| 日記 | 日記主簡介 |
||||
2011 年 7 月 26 日 星期二 【晴】 一個"直豎拇指"既手勢 正話臨收工... 被我發現個有趣情況(因為係我第一次見...亦都冇諗過會見到...) 果時係臨收工最後一轉 車上既人都一隻手...數得哂...有突添 點知當我駛到某一個車站時 就見到有人影相 開頭仲以為又係D鐵路迷 呢D鐵路迷都唔係第一次遇到 我成日都好想同佢地講 喂...你影還影丫 都等我擺好個Post先嘛 你地下下好似攝青鬼咁 一野就攝左....... 我已經唔係靚仔啦...咁攪法...果張相實行肉酸死吧.... 但今次唔同喎 望真D有個白色禮服男(有半秒真係以為自己撞鬼) 加上一個著住湖水藍婚妙既女仔一齊 仲有兩三個人攞住反光板... 我估係攝影師掛... 我來到車站..開車門上落客 佢就響我車頭取景 當時有個攝影師向我打左個手勢...(大概係話唔好意思...阻一阻你吧) 我又向佢打返個手勢表示...Ok啦(反正都尾車喇.....) 閃左兩下閃光燈後 有另一個攝影師拍一拍我車頭玻璃窗 咁我打開窗探個究竟啦 原來因為角度取唔到景所以想我開前少少 佢地向我講好快...兩張...Guaranteed我... 咁我見對面冇車...(如果對面有車我就唔肯喇...費事比人篤啦...) 算啦...就駛前少少比佢...(見到佢打個手勢..我就停車..) 果然影左兩張就攪掂(呢兩張前後唔使20秒...) 眾攝影師同對新人都向我打手勢...Say Thank You 我都向佢地打左個"五"既手勢... 但我又唔知點解我又向佢地再打多個"直豎拇指"既手勢....(我諗我一定瘀死喇...佢地一定以為我傻佬喇) 路途上....我都諗唔明點解要用呢舊廢鐵做背景 你話攞電車都話有本土文化特色丫 真係百思不得其解.... 回家同女朋友講呢件趣事 女友一句講...."各花入各眼吧....." 仲話..."你第時都可以咁做架...." 哇...!!!!我先唔會呀.....比自己人笑足一個世紀呀 呢個笑話仲會流傳千秋萬世...直到永遠....笑到永遠呀 以上呢件趣事..呢頭聽..呢頭散就好了 記得早一陣子仲同女友話..... 不如下次放大假去坐下高鐵囉 當時我仲話都通車左一排...都唔見意外 都應該安全既... 一口就答應左 曾經有個師兄響Lunch Time咁同我吹水咁講...(果陣我真係當佢吹水...心諗，你邊有咁高見呀..!!!!!) 話人地日本都研究左幾個十年先研究到今時今日既高速鐵路 又話人地果D"TGV"高速列車... 人地用左幾多時間、人力、經驗、實驗、撞擊測試..先至開發到今時今日既TGV呀..!!! 中國一起步就想同世界高速鐵路睇齊...?? 通左車我都一定唔敢搭呀...!!! 就係師兄佢呢一句...我真係唔敢搭(吹水還吹水丫...果刻佢又真係講得幾有Point嘛..咪真係唔敢搭囉) 但見佢通車一排...正當我開始有信心時 佢先黎整單大大單..結撻撻既 仲要係犯D咁低級既錯誤 後車撞前車..真係絕對係有冇攪錯 一套完善既訊號系統...點會比呢D事情發生 真係極度低水平既嚴重錯誤(仲要死咁多人...) 但事情發生左都算喇 有一節車廂半天吊 響未搜救出所有生還者同死者之前 佢竟然整斷半天吊果節車廂....等佢跌埋落地 最可悲係....當整斷半天吊果節車廂之後 仲話響殘骸找到生還者 咁即係話...半天吊果節車廂都可能有生還者 但最終都有可能比佢地呢D低級營救手法而跌死 響下面車廂殘骸果D有可能生還既 就有可能比半天吊既車廂壓死 其實 白痴都知首先要救人同時要固定車卡啦 佢仲要將D車廂殘骸用剷泥車整散佢...等佢再支離破碎D 大家有冇見過一架飛機失事後 響意外未有結果前會用機械破壞佢丫...(咁為左救人而破壞就冇得講啦...) 殘骸梗係越完整就越好架啦... 咁事後調查都會容易一D嘛 可知有D外國既飛機失事....為求找到真相， 美國國家運輸安全委員會仲會將殘骸盡力還原 務求解開失事原因 等錯誤唔會重覆再犯 而家好地地一件都叫完整既殘骸就咁整爛佢...(我個人覺得車廂問題都係擁有一個不可公開既秘密...) 真係諗極都唔明點解唔整爛佢...埋左佢 而得出一個笑到仆街既結論係話......方便營救同工作..!!!!(真係咁都講得出...!!!) 唉......有時唔係中國人批評自己人中國人 但中國流傳左千萬年既一個傳統而改不了... 就係"好大喜功" 女友同我講 有時對住D大陸客... 坐頭等、商務果D....(真係覺得自己係人上人...) 其實坐經濟都唔好得好多... 聽得女友講最多係Economy Class(因為小薯絕大部分都係做Economy Class...) 最鐘意呼喝人....使人唔使本(總覺得自己比左幾個錢就係皇帝..) 不得不承認而家中國經濟真係開始發達 仲同時令到好多內地人都發埋達 而家我地比人叫"港燦"(風水輪流轉..山水真係會有相逄) 但好可惜佢地有錢..但偏偏教育水平低 冇教育...個人本身就會冇文化 以為身上有幾個錢...就可以橫行天下 深信腰纏萬貫就可以成為一個肚滿腸肥既暴發戶.....想點就點!! 一個低等教育水平而又有錢既人.....佢地會有咩所作所為...?? 咪覺得我有錢咪大乜哂囉.... 世界要圍住我黎轉囉 我好老實... 我對祖國真係無咩好感 可能我自小係受英式統治時代既教育吧 而家我只會認自己係香港人 喂...大佬呀...我仲點敢認自己係中國人呀..???(我都驚無臉呀....) 又搶鹽、又毒奶粉、又搶醋、又黑心食品、又屎水臭豆腐、又假雞蛋、乜都可以有假(得D賊同貪污唔係假既...) 而家仲整單咁既後車撞前車既鐵路事故... 我地而家仲唔係成為全個銀河系最大碌既笑柄...?? 可悲也...
>>July 27, 2011 at 4:22:33 AM GMT+8 2011 年 7 月 22 日 星期五 【晴】 落Bar飲夠皮 上個禮拜同Philip"打冷"... 落住傾盆大雨.... 我地縮下又縮下咁食住咁避雨 真係唔知呢D係唔係叫"風味"呢... 響打冷果陣... 我地兩個飲左五支大啤 比著十年前.... 我呢D"本死無大害" 多多都同你放入肚 好記得果時有句就係 最緊要飲....飲完入廁所劏又另一回事....劏完返來再頂過(都唔知咩道理黎..唉..!!!) 依我記憶....我有一次真係醉到瞓響馬路中心 但係....當年話飲左咁多啫...我仲未試過"斷片"既情況 一句講哂啦 當年唔怕死....乜酒溝乜酒都係咁照飲 果陣落到Bar仲瘋狂 一舖大話骰就一次細啤(一Round閒閒到都一個人一Set) 飲完一Sst又一Set..... 飲到瘋癲時就爆Vodka等等(年少時真係痴Q線架.....!!!) 點講都好啦.......呢段時間係我人生暫時最開心既時間 無憂又無慮嘛 近呢幾年.... 約返班Friends出來 大家都係淺嘗幾口.... 飲酒好似華山論劍咁......點到即止 總唔會為飲而去飲 大家都話....."仲後生咩....仲係以前咩你估..!!!" 最好笑係....曾經有一日我地C4加埋幾個Friends一齊打冷 望見隔離枱既"年青人"....打冷玩大話骰...大叫四個六......七個二.....九個四 我地不約而同咁話....佢地好硬膠呀!! 但諗諗下......當年我地咪又係咁 原來...我地早十年前已經係一名不折不扣既硬膠 上星期同Philip打完冷之後 仲係落狗屎咁 就心血來潮話去Bar飲下半場....(當係避雨啦) 咁無所謂啦 反正大家明天又唔使開工 入到去就比個拳手氹左兩Set酒 落得Bar.....玩大話骰就少不免啦 估唔到Philip強左咁多 比佢冧莊連羸4、5舖 咁我都要認真下喇 其實我玩大話骰..一向開頭都係輸多 因為我果刻都仲未捉唔到佢路 但之後就唔會架喇 未必會羸緊...不過一定唔會連輸 正玩得興起時 有個拳手加入 果個拳手靚係幾靚既(身材幾好添架....) 但都唔知係唔係有心厄酒飲既 點解話佢厄酒飲...?? 因為有好幾舖骰佢都叫10個或以上"齋"既點數 喂...三個人玩...10個或以上"齋"既點數....微乎其微啦..... 唔開你就真係唔係人啦 佢總共飲左我地成Set酒差唔多...(都唔知佢發咩神經....通常拳手都係厄飲少酒...點會杯杯清架...) 最尾我地係頂佢唔順打發佢走 叫佢去招呼另一枱客吧 果晚我地飲左成千幾蚊酒 最主要係...我銀包得返四十蚊(Philip話我...攞40蚊夠膽出街...!!!!叫我因住比雷劈..天譴呀...!!!!) 咁.......咁關我咩事喎(喂....我今日原本只係洗30幾蚊架乍.....) 酒吧又冇得嘟八達通..我有咩辦法喎 就連我的士錢都要Philip比 的士都係佢幫我截.... 叫的士大佬車我去邊度都係佢幫我嗌 因為我已經醉鬼左 失敗 哼.....早十年你同我飲...你死梗呀..!!!!!!!! 近日..... 返工同事話我知有個SAMSUNG Galaxy 有個App 係玩偷拍...... 我覺得呢個App真係防不勝防(我覺得女士們一定要知..) 佢既偷拍既時間個Mon係黑色 即係同你Off左部機一樣Mode咁 影相完全係靜音 最勁係...佢可以影完相...果張相可以自動改檔名 即係本來jpg既檔可以變成txt檔等等 仲可以選擇偷拍完收去一個好隱蔽既檔案夾內 正如....示範者比我睇咁 佢偷拍完個我食既飯盒之後 佢係機主.....都搵唔返我個飯盒相片 過左幾日 我用Iphone都找到一個咁既類似既App 但其強大程度冇SAMSUNG Galaxy咁強 但同樣都可以黑畫面偷拍加消音 各位女士們要小心喇 好可能..... 只要有個人用個鏡頭對住你 勿理佢係開機定熄機....架機咩狀態下 佢已經係偷拍緊你喇 真係唔係講笑 >>July 23, 2011 at 12:17:46 AM GMT+8 2011 年 7 月 12 日 星期二 【乍寒還暖】 麻麻煩煩... 記得讀中學既時候 除左中文、中史之外 全部都係英文授課 而我咁多科之中 我最憎係Maths.... 都過左咁多年喇....我都唔怕同人講 讀小六果陣...人人可以用心算既數 我都仲係數手指既階段 亦都係咁...本身英文已經唔多靈光既我 再加上係Maths 用英文加上Maths既課程.... 我真係冇一次可以合格 或者我心深處真係好憎"數字" 時至今日 就連去銀行我都勁討厭 一來要排隊 二來要簽名(我總覺得自己簽名次次都唔同...) 諗起都麻鬼煩 前幾日..... 女友用我個Account去買賣股票 而早排銀行網站又更新左(事後我睇過都唔知佢更新左D乜....) 最終攪到女友用唔到我個Account 主要係打密碼問題....成日都顯示錯誤 可知道網上銀行果D密碼...係有錯次限額 唔知錯多幾多次(好似係3次...) 佢就自動Lock Account 咁Lock Account即係要本人去攪啦 其實我到而家都唔知佢有冇Lock到我個Account 因為佢仲比我地打到密碼 銀行呢D野真係好麻煩 想話用電話去解決呢個"密碼"問題啦 又要按一二三三二一..一二三四五六七..輸入完一大輪 先話我知...我地既服務時間係....09點至18點(扒你個街....用電話玩我咁耐..) 而天下既女人都係會為目的..."無所不用其極" 女友竟然打去Card Center問(打去無里啦更既部門問...) 哈...又比佢問到接線生喎 咁個Account係我既...又要我去用電話對資料 不過最後答覆都係話過左Office hour... 佢地果邊冇人 叫我地留言比佢地部門...明天覆 點知...女友明天又要返工 而女友返工時間就係佢地既Office hour 咁女友竟然毫不客氣咁留我姓氏同電話 過左一日佢銀行打比我... 問我有咩問題 有咩要幫忙 我如實講係Login唔到(果刻我都唔知自己講D咩答佢D咩....我都唔係用家..!!!) 但我又唔知女友之前做過咩....響個網上Account裡面 對方問我既事我一概唔識答..唔知點答(有如一直保保持緘默...) 攪到最後我就留女友個姓氏同電話比佢....哈哈 還以為好叻啦自己 女友聽到就話...."到時咪又係要你去對資料...始終都係要你響度....!!!!" Shit...我真係冇諗過....!!! 唉......我真係好討厭有關數字既事情 講到錢囉喎....我更加唔想去理啦 錢呢....我每日夠洗我就Ok喇.... 前幾日... 我八八掛掛睇女友果D所謂師妹既Blog 發覺佢地Post相片有幾個共通點...... 睇佢地D相片先至好笑 有幾個Crew佢地Upload左幾張相上去 果張相片....佔左85個巴仙係佢個大頭 餘下果15個巴仙係背景 只不過...... 佢張自己個樣打左格仔(家下你拍AV嘛...???) 而背景又因為景深太淺變得好濛 咁......咁...你Post上Blog....有咩意思...??(比邊個睇.叫人睇D咩呢...??) 我而家睇打格仔嘛...? 佢重要厚格先攞命喎...!!(咁不如索性唔好Post啦...) 有一個又係好笑 今次呢個Crew就係要去為期6星期既訓練 佢就連每日早餐食果個美心麵包都Post上黎 我真係想問...我地大家未見過美心既吞拿魚麵包嘛?? 定還是呢個係你既最後吞拿魚麵包...? 不過...如果呢個吞拿魚麵包....有條蟲捐出來的話 咁就有Post既價值喇...... Anyway...佢有佢既權利post任何野 大家立場不同吧 講起女友呢 早排我睇返佢影既相 而女友一向影既通常都會有人又有景 有一日我睇下佢部相機啦... 佢影左一張咁既相出來 呢張相....想講D咩..??我唔識英文架 
不知佢想暗示定還是係明示D咩呢..... 啱啱Philip佢打比我 問我係唔係死Q左 成日都唔見我上網 其實有原因既 而家...用手機上網咩都做到睇到(智慧型手機嘛....) 電腦自然就少用少開啦 咁咪變相我咪少左上網蒲頭囉 我仲未死得...!!! 死Philip丫...把口十年如一日都係咁衰咁賤 你呀.....夠冇打電話比我搵下我食飯啦 你係冇錢交電話費丫定係冇錢請我食飯丫定還是係...你已經破產呢..?? 你知啦...你早排話D單唔多夠....唔夠食...話再係咁就破產嘛 咁你上次話破產.....今次我估你又破產 總共破產兩次.... 嘩......雙重破產..... 嗚.......冇陰公呀....(我把口仲賤呀..哈哈) >>July 12, 2011 at 5:45:52 PM GMT+8 2011 年 6 月 21 日 星期二 【酷熱】 講粗口....惡哂呀?? 今日同女友既婆婆去覆診 一向都有糖尿病好多年既婆婆.... 已經病到好嚴重 雙腳已經爛得好緊要 每日都要洗傷口 就算唔每日洗....頂多都要隔日洗 如果唔係....處理得唔好雙腳都要切 據我之前知道 佢洗傷口既時間係需要好長 洗一次最少都要個半鐘頭 我今日陪佢去洗 佢入左去治療室後 我只係響出面等都等到瞓著咁滯 響婆婆入左去治療室無耐 就有個中年男人入去敲治療室對門 我聽到姑娘同佢講.."你遲左一步喇...要等等喇" 個男人坐左我隔離...等左半個鐘左右..... 已經開始粗口鬼殺咁嘈.... 又話咁X耐、洗乜X野洗咁耐...... 總之...每講一句都有粗口 我雖知佢講緊婆婆..但係我又可以做D咩丫 唯有繼續恰眼瞓...當時運高咩都聽唔到 隨住時間佢越等越耐 佢就越來越谷氣 不斷係咁自言自語.....講哂粗口....X哂老母咁 卒之....大家等左差不多兩個鐘 佢就鬧足個半鐘 到婆婆洗完出黎 佢就罵婆婆....洗乜X野腳洗咁耐呀、阻X住個地球轉....X你個老母..!!!! 其實....佢鬧粗口都算喇 我都知等咁耐真係會令人個火滾 之不過佢話婆婆阻X住個地球轉....仲問候人個老母..!!!! 呢個絶對唔可以原諒 大家都係同科病人 你話人阻住個地球轉...咁即係話自己吧 不過.....響醫院公眾既地方... 我都唔想失禮咁當眾大鬧 但係...之但係...咁響我臨走佢都仲X哂鬼咁 到姑娘開門...佢仲向姑娘投訴話洗乜X野腳洗咁X耐呀.....等X左成兩個鐘有多...(其實都冇兩個鐘...我唔知佢點計) 姑娘話....你唔可以咁講喎...我地約左你9:30 你10:30有多先黎 但係條花甲仲係好唔順氣咁話....我等X左成兩個鐘有多呀....(望住我同婆婆講...) 聽到佢咁講我忍唔住同佢講(佢條友擺明就撩交嗌) 你咁想快既話就咪學人遲到啦 一係想快又想可以遲到咪走去睇私家醫院囉 佢正想X鬼我既時候.... 我立即話.....冇錢睇私家就等啦...老坑...阿支阿左 佢正想再出口X我既時候我又鬧鬼佢 大大聲粗口唔係大哂惡哂既.... 因住比人告呀...老坑 老坑話.....告乜X野告....呢度大聲D講野唔X得呀.... 我話......冇文化又唔識字就問下姑娘問下人啦 查字典睇下醫管局附例啦.....老坑 之後我就推住婆婆走 雖然姑娘同好幾個職員都來阻止我地嘈 但係都無濟於事 呢兩分鐘我唔係要嘈羸佢 我只係想激到佢火都黎 睇到佢越鬧越滾越粗口 我真係想笑 唉........鬧到下下都要扯人伯母落水講哂粗口..好勁咩 粗口有邊個唔識講呀...? 句句有形容詞好威呀 有本事一口氣用一句說話鬧足六十個字既粗口出黎丫...... 正廢人.....呢D人先係阻住個地球轉呀 返來同女友講返呢件事 女友話......我知你講邊個男人 原來...佢都係一早已經出哂名口衰又臭檔 早知係咁...我就唔留口...用唇槍舌劍黎收佢皮啦 >>June 21, 2011 at 9:45:15 PM GMT+8 2011 年 6 月 10 日 星期五 【晴】 當婚禮MC之準備 呢三個星期多真係忙到不得了 可能連打後日子都會忙 原因係有朋友要結婚呀 要組織"兄弟團" 對抗"姊妹團" 開頭都有點抗拒呀 事關做過幾次 我真係覺得係比人玩到.......唉(班女人唔係人黎架....) 真係諗起都怕 咁當然啦.....話雖如此啫.....我都冇拒絕 話哂人地大喜開心日子嘛 但我不得不承認有咁諗過 諗過咩呢....? 就係我去做兄弟都要有條件架嘛 D姊妹靚唔靚既先...??(好緊要架呢D....) 哈哈...... 咁開會果陣....大家都坐響度講當日既流程 最重要就係投票選擇誰是當日既MC啦 結果.....我係眾望所歸既男MC啦 原因係我有幾次做婚禮MC既前科...(咁何必投票選呢...嘥氣..!!) 女MC係阿Fuji.... 佢都係眾望所歸既，因為佢又係有前科..(最主要佢個樣夠甜嘛...) 照咁講法..我呢D一定係靠把口搵食啦...(我又冇樣..) 咁選好MC....就大家開會討論當日既Rundown啦 包括開門利是幾多之餘呢 玩咩變態遊戲就佢地仲未諗到喎 段估又唔會係超辣蛋撻、芥辣梳打餅、廿四味啫喱掛.... 記得上一次果一班姊妹諗到玩拼圖 用新娘夾雜其他女仔既五官黎貼響天花板..(卜街...個天花成9呎高差不多...) 要我地抱起新郎哥去搵返佢老婆既五官出黎 結果我地兄弟們"舉"新郎哥都舉到手都軟啦 其實每一次玩遊戲時間真係唔多 好多時都要速戰速決(但我都仍然時間好難過...過得好慢...) 有時甚至玩唔哂三份一之前已經準備既遊戲...就要擱置添 因為又要敬茶.... 新娘又要去梳頭化妝..補妝真係用好多時間 最大鑊係...今次女既住響天水圍 男既住將軍澳(一個住東一個住西...) 只係車程都要40分鐘 要敬兩邊茶真係時間都浪費哂 之後又要去尖咀海傍影相 再之後又要去做埋註冊登記.... 整多兩整時間又話要上婚宴廳準備 上到去又要按之前編排做其他野 不過呢.... 姊妹做既野係會多D既 好似佢地本身要補妝呀、幫新娘執頭執尾等等啦 剩係幫手換婚紗都有排佢幫手啦 而當日既"演講者" 咁例牌又係一男一女做MC啦 今次我就係男MC喇做.....!! 其實點解我會比人揀中...?? 咪就係個女MC...阿Fuji我識得囉 同時我又同對新人比較熟 仲有.....Fuji都係同我同一公司.. 不過佢響東鐵線做查票 哈.....咁都拉得我落水既(咩道理...同一公司做會夾D嘛..???!!) Anyway.....算啦....我本身又真係同Fuji幾熟既 而且我都幾鐘意同佢做拍檔 平日見面我倆都串到對方死...串到飛起 Fuji呢....就十月中輪到佢結婚(佢問幾時到我....!!!!) 阿大姐大Fuji佢呢...已經篤定我出黎做佢婚禮既MC 咁今次都好既 當為左佢再實習下MC做準備先囉 其實我一D都唔怕自己會記唔到台詞 最怕係台下面D人會嫌悶、嫌我地浪費時間 因為我既經驗所知..... 八時入席.....永遠冇八時咁準 一定最快都八點半 仲要你兩個MC.....話一堆廢話喎 咁好多人都覺得嗱嗱聲開席食完就走...就算啦 我有一次好差既經驗係我有我講 下面有下面吹水 唔係十幾個吹水 係十幾檯都係吹水 真係做MC做得好無癮果一刻..(真係好想用1分鐘講哂15分鐘既台詞....之後開席...) 其實做講果個真係好難受...見到呢D情況 所以我都好佩服講楝篤笑既演講者.....尤其係阿黃子華 我好佩服佢做到.....係能夠帶動全場氣氛聽佢講野 仲有喎....佢一上到台講兩個鐘...冇得縮沙喎(我真係冇咩可能做得到佢半成...) 所以今次我地都醒目喇 為左增加趣味性..... 我同Fuji兩個人都改講詞 真係唔好以為我地一企上台就OK 我地都要背稿仲要執生 見到全場冇咩反應...我地又要即場執生攪氣氛 講真丫..... 台下有人笑、拍手掌真係對我地最大既鼓勵囉 所以大家有幸去人地既婚禮 聽到MC演講既話 請你都比15分鐘時間比D反應 就算反應係假都好啦 總好過下面各有各吹水嘛 仲有.... 有冇發覺呢幾年對對新人都興放一段由小時候到大個到相識相戀既短片呢 我唔知人地點睇啦 我個人覺得好老土喇 不過做MC呢就靠佢做中場休息回氣既 雖然我唔太贊成出短片.... 但為左我地兩個苦命MC.... 我同Fuji都係贊成出短片比大家睇 開會時我仲問.... 阿新娘有冇D著三點式既相 阿新郎有冇D著三角褲既相 我覺得出"肉旦"會增加收視率囉 最後好可惜佢地係冇既.....(9成9唔願意分享啦....) 好喇....... 份MC稿由今日起我會隨身帶住 據我經驗好多時都會有攪笑位、感動位既靈感加上去 D靈感好多時都係出出下街或者返返下工先會諗到....(我係咁犯賤...坐定定係諗唔到...) 最後最後.....最唔少得既係一對新人既感動自白啦(一定會有人喊架....係睇新人喊定佢地D父母喊..定係一齊喊....) 正話....我睇過份Rundown..... 又會遇返果D劈酒一族 即係..紅酒溝威士忌溝白蘭地再溝啤酒...果D 睇黎果日我都可能要比人抬返去 因為同對新人太熟....我頂酒都係好難避免喇(10幾杯都冇咩點走雞喇...) 希望...果一晚劈完酒....第二日唔會令我"斷片"啦 >>June 10, 2011 at 6:12:42 AM GMT+8 2011 年 5 月 14 日 星期六 【晴】 最近概況......『懶』 最近都係忙住返工同放工 老老實實添呀...連街都少出呀(其實窮咪少出街囉......哈哈!!) 無他既......但出街有時係可以唔使用錢架嘛... 一個字....『懶』囉!! 唔好話出街呀 就連電腦都少用少開呀 一日到黑就只係想瞓同去瞓 有時都好懷疑自己係唔係得到呢個『渴睡症』 真係試過一日瞓足二十個鐘...(離譜呀真係...!!!) 更可悲係我仲要比女友懷疑 我有心唔陪佢出街(點會呢.....!!!!) 之前買Iphone4時.... 電訊公司話一個星期會有一張唔使錢戲票 但係...到今時今日為止.... 都係一張冇攞過..冇用過 就講今日.... 女友返夜....返成22:00幾 我成個下晝都冇陪過女友出去 話出去食飯.....點知最後係送女友返工 飯呢...就女友去煮...(臨返工前都要女友煮飯...唉!!!!) 我都好相信再咁下去會.......嘿嘿嘿 哈哈....我會不得好死....!!! 係係係...我會好好留意架喇 講起....前幾天 返工既話題都係早幾日單炒車 唉.....705、706已經係超級悶線 不停圍住天水圍打圈 有時真係轉到頭暈又眼花 又多燈位、又多人.....都唔打緊 最怕就係果D行人同我地鬥快(真係覺得架車係車唔死佢咁.....) 其實最攞命都唔係路面既車 我最怕係果D..送外賣單車 橫衝直撞...痴線架....唔使睇車 真係以為自己有兩個轆...就係車(你果D係單車乍....!!!) 仲要幻想自己係拓海添.......真係攞命呀 講返今次呢 我又唔響現場睇過... 據了解係貨櫃車撞燈 只係撞左一下車身..已經出左軌 車門同集電弓都飛埋出黎....電子組件散滿一地 其實...呢D列車得個車身高...前後泵把夠硬之外 基本上係一架LEGO..積木車..(一撞就散...) 我都八掛返過屯門Depot睇過架.... 車底D零件真係散哂...沙版都爛埋 估計係出軌時比碎石同路軌擦過 一句講哂....架車有排醫(或者可能提早翻新呢部車掛...我估..!!) 而家已經有合共兩架車入左廠...(94年果單架車身編號1013已經劏左添...已經唔存在喇) 另一部係上次比吊臂壓到既第四期新車(都唔知藥好未....冇聲冇氣咁) 而家仲多左呢一部..第一期列車 呢排港鐵都多災多難囉....(又抗議又炒車又故障...) 最攪笑係女友打電話問我有冇事..????? 我身在屯門碼頭...點會係我呢....(女友唔留心呀...明明大大張Duty貼左去雪櫃嘛...) 哼.....呢D真係要打喇.... 我上個月左右呢... 去左睇廣華中醫 前幾日覆診..... 把把脈....睇睇條痢.....又叫我執多幾劑藥(200幾蚊....) 嘩....今次D好鬼難飲呀 佢飲剩尾果D粉末呢....永遠都溶唔哂 尾個啖真係...飲到醒哂兼想嘔 我而家先知.....藥丸既偉大(沖水即可內服) 藥師問我.....今次好D未呀...? 我答....唔多見效乍喎!! 可能係咁佢真係執鑊苦既我嘆啦 下次同醫師講野真係要客氣一D先得喇....(如果唔係下次唔知比咩我嘆呀...) 佛誕果日.... 諗住去長洲睇下飄色 點知當日熱到人都溶 我地大家都話...都係下年先.... 其實年年都差唔多既野 講睇哂全日既節目..(睇下飄色、買平安包、買平安包手信、睇搶包山....) 都只係重開第一年我先真係睇足全場 飄色+搶包山+買野、食野 已經係好好好幾年前既事喇...當時仲係同以前女友一齊睇現場添 仲用DV錄底左..搶包山過程 不過都唔知餅帶同條片....飛左去邊喇 應該真係認真咁搵一年去返長洲... 用DV錄底返......我地今時今日睇搶包山既情形 等第時大家都有個紀念...到此一遊嘛 今日睇報紙... Dragonair又遇氣流 又有機組人員同乘客受傷 我都知有D氣流真係好難避免到 話時話.....港龍D花機真係好邪 次次出事都有佢份咁滯 今次到25週年金龍機.... 點都好啦.... 我都叫佢......返工打醒十二分精神 正所謂有咩依郁....攬住碌竹... 咁當然啦....機上係冇竹既 唯有叫佢....見到乜就攬緊D乜啦 唉.....而家搵食真係艱難困苦呀 我行地下既...又怕比人撞 佢行上天既...又怕遇氣流 邊個話而家返工唔係...搵命搏架..??? >>May 15, 2011 at 3:20:07 AM GMT+8 2011 年 5 月 6 日 星期五 【晴】 我的第一次 前排入完醫院 感覺好似大傷元氣咁 攞支水都好似冇力 或者食西藥又打針掛前一排 攪到人都虛哂 女友提意我去睇中醫啦 但..... 其實我對中國任何野都好抗拒 真係唔怪得我喎 卜街.....佢連蛋都有假(蛋要幾多錢啫...都可以有假...佩服...) 奶粉都可以有毒(呢個直頭係離譜..天怒人怨添啦....) 呢排又有果D黑心食品(又話咩化學成份....頂!!....響內地既Chem敢認第二冇人敢認第一呀....!!) 中國咩都有假 在我心中..... 中國得一樣野係唔會假 果D就係"賊" D賊永遠都係真既.... 唔知早幾多年 我都聽過話一個大男人去洗手間 係會出唔返黎....比人攞哂D內臟去賣 攪到我而家都唔敢一個人北上(最少都要三、四個人以上..我先會敢北上.....!!) 的確..... 中國係令我好唔放心既地方 好簡單....兩件貨....一件貨係印住"覓現差拿" 另一件係他國既 我會選"他國"果件..... 總而言之.... 我對內地毫無信心 真係...冇得怪人囉..... 唔係唔想信...係我仲點敢去信 不過....女友話"你試下睇中醫先啦" 話哂...中醫提倡固本陪元...由內至外調理身子嘛...!!" 最多去廣華中藥部睇喇.... 半信半疑...半推半就咁(我諗...廣華又係中大既乜乜乜...應該Ok掛...!!!) 我就比女友推左我去睇(呢一次我個人生第一次既中醫....) 去到呢..... 感覺令我幾放心既(環境好乾淨...感覺係舒服既...) 去見中醫師時.....醫師講野都幾中肯 最主要攞藥時 佢Pack好一包包咁.... 返去只係沖水飲...好方便 最讚既係....佢果D藥方係用電腦打既 用咩中藥...一目了然 唔似坊間果D咁 用狂草寫藥方.....(卜街....坊間果D佢本身已經"草"架啦...佢仲要狂...狂咁草....點睇得明...??) 真係有時想知佢咩藥都唔識睇 而家用電腦出字 我上網Check都會查得出隻中藥大概用處 呢D咪叫放心囉 不過.... 返去沖藥飲 真係好難飲(而且佢唔係想像中咁易溶...飲到尾果D真係...又苦又難食...) 佢苦都好喎(起碼"苦"只係一種味道丫....!!!) 佢又唔係苦....有D古古怪怪既味 真係飲到作嘔咁滯 似乎我仲係接受唔到佢D中藥味道住 比D時間我接受吧 接受....我怕且真係要D時間..... 上星期 姨丈佢地約左我去飲茶 表弟先去攞位 哼...我呢D係長輩喎"大表哥"喎....(但查真D我只係平輩....大家同一Level...只係我大佢十幾年吧...) 嘩..... 我一去到差D認唔出我表弟 高左好多....(同一時間佢D青春豆....嘿嘿..!!) 高過我添.... 哼...高有咩用..??(咪純粹自我安慰用囉...!!) 頂丫.....心諗食左咩咁好營養呀? 同一時間...我心中滴咕滴咕著 點解阿媽唔生高我幾吋...!!!!!! 呢個問題我早十年已經想問過我阿媽....唉!! 唔好話我表弟呀 就連我對下既一個表弟都高我大半個頭.... 同女友出街 女友著高3吋多D呀 我都唔夠佢高喇 點攪呀??? >>May 6, 2011 at 7:01:18 PM GMT+8 2011 年 4 月 17 日 星期日 【乍寒還暖】 捱過喇...我又可再獨立喇 終於都捱左一個有監視既星期....(真係好難捱好難頂好惡哽...) 日日駕住部車....都會出手汗 話雖然係技術上冇問題 之不過有條友企響你身邊......(即係一部會郁既流動CCTV....監視你咁!!) 我真係Feel到有壓迫感 但總括黎講.....一切都好順利 由屯門、元朗、天水圍...我走哂全部線(強呀.....我頂得住喎仲!!) 係返工既繁忙時間....(7-9am、5-8pm) 人流多時上落要留意下有冇夾到人....(阿Sir好似叮囑遺言咁講好多次!!!) 其實要我控住架車冇問題既 但要搵返當日果種感覺.....(其實我唔識講..!!) 感覺大概係指....手反應快過腦(好難理解吧..好深奧..真係好深...!!) 如果找得返呢種感覺.... 我會自信心好多好多 但而家都係做返而家應做的吧 例如....早D瞓覺(成日比女友話我咁夜瞓...) Ok....我會改架喇....!!!(聽住先啦...哈哈) 星期三到今日 女友同班女同事定同學呀...(都係果類既朋友啦...!!!) 去左韓國玩 我響香港被魔鬼訓練中嘛...當然冇份去啦(比我都唔想去啦..去韓國即係去我瘋狂行街...) 女友加上呢班八婆威啦.... 自己走去訂其他航空公司既機位 呢D咪叫折墮囉..我咁同女友講 女友話......邊有公司會有6個機位隨時吉左等我地呀....? 況且時間都唔夾(唔夾...??我Check過20:05有班CX機.....妳地就搭20:10既韓亞!!差5分鐘....點唔夾..??唔明..!!) Check過佢架機係767-300ER(平時係用A333機...唔明點解改左763機..!!唔明!!) 雖然係舊機...但我都未坐過呢隻型號 4個鐘到仁川機場 而家通訊發達 用Wi-Fi打長途電話唔使比錢 咁點呀...? 咁咪即係日日都打黎Check我有冇去滾囉 而家呢....仲流行"打卡" 若女友想知你位置... 你就要響Whatapp顯示而家位置Send比佢 科技真係害人不淺呀 唯一解決方法就係....."唔記得帶手機囉" 講笑啫 我點會唔記得帶呢 我都要聲明...女友暫時都未試過真係走去用手機打卡Check我 千萬唔好誤會我女友呀.... 去到機場接機.... 再同人打崩頭上機場巴士 仲要碰正架係短行李架既巴士 可知幾多人係夜機返呀....巴士公司...???!!!! 女友件行李真係重得可憐 返到屋企.....打開 全部都係化妝、護膚品 而我既手信係.....14包炸醬麵、兩Pack紫菜(一切盡在不言中啦我....) 唉........全部都係食既.... 咁女友去得玩 當然要睇下佢影D相啦 睇到D景..... 我都覺得韓國係一處值得去玩既地方 如果女友下次肯刪減大部分Shopping既時間的話 我就去韓國玩啦 >>April 18, 2011 at 8:49:00 AM GMT+8 2011 年 4 月 10 日 星期日 【晴】 學神二世 今日準時五點幾起身 原來似乎快要入夏季喇 因為五點幾...天係見光....日長夜短嘛 食過早餐....著起好耐都冇著既制服(感覺有點窄...我相信件衫縮水....同我無關...) 準時七點到Depot 報到 見到有新同學仔...(好似驟眼睇又有靚女...) 而家都唔知第幾班喇 當時我係第90幾班 照推理..佢地一定係第100唔知幾多班喇 當然我唔係同佢地一樣要上堂(我可是師兄呀...Level不一樣呀....哼.!!) 我考返果D基本筆試...(用電腦考....一考完知結果果D...) 之後Pass左我可以去掂下部車喇 一上到去...... 嘩....果種車上既視野真係有點陌生.. 其實應該用唔習慣來形容 但當我坐左一陣.....響車廠兜左幾圈 阿Sir...認為我得...就准許可以出街 掛住我B牌....路線牌打住.."司機訓練" 沿途見到好多熟悉既師兄弟姐妹 明明人地係一個有牌..合格既司機.. 竟然要打住"司機訓練"...比全世界見到(比D靚女師妹見到...仲得了既...?!) 真係....唉..!!!(一個字...瘀...好似小朋友留班再考升班試咁...) 第一日....我駕駛一期車(呢款車十分好駕) 第二日...我駕駛三期車(呢款車出名難駕...去得快...落Break更加要快.....垃圾車..!!) 第三日...二期車(呢款比一期難駕..但整體上還可以...) 第四日....四期車(一蟹不如一蟹......心諗堆填都唔收呀...) 第五日....上午..一期拖二期車...下午...四期拖四期車(好明顯...上午食沙糖..下午咪食屎囉...) 第六日....三期拖三期車(心中諗住...明天放假架喇..捱埋今日吧..) 呢幾日真係駕車...駕到嘔 條條線都行哂 重複又重複咁行 都唔打緊 有個阿Sir....貼身睇住全程先係壓力嘛 眼成日要望住D限速牌..同自己既時速計 記得自己以前直頭可以靠感覺開車停車 而家就..... 睇黎要拾回呢D感覺都要一段時間 一星期既"出察重新培訓課程"...(我改既呢個名...) 都叫完結.... 阿Sir都話我大致冇問題 下星期來緊考載客列車 載住客..又要顧住D客之餘 仲要顧住我身邊個"考官" 我都希望女友句話會實現...."佢會守護住你既...!!" 女友話....其實你以前都試過..你係得架噃 咁你仲擔心...怕乜野...!!!! 唉.....女友倒說得輕鬆呀 有個考官將會跟足你一星期喎 點都有壓力啦 我反問女友 正如妳做Service.......做LHR航線..... 妳個紫姐全程LHR睇住妳做Service 妳會唔手震....? 女友話...你個死人頭...同你講D樂觀既說話你硬係唱反調.... 我手震唔驚呀....比人炒咪你養我囉 下星期....你自己好自為之吧 哈哈....我覺得我呢個女友....越來越不近人情呀...!!! 雖然....女友把口係咁講 但呢幾日都好溫柔咁叫我"早D瞓啦...明天要Training呀" 係係係.......妳既話我點都會聽既 無問題.... >>April 10, 2011 at 4:24:15 AM GMT+8 2011 年 4 月 4 日 星期一 【晴】 單車遊 今日同光記、佢家姐兩公婆....踩單車 由元朗→濕地公園→流浮山→上白泥→下白泥 之後沿途咁返轉頭 呢一躺旅程真係.......一個字形容"慘"!!! 由元朗→濕地公園，完全冇難度 去到濕地公園大門口 見到完全冇"禁止單車"進入既路牌 咁我地當然直接入去啦 見到"食蕉"先知唔比單車入 我地比"食蕉"趕走...叫我到去由時租停車場 咁梗係比佢老點啦 內裡得一個露天停車場 我地單車難到要泊"時租車位"嗎... 大家都諗...踩入去唔得啫.....推得掛 於是我地今次落車推入去 又比同一個食蕉趕 我地最後玩鬼個食蕉話 人地果D.....BB車....四個轆都可以入去(我地指住架BB車..) 我地D兩個轆....仲要推....點解唔比入.. 食蕉話....你地係單車....唔比入 光記立即拆左個前轆出黎(佢D係靚單車.....可以即拆即換...方便落場比賽之用..) 咁我入得去啦....!!!!! 阿食蕉好無奈都係阻光記 最後我地扮到好不滿咁 話出面一個指示牌都冇講話單車唔比入 阿食蕉....唔識答 之後光記立即改口話.... 阿姐...講下笑啫...我地痾篤尿就走架喇 泊埋一邊...唔阻人....交個水費...好X快 最後食蕉阿姐好無奈咁幫我地看左兩分鐘車 咁我地都守諾言......拉隊閃人 我相信阿姐到而家都會咒罵我地兩個死仔包 之後全速飛上流浮山(完全放甩佢地兩公婆..) 去到流浮山當然要遊覽一下啦 放底同鎖車係一個問題 光記用一把單車鎖...鎖起四部車........(一百個勁....!!!!) 我都覺得好勁 鎖好車之後 就去睇下D出名既生蠔 沿路真係好腥呀.... 但係去到后海灣岸邊....見到兩個阿嬸....拆蠔殼攞D蠔肉出黎 佢地既手法超快.....手起刀落(呢個個阿嬸，男人一定唔得罪得，佢D刀法真係..要切你忽肉真係唔難，咁當然指係男人最易切果忽肉啦...) 只不過我係最怕食蠔 無論生蠔熟蠔..我一食即痾.....萬食萬靈(好過食瀉藥...) 所以我連蠔油都唔好食.... 佢家姐兩公婆買左D蝦膏做手信 飽覽完流浮山之後 我地向上白泥進發 亦都係慘痛行程既開始 沿途係好多好多暗鈄 我地D單車.....只可用上鈄冇力..落鈄無敵黎形容(光記果架例外啦...) 全部D路真係一係就大上....一係大落 上鈄對我地D外地人來說.... 我諗除左用光記果D幾萬蚊架既單車可以應付之外 你用普通單車......你註定要推車上鈄 就算你好力.....你踩得掂頭一二三段鈄 你都唔會捱到之後既鈄路.... 光哥咪係好例子啦.......牙刷刷咁....最後咪又係要推車 以為落鈄好爽嘛 如果冇對頭私家車的話真係會好爽 無論上鈄定落鈄.... 身邊無時無刻都會有私家車 前後突擊.... 最危險係反而自己人撞自己人 一見到有車來....我收慢架車...有時甚至會收停部車 後面既單車收唔切就炒埋一大碟 我同光記就差D有好幾次真係炒獲勁 雖然係踩得辛苦 但一路上既風景係好靚(可惜我冇帶相機...得部iphone....仲要得半格3G) 最衰果時天氣唔好 如果唔係睇個日落應該會好靚好靚 我地開初諗住聽光記話 由流浮山一路沿稔灣路殺入龍鼓灘 但係路途上已經消耗大量體力 我地去到下白泥....見到有士多 好似見到閃爍既金山咁 買水飲 我地都傻唔哂...問當地村長 沿路如何去行 點知村長話......踩單車去唔到架 你要托車攀山仔咁過先得架.... 咁我地當然打響哂個"退堂鼓"啦 就係.....鳴金收兵時我地見到太陽日落照海面既樣 但天氣唔好...就係睇唔到"咸蛋黃"......有點可惜喇 回程途經天水圍..... 有條死仔踩單車左穿右插 我地D好脾氣既.....只好用一句話殺哂佢家族啦....就係"幸包散"丫你個 但當佢左穿右插到光記架車 光記就同佢挑車.....危險萬分....叫都叫佢唔切 我心諗....鍊車冇用架喎... 應該吊佢車尾..撞佢尾轆...等佢卜街先有用架嘛 光記....去左邊???? 一早連車尾車都見佢唔到 唔好話車尾燈啦....我塵都食佢唔到.... 最後光記已經響朗屏邨等緊我地咁多人 差不多夜晚七點半 去交還單車 大家都餓到跌底 之後我地去左任食打邊爐 唉.........以為踩左日...可以減到幾斤啦 點知自己打邊爐食返幾個特 倒重返幾斤 咁我呢D算唔算....賠了夫人又折兵呀...? >>April 10, 2011 at 3:28:44 AM GMT+8
|
|
無事嗎?irene佢而家情況如何