| 日記 | 日記主簡介 |
||||
2010 年 8 月 20 日 星期五 【清涼】 好人難做 今日返工既時候 又聽到後面車廂好嘈.... 唉..... 又唔知嘈咩喇 看看後鏡 似乎那個肥胖婦女好激動 真係想食人想咬人咁 這一刻我看到佢到底鬧緊邊個呢?? 因為後鏡視點有限 我看不清楚... 但情況真係好似有點不受控制 瘋婦真係....似個潑婦罵街既樣子 下一個車站...我落車出去了解咩一回事 原來..... 我真係頂個八婆個肺丫 因為佢超胖既身形 好似有左BB咁既樣子 有個好心人讓位佢坐 誰知佢不領情.... 仲話我唔係有BB 咁你即係話我好肥啦 而家係唔係歧視我地呢D肥人呀 我好似有BB咩 邊一忽似呀....... 一輪嘴個八婆係咁嘈 我真係想一巴車死佢再一腳兜佢落車 心諗.... 人地讓...妳咪坐囉 妳個死肥婆咁大個肚腩 比我都以為妳有左啦 自己又唔係好樣過人...又肥又臭脾氣 我真係替個後生仔慘同無奈呀 最後..... 我拉左個後生仔去遠少少車廂中門既地方 叫佢不如坐下一班車.....息事寧人 佢亦都無奈同意 佢由中門出去 我走去前門話個女人知 得喇得喇...我話左佢喇 佢唔啱喇...冷靜D唔好勞氣 乘客可能見到呢個潑婦咁惡 真係冇人肯出聲 全車人都冇人性..... 難為我要背良心向個潑婦講佢知...... "妳啱妳啱....我叫要佢落車喇....唔好激氣...無人敢歧視妳...." 此時呢個潑辣女人先至收聲 自己自言自語地口中念念有詞咁 呢一刻我諗.... 其實佢係唔係精神有問題 如果真係的話 能夠比我收拾到個爛攤子...真係好彩 一陣唔係佢又攞把刀出黎斬人 做返港鐵荔景站事件既翻版 咁就大大鑊喇 最終我都見到係.... 冇人敢坐去佢身邊個位..... 或者我真係冇估錯 佢真係有精神病..... 有時返工真係.....什麼奇人奇事都會發生..... 回到家 女友仍然不睬不理我 冷冷的向我說話.... 唉.... 我都唔知點算好..... 可不可以算了....原諒我呀...? >>August 20, 2010 at 9:39:11 PM GMT+8 2010 年 8 月 19 日 星期四 【酷熱】 告知真相始末 我認為.... 我覺得應該.... 比妳父母知道妳既事 是我自己拿主意話去講既 是我親口告訴妳父母知道既 因為我覺得妳係佢個親生女 有權、應該要知道的 而且不是什麼不治之症 其實很小既事 手術已經做了 大家都知道回不了頭.... 告訴給妳父母.... 我覺得...都只是純粹知會給佢地知 其實我真係好大壓力 作出呢D決定 我不知是對是錯 現在告訴給他們知道 佢地諒解我... 我會好過一點 至少妳父母都覺得我做得對 決定是無錯既.... 我知妳好嬲好嬲好嬲我 Sorry呀.... 見到妳咁樣... 我都好唔開心架 呢幾天我真係無心機..唔開心呀 妳不瞅不睬我 對住我講冷冰冰既說話 其實妳父母都知妳什麼事... 佢地都好放心... 事情都告一段落... 為什麼妳都係如此冷淡 若要鬧都面對面我咁鬧我啦 妳不作聲.....冷冰冰冷淡既樣子 真係好恐怖 或者我做什麼妳先會嚥呢啖氣...下這度火 妳話比我知啦..好嗎..? >>August 20, 2010 at 9:38:31 PM GMT+8 2010 年 8 月 18 日 星期三 【酷熱】 傾訴說話 有點事情我有點想不通 心總係十五十六咁 想找朋友傾訴時 先知自己原來朋友真係唔多個 最後我都係搵左雪兒傾 心想.... 雪兒係女仔又係做護士 問佢呢D問題最適合不過喇 經過雪兒開解後 看來我知我應該點做 或者有D事我真係要講清楚 講到尾都唔係我一個人既事 講完我.... 原來雪兒同佢老公嘈交 為左美國簽証一事 為左一個父母既姓名 就要雪兒白走一躺 打電話嘈佢老公為何咁咁咁 佢老公就話佢做事應該唔好假手於人 比得人做就要遇左人地會做得唔好 妳白走一躺都冇得怨人 雪兒向我講左呢D話 我安慰雪兒...放心吧 返到去妳老公一定會氹返妳既 但我都相信佢地都係耍花窗.....玩下吧. 兩公婆呢D都算係情趣嘛 同雪兒飲過杯野後 大家各有各回家 而我不是回家 我就要去接女友放工 唔知首次病後既Flight...佢點呢 捱得住嗎... 一陣見到我咪知囉....哈哈 >>August 20, 2010 at 10:44:10 PM GMT+8 2010 年 8 月 17 日 星期二 【晴】 錢錢錢錢 今日細妹打比我 電話中佢又話自己既牙又有問題 出第三隻智慧齒 其實話我知咪即係要我比錢佢睇牙醫 唉..... 我呢個阿哥都算做得慘喇 成日為個妹破財 又比左1900幾蚊 真係想喊咁滯 刷一刷咭又要下期還錢 衰妹今年係大學最後一年 之後既學費都係我比7成.. 妹自己搵錢比3成錢 講真......我真係全部錢比哂佢咁滯 不過我知政府會津貼八成錢比佢 即係比我啦(到回水時八二分帳) 如果唔係咁....我真係都唔知供唔供佢讀書好 但係D津貼我仲未收到 唔打緊啦....當係儲錢啦 今日我先同妹講 妳都唔細啦廿歲女喇 搵個男朋友補貼下妳啦 下下搵妳呢個阿哥 我都自身都難保呀 我無錢結婚就為妳是問呀 嗯..... 但我妹咁巴辣..... 有冇男仔鐘意都成問題 看情況我短時間內都係仲要幫補我妹 算啦 一世人兩兄妹.... 無計既 >>August 20, 2010 at 10:43:39 PM GMT+8 2010 年 8 月 16 日 星期一 【晴】 書狂 女友佢返左工會離開一日 剩下自己 所以今日約左雪兒食飯 但其實我係主要帶路去幫佢買書 去到屯門市廣場 先至發覺我唔係好識路 真係唔敢相信自己會響屯門迷路 不過.... 冷靜過後我想一想 我識得向咩方向行喇 去到書局 我有我睇 佢有佢睇 找下找下書架先知 我鐘意既作者又出新書喇 當然要買左佢啦 行多兩步又見到 我上次買果本書又出左第二冊 心思思.... 算吧.....買啦 反正女友佢都會鐘意睇 比佢出Trip時睇就最好不過啦 看看雪兒佢 佢買左12本書......痴線 賣單要1300幾蚊 難怪咁貴既 佢D書係講有關醫護既參考書 本本都要250蚊差不多 最平果本都要188蚊 買完雪兒請左我食飯 哈......慳返一餐錢 食完出去等雪兒個老公車 送左佢上私家車後 我自己返去 不知道女友佢捱唔捱到工作呢...? >>August 20, 2010 at 10:43:11 PM GMT+8 2010 年 8 月 15 日 星期日 【晴】 我想話既係..... 前日聽到Simon一家人連佢D仔女一齊去台北玩 而我地對上一次旅行都係年幾既事喇 妳連S L加上 A L仲有幾天可以放 而我呢就冇假可以放 點都好....妳想到要..而我又可以做到...我都想為妳去做 呢個係我想法 近呢一排 我總係覺得自己做D決定好似好錯咁 其實我都好矛盾 是對是錯..我都唔知 總之....我就覺得呢個決定好對唔住妳 雖然妳口口聲聲咁講.... 我冇事....亦明白我咁短時間做決定簽紙我都係迫於無奈 但..果一刻...醫生話如果妳唔做.... 可能有生命危險 佢話..可能....當時醫院得我一個 想搵個人商量都冇 之前妳又叫我唔好話比妳家人知住 試諗下我一個人當時會係點 我果時緊張到又唔識問醫生做左妳以後會點 日後會唔會有問題 只係個腦諗住.... 唔做妳可能會死.... 係死呀....死左就會乜都冇...我唔知再聽到妳把聲..見到妳個人 我果陣妳知唔知我係好驚 我真係好想喊....問人...我點算點做好?? 我果一刹那真係好憎可能呢兩個字 幸好....只係切除一部份就順利完成 但..手術後切左呢一部分....到我清醒一時先諗 我果刻應該打電話比妳父母先係 諗真D.....我點可以代表妳父母做呢D決定..? 到今時今日 妳都冇話比家人知..... 除左妳個妹之外 如果比我選擇多一次 我會唔理妳既說話..打比妳父母商量 點講妳係佢地個女 即使係未婚男朋友又如何 點計算我都冇咩資格做呢D影響妳一生既決定 而家 雖然妳身體已經好左好多 但我發覺我都唔知係唔係剋住妳 早日子先我用熱既流質....燙傷左妳 痛到妳既叫聲..... 我而家仲響個腦好清楚記得.....永遠都刪不去 雖然疤痕可以用衫遮到...但又如何? 是我令妳受傷 今日我又間接令妳身上多一條更長既疤痕不特止... 還要少減一些野 怎說都好...我覺得好對妳唔住咁 現在我每事都想妳開心 即使係今次短程...咁走去台北行一行...住一天咁 妳只係講左一句.... "我都想去行下呀" 我就用盡方法調幾日假 只要妳想.....我可以做我都帶住補償既心態 我成日都疑著妳係唔開心 我真係唔知妳內心係點諗 我真係唔識講而家我個心自己想點 想得到...想令妳會釋懷、開心既方法我都想試 妳話想去行下玩下...我願意求人調假調更比我 妳之前話..我好耐都冇同妳出去影過相 知妳貪靚我靈機一觸願意問人借衫妳去影相 緃縱使我覺得一個男人走去問人借一套女仔衫係幾咁難為情 可能比唔識我既人知還以為我係變態添... 不過我唔介意 當知妳真係有心機有興趣去睇人地既相去選擇要咩衫 我心會同自己講.... 我終於找到一件會令妳投入去講...會去笑住做既事喇 起碼妳會笑住講呢套點點點.... 果套我如果著左會點點點咁 由妳出院到而家 日子不算太長 但係我唔知妳內心係唔係已經平伏 我總覺得妳係同以前有點唔同 好似冇左一種樂天既感覺 我唔知係唔係輪到我多疑 但我真係好想妳認認真真講我知妳心想到底係點諗我既"所作所為" 恨同唔恨......我都好想知 或者妳有什麼想法 妳講我知..好嗎? >>August 16, 2010 at 1:03:17 PM GMT+8 2010 年 8 月 14 日 星期六 【晴】 身在台北 有時間先略略地打下行程 >>August 16, 2010 at 1:02:09 PM GMT+8 2010 年 8 月 13 日 星期五 【晴】 身在台北 有時間先略略地打下行程 >>August 16, 2010 at 1:02:18 PM GMT+8 2010 年 8 月 12 日 星期四 【晴】 夢想既未來生活 放工陪女友佢去洗傷口 咁洗既時候我就唔入得去既 不過…新界西聯網既診所....(只係Clinic...唔係醫院呀...) 大大話話我都識得八成既職員 多得早幾年我成日都要出入診所所致啦 診所既姑娘大多我都好熟悉 而且我間中駕車都會見到佢地(呢D姑娘...我開工時見到佢追我車就...例等架喇...) 都算叫Keep住有聯絡吧 今日我到診所 雖然係熟..但我都冇用特權咁自出自入 老實講…我話要入去都唔係難事 但係規矩係大家遵守既…自己都要識做..又免得人地難做 大家咁熟…要人出到聲就唔好啦 但唔係所有人都會體諒姑娘既工作 好似今日咁 就有個痴線既女人響診所發癲 事源好似佢遲到因而冇醫生見 呢D攞明係自己問題啦…關人鬼事咩 嘩…佢鬧到拆左間診所咁 潑婦叫哂粗口仲話要返屋企攞刀斬人 唔係講笑…佢真係話斬人 最後當然要勞煩差人出馬調停啦 攪咁多野..診所既醫生冇得睇…要去差館睇差人 呢D咪自己攞黎囉…抵死.. 而家搵食真係好艱難 對住客又要吞聲忍氣 又唔敢得罪D客 對住上司又係要咁 做唔做左野都話你做得唔好咁..... 不過....老細冇得好講..佢出糧比你既 但比客鬧真係有時會想… 我情願立即劈炮唔撈..就即埸打個客一身 我以前都做個服務性行業 有D客真係好難頂 真係以為比錢大乜哂... 以前我見到呢D咁既客….我就死忍 就算比人媽我都冇還口 一直忍到佢走左....我先會入後房貨艙打紙箱... 果時做7仔...紙箱多的是 打得最厲害果次係.一拳打到個箱穿...穿就梗架喇 不過估唔到自己可以打穿個箱再打穿箱入面既蒸餾水.... 最後一地都係水...抹得我..唉!! 自此我就唔打箱.....打冰粒...因為打得多手個痛..會自己肯停手 但係.....呢D事都可以咁樣比我發洩 不過我真係好憎聽到呢一句…就係..!!!! ”今時今日咁既服務態度點得…!!!” 相信做服務性行業既人都會多得劉德華唔少 所以我嬲個客之餘..我更討厭劉德華呢個人 直到現在...我對佢冇咩好感..!!!! 今日回到家… 女友打開佢個空服既論壇睇 又見到魚翅屈服於無理既客之下 又係比個客媽完…仲要Upgrade佢坐商務客位 同上次機埸阿嬸事件一樣 我都唔明點解魚翅咁大間公司 要做到咁Cheap 唔怪得咁多人都唔想做地勤 聽女友講…做地勤雖然可以每日返屋企 唔會有時差既折磨 但係香港同大陸客真係好衰 做地勤每幾日都要見到呢D情況.... EQ低到都會做到打人 難怪女友佢情願捱時差同離家出走都要做Crew 做Crew雖然遇到D客都係衰架喇 但係當每做完一班機…就等於劃上一個句號.. 呢個客可能呢世都唔會再見 乾手淨腳…無後顧之憂… 如果女友真係要轉做地勤…我都替佢擔心 畢竟她咁多年都係飛機上過 要佢轉...我都怕難為左她. 但係如果身體正係頂唔住….佢唔轉又唔得 諗過轉工 但係佢除左呢D工作經驗咩外咩都冇 轉工談何容易呢… 有時諗…點解人要為錢而辛苦工作 又諗…點解我唔可以比到佢穩定既生活、生計 兩個人工作先可以撐到生活 很認真呀 我真係唔想自己女友...未來太太同我捱一世 而家既她….工作量大我好多 起碼我唔使點理個屋企 女友將九成家務事攬上身 其實我有講過我幫手做下啦 家我都有份住 但每次女友都會話 駕車要精神呀…放工就抖下吧 唔夠精神開車…好危險 呢D事我情願我做 況且…女友會話…”你做到一半一半咁，咪係要我執手尾…..我做返吧 傻都知..呢個係佢要我唔好做既借口啦 我真係唔信我真係咁差架 但如果要她做地勤 回到家又要捱...等於叫佢打兩份工 我真係唔係太忍心 而家望既…只有我可以做好份工 望去到頂薪既話就可以生活好一點 但前路遙遠又茫茫 不知何時先會有呢一天 想得美好的話 她可以FA做到ISM… 我地到時應該會幾美好 但係 而家暫時會唔會係想得太遠呢…?? 可知我其中一個夢想係我身邊既女友可以好安安樂樂..無憂無慮咁生活 可以擁有一個屬於我們既小康之家 >>August 13, 2010 at 4:07:57 AM GMT+8 2010 年 8 月 11 日 星期三 【乍寒還暖】 Year warranty for worse ear receiver 我有個習慣 就係買左一樣物件 好似電話咁...有個盒裝住既 我都唔會掉左個盒佢 我會一直留住等到我買下一部電話.... 先會掉上次個盒 昨日女友買左對 Ear receiver比我 同樣地都係有個盒 我照舊都係留返佢 掉走我前一個 Ear receiver 既盒 但我望一望個盒先發覺 佢有一年既Warranty....!! 望埋張單據07-09-2009買既 到而家咁即係唔夠一年啦 我諗係唔係可以攞比佢整呀..? 於是問下女友..... 女友佢第一句就話.. 你唔係嘛..?耳筒都攞走整? 咁我話佢有Year Warranty嘛.....!!咁有咩問題呀? 女友話....你一日聽到黑，用到壞都正常啦 你知唔知咩叫"消耗品"呀?? 你D野用得多係會自然會壞架.... 咁整乜鬼啫..? 仲有呀.....你唔係諗住條條Fing咁攞去比個Counter小姐睇 我整呢條Ear receiver呀..咁呀!!! 阿小姐以為你係痴線架...!! 由鬼佢啦.....幾百蚊....整黎仲乜...!! 嘩..... 我好似講左兩句乍喎 好似比人炮轟咁...一輪嘴咁講... 好喇.....唔整就唔整啦 講真....其實我又冇諗住真係走去整 只係望到佢個Warranty未過先有咁既Idea吧 的確攞條梅菜...條條Fing咁既Ear receiver比人整 真係有點兒那個.....可能人家仲以為我係智障添 試諗下個維修Counter處...望下左邊人地整部DC 右邊果個整部DV 自己攞條梅菜...出黎真係笑死個Counter姐姐 我諗Counter姐姐會講... 整就冇得整架喇....醫返都嘥藥費 不過你咁有勇氣攞黎整，我揞荷包出錢送個條新既比你吧.... 嘩...如果係真....我一定瘀到冇朋友....! >>August 11, 2010 at 9:05:27 PM GMT+8
|
|
無事嗎?irene佢而家情況如何