2008 年 12 月 27 日 星期六 【陰】

今日訓到不知時日過，琴晚爹地媽咪仲夜過我同妹妹返到屋企，之後十二點九果時，媽媽本來想搵我傾計，但係真係有點身心疲累，真係唔想再講野，所以決定都係訓覺，一訓就係今朝十二點了，哈！

訓醒後做左一陣運動，之後就hea左一陣，下午兩點就落左街同爹地媽咪妹妹去飲茶！爹地叫左好多野食，不過我都係食得唔太多，而且食左少少野就已經好想去toliet了，可能個胃唔係好頂得住食多左少少野卦！之後同屋企人行左陣海趣坊，跟住就返屋企了．．．

返到屋企唔知挑起左條咩筋，突然間好想執野，所以同妹妹就好努力咁去執野，執左好多從來都好少會去掂既櫃．．．呢d櫃多數都係收藏左我一d收藏品，所以先更加極少去接觸呢類櫃，哈！執到八點先食飯，一路食飯一路睇WALL． E．．．呢套戲除左個主角好得意之外，其實真係好發人深醒的，真係提醒人類唔好破壞地球，同埋唔好以為有科技就得，因為其實我地一直都係度破壞緊個地球！如果我地再唔保護地球，最後我地可能要走返去以前原始時代咁先至可以度番個地球！好鍾意呢套戲呀！

跟住，剛才同A仔傾左陣電話．．．大家都共識了一些東西！希望新一年裡大家都可以有一個新既自己，為未來而努力．．．

>>December 28, 2008 at 3:58:33 PM GMT+8

2008 年 12 月 26 日 星期五 【晴】

今日原本諗住一個係在家可以好好咁思考一下．．．但係發覺係唔得，反而會越會諗得好負面，諗埋晒d好唔理智既事．．．唉，好痛苦！

後來，妹妹叫我同佢出去同佢d朋友唱k，咁我都決定出去散一散心．．．出到去旺角唱k，其實，原來想好好大聲唱歌，好想發洩一下自己既鬱結，可惜，反而越唱越冇心情，是關唱到一d歌既時候，睇番個歌詞同自己既情境好杷似時，真係果個痛從心去痛出黎，眼淚就好想流出黎，個心真係up到飛起．．．尤其唱到衛蘭既心亂如麻，正正可以代表到我呢幾日既心情，仲有，謝安琪首新歌，囍帖街，真係．．．唉，想喊到極！完全自己要面對既情況囉，好upset，係sad到爆！但係，又唔敢比身邊既人知，亦都唔想比身邊既人知．．．好痛苦呀！好辛苦呀！．．．只有神真係在我當中，最清楚我而家既感受！唉．．．

唱完k，我地係家樂坊行左陣，跟住就去左california pizza kitchen食，好在之前已經訂左位，如果唔係等死喇．．．食到好飽，可能我自己本身胃口唔多好，所以好似食左少少肥膩既野都已經好飽，真係飽到有點想嘔咁．．．直到而家，個胃都仲頂住頂住咁，仲好多胃氣，好辛苦！但係妹妹反而都唔係覺太飽囉！即係係我既問題．．．之後，同佢d朋友行左陣，都因為太累了，所以決定九點幾就走人了．．．因為琴晚好夜先訓得到，都應該成三點．．．成晚都展轉反則咁，好辛苦！唉．．．不斷在祈禱，亦都喊左唔知有幾多次了．．．喊到真係有點兒鼻塞，又差點要令我氣喘要發作了．．．不過，我同自己講，我要自己再病，唔要再係咁落去！我要同呢個病say goodbye．．．我好唔甘心，就咁比呢個病拖我一世，亦都比佢辛累我既下半生既幸福，就係因為它而可能失去我既至愛．．．我唔要再見到它！！！！！．．．．．．

今日仍未可以傾到有個結果．．．或者，可以再有多一天時間好好思考！不過，真係有時唔想去思考，因為真係好痛苦！我只願將一切交托予神，希望神可以給予我啟示！但係到而家係止好似仲未接收到神任何的啟示咁，好驚，好不知所措！唔知可以點！亦感到背後原因而感到無奈！講真，相反地，如果對方日後有什麼病，我都會接受，亦都會無論幾艱難辛苦都會照顧佢一生．．．我係唔會放棄佢架！因為，只要存有愛，什麼都可以做得到的！！！

本來聽晚係約左朋友食飯，但係，已經沒有心情可言了，所以推左！我希望朋友可以原諒我！雖然佢唔知咩事，不過我知道作為我的朋友，佢地一定會支持我到底的，係咪？

****************************************************************************************************************************
謝安琪 囍帖街

忘掉種過的花 重新的出發 放棄理想吧
別再看塵封的囍帖 你正在要搬家
築得起 人應該接受 都有日倒下
其實沒有一種安穩快樂 永遠也不差

就似這一區 曾經稱得上 美滿甲天下
但霎眼 全街的單位 快要住滿烏鴉
好景不會每日常在
天梯不可只往上爬
愛的人 沒有一生一世嗎
大概不需要害怕

忘掉愛過的他
當初的囍帖金箔印着那位他
裱起婚紗照那道牆
及一切美麗舊年華 明日同步拆下

忘掉有過的家
小餐枱、沙發、雪櫃及兩份紅茶
溫馨的光境不過借出 到期拿回嗎
等不到下一代嗎 是嗎

忘掉砌過的沙
回憶的堡壘 刹那已倒下
面對這 墳起的荒土 你註定學會瀟灑
階磚不會拒絕磨蝕
窗花不可幽禁落霞
有感情 就會一生一世嗎
又再惋惜有用嗎

忘掉愛過的他
當初的囍帖金箔印着那位他
裱起婚紗照那道牆
及一切美麗舊年華 明日同步拆下

忘掉有過的家
小餐枱、沙發、雪櫃及兩份紅茶
溫馨的光境不過借出 到期拿回嗎
終須會時辰到 別怕
請放下手裡那鎖匙 好嗎

>>December 27, 2008 at 4:22:27 PM GMT+8

2008 年 12 月 26 日 星期五 【晴】

只要和你在一起 - 孫耀威


每次奔波工作裡 也差點想氣餒 差些死去
有你攀山都有趣 吃苦都多麼趣 輕鬆面對
流過似水歲月 奮鬥十年買戒指
才永遠緊記你特殊位置 沒忘記彼此

能與你一起 更艱難更在乎你
能與你一起 哪管財富賺不起
能與你一起 我的殘缺亦完美
能一起 贏輸都勝利 能一起 才珍惜運氣

抗拒一天很富有 怕多一些引誘 一班損友
要你開心經已夠 愛幾多都不夠 相當內疚
迎接各種挫敗 有錯便和你告解
純樸會比較做巨人愉快 未為意好歹

能與你一起 更艱難更在乎你
能與你一起 哪管財富賺不起
能與你一起 我的殘缺亦完美
能一起 贏輸都勝利 能一起 才珍惜運氣

當有天身心灰飛 唯恐明日會離開你

能與你一起 半羹鹽也是甜美
能與你一起 最驚誰有日先死
能與你一起 哪管和你被遺棄
捱得起 旁觀者妒忌 捱得起 人生只為你

>>December 27, 2008 at 5:39:08 AM GMT+8

2008 年 12 月 25 日 星期四 【陰】

唉~ 近呢兩日既心情真係好大起伏，可以話，所有表面既歡樂歡笑都不能夠覆蓋到我唔好既心情．．．damn！

琴晚確實訓得唔太好，唉，因為心情真係唔好，成晚都係坐唔安訓唔落咁．．．成日係度諗，究竟係什麼事？為什麼會好似人間蒸發咁既？係避世還是想避我？我又做錯什麼？究竟發生咩事？．．十萬個問號係我個頭度轉來轉去，個頭好痛，情緒好差，好不知所措．．．我真係咁令人討厭？咁唔值得人去愛？咁唔值得人去重視甚至尊重？其實．．．我又是什麼？連一句都沒有．．．我又可以點做？．．．好煩，煩到真係唔知可以講什麼！

即使下午爹地媽咪妹妹好好，同左我去食野，去左食上海婆婆，之後又去左睇戲，去左睇”葉問”！套戲其實係一套好戲，打鬥場面好正！不過．．．我真係冇心情！睇完戲，媽媽話今晚打邊邊，大家都好似好歡天喜地咁，我又唔敢唔裝作喜歡．．．但確實，真係沒有心情！胃口都沒有，食什麼都沒所謂了．．．之後，陪左妹妹行左陣市中心，佢話明天參加朋友聚會，要買份禮物作交換用！之後，六點半就走人回屯門了．．．

頭先食飯果陣有點傻，以為自己喝醉左就可以什麼都唔去想了．．．但係出奇地，點解自己既酒量突然好左？飲左成杯紅酒都唔識得醉？how come？．．．而家心情仍然好差，感覺好差，好困擾，好大壓力．．．因為好似有好多我估計唔到，了解唔到，唔明白既事了．．．究竟什麼事呢？我好想知道．．．就算要判我死刑，我都希望知道個原因！我真係要崩潰了．．．好辛苦呀！

>>December 26, 2008 at 2:39:00 PM GMT+8

2008 年 12 月 24 日 星期三 【晴】

聖誕快樂呀！祝各位主恩賜福！平安滿溢！新年蒙福！

今日一朝早起身，雖然琴晚成兩點先訓覺，但係都一朝起身都係精神奕奕咁等待去為主耶穌基督既降生而感到興奮！我相信這種感受只有基督徒才能感受到的．．．因為耶穌基督既降生，就等同於給予我地盼望，盼望祂會有日再來臨到世上．．．好感恩，雖然精神麻麻，但係崇拜過程十分順利．．．唯一失望的是，A仔沒有出席崇拜．．．後來好經辛苦，才可以聯絡到佢，原來佢因為太累了而決定缺席崇拜及是晚既聖誕聚餐．．．其實，確實有點失望！因為是次應該係佢第一次有機會感受何謂真正且有意義的聖誕節吧！不過算吧，我都明白及理解佢近日真係好忙，真係有點身心疲累的，放假的時候當然希望可以好好休息吧！唉，真的希望佢會爭取時間好好休息，別要再四處走了．．．

完了崇拜，爹地媽媽參加左婦女部既聚會，咁我同妹妹就自行去搵食啦．．．我地去左FRESHNESS BURGER度食，不過，我覺得比起上次我係沙田食果次好似差左少少，真係唔知係咩原因囉．．．而且佢而家個價錢既SETTING都唔同左，好似有點變相加左價咁，D薯角又冇以甘咁新鮮咁．．．唔，都未必會再去食了！跟住，同左妹妹去皇室堡個IT開倉行，後來爹地媽媽都黎埋，大家又淪陷了呢，一袋二袋的走！因為真係抵呢！

跟住，我地就周圍行街，因為都有時間吧！後來，我地去左HAGANDAIS度食雪榚，係媽媽請的，我同妹妹一人叫左個雙球，YEAH~ 係我至愛既BELGIAN CHOCOLATE同STRAWBERRY CHESSECAKE．．．肥死了！跟住沿路行去灣仔英皇果頭間麗都總廚度食聖誕聚餐．．．

再次至電A仔，仍然沒有佢既消息！真係有點擔心佢會否唔舒服！唉．．．定係佢有咩野唔開心既事呢？不過，我知我又未必可以有機會同佢分擔．．．真係唔知點算好，好矛盾！又怕佢會嫌我煩住佢喎．．．唉！頭痛死我了．．．唯有都係等佢自己靜靜先啦！作為女朋友，真係好矛盾呀！DAMN! What's going on? huh?...

>>December 25, 2008 at 4:37:56 PM GMT+8

2008 年 12 月 23 日 星期二 【晴】

嘩~ 今朝唔知做乜事，本來八點半已經比波波貓嘈醒左，之後訓番，一醒已經係十一點，哈！之後，等媽媽回來，兩點零同左媽媽出去荃灣，行左一陣，之後去左綠楊新開果間別府食野，果間野既裝修同格局好正，佢有好多間房可以比人用，好正．．．我地都食到好飽，因為叫左好多野食呀！當時係三點幾先食飯，所以太肚餓既關係食左好多野．．．跟住行到五點，我都一個人搭地鐵出去銅鑼灣了，因為今晚要出去教會做赧佳音！

返到去六點，準備妥當所有野，之後就六點九係教會出發．．．我地先搭車去到上環，之後再搭巴士去屈地街電車廠．．．同前年同朋友去電車遊時既終點站同一個地方！不過今次去就好唔同感受了！

我地共租左兩架車，而我地兩架車都好唔同，我坐果架就好好彩，又靚又有燈，所以都好charm下架！我地成程車都係咁唱詩，仲同沿途既人打招呼，同佢地講聖誕快樂！真係好開心呀！我地不斷係度唱，唱到真係有點自己感到瘋狂咁呀！哈．．．真係好爽！好耐冇試過唱歌唱到自己把聲都開晒，哈．．．個感覺正到爆呀！

後來去到北角總站，有部分教友走左，我地餘下十零個人就繼１第二部分報佳音！我地先搭電車返天后，之後再沿路行一路報佳音．．．雖然我地人少少，不過都好charm，吸引左唔少人架！我地尤其去到大坑果頭，有d店鋪未關，佢地既食客都好欣賞我地呢，好開心呀！我都真係唱到入左忘我境界了，呵！好high呢~ 之後，我地一路行一邊唱到返教會，最後一站就係聖保祿醫院了．．．返到去，好開心，師母煮左粥比我地食，正呀！餓左成晚呢，可能太用力去唱了，哈！之後十一點走人了．．．

返到屋企已經係十二點八，好眼訓．．．

今日曾經打過好多次比A仔，但係都搵唔到佢．．．我估佢可能又將電話轉到冇聲了，跟住又太累訓了吧！唉，都知佢近日好忙好多野做架喇，希望佢今晚訓番個好覺，明天返教會一齊去慶祝主耶穌基督既來臨啦．．．

>>December 25, 2008 at 4:24:38 PM GMT+8

2008 年 12 月 22 日 星期一 【乍雨乍晴】

（一）11:00am
什麼是．．．“愛”？！

有些人認為“愛”就係，“擁有”、“特權發放”、“自私”、“永遠不變”、“自我表現”．．．

但係我自己心目中，認為“愛”就係，“無私”、“不計較”、“勇敢”、“勇於面對挑戰”、“可隨機應變的”、“不問結果”、“友善的”、甚至係“犧牲”．．．正如好似神去愛我地一樣．．．當然，身邊個個人都好值得我地去愛佢地，而我地同時亦值得願意等待被愛！但當我地係人生裡面，遇上一個我地認為想給予更多既愛比佢既人時，即係你希望同佢一生一世走埋餘下人生路既人時，那一份既愛，卻會係更加顯得不平凡同十分寶貴！

我好多朋友曾經係佢同伴侶既相處路上遇上困難，有些人會選擇放棄，因為有些人會認為唔想再讓自己承受不愉快或者面對任何困難同挑戰！1想逃避一切．．．但係，卻有些人相反地會認為，佢地係會以愛為首，只要佢認為自己仍然愛著那個人，即使當中發生任何困難，你仍然希望與那人一起面對挑戰，逆境中一起成長．．．因為，神早已安排他們在一起，這是注定中神要讓佢地係挑戰困難中成長同磨合，希望佢地透過解決問題過程更了解、認識、甚至更愛對方．．．我相信，這並不是在面對伴侶方面的問題，因為，我地仍然愛著很多人．．．那麼是否當我地與父母遇上困難問題時，我地都選擇逃避現實同問題，選擇同佢地一刀切地斷絕關係？如果，你認為你愛的那個人仍然值得你去愛佢時，就好似俗語說：“你拎得人地份人工，份人工就已經包晒你要去揹黑鍋或者被客人鬧架啦．．．”一樣咁．．．你選擇去愛那個人，就不可以逃避現實，就要有準備同那個人一起面對所有風風浪浪，共同進退．．．因為，這是神比你的安排！除非，神已經同你講，在你既人生裡面，你唔會有機會接觸或者認識呢個人，因為呢個世界實在太大了．．．

其實，而家自己心情好矛盾．．．心知對方竟然對之間的感情出現動搖同懷疑．．．這令我感到很無奈！我只知道，“愛”一個人真的不易，因為一談到愛，我就會想起神，因為神確實係擁有最強力量既，我怎樣都難及神一樣．．．不過，我知道，無論係點，發生什麼事，總會有神係我身邊，佢永遠都會愛著我！我真係希望將一切都交到神既手中，好讓佢為我安排，因為我真係此刻什麼主意都沒有了，好困擾！

31/12原本係一個好值得紀念既日子．．．對我來說係一日好重要既一日！我亦都好努力咁為左呢一日去準備一點東西，好希望為大家留下難忘既記憶！但係而家，或者係果日會有雙重意義了，成為左我地既“開始及結束”日？！

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
（二）5:00pm

剛才，睇完阿Nick的dvd分享，真係好正．．．雖然唔係太完全適合成年人睇，不過，在當中我都體會左好多，從而都鼓勵左我積極咁面對自己既挑戰同困難！

阿nick曾經提過，佢好相信”萬事互相效力，凡事定有美意”！我都好同意．．．阿nick經常鼓勵，當我地遇到困難時，就要找一個你信任的人同你去分擔，而那個人對於我同阿nick來說，同樣係我地既上帝．．．係我地身邊既一切一切，都已經係由我地信靠既神所控制同掌握，只要我地係有信心地去信靠佢，佢為我安排既一切都必定當中有佢既旨意係度！

而且，阿nick亦鼓勵我地相信，人生中總有人會愛我地，當然，我亦都相信神無論怎樣都會愛我一樣；而且，凡事都會安然而過的，什麼困難，痛苦，問題，挑戰．．．只要我地抱著”永不放棄”，事情必然可以過去！阿nick亦提到夫妻相處之道，兩者之間”若能明白男女的分別，婚姻就有力量了”！所以，能夠有機會互相磨合，了解，認識，是一個很好的機會讓婚姻更有力量繼續維持下去．．．

感謝神呀，是神讓我接觸到阿nick的說話，令我在當中有所領會．．．真係好感恩！我要積極下去！加油！

>>December 23, 2008 at 2:21:39 PM GMT+8

2008 年 12 月 21 日 星期日 【晴】

今朝好早，七點就起身了，好似過往返工咁既時間呢，哈．．．是關今朝要同媽媽出去佐敦，同姨媽去醫院度覆診．．．因為約左十點要去到Q醫嘛．．．我同媽媽一早去搭村巴，點知白痴仔早左成幾個站落車，係廟街果頭已經落左車，於是行到去佐敦道果頭間M記食早餐，之後再去姨媽屋企接佢！我地就梗係坐的士去啦，有姨丈豪嘛．．．哈！

足足陪左姨媽攪左三粒鐘．．．不過都好在今日有成三個人陪住佢去，因為都幾麻煩，又去照X光，跟住又要去什麼登記，又要去覆診．．．好煩！唯有各人有住唔同角色！我負責拎住佢對拐杖，媽媽推輪椅，姨丈做跑腿囉，哈．．．合作十分無間呢！攪掂晒後，我地就搭番的士去逸東酒店果度，我地去果度間逸東軒飲茶．．．嘩，酒店既酒樓真係高水準，我都係第一次去呢度咋．．．食物水準不單高，連服務同環境都係一流架．．．四個人，食左四個點心，一碟炒河，已經係三百蚊了！嘩．．．當然，又係姨丈豪架喇．．．YEAH~ 跟住姨丈一定無死的，HEHE~

之後，送左姨媽搭的士走後，我同媽媽搭地鐵去葵興，拎D野去比我個好姊妹．．．我呢個好姊妹太好人了，佢會幫我手設計下婚禮場地既佈置，而我今次就拎我上次係廣州買既物資比佢過下目咁．．．真係好感謝佢既幫助呀！好感動呢．．．錫晒佢！去完葵興，同媽媽去左葵芳行街，媽媽太好了，送了兩件衫比我，YEAH~ 跟住就同媽媽回屯門買野，好重好重．．．回到家已經十分累了．．．

到左夜晚，其實都總係覺悶同無聊，因為而家既電視都唔多吸引我去睇呢．．．唉．．．開始感到生活好乏味了！

>>December 22, 2008 at 3:16:39 PM GMT+8

2008 年 12 月 20 日 星期六 【晴】

琴晚總算係訓得較好的一晚了，叫做曾經訓著過至少有三小時．．．雖然中途四點幾醒左後訓唔番，直至五點幾，不過都好過完全訓唔番丫！我後來都可以訓到八點三先起身，都算唔錯！而且琴晚都冇點發作了，都係一件感恩的事吧！

今日返教會要幫手做讀經員，初時都好擔心，因為自己真係不時都會咳，而且又會唔夠氣講野，好怕到時會失聲，失禮，失場，哈．．．不過，真係好感謝神，我知佢係我背後為我加力量，令我係讀經既過程中，可以由神佢透過我既口將佢想同會眾分享既話語講出黎．．．真係感謝神！雖然我知自己今日表現比以往係失左少少水準，因為講得快左少少，但係最後都得到弟兄既讚賞，我都感到好高興呀！每次出親黎講野，好多弟兄姊妹都會話，往往會比我把聲音吸引住，因為我把聲入咪，而且好似有種魔力去吸引佢地去聽咁．．．哈，又好似誇左少少！但係，聽到又有點飄飄然架，呵！

完左之後，我地去左利舞台，事源媽媽同我都要去果頭拎之前買落既衫．．．足足兩星期有多了，如果都仲未有我會發癲囉！去到uniquolo，媽媽同妹妹傻左咁又買野，唉，等左佢地一段時間．．．之後上左一層去左muji，妹妹繼續傻左，同我一齊買野．．．再上一層去到k2我去拎褲時，到爹地媽媽發左狂去買野，係呢度係流連得最長時間既一個地方，最後，我同妹妹等唔住佢地，我地行番去恆隆中心果頭去franc franc行左陣，再去別府坐低等佢地黎食野．．．果時已經係兩點八，已經係食下午茶既時間囉．．．天呀，餓到傻左囉．．．

之後，大家繼續去到ikea上面，即皇室堡對面間k2，是關我條褲佢tran錯左去果間分店囉，頂！唉，算啦，初時以為又冇架喇，不過而家有只係要行多幾步都算喇．．．如果唔係我會殺人囉！拎完之後妹妹入左hmv買左cd，我地決定要走人．．．點知，妹妹又話要去time square果邊買野，我地總動員陪左佢去．．．行到rime square門口，媽媽又被d creature吸引住，係咁話要映相，咁我就陪左佢去映啦．．．攪完已經係四點十了！

之後大家決定一定要走人，終於，五點半前大家上到車安安心心咁坐係度了，哈．．．今日真係一個好豐富既節目！

聽朝要一早出門口，因為要同媽媽出去陪姨媽佢去覆診．．．姨媽早前在沙田跌斷了腳，打了石膏，我又未探過佢，所以聽日要去了，順便了解下佢既情況！之後，我都要拎d野出去比我個朋友，拎去葵興呀！之後都打算同媽媽行陣葵芳啦，呵！聽日同樣係忙忙忙．．．

剛才六七點時打過電話比A仔，真係比佢嚇壞了，打了兩次都長響冇人接聽，我真係驚得發慌呀！真係想喊咁滯．．．當時係咁寫SMS比佢，好在佢後來打番比我咋，我咁先安心，當時真係眼淚流左出黎，因為真係好擔心佢會有事呀！真係好驚．．．唉．．．而家安心了！真係感謝神呀！

>>December 21, 2008 at 3:20:02 PM GMT+8

2008 年 12 月 19 日 星期五 【晴】

唉，琴晚成晚都訓得極差，成晚鼻塞不特止，仲喘埋．．．我就黎要死了，嗚！好辛苦好辛苦．．．天呀！喘到就黎升天！今朝早後都十一點幾起身，因為再訓都係繼續喘落去，唉！

跟住同A仔一路食野一路睇VCD，睇完就差不多三點幾了，所以都計劃回屯門！點知A仔話累，本來打算帶妹妹過來我度玩玩，最後都泡湯．．．我初時有點嬲佢，因為有乜理由真係咁要訓？唉．．．我又多野拎住，而且又唔舒服，好喘，好想佢陪我走丫嘛，點知佢一句話累就大覺索了，唉．．．所以最後我一個人，好嬲咁走．．．氣衝衝咁踩單車，去到新元中就中招了，條氣好唔順，係咁喘，喘到要窒息咁滯．．．後來好經辛苦入到商場諗住搵個位坐下，點知又有人攪FUNCTION冇晒位，頂！行埋一二邊冇咁嘈同冇咩人既地方抖，企左係度成幾分鐘都唔掂，於是打比A仔求救，真係當刻要死既時候，只係想打比佢，我唔係要佢即時黎定咩，只係想真係隨時暈低下可以聽下佢把聲．．．點知，佢仲係訓緊覺，仲遊魂咁，我仲嬲，一怒下用SMS鬧左佢一餐！A仔佢真無奈！之後，其實我都知自己衰，都已經打番比佢SAY SOR了．．．希望佢原諒我啦．．．一個人病左陣係忟憎D架喇，尤其係冇人冇物係身邊既時候．．．希望佢體諒我啦！

好經辛苦返到屯門，都已經頂唔順了，一路都冇好轉，只好食一D類固醇既藥去頂．．．無錯，過左一陣已經有效，不過始於唔可以完全痊癒或者完全依賴！而且食得多都唔好，所以我一直唔想食！我媽媽就話我做乜唔去睇醫生！鬼咩，D醫生個個星期六下午都唔開門，我睇鬼呀！唉．．．講真，有邊個想成日同醫生好似朋友咁定期就去見佢丫？你估食藥好似食糖咁咩，食得糖多都會蛀牙或者肥啦，何況食藥丫．．．唉！我相信冇人鍾意咁囉！所以，啞子食黃蓮，有苦自己知架咋！

之後食左藥好了一點點，係屋企抖左陣，同左媽媽落樓，去左藥房，買左一枝咳藥水，一枝通鼻塞藥水，仲有一枝氣喘嘖劑（買定先，怕要係想黎冇就大件事）！咁就百幾二百蚊！頂！我都唔想成日同D藥為伴架，唉．．．有時真係諗住，可能死左仲好，一野攪掂，乜都唔洗諗，唔洗辛苦！但係，都係講咋，我仲有好多野好想做，仲有好多好錫我既人係我身邊，又點捨得咁一走了之呢？

明天返教會要讀經，而家都未睇下呀！死啦，而家咁既氣管狀態，好怕聽日頂唔順呀！點好？！真係祈求天父神向我加力，讓我可以快點痊癒！唔好再被氣喘問題困擾住我啦！

>>December 20, 2008 at 3:02:48 PM GMT+8