2008 年 6 月 7 日 星期六 【微雨】

嘩，今日好眼訓呀．．．一上車就係咁訓了．．．今朝都差點遲到呢，好在我趕得切，哈！完左教會，A仔就趕住走人了，因為佢要趕返工．．．原本佢拎左兩個鐘CL既，不過見時間尚早，試下可唔可以早到一個鐘返去，可以慳番一個鐘既CL．．．咁爹地就準備係教會開堂董會，我同媽媽唯有自己出去行陣街，跟住去左食池記．．．都咪話，好似覺得銅鑼灣呢間貴過旺角果間咁既？！唔知喇．．．不過．．．係媽媽請的，算吧，呵！

食完再行左陣SOGO，好似好耐冇行過．．．行左GUCCI同PRADA．．．呀，好想買袋呀！不過始終覺得呢類名牌子既手袋都比較女人D，我都喜歡CAUSAL點的呢，哈！我都唔係好貪心的人，我都冇諗過要自己擁有什麼幾多錢一個既名牌手袋既．．．因為，最緊要係要知足呀，只要懂得跟隨父既國度同義，天父一定會讓我地得到豐足，佢必會給予我地所需要的．．．有時候，人好容易會敬拜兩個既神，一個係真正天父，一個係財寶既神．．．我地往往卻忘記左我地所要既，神一定會為我地安排合適的，我地係唔需要過份去追求．．．

之後，同媽媽趕住返屋企，因為今晚二舅母二舅舅會入黎食飯做節．．．表哥今日又唔入黎，攪到我幾悶．．．一個後生既對住幾個老的，哈！唯有陪媽媽同二舅母打麻雀啦．．．打完去食飯，食左隻好正既乞衣雞．．．好重料呀！好味．．．

呢排真係好HEAVY，食左好多好多野．．．星期四晚就同左同事出去食飯食大餐，星期六又去左飲，今晚又食．．．嘩，變左大肥婆，都咪話，自己都感覺到好爆既感覺．．．好驚呀！本來頭先A仔打黎，話今晚去個朋友度睇波同玩，不過我今晚飲左紅酒呀，係媽媽去澳門時買的葡萄牙酒，嘩，好貴架，不過真係好易入口，所以飲左好多．．．返到屋企就知死，開始醉了，哈！所以．．．都係留係屋企度訓，唔去朋友度．．．聽日先再約佢地出去玩玩啦．．．

>>June 11, 2008 at 2:37:54 AM GMT+8

2008 年 6 月 6 日 星期五 【颱風】

今朝黑雨，原本唔洗返工的，不過，我做左一件低能事．．．呵！朝早七點起身後都冇再訓番了，而家反而感覺好辛苦眼訓．．．

好在後來個黑雨十一點先落，可以唔洗返工，咁就放多一日假了，真係幸福到暈低．．．跟住等爹地返屋企（因為佢今朝出左門口返工，唔知係黑雨．．．），就同埋媽媽既朋友出去飲茶，之後，我就拎埋D比A仔既糉入元朗比佢．．．D"傻"係爹地專誠買比A仔食架，佢千叮萬屬我一定要拎比佢食．．．唉，爹地而家有未來女婿得架喇，哼！不過，當然我都好開心佢地咁好啦，哈！

今晚要出去飲，今朝黑雨，戥個朋友慘，都唔知點出閣．．．好論盡囉！我同A仔6點就出到去尖咀間香格里拉準備喇，其實我地5點幾時已經出到尖咀，食左BURGERKING，行左陣就行過去了．．．咁早去係因為要幫手今晚做司儀．．．初時都好緊張同擔心，因為真係從來冇同A仔夾過做司儀架，哈，不過唔夾過，大家都唔知對方既工作STYLE係點．．．我呢，就認真到爆，樣樣要準備十足既．．．佢呢，就好喜歡爆肚，唔係太理後果．．．但係，我始終清楚知道呢個係人地既婚禮，唔可以失禮同失場的．．．哈！當然，最後十分順利可以完成，我地都合作成功了，好開心呢．．．YEAH~ 合作無間吧~

今晚果餐．．．我覺麻麻地，D送好似普通左少少，比我預期係香格里拉的送而有點失望．．．不過，當然最重要係戥朋友高興啦，食方面都唔係要太高要求！最後走果陣比我地發現左，原來溏心風暴2係我地樓上拍緊劇，我地見到好多明星，例如．．．真人好靚仔既林峰，正；比上集瘦左又高大既陳豪；瘦左好多好SLIM好高既鍾嘉欣；年紀有番咁上下，但係仍然名艷照人既米雪；我從來都唔喜歡既陳法拉．．．都幾攪笑，一次過見到咁多明星，哈！

嘩嘩，好累好眼訓．．．返到屋企十二點幾了．．．明天仲要一早起身返教會呢．．．

>>June 11, 2008 at 2:19:59 AM GMT+8

2008 年 6 月 5 日 星期四 【乍寒還暖】

今日好慘，朝早起身時個頭超痛，而且仲感覺到有點發熱咁，唉．．．病了！

於是乎繼續訓，訓到十一點幾同A仔一齊起身．．．後來，因為A仔有野做要出去佢家姐度，所以我就一個人返屋企了．．．返到去，係屋企係咁休息，個人好累呀！等到五點幾六點，先至出去睇醫生．．．醫生話我感冒呢．．．梗係啦，屋企媽媽又病，公司又有兩個同事病，我唔中招都係奇蹟吧！食左藥，好累，好眼訓呢．．．

明天又要早起身，返土瓜灣呀．．．又要周車勞頓了，唉！

>>June 11, 2008 at 1:52:02 AM GMT+8

2008 年 6 月 4 日 星期三 【綿綿細雨】

今朝一直心緒不寧咁，自從睇左A仔SEND比我既EMAIL後，就係咁樣了．．．心情好差，直至食午飯前同佢傾左大約三十分鐘電話後．．．心情走到谷底，因為．．．心中淡到不得已！好無奈，好想喊，但係，總要公私分明！唔想心情影響工作！．．．爭扎！

奇怪的是，明明十分猶豫神既旨意是什麼，即使多番祈禱亦得不到答案．．．直至剛才的電話，或許已經神比了答案我了．．．我是否要依著而行呢？或是，只是一個考驗？我唔知道．．．或許我真的好愚笨，神點極我都唔明．．．又或許，我是一個過份堅持的人，未到最終知道結果，我都唔會輕易放棄！．．．可惜，我現在理應好爭扎，但係，我卻出奇地可以表現平靜及有了心理準備．．．究竟，是否一個啟示？真係唔識得去形容！

究竟結果如何？我都在等待當中，等待神的啟示，等待對方的回答，而我？只有無奈下去．．．

>>June 5, 2008 at 6:23:50 AM GMT+8

2008 年 6 月 3 日 星期二 【乍寒還暖】

今日係六．四事件十九周年，在此向各位在此事件犧牲的人士致敬．．．

近來心情真係極度差，唔多唔少因為之前book唔到教堂既後遺症所致．．．A仔又一樣，無論態度脾氣都差都十足，我唔知我應該如何做先至好？！真係好矛盾好無奈．．．好想平平靜靜咁去處理事件，但偏偏對方又要用偏激的態度同語氣去面對同處理．．．究竟，我可以點？我開始好深入咁去反思，究竟神既旨意是什麼．．．我開始好驚，好驚個事實會係一個我不能接受的事實；又好驚我將要面對一個好巨大既改變．．．總知好大壓力，好似每對人說話，每做任何事，都總係要小心翼翼的，好擔心會令人唔開心，好擔心會令人起誤會，好擔心唔好後果會一手由自己造成．．．

壓力感越來越大，亦更加想更多更多野．．．越諗越複雜，越來越唔知神既旨意係咩野？開始對神存有懷疑，亦都唔敢再相信神．．．但係，又好明白所有野都係才自神，佢必定會有安排比我．．．只係，這個是否我喜歡的安排？好困擾．．．可以如何是好？想平靜面對，往往又被人拖垮下去．．．好爭扎！

>>June 5, 2008 at 6:17:44 AM GMT+8

2008 年 6 月 2 日 星期一 【颱風】

今日心情都麻麻，是關之前知道A仔嬲了我，心中都不好受了．．．自己已經心情不好，仲要去好好處理之間的問題．．．真係有點乏力感吧！早上同A仔傾完一個電話後，實質感覺很差，心情亦都跌進谷底吧．．．冇心情同人講野同做野．．．好無奈的感覺．．．不過，我很清楚在發生什麼事情．．．我知道要好好處理，亦知道自己的心情是必須要平靜的吧！

放工後，回到家，感到很累，好像想作病似的，感到身體好熱，但係又唔知有冇發熱，只知道心中有好多困擾．．．不過，過後收到A仔的電話，好像感到佢既聲音有點軟化，亦都同我商量好唔好領養一隻小貓貓．．．其實領養係好事，不過有好多外在同內在因素要處理及準備吧．．．真係要好好計劃！

再過一會再與他傾談，大家再分析過此事．．．初步大家都知道是什麼問題吧．．．希望真係透過今次彼此再更了解對方，更懂得如何與對方相處吧！

>>June 3, 2008 at 3:24:12 PM GMT+8

2008 年 6 月 1 日 星期日 【乍寒還暖】

唉~ 今日既心情仍然係麻麻地．．．琴晚曾經不斷在祈禱，想知道神究竟係唔喜悅我地係27/12結婚？還是係唔喜悅我地結婚呢？真係好唔開心同困擾住我．．．不過，都係時候要重新振作同面對問題了．．．不過，我知道A仔佢嬲左我，佢覺得我為什麼唔出聲將自己既想法講出．．．其實，我只係想再想多少少，平靜心情，計劃好了才出聲吧！希望佢明白．．．當然，當中我仍然有好多的懷疑同疑問的．．．唉，好想神可以比點啟示我地吧！

不斷在祈禱，只求可以得到答案．．．心很急，很想快些解決，不過，我知道當中可能有些障礙又出現了，是什麼東西？很想可以快些處理．．．但心知又不可以心急，要平靜好心情才說吧！

>>June 3, 2008 at 3:17:49 PM GMT+8

2008 年 5 月 31 日 星期六 【陰】

唉！今日真係唔開心呀！今朝返教會，原本心情都好好，而且亦都對牧師今日講既野好有同感，尤其係佢講到馬太福音第六章三十四節．．．”所以不要為明天憂慮，因為明天自有明天的憂慮，一天的難處一天當就夠了．．．

之後，因為今日係我地堂慶，所以去左合和度聚餐，過程亦十分好，尤其係今次係第一次帶同A仔參加教會既節目，所以特別感到感恩．．．之後，我同A仔係灣仔行街，是關我地約左牧師五點鐘傾傾關於我地BOOK教堂既事，仲有A仔上慕道班既事宜．．．五點返到去，同牧師傾，唉．．．壞消息吧！因為牧師話而家教會裝修事宜真係唔敢肯定會否跨越我地想結婚的日子，所以牧師唔肯接受我地申請當日，希望我地可以延期．．．當刻真係又失望又無奈呀，都唔知可以講什麼好，心情極差．．．

走左之後，同A仔去左佢家姐祖安屋企，一齊叫PIZZA食，叫左果個扭扭批，都OK好食既．．．但係真係冇咩心情呀！走果陣，A仔同我傾關於今日BK唔到教堂既事．．．唉，我只係好擔心點同D親人朋友交代，攝影同酒樓改期果度點算？好煩呀！而且，由我上年五月自行揀日子到而家都一年了，而家先至話唔得？真係極度失望同唔開心呀！唉．．．而家超DOWN囉~

>>June 3, 2008 at 3:09:17 PM GMT+8

2008 年 5 月 30 日 星期五 【乍寒還暖】

今日一個人返觀塘on duty，其實都悶架，唉．．．好經辛苦渡過左！今日好激氣，因為部電話唔知點解無啦啦都收唔到CSL個台，不斷係度SEARCH，都唔知想點？！後來放工去左ONE2FREE度CHK，佢話係我張SIM卡有時，幸好唔係電話有時咋，如果唔係真係想死，買左一個星期多D咋．．．之後，約左媽媽係旺角等，因為今日打算去買條裙下星期六去飲著，因為要幫朋友做埋司儀呀！實質都未同A仔夾下個司儀稿添呀．．．大件事！

初時行左陣聯合，好快就比我買左條合適既裙了，真開心，行多陣，買左少少野，跟住同左媽媽行金魚街，好開心，睇到好多動物，哈．．．之後我地去左食下午茶，跟住就回家了．．．一日好開心既日子！返到屋企，太眼訓了，見爹地未返到屯門叫我地落街食野，所以就諗住訓番十五分鐘，點知就出事了．．．事源的訓覺時發夢，夢中見到自己無論如何都起唔到身，曾經不斷想郁，但係都唔得，曾經想用手爭開眼睛，夢中見到係爭到的，可惜原來係夢中有夢，所以開始越來越驚了，好想叫，但係又叫唔出，於是不斷想郁隻手打床板，但係又打唔到，越來越驚了．．．後來好經辛苦先至起到身，真係一額汗呢！！

跟住，就去左食飯，個人都好似心神妨忽咁，好慘呀！

>>June 3, 2008 at 3:02:36 PM GMT+8

2008 年 5 月 29 日 星期四 【乍寒還暖】

今日繼續落雨，唉．．．心情都唔多好吧！今朝早起，好眼訓，琴晚玩到點幾鐘先訓，頂！超眼訓．．．搭車仲要冇得坐．．．唉！返到去都冇咩精神同心機做野了，哈！下午食飯，約左表哥仔周總食，我地約左去食日本野．．．呢間野我第一次去，不過佢話好耐冇去過所以揀呢度！呢度既野都麻麻地啦，不過最緊要係大家享受一齊食飯傾計既過程！同表哥講起琴晚睇番”金輝一百”既廣告．．．哈，佢竟然初時唔記得左我地細個玩過，真係激氣．．．不過我講講下佢又開始有點印象了，呵！佢都覺得細個時係好開心，不過而家大個諗番都覺自己有點傻同低能，哈．．．唔知點解，我總係覺周總佢好似對以前同前景都冇咩憧憬同目標咁，我都有點兒擔心佢．．．唉！我地傾左好多野，主要都係傾我結婚既野．．．哈，我都想表哥快點結婚吧，都係時候要好好計劃啦．．．我都唔想追過佢頭的，呵！

食完飯遲左十五分鐘返到去，呵．．．照樣工作，到左四點半後，得番我一個人，同事出左去做野，確實係FREE．．．好經辛苦放工了，放工前好姊妹打電話比我，我地一直傾電話傾到我搭車到一半路程．．．初時見好姊妹都好似好疲累咁，真係心痛佢呀！佢真係好奔波吧．．．希望天父神眷顧同保守佢啦！

返到屋企，得我同媽媽，所以決定兩口子落街食，去左山葵食日本野，係，日本野AGAIN．．．不過食到好飽，食左好多壽司！今餐我請的，自從上次母親節後都冇請過媽媽食野了，都係時候孝順下了，哈！食完返屋企，上左MSN，同好姊妹傾，佢話有心事，就同佢傾左好耐電話．．．得知佢近日好多唔開心同心煩既事，希望事情早日解決外，亦希望佢可以快些開心番啦，唔好想太多了，認為要做的就去做吧，我永遠支持你的．．．我不會離棄你的．．．好多好既前景會來臨的，相信神啦，佢一定會為你安排更好的．．．我會為你祈禱！

>>May 31, 2008 at 2:58:42 AM GMT+8