| 日記 | 日記主簡介 |
||||
2010 年 4 月 16 日 星期五 【晴】 一個死Cheap精 今日真係激鬼氣 話說我幫個傻妹Bid一本日本雜誌連AgnesB環保袋 今個星期三下標亦都成功 先Email電話聯絡賣家亦交換左聯絡電話 大家都答應星期三交貨 價錢係99蚊 好啦....星期三朝早佢打比我話唔記得帶本書 好啦...由佢啦咁星期四啦 我一口應承 點知星期四佢又話唔得 仲要用Email話我知唔得 講真...遲多一日都唔打緊 但有咩理由用Email通知人呀 咁我比手電號碼比你把鬼呀..??? 如果唔係落雨我要留多陣響家中多一陣 先有D空閒開一開電腦睇Email 才見到個賤人又話唔得... 又要遲多日 谷鬼氣..... 立即打比佢話佢....暗示佢咁冇交帶 如果唔係真係落雨天我開一開Email睇.. 咁我咪白等....?? 我電話講..話我今日一定要本書 條友仔係咁講話唔得.... 係咁話因為今日要OT... 老闆既Order係命令 今日做唔到比唔到本書我 我係電話係唔咁話今日要 佢只係識講一句....今日唔得 我話我就你...你邊度工作... 我去果邊等你 就哂你方便 佢先話今日冇本書響身 原來事實上佢係冇帶響身 我直頭話佢...你係冇帶乍嘛..!!!!!!!! 佢唔出聲默認 咁冇法啦....唔通我攞刀斬佢要佢比咩 之後我用Email打左一段字話佢... 明天再唔比我一定不會讓步 佢之後打比我話見到我打段字後 就不斷扮死.... 又話工作忙、老闆麻煩、又話我後生仔唔明打工仔心聲....扮哂死狗 最終我今日先至有得交收 我仲要就佢地方 好...算數 我搭車唔使錢... 我由你... 本書99蚊 到見面話冇散紙找 做賣家都估到知個買家通常都係比100蚊紙找續啦 我比一百蚊佢... 佢話冇得找 仲厚臉皮到講不如算數啦 就100蚊啦...貴多一蚊賣比我 我真係心裡面講 邊有人咁仆街架 又遲比人又要就你.而家仲要貴多一蚊 你個死肥佬... 佢真係好肥又大份..身形起碼大我兩個碼... 即係搭車一個人坐兩個位既身形既人 好...算數 一蚊比你執藥 回到家比評級 我真係完全唔想比正面評級... 比唔落手 但佢事實又交到本書我 又唔可以比負面 比中性又好似唔知點咁 不過諗起佢個肥佬厚臉皮個死人樣 真係想比佢一個唔好既評級 幾經掙扎....我決定 乜都唔比.... 佢絛友仔.... 我真係做交易做得最唔開心係今次 正一賤人 呢條友.... 呢生呢世我都唔會再幫襯佢 正一Cheap精...一蚊都話冇 講真又唔見你話冇得找一蚊 改賣90蚊找10紙比我..!!! 越諗越火滾 真係唔講粗口都唔得 正一仆街死Cheap精...食屎啦你 >>April 17, 2010 at 10:15:30 AM GMT+8 2010 年 4 月 15 日 星期四 【颱風】 麵包超人 今日返工如常一樣都係 女友叫醒... 女友整早餐 準備好一切 最重要我果60蚊啦 係係.... 唔係60蚊... 係妳整個飯盒.... 今日如常咁拿飯盒出去返工 我一向都不會睇內裡係咩飯菜 因為我知.... 點都會食得落肚既.... 今日放食晏時候.... 我如常叮個飯盒 一打開個飯盒 立即比隔離個八婆笑 仲要..哈哈哈哈......!!!!! 嘩......麵包超人呀?? 個飯係唔係比你個女食架...哈哈哈哈哈哈? 立即同八婆講婚都未結何來有個女呀.... 亂唔講野..鬼唔望妳一陣開車時肚痛兼肚痾 仲要搵唔到廁所...搵到廁所又搵唔到廁紙... 咁又難怪個八婆笑到扖街兼噴麵既 事關女友又發揮佢個小宇宙 佢竟然將一塊切成圓形既厚火腿上 用佢D唔知係唔係整蛋榚用既Cream筆... 響塊切成圓形既厚火腿上畫左個"哈哈笑"上去 咁驟眼看係幾似麵包超人塊面.... 真係冇諗過女友有似一著 我當堂唔識反應臉都紅 因為之後仲有幾個八公睇 其實我內心係好開心既.... 真係博到我笑出來.... 最辛苦我又唔笑得大聲 但內心真係不斷咁笑.... 心諗真係....頂妳唔順呀..咁得閒攪D咁野出來 不過真係有點唔捨得食呢..... 我真係唔想咁快食左先架 但係班八公八婆係咁笑笑笑...笑到眼水都標出來 係咁話我....小朋友呀哈哈哈...仲細咩.哈哈哈 都好....呢個時候有個師妹講個說話 "你恨唔到咁多架喇...食你個油浸肉醬意啦....笑...哽鬼死你呀..!!" 雖然都有一個人幫下我口 但為左唔好令人笑到食唔到飯 為左唔好再比人見到麵包超人 我唯有食左佢先啦 攪到連相都冇影到出來... 不過有時女友間中一D小動作真係 真係顯得妳好可愛呀...
>>April 17, 2010 at 10:15:17 AM GMT+8 2010 年 4 月 14 日 星期三 【乍寒還暖】 我部PSP..? 女友今日問我... 而家唔見你攞部PSP出來玩既..? 嗯..... 因為我阿媽攞左黎用呀 係呀.....妳外母攞左去用呀 女友真係信..我媽攞左去玩 仲問有咩野遊戲啱佢玩呀 很天真問... 佢當然唔係攞黎打機啦 佢攞黎睇MP4呀 就係有一日老豆霸住部電視睇 阿媽叫悶 咁我咪比部PSP佢睇MP4囉.... 果時入左套電視劇入去嘛 點知佢一睇上哂癮 攞住我部PSP愛不釋手... 仲問我係唔係只係睇到呢套劇 阿娘問到..當然話唔係啦 入咩咪睇乜囉 後來我教個妹入劇兼轉檔 開頭阿娘都係睇下D.....20集電視劇 有一日阿娘上去收費台睇到套韓劇 "妻子的誘惑" 就一睇又上Q埋癮 仲要我妹入比佢睇 我妹為左唔好咁煩... 就一次Download幾集佢睇 點知比佢發現原本可以上網Download先睹為快 自此我妹慘喇 韓劇閒閒地百幾集 我妹真係轉檔轉到講粗口咁滯 諗住入四集阿娘可以睇耐D 點知佢一日睇哂 好啦..入多十集啦一次過 都係同你一日睇鬼哂佢 我妹問妳係唔係睇得咁快呀...? 阿娘答...."飛來睇嘛...!!!!" 我妹立即..@#%@#$!! 而家我阿娘不知幾In呀.... 完全知道網上世界既偉大 再用阿娘身份...命令我妹多D去Download 好彩我係同女友住啫.....避左一大個劫 而家我妹真係多得我唔少話 話我好比唔比佢部PSP佢睇 睇到佢上哂腦 小時候...我兩兄妹 看書寫字個頭跌低D都比阿娘鬧 聞書呀、同本書KISS呀、盲未呀你、想大近視呀.... 而家... 佢咩都做齊呀自己 靠到埋一埋對眼睇PSP... 哼...想KISS部機呀、聞機呀、老花未呀、想臨老先老花兼大近視呀... 當然以阿娘地位....我地係唔敢話佢啦.... 唯有我倆講...比著以前我係咁..... 打左我十世喇....!! 你話喇.... 阿娘咁鐘意部PSP... 咁我仲何來有得玩丫 假若妳肯送部比我的話.....唔區架 多謝妳先呀....我知道妳永遠都對我最好架 我要部薄既PSP遊戲機呀 喂.... 唔好走啦... 最多妳比遊戲機錢我比記憶咭錢啦... 喂喂喂 最多我出埋個尾數啦.... 喂喂喂喂喂喂.... >>April 16, 2010 at 3:46:43 AM GMT+8 2010 年 4 月 13 日 星期二 【酷熱】 心急如焚 今日真係比單新聞嚇親 我放小休時見到新聞報告.... 剛好見到架飛機放哂逃生梯既畫面..之後我咩都唔知 一眼只係見到係一架國泰既飛機... 自己又聽唔到來龍去脈... 架機係由邊度飛又唔知 因為我第一眼睇新聞時...一播左果個架飛機放哂逃生梯既畫面之後已經報其他新聞... 事關我入來見段新聞片之前已經報完呢單新聞到最尾聲.... 只係見到唯一一個畫面就係...一大架國泰既飛機放哂全部逃生梯出來唔知仲乜 之後就係曼谷既局勢報道 問坐響度剛睇完既同事咩事 問佢係咩地方飛來又唔知....話冇留意呀 係....你會當一單新聞睇 睇完便算... 但係我咩都唔知 又冇時間比我上網睇 那一刻又要趕上出去開車 我心急又無奈咁...出去開車 沿途諗....妳係好似呢個時間落地.... 又似係..又好似唔係 腦中好多問題...原來我都唔肯定妳應該那個時間做緊咩...響邊?? 偷偷地用免提打比妳....妳又冇開機飛留言 總之呢一段車程我真係好擔心唔知出面發生咩事 好不容易到站頭落車.... 有六分鐘時間比我去確定係咩事 立即上網睇.... 原來係印尼泗水返港返來既..而且仲冇大受傷..全機安全 終於安心喇 那刻打比妳都仍然係冇人接.... 是妳冇開電話還是未到..定還是點點點? 不知喇... 過左個零鐘妳短信話我知返到來喇 短信中仲寫.."記得買報紙返來呀" 能夠咁寫出呢D短信就肯定妳冇事啦... 放工回家... 認真看新聞先知發生咩事 我真係無諗過國泰既飛機都會有事(心諗收人咁貴機票..整D咁野出來...國泰今次攪咩呀..!!!) 只係見到逃生梯都彈出來....就比我感覺好似發生空難咁大既一件事 原來...... 我都真係會識驚...真係會好擔心....終於知咩叫"心急如焚" 事實上我真係冇擔心過妳公司會有D咁既事發生 係點都估唔到... 見到呢一單新聞第一個腦海答案係..... 咦..!!國泰做逃生演習呀???咁大陣象既?? 望真D先知係真係出事 開始發慌諗妳響邊、有冇事、會唔會係妳、妳係咩時間落地、好似唔係呢個時間、但又會唔會早左到港、好多好多既想像 心想我們還有好多野未做呀..... 果一轉751...真係我返工咁耐感覺最漫長既一程 心中好急....關門時好趕...上客時心想上車上快D啦...落車落快手D啦呢人....攪乜呀..今日個個食左油呀..!!!! 有諗過衝正在閃爍閃爍著既"開始準備停車訊號"(簡單D講..比喻路面上的車既話叫"衝黃燈)" 最終我都冇做..原來我心急起來都真係唔會用百既人命教非...我真係估唔到.!! 我個腦真係好似放盡衝過去... 但隻手自己叫自己要停車...(真係唔知點解...我真係一心想衝...!!) 回到家見到女友....真係安樂哂 講開先知 事件發生時...女友仲響半空中 當然電話冇人接飛留言啦... 雖然是自己女友平安無事 但我都相信在半空飛機冇左動力真係會令人嚇破膽 而空務員仲要扮震定咁安撫乘客 女友話自己試過遇很強既氣流... 架機有離心力咁樣跌下跌下咁 真係...比咩人你果刻都會驚 不過今次大家都冇事就好喇 雖然有半刻"好在...好彩唔係我女友"既感覺 但發生呢D事真係誰都不想 諗真...今日都唔知咩日子....船又擱淺....飛機又壞引擎....邊有咩黑架..!!! 但係..點都好啦.... 妳又無事大家都無事就好了.... 抵死既妳仲向我講笑 話響外地接到一對兄弟既電話 講埋D無聊野當埸激到妳嘔血 問到妳咩...咩對兄弟呀??講乜呀妳..!!!! "安信兄弟"呀 財務公司問你使唔使借錢呀..問你等錢用呀!!!! 哈哈....今期長途電話費..... 妳就..硬食吧 算啦.....幾廿蚊 我就話冇錢啫.... 我知妳一定比得起既.... >>April 14, 2010 at 2:58:41 AM GMT+8 2010 年 4 月 12 日 星期一 【酷熱】
唔好意思..原因係咁
D日誌一係唔寫 一係就補返咁多日既 到底玩咩 其實我唔係玩呀 因為我個Front Page死左 出唔到大字顏色效果 但雖然係咁... 我每日都有用Word打定架... 只係等我有時間先至轉HTML 所以先會...一日補幾個日誌的情況 我諗呢個情況會繼續呀暫時 因為我都係未搵到個Software轉HTML 希望各位大人見諒 不過大家唔介意我用Word E-mail比你的話(即係同平日一樣咁...不過今次係doc檔而唔係html檔...) 我都可以比你地睇先... 但係冇字體效果... 無所謂的就通知我啦 咁先係做老豆嘛... 返工前送女友去返工.... 唉...人又Swap機..妳又Swap機...妳都Swap得衰過人... 兩日連住咁返工.... 都唔知話妳夠抵諗幫人好..定還是贛居好. 仲要過一晚夜添.. 要聽日下晏先返來.... 唉...算吧....都定左局..唯有由得妳返工啦. 嘩....今日我落車行入國泰城.... 已經好唔舒服...成身都滾咁 頂佢個肺丫 都唔知咩天氣... 熱到我一身汗.... 內面件制服已經濕到差到變成透明 攪到我要問人借衫開工 樣衰到爆.... 人地仲要Fit到死 我一著上身真係窄到呢.....爆鈕咁滯 攪到我要件公司既風衣遮醜 熱足我一日.... 上到車開冷氣開到盡 乾左之後又有汗味 我頂..... 總之今日返工返得好痛苦... 週身唔舒服.... 一放工 我飛咁返屋企換衫 換左之後.... 一身鬆哂..... 之後同表弟出去旺角買相機 佢老豆真係好呀對佢 肯比6000幾蚊買相機... 我呀...老豆呀... 600蚊都唔肯比我呀 最終響一間舖買左部Canon 500D 唉.... 15歲乍佢... 已經有一部咁正既機 我...15歲果陣 仲用機即棄相機呀...陰功 表弟..... 你幸福過我好多喇 睇下啦...老豆..!!!! 咁先係做人地老豆嘛.....!! 學下野啦.....!! >>April 14, 2010 at 3:16:58 AM GMT+8 2010 年 4 月 11 日 星期日 【晴】 紅定黃...??? 女友今日做BKK航班.... BKK即係曼谷 上次印尼又係咁 果邊立立亂 女友問我話我去返工呀...去呢度 我都係傻傻的不知她想暗示什麼 試過一次..衰左 唔可以再衰 今次叫女友小心一點 傻瓜一句...我不入地獄誰入地獄.... 我去救返香港人返來呀.....偉大哩..哈哈... 聽佢咁講好似一點都不擔心 我話..講真架..小心點啦 傻瓜又話.... 碰正"紅衫軍"不用怕呀.... 我的制服係紅色嘛.....喴自己友囉 如果碰正"黃衫軍"點呀...我問..??? 傻瓜答 咁我咪反衫件制服著囉...(因為佢件紅衫反轉係黃色反領外衣...) 當堂..我冇聲出 咁我又問...兩軍都出現咁點呀 傻瓜答 咁我咪時勢做英雄....睇邊面多人囉 著多人既一邊既..顏色衫.. 完全冇野可講 妳呀....總之要小心啦 慶幸... 女友冇事返來.... 我安心喇.... >>April 12, 2010 at 12:08:01 AM GMT+8 2010 年 4 月 10 日 星期六 【晴】 粗暴的對待 今日發覺部電話開始有問題喇 成日都時時自動熄機 咁又難怪佢係咁 我成日都跌佢 撞佢...毫不錫它 最嚴重一次係由月台跌落路軌 仲要跌響兩卡車之間既前一卡車底邊 那次我真係要捐車底執佢 假若部車一郁我定會身首異處喇 不用怕...架車係我開的 司機係我 除非佢自己郁啦 看......!! 我咁對佢...真係唔壞有鬼喇 可以捱到今日真係 偷笑啦 >>April 12, 2010 at 12:14:54 AM GMT+8 2010 年 4 月 9 日 星期五 【晴】 誰人爛賭呀...?? 是日返回娘家 阿娘就唔在家 反而個妹呢就帶左班女上來 嗯..... D樣都OK喎....哈哈 上到來玩Wii又打牌 阿娘唔在家就反轉間屋 作死頂啦.. D同學問我妹...打牌妳又識玩大陸牌、台灣牌、香港牌 啤牌又識...鋤大D、十三張、話事啤、射龍門、釣魚、冚棉胎、鬥地主、潛烏龜、三攻、十點半、廿一點..... 棋類..又識中國同國際象棋 Wii打機又打得咁狠..!!!(而家我仲唔夠妳打添呀...!!!) 賭錢又識填六合彩、咩係三T、六環彩、獨贏、位置、過關...等等都識 是妳自己去邊道學返來....?? 之後... 我個衰妹指住我 哩......!!! 咪我呢個爛賭既阿哥教架囉....!!! 喂.....死妹釘教妳咁多野等妳出去都唔會比男仔呃你錢乍 況且...馬仔係老豆細個我地睇得多一齊學識架....(最憎賭馬...阻住我睇電視呀...) 睇下妳而家可以響"賭"任何地方.."無一不曉" 妳應該多謝我呀.... 仲有.....妳真係要多謝我係 一開始就同妳講話...."小賭怡情".....只可以同親人新年時玩、同學之間細細地玩 教妳一定唔可以同人賭身家呀......(我有冇咁講過呀..八婆喬..!) 我係先講規則先教妳架....衰妹 妳呀..... 如果唔係今日點羸妳D同學飯錢丫 多謝我都黎唔切呀... 妳個衰妹 指住我話我教你爛賭.....打得少呀妳!!!! 信唔信今年唔供妳讀書丫嗱.... 等妳最後呢年自己半工讀.... 等妳借大耳窿... 借完冇錢還....收妳數... 妳知唔知大耳窿...點收數架?? 塞妳鎖窿...煩死妳 淋妳屎水...臭死妳 鎖妳鐵閘...燒死妳 問妳怕未......得罪我呢個阿哥..!!!! 咁大膽向班靚女面前話我"爛賭既阿哥" 妳話妳係唔係抵炳呀..!!! >>April 10, 2010 at 3:32:17 AM GMT+8 2010 年 4 月 8 日 星期四 【暴雨】 突然猝死...部電腦 今日部機還好好地 用用下突然死左 真係好突然 若然要比喻人類的病 佢都可以話係心臟病猝死 真係用用下忽然打句野出來話 乜乜檔案有不能修復的問題 再按一下老鼠 立即變藍畫面...system error... 唉....我全部野都冇backup 今次真係乜都冇喇...... 真係喊都無謂 激死我......整左我一晚通宵先郁到.... 真係..損失慘重.. 講起公司活動 shit.....點解我用做"哥哥"...? 不過都好過CID.....佢要演MTV中一個女人 哈....我買花生等睇好戲..... 我諗過喇.... 我如果扎實把頭髮..... 最多似蘇民峰 哈....要死... 大把人仲死過我.... 真係要偷笑.... >>April 10, 2010 at 3:32:34 AM GMT+8 2010 年 4 月 7 日 星期三 【暴雨】 相信我吧 今日女友在家中又整甜品 今次女友整左朱古力曲奇餅、蛋白蛋糕、芒果布甸 其實我每次食到妳整既食物 我都會好開心 因為呢D食物真係食得出妳的心機 我好慶幸可以分享到妳的心機 妳不要再問我好唔好食喇 妳整架喎.... 點會失手丫 講真的...真心的... 妳整的食物真係好好食 無論係賣相同味道都好好好好 自同妳一起後 我個肚真係有增冇減 肚腩真係越來越肥 問到妳到底會唔會介意我有肚腩架...?? 估不到妳話... 伏在我肚腩上軟棉棉咁 好有安全咁好舒服..有溫暖既感覺 好吧...咁我就聽妳話 不會減掉個肚腩 留下個肚腩來迎合妳啦 其實有時出街我覺得自己真係襯不起妳 尤其係送妳返工接你放工時 我真係會覺得"唔好意思"咁 我知我不應該咁諗 但有時真係控制不到自己 我都唔想咁諗.... 可惜男人天生自尊心真係好強 講到尾妳真係叻過我好多倍 可以體諒我的天生性格嗎?? 不過冇妳咁叻既女友 我點會有咁好既照顧丫 哈哈.... 妳會願意照顧我下半生嘛... 我...?? 我當然會痛鍚妳愛護妳呵護妳接緊妳的手 拖著妳走埋下半生啦 呢個係我個承諾嘛 我知妳一定記得我應承過妳什麼的 放一萬個心吧 我會做到的 為妳做到最好最好...同時都會給妳最好最好... 妳要相信我呀...
>>April 8, 2010 at 2:20:28 AM GMT+8
|
|
無事嗎?irene佢而家情況如何