT！好慘，對腳花晒之餘仲好痛．．．今朝起身，兩隻手同腳就好似唔係自己咁，連行都有問題，隻手係咁易郁一郁都已經痛到死死下喇，莫講話要舉起隻手啦．．．嗚！今日遲左出門口，所以miss左型巴士，攪到遲左到！返到去chk番，先知道原來今朝得我一個，兩個同事都出左去做野！所以，今朝十分之free咁渡過，電話又唔算太多，都係十個八個咁，walk in又冇，哈！

今日成朝都係度上網玩msn咁，哈！不過，四肢越來越冇力，輕輕郁一郁都有想死既感覺．．．真係感覺到係極傷！而家隻大肶極痛，對手一舉行少少，個格肋低就好痛了．．．嗚！仲有，個人好累好累．．．不過又未到要訓著，只係覺得好乏力，無力．．．

到左十二點，其中一個同事回來了，可以同佢一齊食lunch，又係過左隔離canteen食飯，真係好味，不過不是十分抵食，平均每次都要三十蚊左右！哈，其實我一個人出去食，可能二十蚊都得了！求其食下面或者麥記都得啦！今日成日比同事笑，話我好似handicape咁，成個機械人咁，行唔郁呀！超痛超痛．．．加上，右手手指公又爆左，而家極痛，個口越來越大，是關琴日攀一攀隻手又磨多幾磨啦！唉！

臨放工前一個小時，同個同事係咁玩facebook，哈．．．而家玩facebook已經成為生活既一部份．．．近排本來同A仔玩開幾個賽車game，不過今日同事send左個好正既game比我，我自從今天玩過後已經上左癮了，哈！真係好好玩，好有挑戰性，好似一道癮咁一定要拎到高分為止，哈．．．最後，同同事係咁玩，我終於破左我今日set既目標，哈！臨放工前十分鐘，仲食左一件好好味既芝士蛋糕，因為業餘進修中心近日有西餅班，而且呢度既同事同個師傅好熟架，佢成日教完班就會將d製成品請呢度既同事食，於是反我都認識左呢位師傅，我就開始有了口福．．．不過．．．最擔心既問題係，我唔想肥呀！！呢度又好玩又多野食，一定肥架喇．．．先排已經比A仔話我肥了，所以一定唔可以再係咁落去了．．．要好好忍口，KEEP住呀！唔可以失手的．．．但係．．．我至愛既就係甜品了，一見到所有榚點美食我就會忍唔到口了．．．點算好呢！

放工回家，行果陣又比同事笑，唉．．．什麼機械人要回家了！嗚！最慘既係，行去車站既路係必須要行一條隧道，而入隧道就必須落樓梯．．．SHIT！行到我丫！同事仲笑我，叫我搭巴士唔好上上層了，如果唔係又要行樓梯！！哼！講真，唔好講行樓梯丫，我連行平路都痛呀而家，唉．．．返到屋企，好似四肢唔再屬於自己咁．．．即時沖個超熱既熱水涼，之後就塗左我係泰國買番黎既按摩膏！呢隻膏係幾勁的，塗完一陣好快冇咁痛，不過佢一過左氣，好快又回復舊況．．．而家幸好仲未開始痛番，仲KEEP到，所以決定今晚訓前再塗一次．．．不過怕聽日返工成身都有味，呵！唔理了．．．

PS，我放工搭緊車時SEND左SMS比A仔話我好痛，佢都好好，即時打比我睇下我點．．．佢話想幫我捽下，唔洗我咁痛．．．果一刻雖然仍然好痛，不過心甜已經可以償補了，哈！多謝你呀A仔！

>>January 7, 2008 at 12:20:07 PM GMT+8

2008 年 1 月 5 日 星期六 【晴】

今朝超早起身，其實．．．都唔算係超早既，因為平日都係七點起架喇，只不過係星期日黎講較早o者．．．因為今日要八黠去到A仔間中心集合出發去攀岩．．．真係十分周車勞頓呢，一次過轉左三輪車，真係想死，已經十分眼訓，仲要轉黎轉去，真係有點暈暈地．．．落左車，就行左一段山路，可以話都唔太辛苦既，不過係難行囉，因為要入少少樹林，又不斷上山，路又多石．．．不過最終行到上去北潭石，大約二十幾米高既石牆！

準備好之後就開始攀了，我共攀上了兩次，APE番兩次落黎(即係由繩下降)；第一次都OK順利上到去落番黎，冇咩損傷呀！不過第二次就因為難攀左，所以整到手同腳都有傷，又加點戰績了，呵！兩隻膝頭都瘀晒，手腕又磨了薑（磨傷D皮）．．．不過，唔係好傷O者，接受到，係對腳而家D瘀好痛下囉．．．而且而家行落樓梯有點HANDICAPE咁，好累好累．．．雙手最累，有點震同軟．．．希望可以好快RECOVER到，都唔知聽日點返工！

完成成個過程直至返到西頁市中心大約六點度，之後我同A仔就過左去九龍灣行，去左SPAGETTI HOUSE度食，我請，因為之前話左請佢，食左二百幾蚊，不過好豐富，最後都食唔晒．．．係我地去九龍灣過程中同食飯過程中，我地傾左好多野，大家而家又CALRIFY左一點心事了，或許過程痛苦，但是都是一件好事吧！希望大家一同努力啦！我希望大家真係可以如A仔說，一齊努力去到達我地既目的地啦！

返到屋企都十一點幾了，真係有點想死的感覺，已經極度眼訓，但係仲要沖涼洗頭同執野．．．唉！

>>January 6, 2008 at 3:54:32 PM GMT+8

2008 年 1 月 4 日 星期五 【晴】

added~~

今日返工十分無聊，是關我係觀塘中心果邊，個死人熱線電話駁唔到線，連接唔到network，所以一直都聽唔到電話．．．最後，我唯有係度上網渡過日子！之後，係十二點左右，個電話終於冇事，最後今朝都係只聽左一個電話咁大把！放工後返屋企，之後去左西鐵站拎番部電腦，因為A仔已經幫我整番好，真係辛苦佢了，又要整又要幫我搬番黎．．．錫番呀！今晚同左屋企人食飯，係我請客，因為出左第一份糧，都係要請既，哈！不過今日缺少左妹妹，因為佢出左街呀，唯有遲D再補番數啦．．．

本來呢幾日好多野諗，不過今朝聽君一席話後，頓然醒覺，決定唔再傻落去了，反而要好好積極面對喇．．．

先排，堂細佬有次無啦啦係msn度send左一首歌比我，佢話好o岩我同佢既未來姐夫聽架喎．．．其實，一直都未有時間好好去了解同品嘗，最後，今晚終於的起心肝去聽，仲搵埋首歌既歌詞．．．

其實首歌係莫文蔚既：”其實我一直都想對你說”．．．

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

其實我一直都想對你說

歌手：莫文蔚

有一些話從來沒說 以為不說也懂了
我們都害怕太浮誇 這世界又過於虛假
原諒我嗎 你的話若我沒太多驚訝
總以為激情已昇華 並不是熱情已蒸發

還不想當時也把經營規劃它
真的愛不必刻意吧

其實我一直都想親口對你說
你愛我也不容易吧 但是你並不問代價
抱歉我原來還沒親口感謝你
給我力量不懼怕

好聽的話都聽膩吧 錯覺你不需要它
時間匆匆就像流沙 卻想著來日方長嗎
原諒我嗎 當情話 沒點螢棒的火花
總以為激情已昇華 並不是熱情已蒸發

不想把情緒放淡 那太復雜
因為愛不是表演吧

其實我一直都想親口對你說
你愛我也不容易吧 但是你並不問代價
抱歉我原來還沒親口感謝你
給我力量不懼怕

我笑意裏那些淚水和我的歉意
到底可不可以稍稍去彌補
種種不如你期望的所處
如果我驚覺我愛你並不夠

其實我一直都想親口對你說
你的愛就是獎勵吧 生命裏額外的長假
抱歉我原來還沒親口感謝你
你就是我要的回答

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

聽完後，頓然好touching，唔識得形容吧！是的，我會努力的，努力去愛人，努力去經營愛，努力去創造愛！我要珍惜眼前的所有東西，因為所有野都係神所比我既，都係佢既安排，我要相信神．．．

>>January 5, 2008 at 3:36:55 PM GMT+8

2008 年 1 月 4 日 星期五 【晴】

好多謝一個好姊妹．．．佢提醒左我！

我決定左了！既然有d野係已經決定左既，亦都知道有d野係一直以來都係一d不可改變既事實同情況，咁去執著要改變都冇用．．．倒不如面對現實，學習下如何面對同求存！

仲有，最重要既一樣野係．．．我曾經問自己好多次，我係咪好愛呢個人？．．．我既答案係．．．absolutely係！絕對係！永遠係！．．．所以，而家放下了好多，決定唔再去諗太多無謂野了，反而要積極諗下籌備同儲錢既問題吧！

再次多謝個好姊妹，真係愛死佢呀！！仲有，我想同A仔講，我都愛死你呀！！

>>January 5, 2008 at 4:48:09 AM GMT+8

2008 年 1 月 3 日 星期四 【晴】

今日巴天氣已經冇先兩日咁凍了，不過仍然都幾凍下，哈！始終天氣太凍，個人都唔多想郁咁，而且好遲鈍下添，成日想訓想訓咁，好冇心機．．．今日朝早得我同另一個同事係度，而且電話查詢又唔多，所以成朝都好悶．．．後來，有個今日原本放假既同事出現左，佢返黎拎少少野，之後過左一陣就lunch hour，所以一齊出去食飯．．．去左椰林閣食，都唔平，咁就食左三十幾四十蚊了．．．唉！

個下午同樣難過，電話雖然比朝早多了，亦都有walk in，不過都係好沉悶既感覺．．．究竟係我問題定什麼問題？我近日是否想得太多呢？近日唔知點解成日諗好多野，而且近日發覺，即使同A仔一齊，但係．．．我唔識得點形容呀，只係覺得好似冇左以前果種感覺咁，有點失落感！亦有點好悶好冇心機既感覺．．．有時候，大家真係可以所對而無言的，感覺好怪！眼見旁邊的情侶，有說不盡的話題，有表達不完的熱情，有放不盡的激情．．．但係望一望自己卻．．．我明白，大家一齊咁多年啦，邊會再有以前果種激情丫？連我有時熱情一點都會比人拒諸門外，叫我唔好玩！唉．．．有時都會有點心淡，心想做一點東西讓情況改善，但係原來係唔得．．．講真，就連佢都唔會再浪費任何時間精神心機去做什麼，為既係要比驚喜我，或者係博我紅顏一笑啦？唉．．．

女人就係咁矛盾！又想要個穩穩定定既日子，但係好多時又唔甘於平凡．．．A仔成日話：”要懂得欣賞平凡，要知道平凡就是福了！”．．．我當然知呢個道理啦，呢個亦都係神所喜悅的事．．．不過，有時好矛盾，因為好想生活中會有點衝擊，讓自己感到快樂一點！平凡當然快樂，但有時候可能貪心，好期待有人表現著重我！唉．．．點好呢？好矛盾呀！！

今日放工後約左A仔行街，本來想買褲既，因為我有條褲縮左水呀，而且而家好多都有SALE，所以好想入貨．．．不過，同A仔行街就唔想悶親佢，要佢陪我睇衫，所以，我選擇左自己陪佢睇佢所喜歡的東西！有些人會覺我傻，點解唔可以想去就去做？想行街買野咪買囉，洗乜理佢感受呢？之但係．．．我就係一個先會睇人感受的人！

其實，今日個人都好疲倦呀，一來早起身，二來心情唔多好，近排有點兒collapse咁，唔知係咪諗得太多，好似有好多野煩咁，好困擾住我．．．尤其係將要出現既人生大事．．．我唔知點解近排不斷問自己一個問題：”黎曉寧，你係咪真係決定左架？而家又好似發現到d野咁．．．！你確定到結婚後真係可以永遠幸福嗎？”．．．好爭扎既感覺！我唔知點解自己會咁樣諗，係咩野發生左呢？我好似對對方，對自己，對大家一段感情，開始失去了信心同感覺咁．．．有點兒唔知點算好咁！其實．．．我好驚，我一點都唔想咁，但係，近排控制唔到自己既想法．．．或許，誘因我係知道的，只不過係我唔敢面對同向對方表達．．．

>>January 5, 2008 at 4:15:02 AM GMT+8

2008 年 1 月 2 日 星期三 【晴】

呢幾日部電腦死左，所以冇得打日記，慘慘．．．

近日都冇咩特別，放假既放假，返工既返工．．．但係而家部機都未整番好架，都唔知幾時先有電腦用番．．．雖然而家屋企有手提電腦，不過打唔到中文，係英文版既vista黎，都唔多好用咁．．．今日仲要特登搬部電腦過去A仔度整，嘩，拎到我丫．．．隻腳仲要而家撞瘀左添呀，有度損埋．．．討厭！

近日發覺自己真係肥左好多．．．唔知係天氣凍所以食多左野丫，定係因為真係大食左，所以十分之肥．．．唔得，唔可以再係咁落去架喇．．．所以琴晚開始，已經要開始好好節制一下喇．．．不過聽同事講，去得觀塘中心果邊做，好快肥．．．好驚呀！十個唔想呢．．．要努力KEEP住呀！係呀，自2/1開始，我黎緊兩個月都係觀塘中心留守．．．有好有唔好既．．．睇下點睇架O者！

成日都覺得好眼訓，唔知咪凍，所以都係想訓．．．訓極都唔夠咁，討厭！

近日，同A仔去睇開D家私咁，因為遲早都係要為屋企加添新家私的了，始終多左個人住，都係要買．．．十分頭痛，一來要夾下有什麼家私要加添，二來又要配合得到個SIZE同需要，三來最重要既係要睇錢錢啦，唉．．．煩死了．．．而家發覺真係有好多錢要用呀，點算呀！好怕唔夠錢呀！唉．．．煩死！

>>January 3, 2008 at 3:53:49 PM GMT+8

2007 年 12 月 30 日 星期日 【乍雨乍晴】

嘩~ 今日超超凍凍呀~ 今早落街果陣，真係凍到唔多想行咁．．．本來打算踩單車出去既，後來都覺好似太凍咁，而且今日著條裙又短得滯，唔係咁方便，最後決定搭k66出到朗屏西鐵．．．返到去剛剛好，哈！

今朝極度眼訓呀！尤其係食左藥，十分十分眼訓．．．把聲仲沙沙地咁，同事都唔係好認到我把聲（係電話度）．．．今日成日都要係counter聽call同解答walk in，都唔知點解都大除夕啦，都咁多人問野既．．．過埋個年先算咪好囉！要我返工返到五點半，真係失望！

下午成兩點先食飯，去左買粥食．．．順便去chk下出糧未．．．真係好，終於捱完呢個月了，有錢錢用喇．．．唉！好經辛苦等到放工，放工就先去銀行處理下d錢錢先，之後就搭車入元朗，因為今晚繼續去A仔度，有朋友會來吃飯．．．

今晚既晚餐大部份由A仔主理，我只係幫手整左少少野O者．．．我地一邊食飯，一邊傾計，都氣氛十分好！傾完計仲玩左陣，到左十一點，朋友話要走人了，因為有下場，而我地繼續留在家中．．．沒有什麼特別野做．．．只係臨倒數時與電視機前既觀眾一起望著IFC倒數，睇下IFC會否大爆炸，哈！講笑吧！因為是次特別在IFC放煙花，所以常同同事講IFC今晚大爆炸，呵！

唉，咁就過左個2007年喇．．．回顧07年，都覺得自己冇咩作為！唯一最窩心的事，就是係年頭同A仔再次係番埋一齊！今日，係我同A仔既相識九周年，不經不覺識左九年了，話長唔長，話短唔短既時間．．．當中當然有喜與悲啦．．．而今日，都係平凡地渡過，沒有什麼驚喜，沒有什麼特別，沒有什麼不平凡的事發生及出現！這是否就是很幸福呢？人人說，平凡是福！．．．但係．．．當然我都想過一個不平凡的周年紀念吧！算吧！或許人地認為，年年都是周年紀念，為什麼要舟別慶祝？喜歡的話，天天都可以是周年紀念吧！或許，女人就是這樣，喜歡對方在特別日子作特別行動，以表示其重視女方的誠意吧！可惜的是，今天是沒有感受到是周年紀念的感覺．．．失望！或其實．．．他又是否記得今天是什麼日子呢？哈！佢可能已經忘記了吧．．．

>>December 31, 2007 at 5:16:17 PM GMT+8

2007 年 12 月 28 日 星期五 【晴】

今日同樣地係一日好實既一日．．．．本來約左妹妹一點半係金鐘等，點知大家都遲左到，呵！最後攪到成兩點半先至去到海洋公園個集古村．．．不過，好正，集古村變左做聖誕主題既地方，有好多野玩！我地join左表哥佢地之後就開始今日既行程．．．

十分充實，先去睇冰上百老匯表演，正，十分精彩既節目！之後去左玩越礦飛車同滑浪飛船．．．嘩，濕晒呀！不過好正好好feel．．．之後，去左搭cable car落去睇panda，睇完之後再玩panda式既旋轉木馬；再跟住搭番cable car上番去睇水母館，睇完之後再玩摩天輪同千秋．．．好暈呀！之後再搭番cable car落去走人．．．shit，我未試過一日裡搭三次cable car囉，傻左！不過．．．真係好實下，哈！好好玩好好笑既旅程．．．一個字：good~

玩完之後個個都好累了，而且又肚餓，好經辛苦搭車出到去銅鑼灣，去左一間叫越味既地方食野，我請客，三百幾蚊落樓．．．well，有少少肉痛，不過．．．無幾何啦，始終表妹表弟唔多返來香港嘛！都係做一做表姐既時候了！我都算唔話得，入去玩之前驚佢地中途會餓，所以帶定d零食黎，仲買左mrs. fields比佢地食添，都唔話得喇，呵！而對妹妹，我都買左個企餓公仔比佢添，開心死佢，因為我係佢去左toliet時買既，佢唔知架！yeah~ 而我自己都買左panda既首日封同postcard比自己！

最後，我地送左佢地返酒店樓下，好唔捨得咁送左佢地走喇．．．hug一hug，希望快d再見番佢地啦！不過，下年會再見到表妹，因為佢話會參加我既wedding，好感動呀！！

>>December 30, 2007 at 5:27:49 AM GMT+8

2007 年 12 月 27 日 星期四 【微雨】

wow．．．今日真係十分之充實既一天呀！

朝早一早出左去旺角勞資審裁處做野，仲係要連跟兩隻case，死左咁．．．之後十一點半走人，同同事阿魚兩個趕到咁返去土記，因為要趕住返去join車去disney．．．其實初時都唔知去果度做乜，只係知道”交流”囉，但係點交發，交什麼．．．都唔知架！點知上到車先知道，原來今日係一個半日遊喎，哈，無啦啦可以去玩喇，都幾好！

去到disney後，先入左佢地既酒店，食番餐正既中菜！真係好正呀！d野又精緻又好味！咁大個女未食過d咁好味既點心架！食完之後，我地就開始今日既參觀玩樂行程．．．先去左小朋友學畫畫既教室，當然我都學左點畫米奇啦；之後，我地去左睇3D，同樣係DONALD做主角；之後去左睇golden mickey，確實係一個十分精彩既節目；再跟住，去左玩再會史廸仔，好好笑，因為成場都係我地工聯既人，所以佢可以好放咁同我地講笑同玩，有個女同事仲無啦啦做埋史太添，呵！玩完呢度，我地去左準備睇巡遊，真係十分好氣氛，仲要飄住泡泡雪，好好feel．．．心想，如果係同A仔黎既就好了，係咁浪漫既氣氛下，真係好SWEET！可惜丫．．．最後，我地去左睇堡壘既亮燈，真係好靚，好正呀！完晒成日既行程，我同同事阿魚就兩個去左掃貨，難得入到黎梗係要掃啦，大家都各有收獲．．．跟住就七點幾走人了，因為今晚約左表哥，妹妹，表妹表弟食飯．．．

好快手出到旺角JOIN佢地啦，行左一陣後，仲去左映貼紙相添．．．跟住就去左食吉野家．．．好味！食完後係吉野家玩左一陣傾左陣，就各自走人了，因為明天大家仲會見面，就係去OCEAN PARK喇，YEAH~

>>December 30, 2007 at 5:14:49 AM GMT+8