2008 年 2 月 16 日 星期六 【颳風】

今日一朝早就起身了，因為要幫A仔手帶活動去昂平360．．．真係好累，六點就要起身了，不過琴晚係點幾鐘先至訓，因為要整小ME個BLOG丫嘛！好在，360果度又唔係想像中咁凍，天氣都唔差，仲有太陽添，所以活動都十分之順利．．．只係回程果陣因為同司機有點誤會，所以回程時間長左．．．

之後返番去山景中心，我就先回自己家，安頓了一些，之後再約A仔一齊係我家附近出發往天后去探小ME．．．初時打算搭巴士可以好好訓番覺，可惜我同A仔在車程中都唔係好訓得著，往往都想住小ME的情況，最後，都係積極繼續致電好友，將消息傳出，希望更多有心人可以幫助小ME情況．．．

今日出到去，約左A仔家姐一齊睇小ME．．．見到小ME佢好累，因為佢剛吸完蒸氣！之後，見佢著左件衫仔，真係成個牛王頭咁，話佢唔係男仔都唔得啦．．．仲有，佢左後腳果度用繃帶包裹住，因為醫生怕佢D骨會有移位問題，所以都係要梗硬扎住先，總好過移位！醫生表示，小ME暫時情況穩定，只可以話未有轉差的情況，但能否完全康復卻仍需了解及跟進．．．醫生亦提到想幫小ME抽血，因為想了解小ME身體內會否有些絕症，如貓愛滋，腹膜炎，血癌問題，因為這些問題是會影響到小ME痊癒的！於是我地都決定為小ME明天進行抽血！由於醫生表示小ME透過一整日的觀察，認為都應該有能力獨自留在籠中過夜，所以今晚沒有護士哥哥姐姐陪了，要一個人乖乖留在籠裡．．．我地都相信醫生，讓小ME一個自己．．．我地都千叮萬囑小ME要乖乖留在這裡．．．佢好似識得聽咁，不時都有喵我地回應．．．

見佢都係喵喵叫過，即是對我們都仲有反應．．．而且見哥哥餵佢食藥，佢都好乖，一啖食左，但因為好苦，所以佢食完都不斷叫．．．我就TUM佢快點吞左去，佢都好乖吞晒，不過都係因為苦而叫叫．．．可憐！

開始感到極求乏力了，睇完佢吃飯就回家．．．整個人都十分疲於奔命的感覺．．．眼見自己前面有不斷的工作要做，包括自己的工作，小ME的工作，甚至係結婚的工作．．．排山倒海的．．．天呀！我有點想死的感覺．．．我唔知自己幾時到COLLASPE的一刻會自我放棄！因為當中有好多想法．．．真係曾經想過再係咁樣D錢咁洗落去，我同A仔真係一定結唔成婚了！我地如何再儲番錢呢？但係，見住一個小生命，唔通又可以放棄佢咩？好矛盾，又好心痛．．．而且極度頭痛．．．眼見A仔往往都以小ME為首，我從來好少見佢咁專注去處理事件，而且係咁實在咁FIRM的態度，至少對我已經沒有了．．．但某程度上，我又感到無型的壓力．．．是什麼壓力？很多很多吧．．．很多性格上，想法上，與某某人相處上，在處理小ME事件上，對我地結婚上，對金錢上．．．多不勝數．．．我真係唔知幾時會到我倒下？

開始感到有病的感覺，唔知能否撐下去了．．．

>>February 18, 2008 at 8:58:50 AM GMT+8

2008 年 2 月 15 日 星期五 【颳風】

今日我同貓貓轉左去天后的一間動物醫院，因為元朗區的動物診所已不足以治療貓貓的病況．．．我們首先將貓貓接回A仔家，是關我今天都要返工．．．小ME它顯得很疲倦，亦完全沒有胃口，我地唯有將食物利用針筒注射入其口中！幸好，它對我地既呵護仍有所反應！

跟著，我地就搭街車，已最平坦的路段方式帶同貓貓往天后的一間動物醫院求醫．．．到達醫院後，醫生即時為貓貓診斷，醫生表示，貓貓的情況嚴重，需要即時留院進行各樣的治療！由於這裡的治療方式比起早前那間有更多的不同，例如會為貓貓進行吸蒸氣，而那些蒸氣內已存有一些藥物；另外，亦會為貓貓進行針灸，期望為貓貓暢通番鼻子及氣管嚴重淤塞的問題！故此，現時所需的費用，會比起想像中的更多更多．．．醫生表示，貓貓還需要至少留院一至兩個星期多，去治理其流感的問題！至於其大腿骨折問題，醫生表示仍需待貓貓流感問題穩定後才作進一步的檢查及進行相關的程序！

我們亦開始擔心我們是否有能力可以繼續支付及維持下去．．．但是，我們只知道，除了我們外，貓貓其實一直都沒有放棄到，所以我們更加不要放棄它．．．我們而家雖然極度需要金錢去支撐，但我們唯一的是盲目地支撐下去！

我們現在正為此事整理一個個人網頁，希望將貓貓的情況update，並希望透過網頁互相傳遞，而讓更
多人了解貓貓的情況，盡早為貓貓籌得更多的捐款！

希望早日做好個網頁啦．．．近日都好忙碌！返工果時真係完全做返工既野，本來星期一要交試用期後既自我評估，但係我都擔心自己未有時間去做．．．好多野要做同跟進呀！我指係小ME既問題．．．真係十分奔波既日子，根本冇一天係夠訓的，個腦日日都是想著同樣的東西．．．我精神好差呢．．．

>>February 16, 2008 at 4:56:01 PM GMT+8

2008 年 2 月 14 日 星期四 【乍雨乍晴】

唉．．．．而家個心好矛盾好爭扎．．．因為今日放工前收到A仔既電話，得知小ME在醫院既情況不太理想，醫生說他情況仍未有改善．．．於是乎我即使冒著要比上司話既情況下，都放棄了參加是晚既公司聚餐，一放工就係灣仔飛入元朗了．．．

去到診所，我地先去探小ME，其實，我自己在回元朗車程中已經做足心理準備了，亦都想了很多問題．．．因為我認為在這個時候不是再只說感性既時候，而係要理性一點去考慮各方面既問題同解決方法．．．而最重要的是，我希望到時要考慮時，大家可以有一個共識吧．．．於是去到A仔家，我都將自己的想法告知A仔，我知道A仔心中是明白的，可惜他當時都六神無主．．．講真，我又何嘗唔係呢？醫生表示，小ME既情況唔太理想，一來他的流感問題一直未能處理，二來因為佢年紀小，三來因為佢是街貓，可能以往營養不足，四來佢而家腳仔又有問題，最重要的是，佢一路都唔肯食野，每次都係要人梗硬比佢食，有時仲會吐番出來．．．所以他的情況每況月下．．．而醫生話小ME可以完全康復既機會十分低，仲低於1/10．．．

當時大家都好心痛，醫生要求我地好好考慮是否繼續為小ME治療！當然，如果我地說要繼續時，醫生都會照樣繼續有關治療！但最後經過大家討論後，都決定明早帶小ME出院，之後帶佢去另一間醫院再睇，希望可以買一個機會同希望．．．雖然，在運送途中可能要面對好大的RISK，但係大家都已有一定的心理準備去面對了．．．

我相信，在今日過程中，A仔或者其媽咪會覺得我既想法同佢地唔同，相反地，我亦會覺得佢地既想法太唔理性太衝動．．．因為事實在眼前，再過份執著，唔願放下，對事情，對小ME都唔係一件好事囉．．．當然，我都已經有一段長時間未見過A仔傷心得咁厲害了，仲要喊了出來．．．我果刻見佢咁傷心，我都好痛心．．．但係我知道，果一刻唔容許我好似佢地咁，一定要有一個理性點的人存在，才可以處理事情．．．或許，他們會認為我過於”冷血”，”唔夠感性”，”唔明白佢地感受”．．．我唔介意，因為我果刻只係對事，並不是要對人！仲有，我又發現了，自己的見解和性格都同他們十分唔同．．．或者應該話，佢地無論性格同想法都好相似，而我就變了好似不能夠容入他們咁．．．我覺得自己成為了弱勢一方呢！算吧，其實而家並非討論這些的合適時間．．．最重要的是，先處理好小ME的事吧！

>>February 15, 2008 at 3:47:55 PM GMT+8

2008 年 2 月 13 日 星期三 【乍雨乍晴】

今天是情人節，不過我同A仔都冇咩特別去慶祝，是關我地都近日著緊於小ME的事．．．今日我放工後就直入元朗了，因為要準時去探望小ME．．．去到診所時，見到小ME都唔郁動，叫佢又唔係好應我地咁，而且好似好累好眼訓咁．．．有時仲特意做點動作出來，好似要話我地知我地煩住佢訓咁．．．醫生話佢情況雖然不可以話十分好，不過暫時都沒有生命危險！而且經過驗血後，都未見有好嚴重的問題出現．．．果一刻大家都暫時安定了一點心情！

之後，我同A仔去了一間茶餐廳吃我地的情人節晚餐，這並不能談上什麼特別的晚餐．．．不過，過程我地都傾左好多野，有喜有悲的．．．而家對於小ME既情況，我地最大既問題係金錢既問題．．．因為頭先醫生同我地講埋小ME左後腳問題，醫生話佢必定要做手術，否則佢日後好難好像正常的貓兒行動，亦唔可以捱得好耐．．．但係手術費十分昂貴．．．坦白說，我地而家已經付了差不多五千蚊，但做手術的費用比起已付的更多呢．．．故此，我同A仔想到想將此事告知各方好友，希望佢地可以伸出援手，一起捐款下，積少成多．．．真係好希望各位協會下小ME，讓佢可以有個快樂健康既成長！呢個係我地唯一可以為佢做的事．．．

>>February 15, 2008 at 3:26:35 PM GMT+8

2008 年 2 月 12 日 星期二 【乍雨乍晴】

頭先七點半果陣去左探小咪黎，見到佢已經有點好轉，醫生說佢個體溫仍然低於正常，但血糖已經回升了少許，仲開始有點反應，會叫幾聲添．．．當時見到佢咁，我都安樂了一點！真係感謝神一直既眷顧，我會好好照料小咪成長的，真的十分感恩呀．．．

聽日A仔會請假全力照顧小咪，朝早會再打去問問情形，才會決定何時接小咪出院．．．我地都今次準備充足了，拎定針筒，同埋再整理好佢個床舖，希望可以最令佢保暖得到，仲特登去買暖水袋，可惜賣斷貨，度度都買唔到．．．好在A仔家中有其他東西可以代替！

之後我都回了屯門，感到身心都十分疲累．．．唉，本來今晚打算同A仔好好預早慶祝情人節的，點知就發生咁急既情況．．．初時都有點失望同唔開心，不過，唔通個仔都唔理咩．．．係，我地證實在佢係仔黎，得兩個月大，係醫生講我地知的．．．希望小咪會繼續好落去啦．．

>>February 13, 2008 at 3:12:57 PM GMT+8

2008 年 2 月 12 日 星期二 【乍雨乍晴】

突如其來的一個壞消息．．．今日A仔只係返朝早，於是乎我地接佢放工，之後食埋野就返元朗，諗住佢買D好味有營養既貓糧比小咪食，仲買左其他用品，希望可以幫助佢早日好番．．．點知．．．當我地返到屋企，準備整野比佢食時，叫極佢都唔應，仲訓左係度郁都唔郁，當時A仔即刻抱起佢，見佢四肢冇力，成個人軟晒咁，摸個身都同肚仔都係凍冰冰的，我極力比野佢食，佢都食唔到，只係不斷打開口呼吸，同埋好細聲咁叫左幾聲咁．．．於是乎我即刻打電話去診所問最快幾時有得睇急診！當時，我只識喊，不過都提醒A仔帶什麼帶什麼去．．．我就即刻用布包裹住小咪，希望用我既身體比多點溫暖佢！我地即刻搭的士出去診所．．．

去到診所，我都只識得喊．．．醫生即刻同佢檢查，醫生話佢體溫同血糖過低，低到根本量度唔到！我果刻個心好UP，有十級！只係不斷流淚．．．醫生話佢要即時留院醫治，而且最關鍵就係呢24小時，因為仲未CHK到小咪係因為餓得太勁而令佢而家半昏迷狀態，還是係肺炎問題．．．於是而家小咪要留院，吊鹽水打針食藥仲要照X-RAY．．．我個心好痛好UP，完全唔知點好，好十五十六的感覺！

我好爭扎，心想，我近日不斷為小咪代禱，為何天父神要這樣對佢，要佢受這樣的苦？佢只係一個BB！我一直都‘好感恩天父神呢幾日來都比左好多恩典小咪，讓佢活潑跳崩崩的，只係近兩日唔肯食醫生開既食物，佢先至冇食野整整一日有多．．．於是我地今日先去再買其他食物返來比佢食．．．點知．．．唉！我有點自責！是否我愛佢唔夠？我在回元朗車程中曾同A仔提過我地是否有能力照顧它？因為我地個個都要返工，好難全心全意去照顧一個病的小朋友！當然，我不是不負責任，而係我一直都好擔心呢一個問題，我只想找個解決問題的方法！點知．．．是否我衰多口？

我而家個心又痛又UP，又未知佢情況如何！姑娘話我地七點至八點可以去探佢，因為係探病時間！我好希望到時會有好消息出現．．．

而之後既情況待續．．．而家唯一可以做的，就係不時為小咪代禱．．．

無所不能既上帝，我既天父，而家小咪危急存亡之中，希望天父神你可以給予小咪力量，勇氣，信心，堅毅既心，協助佢戰勝難關同病魔．．．又希望神你可以眷顧同保守小咪，希望讓佢得到神你既恩典，可以渡過難關！天父神呀，希望你向小咪施予你既大愛，同時亦將我地對佢既愛傳訊於佢身上，好讓佢更能感到有無限既溫暖，支持同鼓勵！而家呢二十多個小時，係小咪生命最關鍵既時刻！好希望神真係可以繼續眷顧著小咪，讓佢可以感受到人間既溫暖，可以健康快樂地成長．．．我以上卑微既祈求，係靠主耶穌基督既聖命而祈求，誠心所願．．．

>>February 13, 2008 at 9:57:24 AM GMT+8

2008 年 2 月 11 日 星期一 【乍雨乍晴】

A仔頭先同我講小咪情況幾好，佢阿媽返到屋企都見佢仲係個盒仔度，相信佢都冇曳曳走過出來吧！呵．．．不過，聽A仔講佢始終唔食醫生開比佢既食物．．．鬼咩，我睇過D成份黎，係D咩雞肝豬肝魚油．．．貓又點會食呢？唉，真令人擔心！聽日睇黎要買D好野比佢食先至得．．．聽日約左A仔出去買貓沙同用品比小咪，希望佢早日康復，要時時為佢代禱先得呀！！！今晚好凍呀，希望佢好好保溫啦．．．

>>February 13, 2008 at 10:08:49 AM GMT+8

2008 年 2 月 11 日 星期一 【乍雨乍晴】

嘩嘩．．．今日超級凍呀！唔好話咩，小咪真係好幸運，如果我地琴日冇救走佢，佢分分鐘而家已經凍死左了．．．出面只得幾度，佢點捱呢？

今朝小咪一朝早同爹地一齊起身，於是乎我地都比野佢食，仲有先比藥藥佢食先，希望佢早日可以好番！跟住過程中小咪十分頑皮，成日都係個盒度跳出來，仲更加想跳上我張床度，真過份！罵又罵過，打又打過，都是同樣曳曳．．．激死我了！後來，我決定唔再理佢，要佢習慣一個人既生活！點知，佢真係有點自討沒趣咁，自己跳回盒子裡睡．．．唉，終於可以訓下了．．．訓到十一點起身，佢又叫叫叫了．．．唉．．．佢十分纏身呀，我行到邊佢跟到邊，我走開半步佢都呱呱叫了．．．氣死我！又曳曳，跳來跳去．．．XYZ@$$^@)^@!(_!．．．

好經辛苦再讓佢入回盒子裡睡，我爹地媽咪，即係小咪既公公婆婆入了元朗探望佢！佢一點都不驚慌，仲即時走去佢地身邊THER佢地添！好好笑．．．我地幫佢滴眼水，餵佢食野，幫佢抹身抹眼抹腳．．．我地仲見證佢懂得係貓沙上屙屎屎添．．．好感動呀！回想起九年前，我家的貓貓，波波，都是由我教懂佢在貓沙上屙屎屎的．．．哈，很是回味的感覺！而家見到小咪，就回想起波波小兒時初到我家既情境．．．當然，波波情況比起小咪好好多吧！至少沒有什麼嚴重的病痛！小咪在處理好貓瘟後，仲要照X-RAY去睇下左腳既問題．．．仲有大把苦要捱吧！

跟住，又係好經辛苦安穩左小咪入盒訓，因為佢太活躍了，成日跳來跳去，仲大膽到係地下跳上我小腿，用抓抓著我條褲爬上我大比囉．．．激死！最後，同佢安頓好我地就離開！一路離開，一路都擔心小咪佢一個人會點！不過，我一路比緊信心佢，我知佢係可以OVERCOME的！而且我一路都有為小咪代禱，我相信神係一定會眷顧保守住佢的，我相信神必定行使其大能同將恩典降落到小咪身上的．．．

回到自己屋企，即時沖洗乾淨，因為怕貓瘟會影響到波波．．．唔知波波是否感覺有異，今日樣子總係唔多開心似的．．．當然，我想話比波波知，我係唔會唔理佢架，我仍然愛它的．．．我絕對不會偏袒任何一個，邊個乖我錫，邊個曳我就唔錫．．．不過，其實到左而家呢一刻，我都仲好似唔係好習慣到家中多左一個新成員！而且，總係好擔心小咪既將來會如何？例如A仔家中狗狗能否接受小咪？我地又能否有能力照顧到小咪？小咪既身體健康又會如何下去？好多好多問題出現．．．好怕最後會有HARD FEELING出現！

>>February 13, 2008 at 10:08:25 AM GMT+8

2008 年 2 月 10 日 星期日 【乍雨乍晴】

今日我相信係我咁大個女以來，最深刻既一日．．．點解？因為我做左人媽咪囉！哈．．．唔好誤會，其實話說早前我同A仔係街遇到一隻流浪貓貓，今朝我再次去帶同食物同水去餵佢，我就一嘔餵佢一路陪佢食野，睇住佢食到咁上下，我發現佢隻左眼既問題開始嚴重左，於是我嘗試同濕紙巾幫佢去抹，點知都係唔多得，之後，貓貓突然間走出佢從來都唔敢走出既範圍，係咁向我方向走過來，仲係我腳邊轉來轉去，用好可憐既眼神望住我，仲係咁大叫，好似好想我帶佢返屋企咁．．．好可惜，果一刻我真係冇能力同可能帶佢走，我曾經打過比A仔，不過未能接通，於是我打番屋企搵爹地，爹地叫我轉移貓貓視線離開！其實，我果刻好心痛同心UP，因為我覺得自己好似好冷血咁，睇住貓貓B係度捱更抵餓，天氣又凍．．．我果刻真係喊左出黎，不斷流眼淚，冇停過！D途人見到都冇咩反應！唉．．．好經辛苦走左返屋企，再將整件事話比爹地媽咪知，我果時情緒都仲好差，好自責．．．之後，A仔終於\同我聯絡上，佢得知事情十分唔開心，而且亦都好頭痛．．．最後，我地都係決定今晚要去接貓貓走，帶佢去睇醫生，之後帶佢返屋企．．．

我於是乎就帶定一點貓既用品同埋有來接貓貓走既東西，去到貓貓既穴口時，我只係叫左兩聲，佢就可能認得我把聲，同埋我有貓味，於是好快走左出來，我亦好輕易咁捉住左佢！我用毛巾包住佢，怕佢凍親，好快手帶佢上左A仔屋企！我地即時為貓貓製造一個臨時睡房，其實只係一個紙皮盒！跟住即時為貓貓送上食物同水，佢好好胃口呀，食左好多．．．其實都見佢咁有胃口即時都不太擔心．．．跟住就帶佢去睇醫生了．．．貓貓在家等待時都見佢幾活潑，跳崩崩的，哈！其實我地都未了解佢是男或是女，最後都決定幫佢改一個名叫做，小咪！希望佢喜歡啦．．．

帶佢去睇醫生時，可能佢太累了，在診所等待時都睡著左，不過見佢都仲好有介心咁睡．．．醫生話佢有貓瘟，即係貓既流感，再加上佢左後腳既大比斷了．．．醫生建議先行處理貓瘟問題，佢能否好番就要是乎佢個人既抵抗能力，而且都要在這三四天內好好觀察住佢既情況！如果真係”打不勝仗”，貓貓會隨時離開人世！頓時大家都好擔心，不過，大家好快就積極起來，決定細心照顧它下去．．．

睇完醫生，我地大人就去食飯，在食飯過程中，小咪終於放開懷抱，甜甜的睡了一個短覺．．．都好既，起碼都累了大半天，而且近日相信都沒有好日子過過了．．．希望佢好好的睡一覺吧！回到家，就係佢受苦的時候！先同佢食藥，相信一定是好苦的，因為見佢吃完都不開心苦苦的樣子，是其爹地，即是A仔負責餵佢的；跟住，因為醫生要小咪聞蒸汽，是關小咪上呼吸道唔太順暢，要吸吸氣才可以好一點．．．於是乎，先是將小咪帶到浴室，先陪爹地沖涼，再陪媽媽，我，沖涼．．．哈！

小咪佢成日都BB叫，我知道佢對環境十分陌生，而且有點在吸引人注意，佢基本同一個人既小朋友沒有分別，十分可愛！不過，到了晚上，它的頑皮本性開始出現，它不斷在自己的睡床裡跳出來，其實都有一定的高度，大約有一呎高的，但它的彈跳力真是．．．勁！好經辛苦，我才可以安穩到佢唔再跳出來，靜靜的睡．．．不過每當佢聽到一點點的聲音時，佢又會在大叫．．．其實，某程度上都幾煩下．．．不過，我是理解的！

今天真係一個好深刻既一天．．．當然，呢一刻我地有這個決定去照顧它，我地都會盡力去做，希望可以讓小咪健康快樂地成長．．．在此，我為小咪代禱，希望天父神可以眷顧同保守小咪，給予佢堅強同信心，抵抗疾病，讓佢可以在健康快樂下成長！亦希望天父神給予我地能量同信心意志，協助小咪對抗病魔！阿們．．．

>>February 12, 2008 at 1:17:36 PM GMT+8

2008 年 2 月 9 日 星期六 【乍雨乍晴】

今日雖然朝早好凍，不過下午都暖左唔少．．．我地今日十二點先至起身，之後朋友因有事出街，於是我地都離開了．．．我地回左我屋企，我就o拿o拿聲沖涼啦，之後同左屋企人出去飲茶．．．今餐A仔請呀，因為本來今晚佢話黎食飯，不過因為約左朋友，所以請飲茶補數啦．．．A仔仲送左份情人節禮物比妹妹添，哈！不過我冇份喎！因為佢話我唔係佢情人咁話喎，哈！

飲完茶都已經三點幾了，見時間太晏了，於是決定放朋友飛機唔出去了．．．我地就好急腳返元朗，去左百佳買左D一包貓餅，諗住拎去比貓貓食．．．去到之後我地搵左佢一陣，好在佢都仲係度，不過，我見佢情況唔太好，我見到佢左眼既皮膚開始潰爛，仲不斷流濃，好可憐！佢個身體不斷震，有後後腳行動又不便，而且佢好驚人，一見人行過就向後走，好怕人捉佢咁．．．我地都好經辛苦先可以令佢唔驚我地，仲有食我地比佢既貓餅．．．我地特登買左D比幼貓食既糧比佢，希望佢可以吸收更多營養．．．不過，成個過程中佢都係除左食野果陣，都係不斷係度叫，好慘咁叫，好似想話我知佢而家好凍好驚好痛咁．．．我見佢身上皮膚好似有點問題咁，相信係皮膚病，尤其見到佢左眼，我真係好心UP，見到佢好可憐，果刻有點想流淚．．．曾經想過帶佢返屋企或者帶佢去一個比較合適既地方，不過後來想過，認為既然佢而家都找到一個合適地方，而且佢都開始熟悉呢度既環境，帶佢走同死又有咩分別？而且帶佢去一D多貓既地方，只會令佢比人欺負！唉．．．好心UP！當我地心UP既同時，附近一間食店既老闆娘行過，佢話佢都係見到貓貓兩日，從來都未見過佢，呢兩日佢都有比野佢食過，而且佢話呢頭有好多野貓，佢都收養了好幾隻了．．．我地果刻都有丁點安慰，因為起碼知道貓貓都仲有一點的希望，至少有呢個好心既老闆娘會留意過佢！

我地而家決定，每日都會帶食物同水落去比佢，輪到去，邊個方便得閒就會去，年終冇休．．．希望佢可以生存到幾多就幾多．．．當然，曾經我地有刻想帶佢去睇醫生，但係真係好怕醫唔好佢，而醫好左又可以點做？因為真係要我地地方或者環境容許先至可以養到佢．．．唉，好無奈呀！！

>>February 10, 2008 at 10:46:01 AM GMT+8