2008 年 8 月 25 日 星期一 【晴】

今日係爹地生日，係度同佢講聲生日快樂！祝佢身體健康！工作愉快！

今日繼續返工，不過冇咩mood工作吧！今日下午時間出左去拍野，因為我地宣傳部話要幫我地中心拍條片，盲　搵左我同另外兩個同事做主角，今日就出左去拍喇．．．真係好辛苦呀，因為實在又熱又晒呀！想死．．．咁就拍左幾個鐘了！好在，我地去左深井食lunch，哈，真係冇想到去左咁遠食飯．．．哈！

完左返中心，都已經唔多想做野了，一直係度等放工．．．

回到屋企，好累，訓左陣先食飯．．．今晚妹妹買左個細蛋糕回來，話要補番數同我同爹地慶祝生日！因為佢上星期六冇返黎同我地慶祝同切蛋糕呀！今日妹妹買個蛋糕好好味呀，係我至愛的朱古力呢．．．多謝妹妹呀！！

明天就到自己生日了，真係有點無奈，因為要人生要進入新的階段了，哈！

>>August 29, 2008 at 2:33:37 PM GMT+8

2008 年 8 月 24 日 星期日 【晴】

今日一朝早去左勞審處做野，點知個工友遲大到，等到我丫．．．我真係唔喜歡d人對於自己既事唔著緊，成日老鳳咁諗住有人地幫佢就可以，自己唔洗出任何一分力！真係討厭！

不過，今個星期靈修既主題係”饒恕”，所以我真係要好好學習同改善！

放工後回屯門，今日好累呀，要訓訓了．．．

>>August 29, 2008 at 2:27:56 PM GMT+8

2008 年 8 月 23 日 星期六 【晴】

今日一朝早起身返教會，真係感謝主，我地開始崇拜前天氣都好好的，有太陽架．．．後來一開始崇拜時，個天就開始落雨了，而且係好大雨添．．．但係，係我地完結崇拜前，突然又停晒雨，個天又開始光番！所以，真係好感謝主！

完左崇拜，我地就準備今日去探訪老人院既野了，真係連食飯盒既時間都好短，好快手咁吞左半個飯盒落肚就算了！食左都好似冇食過咁，哈！上到車，又要急住同D教友做BREIFING喎，真係忙過不停呀！終於到左，感謝主過程十分順利，而且氣氛都幾好，真係好了！希望我地可以真係將神既愛帶到每一位公公婆婆身上啦！

完左個活動，我同爹地媽咪都回屯門，回到屯門碼頭去左大快活食左個豐富既下午茶，好飽呢，當時係五點．．．所以大家都諗住可以遲點才吃飯了．．．一直在家等待住奧運既結幕禮開始，終於開始時，睇左陣先開始食飯．．．結幕禮真係好正，今次中國真係有晒面子了！身為中國人都感到驕傲呢！

>>August 24, 2008 at 2:44:59 PM GMT+8

2008 年 8 月 22 日 星期五 【晴】

今日返工都已經係holiday mood了，都唔想做野，加上琴日又無啦啦放左日假，更加冇心機做野啦！成朝坐左係counter，都唔係好多電話聽，好呆豬咁渡過d時間啦．．．本來，一直諗住27號生日果日要堅持休市一天架，點知．．．唉，做唔到了，27號果朝仲要去勞審處落案呢，頂！唔開心呀！！原本想好好休市一日架嘛！．．．放工後就返屯門了，返到去約左媽媽去食野，食完野我地就去左買送，為今晚既生日會作好準備！

今晚食西餐，買左好多正野，有牛扒，有煙鴨胸，煙三文魚，意粉，自製羅宋湯，炸薯角．．．實在太豐富了，食左好多好多．．．A仔今晚都有黎同我同爹地慶祝生日，爹地送左份禮物比我，係我今年生日既第二份禮物，因為第一份係好姊妹送既，哈！食飯時間，我地係度睇赤壁，真係好正既場面，爹地都睇到津津樂道咁呀！之後，我地就切蛋糕，好美味既芒果蛋糕呀！正．．．食完真係好飽！之後，好唔捨得咁送A仔走了，因為佢聽日要帶隊去深圳呢！

>>August 24, 2008 at 2:49:12 PM GMT+8

2008 年 8 月 21 日 星期四 【驟雨】

嘩嘩．．．今日真係大打風球呀！我七點三起身時，仲係三號的，不過話左八點前會掛八號了，所以就繼續安心地訓．．．訓到十一點半起身了，AUNTIE話佢自己約左朋友去飲茶，於是乎我同A仔就決定在家好好執拾一下間房，因為都係時候要執執了，太多塵吧！之後到左一點幾話掛九號了，真可怕！好似香港好幾年冇掛過九號了，今次的風真勁，直吹往香港之餘，仲要在屯門，元朗等地橫跨，所以我地屋企都吹得好應風呀！

我同A仔執好野已經三點幾了，於是再落街食野．．．本來想去飲茶，點知見到茶樓都關了，只好去大快活度食下午茶啦！食完之後，我地坐住單車遊元朗！雖然好大風，不過好開心！有點似天若有情，哈！跟住因為太大風同雨，所以都係回家了！

夜晚在家吃，睇住奧運，時間好似過得好慢咁．．．上下網，傾下MSN，咁就到十點幾了！

>>August 23, 2008 at 10:39:59 AM GMT+8

2008 年 8 月 20 日 星期三 【驟雨】

今日照常返工，不過就累到要死咁，真係A仔所講既”頻死狀態”．．．哈！好似行屍走肉咁囉，完全唔知自己做乜咁，真係．．．好在，今日冇咩特別野，可以在公司輕鬆渡過！

放工後，同同事去左食野，真係開心的過程，同事順手幫我慶祝埋生日，哈！真係冇估到，無啦啦夾左人上轎幫我慶祝，呵！不過過程開心的！

今晚已經三號風球了，同事話明天一定沒有九號都有八號風球，所以今日好啖定的等待明天風球的來臨，可以訓晏少少了，又可以放假一天，呵！好似近日風球黎得好多，真係有點兒恐怖，黎得咁密，好似打到黎咁囉！不過，有風球又可以放下假都幾開心的！

>>August 23, 2008 at 10:33:56 AM GMT+8

2008 年 8 月 19 日 星期二 【晴】

嘩~ 今日係個好姊妹生日，在此，先祝佢生日快樂！青春常駐！身體健康！快D做梁太啦．．．

今日工作都冇咩特別！本來係要一連上COURT的，最後亦都唔需要，所以變得清閒了！今個星期真係冇咩特別野做！都好，當係好好休息的一個星期吧！下星期仍然想堅持27號生日係休市一日，希望可以真係做到啦！

今日放工後就回元朗了，A仔今日帶左個朋友一齊返黎屋企食飯，今日好正，AUNTIE整左雞絲粉皮，好好味！下次有機會我都要試下整先得．．．食完飯，我約左FOS既舊戰友食宵夜！好開心呀，見番幾個自己最FD的舊同事，而且見到佢地個個都好好！瑪姬就越來越靚；阿豪就快做爸爸了，恭喜晒，希望佢生個肥肥白白的可愛女兒啦；積夫就黎做人老公了，都恭喜佢終於脫離王老五生涯；至於DINO，佢九月會去西藏生一個月，會去攀山呀，真係羨慕死！而且佢近日搵到份好工，係ICAC做，真係戥佢高興呢．．．見到個個都咁好，自己都好感恩呀！

返到屋企今日已經十二點九了，真係累死人．．．明天仲要返工呢．．．想死！不過，過程真係好開心，我地去CAFE度坐左好耐，傾左好多野呢．．．

>>August 23, 2008 at 10:29:39 AM GMT+8

2008 年 8 月 18 日 星期一 【晴】

呢排既天氣真係好好，真係熱到爆，日日都晒到暈！尤其我要踩單車出去西鐵站時，真係想死的感覺，D手同腳晒到辣的．．．今朝起身時好累好手軟腳軟，所以最後拎左兩個鐘CL，訓多兩個鐘吧！跟住就返工．．．中途個人好累，手軟腳軟咁，想死呀！返到去都唔想做野，但係一拎起聽日連續三日要上庭既文件時，真係想喊呀！後來，真係感謝神，我聯絡個工友，佢決定唔告公司了，決定撤銷追討！太好了．．．我唔洗辛苦了，我仲擔心連續幾日辛苦死我，又病又要用精神添．．．真感謝神呀！

好經辛苦就過左一日了．．．真係又虛又軟的一日！最後都係決定回自己家，陪下媽媽．．．返到去食飯，本來計劃回元朗的，但係真係人太累了，好想早點訓，所以就打比A仔話今日在自己家訓．．．其實佢一早叫我早點回元朗好好休息的，係我唔聽佢話，所以當佢知我返左屋企食飯時真係有點奇怪！而且佢原來同左佢媽媽講我會早返！O．．．我唔知呀！SOR SOR呢！．．．

今晚奧運好精彩，有好多比賽睇，尤其係女排啦，正！中國隊終於可以一連勝三場了！YEAH!

>>August 19, 2008 at 1:35:40 PM GMT+8

2008 年 8 月 17 日 星期日 【晴】

嘩嘩~ 我成個星期冇寫日記了．．．真係又懶起來了！其實都唔知點解會冇左個心情去寫呢！

今日好慘，病左！係，又病左！半夜又喘起來了，好討厭的生活！點解成日都要喘呢？一鼻敏感起來就好容易喘氣了！A仔間房實在太多毛塵了，係時候要一齊做下大掃除吧！

今日下午同A仔一齊回屯門，因我要睇醫生，而佢又黎我屋企幫我整電腦！頂，原來部電腦唔係壞左，只係張VGA卡鬆左．．．都唔知講咩好！A仔以為我玩佢添，哈！整好左之後同左媽媽去飲茶，跟住去左睇醫生，A仔就返工了．．．

到了夜晚，我去左接佢放工！”劉小朋友，你既家長黎接你喇！”．．．

>>August 19, 2008 at 1:26:25 PM GMT+8

2008 年 8 月 9 日 星期六 【晴】

今朝返左教會，感覺好像已經有一段時間冇返過去了，真係慚愧吧！完左後，同左屋企人去食野，食完野就同媽咪妹妹行街街，買左一件風褸！跟住就走人回家了，好累好累，回到家就走左上床訓，訓醒就食飯了．．．食完飯係度睇奧運，真係好刺激呀！好希望中國要加油，拎多d金牌就好了！

今晚仍然留在家訓，因為一來A仔剛去完CAMP必定好累了，要好好休息！二來我都好累，好想早點訓，都係留在家中才可早點訓吧．．．近日實在太累太累了，好像晚晚都冇訓得好少，好夜才訓咁，第二朝早就好似行屍走肉咁，黑眼圈好似跌到落下巴咁，哈！好可憐呀！

>>August 12, 2008 at 4:12:19 PM GMT+8