2008 年 9 月 22 日 星期一 【驟雨】

wow wow~ 今日由朝早開始已經有颱風了．．．睇住由一號變成而家既八號！個風好勁呀，佢個名叫做黑格比！佢好在吹丫少少咋，如果足到正香港既話，十號風都有呀！今次天文台係六點掛八號，所以我四點半就可以走人了，走人果陣排隊搭巴士既人好多，成幾十人係我前面，我好辛苦先至迫到上車，已經企到去車門了，d人仲要係咁迫入黎，好迫呀！撞到我鬼死咁痛添！好在我醒目咋，今朝去完勞審處，見有時間，就即刻返觀塘，去左apm果間吉吉島超市買定今晚既送先，因為擔心今晚打起風黎再去買野就煩喇．．．真係如我所料，太麻煩了！

最後五點九返到屯門，順便去埋街市，去左波仔買飯盒，比爹地同妹妹聽日做晚餐．．．是關我聽晚不在家呀！要為佢地準備好先得．．．而波波貓，我聽日都要比定多少少野佢食喇，如果唔係等妹妹餵佢佢一定餓死左！

個風好勁，佢吹正我屋企果邊，即係東北！我今日放工返到屋企除左想講粗口外，什麼都唔想講了．．．因為返到屋企，當刻剛掛八號，即時我就將媽媽放在外面既花盆放番落地先，順手再幫埋隔離既auntie果d花盆放埋落黎，都係順手o者！跟住返入屋再收衫，收花盆！後來先發現成個客廳都係水，原來妹妹今朝閂唔緊個窗．．．頂！我抹到傻左，成地成梳化都係濕晒囉！唉．．．做死人咩！好累呀．．．

好在爹地返來負責煮野食咋，如果唔係我真係死左！食飯前，我仲要整部電腦喎，因為部機死左，要拎個harddisk出黎去A仔度整，仲有再駁另一部機．．．整到成身汗，好累！死人妹妹又唔幫手，好討厭！

雖然，明知明天朝早都係要返工架喇，不過今日早左一個鐘放都係好事，可以好好休息下啦．．．今晚一於早點訓啦！

>>September 23, 2008 at 1:33:23 PM GMT+8

2008 年 9 月 21 日 星期日 【陰】

今日好累呀，因為比起平日係A仔度早起左三個字．．．係架，三個字好緊要的！今朝媽媽終於出發了，佢會去日本大阪旅行五天，所以今個星期我都要乖乖在家，負責照顧下屋企，尤其係要睇住波波貓貓．．．冇我係度，一定餓死！因為靠妹妹就死得人多了，哈，呢句係媽媽講的！希望媽媽有個愉快，平安，順利的旅程啦！

今日放工後都好乖去左佳寶度入貨整野食，其實媽媽已經好好，琴晚特登整定多少少送留比我地今日食，不過，我又唔想咁悶又食果D野，於是都係走左去買野．．．今晚好豐富，有鰻魚同埋煙三文魚，呵呵！作反了，同妹妹係度食大餐！當然，爹地都有份食．．．鰻魚啦！

好累呀，而家發覺做人老婆都幾辛苦，尤其係全職女性，又要返工，又要照顧屋企上下既人，又要打理家頭細務，又要煮飯洗衫．．．好想死！諗起都好怕怕了．．．今晚個天好焗，好似焗SAUNLA咁囉，煮一個飯已經出晒汗了，加上妹妹又唔做野，要我成日執手尾．．．頂！好累好累．．．想早點訓又唔得，要等爹地返黎先訓得．．．唉！咁就十二點幾了！

>>September 23, 2008 at 2:15:36 PM GMT+8

2008 年 9 月 20 日 星期六 【晴】

今日好乖，返左教會．．．數數下，已經好幾個星期冇返去了，真係無奈！本來今日都返唔到架，後來好在因為唔洗等家私黎，D家私下星期六先至黎丫嘛，所以先有時間去啦！

今日得我同爹地返咋，完左之後我地兩個就去左別府度食！哈，十分豐富的一餐，我仲食左牛肉刺身添，真係好GOOD呀．．．不過，就係因為呢個牛肉刺身，攪到我無啦啦晒左廿幾蚊！因為走果陣我返元朗，爹地返屯門，我上左車後突然個肚好痛，於是去到PACIFIC PLACE個站時都要落一落車處理一下個肚啦，真係衰！唉！

跟住三點幾返到元朗，等到夠鐘就去搭村巴返去屯門！去到屯門西鐵站，我就去左鴻X堂買野飲，走果陣隻手唔小心撞到個招牌一下，當時都冇為意的，後來去搭巴士前先發現隻手係咁流血，嘩，流到連件衫都有血呀！當刻真係唔識得痛架，係發現左先黎痛囉！好黑仔呀！點解今日咁黑架！所以就打電話返屋企，叫爹地落黎接我幫手拎野啦，因為隻手好痛已經拎唔到野了！好可憐！返到屋企細心睇番個傷口，都完全睇唔到係傷左邊度，只係見到好多血囉！頂！

媽媽聽日就出發去日本大阪了，真係羨慕呀！我都好想去旅行呀．．．見眼身邊好多朋友都去左旅行，我真係羨慕到死呀！最衰係我冇假放囉，如果唔係已經去左旅行了．．．好想去呀！！！

>>September 21, 2008 at 1:20:04 PM GMT+8

2008 年 9 月 19 日 星期五 【晴】

今日繼續返工，感覺辛苦，條氣仍然唔順，冇咩氣講野呀！成日好似回唔到氣咁，好似冇氧氣咁，我就黎死架喇！

好經辛苦捱到就放工十五分鐘，大阿姐落左黎同我地開左個causal meeting，一講就45分鐘．．．頂！最後一點半先至可以走人！不過算啦，今日下午都冇咩趕時間，都係行下街食下野，等夠鐘就去荔枝角join阿A仔去個朋友屋企度幫佢手整結婚既野．．．

真係激氣，朋友既兄弟姊妹個個都遲到，得我同A仔係準時，所以我地呆等左好多時間．．．頂！完左個活動，食埋野，睇左十五分鐘家好月圓後就回元朗了．．．回程既車程中，我又做錯了事，係，又係我！激嬲左A仔．．．對唔住呀！我冇心架！真係唔係咁既意思呀！！唔開心呢．．．曾經想過要考慮清楚大家是否有意思再一齊．．．不過，最後都冇去諗了！

>>September 21, 2008 at 11:06:08 AM GMT+8

2008 年 9 月 18 日 星期四 【晴】

唉~ 今日好唔舒服，又喘了，好辛苦．．．有時真係感覺唔好，好怪責自己，點解成日都唔舒服，點解要揹住氣喘呢個病，好痛苦呀！有時，嘗試從第日個老公既角度去睇，可能都會嫌棄個老婆咁煩啦，郁d又話唔舒服又話病，都唔知點照顧佢好？！．．．唉，其實我都唔想架！

但係，當我見到媽媽時，我個心又會堅強起來．．．因為媽媽確實係一個活生生的積極例子！佢係一個長期病患者，除了有血壓高，膽固醇高外，仲有甲狀腺問題！雖然，甲狀腺已經受到控制，不過仍需長期吃藥．．．有時，真係好為媽媽辛苦！但係，媽媽那份積極面對人生的心卻成為左我積極的推動力呢，所以，我一直以來都好佩服媽媽的，我永遠會以媽媽為傲，為榮的！媽媽萬歲！

今晚仍然在屯門過，同媽媽好落力咁去睇電視，哈！因為家好月圓實在太緊張了，呵！

明天又要一早起身，可憐！

>>September 21, 2008 at 11:02:10 AM GMT+8

2008 年 9 月 17 日 星期三 【綿綿細雨】

今朝返工時天已經陰陰地架喇，點知去到黃大仙就落起雨黎，幾驚呀，因為冇帶遮呀！好在，去到觀塘時落車就冇雨喇，好在o者！

今日都幾忙下，加上今日放工後要返土記開會，真係諗起都想死．．．最後都開到七點九先至走得，好可憐！開會就好似討論大會咁，或者係爭論大會咁，好怕！今日收到個消息，就係我地其中一個助理總幹事會調職，佢last day係九月尾，所以大家都約實下星期四同佢farewell．．．其實一向都唔like呢個同事的，而家聽到佢走，其實都冇話咩既，又唔係特別高興，又冇話特別失落，只係覺得：唔好阻人發達！．．．祝福佢啦！

今日完晒工作就回屯門了．．．久違的媽媽飯同湯，十分掛念．．．好開心又可以同佢地重逢了！食完飯好似個人好精神咁，唔想訓，好想找緊時間同屋企人相處！有講不盡的話題，有做不盡的事情．．．好開心呀！！

>>September 19, 2008 at 2:00:55 PM GMT+8

2008 年 9 月 16 日 星期二 【晴】

今日天氣仍然唔好，仍然係好焗咁，抖唔到氣呀！琴晚都係訓得唔好，又係咳咳，不過好在食左藥先訓，所以都比起前晚好好多喇！

今朝可以同A仔一齊出門口，一齊搭西鐵返工，哈！好開心呀！從來極少有咁既機會的，只係因為佢今日要出去白田教班！所以十分珍惜呢D機會呢．．．開心死！所以今日比較精神奕奕咁返工！到左LUNCH，同左同事去食上海面，其實都覺得幾肥下．．．真係要節食了！之後出左去佐訣，因為要去勞審處做野．．．本來諗住應該三點半點都攪掂喇啦，點知最後成四點九先至可以走人，仲要拎住一大份文件，想即時走人都唔得啦，唯有返番去觀塘放低D文件啦，返到觀塘已經五點五了，頂！

放工去左搭巴士直接返元朗，好眼訓．．．實質係來往觀塘同勞審處兩個車程我都訓著覺了，好眼訓！所以放工就一上車就訓，好累好累．．．後來，約左A仔同佢媽媽去左食壽司，好飽，食完返屋企了．．．好累，決定今晚要早點訓！

>>September 17, 2008 at 2:24:15 PM GMT+8

2008 年 9 月 15 日 星期一 【晴】

嘩嘩~ 琴晚好辛苦呀！鼻敏感發作，係咁咳之餘，仲有點抖不到氣．．．想死！但係今日公司唔夠人手，我都要返土記幫手當值，所以都唔可以亂話請病假！最後都係返左工啦！

係土記好悶，朝早雖然有個同事係度，不過一向呢個同事都唔會做野的，成日諗住自己係黃馬褂，可以咩都唔洗做，所１我今朝都一個人係counter度一腳踢．．．頂！下午仲要一點九先出去食飯，d同事又係搵我笨，要我一個人係lunch時當值，真係唔開心！

放工果陣，約左同A仔去青衣，因為佢要整牙仔．．．陪左佢去青衣等左好耐，好在佢唔係生智慧齒，只係普通牙肉發炎．．．不過見佢痛到食唔到野，我都肉痛架！之後，本來我地諗住搭車出番青衣城，之後返左元朗先再食野，點知等左成半鐘先有車返去青衣城，之後去到仲見走埋班264M，頂！所以，最後決定係青衣城食埋野先走人，當時係九點囉！

我地之後去左滾滾紅茶度食，質數同海趣坊一樣，唔錯！兩個人一個DINNER都係食左八十幾蚊，都算係抵喇！而家食個LUNCH都要三十蚊啦！之後就回元朗了！今日真係好唔舒服呀！一路搭車一路暈同想嘔．．．好辛苦呀！個天好似冇氧氣咁，完全抖唔到氣咁囉，好辛苦！想死！

>>September 17, 2008 at 2:07:53 PM GMT+8

2008 年 9 月 14 日 星期日 【晴】

琴晚成兩點幾先訓，好眼訓呀！今朝十一點已經起身了，發覺原來妹妹成晚都冇返過黎囉．．．佢都勁喇！唔理佢了！

起身後同左爹地媽咪去飲茶茶，之後就入元朗搵A仔了．．．入到元朗，是日幫屋企大清洗，執左好多野走呀！之後仲拎左D野去下面間收賣店度賣，都賣到少少錢咁啦，哈！不過D錢都會用黎FOR番屋企兩個動物小朋友既基金用途．．．

不經不覺放完個假喇，真係好想再有假放呢．．．

>>September 15, 2008 at 3:28:44 PM GMT+8

2008 年 9 月 13 日 星期六 【晴】

今日係十三年來最熱的一個中秋節呀~ 成三十幾度囉，都唔知想點．．．難為今日結婚既人！今日係好兄弟，積夫佢小登科，娶老婆！係度祝佢地恩恩愛愛，快d生番個b呀！我今日去唔到飲呀，於是就去左觀禮．．．佢係紅棉路行禮呀，今日又熱又焗，真係好辛苦！我已經係著晒背心裙架喇，但係d汗都係兩邊頭髮流落黎，我仲感覺到汗係從背脊流落去，從心口流落去囉．．．真係想像唔到準新娘新郎著住套禮服既情況係點？！真係辛苦晒！

行完禮我都走人喇，太熱了！同妹妹去左ifc行左陣，去到great超市見到有雪榚買，最後都忍唔住食左杯超大杯既dark chocolate cone，太正了，十分香濃！食完就行左陣，點知失手，係zara買左對鞋，不過買左之後我今個季都唔洗再買了，因為心目中要買的都已經比我買左喇，good~

跟住約左表哥仔係觀塘apm度等，我地行左陣，係kfc食左少少野，之後行左陣muji，就走人去左藍田，因為好耐冇去過了，所以去左個up dup商場行陣啦．．．都咪話，都有野睇架，都唔係心目中咁up dup喎！跟住六點幾上左細叔叔屋企！

佢屋企真係大，三房，細佬妹都可以有自己既房間！雖然房間唔算大，不過都叫做自己擁有一間房丫！而且又有兩個厠所，幾好，唔洗爭嘛！今餐係嬸嬸出手整野食，今晚除左有我同細叔叔一家，仲有表哥仔一家，仲有嬸嬸既媽媽同家姐同場，不過佢地只識講上海話，所以溝通唔到，哈！要靠細佬妹幫手做翻譯！跟住，表哥提議我地一齊去睇戲，所以我地係網上訂飛，去淘大睇戲．．．最後得我，表哥仔，細佬同細妹去睇，虹虹妹妹冇去到，佢約左朋友！

我地睇左”我和尋回犬的十個約定”．．．呢套戲好有教育意義，叫d人唔可以輕易放棄d寵物，當你決定養佢開始，就要照顧到佢終老．．．好感人呀！我睇到眼濕濕，但係班人話我係傻囉！頂！

返到屋企已經係兩點了，因為睇完戲送埋細佬妹返屋企先再同表哥搭西鐵返屋企，所以咁晏啦．．．

>>September 15, 2008 at 3:21:40 PM GMT+8