2008 年 5 月 6 日 星期二 【晴】

今日照常返工，但係總係覺日子難過的，唔知點解！其實，係觀塘已經好過係土記了，因為始終觀塘既電話密同多好多，所以時間都唔會話太多空閒．．．只係自己唔太喜歡一時有一時冇野做既情況！我係一d好衝既人，有野做我係好想即時好快做好佢，只不過，呢度就唔係了．．．電話，唔知幾時有？個案，唔係時時有！算吧，公司精神就係．．．有野就做，冇野唔好叫我做！

今日冇帶飯，因為今晚會入元朗，所以費是帶了！今日食左個快餐，係椒鹽朱扒飯！嘩，完全係破盛，因為除左辣之外，仲有白菜食，仲唔死？到左五點，又破戒，食左個芒果布甸．．．唉！死梗！

放工入元朗，跟住約左對朋友食飯，因為佢地結婚，要搵我同A仔幫手做司儀！司儀呢樣野真係唔會難到我地既，做社工平日都好似做司儀咁架啦，哈！我地去左一間意大利餐廳食，D野都幾好食，係要等得耐點．．．我地傾左好多野，好似大家都傾到唔捨得走咁．．．最後傾到成十一點呀！返到屋企，快手沖涼，聽日仲要早起呢．．．有點乏力感！

>>May 10, 2008 at 4:15:35 PM GMT+8

2008 年 5 月 5 日 星期一 【晴】

今日既天氣比先幾日好似好左d，起碼冇落雨丫，不過都涼左少少咁．．．朝早起身時都著左件長袖衫先返工！今日係觀塘，感覺都好唔習慣咁，可能太耐冇返去了，差點什麼都好似好生疏咁，無論人和事都係．．．

食午餐，我帶左個飯壺返去，真係自從我離開左中學之後，都已經冇再接觸過飯壺呢樣野，估唔到而家會拎番起佢囉！點知出事，個蓋開唔到，最後攪左好長時間，要兩個大隻佬先開到囉．．．食左半粒鐘就要趕出去灣仔做野喇，點知出到去．．．頂！原來先知道係一件無聊事，只係個工友誇大左．．．頂！算啦，都係要開個案去跟架喇，橫掂呢兩個月真係開唔到個案．．．

放工，先去左覆診，出奇地今次去到只有一個人等，所以好快手攪掂，跟住就趕住去做facail了，做完已經係十點幾了，好累好累．．．．又係一晚唔夠訓既一日，好可憐！

>>May 7, 2008 at 3:04:08 PM GMT+8

2008 年 5 月 4 日 星期日 【微雨】

今日返工十分之累，感覺好似幾日冇訓咁，好辛苦！可能感冒吧！朝早電話不是太多，主要都係做一些文件工作！

今日見左部門上司，佢續個同事照肺，傾佢地既事．．．我都開心見誠講左佢知我年尾會結婚！佢都好為我高興！大家都傾了一小段時間！

放工，本來想今日去覆診，不過因為太累了，都係回家，明天才去！上到車累到要死的，訓到下車！回到家繼續訓了一會才吃飯！

明天開始要返觀塘了．．．決定繼續帶飯返去，只係用飯壺咁．．．一來真係想慳錢，二來真係因為戒口問題，出去都冇咩可以食．．．算吧，比同事話唔合群都冇計了！

>>May 5, 2008 at 3:49:54 PM GMT+8

2008 年 5 月 3 日 星期六 【晴】

WOW~ 今日好熱呀，好似有成三十度囉，傻架！好似去左夏天咁呀！！

今日返教會，今日係勞工主日，講左一個關於勞工問題既講題．．．完全合我心水同”河車”呀！好有共鳴呢．．．而家我會同自己講，我會更投入我份工作，因為我要將神既公義彰顯出來！努力呀！好感恩呢！突然覺得自己好有用處，呵！好似感受到自己不時被神所使用當中，幫他彰顯其愛同公義．．．好感動！

之後完左，同左屋企人去食野，我地去左食印尼野，好 good~　因為好耐冇食過了！戒口戒了很長時間吧！跟住，陪左妹妹行，咁就陪佢行左好耐．．跟住四點同爹地媽咪分開，妹妹同左我去覆診，醫師話我感冒未好晒，所以要繼續食感冒藥．．．講真，今次既藥真係超難食囉！唉！睇完都已經七點了，頂！回到家，十萬個累囉！快手食個飯，就休息下！

後來，同A仔傾左陣電話，分享一點一路以來好想同佢分享既事！因為眼見佢近日工作十分忙，真係冇時間返教會了，真係有點擔心！一來擔心因此動搖了他信主的心；二來怕他繼續下去牧師會因為他小出現而認為他不合適洗禮；三來又怕他到時沒時間參加慕道班．．．真係令人擔心！但係沒辦法，冇理由放棄工作吧！當然，我地亦相信，神亦是在使用他當中，希望他為神行使公義及愛．．．希望記住，我地不是SUNDAY CHRISTIAN．．．同佢傾完個心好舒服，亦都好感恩神可以給予呢個機會協助A仔有所反思！

>>May 5, 2008 at 3:45:13 PM GMT+8

2008 年 5 月 2 日 星期五 【綿綿細雨】

哈，最後今日冇返到工，是關今朝起身時超累呀，琴晚成兩三點都未訓到覺，一朝早六點幾又比晨運友嘈醒，所以．．．最後都係射左波，哈！

呢個CAMPSITE都幾好，話晒對於屯門人黎講係一個新景點呀！我都好喜歡呢度．．．訓醒我地就煮早餐吃，之後我就去左新屯中覆診，好笑地，醫篩話我無啦啦感冒，今日先比兩服藥我醫感冒，聽日先至再去覆診關於氣喘，好奇怪！有時我都覺D中醫好勁，有D我地唔知既野佢把一把脈就知，勁！所以，我覺呢個中醫都幾厲害下．．．但係，A仔就話佢係呃錢囉．．．我唔知呀，雖然而家氣喘好似冇特別大既好轉，不過，我知中醫係冇咁快既，我始終想比多兩個月去觀察下先．．．

跟住我就再返去JOIN佢地，我地落左沙灘玩，玩橡皮艇，哈，好好玩．．．之後走人了！今晚決定食完飯去A仔度，想多點時間同佢一齊呀！近日發覺少了見佢，所以每次都好珍惜！而家成日大家都好忙，真係難攪！

>>May 3, 2008 at 11:06:16 AM GMT+8

2008 年 5 月 1 日 星期四 【乍寒還暖】

今日天氣好差，落大雨呀！今朝得我一個人係中心，都咪話唔悶．．．後來，我上司返唔切黎，午飯時間我都係叫個護衛睇住個檔口，我再去叮飯，之後係counter度食咋，幾咁可憐！直至到兩點先至有人返黎．．．

到左四點幾，出左去迎聖火既同事終於返黎，我都好羨慕，佢地又唔洗返中心，之但係十點幾先係沙田集合，而且又可以hea埋食埋個靚飯先返中心，真係好唔抵得呀！我就係度聽左成日電話，哼！

放工後，約左A仔去金都，因為要去睇下婚禮攝影既野．．．最後攪左四十五分鐘，就搵左一間了，呢間係我有個朋友之前介紹過我的，不過我當時冇選擇到，不過行過見到又睇左一睇，又見佢既相都幾好，而且價錢又合理，加上佢地服務好好，感覺唔錯，大家都好好傾，所以最後決定左了．．．真係好，終於又攪掂左一樣野．．．A仔成日叫我唔好咁緊張，有時鬆容面對好多野都可以迎刃而解．．．我終於感覺到了．．．要好好面對問題呀！

跟住今晚會落蝴蝶灣，因為得知果度整左個露營區，所以同朋友打算去試試．．．唔知點架呢？聽朝仲要返工，感覺好差．．．

>>May 3, 2008 at 10:59:31 AM GMT+8

2008 年 4 月 30 日 星期三 【陰】

今日係勞動節，大部分香港人係呢一日都係唔需要勞動，仲有假放添．．．之但係．．．我今日就要返工去勞動！今日機構攪左一年一度既五．一遊行，晨早八點九就出到去遮打花園了，真係返工都冇喧早！我仲記錯左今日有快車962P搭添，點知去到車站先記起今日公假係冇的，頂！去到已經差唔多九點，好在冇人話我！去到梗係快手幫手去準備同整物資啦！最後，攪到十一點九先至出發遊行．．．真係有點疲於奔命的感覺！

遊行過程唔錯，我都幾喜歡遊行的過程，尤其係自己身在其中，感受好深！一路行，一路渣旗，一邊叫口號．．．而且所爭取的，都係自己切身，亦係而家香港人所切身的問題！所以十分深感受！尤其近日”一百萬人的故事”效應．．．

攪掂晒後，執好野，同左同事去附近既”翠亨村”飲茶！當然，有大老細請啦，呢類咁高檔既地方，完全都唔會去！一碟叉燒腸要四十幾蚊，一碟普通既咸魚雞粒炒飯要成九十蚊囉．．．好貴！不過，同事們一點都唔會幫老細慳荷包，係咁叫係咁食．．．我就真係做唔出喇！後來飲完後，約左妹妹去市中心陪佢去買野，於是我都去左市中心！同妹妹行左陣，都冇收獲，妹妹就有了！可能近日行得多街，都冇咩心機行了，好似睇黎睇去都係差唔多既野！跟住就餓，坐低同妹妹嘆左個TEA，係果間叫RISO/RISA? 唔記得了．．．係EURO GO GO隔離果間呀！今次係第一次去食．．．都OK既，不過我覺唔多抵囉．．．食完就返家了！

返到去十分累，所以訓左兩粒鐘先起身食飯．．．食完後同左朋友傾關於佢今日幫我去金都問婚禮攝影既事宜．．．呢個朋友真係唔話得架，放假都幫我做野．．．真係錫晒佢！不過，希望佢女友唔好呷醋！哈！發覺好趕呀，好多間都話FULL BOOKING了，開始令我擔心！如果再拖就麻煩！

初時想打比A仔，但係佢今日去左大陸又未返．．．好經辛苦同左佢傾，之後大家仲為呢件事嘈黎．．．唉！有時都好心痛，都唔知想點？好頭痛呀！好煩．．．佢又叫我唔好太緊張，攪到自己情緒唔好！係架，我承近日心情真係唔多好，因為有好多野煩！眼見佢又幫唔到手，我真係好大壓力！一個人去處理面對咁多野都幾辛苦下．．．但係，我又唔能夠咩都唔做，我真係做唔出咁優閒呀！

>>May 2, 2008 at 2:56:21 AM GMT+8

2008 年 4 月 29 日 星期二 【晴】

今日因為要上庭，要去MECAB，即係小額薪酬索償仲裁處度做野，可以十點幾先去，所以索性唔返中心，係屋企出發，可以晏成粒鐘起身，正！不過，真係好彩係咁咋，因為琴晚無啦啦又喘氣了，真係唔知咩原因喇，喘左兩次，起左身三次，到今朝七點幾又比屋企人嘈醒左，所以今日好眼訓呀！雖然出門口前條氣都唔多順，不過好彩後來出到去就好番點．．．

出到去十點三，點知個工友未到，又打極都打唔到比佢，最後，要十點九我先至MEET到佢！中間果半粒鐘我就去左西九龍行左陣，因為太早了，實在冇野好睇．．．終於完左個個案，不過呢個工友真係令我每次都十分激氣的，今次當然不例外啦，哈！不過最終都有完滿結束，雖然係和解，仲要少左一半錢，不過總好過冇丫！

之後就返中心，食埋琴日帶左返去而冇得食個飯盒．．．食完好滿足！之後又得番我一個人係中心睇COUNTER了，因為同事要去準備明天遊行既野呢！我好衰呀，因為朋友布LUM同我講幫唔到我搵攝影師呀，所以我都趕忙上網搵資料，再SEND去問津．．．但係已經有三間回覆我已被人BOOK了．．．真係令人擔心呀！好驚最後什麼都沒有呀！好在朋友都好好，話聽日幫我去太子果頭問問喎．．．真係多謝佢幫助呀！

放工後，約左A仔，我地今日又買左樣露營用品，就係一個二人營了．．．一個原價千幾蚊的營，我地只係用八百蚊買到了，真係好呀！識人多真係好！跟住我地行去廟街食煲仔飯，哈，好飽呀！食完行番去旺角，再去幫A仔買中心既物資，跟住返屋企了．．．

今日好累，本來心情都幾好，不過又因為擔心搵唔到攝影師，同埋回家途中同A仔有少少誤會，令到心情唔多好．．．加上，聽日又要返工，八點幾要出到去中環了，頂！比平日仲要早，又要遊行，仲要放假日子做野．．．超唔開心呀！！！！討厭！！！！

>>April 30, 2008 at 4:02:29 PM GMT+8

2008 年 4 月 28 日 星期一 【晴】

今朝都係陰陰天，到左下午終於有太陽！心情都好了點！今朝真係氣死，差唔多返到土瓜灣，就被上司叫我返觀塘，話果度因為一個同事自行調更，攪到人手亂晒龍，要我返去觀塘幫手．．．其實都明白，不過就攪到我好趕囉，頂！好討厭果D咁既同事，尤其係呢個不負責任既同事，佢成日都係自把自為的，好討厭！

去到觀塘，朝早得我一條友，後來十一點幾個同事返左黎，之後同佢去左觀塘工業區內既餐廳食，都好大碟喎，幾抵咁啦！食完我地去左買文具，之後返去了！其實同呢個同事一向都冇咩兩句，是關呢個人全世界同事都唔鍾意佢的，當然包括我地內．．．因為呢個人無論做事或態度方面都有問題的！不過，我自己作為一個註冊社工，而且仲要係基督徒，我知道我對任何都要包容的，更加的是，呢個人我好清楚佢曾經係我上司前”篤我背脊”，仲係要老屈果隻，有時候要對住一個咁樣既人，真係幾辛苦同痛苦既事．．．但係．．．真係無奈！往往我就係同佢係同事，要互相合作！唔通真係神安排要我同佢好好溝通同相處吧？

>>April 29, 2008 at 11:55:08 AM GMT+8

2008 年 4 月 27 日 星期日 【陰】

頂！琴晚半夜三點三，唔知邊條PK打電話去A仔度，嘈醒左我地．．．初時，我仲擔心唔知係咪A仔家姐有事添呀，聽電話又冇人聽，唔知係乜水了，真係衰．．．嘈醒左我後都唔係好訓得番了，討厭！

今日都朝早返中心，跟住十點幾出左去上庭了．．．件案好快攪掂，SETTLE左，真係好！之後，同左個同事去食日本野，因為今日原本公司有茶飲架，因為5．1關係嘛．．．係架，我公司大時大節就會有餐食，好正架！咁如果同事出左去做野食唔到果餐呢，就可以有UPPER LIMIT $60去食番餐，只要有單就可以CLAIM，幾好！食完後，我偷左少少時間去左中華書局行，因為今期我公司六十周年，有會員卡係中華書局買書可以有折．．．最後買左本書，”在天堂上遇到的五個人”．．．之前已經想買，不過見而家有折更加會買！GOOD~

放工後，約左MTO既同事去熊貓酒店間裕滿人家度食，都唔錯丫！當然最正既係同朋友相聚既時間同機會啦！朋友都好積極去傾我結婚既事，因為佢地會幫手做姊妹！其實，有佢地呢班朋友，真係我既福份！佢地個個都好好，幫我好多！仲有個姊妹唔收錢幫我化妝添．．．實在好幸福呀我！要錫晒佢地呢．．．

>>April 29, 2008 at 11:42:50 AM GMT+8