2008 年 10 月 21 日 星期二 【晴】

今日同樣係好累，其實琴晚都叫做訓得唔錯，起碼冇好似琴朝咁，無啦啦六點幾彈醒左先啦，可以一覺訓到大天光呀！

今日超忙，忙到有點想死我感覺，又係電話多到嘔，walk-in多的是．．．真係就黎死，累到要死，煩到要死．．．想起有好多paperwork都未做添，唉．．點死呀？

無啦啦放工前阿姐叫我聽朝返土記on duty，因為唔夠人手．．．我之後下午又要再番觀塘中心見case，放工又要等八點再去食蛇宴！聽講會食到十點囉．．．

今日下午同左同事去左飲茶，冇食個飯盒呀！不過難得同同事去飲下茶啦，都咪話，咁樣豪食下每人都食左五十蚊！哈．．．肥死．．．放工時上左車個人又係好唔舒服了，又暈又想嘔，真係極辛苦，我都認為壓力實在太太太大了．．．．

回到家，本來今日打算食完飯都返去元朗，不過實在太累了，決定不回去，於是打左個電話比auntie講聲，點知auntie話佢今日夾親隻手指，當時兩隻手指夾傷了，即時去左急症室．．．好在醫生話冇咩野，只係傷左裡邊既軟組織！咁我都安心點．．．本來想回去睇一睇佢的，但係auntie既固執性格又來了，不斷叫我唔洗理佢．．．唉！有時都難做的，唔理佢又好於理不合，而且又怕比A仔怪我唔理佢，但係理佢咩，佢又嫌我煩住佢．．．唉！真矛盾！唯有叫auntie咩都唔好做住，等我返去先做啦．．．

>>October 22, 2008 at 4:04:03 PM GMT+8

2008 年 10 月 20 日 星期一 【晴】

唉．．．今日有十個累同十個煩惱！一朝早收到消息，知道金至尊佢清盤，所以我地即時組織小組，出去各分店派下片同資料，希望可以擺定個勢先．．．今朝得我同一個男同事坐住勞工車出發，行晒港九新界各金至尊既分店．．．真係好累好累．．．雖然有公司車坐唔洗自己去，不過周車勞頓都唔好受．．．成程車真係好累好眼訓，出邊街又熱又多人，而且又唔係間間金至尊都收我地既野，所以都辛苦！

攪掂左之後，就去左新蒲崗果頭食晏，去左食車仔面，我食到大半先發現裡面有隻蟲．．．算啦，都食晒囉，係有事先算啦．．．哈！而家都冇咩心機理埋呢d咁既小事了．．．食完飯，同左同事去附近的勞工處幫手，因為同事要跟一個六十人的個案，需要我去協助，所以咁樣一攪，又攪左我兩粒鐘，回觀塘中心時都已經係五點！係回觀塘車程中又收到個惡耗，得知勞工處收到消息，知道有個工友打電話去政府熱線度投訴一個勞工處主任同埋我，我一聽到個工友名，心中就已經好想打人，是關呢個工友都攪到我同勞工處果度好麻煩的了，而且我一直都懷疑佢係精神有問題的，佢去投訴我都係我意料中事了．．．哈！好似有點兒變態咁，不過我唔怕架，因為我自知我已做足晒要做的工作，只係個工友佢唔接受我地既服務，而唔係我地唔服務佢．．．所以返到去，我阿頭都問左我情況，亦都叫我寫番份report比佢，要好好保障我自己！好在，阿頭都撐我，是關佢都試過比一個精神有問題的工友投訴過，所以佢好清楚我既感受．．．不過冇咩既，最重要既係我自己理直氣壯嘛，我自知冇做錯事就ok啦．．．所以，一返到去中心我就係咁打我份report了，因為想打鐵親熱去做．．．一做做到五點九先走人！

回程上左車，感覺好疲倦好乏力咁，亦都感到好失落，心中當刻只係想起A仔．．．幸好，在我食飯時間，佢打過比我黎，不過，最死我冇聽到電話，好在佢留左言，話佢一切都OK，而且好掛住我，亦都而家係四千五百幾米了，聽日會再上山頂之後再落番山．．．希望佢可以成本登頂啦，祝福佢．．．之後，係我係勞工處做野時，佢再打多次電話比我，真係好開心，為我當刻既疲倦打了枝強心針呀！佢話佢已經開始休息，因為明早要登上山頂再下山．．．好想快點見到佢呢．．．在車程中，突然一刻好掛念佢，好想佢係我身邊，好想攬住佢呀！！因為，而家個人有點COLLAPSE了，真係好FRUSTRATE呢．．．好累好累．．．

回到家，什麼都唔想諗，只係想食同訓．．．仲有係休息！但係，亦都想急不及待即時將今日發生的事紀錄下來，所以好快手打完這個日記．．．

>>October 21, 2008 at 1:19:19 PM GMT+8

2008 年 10 月 19 日 星期日 【晴】

今日好累好累．．．本來琴晚想十一點就訓，點知最後都十一點半先有得訓，哈！我已經好醒，唔比貓貓妹妹同我一齊訓架喇，如果唔係就更加唔洗訓．．．近排都唔知點解，成日無啦啦五六點會彈醒左，之後又再訓唔著喇．．．好辛苦！可能我真係太大壓力了．．．

今朝返工搭西鐵，是關A仔放低左佢張全月通比我，咁梗係唔好晒啦．．．幸好去到九龍塘有位坐下咋，如果唔係死左！今日同樣好忙呀，近排泰林結業既事都令我地忙左好多，而且近排又多左好多CASE同電話查詢，真係有時忙到連飲水TOILET都去唔到呢．．．尤其係今日得我一個人係觀塘中心．．．不過其實都幾FREE既，起碼我可以選擇性地工作嘛．．．到左下午近五點，終於有個同事返來了，不過都沒用，我都一個人悶左一日了．．．

放工即時回家，因為太累了，返到屯門就去左訓覺，哈，訓到食飯先至起身呀！今日同媽媽一齊睇電視，一連睇左兩粒鐘珠光寶氣．．．都幾好睇丫！

今日已經沒有再收到A仔既sms了，可能佢在山上收唔到電話啦，又或者佢怕冇電啦．．．不過，我又唔太擔心佢，因為我知道神一定會保守看顧佢的．．．

今晚媽媽好好，特登煲雞湯比我飲，因為姨媽話佢飲左一段時間雞湯後身體好左好多，媽媽都好想我身體好，所以決定要多點煲雞湯比我飲．．．媽媽，多謝你呀！要錫晒你！好在琴日送左對鞋比媽媽，可以順手一表我心意，呵！媽媽，我愛你呀！

頭先收到上司電話，因為聽日又有urgent野發生，所以我要無啦啦一條友出街站．．．其實都幾討厭，一個人出街站真係唔好受的．．．不過算吧，而家風頭火勢，大家同事都係要好好合作同協調架喇．．．

>>October 21, 2008 at 1:29:50 PM GMT+8

2008 年 10 月 18 日 星期六 【晴】

今日係一日輕鬆既一日．．．朝早返左教會，雖然過程中都好眼訓，不過最重要既係可以親近神，同埋為A仔而代禱．．．完左崇拜，同左一個同爹地由細玩到大既UNCLE AUNTIE傾計，因為佢地係加拿大返來，大家已經好耐冇見了．．．各人都為我既結婚而祝福我，有時有人走埋黎同我講一句：恭喜晒呀！有時，我都覺得好唔習慣，好似好怪咁囉，哈！

之後，我同爹地媽咪又去左別府食野，同樣食得好豐富好飽飽，於是就走左去行左一陣，睇左好多靚鞋靚衫，不過怕悶親爹地，所以同媽咪都唔敢行得太耐！跟住我地仲去左SOGO個SUPERMARKET買今晚既DINNER，我地買左好多正野，媽咪話今晚係開大餐呀！買一買就百幾二百蚊了，相信一定十分豐富！回到屯門，我地去左海趣坊，行左一陣，爹地買左條牛仔褲，而我同媽咪就各人買左一對鞋，哈．．．真怪，係出邊就睇唔中野，反而返到屯門先買到野！

今晚好豐富，食西餐呀！有漢堡扒，有珍寶腸，有意粉．．．正呀！又係食得好飽好飽．．．之後九點半走人回元朗了．．．回到去，貓貓妹妹十分活潑，係咁同我玩，我都返到去係咁執野，因為洗左床單未鋪番呀，又摺番D衫入櫃呢，攪到我一身汗．．．好在係屋企時已經沖左涼，可以返到去唔洗太夜先沖．．．今晚決定要十一點訓覺．．．

>>October 21, 2008 at 12:43:35 PM GMT+8

2008 年 10 月 17 日 星期五 【晴】

A仔今朝一朝早出發了，佢四點已經起左身，我都陪左佢一陣，陪到佢出門口為止．．．當刻真係好唔捨得佢呀，佢走之前仲喊左出黎，真係樣衰！希望佢可以順利平安完成個旅程啦，我會為佢祈禱的！

今日只係返半日，本來上星期六泡湯左既單車之旅，我同妹妹，堂細佬妹，一直都期待著的，可惜，卻被表哥一句：我冇預留時間喎．．．咁就再次泡湯喇！好唔開心呀！本來興致勃勃一心諗住有得去玩，點知就攪成咁，真係好down呀！加上A仔又離開左香港開始佢既雪山旅程．．不過，今朝八點同十點都收到佢既sms，佢話佢終於去到麗江了．．．真係戥佢緊張呀！放工後回了屯門，同左媽媽妹妹去飲茶，之後妹妹出左街，我就同媽媽行左陣街，之後返左屋企訓，但係都唔係好訓得到，即使真係好累好累．．．到左八點就同埋爹地媽咪出去食飯，今日又食左好多好味野，唉，點死．．．個肚已經越來越脹了，好恐怖！

妹妹今晚冇返黎訓呀，我一個人訓晒間房都不知幾爽呢．．．妹妹佢今晚去左disney個黑色世界，不過聽佢講好多人呀，要排好耐隊囉．．．我就冇興趣去搵隊排喇，呵！

>>October 21, 2008 at 12:03:17 PM GMT+8

2008 年 10 月 16 日 星期四 【晴】

唉，今日又有公司結業了，真係好可悲。。。我地同事又係隨時要stand by出發去支援了，好似有點似粉紅救兵咁，哈。。。

近日同事成日要出出入入支援，中心人手自然少左，真係做到人氣咳。。。我今日又要出去做野喇，下午出左去灣仔開會。。。哈，我今日先知，原來我今日隻case，係漫畫界好出名的一個人！如果大家都係七十年代尾，八十年代頭出世既人，應該會睇過"海豹"，"武神"等漫畫，當中其中一名畫家就係叫光仔，我就係幫緊佢個個案了。。。去勞工處開會時，主任唔講我都擦覺唔到呢，哈。。。主任仲好好笑話佢係光仔既fans添，哈。。。攪笑！不過呢單案真係幾麻煩的，睇黎有排攪了。。

之後就返左土記，因為今晚有個talk要去。。。好慘，七點半先有得聽，於是同左兩個女同事去左食飯，哈，又係食車仔面。。。今日下午已經又係食面，不過就食左魚面，好好食的，裡面有埋炸芝心雲吞，同埋魚腐，正！不過唔平，要三十蚊囉。。。今晚果餐都係廿二蚊攪掂！但係近日洗多左錢，是關冇返屯門屋企好幾天了，午餐冇著落，哈！要慳慳地了。。。

今晚個講座請左曾玉成黎講，不過我好唔like佢親冇傳媒係度，就係度話其他既議員不是。。。佢身為立法會主席都做到咁，我好不洩佢囉。。。即使社民連三個議員既行為真係唔係咁o岩，都唔應該咁啦，好冇口德囉，佢唔係應該中立一點架咩？所以，聽到八點半走人了。。。

回到元朗好累，不過都有陪住A仔，因為佢聽朝一早出發了，四點幾要出發，約了的士送佢去。。。有點唔捨得佢添。。。聽朝無論如何都要起身送佢走呀！希望佢可以順利平安完成今次既旅程啦。。。加油呀！

>>October 20, 2008 at 7:50:44 AM GMT+8

2008 年 10 月 15 日 星期三 【晴】

今日好累好累。。。因為琴晚同左朋友去食宵夜，不過好攪笑，我同A仔帶左妹妹貓出去食宵夜同比朋友睇，我地出去果陣將佢放左係我個單車籃度出去，佢表現好緊張同擔心，個樣好攪笑。。。食野果陣又唔願意比人摸同玩，初時都坐係爹地度既，之後覺得坐得唔舒服，都走左去我度坐，真係冇幾何咁乖，自動走去我度。。。下次有機會會再帶佢出去玩玩的，因為好好笑。。。佢都係時候要見下世面了，呵。。。

今日成日都恰眼訓，好在LUNCH時去左食車仔面，仲同同事去左買平野飲，百佳一盒維他250既檸檬茶只係$1.9咋，十分平。。。開心呢。。。不過今餐車仔面都好肥下，因為好多油呢。。。

琴晚夜訓呀，好累，今晚放工後仲要開中心會議，開到八點半有多呀，想死。。。好累。。。放工後都去左麥記買野食，一上車就係咁食，真係個胃有點應付唔到，所以上到西鐵好辛苦。。。跟住返到元朗了，A仔同佢媽媽剛食飯，佢地叫我飲湯同再食左三隻雞翼。。。呀，真係死得人多喇，之後仲要食左好多紅提子，仲有楊桃，同埋朱古力雪禁添。。。雪禁係我自己買的，不過冇諗到食之前已經食左咁多野囉。。。慘慘喇，你話點死丫，見到個肚真係好想拎把刀黎切開一半去呀。。。

>>October 20, 2008 at 6:20:16 AM GMT+8

2008 年 10 月 14 日 星期二 【晴】

唉，忙忙忙忙。。。除左個忙字，什麼都唔識講了！好累呢。。。今日放工返到去仲要執野，因為個鞋櫃同梳妝台終於送左黎喇，要執野了。。。好累好累。。。在返工過程中唯一可以輕鬆下既，就係LUNCH既時間。。。今日同同事去左瑞和街街市食泰國野，都唔錯，又平呢。。。好THAI架，哈！

唉，想起明晚同後晚仲要做野，真係有點想殺人呀！放工返到去元朗，同左A仔去食飯，去左食壽司，可以承機又RELAX下，不過就用左個肚去較飛，同埋TAKE左個會肥既RISK去換取快樂囉！

哈。。。近排真係食多左野，而且係食多左好多雜食。。。之前都好忍得口架。。。但係唔得了，真係唯一係食物中令自己感到快樂，因為真係忍左口太耐了。。。不過，而家為左要減肥，真係唔可以再係咁落去了。。。近日個腸胃都差左，個肚成日都脹脹咁，好辛苦喇開始。。。TOILET又去得唔好，唉。。。

我知道自己近日好大壓力了，公司工作日日都多到嘔，而且變數好多好大，一時話某某公司裁員結業，一時又話某某公司有工潮，我地同事就隨時要STAND BY出發工作。。。一個既金融海嘯實在太恐怖了，令成個世界都一遍死寂咁。。。相信而家只係開始咋，陸續仲有大把公司結業，仲有大把裁員潮出現。。。唉，有時都好矛盾！身為香港人，梗係希望香港繁榮安定架啦，但係，咁又令到我地一班專為勞工服務既人就可能冇左個飯碗。。。所以，有時真係覺好無奈！不過，我地現刻反而要努力幫助所有有需要幫助既人！希望香港快點經濟好番啦！

今晚同左朋友去食宵夜，去左食甜品。。。係又係食野，肥死喇。。。不過好好笑，頭先帶埋妹妹貓出去，佢好驚驚呀。。。

>>October 20, 2008 at 6:12:48 AM GMT+8

2008 年 10 月 13 日 星期一 【晴】

天呀~ 今朝已經頂唔順了，要拎左一粒鐘既CL，哈！好在今日本來隻上庭CASE徹銷左，如果唔係今日死左架喇。。。好累好累。。。

近日好忙，因為D工潮事件多多，同事們日日都要保持最高狀態去工作，有時真係感到身心疲累吧。。。好辛苦，想死呀！！！好想有我放假同休息。。。

今日回了屯門食飯，之後約了A仔接佢放工，一齊回家途中都講起大家工作上的頭痛事，真係煩死。。。不過，有時都係要面對既，唯一既係自己想下辦法，令自己嘗試從好的方面想，亦都要知道其實係神對我地既考驗。。。要加油呀！

A仔聽日開始放大假了，好羨慕呀！不過A仔叫我唔好羨慕佢，因為每個人在工作上，生活上，總有值得欣賞自己的事，係唔需要羨慕人地的。。。但係，我現刻真係好羨慕人地有假放囉，因為自己冇丫嘛。。。嗚！

好想同好需要放假休息呀。。。

>>October 20, 2008 at 3:13:16 AM GMT+8

2008 年 10 月 12 日 星期日 【晴】

唉，點解咁忙架．．．琴晚夜訓了，所以今早偷懶，朝早拎左一粒鐘補假，呵呵．．．十點先返到中心，真係好，時間都覺得過得快一點呢．．．下午同左同事去食飯，去左瑞和街街市度食泰國野，幾好食呀，而且都好平添．．．唔錯！不失為一個好地方！

好在今日朝早的上庭個案徹銷左，可以叫做鬆一口氣，哈！近日實在太忙了，連要每個月交的報告都冇時間做呢，呵呵．．．好多PAPERWORK都冇心機去理喇，真係想起都想要死呢．．．

放工同樣回了屯門，因為要幫A仔拎點東西．．．之後同樣去了山景接佢放工！A仔就好啦，明天開始放假了，真係羨慕！佢成日叫我唔好去羨慕別人所謂的好，反之要好好欣賞自己的好！但係現刻，我暫時搵唔到當自己冇得好好休息時，點樣可以唔羨慕人地有假放囉．．．唉！而且，明明計劃住十一月可以去台灣花蓮玩玩，點知大家又夾唔到時間，呢刻就更加沉晒．．．唉！

>>October 16, 2008 at 3:48:22 PM GMT+8