| 日記 | 日記主簡介 |
||||
2010 年 7 月 31 日 星期六 【晴】 緊急手術 今日係我人生第一次自己叫白車 可恨既係我唔係女人 如果向我講肚痛.... 我最多都只會以為是腸胃炎 覺得是忍受得到既痛... 出去買一盒止肚痛藥便算 嚴重點去睇家庭醫生友只係掩肚叫痛 但臉容不算難看 我選擇前者...就比成藥女友食算了 亦都食左藥有好轉 但不到幾個鐘又叫痛 見女友痛左兩次 安全計扶女友看睇私家診所 當時扶著她還懂行走 仲可以扶到行到商場睇醫生 經醫生診斷.... 腸冇絞動...唔似腸胃炎 但女友堅稱只係肚痛 或許係咁 醫生無奈下開左腸胃藥及止痛藥比女友服用 最令我奇怪係...女友今次肯主動打針 回到家後...食左藥又好似好左一點 到夜晚..... 又叫痛.... 今次痛到企唔到挨到牆邊 臉色明顯地係好差 問女友見點.... 女友說不到話...只係點頭搖頭..彎腰雙手掩著個肚 看情況今次係痛到叫唔出聲.... 我見到咁.... 腦內閃過兩個做法... 抱佢搭的士去醫院 一係叫白車去醫院 其實我好怕尷尬.... 比人見到有白車佬推女友出去 一定唔多唔少會比住客知 街既人又會望 我嘗試抱起佢 但她似乎痛得佢僵直.... 完全放鬆唔到比我去抱... 無可奈何下只好打999 好快就有救護員到 我在家只係帶左女友同我個手袋....就關門走 跟白車去醫院 由家到醫院沿途都係躺在擔架床上 在車上救護員幫女友Set哂機 好似好嚴重咁 由白車出AED..... 女友分流為緊急個案 好快女友已經有得見醫生 我冇得入去只係外面等 醫生替女友檢查... 醫生仲要她優先做緊急超聲波檢查 已經斷定唔係肚痛咁簡單 其嚴重性要做個緊急既手術 醫生向我講解手術風險 由於係緊急手術... 好多應做既手術前檢查都冇做 只係好快咁配血.... 就由AED直推上5樓手術室 此時已經係凌晨12點幾 醫生話手術約半個小時 但我一等就等左成個鐘 之後有著住手術袍既人大叫邉個係傷者家人 手術原來冇想像中咁順利 要我做決定簽紙再進行一個手術補救 但要切除既部份... 我一時三刻真的冇法決定 但唔做醫生又話有危險 其實我跟本冇選擇 只好簽紙繼續進行手術 這刻我只祈求不要再發生同一情況 如果唔係再要切除既地方會影響女友成世 我等多個鐘...前後兩個幾鐘 女友從手術室推出黎.... 我一路跟住床走向她講 做完喇..冇事喇...見點呀? 女友只係講...."痛" 之後又閉上眼.... 姑娘話麻醉藥未過 推入病房時... 姑娘話我唔入得去 心急既我...緊張又大聲講... 佢啱啱做完手術..你都應該比少少時間我望一望佢掛....我起碼想知佢點丫 姑娘見我咁....就話..明白明白..一係咁...我地過好床..Set好機先叫我入去望望 姑娘仲話始終係女病房而且深夜又唔係探病時間 我話...我明白..我唔會望好耐..但我起碼想知佢情況點....話比病人知我會走...我都要知佢響咩病床 我話...我會明白我會識做....我再強調我唔會望好耐 我在病房外等左15分鐘左右 姑娘叫對講機開門比我入去 入到去第一眼望到女友係 旁邊有兩個機...嘟嘟咁響、手指夾住睇個血氧、手臂包住個血壓機、床邊掛住我尿喉既袋、仲吊住一包血、還有吊住一包唔知咩既水...佢係要經過架機先會注入血管... 我輕拍她...女友有感覺..望向我...但我見到既佢係一臉倦容...連轉身甚至連講野都冇力既感覺 我知道我再留底都冇用... 向女友講...我將電話放在你身邊 有事或者可以郁到既話就打比我啦 著她講.....妳自己休息下...我唔可以留咁耐...明天探病時間探妳 這刻...女友輕軟冇力向我說話...."唔好話比媽咪知..." 我應承她....同時講我要走喇 女友輕點頭... 我亦都走出病房 我這刻諗...我可以約見醫生 就向姑娘book時間約見醫生 明天早上11:00見 回家途中....我諗...真係唔知點向女友講佢情況 或者明天醫生都會向她道明情況 我只怕既是女友不知會唔會唔接受 雖然切除左部分還有其功能可以運作 但呢個影響我真的唔知女友會點諗 算吧.... 明天再算 睇睇電話已經凌晨4:00幾 我好累...但真係冇心情休息 我還可以點.... 仲未等我覆診時.... 女友已經先入院攪到咁 今年我地攪什麼 點解大家都要出出入入醫院...? 很煩呀... >>August 2, 2010 at 9:05:25 AM GMT+8 2010 年 7 月 30 日 星期五 【晴】 等我.. 今日返工前比人抽左去吹波波 即係Check下有冇飲酒 當然係我冇飲啦..... 不過吹果個波波都唔容易 佢要我一口氣吹...一直吹到部機響為止 我差D吹到斷氣... 當場死比佢睇咁滯 不過都叫好彩 因為....我間中都會返工前瞓果晚 飲一細支裝既啤酒 但係我會心中有數...咩時間可以飲 一定唔會超標 話雖如此.... 飲左就係飲左 少少佢都會Check到... 但只係唔超標 不過比人知道我曾經飲過就真係比人扣哂印象分啦 有時女友煮飯都會用酒煮 唔知我食左會唔會中招呢... 之但係有時冇酒煮既餸真係冇咁好食 尤其是女友煎豬扖時....用紅酒煮...果D味真係......(好想食呀....!) 響呢度真係好想多謝女友一直現在都照顧我三餐 有妳先會養到我咁肥肥白白 來緊日子我可能要入院做個詳細檢查 冇事..固然大家都會開心 但如果驗左係有事..... 我都擔心到時得妳一個人個悶親妳 而家政府醫院D探病時間又有限制 如果到時想見都有困難 同樣地... 如果一個人我響醫院瞓 我都一定會好好好好掛住妳惦記妳呀 對唔住呀 妳既朋友一個一個咁結婚 今日又收到帖喇 其實我感覺到妳打開喜帖時係有D野 唔知用咩形容詞形容妳果刻 其實我都好心急咁娶妳架 但係一生一次...我想做得好好睇睇..比我地有個美好回憶...等妳會有深刻印象 要做得好好睇睇 就需要錢 我真係好想靠自己能力去娶妳 要我女友...未來老婆等我 十萬個Sorry呀.... 總而言之我應承妳唔會掉低妳 我呢一生只會喜歡鐘意妳一個 我今生都係只會娶一個女人..... 就係妳呀Irene... 可以相信我...再耐心多一會等我嘛...? >>July 31, 2010 at 4:05:32 AM GMT+8 2010 年 7 月 29 日 星期四 【暴雨】 魚翅新制服 正話夜晚約左女友同埋佢D同事去食飯 女友既同事有D啱啱落機 衫都未換就出去飲野食野同傾計 而我見到D紅色利是封已經見慣不怪 我成日都話....套制服咁既設計 係防止妳地遲到 點解...?? 著到紅噹噹咁... 妳要追車巴士追車司機實見到妳啦 一定等埋妳.... 咁點會遲到呀...? 講笑啫..... 據我了解佢地守時係好重要 遲左返去開呢個"上機前會議" 真係會比ISM劃花個底 所以..好少聽到人話會遲到 Ok....講返今日想講既 其實我想講今日我終於見到佢地有人著新既制服 開初我仲以為會擺脫"利是封" 點知都係難逃呢個"紅色"宿命 但我見個設計好似仲衰過舊既呢套..真係新不如舊 而家舊呢套雖然係好紅.... 但佢個黃色領口好特別...我覺得真係好靚...呢一個設計 整套著上身...如果著果個女仔五官端正...唔係太肥 基本上...化個指定"綠眼紅唇"妝已經會好靚好搶眼 加上佢地件外衣係"收身"設計 點著都會有條腰著到出黎.....望去會覺得佢好窈窕 真係好難怪好多男人去望佢... 比我的話...若果唔係時時見到空姐...我都會好自然望一望 講真係.....未同女友一齊時呢 我硬係覺得著左制服既佢地係好鬼串 好高挑、清高....好似望我一眼會失佢身份咁.... 唔知各位男仕們有冇咁既感覺 但而家識多左好多身邊既人做呢一行 相處落會覺得佢地幾好人、冇咩點 仲比我地D人識得打開話題....難聽D叫唔怕醜啦... 或者有機會接捉佢果行既人....先會有機會改觀啦 講真...平時等巴士響街既時候見到D空姐們.. 我同佢三唔識七....都唔識佢點會同到佢傾計呢? 唔好話著住制服既空服啦....路人甲乙丙都唔會咁做 所以自己先會好自然咁就覺得人地好串吧 嗯.....講到尾...人地著住套制服就話人串...就真係有點那個 但2011年至2012年左右 魚翅會轉制服 今日見到Sara著果套.... 佢好野丫，比公司抽中左可以首批試著 女友佢入紙申請試著...佢抽唔中冇得試 女友扁嘴話..可能自己身材唔好吧...!!!! 今日首次見..... 我第一個感覺係....Sara老左10年咁....著到似一個女僕多過一個空姐 雖然佢都話上機都係一個....連廁所都要洗既女僕..冇分別 但今次新制服D剪裁真係麻麻地 唔知係唔係我睇唔慣啦 冇左黃領口....而反變左係白又唔白...金又唔金色既領口.我都唔知咩色形容佢 睇睇下我仲覺得似個酒樓D女侍應添 聽佢地既著後感... 條紅裙工作時自己扭埋一邊.....好鬼煩.. 而且個開叉好阻佢地"踏大步" 不過聽佢話著慣左都可以"健步如飛" 見到Sara著成呢個樣咁 心諗好彩女友冇抽中試著 我真係想像唔到女友著上身會點...? 但轉係遲早既事.... 看情況我都要接受一下... 其實接咩受丫....哈哈 都係睇自己睇唔睇慣吧..... 可能我到時望耐D可能覺得佢靚呢...又話唔定 而且都係制服一套...個個都係咁著.... 不過呢..睇黎要幫女友響未收回未轉制服時呢段日子 幫佢影多D相先得 比第時D仔女睇..媽咪幾咁靚都好丫嘛...係咪...? 有時間下次我地既節目......影相 我諗女友都會願意做個Model... 我公司班影相發燒友師兄弟 都會好樂意影既
其實我都想Post佢地既新制服比大家睇... 但D相片係Sara既我又唔好意思未得人同意放上黎 如果妳地想睇....去機場T1大樓5字樓 坐定定幾個鐘就一定會見到 不過遲D大家都會有得見架喇....遲早既事 唔使急住睇丫... >>July 30, 2010 at 3:21:25 AM GMT+8 2010 年 7 月 28 日 星期三 【溫暖】 狂風雷暴雨天下 整天都落住雨 心情真係最不爽 我返工最憎雨天就係人都知 一來...列車會跣軚... 無錯...鋼轆係都會同路軌互跣 二來....我落車會比雨淋濕自己 一出一入冷氣就真係...想病都極為容易 有人問我...你冷氣開細一點咪得囉... 係..真係得..係可行既 但車外內溫差令車窗會有霞氣....驅之不散 阻住我視線 再加埋大雨...真係想唔撞死人都唔得 不過.... 我今日發覺下雨可以令到我有一點"笑" 唔知係唔係呢一次真係好勁..我講D雨 D渠又塞..去水入極慢 令到路面好快好快好快咁水浸 水浸就令馬路都有成2吋水高 D車經過好似...噴水秀咁 濺到路人一身都係水.... 當然我架車都唔會例外 雖然我見唔到自己車有冇濺到好高既水 但我見對面線其他師兄既車... 濺水大到可以高過一架小型客貨車..即係細貨Van 我眼見有好多人在水中央等過輕鐵路軌上去對面行人路 佢過到一半又變紅燈 D人向前走不得...因為我架列車衝緊過黎.. 我車速都有30km/h...唔算快...但一定夠Power濺起D水 D人亦退避不得....因為背後面係行緊汽車 D巴士、私家車、小巴....,一架接一架 我先見路人比呢堆車濺到盡濕 之後仲要到我架車來到再濺多佢地一野 正確係兩野...因為我係拖Car 其實我已經好好心咁慢車咁去 但架車咁重..我點慢都冇用 眼見路人咁...我都除左用慘形容外.. 我都冇更好字黎形容 不過.....人都係鐘意睇人PK既.....人性嘛..!!! 正如你睇動物頻道都係咁...獅子打老虎....你唔會睇佢有打得幾痛... 你只會睇佢邊隻死..邊隻PK...!!! 我都係人....人性也.... 見到D人比雨水濺到一身係 我本人呢個PK.....係有笑出黎.... 心跟住諗....而家在有蓋地方返工既我 真係比佢地幸福好多 唉....唔好話我衰喇... 我今日每個站都差不多等人追我車呀..又慢車避水氹 我足足"正"左1分鐘有多 廁所都冇得去呀.... 果然...我都係返工討厭雨天 >>July 29, 2010 at 12:01:28 AM GMT+8 2010 年 7 月 27 日 星期二 【雷雨】 靚得瀟灑?! 女友又執野 今日輪到執飾櫃 除左少少金器、銀器 都有D會比風吹得走既鑽石....應該叫碎石吧 仲有好多水晶首飾、頸飾... 其次最多既係髮飾同埋有D我都唔知叫咩...大概係用來方便紮個髮髻出來既工具 仲有D大髮夾、頭鉔、紮頭髮既像筋咁 最多最多既係黑色既蝴蝶髮夾 起碼有30幾隻.... 攞命既係佢隻隻款都差唔多 據講呢D係佢返工時紮頭髮用... 因為公司規定長頭髮女仕們一定要紮頭髮 跟住有一袋係包住兩卷黑絲帶 聲稱用來綁頭髮 即係剪10零吋長之後....代替紮頭髮既像筋咁使用 當場女友示範過 好勁...果然有一雙巧手 我真係睇都知自己冇可能做到 一手抓住D頭髮....另一手就繞繩...跟住唔識點講 其難度係屬於"超S級" 我話..多餘..有像筋唔用..要咁麻煩 女友話咁除左唔傷頭髮又靚之外..... 仲有....即埸示範.. 一手一拉條絲帶 好瀟瀟灑灑咁..D頭髮一把咁放返出來 再Fing兩Fing把頭髮.... 我真係睇到眼都定...!!!! 呆等數秒..我問.."就係咁呀..???" 哈..... 我眼前呢個女人..真係服左佢... >>July 29, 2010 at 12:00:48 AM GMT+8 2010 年 7 月 26 日 星期一 【酷熱】 受氹 我婆婆生日..... 阿娘既兄弟姊妹個個都出黎賀壽..即係我阿姨、姨媽同舅父 在酒樓擺左兩圍 今日女友都有去 女友除左過時過節上去婆婆家之外 其他時間都好少上婆婆屋企 我有時覺得帶女友去我邊親戚食飯 會悶親佢 每次去呢D節目之前 我都會問.... 如果妳怕悶..可以唔去架..我唔會迫妳去見人 雖然每次都咁問 但女友次次都會出席...只要當日唔使返工或上課 我婆婆為人慢熱... 遠觀仲有點惡.....好似好臭痺氣果種 不過見今日....正話果陣... 女友佢係有D計... 竟然可以逗到我婆婆傾計 仲有講有笑..... 漸漸地...冷落我添仲... 說笑吧.... 妳有妳同婆婆傾 我有我同表弟傾 回家時 我讚嘆女友.... 妳好高招.....竟可以咁快逗到我婆婆傾計 女友一句.... 大家都係女人啫..... 女人要氹嘛.... 氹下氹下就會熟啦...要打開話題有幾困難..? 女友此時此刻強調...."女人係要氹架...!!!" 我望望身邊....街上既人..好少....我問...."妳同我講呀..?" 其實...男仔都想自己個女友氹自己架... 妳有知唔知丫..?? >>July 27, 2010 at 12:14:35 AM GMT+8 2010 年 7 月 25 日 星期日 【酷熱】 想法.. 今日女友氹我出街 或者知我精神不太好吧 早上返工 如果全神貫注駕車 真係會暫時忘記到 但當休息停下來又會心情一沈 在放工前四轉車 女友都跟車陪住我 直到我收工 收工我換好衫女友就叫我一齊出街行下 先帶我去食野之後再去書展 去到書展見到台灣Blog天后"彎彎"來左香港 女友知道我鐘意彎彎既漫畫 見作者出來突登帶我出去 雖然攞唔到佢簽名 但可以一見作者我都覺得好幸運同開心 女友既安排真係好呀 今日女友有點唔同 唔似平日會扭計點點點 反而今日女友會好氹我 沿途大多時間女友都挨向我身用手撓得我好緊 真係感覺得好暖...感覺係好照顧住我 我知女友怕我擔心...知我呢幾天唔係太開心 女友問我會唔會嬲佢..迫我去睇醫生排期檢查 其實檢查我一D都唔怕 怕既係知結果是不好既話 女友妳既感受 假若我有任何事 我知妳既難受唔會比我少 要妳擔心我同時..要叫我唔好擔心 遲點我應該要住院做檢查 我不知會住幾耐 冇事既可能兩日出院 唔好彩有事既話..我都唔知要住幾耐 或者好多事而家都要安排定 其實我最在意係妳點諗 呢個時候我知道我地彼此好多話都唔敢同大家講 是嘛..? >>July 26, 2010 at 11:42:40 PM GMT+8 2010 年 7 月 24 日 星期六 【酷熱】 等待 呢幾天冇咩心情 除左返工會出去之外 其他時間我都唔想出街 不能不承認我真係擔心自己會有D咩事 之後睇私人醫生 醫生雖然話呢個情況可能不是太壞 因為好多人都係有咁既情況 經常頭暈未必一定有事 自己有壓力、心理因素..成日凝住自己會暈等等原因 都可以成為頭暈既理由 不過如果唔理佢好可能會好嚴重 畢竟頭部都係一個好複雜既地方 就算冇事...但長期心理抑制住...好易會出精神病 好似而家咁 我已經覺得自己好似好想嘔...個心好似好實咁..好難呼吸 是有事..定心理因素...我真係分不清 某程度上我真係好辛苦 我又唔想女友見到我會擔心 講到底女友既工作會時不時離開香港 我真係有事 女友冇可能第一時間會知 知道都唔可能立即返黎 就算我冇事 女友返工都會唔安樂 攪攪下....我怕最後連女友都會有精神困擾 咁就真係不得了 而家我覺得唔舒服 但又好似冇事咁 我只想咩都唔諗鑽入被窩蓋頭什麼都不理 其實我連電腦都不想開 就算開我都冇心機玩 但鑽入被窩裡我知我會更差 睡不到又會亂諗事情 現在我只好等下次入院見醫生個做檢查 不過在見醫生前呢段日子 我真係好迷茫 病不是最難受 最難受係唔知將會驗到什麼 是好是壞.... 咁等待的日子真係好難受 >>July 26, 2010 at 11:41:57 PM GMT+8 2010 年 7 月 23 日 星期五 【酷熱】 憂心.... 呢排唔知點解會頭成日都見有D暈 雖然未至於要暈到跌落地下 但係正話我食食下飯時就見暈 跟住想作嘔 我諗如果我係女人見咁樣的話 個個都應該應為我有左BB吧.... 但我冇可能生到仔 咁...點解我會咁...? 唔知.... 事實上...見突然間暈已經唔係第一次 係已經數唔清咁多次 佢暈只係暈一陣好快就冇野 呢個情況真係好影響我 女友叫我去Check下 都唔可以話"叫"....應該係要我一定要Check 我唔係怕入院 只係怕會驗到唔知咩出黎 已經去睇左醫生攞左轉介信去醫院 或者今後日子 我會成為女友既負累.... 真的唔想要女友擔心 可惜事情我控制唔到 我又可以點做呢...? >>July 26, 2010 at 11:43:10 PM GMT+8 2010 年 7 月 22 日 星期四 【颱風】 點揀... 好早之前已經有講過我會上West Rail(重鐵) 但都係得個講字同等字 除左過時過節..特別日子 我會做Spare之外 我基本都好少好掂EMU SP1900 不過今次有機會轉上去 人工會好少少少... 但會悶D、責任再大D 而且西鐵唔同輕鐵 駕駛室西鐵係封門既冇得見到內面 唔似輕鐵咁可以睇到我開車 以後...女友落黎跟我車都冇意思 其實工作類型有好有唔好 好既係全自動唔使我郁...安全好多 唔好既係會悶到會死 而家個心十五十六.... 大家應該覺得我要點選擇好... >>July 22, 2010 at 10:04:40 PM GMT+8
|
|
無事嗎?irene佢而家情況如何