| 日記 | 日記主簡介 |
||||
2012 年 5 月 16 日 星期三 【晴】 搭車既期待 唔知點解我冇咩抽獎運 無論係過時過節、公司春茗等等 總有啲抽獎環節 每到呢啲抽獎環節時 手執號碼票既我...都可以唔使睇同等(有時我直頭上廁所...都費時聽抽獎..) 因為十居其九都唔會有我份 但冇咩所謂啦...都冇抽獎運咁多年啦 有咩話..唔開心、唔甘心、氣餒丫..... 因為習慣了 其實.....生活中好多事物時都好似等抽獎、等抽籤....... 例如....搭巴士咁 每當自己坐住個窗口位時 身旁仲有個吉位 男既定想有個美女坐下來...咁女當然又會想有個俊男坐底啦.... 無可口非既.....異性相吸嘛，永恒而不變既道理 據我坐咁多年巴士既經驗呢..... 女既呢......通常會選擇返女性旁邊坐 男既呢....大部分人都係會坐返男性旁....小部分會專係揀女仔旁坐.... 曾經有幾次... 我坐機場巴士.... 當時係非繁忙時間 架車明明仲有大把座位選擇.... 佢硬係要坐去個空姐隔離(我係男人都會諗...咩居心呀..?明明大把位) 我呢....通常都會選擇坐返男性隔離 通常我會選個冇咁大份既男人...事關我大份嘛...(你又大份我又大份仲齊齊坐..?想迫死大家咩...) 二來...為免有麻煩事發生嘛.....(避得就避啦...) 一陣坐坐下瞓著....個頭挨埋個女仔度.... 挨下落啲..跌下又過啲....一個唔覺意跌落人地個胸度 咁就聽仆街之餘....鏹水洗都唔清啦 當然...如果係佢主動選擇坐埋來..... 咁你自我感覺良好之餘.....仲要小心唔好瞓覺挨向佢度啦 不過.......通常十次有九次都係麻甩佬坐我隔離 所以我唯一祈求...都係希望唔好坐個咁麻甩就算了(但唔好比個巴士阿叔我....因為你有壓力..我都有壓力..) 話雖如此...... 我都搭左咁多年車喇 就算坐個麻甩佬來.... 都係一個鐘頭車......算吧啦(又唔係做人世.....) 另一種情況係 由總站上車.....好似等中奬咁 等某某坐下來 點知...轉眼間全架車眼見都坐滿喇 偏偏係自己隔離都冇人坐 那刻會懷疑.....我唔係咁面目可憎嘛.....!!! 果陣時...只求是但找個人快快坐低就算了啦 之但係有一種情況 真係好難頂 就係一身汗味都不特止 仲有酒氣...再加上陣陣濃烈既煙剷味 呢種人無論坐前後左右..我都會覺得好難頂 響架車未上高速公路還好一點 我可以起身...扮下一站落車...走落去企位算 如果上左公路...哈哈 我真係唔知點由東涌捱到返屯門喇 我真係試過咁....迫於無奈 由東涌一直用張紙巾掩鼻.....掩到屯門.... 焗到我暈咁滯(差啲焗到我無意識....) 不過...講返搭車... 我覺得男人總會坐車時..期待邊個會坐下來 中得麻甩佬奬多既我.... 已經冇咩期待 索性閉目恰一恰..... 到睜開眼一看.... 嘩..!!! 前日...... 我坐東鐵... 由羅湖坐到去紅磡 去到上水站 有個強國山東婆身形既女人帶住個肥仔 一齊坐響張四人位排椅度 其實冇問題既.... 假如張排椅係只得兩個人坐的話 但佢唔知係盲定點啦.... 排椅已坐三人..包括我在內 佢仲夾硬塞入來坐(真係頂佢個肺丫...) 四人排椅就坐足五個人 有時候真係唔係港人歧視佢 係佢地啲行為動作真係好離譜同難理解 好似荒死會蝕底咁.... 咁鍾意坐....去後幾卡坐頭等啦 果度每人都有獨立坐位呀 再唔係坐的士啦 要再豪啲咪 阿媽坐一架.....阿仔又坐一架....果幾件行李再包多架 呢啲咪強國人口中既豪囉 可能我係受殖民地港英政府下既教育 我真係摸不著佢地內地既文化喇 >>May 16, 2012 at 6:30:09 AM GMT+8 2012 年 5 月 9 日 星期三 【晴】 我接受唔到囉 很久冇上過來喇 有兩個原因 其一係....我懶...(其實每日都冇特別事發生...唔知寫咩好..冇理由連痾屎都寫架~) 其二係部機電腦...前陣子規規地咁 先係個Windows XP死左 再試裝個Windows 7(唔夠兩日又瓜左...) 以為係咁啱吧...再裝多次個Windows 7....(唔夠一日佢連極都連唔到線上網...) 唔信邪......(冇理由將Lan Card會咁啱壞既......) 又Down Grade.....裝返個Windows XP....(裝XP佢又冇事喎...) 越想越不服氣.....(我部都算係新機丫...) 有咩理由...裝XP就冇問題....裝Windows 7就死機丫...(學王祖藍話齋我.....我接受唔到囉....) 人地舊機裝Windows 7..都行得到..用得到 我冇理由唔得.....(我要上訴...) 又再Format...再裝多次個Windows 7.... 直到而家...暫時都冇事.... 一個多月Windows XP同Windows 7 既抗戰... Windows 7 得到勝利...(我要好多謝自己呢種死唔斷氣..不屈不撓既精神....) 呢個月..... 我要溫書...(臨老先入書叢...折墮呀...) 呢本書全英文...同本字典咁厚 雖然我之前讀過.... 但好多內文都Update左.....(即係要再讀過學過....我接受唔到囉=.=) 而家出街.....如果要預左等人的話 我都會帶本"字典"同電子字典出街....(重到娘親都唔認得我呀...) 仲要放假走去上堂.....(唯一一日假期都要扼殺我.....很想爆粗呀) 不過....希望我既努力.... 到考試當日唔好白費就得喇 而女友都係要為份工去溫書... 佢比我優勝既地方係英文好我好多....(其實頭腦仲清晰更多...) 同埋...佢全個課程冇咁長...(而事實我覺得只係濃縮左...諗住一個月內讀死佢地咁吧...) 響呢段日子裡 大家放假冇出街...(已經有個幾月冇出去行街....) 如果撞正係大家放假.... 一個會響房溫...另一個會響書房溫.....(仲要欄網費事啲貓入來撒嬌...) 此情此境...似曾相識.... 就係細個果時... 細妹響房溫書...我響個廳溫書咁..(可知道學生時代..果啲測驗考試時間都一樣咁滯架啦...) 真係有啲回到過去既感覺 個幾月...大家都爭取時間溫書.... 同樣地個幾月我地都冇煮飯(其實係我堅持叫女友呢排唔好煮...大家都辛苦...仲煮什麼丫) 食既係即食麵....叮叮飯....叮叮粥等等等等 間中會出街食 唔食都唔知....出面食野貴左咁多(閒閒地兩個人都差不多一百蚊...) 而家返工...放飯時間響元朗的話食個酸辣水餃麵加杯豆漿都要40蚊 心諗而家最低工資28蚊乍....(咁就食左差不多兩個最低工資..) 如果響天水圍食仲貴....是但叫一個飯加飲品都要50蚊...找兩三蚊咁(搶錢麼.....搵錢好難架...) 屯門都唔平.......(但可能熟路啲..可以搵到平野食...) 呢幾年...咩都加.....(篤篤計數機計今個月開支時都會擰哂頭呀....) 儲錢.....?!!!(除非唔食同唔住吧...) 前日放工響街見到大果個表弟 冇見一排高過我喇......(其實係娘親生得我矮啫...) 問佢去邊...佢話去食飯... 咁一齊啦..反正家中冇飯...(女友當天不在港呀...) 食飯時佢係咁玩Whatsapp..上facebook.... 最好笑佢又比我睇佢打啲咩喎....(都係啲無聊野啦...) 我一睇....最比我留意到唔係佢啲內容 係佢啲別字.....錯到九十九彩咁 我問佢....咁多別字既 佢話而家個個都係咁打字喎....(係咩..?是我孤陋寡聞吧...) 但我問佢...有啲字好簡單..基本上唔會打錯... 佢話同音咪得囉......對方會明咪得囉(比我....我....我接受唔到囉....) 我....有時真係唔明白點解要將正字打成別字...(有啲字直頭進化到我係睇唔明....係要估...) 我記得有次收左句Whatsapp..."禾就里到牙"(我係用左幾秒先領悟到佢想講咩...) 其實，我同禾、嚟同里、牙同呀..都差不到好多筆劃吧 仲咩要寫得咁難睇呢...?(講真....齋睇我第一個感覺係...你識唔識字架...?!) 或者我已不懂追上年輕一代的潮流 也許我只承能認老喇 下次.....如果表兒甥女果堆後輩再叫我叔叔 我都應該學會...欣然接受吧 仲要回敬一聲....... 乖唷~ >>May 9, 2012 at 11:48:22 AM GMT+8 2012 年 3 月 13 日 星期二 【乍雨乍晴】 回憶50日 好耐都冇打日誌喇(真係要回憶下有咩野發生...) 係因為懶...??(打死都唔認懶啦..) 其實...我發覺自己每日既生活都千篇一律咁 基本上...好多事都會重覆地發生 實在冇咁多事件好記下 有時候....濕濕綷既事又好似記來又好無謂咁 不過....冇打咁耐的日子裡 點都會有難忘的、開心的事發生既 例如新年人地派利是時候 十個人總會有八人會咁問.... 問我結婚未(心想...你地夾埋封幾皮野比我...我就明天結婚啦..) 又會問我下年派利是未(心諗睇下你封是識唔識做啦....哈哈..) 今年新年...初一初二 女友都要返工，所以冇去拜年(錯過左d數人頭既利是..幾百蚊左右啦...) 但係相熟親戚都會預左佢一份 還有......初三那天 我返工時見到阿熹(其實係佢見到我....拍玻璃窗嚇我...) 手抱住個囡囡坐我車出屯門拜年 到了站...佢地隔住車窗比左封利是過我 臨走前...阿熹話幾時約大圍舊同學食飯 嗯....我同菲力做左兩年攪手喎，又係我嘛 阿熹話..今年叫小梅(即係Irene)攪啦....!!!(心諗咁咪即係我攪囉...) 在市中心站傾左差不多成分鐘(望望後鏡....感到有點殺氣既眼神...) 都係拿拿聲去開車喇 我臨開車時佢個可愛囡囡....仲揮揮手仔同我拜拜..(可愛到爆燈....) 去到碼頭總站....得45秒休息..(當堂覺得前列線發炎..) 要忍到元朗先有得去.....(全程冇飲過水...應該係唔敢飲!!!) 記得年初二果晚 食完飯後....新年呢D日子點可以唔賭下錢呢 我最細個表弟...同佢玩魚蝦蟹 其實同佢D小朋友們玩，佢一兩蚊咁買...真係好悶(完全浪費我時間..) 真係好想去隔離枱打牌或者踎響地下同班叔父玩十三張 不過我果日發現件攪笑事 就係發現我最細個表弟....佢 見我搖到佢有買既圖案就放多一蚊 見我搖唔中佢要既...佢就靜雞雞攞走一蚊 呢D小朋友...我真係覺得佢好有前途呀(夠古惑嘛...我欣賞佢) 可惜手法生疏D.....哈哈(比我一句仲捉你唔到....嚇到佢彈起) 後來...過莊比我二表弟...(比佢新年厄下細路錢啦...) 我就去玩十三張、打下牌咁...... 先唔計輸贏啦，起碼D新年氣氛一樂也... 但尾門結數計埋我輸左五舊幾水...(最衰尾果圈麻雀..比人一舖自摸大三元同一舖清一色對對糊) 返到去話比女友知我點慘敗啦....佢話我屎牌!!!!(冇人性) 記得新年果幾日好凍 我有一日唔知點解..叮熱個飯盒走左出去屯門碼頭出面食 望海食飯個感覺有點熟...但又想不到幾時曾經做過呢個熟悉的動作..(到而家我都諗唔起...) 其實我好鐘意響碼頭望海食野(而且我望既位置仲可以見到飛機升同降...) 但只能限天氣凍的日子 因為我地著住件制服唔可以咁週圍坐同食(冬天著住件褸就可以魚目混珠...) 上個月..... 我同女友去左雪兒家打牌同燒野食 仲有Maggie、Katherine、Tina佢地班姑娘等等(其實仲有好幾個姑娘既老公們都有來) BB焦前大家打牌耍樂 而果班老公團呢就上左天台吹水兼吹風 咁女友就同果班姑娘果啲小朋友玩Wii(玩陳年Game Wii Sport) 點知我地打打下牌有個媽咪話夠鐘要去餵奶比B食 咁當時得女友可以頂腳 就係果一舖...... 我食左女友一舖十三么 果刻我諗...我食唔食好呢...?? 但眼見三家都做好牌等食糊咁款 我唔食又有可能比人食 但呢舖我食左等於冇錢收.... 我等自摸好定食好呢.....(以上動作考慮左共15秒左右) 最後忍痛食左佢 點知..沒有最痛...只有更痛 原來...三家都未叫糊(三家果舖牌純粹靠嚇...) 咁即係我唔食女友果隻牌 我仲有幾會自摸啦...(當場噴血...) 果日BB焦，雪兒買左5大支紅酒同兩打啤酒(好似有預謀地隊醉大家咁...) 最後飲到大家啤啤呼(媽咪級果D除外..因為飲汽水) 那晚.....我地好多人都響雪兒家過夜(包括我同女友...) 客房得一間，所以打地舖、坐梳化瞓、坐書房張椅..坐飯廳椅等等 可以休息既地方都比我地班酒醉鬼霸佔哂...哈哈 一瞓醒已經天光....(查實看清楚當時已經日上三竿...差不多十二點) 大家就出去食個晏再各自返歸 雪兒家係小巴總站附近... 我地一上車已經佔左14個位(如果早廿年...我地已經打爆左架14座...) 累到沿路等小巴都要冇車可上...哈哈 上星期左右 女友問我...話不如去旅行... 其實我都已經推左女友好幾次(因為大假調唔到.....又攞唔到..加上就唔到時間) 但今次.....應該冇問題(大假我今次有...大家又夾到時間..) 暫定去阿姆斯特丹... 其實我想去好耐 我好渴望去D有一望無際草原....可以睇下羊群、傳統既木屋等等 但計算洗費方面唔少...(已經選擇淡季去...有剩機位既機會大啲..) 希望可以去到啦...(其實個行程十劃都未有一撇.....乜都未plan....唉) 仲有女友今年內會成為Flight Purser..(其實早幾年已經夠年資去考..) 已經有訓練既時間喇... 祝女友可以順利考到啦...(以佢咁既能力點會唔得丫...) 咁未來佢既制服就會有所轉變(不過已經想像到...) 有點佩服女友佢咁有鬥心去考去爭取.. 明知會比而家更辛苦...責任更大 你令我諗...我係唔係都要自我增值下 所以我近排都有留意內部調職同其他職位 希望我都可以轉一轉...試下唔同環境 唔望加好多人工 攞下佢經驗都好嘛
>>March 13, 2012 at 8:03:06 PM GMT+8 2012 年 1 月 8 日 星期日 【颳風】 回憶年少時...<劈酒篇> 今日同Philip一齊食飯 真係唔明白點解元氣永遠都咁鬼多人(排二十幾張枱....) 我好有衝動想問佢係唔係唔使比錢食...!!! D飯又唔係手搓...而係用係啤出來(講到壽司佢一D都唔正宗....) 魚生又唔係新鮮好食過人 最重要係...佢又貴過人(簡直係搶錢...) 我同Philip當然見到條龍已經掉頭走啦 最後我地去食打冷 打冷就難免飲幾杯啤酒喇(先來兩支大獅威丫......因為夠平嘛...) 大家點左餸就倒啤酒飲 細說話當年咁.... 話時話...我地都識左17個年頭 真係估唔到中學時代既同學.... 感情維繫到現在......(感情真的很要好...) 實在難得 大家又碰杯...一飲而盡 其實之前大家有幾年都冇聯絡 係靠整電腦維持大家見面既關係 當年Philip真係一個電腦大白痴 果時仲係行DOS既年代...(即係電腦背景仲係真色畫面....白色英文字...要自己打字果D) 指令電腦做野一定要打Command.... 而家就方便啦....(用Windows....95、98、2000、ME、XP、Vista、Windows 7) 用mouse點一點就得喇 自早十年左右Philip去軟硬體學電腦後 自始我所有電腦都要靠佢喇(因為果些年頭我學做裝修...脫節左兩年左右...上唔返潮流) 風水輪流轉...山水有相逢...咪呢D囉 有次我拆開架機..攪極部機都唔掂.... 要Philip出手(佢係山長水遠咁來到...) 點知Philip佢一望....原本係大Power條線插少一條 一插左之後就攪掂 個衰仔笑笑口窒鬼我話....."你條友仔真係信唔X過呀..." 嗯.....其實我同Philip已經冇咩可以計 大家太熟...太明白對方心所想喇 呢一餐...我地又傾左兩粒鐘(快樂不知時間過...) 啤酒不覺間已經飲左六支(已經飲得好溫柔喇...) 到賣單......我地永遠唔會爭 今次你...下次我 下次你冇現錢....咪我比囉....大家都係咁是但...冇所謂 食完...我地又落左Bar飲 由於係星期一前夕...所以人唔多 我地一坐底已經比個吧妹推左一Set喜力(又要188蚊一Set...搶錢呀...) 由於呢個係我地主場關係 全場拳手我地都識 我地兩個人就坐左兩個拳手加個生力妹一齊玩大話骰 不覺間....我地都飲左四Set....(每人比左兩Set錢.....!!) 大家都知...飲夠喇....返去屋企休息 點知....呢個時候有個個貓左既~c仔坐過黎我枱挑我地機(又係呢D死金毛~c仔....唉..) 心照啦.....你果枱得兩三個人...仲要計埋個拳手在內....梗係唔好玩啦 最主要果個拳手唔靚嘛....(男人係好膚淺既動物....響酒吧見你靚先會有興趣同你玩) 開頭見佢貓貓地..都諗住一杯分三次飲 點知佢話一舖一杯....(好大膽...但我好想話佢知...你挑錯機了...) 我地話...我地冇酒喇 個傻仔真係自己比錢賣兩Set.....比我地飲(有傻仔請酒飲...Very Good...) 咁我地是但啦(一杯硬掘就一杯硬掘啦...) 玩玩下開始發覺條友...傻傻地 係唔係都開.... 咁梗係要杯杯清啦 可能條友仔不甘輸得咁慘啦(始終有兩個青春可人拳手坐住一齊玩...) 條友仔竟然....郁手打Gameboy...!!!!!! 如果你係女仔.....大家知規矩...會算數 但你係麻甩Man.......(飲唔起....輸唔起就唔好玩杯杯清啦...) 都算......反正打Gameboy有打Gameboy既叫法 的確.....打過Gameboy之後...佢開始贏返幾舖 點知條友仔串貢貢咁.....小我地屎波...叫我地收X皮....(用粗口係咁小小小...窒我...!!) 媽的丫......仲忍你...仲係男人嗎 下一舖....佢又打Gameboy.... 比Philip一手拍落佢個骰盅度 個骰盅啱啱拍正佢兩隻手指尾 Philip咁既突襲...嚇到佢彈一彈 Philip大叫話...."仲捉唔到你個Pk打Gameboy.....!!!!"(拳手同我都笑到佢碌地...果刻佢係勁`b爆到頂點) 罰要佢自吹三支啤酒 條友吹唔夠兩支已經衝入廁所劏.... 而我地梗係較腳走啦(費事佢找人覆桌麻鬼煩...) 問Philip有冇醉....冇...但有少少Wing 我話我都係.... 最後我地又食宵夜....(飲罐可樂清一清醒先....) 其實我們都年輕過狂妄過 以為響D拳手面前要飲得.....先有臉 其實拳手識係係老鼠呀 條傻仔咁叫酒只會益左間Bar..... 又出錢又出命.... 我都明白既..... 當年我只係地方唔同.... 果陣響大排檔一星期飲兩次(當年自恃自己搵到錢....就目空一切) 每次5個人都叫24支大啤以上(其實兩打大啤已經永冇走雞....差在仲要飲多幾多友) 飲到大吵大鬧... 又成日聊啤酒妹..... 當年.....輝少金句."最緊要飲..飲完去劏就另一回事...!!嗱...我而家等人碰我個杯呀...夠膽就來啦" 果時年少無知血氣方剛怕你有牙呀???? 抵唔住就係咁互碰杯.....飲飲飲飲飲...(最尾咪飲到的士都唔肯車我返屋企....) 據知....當年我地響大排檔都臭名遠播...(最近撞返大排檔老板...而家間大排檔已經頂左比人做...) 玩得又嘈又傻又癲....又嘔到一地係 但無奈我地張單都千幾二千蚊... 佢無理由唔賺吧 攪攪下....大排檔老板都醒目...比定個桶大家.....嘔!!!! 今時今日..... 我地碰面......互隊情況已經好難見 大家都大個左...開始老喇........只係一杯起....三杯止 唔係再為飲而飲 係為大家見面..傾計而飲 但如果有人刻意地挑機.... 我可不會手軟(只限第二天放假時適用...其他返工日子.....睬你有味) 因為我自問都算係飲得之人呀......哼!! >>January 9, 2012 at 4:34:38 AM GMT+8 2011 年 11 月 28 日 星期一 【晴】 我的手機年代 曾幾何時 約朋友...大家會響電話筒先講明... 喂.....我地三點半響邊度邊度等啦咁 當時冇問題架喎... 大家都會好守時...(當時個個都最少有隻膠表睇時間...而家梗係睇電話時間啦...我都係~~) 因為是但一方遲左都會累另一個...等到吽....等到變化石 呢個時候...我應該係讀緊..小學一二三年班既時間啦 大概到小四五六年班啦 Call機...即係"軟貓"啦......開始普遍喇(我都唔知點解有咁既濁稱...) 開始大眾化地流行 當年call我老豆時...打啲7字頭既電話 例如....打712344321...call..9413咁 call台小姐會問你姓咩 記得當年我仲好細個... call台小姐問我姓咩......我就答佢姓咩啦... 佢好自然就叫我咩生...咩先生留call 但果時我好細之嘛....咩乜生..物生..啫 我可是一個小朋友乍 所以...我當時好憎打比call台 乜生..物生..叫到我老哂.... 但當時有call機都冇用...(因為流動電話唔普及...呢啲係高尚生意佬身份既象徵品) 對我地呢啲小學生來講.... 約朋友都係在家中先打電話講地點再到時自動蒲頭..... 往往都好少遲到......大家講信任....話幾點就幾點... 最多15分鐘走盞吧 好喇到中三左右呢啲時候 開始有個手提電話 當然係有錢既同學仔先會有(當時佢手攞住一部藍色既愛立信768) 果時...啲電話費好貴好貴 咩一蚊一分鐘呀 個半一分鐘呀 記得當時還叫做"香港電訊"既公司 夠膽收...兩蚊一分鐘(因為出名收得好....果時人地收唔到潛水...而你就對住手提係咁講...你可是很矚目呢...) 哈......果陣有電話都唔敢亂用 用親都要望一望個通話時間.... 情況一就係......."喂...仲有三十秒...唔好益佢呀.....講多三十秒先" 情況二就係......."妖那星丫....啱啱過左兩秒添" 當時.....有電話既人開始冇咁準時喇 因為有電話嘛.... 唔見人...你咪打比我囉.... 心諗....我果陣都未有電話呀....打條毛比你呀..??? 到左出來工作.... 我第一部自己買既電話"愛立信..T18s" 即係劉華個頭仲係分五五界既時候... 劉華同關之琳賣廣告果部.....主題歌係"心只有你"(回頭便知..我心只有你...沿途路鈄..咩在原地) 呢部T18s就威喇當年.....(佢就係貴在個S字) 因為T18s可以顯示中文字....可以打中文字架(T18...就係冇中文顯示...得英文..冇記錯的話) 同埋佢好似...好似呀....佢係第一部有聲控既電話...(即係向電話講...大佬文....佢就自動打比大佬文..) 嘩....當時有一部響身....真係要掛住響腰....仲要凸部電話出來比人知 咁大家有部電話.....當時又出來做野喇...(時間飛逝....當時係已經有月費計劃大約二百幾蚊...三百幾分鐘左右...打爆就每分鐘五毫咁上下啦...) 大家開始都唔多守時.... 因為見唔到對方咪打對方電話囉...咁簡單 "喂....死仔...你去左邊呀??又話三點半響老麥等......" "等多陣啦....我行緊來喇"(查實條死剷仲係等緊車...) 嗱....當年啲網絡係冇而家咁好架 經常潛水...... 所以有電話有時都冇用....(當年冇月費組合呢回事..係唔通就唔通..好少人肯比多幾廿蚊左右加個遺言信箱...) 當時...聽得最多就係呢句.."你打既電話暫時唔通...請遲啲再打過黎啦...The call乜乜乜" 聽到呢段反應...當時係只會講一個字..."屌"(學咩人用電話呀....有等於冇...下刪三百字粗口) 但雖然係咁......我地都有方法搵到佢 就係Send短訊喇....(但當年短訊好貴...好似差不多兩蚊個...果時好似有分網外內...網外兩蚊個..網內一蚊個咁上下啦) 因為短訊..只要佢有少少網絡都會收到嘛 嗱...我好肯定自己係玩短訊既頭幾批人.... 因為我試過玩短訊..玩左百幾二百蚊.....(筆劃輸入法..我早就識喇..) 那年代既人...還會講準時嗎...?? 我諗都冇幾多人會守時囉....(間中自己都唔會啦...) 好喇........到開始有GPRS喇 果陣...我又買部最新既Nokia 8310.....白燈..可以換殼.....仲可以入成分鐘既和弦鈴聲...又有得上網 幾歹都響朋友面前..上下Yahoo....威下先 但威...係要比沉重代價...就係錢 仆街....我又係中個GPRS呢個伏 佢係我唯一一張要交三千幾蚊月費既單...(到今時今日..呢個紀錄仲未被打破...) 老老實實...我都係用左幾鐘上Yahoo....去下睇新聞網...睇下圖片咁.... 點知會咁貴...... 之後..我刪左數據服務.....(直到近幾年我先開返....) 就算後期佢有數據月費....(佢好似段MB計...過左個MB數就唔知點收你錢) 呢個時期啲電話亦都大部份有留言、飛綫等既套餐喇 用費都開始..比較平宜大眾化喇 啲人用電話都唔使睇住時間既年代(咩3000幾分鐘呀二百幾三百蚊咁上下.....我永遠都打唔爆三千分鐘) 短訊都開始話頭五十定一百個係唔使錢咁喇 當年已經係可以帶號碼上台既年代(好似可以帶號碼上台好幾年喇果陣已經....) 所以我成日都轉台(果時好興一轉台就留客...送呢樣果樣比你咁...) 如無記錯...早十年前..我已經用過所有台... 最好收....係邊間....(好簡單....貴價咪好收囉...) 電話費平、短訊唔使錢........唔知幾時大家情願打筆劃都唔打電話同對方直接講 大家明明就攞住部電話架嗱.... 但情願...按筆劃都唔出聲 呢個年代都唔好話守時....就連講電話都懶得講...大家鬥快打字啦...(回得快..又打得多...你就最威喇...) 到左手機有相機既年代 我第一部影相手機係T630....30萬像鏡頭... 唔好話佢影得好唔好先啦.... 有部可以影相...點都要響朋友面前乜都影下 腸粉呀、爛地呀、呢篤屎幾靚喎..又影 明知影出左都係一Pat屎咁.....都要影下...... 目的得一個....."喂...我有部影相手機呀...你有冇"(小時候就係沉醉呢啲虛榮心..而家諗..為乜呢..??) 查清左...當年我用T630時...前一型號都有得影相...就係T610(但好似當時我個芒啲色係靚過佢定點....忘記了) 但又如何...我部新過你呀.......!!!!(哈哈哈...羨慕吧....) 我諗用T630呢個時候...冇記錯已經係2003定2004年咁上下吧 果時仲未興手機聽MP3呢 當時......手機有了..功能有了 大家都習慣左.....唔準時了 但唔打緊丫...我咪玩下電話...影下相囉....30萬像數.....幾歹都玩下先 不過有一日....我同事佢買左部聲寶GX22 佢都係30萬像....但影得好清...真係好清....就算呢個年代..我都會咁講...真係好清好靚 原來CCD鏡頭係咁靚.... 喂...人又30萬像...我又30萬像.....點解我影到一Pat屎咁...???? 唔得..我要換機 但基於當年冇咩錢...加上我手機未壞....(我冇借口換...??但講到尾都係冇錢吧) 不過..唔打緊...女友架機壞喇 係好機會..... 用左3000幾蚊...我送左部手機比女友 咁一來女友開心，二來我又可以玩下，最重要係女友部機真係壞左啦嘛 呢部GX22真係唔講得笑..... 佢影完曬2R相.....唔係問題 咁我當時只有一個願望就係....我架機快啲壞 最後..呢架T630...我係賣左比我細表弟.....套現一千 去追求一架GX32.....即係GX22既下一代 嘩....100萬像呀....真係不得了呀(價錢更加不得了呀...4700幾蚊) 前後芒.....仲有兩個鏡頭.....抵哂啦..(仲有得入MMC或者SD咭呀....我入張1GB入去.....容量邊個夠我大..) 不過...呢部機我冇後悔買....(好明顯係自我安慰啦呢啲...) 因為同期機....甚至後期既200萬像....都唔係呢部GX32對手 嗯...冇錯...已經講到前後鏡頭 當時已經踏入3G年代...(但3G出左咁耐...直到我到我今時今日都係總共玩唔過..一小時) 不過我冇咩用3G丫.......三個字形容"貴"、"窒"、"鈍" GX32...如無意外係我用得最耐既一部機..(其實有諗過佢下一代叫SX833...但好Q貴..要5000幾蚊...) 實拯當年已經年時開始漸高...已經冇心機追機款 好明白...追來都冇用...明天有部又過你頭 果個年頭同朋友開始少聯絡 事關個個都有野做..有野忙 約朋友出街都少喇(一年先見一兩三次...) 都冇話遲到定點喇 覺得人漸大...呢啲小事唔介意(唔通仲話你遲....閙你一餐咩....心暗鬧就會...哈哈) 有女友既日子...真係少追求呢啲科技喇 到我買手機...換手機已經係3G、MP3加影相於一身既手機 當時我買左部K810i.....雖然出左一排但果時都算係新機 我記得我仲大鄉里到同Sales講..咩係M2咭...咩而家呢記憶咭咁細既...真係有2GB嗎???(可知我當年已經冇心亂追啦...) 呢部用左一年多啲咁上下 之後部機又有啲問題咁...唔記得喇 去睇呀睇...心思思又想買部類似接近有電腦Windows既Nokia N73 用唔夠半年...又賣左比個妹...(正當係個妹出來工作既時候...佢又唔想買貴機..所以好平咁讓比個妹) 之後又買左個Touch芒既LG KU660 (係用到我把鬼火既一部) 唔夠一年...叉電位又叉唔到電.....好多古怪問題出黎 最後迫我買部Nokia 既5800...... 呢部平呀.....賣單剩機都係1700蚊左右(我果刻係純粹睇平價錢加上自己能用到既功能去買..) 又送咭、又送機套...又可以加廿零蚊月費..無限上網 由呢一刻..我再次走入GPRS世界..查實我都唔知而家係唔係仲叫GPRS喇(仲有...我用左半年先知有Whatsapp呢回事...) 呢部用左雖然唔係好耐....又係一年左右 事關佢成日有好多Lag機問題 打一個電話都Hold我成分鐘機 但又冇時間去維修 到有時間時先知已過保養期 5800呢部機...雖然用到我把火.... 但我都係抱住打得出打得入....上網睇到報紙....就算...(hold機我忍佢...) 呢個時候Iphone4已經問世 全世界人為佢瘋狂.... 我都唔明點解咁多人要為佢瘋狂 我覺得蘋果都係同香港有影響力既人....Mr Lee一樣 一心都係吸乾你啲錢... 其實我心問緊....佢點改變世界..???點樣咁偉大?? 係.....的確好多人用呢部機..(包括我...) 但諗下....老麥唔偉大咩...幾多人為佢啲公仔...餐餐食佢.... 講明係垃圾食物..不停加價都要食.... 我覺得佢一樣咁偉大 可樂唔偉大咩.... 幾多人日日要飲佢呀 由一支藥水....變成大人細路都會飲既𣈱銷飲品 糖份高又如果... 全世界都有捧場客.....我覺得佢都好偉大... 同埋....我覺得佢既出現...令到人同人更加遠 什麼whatsapp呀等.....呢啲軟體 夠膽死...女友響家....我又響家.... 女友竟然whatsapp我叫我攞野比佢(真係呢...唉~~都唔知好嬲定好笑...) 而家上親車個個上車都係咁啃蘋果(好似七十一咁....梗一個響左近) 點解......人地話要cut個無限上網呀...?? 大家都有呢啲電話加免費通訊軟件.... 發明呢啲免費通訊App...(佢的確係令好多人受惠...我都好受惠) 我好相信當日Line話要收錢都係啲電訊公司放流料出黎 個個都用免費通訊App....電訊公司冇肉食 咩長途電話生意都冇 好難怪人地會斬纜話Cut左無限上網月費喎 其實我都好懷念細個時....同朋友約好地方等 冇流動電話....冇Call機既年代 若果等好耐都唔見朋友出現...為左打電話比佢屋企問下佢家人幾時出左門口... 你會找遍成身去找個一蚊.....跟住打開銀包 攞本迷你電話簿出黎...找個朋友電話打比佢屋企 你而家仲會唔會放迷你電話簿響銀包呀....?? 唔會啦.....甚至連電話號碼都唔會去記吧(我都唔會...但家人、重要朋友..我係自己去記..) 打比朋友A都係打個1字....快速鍵吧 一唔見左部電話...就好似唔見左五臟六腑是但一件吧 但又冇辦法..... 科技帶著人去行 雖然...我唔太認同一些科技 但的確方便我好多好多 正話...屋企個電話冇電...我果度手機又係盲點 女友打比我打唔到.... 佢Whatsapp我.....咁大家就聯絡得上喇~ 不知是好是壞喇.... 慶幸自己真係已經唔係後生喇 追新電話、新電腦.....總之咩都要新.....過你..!!!!呢首歌..我冇得唱喇...亦唔會唱 如果我問自己遲多十幾年出世....會點 嗯..... 我敢肯定自己都不斷.....大灑金錢....務求咩都要新...過你吧 無窮無盡地滿足自己既慾望喇...我一定係呀 >>November 28, 2011 at 10:05:35 PM GMT+8 2011 年 11 月 26 日 星期六 【晴】 酒池肉林 好耐都冇打過日誌(係係係...我認我懶....不過我有解釋架，因為換左新電腦我冇左個Program先冇打乍...) 總覺得日誌變下變下變左月誌.... 再變左"隔月誌" 不過都唔打緊啦 反正呢啲日子都冇咩事發生(小事懶得打.....大事又費時打，因為要打好多字嘛...) 我諗最大既事都係我啲Friend同女友分手 同一個月又有朋友找到女朋友呀咁(一雞死...一雞鳴..咪呢啲囉...) 近呢半年本來減肥很成功...... 可惜....就係佢同分手呢個Friend....令我打回原形...仲肥多幾磅添 為左陪佢飲酒發洩...... 攪到我辛辛苦苦減到既......一鋪清袋 好帶唔帶...帶我上大陸飲.... 140蚊...14支細啤 小食又平(薯條12蚊一大碟...串燒2蚊串...好多高脂肪又平到冇人有既垃圾食物...) 如果唔係人仔貴咁多(400HKD對324蚊人仔...天呀!!!) 真係好好消費既地方 上去飲....啲拳手冇香港啲咁串嘴(我試過香港有一個係...一邊玩手機SEND訊息...一邊hea住同我地玩) 反而仲有傾有講添 不過最近一次同菠蘿佢去 死仔佢耳仔軟.... 比啲拳手推佢買左支芝華士 飲完一支再開多支 之後再開多一支..... 前後兩支半......(另外半支簽左下次飲...) 人生第一次玩骰盅....贏到個拳手飲到伏響枱(yeah....強呀!!!) 之後.....又有一個黎同我玩骰盅(呢個痴線...飲得快又唔醉...) 我幾歹都賴皮話醉..返香港喇(好漢不吃眼前虧嘛....幾歹都詐死先~) 返到香港.....都半迷狀態咁啦當然 第二日頭都仲暈...(好彩去飲親既日子第二日都係放假...) 嗱....事先講明呀.... 以上既場都係"正"場...而唔係"邪"場呀 不過..... 早排有朋友既朋友既朋友生日....我拉人衫邊去 點知比人賣我豬仔去左間"邪場"玩 其實去到都知唔對路.... 點解成條街都係著得咁性感既"小姐"既 個個小姐都係拖住個麻甩Man....(有啲仲一拖二添....) 行到一半...有個"媽媽生"向我朋友大叫話...... "喂....靚仔...上次比個QQ你....仲咩唔覆我 我朋友問佢.....你QQ個名係乜呀 媽媽生大叫話...我QQ個名叫"七情六慾"嘛(仆街丫.....真係頂個媽媽生唔順...) 行下行下終於去到間"邪"場 上左條旋轉型樓梯... 之後又上左好幾轉旋轉型樓梯...(頂.....Lift都冇一架..!!!) 九曲十三彎....沿路只見好多雞蟲同小姐 朋友既朋友既朋友....沿路不斷望女...又抽水 我都有望....但係望我如果萬一火燭點走 萬一不幸事發生我都識走嘛 上到原來去朋友既朋友既朋友既朋友..已經攞左間超大房 內裡已經個個攬住條女...!!!! 響一間充滿濃郁尼古丁既空氣中... 見到呢啲情形... 只能用四個字形容...."酒池肉林" 我屁股都未坐暖已經有媽媽生帶住一批小姐入來房 問我地Mark邊個小姐坐枱 當然....我啲朋友....同朋友既朋友既朋友......個個都搵到合心水啦 而我....話唔要...點知.... 佢又帶另一批小姐入來.....我都係話唔要 點知....佢又帶多批小姐入來.... 此時....聽到有個人大叫..."揼春呀.....越後果D女越靚...!!!!"(其實我都冇點望佢果三批小姐，每次佢黎介紹我都詐加衣飲酒) 媽媽生係咁落嘴頭....話搵呢個呢個果個...坐枱啦....新來架...(我都想同佢講..我都係新來架..比人賣左過來做左豬仔呀) 三轉後....媽媽生冇小姐再介紹過我喇....(媽媽生大概估我係"虧"的吧......) 形容下啲小姐啦... 個個都係超低胸.... 條裙短到唔可以再短 個個對鞋都成三、四吋.....(我差點要抬頭同佢講野....) 過左兩個鐘都唔夠...... 原來先係戲肉..... 就係出去爆房 頓時間K房得返我同另一個唔識既所謂朋友(果刻先知原來都有人同我一樣冇Mark小姐坐枱...) 而呢個朋友都成差不多四十歲既阿叔 冇得揀對手之下 我倆只好骰盅互片啦.... 始終...大話骰兩個人唔好玩(兩個得果十粒骰估..唔係你贏就係我贏...唔多好玩..) 之後玩下幸運骰...又玩下推骰咁 各有贏輸...我倆每人有飲左六支大啤左右 同佢吹下水啦.....我問佢仲咩唔搵小姐陪坐呀...? 佢答我...玩又玩過喇...試又試過喇 玩完個人之後好似好空虛咁.....厭喇 心諗.....原來係"識途老馬"級既阿叔..試到厭喇 佢又問我....好少見我喎...(心諗...梗係啦..我都冇上過黎..) 我話係朋友既朋友既朋友叫我上來唱下K.....飲下酒乍 佢又問返我....仲咩唔搵小姐陪 我話....."我冇錢呀..." 帶唔夠人仔...我只夠比酒錢乍今日 冇諗過會係呢D地方呀 佢大笑...哈哈哈....當見識下囉...但唔好沉迷就得喇...(佢抽一大啖煙....呼出煙圈向我講呢段說話...) 佢仲話一睇你就知..你係比人厄左上來啦....(說穿了...唉...) 我又..哈哈哈...大笑....(因為我都諗唔到用咩說話答佢...) 我話....來大家飲杯先.....杯要清呀(我倆二話不說....一口氣清左一大杯) 正諗緊....飲完我同佢仲有咩可以吹呢...? 終於有人返來啦.... 爆房既都陸陸續續咁返來.... 見到熟既朋友問佢...."你個囡囡呢...??" 走左啦...!!!!! 我話...咁就走架喇佢?? 佢收左兩舊人仔喎...!! 我朋友話...咩兩舊呀...???!!!! 兩舊坐枱....加多舊上房....房租再加六十呢...!!!(未包酒水呀...) 三百六人仔....即係港紙四舊有多 做小姐...真係好似幾好搵啊... 當日.....凌晨十二點突然有個蛋糕推入來K房 係一個三層高既蛋糕 唔係人地結婚七層既道具 真係一個三層高可以食既....(我都係第一次見...) 但係好睇唔好食.... 忌廉多到丫.... 我咬左一啖...已經掉左 之後....大家狂唱歌..玩骰盅...飲酒到三點 埋單...我比左兩舊人仔(我就抵到爛啦...兩舊) 埋完單大家一齊食宵夜 話大家一齊..... 但有最少五個係飲到昏睡狀態... 有兩個已經不醒人事 好幾個語無倫次.... 哼....我同好幾個人比較清醒啦當然 仲要.....有份負責抬不醒人事既人上賓館添呀 而五個係昏睡狀態既..有四個都上埋賓館 五個有四個仲要醉到唔識比錢開房攤屍 要我出去比埋錢佢開房瞓 成240蚊人仔架.......陰公 最後...我同五個人迫一架的士(每人夾20蚊人仔) 搭成40分鐘的士去皇崗過關返香港 一步出香港地方.... 鬆了一啖..又大啖吸一口氣..(心大叫著.....我返來喇...) 始終...我都係喜歡香港呢一個地方 返到香港又搭左80蚊的士返屋企.....(已經冇計用左幾多錢喇...Shit..!!) 雖然話上面酒水係平啲 不過.....如果咁玩法...同香港冇咩分別 若果..近近地上去返我地飲開果間...冇所謂 落馬洲過完關...搭的士都係13蚊就到 係齋飲同玩骰盅.... 夾到日子既...又有時間去既我都會去 但如果又爆房果啲下次咪攪我喇 又悶、又貴、又遠 哈.......之前有人問我...你真係咁飲得..?? 其實....我自問Ok架 但飲得多...都會飽到飲唔到既時候(其實唔係醉...我係飲到飽....想我醉大家要下啲功夫) 我個人有到好就係 我好識響適當時間去扣喉去嘔哂佢(我唔會等到飽肚先去嘔...) 我好都朋友都係飲到飽到嘔..先識嘔(到時咪連自己都忍唔到去廁所....就地嘔咪呢啲囉...) 要嘔..真係咁困難嘛...? 嘩.......如果照單全收...仲有命既 香港都冇咩所謂.... 價錢貴...飲盡都係兩打左右 咁都還可以唔使嘔.....照單全收 上去飲咁平.... 個個搵命搏咁....飲親都四、五、六打 我先唔會傻同你吞哂落肚呀... >>November 26, 2011 at 5:09:07 AM GMT+8 2011 年 9 月 30 日 星期五 【寒冷】 深刻旅程 最近比較忙... 真係太多節目喇...(又要上堂、讀書、考試、返工...充實到爆) 早排....用左三星期去左旅行(真係用盡所有方法先夾硬攞到多一星期假...唉!!大把人情債喇...) 都講緊係8月中既時喇 一直都好想試下漫無目的冇去旅行(因為早十年真係好想做下電波少年既滋味....) 今次同Philip實現到喇 兩條"麻甩Man" 由寶安機場出發....轉轉折折咁 去到張家界遊歷 我地連行左行右都唔知 就決定踢拖鞋做決定 拖鞋面向上，向左行 拖鞋面向下，向右行 總之.....當大家都唔知行邊就問"拖鞋"(名副其實...向左走向右走....) 講真...呢個旅程..既痛苦又折墮 例如見到巴士站啦 等左3個鐘都冇車到(頂..!!果刻真係等到爆哂粗....巴士站牌是陳列品嗎..??) 最後要向私家車埋手 比錢帶我地出去火車站啦(其實我地都好驚比人屈住劏....全程係保持會準備跳車狀態...) 去到火車站又冇火車(過左時間.....有冇咁黑仔架....!) 有火車來又唔知去邊咁 好喇....上到火車又唔知坐邊...(覺得架車好似Full哂咁...) 呢三星期真係行足一日又試過 坐足半日又試過 瞓機場都試過 幾經辛苦，我地坐飛機去到石家莊正定國際機場(搭果程D飛機真係舊到....好似飛到半空會解體咁...) 當時個行程已經係兩個星期既中間 見仲有時間就諗住再做大冒險家啦 又坐行又坐車上去北京 仲要上錯車..攪到大失預算 都唔知用左幾多時間 上到北京首都機場就諗住睇下有冇航班返香港啦 諗住可以舒舒服服咁坐一程機返香港 點知....CX同KA都冇位..(睛天霹靂...) Check到有位果D又唔啱時間 但眼見CX有班機真係好啱我時間....有得睇冇得坐...激到嘔泡泡 我地只好留電話號碼比地勤...叫佢有位就通知我地啦... 而事實上我地真係好趕 趕到係要今日一定要上機...今日一定要返到香港 如果唔係我地就趕唔切返工 再問下HX有冇機啦.... 有位...但我返到去香港曉飛都遲大到 我諗住轉機去寶安機場 又諗過去白雲機場 又諗過飛去澳門..再由水路返來 總之無所不用其極.....咩地方可以轉都諗過 但係我地真係冇經驗 真係唔知咩地方有機再駁機 心諗...呢次仆街啦 正當大家你眼望我眼時 CX打比我地話有兩個位....但分開既要唔要 心諗...我理得坐地下坐貨艙丫..... 我目的....只要返到香港 最終....我地係可以準時返到香港 我仲有時間返屋企梳洗....(正所謂差之毫厘，謬之千里...!!如果搭唔到呢班機一定唔可以準時返工....更唔好話食個麵) 食個杯麵再大埋個便 先返工...爽死喇 回想果日....返工真係好似酷刑咁 但....呢一個行程真係非筆墨可以記錄(呢D日子走個好多連自己都唔知既地方....) 其實內裡仲發生好多事情 而呢D事係極瘀皮 女友聽完之後..... 話"兩個人...兩個腦都咁死蠢"(可想而知係幾瘀皮.....) 之不過呢躺行程係開心既 得到好刻骨既經歷..... 最緊要係呢一個旅程用左好少錢 其實最貴咪就係回程果張機票 國泰食水真係深呀 最可惡係....我果度係個男空服負責 攪到我全程都可以叠埋心水..... 就係.."瞓覺" >>September 30, 2011 at 3:52:24 AM GMT+8 2011 年 8 月 7 日 星期日 【清涼】 啤啤呼 今日放工同同事吧 我都知呢排落得多左 慶幸女友仲未介意 只係叫我唔好飲到唔識路返屋企 個個同事聽到我呢個電話既對話 都話我你女友真係開通呀 查實我同四個同事落Bar 得我一個未結婚 真係有點慚愧呢 落到去推骰仔都少不了 自問大話骰都ok既我 當然飲得唔多啦 或者對手太弱關係啦 有成四Set啤酒都係佢地頂 飲到佢地都瞓覺咁滯 但係都勉強同我玩到 卒之我地五個麻甩佬玩到有拳手坐枱陪我地玩喇 拳手好快就攪掂果三個 最後得係得我同拳手同另一個同事玩 最後另一個同事都投降...瞓得 得我同拳手玩 佢真係好勁...我不得不承認 完全捉唔到佢路 我後尾都係著量咁飲下算喇 費事比人灌醉我 但係個拳手真係好勁 我完全唔知點贏佢 就算我少少咁飲都幾杯幾杯咁上 我都比佢灌佢成Set 卒之有D...人飄飄...Wing Wing地 酒精影響下的我 開始有點失控 深知玩親都輸咁滯 我直頭唔望骰...咁叫骰 可能個拳手睇唔到我眼神...知我靠估 佢都遇料唔到 帶醉既我摇既骰真係比較好運 我叫7個1齌既...我自己都冇望咩骰 我自己竟然係圍一 對手兩粒一 叫中佢....佢要飲啦..哈哈 好幾十舖我都係冇望骰同佢玩 似乎醉醉地既我反而有贏既可能 最後拳手都要過枱同其他客玩 我望住成大半Set酒..... 都唔知點算 醉醉地既我開口撩隔離枱班人玩 好不容易先飲埋飲下果幾支 飲完...我望住瞓著果四個同事 我都唔知點算 我用盡力一個一個咁送佢上的士 仲要比幾個的士佬拒載 因為怕佢嘔嘛 最後我自己一個搭的士啦當然 回到家仲可以自己沖個涼 打埋日誌先瞓 我都算係咁喇.... 多得以前同C4....日飲夜飲吧 酒量雖然回塘... 但對住呢班同事還可以 不過....下星期已約好既聚會 我真係唔知有冇可能清醒喇 **其實而家我話清醒.....但我打日誌..不停咁...連續咁打錯字...** >>August 7, 2011 at 5:47:53 AM GMT+8 2011 年 8 月 6 日 星期六 【酷熱】 偷食唔抹嘴既結果 今日女友有點唔舒服 我收工就陪佢睇醫生啦 既然女友身體抱恙 咁我都唔想佢專登煮飯咁辛苦 反正佢一返到屋企食完藥已經瞓到好甜 一餐半餐咁 我都煮得來既.....我都信自己可以 為左唔好煮得咁煩 我就諗住炒個飯算數 咁我去街市買左雜菜豆、雞柳、叉燒等等材料返來啦 返到家中廚房我將D雞柳切粒調味再煮熟上碟 同時我又將D叉燒放上碟備用 跟住我諗住打蛋啦 先發覺家中一隻蛋都冇 唯有落街走多一轉買啦 點知買完返到屋企 一入到廚房大半碟叉燒冇左....雞粒冇埋(但見地下有D雞肉碎...) 我知我唔使諗...一定係細果隻貓咪攪攪震(係得佢既啫....肥貓咪先冇咁得閒..!!!) 立即捉佢出來睇下有冇罪証 比我發現佢口側邊既毛毛有D油蹟(証據確鑿....點樣抵賴...) 二話不說打左佢屁股幾野 再捉實佢鬧左一輪 鬧佢..我地而家冇比野你食咩....?? 唔怪得你肥左咁多啦(再下刪一千字....) 身型拍得住肥貓咪 點知我未鬧完佢就想逃走....(真係冇禮貌呀....衰仔..) 於是捉住佢又拍多佢幾下屁股 鬧到女友都聽到出來問...發生咩事 今次最痛錫佢既女友都唔幫佢 正所謂國有國法...家有貓規 被告...貓咪因偷食而要困籠 罪名係...."偷食"(唔抹嘴....) 罪名成立...唔接受上訴 刑罰詳情如下.... 偷食...雞粒....罰困籠三小時 偷食...叉燒大半碟...罰困籠四小時 偷食唔抺嘴笨到比人捉到.....罰困籠兩小時 食左咁多野.....罰困籠時冇晚餐(只有水飲....) 早餐得乾貓糧冇罐頭 要我又要去比錢買過..煮過.....罰困籠三個小時(太可惡喇真係....又比多40幾蚊...) 總共困籠十二個小時 全部今日晚上同期執行 真係激死我.... 到而家我都唔知佢點偷入廚房..... 明明已經欄住左.... 如果你偷食完識得抹嘴 冇証冇據....明知都應該係你架喇(捉賊要拿贓嘛...) 我都會算數 但你笨到偷食唔抹嘴......斷正比我 好彩你係貓乍...係咁已比我...仲要就住細力拍十幾下(我知你自出娘胎都冇比人打過屁股......) 如果你係人....... 你死緊喇....!!!!!(可人偷食唔抹嘴咁夠薑咁夠"吉屎"喇.....) **我想講比大家知..佢受靶時....肥貓只係冷眼旁觀....眼神似話佢抵死咁...好鬼抵死** 佢真係唔似得一歲半...咁肥!!! 
唔知點解貓細個時幾可愛...一大個左呢眼神總覺得有點邪惡咁!!! 
乜都爬一餐...呢D動作都唔知掃跌打爛左幾多野...正衰仔!!! 
我在監獄的日子...無自由..!我失自由!! 
>>August 6, 2011 at 4:20:38 AM GMT+8 2011 年 8 月 3 日 星期三 【清涼】 又一個爬我頭 早陣子收到Winnie既電話 第一句問我地址有冇改... 原來佢話想寄請帖比我 我一句"得"埋去話.....出來請我食一餐兼比帖我啦...寄乜丫 唉....又多一個人爬頭 冇記錯Winnie細我幾年既.... 真係...做女仔咪好囉.... 等人求婚又唔使點比錢 我地呢D男生咪為結婚儲錢又儲錢囉唯有..... 我都唔知何時才可以望見家鄉... 真係無言呀 今日約左Winnie出來一齊飲咖啡 同時佢又比左佢地婚紗相我睇.... 嘩..... 我登時對眼一望張相...再望下佢個真人.... 喂....兩個人喎 我眼前明明係一個A小姐喎 點解相片果個係D小姐架...? 又潛建得幾有誠意喎...(果刻比Winnie擲我紙巾....仲要係用過既...頂佢...) 當然講笑啦 以我同Winnie出生入死既交情...佢唔會嬲既...(我指係當年工作上出生入死既交情乍..) 不過..化妝真係令女性起死回生 我識個Winnie邊有咁索呀...哈哈!!!!!(Winnie扁嘴問..我而家好差咩....!!!) 睇哂佢全本婚紗相 我要由頭睇過....點解..?? 因為我冇留意背景係咩地方 你知啦.....有個靚女做Model....我就Miss哂所有野 再看之下.....又係台北景... 真係好多人都走去台北影婚紗相 女友果邊十個有九個都係 我識既都係十個有十個都係 記得有年去婚紗展都係咁 十個攤檔有八個都係台北既婚紗店既舖頭 果陣時同Serene兩公婆一齊去問有關影婚紗相事宜 佢果D婚紗相套餐真係幾吸引(因為價錢比香港平...景又靚...) 最特別係佢地D小擺設 將你地影好既相做成一個小擺設(貼心程度真係要加佢十粒星星....) 仲會幫你整埋請帖...印紀念咭等等 Serene兩公婆...當年好似係整左一盒幾精緻既年曆咭.... 比帖人同時會放一張入去 上年Sherry兩公婆就好似派明信片.... 結婚真係多野攪呀..... 問到Winnie婚禮攪成點先 佢話仲係立立亂咁 仲話為左就呢個又就果個...兩個都有爭執 淨係為請唔請邊個親戚都嘈一輪....(其實好簡單吧，少聯絡果D唔係親戚....果D叫疏戚啦....不請也罷啦..) 我話...正常既 我識好多個都係咁....... 係要大家爭執下先會攪得好 其實大家都係為件事好吧(最緊要佢之後氹返妳咪Ok囉....) 始終......一個婚禮好難滿足所有條件 正所謂...順得哥時失嫂意嘛 或者呢個就係踏入婚姻生活第一個考驗啦 飲咖啡時我又八掛問下佢未來老公係點識架 又問點解佢咁蝕成要妳架.....(又比佢擲紙巾...今次好D...未用過....乾淨既...) 講笑講笑~~ 不過.....我真係點都要恭喜佢既...(真心真意地咁恭喜佢既) 待婚新娘真係特別美... 果種美係由心內散發出來 每一刻都開心又笑得燦爛既 真係....我地早幾年仲係一齊響社區中心工作 一齊真遍元朗既村屋做家訪 一齊出外家訪兼吞Pop食Tea 一齊為去家訪比狗追..... 果陣.....仲係一個傻更更咁既Winnie 邊個諗到咁快妳會上岸丫...(而妳就響岸邊睇我游蛙式、蝶式.......游極都上唔到岸...) 今日既妳將會結婚喇..... 真係大個女喇.... 放心....到時人情我會做足 不能不提要多謝Winnie今日為左比相我睇 要一個女仔搬本相簿出來 果本相簿真係好誇張..(係重得誇張) 仲未計其餘三本細相簿 走果陣我幫佢攞起全套相簿.....幫佢拎啦 真係一個男人都覺得佢重到不得了 那刻我先知道約佢出來真係難為佢呢... 到最後我都決定幫佢攞到返去 當係送佢返屋企啦 Anyway.......祝你婚後要幸福快樂.....永遠地幸福快樂 >>August 4, 2011 at 5:39:29 AM GMT+8
|
|
無事嗎?irene佢而家情況如何