2009 年 1 月 16 日 星期五 【微冷】

今日同樣係早起呀，因為要今早去見貓b，佢今日返番黎元朗睇醫生呀，所以我地都順手去睇下佢個情況！貓b佢情況好好呀，已經打左一次針針了，下個月會再黎打針針喇．．．攪掂左呢度後，我地就行過去第二間寵物診所，因為關於另一隻狗狗，阿肥既事．．．阿肥佢琴日做手術，因為手術情況需要再向醫生了解，所以都去埋一份睇下點樣．．．幸好，冇想像中差，起碼可以控制個現狀先，都係一件好事！跟住，再扡埋另一隻狗狗，係佢之前比食肉烏蠅咬果隻．．．佢情況好左好多呀，應該新年前可以返屋企了，真係好．．．不過，唉，係呢隻狗狗隔離就有另一隻洛威那狗，佢好慘，有個腫瘤係心口，聽姑娘講係冇得救架喇，而家唯有既係等死．．．唉，好心up，睇住佢個傷口，即係個腫瘤係咁出血，又訓左係度，眼神好可憐，仲有點淚光咁．．．真係好心傷！唉，好想為呢隻狗狗，好似叫rocky祈禱，希望天父神可以眷顧住佢，帶領住佢．．．

之後，我地去左食魚旦粉，食完返左屋企一陣，跟住就出門口了．．．出去A仔家姐屋企．．．因為今日去佢度食團年飯．．．我同A仔出去先，去到就等到七點食飯．．．今晚好豐富，有茄汁讓雞翼，百合炒蓮藕，豬扒等．．．好正！之後九點回元朗．．．今晚返黎同A仔睇DVD，而家努力腸喇．．．

>>January 17, 2009 at 3:34:17 PM GMT+8

2009 年 1 月 15 日 星期四 【微冷】

今日終於冇咁凍了，起碼中午時間真係可以唔洗著外套先丫．．．今朝一早起身了，跟住同A仔一齊上左深圳移街街．．．我地今次選擇係淳圳灣過關，所以係元朗搭B1巴士．．．我今次係第一次係深圳灣度過關，呢度個關真係幾新，都幾大下啦，好快手就過左關添！好順利過左關後，我地就搭巴士去左一個叫白石洲既站，跟住行左大約二十五分鐘去到我地既目的地，深圳既IKEA．．．

我地一路行當一路行街，去到IKEA，真係嘩左一聲，因為真係好大好大．．．我地一去到，第一時間就梗係去左佢個餐廳食野啦．．．我地今次係豪食，有三文魚，有龍蝦湯，有瑞士肉丸，紅酒會牛尾飯，仲有TIRAMUSU做甜品，好正呀！食左七十五蚊，不過淨係個食物貿數同個格調已經抵番晒喇．．．GOOD~

食完之後就係呢度行街街，行左都好耐，因為有兩層．．．佢有部分野係比香港平，當然都有部分野係貴少少．．．佢最衰既係唔送貨去香港囉，如果唔係係度買野都唔錯！最後我地都買左少少野，不過當然係好輕便果隻啦，哈．．．行完呢度，我地發現呢一帶唔止IKEA行，仲有一個係賣運動用品既超大MALL，仲有一個專電器同家品既MALL，所以．．．我地最後係呢度流連左成五粒鐘．．．最後，我地再回多次IKEA，食多次好平既$2熱狗同$3杯既汽水，跟住本來打算搭佢既SHUTTLE BUS走，點知排隊到我地時就話滿晒，頂！最後，都係行番出去搭巴士，又比我地誤打誤撞上左架巴士可以去到華僑城果頭喎，咁我地就梗係順利去埋果頭既WAL.MART度行啦，又買左野呀，不過都唔係好多零食，都係正經既野．．．

所以總結黎講，今日行程相當順利，而且十分好，有得玩，有得食，有得行街，有得SHOPPING．．．好開心呀！！！多謝A仔同我去左咁正既地方呀！！

行完就返元朗了，返到黎都十點幾了，跟住先再食野．．．食完野仲睇左套日本片，不過真係有點不知所謂咁，因為睇完都唔知講乜，只係覺好恐怖囉．．．

>>January 17, 2009 at 3:24:03 PM GMT+8

2009 年 1 月 14 日 星期三 【颳風】

今日訓到成十二點先至起身呀，琴晚其實都訓得唔多好，因為貓仔妹妹成日走來走去，而且我又咳番，所以真係成晚起身又訓下咁，真係激死我．．．

訓醒之後同A仔決定去睇赤壁II，真係開心，三點幾就出門口，之後去左屯門市中心果間凱都戲院買飛，睇五點場．．．好平呀，三十五蚊咋，超正．．．去到剛好四點半，即刻去麥記買個包，食完就剛好入場．．．全場兩小時二十分鐘，都幾抵睇呀！不過A仔話覺得套戲麻麻地，因為同真既歷史仲有點距離．．．反而我就唔太熟歷史喇，當係一套戲去欣賞都覺OK既．．．場面都幾勁，不過好似比預期既差一點啦！

睇完戲，去左市中心行左陣，去左TASTE度行，買左野，跟住我就順手去A-LOOK度試下拎唔拎到眼鏡，因為佢本來話聽日先有既，我都係試下咋！點知有喎，真係好，順手我地仲洗埋副眼鏡，幾GOOD~ 跟住我地就搭小巴番屯門，因為我要放低D野，A仔就順手拎走我屋企部電腦返中心，哈．．．媽媽話部機終於可以離開屋企喇，因為大家都覺部機都幾阻地方，哈！

跟住再同A仔係西鐵站度JOIN，一齊返元朗．．．返到元朗我地一齊去左麥記，買新出既麻辣產品，例如雞腿包同麥樂雞．．．其實好似麻麻地好食，加上我都麻麻地食辛辣既野，所以．．．WELL，我唔會再試囉，哈．．．不過A仔話個包都OK喎．．．食完都好飽，因為剛才在自己家都食左少少野．．．聽日我地決定上深圳行街街，好開心呢．．．

>>January 15, 2009 at 3:59:50 PM GMT+8

2009 年 1 月 13 日 星期二 【颳風】

今日最後都係冇同媽媽出去探姨媽，是關實在太早了，琴晚幫A仔手整一D中心既文件，兩個人合力都整左成粒幾鐘，所以都好有成功感呀！今朝都訓到十一點呢，哈．．．

之後都係一個人在家，下午時間同左個好姊妹愛麗斯傾電話，因為佢都今日放假呀！我地都傾左好耐時間電話呀，真係好開心同佢分享左好多，呢個姊妹真係好唔話得，成日都要佢聽我伸好多野，哈哈．．．同佢講起有關我結婚既事．．．唉，其實我都唔知點呀，我都同好姊妹分享左好多我現時面對緊既問題同情況．．．當然，我自己梗係好希望可以四月結我成婚啦，因為我都好想拖住自己愛同愛自己既人，一齊步入教堂，向住神去承諾我地下半生係相親相愛！不過，我真係唔知最後結果會如何喇．．．唉．．．講起都有點兒心傷！

跟住就執定野，因為今晚去元朗A仔度做GYM．．．好耐冇同佢一齊去運動了，本來想約佢去打羽毛波，不過後來都係決定去做GYM．．．返到元朗食左點野就去做GYM了，我做左好多項唔同既野呀，條氣管都冇話有唔妥，真係感恩喇．．．做完之後就去左STEAM同沖涼，STEAM左十分鐘左右，真係好舒服，如果唔係中途有人入左黎，我可能會再STEAM多五至十分鐘架．．．攪掂晒就上番樓，跟住再整野食，我地一齊整左個肉燥飯食，好正，係度小月既肉燥，太GOOD了．．．

今晚會係A仔度訓，因為出邊天寒地冬都唔想走來走去了，留一晚好過喇．．．哈哈．．．

>>January 15, 2009 at 6:28:59 AM GMT+8

2009 年 1 月 12 日 星期一 【乍雨乍晴】

今日訓到十一點先起身，是關琴晚成點幾兩點先至訓，哈！下午同左媽媽去市中心，今日我大出血，買左一d護膚品，跟住再配左眼鏡，真係慘慘！不過副眼鏡又非配不可了，因為都已經十分之殘．．．

食完飯係度追電視，相信返工後都唔會再有呢d閒情去追電視了，哈．．．

剛才接到A仔電話，得知佢中心爆格既事已交由警方處理．．．唉，希望早日可以搵到班人出黎啦，佢地既損失真係唔只錢咁簡單，最慘係冇晒D重要DATA丫嘛，唉．．．另外，頭先A仔中心發生左一件事，令A仔十分憤怒，我都好同意佢同事真係有問題架，A仔決定今晚ACTION，我都好支持佢．．．A仔，加油呀！支持你的．．．

>>January 13, 2009 at 3:58:58 PM GMT+8

2009 年 1 月 11 日 星期日 【乍雨乍晴】

今日睇住d氣溫下降，天文台話聽朝市區會得八度，真係恐怖！今晚半夜相信得番五度左右．．．想起街上d貓貓狗狗就好心up喇，都唔知佢地過唔過到呢一關．．．希望天父神可以保守佢地啦，眷顧住佢地可以有強壯既體質渡過呢一個寒冬！

今日本來下午要去一間機構度見工，係1st in，但係要去到中環半山區，其實自己個心都十五十六咁，唔知去唔去好．．．是關如果ok左，第日就係日日去果頭返工了，都咪話唔辛苦呀！之後下午兩點幾，收到個電話，係循道衛理打黎，佢話offer個post比我．．．我果刻真係好感恩，亦都知道原來我選擇唔出去見工都係正確，哈．．．份新工下星期一就要返工了，呢個星期真係要好好享受之餘，都要好好準備同收拾心情了．．．唔經唔覺都量地左果零月，時間好似都話長唔長，話短唔短咁．．．初時仲好擔心，可能要過埋個年先至可以搵到份工！所以，真係好感謝主呀，我知道主佢要使用我成為佢既器皿，服務有需要既人！我真係好期待新工作既來臨呀！

收到消息後，都同左幾位人講左，個個都恭喜我，好為我高興！A仔佢當時開緊會，所以我都係SMS佢先，之後四點幾佢再打電話比我．．．A仔答應我呢個星期四五六都要留比我．．．好野！錫晒佢．．．

>>January 12, 2009 at 2:45:40 PM GMT+8

2009 年 1 月 10 日 星期六 【乍雨乍晴】

今日終於冇琴日咁凍了，真係好，下午時屯門都有成十八度，真係唔錯，加埋有陽光，感覺好舒服！我一向都唔喜歡冬天，因為一凍個人就好似冇晒活力同精力咁，真係唔開心架！今朝十一點都起左身喇，本來琴晚應承A仔起身時會打比佢，不過都唔敢太早打比佢呀，因為琴晚都同佢傾電話傾到成一點幾，之後都知佢打算繼續睇電視，所以都估到佢一定夜訓．．．點知不出所料，我一點鐘打去時，佢剛起身，話我知琴晚終於d/l到葉問，睇到五點先訓，哈．．．

之後，我同左媽媽落街飲茶，跟住三點幾就過去元朗，同左A仔係元朗行街街，好耐冇試過行得咁徹底喇，連朗屏都行埋呀，哈．．．跟住，我地同左A仔既爸爸媽媽去左新明皇度食晚飯，因為又係時候要食滿三百蚊去RENEW張八折卡了，哈．．．四個人食三百蚊都唔係太難既，最後我地食左三百零一蚊，老闆好好人，收少我地一蚊，三百蚊剛剛好，跟住仲拎埋張八折卡喇，GOOD~ 食完飯再行多陣，同A仔去左十蚊店行，我都好耐冇行過十蚊店了，其實可以係呢個地方流連好長時間架，因為好多野都好正！不過夜啦，唔留太耐喇，A仔聽日仲要返工，而且今晚返屋企仲要做野，預備聽日入學校PRESENT既內容．．．A仔，你要加油努力呀！你一定得架．．．YEAH~

呢幾日成日都同A仔一齊渡過，真係好開心呀！幸好佢呢排都放假，大家好難得可以好INTEVSIVE咁一齊．．．真係好感恩呀！我好希望大家可以爭取多點時間一齊，多點磨合既機會，多點相處既時間，咁樣大家既關係同感情都必會增進！所以好感謝神呀！

>>January 11, 2009 at 3:16:34 PM GMT+8

2009 年 1 月 9 日 星期五 【乍雨乍晴】

wow wow~ 今日超凍呀！朝早好似市區得十度，咁我估屯門都係大約七八度啦．．．戥爹地同妹妹要早起返工而慘慘呢，哈！我今朝就訓到九點就比波波貓嘈醒左喇，佢係咁叫我起身，我起身睇一睇，原來今朝爹地冇請佢食野囉，所以即刻請佢食野先，之後我都再訓多一陣都起身喇，我一路沖涼，波波就係咁叫係咁搵我．．．而家波波老左，就纏多左人！一唔見人就係咁叫．．．其實都有時覺好煩，哈！不過又好開心見佢咁纏自己喎，真係犯賤！

之後十點九出門口，因為今日要同貓b去打預防針，順手要將佢轉介比新主人了．．．唔，都冇話捨唔捨得既，最緊要既係可以幫佢home到一個好人家．．．今日見一見果對新主人，我都感到佢地係好人黎既，我相信佢地會對貓b好好．．．我都好放心同開心呀！今日帶貓b去打針針之餘都帶埋貓貓妹仔去順手磅下重．．．哈，呢個衰妹重左好多呀，而家有成3.1kg囉，即係6磅幾呀，哈．．．我都仲想佢肥d呢，肥d可愛點，而且會強壯點嘛！反而波波老喇，真係要好好注意佢既健康同飲食了．．．係時候都要帶佢去做下body check了！

同貓b分手後，我同A仔同auntie去左食個brunch，跟住就帶住妹仔行返屋企了．．．返到去妹仔都好似仲未feel到貓b已經離開左呢個家咁，哈！妹仔又少左條"靚"了！之後係A仔屋企流連左一陣，四點幾五點就同A仔一齊走了，A仔今晚約左同事食飯，傾佢地中心既大事．．．我都希望佢地中心既情況可以跟住某些人既離開而解決！要努力呀！支持你地架．．．

返左屋企之後，波波貓好似發左癲咁，一聽到出邊有人聲，就發左茅咁走左去梳化後面，我攪左好耐先帶番佢出黎．．．佢老喇，而家少少野都會好驚，真係唔嚇得喇，開始擔心佢了！唉！之後，媽媽就從澳門回來了，佢今次當然又係勝利而回啦，佢話可以幫補下封利是既錢喎，笑死我！之後夜晚又落街食飯，嘩，好凍呢，夜晚落街真係好慘，超凍超大風囉！下星期二都仲係八度，都唔知點死了，唉！想起係街既貓貓狗狗就覺好痛心喇，唉，真係好無奈！好似好多野都做唔到，但係又唔想見到呢D野發生，唉．．．唔知點形容個心情好喇．．．

呢兩三日都係同A仔一齊過，感覺十分好，真係好開心．．．真係多謝佢！錫晒佢．．．

>>January 10, 2009 at 3:07:54 PM GMT+8

2009 年 1 月 8 日 星期四 【颳風】

嘩，今日好凍呢，不過聽日好似仲凍，市區得八度咋，好好好恐怖！今朝九點就醒左了，但係其實琴晚都唔係好訓得著，可能妹妹貓佢成日走來走去卦，攪到我訓下醒下咁．．．不過都唔緊要啦，琴晚其實好早就訓了，好似九點幾，哈！都好耐冇試過咁早走上床訓了，呵！

訓醒後，A仔整左個早餐我吃，我就去左沖左個早涼，好舒服呀！朝早沖個熱水涼真係好正的呢！食完個早餐，繼續幫手執野，我地兩個好努力咁抹露台個玻璃趟門，嘩，抹到傻左，因為真係好多積係度，用得濕布時又要用乾布．．．不過係我地兩個合力下終於抹得一乾二淨！之後再食左個西安午餐，我地食左個羊饃，其實都唔知點解釋係咩野黎，係一D一粒粒好似包既物體，再加上羊肉既熱食，有湯有蒜頭咁，係西安人既熱愛食物．．．食完之後好眼訓，三點鐘同A仔妹妹貓三個一齊訓左個晏覺，訓到四點八先起身，都幾GOOD~

訓醒我地就約左朋友出去旺角，因為朋友要去買行山鞋，我地都出埋一份！行左旺角一陣，幫朋友買埋行山鞋，就同其中一個朋友去左行信和，之後再去左旺角熟食市場度食飯，真係好抵，難怪咁多人去食！食完再行多陣朗豪坊，跟住就走人了．．．嘩，好多人搭車，因為果時已經係十點幾了！呢個時段，尤其星期五係最多人的．．．

回到屋企，難為了波波貓，是關今日全日得佢一個在家，媽媽今日同聽日又去左澳門！係，又去澳門了．．．我都係琴晚先至知！哈！我返到黎都餓死波波了，即刻請佢食野，佢都不知幾開心！但係當我一行開，佢就好擔心又唔見左我，就係咁大叫，唉．．．突然間好纏身！不過，我又好開心的，因為佢好難得咁纏我，哈！好溫暖喔．．．

>>January 9, 2009 at 4:03:28 PM GMT+8

2009 年 1 月 7 日 星期三 【晴】

嘩~ 今日d天氣開始轉凍喇，睇住個天氣報告見住d氣溫每日係咁低落去，都咪話唔驚呀！今朝十點半就醒左喇，之後攪左一輪野，到左十二點先至打比A仔，因為怕太早嘈醒佢，難得放假梗係希望佢可以休息多d架啦．．．之後我一點就出門口了，去左元朗，因為今日想去同貓b玩下同埋陪下A仔．．．

去到元朗，最後主要都係幫A仔手去大掃除，清左間房好多塵，哈！我都要帶住口罩執野，都怕攪到鼻敏感或者氣喘．．．執完野都好累了，之後A仔整野比我食，今晚食西餐，有煙鴨胸同大腸腸食，好味，仲有A仔自創既薄荷COCKTAIL添，其實係用少少GET 27薄荷酒再溝lemonlime同礦泉水．．．出黎既效果真係唔錯喎，好易入口，所以我都飲左幾多下，哈．．．最後，咪就係飲醉囉，越來越眼訓，哈！都係頂唔順喇，最後決定要係A仔度借宿一宵喇．．．

>>January 9, 2009 at 3:35:08 PM GMT+8