2008 年 12 月 8 日 星期一 【晴】

今日妹妹朝早請了病假，於是媽媽決定同妹妹去拎早前去SCANNNG既REPORT．．．去到醫生度，醫生話X光片內見到確實有幾粒不知名的東西，但其實是什麼，真係需要詳細了解才可以知道！不過醫生話應該問題不大的．．．不過醫生都係建議求個安心，會轉介妹妹去博愛醫院個新界西乳腺科度排期檢查！

於是，拎完REPORT後同左媽媽一個朋友同埋個朋友既女飲茶．．．大家傾開計黎，AUNTIE個女，我地由小至大都叫佢做嘉敏姐姐，到而家都係叫佢做姐姐，哈，好好笑．．．嘉敏姐姐話可能虹虹既情況係乳腺增多，可能唔係大問題．．．不過當然去檢查下都會安心D既．．．我都同意呀，檢查下安心D，而且我都相信唔會大件事，因為神一定會保守住妹妹的．．．

在飲茶過程中大家談起寵物過身的事．．．朋友談起兩年前佢的貓貓都離奇去世的事，當時佢都唔知個原因，但係亦都冇FIND OUT到．．．之後講起骨灰問題．．．其實，都勾起了之前同屋企討論的話題．．．坦白說，我都認為沒有需要必定要將骨灰帶回家，我唔係怕什麼或者好像有人迷信的說”對家宅或健康唔好”．．．只係認為留下的所謂骨灰，都只係一個軀體／軀殼，我地所在意著緊的精神卻永遠都會存在在我地心中或者身邊，何必又要執著於那個已經沒有意思及意義的軀殼呢．．．其實，將那些骨灰撒到空氣中，我認為更能顯得自遊自在，更能表達將那種精神發揮到每一個角落呢．．．當然，我相信仍有很多人未能接受！或許我本身是基督徒，所以對於生離死別一來會睇得開一點，因為我地相信神是有其安排，而且他日我地會在天國重逢；二來，我地唔會著緊於一些軀殼上的東西，我地會在乎那種精神力量多一點．．．現刻，我有一種衝動想做一件事，但係．．．我唔知如何開口，亦都唔知對方會否接受同意我既想法．．．真係有點爭扎．．．

飲完茶我地直接去左元朗博愛同妹妹BOOK期，點知．．．BOOK左既期係2011年1月囉，嘩，足足兩年零一個月囉．．．有咩大件事真係等唔等到呢？哈．．．真係好笑！之後係元朗都冇點流連都返屯門了．．．

留左陣屋企又出街了，約左A仔出去深水步同旺角呀，佢話有野要買喎．．．出左深水步，行左黃金一陣，點知最後自己買唔到野，反而A仔幫朋友就買到野．．．之後我地去左旺角，因為A仔見到雜誌話周生生而家同愛護動物協會合作，出左一D可以刻動物相既頸項．．．A仔打算送條比佢媽咪作紀念，但係一問，最平果條都要$4000囉．．．當時我想起有些類近的東西，只不過係銀牌，價錢起碼少一個零頭囉，所以我建議上網再CHK下邊度有．．．

之後過程中大家都有點口角，真係不太愉快．．．最後決定一同回元朗後再食飯，當時已經差不多九點了．．．唉．．．去到南昌西鐵站，發生了突發事情，我地見到有一個巴基斯坦人從電梯倒下，頭撞向地．．．即時，有乘客走去停左個電梯．．．當時我都考慮緊是否去停電梯，因為怕一停上面既人企唔穩既就死得人多，點知果個人咁大膽咁做．．．之後，A仔走左上去睇下情況有咩可以幫手，而我就走左去客務中心話比職員知．．．點知個職員求其咁REPORT比同事知就算，完全冇去過睇任何野．．．咁都得架？太差了．．．

返到去元朗，A仔煮左野比我食，好好味既煙鴨胸．．．多謝你呀A仔，好味味呀！

>>December 11, 2008 at 9:57:36 AM GMT+8

2008 年 12 月 7 日 星期日 【晴】

今日訓到十一點先至起身呀，唉．．．唔知點解好似好累咁，可能成晚都係鼻塞卦．．．真係好辛苦，好唔鍾意冬天，唔係氣喘就係鼻塞，頂．．．好辛苦呀．．．天呀．．．

下午約左梁芬同學，真係開心，我地又係去左老地方，EURO GO GO度食，又係豐富的一餐，食左好多甜野，真係開心死．．．我地兩個至愛吃甜的東西呢．．．肥死．．．我地傾左好多野呀，好開心，好感恩有個咁好的朋友，甚至係好姊妹！大家只係從大家的第一份工認識至今，數數已經七年了．．．時間真係過得快呢．．．五點大家走了，就去了行陣街，梁芬買了一對波鞋，哈．．．又淪陷了．．．而我？同梁芬分手後我一個人去左睇野，買了幾對絲襪呢，哈，咁就成舊水了．．．不過都好靚質地既，希望唔好再易爛了，真係要喊的了，之前成百幾蚊對的絲襪都爛了，好心痛呢．．．唔想再爛了，會好傷心的．．．

>>December 11, 2008 at 9:27:55 AM GMT+8

2008 年 12 月 6 日 星期六 【晴】

今朝早起返教會呢．．．好似已經有一少段時間冇返了，好懶呢．．．今日好開心，A仔終於可以有時間返教會了，真係好，太感恩了，佢可以今日拎左兩粒鐘OT返教會．．．感謝神呀！

今日完左崇拜後，A仔就要趕快回去中心返工了，真係失望，仲諗住佢可以留多一陣添．．．之後，我同妹妹決定參加今年的報佳音活動，可以坐住電車去報佳音，真係開心，諗起都覺好玩．．．完左電單之後，我地會再繼續係北角報住佳音回到教會才完結，之後再會食宵夜添，好開心呀！好期待呢．．．今日練左陣歌，之後兩個星期都要練呢．．．跟住就落左去參加勵進團既火鍋宴，GOOD~ 好多野食呢，最後仲有甜品，糖水食，開心死了．．．肥死了．．．

之後，我同左妹妹行街，我地又淪陷了，慘．．．真係唔知點算好！錢錢不斷飛走了．．．嗚！之後同左妹妹一齊返元朗拎個筴，點知撞到梁芬同學，哈，佢竟然記得我地約左聽日見面，真乖乖．．．返到元朗留左一陣，貓貓妹妹見到虹虹姨姨竟然唔驚，仲走去親親佢添．．．哈，比妹妹個爹地，A仔知道一定呷醋了，哈．．．

>>December 11, 2008 at 9:11:04 AM GMT+8

2008 年 12 月 5 日 星期五 【晴】

今朝起身時已經十二點，嘩，真係太累了，可能琴日勞動左半日吧．．．起身時，A仔媽媽話睇星島地區報見到介紹一個農場，係錦田果頭，果度收養左廿隻狗，佢好想去睇下，請D野比D流浪狗食咁話．．．於是乎我地今日就舉家去左錦田果頭．．．

我地係元朗搭小既去到錦田既雷公田果頭，再步行十五分鐘度入到去個農場．．．入到去就”下”左一句．．．原來所謂既農場，其實只係得一個小小既草地，裡面艱左五頭小黑羊，D羊仔好胃食，我地可以去COUNTER拎D面包去餵佢食，之後就冇其他野睇了．．．問過個老闆娘，佢話所有既工場都唔可以參觀的，而且所有狗狗都在工場內，唔會比佢地出黎的．．．當時大家都有點失望，唯有在這裡品嚐下出名的奶類產品，我地食左薑汁撞奶，果然好滑，不過我覺唔夠薑味囉．．．跟住又食左個茶葉蛋，都幾好味既．．．跟住再買左佢每日新鮮包裝既鮮奶！

跟住我地返番去錦上路西鐵站果頭，剛好有跳蚤市場，行左一段長時間，佢地都買左少許東西！本來打算今晚回屯門的，不過見夜了，都係留多一晚才回了．．．回去元朗後又係去番琴晚間齋舖，O．．．又食齋了！其實琴晚已經嘔過黎，因為D野太肥了，而且琴晚同A仔有點口角，唉，又喊黎呢，所以個胃更加唔舒服！今晚叫左個五柳魚，其實咪即係芋頭魚，仲有一個芋頭扣肉，咪即係用什麼蒟蒻做，扣肉個形狀係好似呀，不過．．．D南乳味超濃，真係食壞人囉．．．五柳魚都唔錯既，酸味都尚算幾好，不太過火．．．嘩，一次過食咁多芋頭，我都怕個胃頂唔順呀！

>>December 11, 2008 at 9:04:18 AM GMT+8

2008 年 12 月 4 日 星期四 【晴】

wow~ 今日係元朗屋企大掃除呀~　難得A仔佢今日放假，更加要捉住佢一齊清潔下間房啦．．．今日執左好多野，亦都掃左好多塵．．．希望之後可以氣管敏感問題好一點吧．．．因為間房真係太污糟了．．．唉．．．

最後，又係執左一大箱掉既野，A仔媽媽又可以拎落去變賣了，唉．．．

之後，大家一齊去左食晚飯，真係肚餓，可能勞動完卦．．．我地去左一間新開的齋舖度食，近住水車館里果頭的，叫滋味齋！間野都幾好食既，而且又唔太貴，可以再黎食．．．不過，我其實一直唔係唔喜歡食齋，只不過會當係其中一種美食，就好似快餐，中餐，西餐，意大利餐咁．．．因為一來始終食齋真係唔多健康！好多人以為食齋應該係最健康，但係其實就係因為齋菜用既材料本身就係缺乏味道，所以做果陣先至會落更多的油同味料去做，咁先至可以吸引食既人！

而且，二來我好唔BUY一樣野，就係．．．食得齋既人，我相信理應佢地係理念上係認同唔應該殺生，所以才會吃齋．．．但係偏偏而家既齋舖會出埋晒D千其八怪既食物，什麼齋壽司，齋燒鴨．．．係呀，形狀甚至味道都好似架，不過．．．我就覺得已經冇左背後既意義係度囉．．．所謂”齋口不齋心”就係這樣了．．．究竟本應食齋既理念是什麼呢？去左邊呢？口話要吃齋，其實心想著那舊”午餐肉”．．．唉！咁又有乜謂呢？倒不如唔好咁辛苦啦？

>>December 11, 2008 at 8:50:36 AM GMT+8

2008 年 12 月 3 日 星期三 【晴】

嘩，今日真係多好消息呀！首先第一件就係爹地媽咪既結婚XX年周年紀念，在此，祝佢地XX周年愉快啦．．．哈．．．我諗，都好少人會好似我咁，會記得或者甚至知道爹地媽咪既結婚周年日架喇，我都會好怪既人，咩野都可以慶祝一番，就算係爹地媽咪結婚周年，我同妹妹細細個時都會幫佢地慶祝，買晒蛋糕，買晒禮物咁祝賀佢地架，哈，係咪好怪呢？不過，我又覺得好溫馨架喎．．．因為，如果冇爹地媽咪，又點會有我地呢？所以，佢地既結婚周年就好似我地既周年紀念咁囉，哈！

第二件喜事，就係今朝收到A仔姐夫既電話，話A仔家姐JOANNE已經生左了．．．生左個5.5磅既囡囡．．．哈，在此都恭喜佢先．．．好開心呀，聽到呢個消息時真係好戥佢高興架．．．我都即時SEND左個SMS比A仔話佢知啦，佢都即時打電話比我問，我地仲約左今晚去醫院探JOANNE添．．．

但係，今日要一早出去灣仔見工，頂，見工既時間只係用左15分鐘，而搭車既時間就用左粒幾鐘．．．真係唔知講咩好？不過，如果呢份工我見得成既都唔錯，因為份工係屯門做，可以慳番車錢呀！

見完太早了，所以返左屯門同媽媽食LUNCH，之後返左屋企一陣又出發了．．．好遠，係去東區尤德醫院囉，去到柴灣再上山囉，好遠．．．我出到中環IFC同A仔會合再一齊去．．．我知A仔已經好累了，因為佢琴晚係CAMP都冇點訓過，真係辛苦佢了．．．不過，當去到醫院見到BB時真係好開心，見到A仔從心笑出來，仲話終於感受到真正做舅父的感覺，哈．．．而且目到JOANNE佢都精神不錯，真係好戥佢地開心．．．我仲將送比BB既泰國手信送埋比佢添！BB改左個名叫芷澄，都幾好聽．．．BB好古靈精怪，似足媽咪，我地見佢時訓訓下會咪咪咀笑，仲會單眼望人添，好攪笑囉．．．

之後，同左A仔爸爸去左觀塘食飯，食完飯都返元朗．．．知道A仔真係好累．．．辛苦佢了！不過，我有一點真係好唔明白．．．作為一個媽媽，眼見個女生左，知道個孫出世喇，其實係咪應該即使咩事都好，都應該開心至係呢？但係點解仲可以為左一件已成過去既事而令自己唔開心，唔放開懷抱去面對開心既事？而且，有些事情是否應該要懂得去排次序呢？去醫院探個女重要？還是去做義工服務重要？我真的不明白．．．或許，只有當時人才會明白或者接受自己的做法吧．．．

>>December 11, 2008 at 8:37:33 AM GMT+8

2008 年 12 月 1 日 星期一 【晴】

本來今個月打算回屯門住的，因為屯門有PRINTER，方便我打信搵工丫嘛．．．但係因為近排仔仔既事，我都應承左A仔今個星期會盡量留在元朗，可以陪佢媽媽多點，幫手睇住佢媽媽！因為佢媽媽既情緒都仍然一般，有時都會喊起來，話掛住仔仔．．．其實都明白既，仔仔係佢既人生同生活中都佔左好重要既位置！而且，對一個已離婚既女人黎講，仔女都大晒喇，有自己既世界既時候，佢唯一可以寄託既，可能就係隻寵物度．．．而家佢最貼身既東西走左，當然會係好難過既，因為佢整個生活都係會改變晒．．．係需要時間去適應同習慣！

今朝我都十一點先起身了，之後都拿拿聲出門口，因為約左妹妹同媽媽，因為妹妹今日要去新墟果頭睇醫生．．．唉，講起妹妹，佢近日發現了胸口度有D一粒粒好像波子的物體，有時會覺痛，有點硬又不是好硬的．．．所以決定去睇醫生，醫生又寫左紙叫佢今日去做SCANNING，睇下係什麼物體．．．媽媽佢好擔心妹妹既情況．．．不過，我覺得又未必太WORST既，因為妹妹講好耐之前已經發現咁既情況，講真，如果真係有事既一早就已經有事啦，仲等到而家咩？而且，所有野都已經有晒安排架喇，神佢安排既所有野都係有佢既旨意係度架，所以，我地要安然咁等待神既安排，要對神有信心，不可以懷疑神囉．．．所以，我對妹妹都有信心，我知佢會冇事既．．．

同左妹妹CHK完，就同左佢行左陣街，之後返左屋企食飯．．．妹妹佢今日大出血，買左千幾蚊衫．．．我就忍到手冇買野．．．可能去完旅行返黎都會通常”手緊”一點啦，唔會輕易再用錢住，呵．．．

今晚回元朗時係西鐵撞到久未見面的梁芬同學，真係開心．．．同佢傾盡成程車呀，真係好！大家仲約好左星期一見面呢，開心．．．

>>December 11, 2008 at 9:13:05 AM GMT+8

2008 年 11 月 30 日 星期日 【晴】

今日去左幫A仔中心班展翅仔講TALK，哈，又係講老本行，DRUGS囉．．．都唔係什麼老本行既，只係比較熟悉一點有多點經驗咁啦．．．不過個TALK都好順利，班人都幾OK啦．．．係唯一A仔少左同事入黎聽有點可惜咁O者．．．因為仲諗住係佢班衰同事面前幫A仔出番啖氣架嘛，諗住玩番佢地一餐．．．點知又冇咩人黎，真係失望．．．哈！好似有點變態咁．．．

之後返左屯門．．．星期四有份工見呀，係駐校就業社工．．．我都冇諗到自己會搵番社工既工作架．．．見到係駐校就諗住試下啦．．．不過，人地可能見我冇駐校經驗又未必會請．．．其實自己都有點興趣既，希望得啦．．．

>>December 11, 2008 at 8:15:38 AM GMT+8

2008 年 11 月 29 日 星期六 【晴】

今朝八點幾我已經FEEL到A仔媽媽已經離開了床出了去，後來我蒙蒙龍龍間聽到點喊聲，於是我走出房間，見到A仔媽媽抱著仔仔的屍體，訓在床上，一邊喊一邊不斷叫仔仔起身食早餐．．．當時既情境真係唔知點講好！A仔爸爸又唔識得處理喎，只有坐住係度望住A仔媽媽．．．當時，我唯有叫A仔爸爸先行出廳，我同佢媽媽傾．．．但係A仔媽媽佢仍然變本加厲，當刻我都有點發火了．．．無論我說什麼佢都唔願意聽，亦都入唔到腦，只係不斷在自我埋沒，不斷在妄我，遍離現實．．．於是我再叫A仔爸爸入來，我用力打開A仔媽媽的手，叫A仔爸爸拿走仔仔的屍體，因為我相信，唯有這樣才可以令A仔媽媽願意起來積極面對．．．可惜A仔爸爸仍然不知所措．．．在爭扎之時，A仔剛好回來，A仔唯有叫同事昨夜臨時去幫手，佢先可以走回來．．．我即時就藉以話A仔都想見仔仔一面，才可以叫到A仔媽媽放開仔仔的屍體．．．真係好彩！要不然都唔知點樣攪好了，因為當時佢既情緒真係好唔掂當囉，我都擔心我自己一個人真係冇能力可以處理得到呢．．．

之後，我地就等待協助我地處理仔仔身後事的”伴著他”寵物服務公司負責人，蘇生來臨，我地坐佢車去左小ME上次火化果度．．．全程A仔媽媽既情緒都好波動，喊到有如淚人，旁人見到都有點心酸！同時候亦有另一隻小朋友要處理同樣情況，小朋友既家人本來都冇喊既，後來都比A仔媽媽佢影響到，喊到不似人般．．．唉．．．

其實我心想，無可否認，生離死別係一件好痛苦既事，但係，傷心又如何呢？因為我相信他朝有天我地必會再重逢的．．．只不過大家在另一個空間度咁解O者．．．而且，我亦都相信，雖然死者既肉體已離開，但係佢既精神係永遠都會長存在我地心中的，佢根本都冇離開過，係咪？所以，何必執著於此呢？

完左個CEREMONY後，我地去左屯門市中心間齋舖度食野．．．大家都餓了，因為都忙了兩天．．．當然，我都希望大家心情可以好點，希望天父神可以保守仔仔既家人，可以讓佢地可以快些從傷心中積極起來面對生活．．．誠心所願．．．

之後我都回了屯門，同自己家人談起此事．．．之後，大家都談到日後波波都終有一天會離開我地．．．唉，心中真係有點酸溜溜的．．．不過，我同意屋企人所講的，既然死者已矣，又何必執著於肉體上的保留？我屋企人的意思係有關骨灰既問題！因為我地相信，死者既精神係會永遠留在我地心中，強行留下一些東西，例如骨灰，亦沒有意思及意義，因為，畢竟這些東西都只是一個軀殼以已，沒有需要那麼執著，我地在意的是那種精神！因為，死者的精神已到了天父那裡去，我地日後的精神同樣會到父那裡去，我地他日亦會再重逢，所以什麼軀體都已是一件沒用的東西！保留這些沒用的東西，對自己對別人對生活不但沒有好處，亦沒有意義吧！所以，哈，日後我死左，我都或許會叫我的家人幫我將D骨灰放在大海或空中，我覺得這樣更來得實際及合心意．．．

不過，當然，每一樣的東西對於不同人來說都會有著不同既意義．．．那麼，就在乎那個人對於這件有意義的東西可以怎樣去看待了．．．是否放在自己身邊就是代表你十分在意著緊？不放在身邊的就是不在意不著緊呢？這個大家都必定好清楚明白．．．所以，那又何必執著呢？

>>December 11, 2008 at 8:09:37 AM GMT+8

2008 年 11 月 28 日 星期五 【晴】

今日係last day當然心情不錯，不過日子都不難過．．．上半既時間都係做自己野，聽下電話查詢咁，下半就同左我上司傾計．．．我將琴日發生既事話左佢知，我只飲茶既事．．．因為，我都好想佢真係留意一下情況，我都唔想佢死得咁快同咁早！我自己一個衰，係我唔好彩，d同事賤格，用d不法手段去整死我，只怪我冇同佢地”同流合污”卦，哈！不過，我都唔恨要同佢地同流合污，影衰晒自己既人格呀！我呸！

我同上司傾左好耐，講左好多對同事既看法，希望佢可以多加注意！其實，我都唔係要特登話佢知我琴日點幫過佢，我只係想佢知道，佢都可能會成為下一個比大粒整死既人選，因為個HR主管，即係出年本部門既主管（佢出年會升職），佢特別問到我對呢個上司既看法問題．．．我都已經多加維護佢架啦．．．希望真係唔會累左佢就好了．．．傾到最好，我上司同秀雯都好唔捨得我．．．

之後，我就做番自己，去左玩玩啦．．．今日約左EDMOND表哥，鐘靈及鐘慧兩個堂弟妹，仲有妹妹去踩單車．．．我地由沙田踩到去大尾篤．．．實在太FREE了，好耐冇這樣玩玩了，尤其係同自己既親友去玩玩．．．不過，在我最ENJOY的時間收到個惡耗．．．A仔媽咪打比我話佢地隻愛犬仔仔過左身．．．當時A仔媽媽喊到好厲害，但當時我又在中途，又未到達終點，交不到車，所以都沒有法子，而A仔當時佢又去左乘風航，更加返唔到黎．．．我當時都十五十六．．．最後，唯有盡我力量，用最快既時間回去啦．．．

我B埋個Q之後就返去了，去到南昌西鐵，A仔打比我，用左D好唔客氣既說話同我講野，當時，我真係好嬲，因為我覺得，我點解要在咁不被尊重情況下去委屈自己呢？真係好想一走了知就算．．．不過，心想，如果唔返去既話，可能分分鐘會出事．．．最後為左怕出事既理由，我都返左去．．．我一路安慰自己話：A仔當時心情差，所以先知係咁既語氣！唉．．．回想起，再問自己，點解要咁委屈自己呢？

返到元朗，見到A仔爸爸都係度陪住A仔媽媽，幸好！當時見到仔仔既屍體，我都心中有點一沉！A仔媽媽表面十分平靜，不過我知佢心裡卻唔係一回事．．．今晚會同A仔媽媽一同孖床訓，希望可以陪住佢啦．．．

>>December 11, 2008 at 7:50:08 AM GMT+8