2009 年 1 月 6 日 星期二 【晴】

嘩~ 今朝又一早起身了，近日唔知點解都仲係要早起．．．都好既，唔洗令到個人懶晒！不過係夜睡早起呢，都辛苦架！今朝一早就出去佐敦，約左大表哥同表嫂出去食早餐！媽媽真係”錫”，到我爆，叫我幫佢搬一大袋野出去比姨媽，裡面全部都係褲囉，仲係要牛仔褲果隻，你話重唔重喇！仲要最後加多一盒佢自制既上海年榚添，真係錫到我爆，驚我我唔夠重！唉，拎到我傻下傻下．．．好在出到去即刻比袋野大表哥拎，如果唔係死左！

我地去左澳洲牛奶公司度食，今次唔係第一次去架喇，不過感覺好唔一樣，d野既質數好似差左少少咁．．．我食左個快餐，其實佢果度只係得快餐，早餐同茶餐揀，而內容都係有多士，蛋，通粉，只係睇下你飲什麼？快餐就係飲熱OR冷鮮奶，我就揀左熱啦，都幾GOOD的，幾香幾濃奶味！好叻呀我，飲完冇BU BU肚仔痛喎，哈！

食完早餐，同左大表哥去拎相，佢地晒番佢地之前結婚時既相．．．睇番真係好羨慕佢地咁SWEET~ 見到佢地係教堂內行禮既相相，就問自己．．．我有冇呢個機會呢？我會唔會都搵到一個百份百愛自己愛自己既人呢？．．．心突然一酸！近日，大表哥表嫂成日都問開有關我結婚既事，我都唔知點答佢地好？！唯有是但點下頭笑一笑就算．．．唉！唔通同人地講：而家四月可能結唔成婚？！．．．到時一定比人問到天腳底都要問清楚點解囉．．．好怕好怕！好無奈！．．．所以，我比較喜歡細表哥，佢比較明白我，我只係有時向佢打一個眼識或者表情，佢已經知道我心想講咩喇，佢即時就會停口．．．真係好多謝佢，佢真係一個好好既表哥，佢好體諒同明白我．．．好想錫佢一啖！

之後，上左姨媽屋企hea左陣，一點就出門口，同表嫂去大角咀果頭，因為今日佢要上化妝堂，我要做佢既model．．．初時都有點擔心架！一去到，原來佢係一對一果隻上堂，都冇咁驚．．．個導師個樣應該都幾年輕下，我估三十歲分分鐘都冇既女仔！佢既化妝技巧就．．．well~ 坦白講，我覺就麻麻喇，不過表嫂就好似當佢神咁拜囉．．．我覺得都係普通一個化妝師，只係呢個女仔佢而家有幫janice man化開，好似出名少少咁！

咁就比表嫂玩左我個面四粒鐘喇，係整整乖乖坐左係度四粒鐘．．．好在，出到黎都唔係咁差！我有半邊面係個化妝師整，半邊係表嫂整既．．．好在有化妝師係度執手尾，我唔會鍾無艷！哈，講笑咋，其實表嫂作為初學者黎講算唔錯，只係今日知佢精神唔太好，有少少失手咁o者，哈！之後，同表嫂打的出左去旺角中心行街，之後join左大表哥，陪佢地兩個去掃貨！正確黎講只係陪表嫂掃貨，哈！我自己只係買左一塊$10既鏡，因為舊果塊爛左！

跟住七點半就去左新世紀間simply thai喇，因為book左位呀．．．我地叫左雞肉柚子酸辣沙律，軟殼蟹米紙卷，椰汁雞湯，泰式濕炒豬肉河，後來仲叫多一個菠蘿炒飯，同埋甜品，香蕉布甸加雪榚．．．好飽飽呀！今餐又係大表哥請，真係多謝晒！食完之後大家行左陣，都感到好累了，可能大家都有點病，決定九點就散會了！各自回家！

返到屋企我就大工程囉，要落妝，落左好耐先至好d，真係辛苦！最後十一點幾都頂唔順要訓了！

>>January 8, 2009 at 3:32:34 AM GMT+8

2009 年 1 月 5 日 星期一 【晴】

今朝九點就比媽媽嘈醒左，其實琴晚十一點訓，都係時候要起身，不過因為整晚都鼻塞，所以真係訓我唔多好．．．後來，再繼續訓，一訓就十一點幾了！跟住十二點半收到A仔既電話，大家講起貓B．．．A仔話佢地決定左收養者了，都係認為頭一個女士比較適合，因為佢除左睇得出好錫貓之外，佢同佢先生都有養貓經驗，而且家庭背景又相當適合，加上，佢係唯一一個黎睇貓B既人，貓B係會主動去親親佢的，所以咁證明左佢地係有緣份了．．．

實在太好，幫貓B搵到個咁合適佢既家．．．我祝福貓B佢可以一生都永遠幸福快樂！貓B佢星期六就要走了，真係都有少少唔捨得佢，因為佢個樣實在太可愛了．．．所以我星期四都會再去探佢，同佢映多D相相，同佢再玩玩．．．A仔講得O岩既，我地用幾百蚊既錢，預期係食左之後都唔記得左，不如去做多一點有意義既事仲好啦！咁樣又可以救到一條小生命了，真係好感恩！感謝神！比我地同貓B可以相遇，我地又可以為生命加添了光彩．．．都係一種緣份黎既！所以我地好相信，冥冥之中神真係為我地安排左好多好多野．．．

今日既鼻塞情況仍然嚴重，後來媽媽今朝幫我去藥房度配左藥比我食，而家食左三次了，好似鼻塞問題好了點，開始都伸到下鼻水，當然鼻就繼續都有塞架喇．．．而咳都好似好了少少！唔，希望可以快點好番，我要星期四去睇貓B呀，仲有去見A仔．．．

琴日去見工時，果度有間書室，所以都順便行左陣．．．買左D野比A仔！呢樣野對佢而家面對工作上既困難同問題好有幫助的．．．希望真係幫到佢啦！另外一樣就係可以改善我地男女之間關係既野，我都希望真係可以幫到我地，改變我地既有既看法．．．

聽日會好EXCITED，因為會幫我大表嫂做MODEL．．．佢今次返黎香港其中一個任務就係要學新娘化妝，當然我都將會成為佢既白老鼠之一啦，呵呵．．．不過冇所謂既，當玩下囉！唔知聽日個樣會攪成點呢？要帶定相機先得，哈．．．

>>January 6, 2009 at 3:08:03 PM GMT+8

2009 年 1 月 4 日 星期日 【晴】

wow~ 今朝九點就起身喇，但係琴晚係一點半先訓得著囉，因為成日都鼻塞，塞到都訓唔到，就黎死喇．．．今朝咁早起身，因為今日約左美國回來既大表哥，表嫂，姨媽姨丈，二舅舅二舅母．．．出去油麻地飲茶！呢餐茶最後連爹地都黎埋囉，最後飲左成兩粒半鐘，哈！

飲完茶之後，我同左爹地媽咪去左永安行左陣，之後爹地要返工了，走左，我就陪媽咪去裕華度買野，買完之後就陪媽咪行番去旺角果頭，到左旺角，我就自己一個搭地鐵去金鐘，因為今日要去循道衛理2nd in呀．．．三點九已經到左，好在總幹事都願意早十二分鐘見我．．．

成個見工過程都好特別，因為總幹事，盧牧師佢，主要都係想了解多少少我信仰既想法同背景，多過係我經驗同學歷！所以好攪笑．．．呢個盧牧師言詞都好勁，我都比佢d言風傷到架，所以都唔知自己會否成功！唯一只可以將一切交托予神啦，如果神認為呢個職位合適我既，想使用我作為工具去服務人群既，呢個位一定去唔甩既．．．而家只有在等待，等待回音，等待神既差遣！

今日成日都係超鼻塞，好辛苦！完全係冇好過囉，d鼻水係完全伸唔出囉，唔知想點？！幾時先可以冇事？太辛苦了．．．有什麼方法可以解決鼻塞問題？．．．

>>January 5, 2009 at 2:10:10 PM GMT+8

2009 年 1 月 3 日 星期六 【微冷】

今日好在冇之前幾日咁凍了，真係好，唔洗著咁多衫．．．因為著得多衫個人好辛苦！今日個人好辛苦，朝早起身時已經係抖唔到氣，因為個鼻好塞好塞，係塞到頂點果隻，無論點整都係抖唔到氣，唯有係用口去抖氣．．．d鼻水係永遠都伸唔出果隻囉，想死！其實d咳已經好在少少，喉嚨都冇咁痛架喇，而家反而好似係傷風多囉．．．一直都以為自己只係咳同喉嚨痛咁大把．．．唉！

今朝收到A仔既SMS我先知道，佢由琴晚至今朝都打過比我，但係一直都搵唔到我喎，我諗黎諗去都唔明，個電話明明冇叫過，點解呢？後來先記起，原來我係廣州番黎香港之後，換番張電話卡後，都唔充記得左飛番條線囉，頂．．．所以邊個搵我都一定搵唔到，唯一係SMS先搵到我，都好在A仔講一講SEND左個SMS比我先醒起，真大頭蝦！攪到A仔搵左我咁多次都搵唔到我添．．．

A仔話我知今日會有兩個人去佢度睇貓B，果兩個人都有意想收養貓B的．．．不過最後A仔話只有一個人黎左，而另一個會明天去．．．A仔話果個人都好有心想收養，而且都幾合適，不過都想睇埋聽日果個人點先再考慮下．．．希望貓貓早日可以搵到個合適既家啦！

>>January 4, 2009 at 3:51:53 PM GMT+8

2009 年 1 月 2 日 星期五 【乍雨乍晴】

香港天氣同樣係寒冷，真係討厭！今朝十點就起身了，其實都辛苦，係咁咳，琴晚差點以為自己發燒，好在探過都冇事！而家只係喉嚨痛同咳，有少少感冒情況出現．．．唉，曾經諗過今日唔去A仔度同貓B睇醫生，不過又應承左人，而且又急住同貓B映相相放上網，幫貓B早日re-home．．．冇計，最後決定去左．．．我十一點七去到診所join佢地，貓b又真係好可愛好靚女，面仔同眼仔都圓圓的，相信re-home應該唔太難既．．．醫生話貓b情況不是太差，只係有少少貓瘟，同埋耳仔好多蚤，一星期後如果冇事可以去打預防針同杜蟲了．．．都幾好丫，不過錢就係咁飛走了．．．本來用來同貓貓妹妹睇醫生既錢都飛左去了，唉！

之後睇完就返左元朗家，大家要為小貓b去setlle一齊，連貓妹妹都差點沒時間理會．．．而我就好努力咁幫A仔去整poster同7放消息出去，坐到我腰都直埋先做好．．．連水同野都冇點食過呢．．．攪完都已經五點半有多，之後仲話出去一間寵物診所度探左一隻狗狗，隻狗之前都係流浪過，有人執左佢返黎，發現佢頭部比食肉烏蠅咬到爛晒，仲要有蟲走出黎，好恐怖！睇完狗狗我都回屯門了．．．回到去就同屋企人出去食飯，不過真係唔太舒服，所以成日都發左屋企人脾氣，真係唔好意思．．．而家食左藥，又好似好了一點點咁．．．希望快點好番，因為星期一要去2nd interview呢，我要以最佳狀態示人呀．．．

>>January 3, 2009 at 4:04:14 PM GMT+8

2009 年 1 月 1 日 星期四 【乍雨乍晴】

今朝成十二點先起身囉，是關琴晚睇叱吒睇到四點半先訓，最後當然只係得番我同細表哥繼續戰鬥落去，其他人睇睇下都訓晒囉，哈．．．我訓到連妹妹朝早八點幾起身出門口返工我都唔知囉，最後都係透過人先知道妹妹十二點半已經返到香港喇！呵呵．．．真係失敗！連自己妹妹都冇理到添，hehe~

之後，成班人出左去食brunch，去左食粥同拉腸，係廣州最出名之一既食物，好正！佢有好多特別既拉腸，什麼魚片，牛腩等，好正！跟住，大家就出左去一條街叫康和路既neway度唱k，果度有間家樂福的，都好大下，曾經行過下咁啦，下次有機會都可以去果頭行！係neway唱k都好平，一個人頭$32人仔，包一個小食，而野飲要另叫．．．其實每人平均都係$50左右，都ok平架！唱到半路，其實我好唔想唱喇，其實今朝起身好唔舒服，應該話琴日開始唔知乜事，已經係咁咳，個喉嚨痕都飛起，而且仲痛痛圩添，唔知咩事！今朝起身直情死左咁，喉嚨痛到飛起，把聲沙左，又咳到死死下．．．所以都唔想再唱了，太辛苦喇，而且A仔又叫我幫佢買皇上皇既豬肉乾，所以索性話出去行下，點知細表哥，堂弟妹都話同我一齊去，於是我地一行四人打的去左上下九路行街街．．．我覺得呢個時候係我最FREE既時間了，哈！可以四圍行，買自己喜歡既野，睇自己想睇既野，GOOD~ 因為之前成大班人咁，雖然我地最後都分開行（係我同細表哥妹妹一組），不過都好似唔多好意思咁．．．哈！

我地係上下九路先去皇上皇買豬肉乾，好多人排隊買呀．．．仲要唔比自己揀添，好衰，可能太多人了．．．買完我地就去左行街，堂弟妹買左好多野，佢地好開心，因為可能用美金計番，真係平到笑．．．我聽番佢地講，美國D野真係幾貴好唔抵，一對絲襪都要成一百蚊港幣，而家一對$15人仔OK喇，所以真係平到暈．．．我地行完就再打的，去食晚飯果度JOIN佢地，我地都算係叻架喇，可以自己打的去到，哈！去左一間叫六千館度食，係食上海菜的，都唔錯，佢食物質數幾好，唯獨係D服務員質數差D．．．其實唔只呢度，係成個廣州既服務員質數都好差囉．．．D人好似懶懶閒咁，講野做野半知半咁，好麻煩，成日要我地三吹四吹，又要講黎講去都先明，仲要教埋佢路點樣先醒D，唉．．．

跟住食完飯我地就返去廣州東站了，九點鐘火車，返到深圳十點有多了．．．其實都好累，細表哥在火車都訓著左，而我都唔係太訓到，因為喉嚨好辛苦，係咁咳，好辛苦！跟住去到羅湖就同細嬸一家分開了．．．同細表哥自己走！

上左上水小巴後，同A仔通電話，知道佢媽咪今日係元朗執左隻貓B返屋企，話貓B好慘，仲話聽日同佢去睇醫生．．．我聽朝都會去的，希望起到身啦，因為太累了．．．

>>January 3, 2009 at 3:55:21 PM GMT+8

2008 年 12 月 31 日 星期三 【乍雨乍晴】

嘩哈哈~ 今朝七點三就起身了，因為約實左九點要係上水度集合呀，妹妹仲早過我十二分鐘起身！最後我地八點三就出門口了！上到小巴跟住就收到大表哥既sms話佢遲到，真激氣！去到上水，先join左細表哥先，之後再join埋大表哥佢地．．．今次既旅程參加人物組合好古怪，包括有我，妹妹，大表哥，大表嫂，大表哥既細嬸同埋堂弟堂妹，仲有細表哥．．．我地一行八人一齊去．．．其實，最大既問題係．．．大表哥既阿嬸，因為大家年齡差距問題，令到好似之間會發生好多問題咁．．．不過幸好，整個過程我同細表哥都好識大體，好識做，都令長輩ok滿意啦．．．因為我地好清楚呢個auntie係一個好細膩既人，所以更加打醒十二分精神！唉，所以對住佢都有點兒壓力架！

我地到左步之後，大表嫂既爹地媽咪就揸車黎左接我地，我同大表哥，細嬸，堂弟堂妹坐uncle車，而其他人坐公共交通工具！我地先去一間叫母米粥既地方食lunch，呢度係馳名用一d煮到冇米既粥做湯底去打邊爐，其實之前都食過一次，真係幾good架！之後，大表嫂帶左我地去烈士陵園站附近既mall行街，我地係果度間jusco超市買左好多零食囉，哈！之後，我地又去食晚飯了，我地是晚食葡國菜，食左個超大既疏乎里，好good呢！當然仲有好多好味既野食啦．．．食完野就回祈福新村了，之後去左dup骨！我咁大個女第一次比人踩背咋，係按摩師主動話幫我踩，我話唔好踩背脊，所以佢只係踩左我個pat同埋對腳．．．其實又真係踩完幾舒服既，唔錯架！但係踩腰背就唔好了，我怕自己受唔到個力．．．

今晚我同細表哥妹妹打算返去屋企後睇埋個叱吒音樂頒獎禮先訓，所以係祈福果d 24小時便利店都買定晒d零食野飲，諗住開個小型p咁啦．．．yeah~

>>January 3, 2009 at 3:40:38 PM GMT+8

2008 年 12 月 30 日 星期二 【乍雨乍晴】

（一）1:30PM

嘩嘩~ 今日極之凍呀，真係好凍呢．．．今早chk email時知道A仔佢病左，仲日日冇時間食飯，好忙咁工作．．．我好肉痛呀，唉！心想，點解佢中心其他人唔會幫手架？其他人死架？邊有可以咁架，佢老細做咩人老細架？要個同事日日返三節之餘，仲要捱更抵夜咁同佢做PROJECT，半夜三四點起身幫佢做野，又成日忙到連食飯時間都冇咁．．．！！我真係好肉赤呀，點解其他人就可以遊手好閒咁等放假，而A仔就要咁呢？我好唔抵得其他PK同事，點解咁唔公平？係咪做一個有責任感既人就係要咁可憐？我真係唔明．．．我真係好想呢一班人得到懲罰，要佢地知道佢地係幾咁PK！而家終於捱出個病喇．．．呢間中心既人真係正PK！太過份喇！！！

琴晚我都訓得唔好，波波貓唔知咩事，成晚都走來走去，又係度叫，知我未訓就成日入黎我房度叫我陪佢，我抱佢上我床陪我訓，佢又唔肯，最後攪來攪去都係要一個人出番去廳．．．攪左我粒幾鐘，最後成三點半先有得訓．．．唉，其實琴晚心情都唔太好，因為太擔心A仔了，知佢忙，但係自己又做唔到D咩幫到佢，覺得自己好冇用！但係又唔想令佢感到我煩住佢喎，真係有壓力架！唉．．．

一陣會努力整D野，之後就會六點去接A仔放工，可能要同佢去睇睇醫生了．．．唉，好擔心佢呢！希望佢而家都有時間食下飯啦．．．病左更加要食野架嘛，如果唔係點會好喎．．．
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

（二）　11:45pm
好開心呀！今日下午努力整個檸檬芝士蛋糕，成功了！之後就同左媽媽落街食野，食完野就返屋企同個蛋糕埋埋個尾去，跟住就出門口去A仔中心度接佢了．．．接左佢之後我地一齊返左元朗，跟住我就煮左個晚餐比佢食，因為知佢好病好累呀，所以今次比佢做大爺啦！之後，我送左份聖誕加我地相識十周年既禮物比佢，佢好鍾意，尤其係條地圖手巾．．．唔知佢睇完兩張卡之後有咩感受呢？呵呵．．．仲有個蛋糕佢都好鍾意，佢都話好味！YEAH~ 跟住同A仔一齊上youtube，A仔比我睇左條片，係佢之前做義工嘉年華時唱歌表演既片段．．．嘩，好威呀！型仔喎，唱得都好聽呢．．．好勁囉，可以上youtube．．．yeah~

跟住就走人回屯門了，因為聽日一朝早要上廣州了，九點上到上水！要早起呢．．．

在此，祝各位新年快樂！心想事成！身體健康！

>>December 31, 2008 at 5:36:22 PM GMT+8

2008 年 12 月 29 日 星期一 【乍雨乍晴】

wow~ 今日既天氣睇住佢慚慚凍咁，好可怕呀！好凍好凍呢．．．真係唔鍾意咁凍既天氣，攪個人咩野動力都冇晒！

琴晚半夜兩點半，無啦啦唔知乜水打電話黎，嘈醒晒全屋人．．．媽媽當時狂喂都冇人應，朝早時chk番又唔知個電話係乜水喎，真係激氣！真係有d野打番去睇下下邊個！

今朝十點就起左身了，做了點運動，上下網就一個朝早！之後同媽媽落左去食野，因為商場新開左間日本野，叫夢工房七福神．．．其實係元朗都有，我之前都有食過．．．d野都ok好食既，不過我覺得可以再好d囉，哈！之後，同左媽媽買送，跟住返屋企我就開始一個大工程，就係整甜品．．．係芒果忌廉糯米茲！嘩，整到手都軟埋，因為d忌廉我發左好耐呀，始終用人手打真係慢好多．．．睇黎要考慮買番個電動打蛋機先至得喇！而家隻手仲軟緊囉！

下午食野果緊接到個電話，係之前循道衛理中心果度叫我2nd in．．．約左下星期一去見！有點期待又有點緊張．．．希望可以成功啦！我都對呢份工有點期望的！願神可以給予呢個機會我，亦希望呢份工會係神所喜悅既工作！

>>December 30, 2008 at 2:30:00 PM GMT+8

2008 年 12 月 28 日 星期日 【雷雨】

今朝十點唔夠就比一個電話嘈醒左，其實九點半果陣媽媽已經叫醒我一次架喇，不過因為琴晚唔知點解無啦啦訓唔到，成三點幾個人都係展轉反則咁，好辛苦囉，所以今早都唔係好願起身！後來十點就係比呢個電話嘈醒左．．．不過，呢個電話係一個good news電話，因為係我從美國回來既表嫂打比我的，哈．．．所以好開心呀！大家傾左一陣，又講低1/1大家點join，真係好期待去廣州，好想盡情咁去玩同relax呀！！！

之後十二點幾，美國回來既大表哥call我，佢話表嫂佢遲d有d時間要去學化妝，要去上堂，所以佢會有好多時間都會好無聊，所以講定我知隨時會搵我出去．．．哈，我又無所謂呀，反正我都係得閒，而且出去又有人豪既，又ok喎，呵呵！

跟住兩點半同左媽媽一齊出門口，入左元朗，我地去左食野，之後行左陣，跟住我就上左A仔度，拎番D野返屋企．．．只係拎左好少部分野，已經係極重了．．．今日為左貪方便就冇拎個筴，所以拎左兩個HANDCARRY．．．好在媽媽係度幫手，如果唔係我拎死左了．．．返到去元朗，見到貓貓妹妹，好開心，因為已經有一小段時間冇見過了，佢好似又大隻左少少，而家圓潤左好多，有肉地左，見到佢好開心，佢仍然係好活潑，不過佢冇曳，仲親親我添，好開心！呢種感覺好耐冇了！唉．．．心中突然一沉！唔知幾時先可以再有機會探妹妹，再同妹妹去玩玩了．．．個心好UP！

返到屯門，忙於執理拎番黎既野，之後個人好累，唔知點解？可能．．．今日係姨媽到訪的1ST DAY卦．．．好累好累．．．之後係妹妹張床訓著左，訓到食飯先起身！而家個人都仲好累好累！剛才，細表哥EDMOND打比我，話1/1想再約早點集合時間．．．嘩，要九點係上水等囉，真係可憐！31/12睇黎都唔可以咁夜訓了！而妹妹頭先同我地講，公司又大地震了，上頭大老細要佢地部門又交人出黎去裁！妹妹佢好擔心，所以2/1本來想拎全日假同我地去廣州都唔太敢，而家唯有拎上半日，下半日返工啦！唉，而家咁既時勢，真係幾令人擔心，好似返番去果陣SARS咁，我自己都好擔心呀，而家係工作上都未有著落，唉．．．都唔知點好？！可以唯一既係多祈禱，希望神可以為我早日安排合適既工作比我啦！

>>December 29, 2008 at 3:03:56 PM GMT+8