| 日記 | 日記主簡介 |
||||
2010 年 6 月 30 日 星期三 【清涼】 了結心事 真係發現自己越來越冇記性 或許應該咁講 我係唔多記呢D事 就係有關錢銀既事 我向來唔上心唔多記 所以有咩人借我錢.... 一個月後..我會唔記得咁滯 亦因為呢個原因 一身街數..好多人好多人都冇找數比我 也許我都唔會記得借幾多...還幾多 我成日抱住心態係 借得比人就預左人冇得還 雖然呢個理論比人插到飛起 但我都係會咁做 或者我試過要錢趕住用冇錢時既徬徨感覺 一D都唔好受 而且借錢都需要勇氣.... 當然啦....你信得果個人...你先會借 如果係三唔識七完全冇溝通過既..免問啦 仲有一類人我會好樂意借既人 就係 讀緊書而又等錢用既時間 咁呢D CASE係借我錢做需要既野啦 唔係借完去買個名牌手袋 比我知道..呢D我要佢即刻比返我...兼叫佢去死、以後免問啦 頭先我話我試過要錢時冇人借比我時既徬徨..... 就發生我求學時期 問親個個都話冇 最後竟然係一個師姐借比我 而呢個師姐我只係從ICQ時識佢... 我地大家見過不到10次 當日我響ICQ只想吐苦話比佢知...所謂朋友就係咁...大難臨頭各自飛 當佢聽到咁... 就二話不說從ICQ Chat room問我幾多呀要?? 轉頭就出來借左比我 仲千叮萬囑話有錢先還啦....唔使急..唔好急 其實 果陣既我跟本冇可能還到比佢 一拖就拖左年幾 最後條數拖到....連搵本人都搵唔到..ICQ又唔Online 間接間接打聽之下 原來先知佢去左外國讀書 仲去埋果邊住... 最後仲結埋婚生埋仔添 直到果一日直到今朝.... 我仲欠佢錢 大拿拿一千蚊,...當時呢個我天文數字...對我黎講 我想還..都冇能力還 幸運地..好彩地...行運地 今日...我響元朗見到佢 佢推住架BB車 唔知點解我一眼就認得出係佢 天呀..... 終於比我見到佢喇 開頭佢都唔知我係邊個 直到我講返我地既事 佢先記得 哦......你係果個......乜乜乜...邊個邊個.....人 佢第一句話.... 嘩...咁你瘦左咁多既...??(今日我先知..我以前真係好肥) 可惜時間有限 我要趕時間開車走 但我都冒住誤點既後果 都問佢攞左左個電話號碼 我話我放工就搵妳出來飲杯野...傾下計咁 始時我攞左1000蚊出來還比佢 一出到來見到面... 我立即還錢比佢 當然啦 佢唔知點解我要比錢佢...佢一頭霧水 最後我講返比佢知..當年我借過妳錢呀..記得嗎?? 佢話...係..??有咁既事??? 開頭佢唔收....話..算啦算啦咁耐..我都唔記得喇 係都唔肯收..死都唔肯要 最尾都係冇收到我錢 但係..唔還的話 我真係勁唔好意思 唯有話當係我比1000蚊BB買野啦我 左推右推先肯收...(唉..真係推到差D打交呀...) 問到她會長住香港嗎 佢話唔會喇 過幾天就會走 因為已經留左香港一個月有多 之後會在返番去倫敦同老公長住 因為佢老公D生意帶唔到返香港做 只好嫁雞隨雞嫁狗隨狗... 食完之後 大家交換E-mail同地址電話.....各自各走 路途中..我心諗著 太好喇今日 我終於了左一件我既心事 多謝當年妳借錢比我買衫見暑工同搭車既車馬費 我會一世記住... 得人幫既忙..我會千年記 或者是師姐妳感染我既性格 而家我都好似妳咁 看得個"錢"...一D都唔會重 估不到只係一個從ICQ認識既同校畢左業既師姐 見面不過10次..竟然會借錢幫我 靠妳1000蚊我做到果份工....攞左工作經驗 而靠呢D工作經驗 今日我先可以安安穩穩咁做到而家我呢份工 我有今日.... 都係因為妳給我的 多謝妳... 另外..今日要祝我個妹.."生日快樂"... >>July 1, 2010 at 2:05:24 AM GMT+8 2010 年 6 月 29 日 星期二 【晴】 訓練 今日真係熱到彈起 仲要咁好彩攞左架冷氣唔凍既車開工 一路開車...一路曬乾我 因為太陽直射車頭 司機首當其沖.....曬到燶 今日我駕"一期車" 一期車有好有唔好 好既係...好架車性能反應好D..易駕駛 衰既係....佢D冷氣唔多夠勁 熱係一生中最大敵人 今日天氣咁熱 我不停咁飲水 個個站頭我都入水裝滿我個水樽飲 而食完飯之後 我洗乾淨個飯盒兜 放左D涼果食(又做遺規事) 每停一個車站就放入口.... 開車就係咁咬..係咁咬..係咁咬黎食 不消一會我就食哂... 唉......我真係貪食到.....!!! 食完果個吉盒 我放左個杯水飲入去(即係將個吉盒當碟子用) 我係一直打開個蓋方便自己隨時就攞起水可以就咁飲 但又伯行車時會倒翻杯水 整壞架車D電子零件(我賠唔起呀...) 所以我用個兜(即係個吉盒)放穩固定 就算倒翻 都會有個兜....兜實倒翻既水 沿途...我突然諗 呢個動作好熟.... 我記得喇 就係頭文字D...文太要拓海在不翻水狀態下進行飄移動作 我列車冇得飄移丫 但我都突然想試下睇下得唔得 只要架列車控制得唔Chop.... 水一定唔會倒翻 結果.... 我倒到成兜都係水..... 原來我手車...都係屬於chop.... 只係比較其他司機冇咁Chop 之後.... 我都繼續用呢個方法試自己 都係倒翻 及後我試過將水飲走多一點 等佢少水D 冇咁難度高 果然好左好多....但始終都係倒翻點點水出來 直到今日最後果轉我都係有倒翻少許 但試自己都要有代價 就係架車要開慢一點點 變相我有少少遲到(但我相信習慣左就唔好誤差時間..) 有朋友問我咁要顧多樣野...係唔係要分心..?? 其實..係唔會.... 因為我行車時我係完全見唔到杯水 跟本冇得留意 只係可以停車時候望下有冇倒翻水 行車同我平時一樣安全... 我覺得冇影響 因為咁...反而我會更慢更定...反應仲更安全 也許呢D訓練都唔係可以一朝一夕成功既事 因為要關乎到開車一刻同刹車一刻既時間同事情 如果架車一起步大D....沖出去... 果一下Chop又會翻水 如果要做得好...我係需要慢慢加速 剎車都係一樣... 整體刹車係較難控制 因為月台有限你長度.... 到就一定要刹停 好難做到好順暢咁溜到月台..加少少Break停..咁完美 其實駕車真係好悶 而家諗到呢D野.. 可以考下自己技術 我反而唔會悶到飛站 我相信我總有一天可以做到完美既 其實我都有期望自己可以一路做 做到一段長時間成為老手 可以教車 而家我望既路途真係仲好遙遠 但都叫有目標丫 而女友都係一樣.... 一直做..可以升到做 ISM 或以上 Irene....我地要努力呀 各是向住呢個目標前進.... 希望我地可以成功啦 >>July 1, 2010 at 2:03:31 AM GMT+8 2010 年 6 月 28 日 星期一 【暴雨】 向左走?向右走? 一個人在床上輾轉反側 整晚都睡不好 半個鐘醒一次 點解妳可以咁輕鬆 若無其事咁笑著返工 我既心情好唔知點算好 我都唔知係擔心定係緊張 我有好多問題 內心好鬥爭呀 幻想到若果係...的那個樣子 我真係暈眩落地 但我知....結果怎都好 我都會在妳身邊觸緊妳....在乎妳 畢竟也好... 我知呢個係妳既願望同希望 只要妳想... 我點都得 我接受... >>June 29, 2010 at 7:43:44 AM GMT+8 2010 年 6 月 27 日 星期日 【乍寒還暖】 揭開飯盒時
在微波爐前打開個飯盒時 比班八婆.....大叫.... 嘩....好得意呀!!! 男既見到... @#$#.....你好低能呀...仲細咩? 其實大家同事都唔係第一次見我咁架啦 飯盒唔係我整我點佢點整喎...? 但你班八公...."小完"我之後咪走去夾我餸 嫌低能咪望咪搶丫... 但又唔怪得人地話我架.... 雖然....的確幾有心思同心機 但堂堂一個男人叮飯時... 比人見到個飯咁喎 哈...... 之但係如果叫女友停止唔好咁做 我又唔想喎 見到佢擺得咁可愛 同時可以食到佢心思 我覺得不知幾咁好 所以..我決定不會投訴話低能 繼續啦.... 講真丫....我作為食家點可以咁多要求丫 保持原狀..咁就最好 其實呢...每一次打開個飯盒都好似拆禮物咁 好鬼開心架....
今日既飯盒....共兩盒 
如果有個男仔打開個飯盒係咁...在身邊的你會有咩感覺..? 
>>June 28, 2010 at 12:56:18 AM GMT+8 2010 年 6 月 26 日 星期六 【乍寒還暖】 替你著想 曾經近排睇過一個報告話 益力多係好高糖份既飲品 自從知道後 我就少飲左好多 其實 唔係我飲少左 係女友買少左 咁我自然就少飲左啦 唔知係唔係呢個報告出左 即係話益力多唔健康呢個報告 益力多就成日都做特價 有時見佢7蚊有5支...都夠膽死 但係都係少買.... 前幾日...女友識人用入貨價買左30排返來 仲送到上門添 點知唔使兩日已經比我飲左4排 女友今日打開一睇.... 嘩......你當水飲呀?? 我當然死口話....妳都有份飲呀!! 女友話..我飲左4支乍噃 仲有半條係比左你飲添 即係飲得3支半 妳唔好當我傻..咩都唔記得喎 你真係有得飲就搏命飲 我當然冇說話好講啦 女友跟手話下次你都唔使旨意我再買返黎呀...!!!! 唉.......我話飲酒就話要理啫..... 飲益力多都要.... 第日妳做阿媽..阿仔一定好慘喇..咁管法..!!! 講左一大論 女友話下次買隻低糖比你飲啦 而家香港有得買 我問出左好耐架咩.... 女友講..外國出左9世啦 不過一樣味...我都係覺得佢唔係低糖... 下次都係訂多幾支水返來你飲好過喇 唉....陰公呀 飲水呀淨係 一係煲茶你返工平時飲喇 你平時買D支裝烏龍茶都成10蚊支 我沖好放入雪櫃比你帶返工啦 你仲可以慳錢喎 幾為你呀...!!!! 各位.... 你地覺得邊個為邊個多呀...?
>>June 26, 2010 at 11:33:05 PM GMT+8 2010 年 6 月 25 日 星期五 【晴】 偷懶... 今日個html又唔知點解又死左 攪到我寫唔到日誌.. 算啦... 唔打緊 反正今日冇咩特別事發生 食得...瞓得...做得.....係仲未死得 所以.... 當打少一日啦 今日乾脆地話比大家知 我個Software死左 懶一天 所以休blog一日 >>June 26, 2010 at 11:32:31 PM GMT+8 2010 年 6 月 24 日 星期四 【晴】 歲月流逝 曾幾何時 有個女仔話我坐到"一字馬"架 的確..... 我真係見過呢個女仔真係坐到一字馬 但今日... 我興起問到.. 而家仲得唔得呀 女仔立即當場示範 果然.. 見個女仔真係慢慢咁壓腿... 直到壓到個一字馬出來 男仔話..... 係喎..真係仲得喎 拍手話好野好野 之但係.... 過左一陣間 女仔話..... 好痛呀....個大腿位 行路仲拐下拐下咁 男仔同個女仔講話.... 妳老喇...骨頭硬喇 女仔眼神厲一厲個男仔 跟住話.....真係喇... 真係老喇... 奇怪係今日妳竟然認自己老.... 傻啦 妳個樣妳D行為仲好後生呀 妳點睇都係25、6乍 放心啦 再化一化妝似....18、22添呀 其實時間唔會騙人....又捉唔到 年紀大都係正常事啦 我都有次比人叫"叔叔"啦 起初真係想打個死仔.... 但係我地都20到尾喇 要轉轉..唔係哥哥...係"叔叔"喇 歲月不饒人... 但放心啦 無論妳變成點...我都係咁鐘意妳.... >>June 25, 2010 at 12:54:06 AM GMT+8 2010 年 6 月 23 日 星期三 【乍寒還暖】 咩原因...?? 正話朝早 我同女友一齊去食早餐 最後去左老麥食 而家老麥有度好就係有即磨咖啡飲 而且質數都Ok 最少都同價錢成正比.... 我叫左個精選早餐加個豬柳蛋漢堡再要多塊薯餅....(怕佢膽固醇唔夠呀我..哈哈...) 女友要左個熱香餅加一塊豬柳 最後塊豬柳我都幫佢KO埋 哈哈.....今餐可叫最唔健康既一次 不過..妳話間中一次無所謂啦 最多一陣返工個飯盒我會整得淡D喇 希望我一陣返工打開飯盒唔會比白粥加白粥我食啦..... 我知妳唔會咁殘忍對我既 係咪...? 不過去到老麥時 我問妳攞錢買果陣 可能我又大聲左 比班學生見到(仲要係女中學生....) 我諗佢地以為我男人老狗大大聲咁女人攞錢吧 攪到我勁唔好意思 事實上我唔係咁架 好冤枉呀 而家老麥最麻煩既地方係 排隊都唔知排邊條 一條就攞野食 一條就比錢 我都唔知排邊條 都唔知咩人設計... 正白痴..!!! 以前咁咪好囉 什麼即叫即整 我唔覺佢特別新鮮囉 真係多餘... 好不容易買左返來 之後我又要去另外買兩杯咖啡 不過今次佢地會攞過黎 方便好多 食野無聊我地走去買左份報紙 諗住一邊食一邊睇 當睇到段新聞 話港龍請空中服務員 24個人爭一個位....變態 妳第一個反應.... 真係咁吸引咩...? 因為見到有D女仔話 連有大學都唔讀走去做空姐 妳搖哂頭話真係有病...痴線...!!! 我話.... 妳都係做呢行架 咁話人即係話自己啦 妳就理直氣壯咁話... "我係讀完大學先做架...我讀左個SWA...我有証書呀..." 冇得做都可以轉行呀 而家D人話係有書唔讀走去做呀 響呢個時候 女友數左十萬八千個空姐一職既壞處 其中一個話... 咩真係以為飛去邊玩到邊呀.... 佢就想喇 好似飛大板咁.... 即日Turnaround....玩咩呀..? 好...即使飛遠D...去到加拿大咁 去到都係Stay響酒店瞓覺 仲邊有咁多精力去玩丫 唔係冇機會既.... 少囉但係 有時飛落後地區 危險到震.... 酒店..可以開到另一對門(我聽到都O左嘴...咁都得...百合鎖匙呀..?) 又可以停電冇自來水 食既又唔習慣... 分分鐘病響異鄉...自己理自己生死(所以我真係好擔心妳一個人出去咁遠..) 返工次次都唔同人... 留過夜Over Night既10次有7次都係做獨行俠 安全冇保障....(女友話..據聞係有空姐響異地比人強姦...但係公司唔認有咁事喎..) 飛得多...長期響乾燥同氣壓不同既環境做野 皮膚變差、眼都會退化得人快、耳膜穿機會又會比其他人大.. 上到機做阿四做"飛傭" 派餐、通渠、洗廁所、急救、保安、唔好彩有人死左響飛機仲要幫佢打包、 仲成日比人咸豬手抽水.......好多好多...講不完 仲要係多勞多得(報紙話13000至15000...月薪...發夢啦....報大數....) 返工有時早到冇巴士搭...放工又係咁 車錢都要自己蝕埋(的士一程要300蚊呀差不多...) 再唔係等1個鐘1班既N線機埸巴士(慳錢既只好呆等呢一架巴士.....仲要係咁兜路行) 每次出發前都要受壓力怕老總問問題(女友話...一早起身個腦都仲瞓緊覺..點答問題呢....) 每年又要覆習考試.... 唔合格就冇得飛 退休又早.....到唔做出到黎又難轉工 總之不停咁話..... 唔好唔好..... 係咁一輪嘴講 講到我食左個餐一半先停..... 女友自己先開始開餐...... 咁我食完後... 開口問女友 咁妳都係做呢行啫.... 使唔使講到咁差呀 咁妳又做...? 以下...係我今日先知女友..原來係咁諗 女友話 入行前都係貪玩... 心態同而家班女仔一樣 著住套靚靚制服..又可以週圍去...一切都係美好既憧憬 而且畢左業又想見識下 貪慕虛榮下 咁做空姐真係一個好好既選擇 女友諗住玩三、四年就會唔做 辭職左到時先出來再搵工做 呢個係女友開初既打算 但當時我未出現，仲冇諗過會同我一齊 當一齊左之後 女友就一心想結婚後就唔做(真係想得完美呀...) 全職做個家庭主婦..湊下仔女 做一個好媽媽既女友既心願 但時勢唔同左 而家好難再搵野做 尤其係做呢一行既人 所以個打算改變左 諗住唔轉行一直做落去 因為呢一行始終都會跟年資去升職 而且福利都Ok(對比其他公司..) 同埋刻薄極都係大公司.... 但次後先發覺原來將來老公做野都未必夠錢養得好個家同仔女 老婆要返工要賺多一份錢係唔可以缺少 而事實上真係我們兩個人搵錢生活會好好多(好似而家咁....) 所以女友同我講 我會一直做下去... 即使將來遇到幾咁惡頂既乘客都會忍受 女友想未來生活大家可以好一D 我地諗住會生小朋友既 我一份糧真係唔夠用 女友話我上次點解唔想我去做地勤 其中一個原因係 若果將來大家冇左乘車優惠 開支會大好多好多 兩個都做航空公司.... 兩個都Clam到機票有鬼用咩....? 難道旅行會日日去嘛...? 車就會日日搭嘛(呢D叫市懀定精打細算呀...?) 唉...... 個傻瓜真係"機關算盡" 講講下女友話 "我呀為左你改變哂我未來既全部呀...." 你呀...試下背住我搵其他女仔呢.... 我一定唔會放過你呀(這時女友係攞住把刀用力切開塊熱香餅...) 又話自己就30歲 已經冇青春再搵另一段愛情 又話全部野放哂投資哂你身上呀 仲好強調多次話我 如果做D對唔住我既事呢.....我真係唔會放過你呀... 雖然妳笑笑口咁話...."會攬住我一齊死" 但我知同覺得妳真係會認真同做得出囉.... 妳呀.... 攪到我越來越怕妳呀 真係怕左妳呀 我真係投降呀 妳呀.... 最可怕係都唔知妳邊句講真定講笑呀 妳可以笑得好甜好可人好迷人好........乜乜乜...乜都好 之但係當妳唔笑認真嬲起上黎真係唔係人咁品 妳好人時真係可以做到好親切好令人感動 但係見妳嬲一次...我就怕一次 仲怕埋下一次 有時我都真係服左妳 到底係我太好人丫 定係妳真係對男人有辦法 如果...妳話要掌握到妳個男人既話 恭喜妳呀 妳做到喇.... 滿分添呀 唔係呀....我冇投訴呀(睇下我幾怕妳丫...咁講又怕妳誤會喇...) 唔係話妳點點點呀 而係我真係佩服妳點解會做得到..... 妳呢...又唔係威迫我要遷就妳 但我又甘心比妳管住(唔知點解我會咁...) 但事實上男人真係唔鐘意女人管 不過我又唔明點解我會受 連我自己都唔知點解 可能妳已經係好多女人既偶像喇 開班授徒可能妳都搵到食呀 我地往後日子唔怕餓親喇 哈哈哈..... >>June 23, 2010 at 10:42:14 AM GMT+8 2010 年 6 月 22 日 星期二 【暴雨】 賤精車長之"工"報私仇 今日返工第一次比我見到 有個乘客食兩餸一飯 係咁既 兩個飯盒... 一盒係飯、另一盒係兩味餸 點解我會知呢.... 因為真係太過香.... 傳到駕駛室都聞到呀.....扖街 我未食飯架仲 真係離譜.... 食無汁食物、一啖過、乾乾淨淨果D 我唔理你丫 咁過份食得我第一次見 仲要夠膽坐去第二行食 一眼比我見到 當我死既 我已經出廣播話車廂嚴禁飲食... 出左幾次都當冇道...當聽唔到 但係我又唔敢出去Stop佢..叫佢唔好食 因為佢個款又似D好惡死既人 即係"大傻"果D爛仔Look 我唯有報上台 叫人捉.... 唔得呀....太過份呀 開餐咩.... 我覺得食老麥都係過份....... 因為太過香..... 但佢勝在乾淨...我會算數由得佢 但今次我一定要報串呀 卒之三個車站後有便衣職員捉左佢 人贓並獲...証據確鑿... 公司效率好高呀真係 雖然......我唔贊成公司立例咁嚴... 食粒糖都罰 但係今次真係勁過份 最過份係我未食飯... 你響度食先... 我見你咁食我會肚餓架嘛... 有得睇冇得食 你咁先撩起我把火嘛 而家咁擺明話我知..."我有得食..你冇得食啦" 我唔報串我仲係人黎既.... 或者.... 我食飽左你食既話.... 結局可能會唔同既 今次算唔算"工"報私仇呢.... 哈哈 我都覺得自己好賤 女友聽到我咁講都冇話可說 話我唔知做得好丫 定係.....做得衰格好 我的確又冇做錯 但我的確又可以當咩事都冇發生由得佢食 大家搭輕鐵時小心D我呀 我都係睇心情做人呀 哈哈哈 >>June 23, 2010 at 10:49:09 AM GMT+8 2010 年 6 月 21 日 星期一 【暴雨】 粗心大意.... 唔知我係唔係真係咁論盡... 今日幫手攞餸攞湯出飯廳既時候 首先攞左兩個餸出去先 左右手各一碟 最後我攞一大碗湯出去 就係呢個時候我比張茶几跘到 我立即失平衡比碗湯燙到手 由於係玻璃碗關係 我唔敢放手....因為怕打爛有排執 我個腦係咁叫我忍住痛.... 其實人既反應正常燙親係會放手... 但我冇放...繼續忍痛拿住碗湯 只因燙到手真係太熱... 我意識不停左右手交換拿住碗湯...大約三次左右 同一時間大叫... 呀~~~~~~好熱呀....呀~~~~~~ 女友立即望發生咩事 知我燙到立即幫我攞走碗湯 呢個時候係我咁Fung手降溫 女友放好碗湯立即轉頭望下我 死得未...(呢句我講啫...女友冇咁黑心既) 其實女友係望下我隻手點 好彩碗湯已經放左出來一段短時間....已經叫放涼左少少 只係80度左右水溫...(我估計...) 因為我最後對手都冇事 冇燙到甩皮 女友見我冇咩事就話我 好鬼蠢呀你(好直接呀....) 話我應該一係縮手...將個碗掉遠自己範圍 一係就踎底放底碗湯響地下 而我就一隻手燙唔夠 仲要左右手輪住交換燙.... 仲挖苦我講真係唔知我物理知識咁好 識得玩"對流" 這時女友攞左碗有冰既水捉實我對手浸凍水... 浸手時冇咩好做..就問女友咩叫對流呀...? "下流"我就知...!!! 女友解釋.....簡單話即係一杯熱水...倒去另一個杯 不停咁將呢一杯水倒出來輪流轉杯 水既交流過程形成"對流"...同一時間倒流一次會將水降溫一點 仲問我...細個媽咪有咪叫你飲熱飲.... 見到太熱你飲唔到 就會叫侍應攞隻空杯...兩個杯互倒你飲果杯熱飲呀 諗諗下又好似係有喎 我話.....車.!!我都冇修物理.....果D科...鬼知咁多咩 女友就話我 中三時有學架 同你一齊上堂..係你冇聽書乍....邊度係冇學呀..!!!! 係你上堂冇聽書乍 就係咁.....,,短短既凍水浸手過程就比女友翻讀書舊帳... 比女友話到我都唔記得比湯燙到呢回事 咁望望雙手... 我又係真係一D都唔嚴重 冇甩皮...浸完水都唔痛喇.... 突然諗起我上次用滾水燙到女友一事 上次我真係由個煲熱騰騰咁攞出來 冇100度都有95度 今次我咁都大叫 上次女友一定好痛好痛 有時我真係唔明 係妳醒目顯得我論盡 定係我跟本係論盡... 點解我來到呢個家成日都帶比人麻煩.... 好似只有破壞冇建設咁 我係唔係真係本身有問題... 我都唔真係唔識得分辨喇 >>June 22, 2010 at 1:27:40 AM GMT+8
|
|
無事嗎?irene佢而家情況如何