| 日記 | 日記主簡介 |
||||
2010 年 7 月 21 日 星期三 【寒冷】 我冇呀..冤枉呀... 呢幾日都係補寫..補寫咁... 其實我冇放棄過打日誌 只係整html要時間 我要打好一篇文章後 再轉html真係有點麻煩 所以我只係打左個Body 今日一次過先轉 Ok回正題喇 其實我返工真係見盡好多事 有無端端拍我車頭個側窗罵我既 有後面指指點點既 有大大聲聲講野既 有飲醉酒既 有恃老買老大條道理擋門既 好多好多 當然好既都有啦 但少D囉..... 不過有時見到D奇景都唔知笑佢好、幫佢好、定由得佢好... 最後我都係幫佢 今日響洪水橋站 我架車埋站.... 見到個廿歲出頭既女仔追我車 我見到佢果時離我架車都有15米左右 唔算好遠 照道理佢可以好快咁追到我車 之但係我遠處見到佢拐下拐下咁 望真D.... 嘩...佢對鞋....好厚底起碼有四吋高...個踭仲要好幼 咁見到個天又毛毛雨咁.. 佢又撐住把遮..又心急咁追 我見佢開始左右腳震.....真係震架 好似企唔穩咁...其實直頭係企唔穩 再加上佢上既月台係上鈄路...(因為呢一邊既月台係比輪椅用既....另一邊先係梯級) 佢左右震開始更嚴重.... 最後佢要想跌...但佢又救到...佢唔跌但就踎底響地下 見到佢咁... 我就出去扶佢..唉..!! 正當我出到去時佢竟然想除鞋諗住赤腳咁上車 我立即Stop佢.....心諗污槽架地下 我扶佢時我都覺得佢好辛苦 我感到佢全身已經係搵我借力搭住我 雖然佢好尷尬..但佢知都冇辨法..唯有比人扶 好彩當時車唔多人又有位比佢坐 睇見佢真係辛苦 事件阻左我成幾分鐘 但車既人冇嘈.... 全部都係響度睇住佢"表演" 香港人...真係最鐘意睇人點仆街 因為真係冇一個人肯扶佢上車 其實佢都算係靚女一名丫 我唔明點解冇男仕出手 上車安頓好時...佢立即除鞋 我望一望佢對腳真係紅腫哂...睇見都痛 唉.... 為乜丫.....著得咁辛苦點解要著?? 靚真係咁緊要咩....? 到總站佢落車時見佢有個男仔攞住對拖鞋響月台等佢 佢有救..事情都完結 我到站落車時..佢有唔該我 我見佢有響我身望下望下咁 我估佢想知我咩名.... 但個名牌我放左上車件風衣度...無show出黎 回到家..我問女友 著高踭鞋真係咁難行路嘛...?? 女友話係.... 但我覺得我今世都唔會知有幾難行.... 我同女友講..... 妳著鞋唔好著咁高 女友話3吋半都係極限 4吋一定要帶鞋替換 女友跟住講..."你好啦...抽盡人地水啦...!!!" 我冇呀....真係只係扶佢乍....冤枉呀..!!!! >>July 22, 2010 at 10:04:03 PM GMT+8 2010 年 7 月 20 日 星期二 【暴雨】 染髮 今日女友去染髮... 諗住染金啡色 去到同髮型屋同髮型師講咩色咩色咁 髮型師話女友頭髮本身已經有金色 再染都唔會好覺 就同女友話... 同妳染深色少少啦.. 但又冇指名咩顏色喎 點知..染完出來結果只係啡色....仲接近黑色 染完仲衰D 因為事關之前女友冇講指名咩色 所以對方不負責任 女友佢都費事同佢嘈... 比左幾百蚊就走.....(以後不再見...) 回到家.....女友不停照鏡 照完就不斷呻......仲衰過之前..點好..點算好....點見人...!!!!! 或者女仔真係會好重視自己把頭髮 女友佢越照塊鏡就越唔開心 最後照鏡照到有眼淚水出黎... 雖然唔係瓜瓜叫咁喊 但見到佢真係好似好可憐咁 不斷講..."唔靚喇"、"點解染完仲差過之前架??..."、"點返工見人呀"等等說話 我......... 真係怕左佢..... 染得唔好就不斷唸唸有詞咁....點算呀?再比錢整過?"過幾日返工呀染到一忽一忽咁都唔靚 我聽左"唔靚喇"呢D字眼.....過百次.... 我真係頂唔順又好、心軟又好、染多次等佢心息又好 我話.... 我買返來幫妳染喇....好嘛...? 此時女友佢....立即270度變面 笑住講"真架...你肯幫我整呀...?"(雙眼係仲有眼淚水架...) 係呀係呀....唉...!!換衫出去買野染啦咁 去到萬寧去選擇..揀下邊盒咩色好 選中左.... 買一盒怕唔夠染...仲要買多一盒後補 兩盒120幾蚊.... 買完開開心心咁去買野食..食埋野先回家 話食完就返去立即染啦...... 整件事好似..小朋友扭買玩具..媽咪唔買..就扭計...始終最後都買玩具比佢.....跟住好開心...笑笑笑咁返屋企 不過..... 見到佢咁開心.... Ok啦...心諗..唔好又流眼淚就得喇..真係怕左妳呀... 回家.."開壇染髮" 嘩....果次染料難聞到丫 完全係Ammonium Hydroxide味道 仲要染料係攻到我"擛"眼 全程幫佢整左20分鐘有多 加上佢把頭髮又勁多同長 我帶住口罩都差D暈 女友話...都真係好勁呀陣味 但佢竟可以唔帶口罩咁比我染 正一係要靚唔要命.... 最後.... 我染得好明顯啡金色出來 滿意度...見佢笑就知..合格啦... 有時真係冇妳符.... 咁鬼貪靚...唔靚真係會流眼淚出黎先嚇人嘛 女友楚楚可憐流眼淚表達染得唔好呢個樣..... 今次贏哂.... 贏到我地一齊特登去買染髮劑 贏到我真係好盡力幫佢染 Irene......妳真係有D計.... 我呢個男友真係服得妳好交關.... 都唔知笑妳今次染得成功好丫 定係笑妳....咁大個女都仲為呢D事流眼淚..咁喊包好.... 妳真係可愛得好均衡 我諗如果係我 我出到呢招對妳會有效嗎... 但我真係好難做到.... 明明流緊眼淚...唔洗兩秒 笑住向我講..."真架..?妳肯幫我染呀...?" 係呀係呀....傻妹... 貪靚得要攞命.... 我都無話可說 哈哈...唉!!!(擰哂頭呀我...) >>July 21, 2010 at 10:25:12 AM GMT+8 2010 年 7 月 19 日 星期一 【酷熱】 阿娘與女友 今日女友放假我返工 留底女友一個在家 女友在家中依舊咁執屋 家中長期都保持企企理理 而當每次女友在家的話 女友會響我返工前都會準備早餐同返工飯盒 不覺不覺呢D生活...我都過左一時日子 女友既勤家務既性格 由我開頭會"好唔好意思"到"我習慣了"的感覺 好似變得這是"理所當然"咁 有時候我明知自己能要處理既家頭細務 我都變懶唔去做(我真係好衰...) 覺得自己開始有點似我老竇咁(咁真係死得人喇...) 我其實好唔鐘意老竇既性格 因為老竇"男外女內"既性格(即係在家中要做皇帝乜都唔理.....我行我素，我搵錢返來就係大哂..) 而令到家嘈屋閉已經好多次(細個時嚇到我同細妹..唉!!可憐既細妹仲要嚇到喊..) 所以我同自己講 唔會做我老竇既翻版 老竇同阿娘出現既問題 我唔可以比我同Irene之間發生 其實點解我會咁相信女人掌握D錢呢 或多或少都係我阿娘影響我 因為每次"家變"完 阿娘都會同我講...老竇點衰衰衰....(早時期的我細個時都唔明白咩一回事...) 但每一次我都覺得阿娘係啱既 我總想.... 如果老竇肯聽老婆話 事情唔會變成咁 而當年我地一家就唔會咁辛苦 早排阿娘同我講以前既事 小時候既我可能未知咩既時候....或者今時今日既我可以理解 當我聽完阿娘講好多過去時既事情後 我就知...我應該要相信我既另一半 唔知點解Irene好有我阿娘既縮影 同樣地都係會做好個家兼且解決我們一家三餐 如果要比不同的話 只可以比較年齡大細同廚藝 咁廚藝我阿娘當然地輸足五十九條街啦(正衰仔咁話阿娘..睇住行雷呀...) 因為我同細妹都係一致認為..."阿娘煮飯唔好食" 咁阿娘係唔係咁差呢?? 唔係... 其實阿娘係得既 只係佢"求其"兼且要食得非常清淡(阿娘口講咁食先健康....) 以前阿娘都會炸下野.... 而家呢開個獲炒餸都難 永遠都係用電飯煲..."蒸" 我而家都好替細妹可憐 記得我仲響娘家住時 我地每次互相都問..."今日呢餐食唔食得" 我地一打開個電飯煲....拎哂頭...唉~~~ 我地當然有投訴啦 回應係..."煮埋比你食都阿支阿左.....下次你煮丫....!!!"(阿娘呢句羸哂...) 其實我地真係幾衰仔衰女 因為有時襯阿娘唔響度我同細妹就倒左佢...當食左!!(折墮....下世我一定響第三國家冇飯食地方出世...) 而家諗返起自己真係"正死仔、正死女" 今天... 我有Irene做女友 食飯跟本唔使擔心食唔食得.... 細妹讀間大學近我地家 間中我細妹都上我地家黎開飯 細妹都不知食得幾咁開心 食完每次都話...."你就好啦..日日都有啖好食....我就慘喇" 細妹成日暗地裡問我幾時結婚...(唉....有錢咪結囉...出糧要接濟妳阿哥呀...話哂我都有比錢妳讀書架...衰妹!!) 雖然我娘煮得唔好... 但係財政家用可以用得好好... 連我都覺得阿娘...妳係唔係識印銀紙架...? 我老竇當年幫姐夫打工 刻薄到死.... 當年九巴請巴士司機.... 阿娘佢叫轉工.....老竇唔肯(肯做我搭巴士唔使錢呀....!!!) 到細妹差不多出世 當時香港環境好好... 做咩工都會風山水起 姐夫間舖都係咁..好多生意 但佢姐夫加人工又少.... 阿娘叫老竇轉工唔肯 當年1987年.... 原來當年阿娘都有叫老竇見輕鐵司機一職(輕鐵係1988年通車) 我真係估唔到阿娘曾經係叫我老竇做呢份工..!! 當時都係九廣鐵路公司..唔使學歷唔使車牌都可以考 老竇唔肯...(肯既話我晨早有免費火車同輕鐵搭喇....當時東鐵叫做火車....) 死都要打佢姐夫份工 終於"金融風暴"後...佢姐夫間鋪都要摺埋 當時每個工人都有一舊唔少既錢補水 但老竇就係都唔肯比阿娘過手儲蓄日後用 嘈交就開始成日發生 幾翻波折老竇先肯比DD阿娘蓄起佢 Anyway...老竇今日呢舊錢去左邊... 細個既我果時都唔知 但早幾年 經我同細妹調查過(我做二五仔幫阿娘睇老竇存摺) 原來係關我大伯既事(我最想佢死既親戚) 因為我同我細妹查下舊錢去向時 睇過D信件....竟然係英文信函(我老竇都唔識英文...點解會有???!!!) 細看下係有關大伯間公司既律師信 乜原因我唔講 但我同個妹都明白同估到錢去向....係關大伯事 我同我細妹就更加恨不得佢凌遲處死 所以點解佢新年時候出言攻擊Irene我會想打佢就係咁原因 新仇舊恨..我真係恨不得監生用拳頭打死佢 或者.... 呢一個算係我同我妹一個秘密.... 舊錢去向我同細妹唔敢同阿娘講(亦都唔想阿娘會知...) 只係同阿娘講舊錢佢花光"吃喝玩樂"吧.... 可能出去請下人...豪哂出去...做下老世吧 但真相只有我同細妹知 我同細妹真係唔想阿娘受刺激 點都好啦...而家我地個個都出身工作 老竇仲有時開下工搵下錢 阿娘亦都有份工搵錢 細妹又開始出來做野 我又有份工 一家都叫餓唔死啦 而家間中兩個仲會上大陸旅行三兩日咁 老竇以前既事我同我細妹都有共識...算吧...都過去左 況且老竇都開始老啦 難道仲要計算前事舊債咩 講返阿娘 雖然煮飯求其 但係家用管理得好好 可能係咁...我真係好相信身邊既另一半 點解我會成份人工比哂女友.... 或多或少係咁原因 女友既性格好似我阿娘咁..... 不同係阿娘既明顯弱點...Irene係冇 但我娘有同Irene既不同之處... 就係變臉.... 你話我阿娘惡...?? Irene如果肯去惡的話....一定比我娘更厲害 我唔係怕女人 只係見到上一代既"錯誤" 我唔想比佢發生 Irene想做好一個好老婆 同樣地 我都想做一個好老公 睇黎我真係要郁下..... 呢個時代.... 返工唔係大哂架喇 況且女友都係有返工 咁掃地、摺衫收衫等等 手板眼見功夫.....我還可以既 幫下手啫.....唔打緊..唔打緊 >>July 20, 2010 at 1:54:47 PM GMT+8 2010 年 7 月 18 日 星期日 【酷熱】 唉.......慳返吧啦 今日買左部新既錄影Hard disk 我自問就對電子儀器..得半桶水 我一定要睇說明書先得 但今日呢個說明書得英文同日文 英文我識講多過識睇...死得 日文...佢識我我唔識佢...死梗 咁重要任務都係留比女友睇吧 良久..... 終於Set好哂 女友同我講 不如你都學下日文啦 女友話好易.... 日文有三分一都係漢字 只要睇多D理解下唔會太難 唉...... 妳講下佢好 我最憎讀呢D書 返工我又冇用 我又唔係成日去日本 學黎仲咩 留埋D心機心血教第是自己D仔仔女女仲好啦 叫我.....臨老入書叢... 女友....真係識同我"開玩笑(國語)" >>July 19, 2010 at 4:02:48 AM GMT+8 2010 年 7 月 17 日 星期六 【乍寒還暖】 記得還有呢一個 我冇估錯 女友係認識阿熹既 原來當年中四果陣 阿熹係做學校一個普通話活動司儀 咁我諗阿熹D國語應該都有返咁上下 我問點解咁肯定係中四果一年呀? 原來中四暑假班際問答比賽Irene係其中一個參加者 女友話 大概我識佢佢唔識我吧 果時佢地係A班出名最勁果其中幾個啦 其中另一個都係A班既"楊慧玲"...(響人全朵添....算吧...呢D名通街大叫就會有三個應你吧...) 女友咁講我就記得楊慧玲呢個人 而且我都係同阿熹同一時間識佢 因為佢地兩個都係參加同一個課外活動(Red Cross) 佢都係當年同阿熹孖公仔咁出現既 女友咁講我記得呢個女仔喇..... 但楊慧玲咩樣我就好模糊 但.... 你比相片我選擇我認人的話.... 我都會肯定認得呢個女仔 因為都係靚女黎既 嘩....當年又靚又叻.....唔怪得D高Form既師兄都過黎搭訕啦....(當年應該唔興"搭訕"呢兩個字吧....應該叫"溝"...溝女嘛過黎...) 我搵日返天水圍娘家找當年red cross果D相片出黎先.... 楊慧玲... 唔知有冇機會碰返呢D舊朋友呢....?? 返工開車入月台剎那我留意下月台上既人先 大家當年都係天水圍住 如果唔係搬走都應該唔難碰既 時間問題吧 最衰我地只係攪中學舊生會團聚食飯 Red Cross果邊真係冇左8成人既踪影 嗯.....隨緣吧啦 我知我今日有D事令到Irene唔開心 當女友知到阿熹有左BB時 就問我D問題 我答到模稜兩可咁 說真的.... 我好擔心第日個仔會出現我D遺傳病 雖然話驗好哂血做好檢查先會生 但係我都知自己係唔願提、唔想講咁... 其實我唔想咁架... 不過真係好煩呀呢D 自己感受過有幾咁辛苦 如果要連累自己仔女都要受呢D苦的話 我真係唔知點好 咁之前應承過既事...如果堅持我都會冒下呢個險 我唔係唔想答..係諗唔到點用最好方式向妳表達我意思 所以先有猶豫 我個腦猶豫..先會答妳答到模稜兩可咁 希望妳唔好介意啦 我冇心咁令妳失望架 唔好唔開心啦...好嘛... >>July 19, 2010 at 4:02:06 AM GMT+8 2010 年 7 月 16 日 星期五 【乍寒還暖】 校花(1997年度) 如果有人問我做我呢份工有咩好處 我諗我會答你有免費車坐之外 其次係....你間唔使都會見返好多舊朋友 姑勿論話會唔會認得大家啦 有時開住部車兩邊走 真係會碰返唔少人 同學會有、舊同事會有、親戚都有 更甚者仇人都見到 果刻恨不得一野就撞瓜佢....(講笑啫....我邊有咁少氣呢...) 我只會暗地裡用"拮拮降頭仔"吧...(大家小心....) Ok...講正經喇 今日其實我見到阿熹.... 見到佢唔奇 見到佢大左肚先奇 其實我同阿熹好少聯絡 只不過係大家唔會唔記得大家咁吧 見到佢上車... 但佢見唔到我(梗係...我又唔係靚仔過人...點會見到我....) 於是我每站都望一望佢睇佢幾時落車 終於響天秀站見佢大肚婆落車 由於我知打開我地D爛鬼車窗..係好難既事 一定用盡飲奶既力先至開到 所以我響天秀站前已經開始試打開個窗 卒之響天富站比我打開到 咁見阿熹落車立即響車窗叫佢啦 我第一句....係餡定還是肥左呀..(一聽知係玩野啦...) 阿熹話有五個半月喇 哦.......!!! 時間有限....趕住開車 又係果句啦... 得閒出來叫埋妳老公食飯啦 當然唔少得既係.... 恭喜佢啦 就快做個幸福媽咪喇 大家可知嘛 阿熹係當年中學既校花兼且高材生 當年我地班宅男讀書又屎....讀C班 人地讀A班 想識人都識唔到 諗住只可以遠觀啦 點知響課外活動中又同佢參加埋同一個項目 大家先至識乍 真係曲折呀 不過而家人地貴為人妻.... 雖然好似冇點見過佢老公 但我諗佢老公都有咁上下把炮同猛料既.... 如無意外...女友都應該識得阿熹... 畢竟兩個都係原校上到中七.... 哼.....兩個都係勁人黎架...!!! 嗱......!!! 呢D女人咪唔可以得罪囉.....
>>July 19, 2010 at 4:01:21 AM GMT+8 2010 年 7 月 15 日 星期四 【雷雨】 一臉倦容 女友今日終於都返來喇 一見到佢個樣好似個癲婆咁 我眼見佢紮條馬尾辮紮到鬆哂 而頭頂既頭髮又係鬆鬆咁 額前將果D海....用夾夾上前額頭度 跟住仲好似未瞓醒狀態咁 由抵港大堂走出來 一見面就話....好辛苦呀呢一程機坐得 原來佢地臨時比人買走左個位 基於利益一定歸公司 公司一定會..先比客後比Staff做後補 就係咁啱有人買左佢地兩個其中一個位 攪到只得一個機位回港 同女友同行既男仔要等下一班機先有機會上 佢地各有各前後腳走..... 但女友佢個機位都唔好受 近洗手間仲要中間位.... 身邊仲有兩個肥鬼佬夾住 就係咁..女友捱左13個鐘頭先返到香港 出到黎就難怪佢變左個癲婆喇 行去搭巴士時問女友....點解唔等下一班機 原來女友都會好守諾言話過呢一返就呢一返 唔想我機場白等一場 但如果真係咁辛苦的話... 我寧願女友遲點返來 大不了我咪自己回家當去機場遊一個Round 聽女友講響架機上真係好痛苦 兩個肥佬擋住... 去洗手間又困難 大大份又將手臂佔左佢少少位 食餐都要就住位食... 到瞓覺....兩個左右環回立體聲嘈到冇得瞓 帶左耳塞都冇用 唉....聽到咁都替佢痛苦...要咁捱13個鐘 女友真係一上巴士就瞓 全程冇出過聲 返到屋企都係瞓 我返到去幫女友執大細黑 仲有一個約4呎乘4呎紙皮盒 不知道是什麼 算吧啦 我幫佢執好所有旅行完既污槽衣服去洗 細黑內放左好多飾物..應該係手信吧 而出奇地今次竟然得少量食得既手信 真係唔似女友作風呀 但眼見佢一返到屋企立即沖涼之後就瞓 我都冇機會有時間去問佢旅途如何 但不過我估女友呢一躺旅行並唔係我想像中咁舒服 佢轉內陸機都起碼5轉左最少5次... 每處只係留一陣間...睇一陣景 好似去"流浪"咁 咁以上都係我估啦..我唔肯定 而家女友仲瞓緊 瞓醒先問佢到底玩乜玩都個人變到咁攰啦... 但係我呢個心定返點喇 見到妳返來 冇妳呢10日我真係好悶呀 妳知嘛.... 我真係等妳架...!!
>>July 16, 2010 at 3:25:06 PM GMT+8 2010 年 7 月 14 日 星期三 【酷熱】 一個鐘頭爸爸 放工收到雪兒電話 叫我去博愛醫院一齊探Maggie 我問Maggie入左院咩..? 雪兒話...唔係呀 係佢個差幾日就三個月大既BB女 下...?發生咩事入院呀?? 咁我並冇追問下去 只係應承雪兒.....我會去睇下BB女 但係我心諗點解住博愛醫院咁古怪 據我知博愛醫院既病房係冇"兒童房" 更何況係BB仔房呢 但係雪兒話係...我就信啦 話哂雪兒都係新界西聯網醫院既姑娘丫 唔通我唔信雪兒咩 我唯有照去博愛醫院.... 我搭輕鐵轉巴士去 而雪兒就響屯門湖康診所跟個醫生車去博愛 唔使講...一定係佢坐私家車快啦 我輕鐵去到元朗廣場我就收到雪兒電話 話...!!!! "我...攪...錯...左...!!!" 係屯門醫院先係 我馬後炮同雪兒講.... 我話我都估妳係錯地方喇 博愛醫院都冇房比仔瞓 我仲乘機揶揄雪兒..... 屯門醫院做姑娘喎.....挑~ 我話雪兒...妳都真係傻得交關.... 我信妳...我仲蠢呀 呢個時候雪兒係同我行緊一條冇咩人既單車徑 佢當埸大聲唱歌..... 荒死冇人聽唔到咁 我立即彈開.... 我唔識妳架.... 雪兒係咁捉住我唱歌 唉......同個傻架一齊呀...!!! 好...我舉手投降.....係....講錯地址唔係妳錯.... 係我錯..我應該問妳係唔係真係去博愛醫院先係 去到屯門醫院佢雖然係探病時間...但探訪者管出入好嚴 要問你同病人關係、本人咩名咁 雪兒可能知規矩.... 話自己係病人既家姐..... 當我...仲諗緊我要用咩身份入去時 雪兒同個阿姐講 用手指住我 呢個係病人既爸爸....!!!! 我頂......真係比唔切反應雪兒 為左唔好穿煲...我唯有講... 係呀 裡面個女人係我老婆....病床上係我既女 入到去D姑娘當正我係佢老公咁 係咁講D病情我知.... 唉...... 比女友知道我一定死梗呀 無端端做左人地老公 死人雪兒講大話都唔眨眼....... 佢係病人爸爸...!!!!! 不過....因為我咁既身份 我知道BB女既情況 真係好令人擔心 最慘係......五十五十咁 唔肯定 希望BB可以冇事啦 Maggie即係所謂既我"老婆".....個女... 真係好可愛好乖.... 唔會扭計喊.....喊都係叫肚餓先會喊 佢手腳撐撐咁好鬼可愛 Maggie叫我快D生啦 咁生呢一定會生既 Irene鐘意小朋友.....恨做媽咪... 但唔會係而家囉 養一個要400萬.....仲未計雜費呀 你話..我識印銀紙就好喇 哈.......曾幾何時我有諗過去諗方法同途徑去找一份幫香港銀行印銀紙既工 嘩...睇住一板板未Cut開既一千蚊紙 仲要見到半個人咁高既銀紙放響眼前要我Cut成通用鈔票 真係爽到爆 Ok...我傻完喇.... 返番黎 明天Irene會返香港喇 我要去接機.... 冇見咁多日好掛女友呀 不過Irene返到來睇到我呢段文章.... 我背住女友做左人地一個鐘頭老公 Irene會唔會將我滅口呢..... 大家可知道嘛 我女友都唔係好蝦架..... >>July 15, 2010 at 2:25:49 AM GMT+8 2010 年 7 月 13 日 星期二 【清涼】 還有一天 女友後天會返來喇 當然如果行程不變的話... 計一計...女友已經離港9日 玩足一星期有多 咁耐我都係同佢聯絡過兩次咁大把 好恨我都可以好似妳咁遊走各地 人人都話....."妳個女友有平機票...你去邊都得啦..." 係..無錯 但我有假、有錢先得架 仲要睇下有冇運氣 一陣如果臨場有變上唔到機就真係咩都要泡湯 外地生活指數高 去玩都唔會玩得盡情... 要左慳右計 去玩都唔係一件容易實行既事 都係儲到錢先算吧 有錢呀..我都想娶左女友先啦 話時話...講時講 Irene妳呀...有冇丁點記起我呀..? 會唔會玩到忘形.... 連我姓咩都唔知呢 哈哈....點都好啦 今次我讓妳去都係想妳完下旅行夢 遊走各國....轉機都轉幾次 旅行都係想妳開心 只要妳開心就得喇 但返到黎可否煮一餐好既比我呀...? 呢幾天食得唔係幾好呀 返到來就Check左我咁多日既日誌啦 當中我都發生左D事 好想妳知 而有樣野我好想知.... 但要等妳返來先知 我好想知答案.... >>July 14, 2010 at 2:30:56 AM GMT+8 2010 年 7 月 12 日 星期一 【清涼】 慳電費 放左工鬼打咁熱 其實最好就返屋企抖...嘆冷氣咁 但我發覺張電費單要1700幾蚊..眼都凸埋 我懷疑屋企係唔係漏電....漏走左D電!!!! 點解會咁貴? 不過計下計下又唔係冇可能 我地冷氣真係輪住開 開完房呢部就開廳果部 只要有人在家.... 就一定會開冷氣 而且我呢個人冇冷氣係生存唔到既添仲係.... 咁樣電費有咩可能唔會重皮丫 但女友返來要同佢解釋下先...一千七百幾蚊呀.!!!! 仲有女友開既焗爐、電磁爐....都係勁食電 其實女友唔可以怪我丫 妳冬天夠開暖氣開足一日啦 咁又點計喎...! 但有時諗下計仔都可以慳到既 今日我就冇返屋企.. 出去坐有冷氣既交通工具 坐鐵路最好喇....唔使錢 最乎合我呢等窮人既經濟原則 所以我放工坐港鐵遊走香港鐵路網 而今日事實都証明左我知... 東鐵舊車冷氣係最唔掂.....真係焗架..頂佢個肺!!! 我由上水坐到太和真係頂唔順 要等架SP1900...即係東鐵既新車....冷氣先較為好少少 之後去九龍塘轉地鐵... 地底一行車D風係咁打埋黎就好涼好爽 我遊走全條觀塘線同將軍澳線、荃灣線、東涌線、機場快線 轉轉折折去到大圍坐埋馬鞍山線..... 好可愛SP1900得4Car車廂.....有如Q版西鐵 我諗馬鞍山線車長會係有駕駛西鐵+輕鐵既混合感覺 最尾回程我由紅磡坐返屯門 始終EMU SP1900新車D冷氣真係勁好多 勸公司攞走咁多抽舊車堆填啦........真係熱死人架 返到屯門坐輕鐵 唔係讚自己既車 輕鐵D冷氣真係好夠 只要個司機肯開既話...好似我呢D咁 真係可以凍死人 輕鐵車細..冷氣匹數大 尤其係新車..... 有時開到我都會覺得凍 好難怪我呢幾天除左去洗手間、食飯之外 我都留返響自己車涼冷氣 好彩政府冇立例要鐵路停車熄匙 如果唔係我真係會冇命 今日就係咁...自己一個人無聊鐵路遊 係咁架喇.... 女友唔響度.... 我可以做D咩喎 回家同兩隻貓玩手指咩.... 有冇好心人約下我食飯呀 20蚊樓下...我請得起架 唔知女友今日玩得開唔開心呢 走幾個國家咁玩.... 羨慕死我喇....衰人 >>July 13, 2010 at 3:40:55 AM GMT+8
|
|
無事嗎?irene佢而家情況如何