2008 年 11 月 1 日 星期六 【晴】

今日返左宧會，同左爹地仲有A仔一齊返．．．今日崇拜既主題同我同A仔而家面對緊既情境十分貼近，這再次證明，神係會在我地身邊，佢係好清楚我地既一切，佢係一直在回應我地，係叫我地要好好依靠著佢．．．

返完教會，同左A仔去左炮台山果頭一間叫SUBWAY既餐廳食野，佢只係有外賣，佢係食法式包的，可以自行選擇個內料．．．都唔錯丫，而且．．．哈，仲可以順便PRACTICE下D英文，因為佢所有職員都係外國人，要講英文的，哈．．．我地買左野後就上左A仔家姐屋企食．．．A仔家姐而家請左個菲傭，所以好多野都可以輕鬆左，唔洗佢做．．．而因為A仔家姐下個月要生了，所以佢姐夫都急於執理家中物件，掉得既都會掉，希望多點空間出黎比BB用．．．所以佢姐夫即使唔捨得都要將佢D漫畫奉獻晒出黎，有D送比人，有大部分都捐左去A仔間中心度比D小朋友睇．．．我同A仔執書都執到傻左，真係好累好累．．．好在有個菲傭係度幫手咋，如果唔係執死！

執好後，我地都叫左街車一車過返晒屯門．．．之後我都返屋企先，等A仔整好D野後再過黎我屋企度食飯，食完飯都回元朗了．．．

明天要返土記了，感覺好怪咁．．．不過好在明天有工作在身，唔洗早起之餘，仲可以晏點才回去．．．之後下午又再出去，要入屯門IVE講TALK，可以早好多返到屋企，YEAH~

>>November 5, 2008 at 2:23:25 PM GMT+8

2008 年 10 月 31 日 星期五 【晴】

今日心情都係一般，不過好在一個人在觀塘中心做野，而且都忙，咁時間都好容易過左去．．．不過一放工，心情又回到地底了．．．放工就回了屯門，同左媽媽去市中心食野，我地去左新開果間珊瑚堡．．．D服務實在太差了，價錢雖然同椰林閣果類差不多，不過服務真係根差，下次都未必會再去．．．

食野前等媽媽到，我一個人去左商務睇書．．．見佢有折，所以都特別睇下台東同花蓮既書．．．咁又買左兩本！我決定要去花蓮旅行，要好好輕鬆下．．．雖然，咁又要洗一筆錢，可以會影響我之後既生活，不過．．．我寧可之後慳點，都想做一些真正令自己快樂既事！有時都覺自己幾”今朝有酒今朝醉”架，哈．．．唔理喇，我而家要既係快樂！

屋企人都知我心情唔好，所以都唔太多提起我今次既事，反而都好支持我，成日都鼓勵我，亦提醒我，神係永遠會係我身訪保守住我的．．．我好感恩呀！感謝神．．．我知道的，神永遠都會靠在我身邊的！

今晚留在屯門，因為A仔去左佢家姐屋企探佢家姐，而我又咳緊，所以都唔方便去探佢，怕傳染佢同BB嘛．．．

>>November 5, 2008 at 2:13:50 PM GMT+8

2008 年 10 月 30 日 星期四 【晴】

壞消息真的在今日出現了．．．心中十分不憤，亦都好唔甘心．．．不過，咁又可以點？最終都已經知道了答案，都係要重拾信心，面對困難同問題！我要堅持下去，唔可以輕易放棄！因為，我要證明比人知，我唔係佢地咁諗的．．．我唔可以比人睇死！我覺得職場真係好黑暗，越係小家同心胸窄既人，越係喜歡搬弄是非．．．真係好不褻呢d人囉，哼！真係好討厭！

今日整日心情都不佳呀！放工都返元朗了．．．心情係唔好，但係我同自己講都要面對現實！A仔都已經要安慰既都安慰左，要提醒的都已經提醒左了，我都知佢既心意了！唉，係我自己太執著O者．．．反而的是，今日從三樓同HR傾完野返落去中心時，面紅耳赤的走回來時，比同事見到我個樣，我都知同事一定覺有問題的．．．即時，有個女同事都走來慰問我，我都毫無保留的同佢分享左我既事，佢都好同情我，而且都好明白我既情況．．．我好感謝佢既支持同體諒！反而其他同事，我都不敢奢望佢地會明白我的了．．．算吧！

其實而家個心有點唔知應如何在跟住一個月面對同事．．．真係有點唔想見人！幸好明天一個人回觀塘當值，可以一個人靜靜了．．．

>>November 5, 2008 at 1:51:50 PM GMT+8

2008 年 10 月 29 日 星期三 【晴】

今日好忙好忙，因為要跟一隻二十一人既個案，要去勞審處落案．．．因為太多人既關係，足足攪左一整日．．．中途，HR既負責人打左電話比我，叫我明天下午回土記約見我．．．其實我心中已有晒準備了，我都知會係一個什麼的結果，只係我自己性格問題，往往都係要清楚明白知道什麼一回事．．．

完成左是日工作已經係五點九了，真係好累好累．．．之後仲要回土記上培訓．．．心情同精神都好疲累呀！身體就更加吧．．．不過都完成左個培訓，同埋同事一齊去食飯．．．我相信今次都應該係我最後一次同所有同事一齊食飯架喇．．．呢個係我心中的一個感覺！

食完飯後，就回了元朗！心情仍然不好！唔知明天會如何呢？

>>November 4, 2008 at 3:31:18 PM GMT+8

2008 年 10 月 28 日 星期二 【晴】

唉，心情唔好都總要返工的，而且返工仲要好忙好忙咁努力工作，一點都唔敢鬆懈！心中開始有晒心理準備，隨時要面對問題同困難！好想將一切都交托比神，因為我真係已經冇晒目標同方向了，我真係唔知仲可以做點什麼了．．．個心好淡，只知道職場黑暗，你以為人地係好人，但係分分鐘佢就係背後中傷你既人，真係好無奈！

今天繼續忙忙忙，真係忙到令自己瘋癲，已經唔想再去諗什麼，亦都係冇時間去諗什麼了．．．放工約了A仔去了深水步，我今日已經六點幾才係觀塘走，點知佢仲遲過我，所以我係深水步度等左佢好耐，不過，個心都已經冇咩精神去怪佢或者感到憤怒了．．．我知A仔好好，佢好希望做一點事去令我感受好點，心情好點．．．所以佢想盡辦法去令我開心番！其實，真係好多謝佢的．．．同佢係深水步買完野，我地就打的去左旺角新世紀，去左果間SIMPLY THAI食，食左好多野，好好味，兩個人食左二百幾蚊！真係肉赤，如果唔係我就唔洗洗咁多錢錢食野了，呵！錫晒A仔呀！

>>November 4, 2008 at 3:22:52 PM GMT+8

2008 年 10 月 27 日 星期一 【晴】

今日早上得我一條友係觀塘返工，真係感覺唔多好，好悶，又忙，好無助的感覺．．．食完個飯就無啦啦返左土記ON DUTY．．．而家真係唔多喜歡返土記，唔知點解，個感覺好差！忙左一朝，又要跟住趕返去．．．琴日收到消息，上司要我今日下午返土記當值，其實，我唔知點解心中已經有一種感覺，我知道壞消息好快會來臨到我身上．．．

如我所料，我的部門主管真係搵左我傾談，佢終於同我講到續約問題．．．呢個問題已經煩憂左我一個多星期了，都總叫開始有點解決事情了！同負責人傾了很長時間，有個多小時，我亦都將自己心中所想的告訴了她，可惜．．．佢比我既感覺係：所有的說話都係安慰，或者係”打完場”的，令我感覺很差．．．我自己都已經心中有數的了，只係我一向的性格都是，不說個清楚明白，不給我個明明白白的原因，我是不會輕易放棄的．．．今日的過程，確實令我感覺很差，亦都感到很氣憤！

回到屯門，我已經忍不住同媽媽分享一切一切．．．媽媽都好支持我，亦都感到公司是十分有問題的，亦都安慰我．．．我好感謝媽媽！忍了一整日，到了夜晚才可以見到A仔同佢講我發生左咩事，真係好難受．．．JOIN左佢之後，我地一齊回元朗，我都唔知點解，一踩單車時，我只係想不斷踩，越踩越快，有點危險添．．．當刻，我只係想用盡自己既力，發洩晒所有既力，就係叫自己放下．．．但係，我做唔到，我最後一路踩一路喊左出黎，我不斷問自己我係度做乜？點解我會面對咁既不幸消息？我點解做左咁耐人，點解都係咁無用，好似份份工都總係有問題咁？我果刻好灰好DOWN，感覺好差好差，只係好想大喊一場！但係，點解我仲要係人面前扮堅強呢？我最後忍不住了，沖涼時終於大喊了一場．．．好辛苦好辛苦．．．

喊完，同A仔再分享完，心情叫好了一點．．．但係．．．唉，我要面對的問題卻不是一言三語可以解決得到．．．而家要面對的問題真係令我頭痛，我真係好矛盾好混亂！而家好似完全冇晒方向冇晒目標咁，個腦一遍空白的，好辛苦的感覺．．．天父神呀！你在那裡呀？你會來帶領我嘛？

>>November 4, 2008 at 2:54:36 PM GMT+8

2008 年 10 月 26 日 星期日 【晴】

今日同樣係忙忙忙，不過，心情同樣係麻麻地，真係不在狀態工作呀！唉．．．有時都會心不在焉咁，唉．．．

放工返左屯門食飯，我覺得回到家的感覺是最好的，因為可以無所不談，家人亦會最體諒我．．．食完飯就去左接A仔放工，今天有點唔多想早回家咁，其實好似有好多野想同A仔講，但係．．．真係唔知從那裡開始起好．．．好心煩呀！

心中總有個結，唔知應唔應去解好？

>>November 4, 2008 at 2:22:30 PM GMT+8

2008 年 10 月 24 日 星期五 【晴】

今日A仔已經凱旋回歸了，真係恭喜佢呀！我知今次既旅程令佢有好大的感受同回饋！我都好戥佢高興呀！真係好感謝主呀！我知道A仔將更清楚知道自己一直是被神所寵愛住的，呵！好開心聽到佢話佢真係知道神既存在，感受到神一直都係保守住佢，所有既能量都係從主而來的．．．十分十分感恩呀．．．

今日一條友係觀塘返工，感覺好差．．．可能因為近日既風波確實影響了我的心情，加上工作都繁忙，所以脾氣情緒真係唔多好．．．放工後就回了屯門，因為今日誠邀姨媽一起吃午餐！我地去左食山葵日本野，好飽好飽．．．食完後返左屋企一陣，之後得知A仔已經回了元朗，於是都快回元朗看佢啦．．．始終都有點掛住佢既，呵！

回到去，A仔一邊執野一邊同我分享左好多佢既經歷，當中有好笑的，有辛苦的，有感恩的．．．我相信呢次既旅程對A仔來說會係佢人生中一個好重要既一次！我地後來同左A仔媽媽一齊出去食壽司，我因為午餐已經食日本野，而且加上胃口不太好，所以都唔係食左好多野，之後都一直冇肚餓過．．．回了家，A仔繼續執野，我都做自己的事．．．後來佢都執好野了，我地就一齊睇相相，我邊睇佢邊介紹．．．真係好正！我好鍾意D風景，而且我喜歡這些富有文化的土地風情．．．好羨慕可以親身經歷．．．不過我知道自己是沒有能力與他上雪山的．．．哈！唯有看相相吧．．．

看完相，我就將近日發生既事告訴A仔．．．我又喊了一大餐了．．．唉，A仔說得對，凡事都總有兩面的，不可以只怪是但一面，而且，佢提醒了我，如果我是信靠主的，主必定將最好的安排給我，佢一定會帶領著我行更適合的路．．．我知道的了，我而家要隨心地面對結果，不要再太執著了！唯有見步行步啦．．．

A仔叩我同佢夾下11月有冇時間去台灣．．．唉，其實而家風頭火勢我都唔敢郁住喇，睇下點先啦．．．

>>October 26, 2008 at 6:34:19 AM GMT+8

2008 年 10 月 23 日 星期四 【晴】

今日個人心情唔多好，琴晚仲無啦啦喊黎，因為真係心情十分之差，好唔想發生一點事．．．如果A仔而家係永就好了，可惜係冇囉．．．琴晚成晚祈禱，亦都聽左好多詩歌，心情都叫做放鬆了一點，但係今日個人都好似冇咩心機咁，而且有點十下十下咁囉．．．好在暫未影響工作表現同效率．．．

下午同左同事去觀塘工廠區內邊既街市食飯，食左一餐好平既三送飯，包埋送汽水，只係廿蚊超抵．．．味道都唔太差的，我覺可以接受的．．．可以日後再試．．．

今朝收到個消息，我地中心又有個同事要調職了，要調去工會工作．．．當時我聽到後想了一想．．．我不是話什麼覺得同事離開係一件好開心既事，因為始終而家係十萬火急既時候，中心而家好似打緊仗咁，D工作多到嘔，工潮日日新，大單野日日發生．．．好煩呀！所以走左一個人等同於又死多幾錢重．．．不過，我心想，這是神的安排．．．莫非，神真的是在幫我？佢呢個安排是為了我去安排的嘛？如果是的，我可能有救的了．．．不過，這只是我的猜測，結果是怎樣我仍未知道．．．都是將一切交托予神吧．．．

放工回了屯門同左媽媽姨媽吃飯，之後就回了元朗．．．好累，想早點訓．．．

>>October 25, 2008 at 3:18:53 PM GMT+8

2008 年 10 月 22 日 星期三 【晴】

唉~ 今日返工都總係趕頭趕命咁．．．琴晚最後留左係屯門，所以今朝早要早點出門口，是關今朝要返土記，怕d車有阻塞．．．點知真係中左，我出到去旺角等果架死人28m小巴等到我發火！出到去見到條人龍長到嚇死，仲要等左好死耐先至有車黎，最後攪到我遲大到，成九點三先返到去，頂．．．

係土記今朝又得我一個，好在電話不繁忙，而且同事都好快做完野都返晒黎．．．下午開始心情不佳，因為我上司同我講左句說話，令我感覺到一些對我不妙既事將會發生，或許對我在這裡既事途有影響．．．唉，天呀！點解會咁？我真係好唔服氣囉，如果佢係因為一d好唔reasonable既原因既話，我真係不能接受，我真係會反抗的．．．但係，我上司竟然同我講左一句：”你自己諗下啦！”．．．嘩，這句不但令我知道佢不會support我，更加讓我知道人情冷暖．．．唉，好心淡！但係，我又真係想清楚，我真係冇諗到佢要諗既地步囉．．．唔知呀．．．好煩好唔開心呀！冇A仔係度既日子真係難過呀．．．

A仔今日打左三次電話比我，聽到佢一切平安，只係受左少少傷，我都已經好感戈謝神了．．．而且，我知道佢在過程中曾經個人COLLASPE過，不過，最後佢心中都可以想著神，亦都知道他的一切都是從神而來的，佢所有既力量都是神所給予佢既時候．．．我真係好感恩！因為我知道，A仔終於可以有所得著了，尤其可以是知道與神之間既距離係越來越近．．．我好開心呀！好感恩．．．感謝神呀！

今晚八點食蛇宴，於是放工後約左妹妹去旺角度行左陣，都買左少少野．．．其實真係今日成日都冇咩心情同心機的，但係．．．我同自己講，都要做一點自己喜歡快樂的事，所以買左點東西安慰自己，亦都叫自己在蛇宴中要盡情食，開懷地笑．．．我做到了，我係買了自己喜歡的東西，盡情地食，開懷地笑，不過，我仍然唔開心！唉．．．心好煩，好想同人講，但係，又唔知點講．．．好想A仔即刻返到黎我身邊呀．．．越聽得多佢把聲就越想快點見到佢，但係我知道佢有好多好開心既事情想同我分享，我又唔想打斷佢既雅興，同埋好想同佢一同分享佢既喜悅，又唔想佢同我分擔我既憂慮！唉．．．煩死呀！！

神呀，我真係唔知應該點樣做好？我真係有問題嘛？我有做錯事嘛？點解公司既人要咁樣對我？究竟是什麼的一回事？佢地既決定對我又是否公平呢？原因又是否合理呢？我真係有好多既懷疑係度．．．我知我係唔應該去猜度什麼，因為我知道一切都已經由神你為我安排左，我只有靜靜地等待神你既安排同旨意！但係，有時候我真係有點不甘心！唉，我而家個心好矛盾呀！！！希望神你可以給予我勇氣同力量去跨過呢個考驗同難關．．．我願意將一切都交到神既手中去為我安排．．．以上祈求係靠主耶穌基督既聖名而祈求，誠心所願．．．

>>October 25, 2008 at 3:09:40 PM GMT+8