2008 年 9 月 3 日 星期三 【陰】

今朝本來乖乖七點三起左身，仲走左去刷左牙，不過，企左一陣個人仲係wing wing下咁，於是乎決定拎一粒鐘CL，訓多一粒鐘．．．果然係咁易訓多一陣個人精神多少少，八點三起身時好快手就可以準備到出門口，仲九點十返到中心添．．．

返到去個人好呆，食左個包再食埋藥就更加眼訓了．．．朝早都幾忙呀，D電話好似車輪轉咁，尤其搵我既電話．．．真係暈左！之後到左下午，同同事去左食沙爹王，呀，講起先諗起仲未問同事收番食飯錢添，呵！因為係我比錢的！返到去食左藥，仲眼訓，完全係頻死狀態．．．又冇心機做野，因為太太太累了．．．不過，都係堅持住．．．後來對斫進修中心同事請左我食1/4既東海堂冰皮月餅，係朱古力味，都唔錯喎！不過食左仲眼訓，係咁捽眼，哈！

好經辛苦捱到五點半放工，上到259D就係咁訓，醒左陣已經係返到屯門了．．．我知道中途係塞車黎，不過都冇理會，繼續訓，呵！因為真係好累．．．

>>September 4, 2008 at 11:27:37 AM GMT+8

2008 年 9 月 2 日 星期二 【晴】

今日慘慘，因為病了．．．是感冒！醫生話我作發燒同感冒，太辛苦了！朝早睇完醫生就回了屯門家，吃了腸粉和燒賣後就食藥訓覺，一訓已經係五點八，係A仔的電話叫醒了我．．．後來去了山景等A仔放工再一齊入元朗！

今晚約了梁芬芬食飯，好開心呢，計計下大家都好耐冇見了，上次好似都已經差不多好多個月之前既事，仲係我，芬芬同埋A仔三個一齊係元朗食宵夜飲糖水添，當時係A仔介紹份工比芬芬．．．哈，真係諗諗下係好耐之前的事了，呵！真係好耐冇見！

我地今晚去左元朗間OLIVA度食意大利野，其實我覺幾OK的，一個SET DINNER都係$70，有埋甜品，都好正架！所以我都幾喜歡呢間餐廳！過程中大家當然又係無所不談啦，天南地北的，又係大傻大笑的一番，哈哈！呢個就係我地可以做左咁多年朋友既原因，因為大家都係傻婆一名！哈哈！而且又係鍾意食野，尤其係甜品，YEAH~

食完飯，我地一齊行返去A仔屋企，因為芬芬想睇我地既婚紗相，同埋順便可以同我個囡玩玩．．．哈，芬芬好開心呀！因為佢話已經好耐冇同過貓B玩了，佢家中亦都有三隻可愛的貓貓，其中一隻係以前未戒奶時已經去左佢度了，而家阿B已經大了，不再是貓B，所以芬芬話好耐冇同貓B玩，特別玩得放同開心！

玩完同睇完相相都十點九了，所以芬芬都要回家．．．希望九月尾時可以再約芬芬出黎啦，因為到時到佢生日了．．．佢今次都有送左份生日禮物比我，不過我未有時間拆呀，可能要聽日先拆黎睇喇，真係好開心，因為我發覺身邊自己原來有好多好朋友，而且佢地個個都好錫我同愛我！好感恩呢．．．

愛時恆久忍耐
又有恩慈

愛是不嫉妒
愛是不自誇,不張狂
不作害羞的事

不求自己的益處
不輕易發怒
不許算人的惡
不喜歡不義
只喜歡真理

凡事包容
凡事相信
凡事盼望
凡事忍耐

愛是永不止息.......................

>>September 3, 2008 at 3:41:22 PM GMT+8

2008 年 9 月 1 日 星期一 【綿綿細雨】

唉．．．今日用一個字去形容．．．”累”！

琴晚成晚係度行雷閃電同落雨，攪到我都訓得唔好！而且，個囡因為曳曳，比老豆罰佢，我個心又唔安心，唉．．．總知成晚就係訓得唔好啦！今朝起身個感覺想死咁．．．返到去中心，真係好想訓！好經辛苦過左個早上，幸好今朝電話不是勁多果隻，都有點可以忙裡偷閒既時間！

下午時間，因為落起雨黎，我又帶左飯，所以同事都係下面買野返黎食就算！食飯果陣聽左陣收音機，哈！我好似極少會聽收音機的．．．不過，又幾好笑喎，好笑在，有個阿”毛”打電話去電台同個主持講對赤柱塌樹壓死少女事件既感受，而個阿毛又話自己好upset，又話自己係一班街坊中英文較好的一個，所以佢決定以英文去信當局，要求好好咁去保護日後既樹木！咁主持人又多口問佢信既內容係咩，而且仲係咁易寸左個女人話佢d英文文法係咪正確．．．哈，跟住笑話出現了，個女人讀左一次封信後，要個主持跟佢將成封信既內容讀多一次，點知個主持既英文又屎，發音啦，文法啦，又漏晒d"s"尾啦．．．真係笑詔連遍，個女人係咁捉住個主持一定要讀o岩晒先可以收！最後，因為個女人真係頂唔順主持既英文太屎，即時收左線！嘩哈哈，笑死人！真係唔可以相信，咁屎英文既人點可以做主持？不過，而家既娛樂圈都唔係咩學歷了！

跟住食完飯仲有半粒鐘，剛好個同事近日畢業BA HONS，係讀HR．．．雖然，呢個同事我一向都唔LIKE佢，不過佢出到聲話帶左件畢業袍黎想同我地映相，我都是但啦，同佢玩下囉！映左幾張，玩左一陣就夠鐘了！又要開工．．．

下午個人開始有點唔多妥，個頭痛痛地咁，唔知做乜！而且又係得我一個人，更加冇咩心機工作！因為個同事出左去做野．．．係到左三點幾有個同事做完野返黎先好少少，有點人氣！之後五點又有新解面包食，師傅真係好好人，次次教班都必定整多幾個比我地食！唉．．．一返觀塘中心就死得喇，一定肥死！唔得，真係要忍忍口了！

放工又係忙個不停，總係好似有好多無論私人也好，工事也好，都好似好多野要做，好多時都係好似係街出邊咁，無咩時間真係真真正正留係屋企度咁．．．個心有點疲累，個身就更加唔洗講．．．不過，今日既過程都好愉快！因為又有生日禮物收了，呵！係agnes b既頸錬一條，yeah~ 係妹妹送的，真係多謝佢！好貴架份禮物！hehe~

返到元朗十一點幾了，真係有點累．．．

>>September 3, 2008 at 6:38:23 AM GMT+8

2008 年 8 月 31 日 星期日 【晴】

今日係開學日，表面睇黎對我黎講冇咩關係，但係其實。。。今日返工果陣真係成街都係人，最後攪到我搭唔到村巴，要行出去囉，頂！因為今日拎住一大袋FILE呀，要拎番去觀塘用，真係想死，拎到我丫！

返到觀塘，要對住一個自己唔喜歡既同事，真係難過。。。不過，我知道神係希望我可以寬恕人，懂得去愛一個自己唔喜歡既人真係好難，我真係要好好學習了！

到左下午同同事去左食上海野，係，又係上海野，好似琴晚先食完，呵！食完繼續返公司工作！好累好累。。。因為比係土記真係忙得多！

終於放工，帶住好累既身體回屯門食飯。。。因為今日A仔同佢媽媽返大陸DUP骨，所以我都食埋飯先返囉。。。

今晚天氣突變，成晚打雷閃電同落大雨，希望明早唔好咁啦。。。

呵，頭先返元朗果陣經開七仔，見到雪榚又想食了。。。最後忍不住口，買了杯DREYERS食，呵！肥肥呀。。。要減減了。。。

>>September 2, 2008 at 3:32:42 AM GMT+8

2008 年 8 月 30 日 星期六 【晴】

話咁快就過左個八月了．．．好似覺得光陰似箭咁呀！咁又大左一歲了，呵！步入三字頭的感覺不太好吧！

今日曳曳同懶懶，冇返到教會，不過就托左爹地同牧師講我同A仔的婚期．．．如無意外牧師話應該冇問題！太好了．．．終於可以有個日子定到喇！唉．．．

今日訓到十二點呀，之後同左爹地媽咪去飲茶茶，妹妹冇去，因為佢要陪佢既仔仔，呵！我同爹地媽咪飲完茶後，就一齊入左元朗，因為今日爹地媽咪話要去探下我個囡囡．．．哈！佢地話MUI MUI好可愛，好精靈，又靚女．．．哈！真係開心喇！爹地媽咪同MUI MUI玩左好耐呀！後來，我地同埋A仔媽媽一齊出去食飯，去左食上海野，幾GOOD呀，好飽呢！

食完之後送左爹地媽咪走，就同A仔媽媽一齊行返屋企！一路行一路講起一些關於宗教的話題！當然，我都希望他日A仔媽媽都會得到神既大愛，可以成為天父神的兒女！

>>September 1, 2008 at 11:50:55 AM GMT+8

2008 年 8 月 29 日 星期五 【晴】

今日返工都基本上holiday mood了．．．不過都幾慘，十一點就去左聽一個talk，題目係：北京奧運對於中國未來發展及展望．．．嘩，聽到個題目都想訓了！如我所料，都係一場大龍鳳！基本上係比一個場合d人係度刷鞋，真係唔喜歡呢類既場合！

一聽到d同事係度刷晒鞋咁既時候，我就好想講出自己心裡面既說話出黎．．．不過，自己係度既年資又淺，始終都係唔太敢講咩野！但係，我又會係d長頭草囉，我一定會有番自己立場，只不過係唔會特別出聲講咁，不過個樣就一定比到人知我係好唔like果隻囉，因為，我好易黑面的，哈！

完左場大龍鳳後就放工了，放工後就入左屯門市中心，約左妹妹去剪頭髮！本來約左妹妹兩點三，諗住食埋野先三點鐘上到去，點知妹妹又遲到喎，我唯有去搵食先啦！嘩，去到間間野都係幾十人係門口等架，真係唔掂，都唔知點解兩點幾仲係咁多人？最後，去左一間我地估一定少既既地方，茶軒，度食！因為，呢間野實在唔好食，相信一定少人，點知去到如我地所料，係好多位囉，哈！

食完野就去左剪頭髮！今日好多人，所以都要等左陣！後來三點九，媽媽打來話佢同嬸嬸都想黎電髮，所以佢地四點半黎到，等埋佢地，最後成七點幾我先同妹妹攪掂，難為堂妹等嬸嬸等到傻左！於是乎我帶左堂妹落去市中心行下街先，邊行邊等！真慘，又餓又累呢！最後成八點幾先走到人！

回屯門碼頭即刻去食飯啦，好在爹地一早去左搵位，叫晒野食，我地去到好似餓狼咁係咁食，哈！爹地都驚左我地！食完飯，我買左雪榚請大家食！真係好開心同好享受一家人食飯既樂趣！

回到家，好忙咁執野，因為明天又要拎野過去A仔度．．．今次想住到二十號，因為二十二號一連一個星期媽媽會去左日本大阪旅行，所以我都要回一回家協助理波波貓同屋企大小事務！哈，靠妹妹，一定死得人多！媽咪係咁講的！

>>August 31, 2008 at 6:06:04 AM GMT+8

2008 年 8 月 28 日 星期四 【晴】

今日好累呀，是關琴日都夜呀，唔係好夠訓啦．．．累呀累！

今日好忙，D電話查詢多到嘔．．．近日有身心疲倦的感覺！好在下午可以返一返土記，叫做抖一抖，走一走咁．．．返去土記食國慶茶聚，哈！又係可以大吃一餐了，不過又要肥肥了！近日成日都因為壓力大，好想搵方法舒緩！而唯一一個方法，就係食自己鍾意食既野．．．近日真係係咁食．．．好肥呀！

放工後，去左旺角行，因為今晚約左A仔帶班細路上紫藤參觀！完左個活動，同A仔行左陣旺角就走人回元朗了．．．好累呀！好在坐68X都好快，都好舒適！可以抖下啦！

>>October 2, 2008 at 12:48:36 PM GMT+8

2008 年 8 月 28 日 星期四 【晴】

今日返工好眼訓，因為同樣係夜訓架．．．琴晚食完雪榚都已經係十二點幾了．．．頂！今朝好忙，一係一個電話都冇，一係就係正我要出街去做野時就走左幾個WALK IN入黎，真係忙死．．．攪到我遲左出去做野！

今日出街站，好在搵個地方不是太熱太晒，而且人流多，好快就派晒D小冊子了，真係好喇！之後就去左麗晶花園果頭食飯，去左椰李閣食！食完就回中心了．．．又係捱到放工．．．放工後即時回屯門，好眼訓，在巴士上已經訓著左，醒果陣剛好回到屯門，真係十萬個不願落車！回到家中，好早有飯吃了，吃完飯，都好想訓．．．不過，唔知點解到而家十一點都未訓囉，呵！

真係要訓了．．．

>>August 29, 2008 at 3:02:20 PM GMT+8

2008 年 8 月 27 日 星期三 【晴】

WOW~ 今日好眼訓呀．．．因為琴晚夜訓丫嘛！今日十分缺乏精神呢，好辛苦呀！

今日真係感謝神．．．原本放工後仲要開OT的，後來取消左，真係感恩呀！因為今日真係超超超累呢．．．真係要好好休息！放工後，去左旺角行了一陣，買了點東西！希望A仔會鍾意啦！

放工後原本回了屯門架喇，食飯期間A仔打來，話想我去接佢放工．．．所以食完飯就去出門口了！真係衰，今日係冒住生命危險咁去接佢放工囉，因為落樓之後，係街度遇到個單車仔，佢見左我一眼後，本來已經走左，之後就查住架車返番轉頭，同我講左一D好性騷擾的說話．．．真係想xyz)$%_q%+@#%)佢．．．．我當時好驚，佢仲話：咁夜出街，你唔怕比人非禮呀？嘩，我果刻真係驚到死，唯一既方法就係怒bear住佢，一路行一路bear！其實，我只係想望住佢有咩行動，而唔係真係咁大膽去bear佢囉．．．我一路望住佢，佢就同樣望番我，超驚呀！後來，當我去到一個地方係見唔到佢時，我就即刻係咁跑喇，真係想死．．．

去到山景，就等左A仔好耐，我都同左媽咪同埋A仔講呢件事，佢地同埋我都唔知點解，我成日咁多桃花，係街成日已經比人無啦啦係咁望，仲要非禮同性騷擾．．．好討厭！返到元朗，好想TUM番自己，於是去左百佳買雪榚食，我地買左盒DREYERS食，正！又係一個藉口去放縱自己吃了．．．今次越來越肥，都已經唔再敢上磅了．．．

>>August 29, 2008 at 2:58:07 PM GMT+8

2008 年 8 月 26 日 星期二 【晴】

今日係自己生日，其實都唔應該咁低能祝自己生日快樂的，哈，不過，我都會祝自己生日快樂的．．．呵！

今朝早又係要去勞審處做野，不過，都ok輕鬆的．．．做完野之後就回土記，去左食自己最愛的擔擔面．．．正！今日難得生日，比自己放縱一點吧！之後好經辛苦地捱埋個下午去，哈！因為已經唔多想做野！

係五點半前，我已經見到個傻佬係我中心門口度行來行去了，哈，呢個當然係A仔啦．．．佢今日等我收工呀，真係感動，係咁耐以來的第一次！不過，佢仍然想做住隱形人先，唔想比同事認識佢住．．．不過，最後都係比一個同事見到，呵！真尷尬！

之後，A仔好神秘咁帶左我去TIMES SQUARE，原來佢帶我去一間意大利餐廳食飯，呢間餐廳叫做”鰲”，係專食蠔的．．．佢有個蠔吧係度比人客去揀蠔的，好正！不過我一向腸胃唔好的，所以最後都係叫左半打焗生蠔！有三款味，包括莧菜，芝士同煙肉，好味到爆！除此之外，仲叫左個頭盤，係蜜瓜夾奄肉，同樣好正！仲有，我至愛的意大利包包，點住橄欖油同甜醋，至GOOD的配搭；最後主餐我地就叫左個PIZZA，同樣係VERY GOOD呀！最後當然食到飽飽啦！

食完飯，就係收禮物既時候，呵！今次又開心又激氣，因為比A仔玩我，佢由小禮物送到大禮物，玩到我暈陀陀，哈！佢就玩得開心，我就比佢激到暈左．．．不過其實係好LUM，哈！收到好多份禮物，主要係agnes b的產品，包括化妝袋，香水，同手袋chain，仲有一隻豬仔餅，佢話係美真香見到時覺得想起我．．．哼，我做了一隻豬？激氣！仲有一份係A仔家姐送的，係一條頸錬，同樣精美．．．

收完禮物好開心，我地仲行左陣街，係CITY SUPER買左野，之後就返元朗了．．．本來打算搵地方食雪榚的，但總知最後都冇食到，激死！返到元朗已經好夜了，不過今晚真係好開心．．．

返家途中不斷收到電話同SMS的祝福，真係感到自己好幸福同幸運，身邊係好多人錫自己的，有好愛我的屋企人，未婚夫，好朋友，好兄弟姊妹．．．好想講一聲：”多謝你地呀！我都會錫晒你地架！．．．

>>August 29, 2008 at 2:47:39 PM GMT+8