| 日記 | 日記主簡介 |
||||
2010 年 9 月 9 日 星期四 【溫暖】 工作生涯第一次 今次係我返工第一次親眼見到既嚴重意外 估唔到架新車落地冇三個月就要大修 眼見佢壓到佢差D斷開兩截 真係有點心寒 發生意外既時間 我係跟緊出事意外既後面第二部車 當時係突然成架車冇哂電 熄哂燈... 幾秒之後...後備電發揮功能 供應有限電比架車 架車先有幾盞緊急燈著 初初仲意為我咁黑仔...又係我壞車 但眼見對面線架車都係咁 就知電纜出問題 再望遠少少前前車好似有D不明物體打橫跌響列車車頂 雖然唔係好清楚... 但估緊佢係唔係有意外 未幾OCC就報上黎話我前面真係有意外要疏散搭客 我都係第一次開緊急逃生梯比乘客落車 亦都係第一次要控制人群上接駁巴士 做好所有工序 列車降下"集電弓" 我地司機都係呆等 而我後面仲有一部車響失電範圍 再之後既車就來得切改路掉頭 響熱辣辣天氣架車冇電即係冇冷氣 真係攞我命 我個頭好似識得流水咁 D汗一直係咁流 我地又走唔到 架車冇電形同廢鐵 冇可能救到前車 最後我地都要用工程部既"怪獸車"(其實係路面同路軌兩用既車) 將我地列車向後拉到有電到既位置掉頭 但拉一部車非常需時 因為架怪獸車要調好位置行入路軌先可以進行拉拖動作 第三部車離我較遠 所以佢要首先單獨拖走 之後我果部同前果部就好近 我同幾個工程人員及前車司機一齊推車 由於要進行接卡關係啦 即係我架同前車接埋一齊...再由怪獸車一次拉走 而接卡兩車之間係要有少少速度先可以做到 首先我架車落Break等佢唔會因接卡時比前車一齊推走 六個男人推呀推呀推呀.... "咔"......一聲.....得左 之後由工程車一齊拉到有電到既地方 到左有電力供應範圍 列車升起"集電弓" 繞路行回車廠作簡單檢查 之後再出車 今日.....因為呢件事 我只係走左三轉車就可以收工 事實發生時都有D眾生相 當中有八掛既市民睇我地做"馬騮戲" 仲有好多應該係"鐵路迷"到場影相 我同前車同事都將眼見既鏡頭都一一避過 但偷影既唔知有冇 我地真係唔想做上網人物 真係萬一比人起底就真係.... 放工後...八掛既我走去車廠睇下架出事列車 陰公........新車黎架.... 對門壓到變哂形 車頂部分壓到扁 好彩出事現場有一排工字鐵擋一擋卸走大部分重量 如果唔係架車一定一定斷兩截 若果照單全收將30噸壓落架車度...肯定會有傷亡 今次算係幸運 出事既編號列車1118...呢架車我都未駕過呀 就咁出事.... 可惜可惜呀 在此希望兩名重傷既客早D好返啦 >>September 11, 2010 at 12:37:20 AM GMT+8 2010 年 9 月 8 日 星期三 【溫暖】 恐怖閃電 今日諗住下午天氣幾好 女友又放假.... 我又放工放得早 就問Philip借左架車一用 一心諗住可以駕住四圍去...週圍去食下遊下咁啦 最後我地去左沙田食粥、元朗食糖水 仲用左大半缸油.."遊車河" 其實之前早就知天氣報告話會有雨 但真係估唔到佢會咁大雨 開初....沙田都係有雨...但唔大...只係落得好密......呢D接受到 只係一出吐露港公路途經上水出元朗就開始有好多閃電 但係得閃電...雨又唔大 所以仲夠姜去左食糖水 食完都冇事雨都係落得唔大...但今次夾雜無住行雷閃電喇 見到天氣都仲OK喎...只係閃電行雷啫..唔怕唔怕 最重要係..連女友都贊成四圍遊下 最後我地由林錦公路出左大埔....即係由錦田出大埔啦 嘩..... 呢段路就慘喇我...後悔都黎唔切 差不多全程都下大雨...落狗屎....傾盆大雨...!!! 架車既擋風玻璃水潑都潑唔切D雨水 最可惡係條馬路 每一吋地方都係有水浸住 做乘客既女友就坐得開心呀 見到架車將D水係咁濺出去.....睇得興奮..!!!!! 但我就擔心喇.....心中不停咁祈求"你唔好壞車先好呀" 更加可可可可惡係D雙層巴士同埋D大型貨車 車身高個車轆又大 佢響對面綫行過D水就濺哂我部車度 P佢個K丫.....架車已經潑唔切D雨水架啦..仲係咁濺D水埋黎 但係女友好似睇得幾興奮咁.....不斷咁......."嘩......" 因為仲有D行雷閃電聲配合住..... 兩者配合埋就好似好有壓迫感咁樣.... 突然呢個時候有剎好光好光好光既閃電... 之後仲來一個好勁好勁好勁既雷 個雷大到我都嚇一嚇 我身邊既佢就更加....."大叫啦..." 跟住唔使兩秒.... 全條馬路黑哂...交通哂都熄埋 估計係個雷劈到D電壓影響路面既電力 真係頓時漆黑一片 見到既只係每架車既車頭燈 可能漆黑一片都太厲害關係.... D閃電見得好清楚.... 真係一條一條咁劈落黎....十分清楚 呢個時候...女友...唔使講...又....."嘩...好恐怖呀" 我話我仲驚呀.... 女友話妳做左D咩衰野呀...怕比雷劈呀...? 我話真係怕比雷劈呀 可知我做D規心事....仲未衰到要比雷劈呀 但我唔知我旁邊既妳有冇做嘛 一陣明明劈妳... 劈錯左我好無辜呀 女友立即話....."我做衰野做極都冇你咁多啦...." 之後由我地讀書時代數...一直數衰我到我而家...... 我真係冇聲出....無話可說 一來佩服佢可以一論嘴咁講啦 二來係因為女友講既大部分都係事實...哈哈 我而家先知我係咁衰.... 回到家個天都仲係轟轟轟轟聲..... 個天仍然都係閃電閃過不停 在家打開窗望下......嘩...!!!! D閃電真係忍唔到手點都要影下 真係好勁好誇.... 如果真係做錯事比佢劈一野 真係十死冇生呀..... 仲有.... 今日阿貓咪好靜好安靜 我諗佢自出娘胎都冇試過有咁大個雷咁勁既閃電吧 一定嚇親佢喇我估 呢D閃電...比佢劈一野真係"永不超生"呀. 
>>September 9, 2010 at 6:46:11 AM GMT+8 2010 年 9 月 7 日 星期二 【清涼】 精神緊張 當第三轉車剛去到總站 衫袋既電話就突然響起 心諗邊個咁醒目 知我小休時間就打比我呢 望下電話顯示"無法顯示來電" 正常情況下我係唔會聽呢D冇來電既電話 但係今日算啦.... 反正有時間 如果係推銷既就Cut佢線罷了 誰知原來係屯門醫院打電話比我 話我知要提早見醫生 我提高聲調...問到....點解呀.? 我唔係有D咩事嘛....???? 對方話..."唔係" 只係我地個部門將會搬去博愛醫院 而我呢一批病人係最後一批響屯門醫院見醫生既 為左可以行政上方便處理 想我地呢一批病人早D見醫生 等搬部門時D資料會冇咁多咁亂 我話....."哦......Ok啦咁樣.." 收線之後.... 唔係喎.... 我攞左大假響10月放喎 女友都係10月放 而家要我9月尾見醫生 咁咪打亂左我地既時間表.... 激死呀....一時醒唔起 而家都唔知點改個大假好 女友果邊又唔知改唔改到 我又係咁 真係而家方便你你地屯門醫院 但攪到家下就搵我笨實 但應承左人...而家改又唔係... 唉...!! 睇黎...我或者遲D要入院喇 看看自己有咩想做 未做既 就呢兩星期做左佢喇 嗯...... 好似講到自己"時日無多"咁 雖然個個朋友、同事、女友都叫我唔使擔心 其實 唔擔心就假喇 越近見醫生既日子我精神就越緊張 而家我既精神係歷史新高既緊張.... 但我又可以點丫 況且住院我又唔係第一次 十隻手指已經數唔哂咁多次喇 響呢個時候... 我唯一可以做既係 見步行步...聽天由命吧..... >>September 7, 2010 at 7:35:41 PM GMT+8 2010 年 9 月 6 日 星期一 【晴】 兩個字形容..."煩"、"懶" 哈哈...... 我真係懶得開個Html寫呀 真係好想轉左個日誌佢 搵過方便D既 最起碼較大細粗字、Upload相片都容易D丫 而家下下都要Html指令咁寫 真係寫到眼都盲 最慘佢Html只要錯一個英文字就顯示唔到喎 有時真係寫到發炆憎 Upload相片又要自己放上相簿再打code入去先顯示到出來........ 以上一堆事情..... 一個字形容..."煩" 今日我要打開自己本手寫日記 先記得呢五日做過D乜 不過我都有寫重點比自己知既 所以補日誌既內容都唔困難 只係我個Email有好幾個Friends問 "呢幾日冇既.....呢排都係咁既...???" 一個字形容....因為太煩同難...所以..."懶" 其實我內心都好想開出來日日都打 將日日既大小無聊開心唔開心既事一一記低 間中我有時都會睇返以前既日誌... 當睇完好多時我都會咁諗... "下......有發生過呢D事咩.....??" 細心諗下之後......"嗯...好似係有喎..."漸漸記起喇 之後就幫我勾起憶起連串連串既絲絲回憶 呢D珍貴回憶就係我日日都寫既收成喇 當你記得一件事後就會帶連自己記返好多好多自己都差D忘記既舊事 我成日同人講.... "往事只能夠回味"(呢句話出自一個因癌病去世既病人....當時我15歲住醫院做手術果段日子...) 都有遺憾既.... 就係再早五年幾以前既日誌因為別個網既日誌Sever問題......冇哂 我有投訴...最終事件石沈大海....!!! 其實我都好鐘意呢個地方(我指呢個網頁空間...) 呢度可以見証到我同女友由相見到相戀.... 響呢度可以不折不扣咁找到段段回憶返黎 不過遲D我可能有一排會寫唔到喇 應該係10月份...月頭左右啦 因為要入院檢查 好彩冇事既就好快出黎 唔好彩有事既分分鐘我連個生日都要響醫院渡過 但如果我可以響醫院無線上網既話 我都會日日記錄我自己個病情況 為左唔影響工作 我連個大假都攞左響10月放 個大假比哂醫院....比哂我自己個病假...完全咁奉獻 因為真係唔想比公司感到我長期攞病假 若果咁..我個File底一定會比佢劃花 所以可以避到既...病假我都盡量用大假蓋過佢 今日開電腦先睇到女友個Roster原來響我生日既時候 同樣地亦都係放大假途中 應承妳丫 如果我冇事 我地呢個大假去旅行 就算兩日一夜也好 很想同好真真正正飛出香港 好好地咁再去多一次旅行 其實我都好想多點時間陪住妳 無奈大家要搵食 返工時間唔定時 要夾時間日子去放假走去玩 可真係一件不容易同有難度既事呀 但呢句千真萬確的真心真意的 "我好想多點時間陪著妳...好想同妳好好地去多次旅行..." 咁.....唔知妳又想唔想呢...?? >>September 6, 2010 at 2:48:51 AM GMT+8 2010 年 9 月 5 日 星期日 【暴雨】 大細超 今日放工同女友出去食日本野 即係食刺身同壽司啦 如果有對過元朗既人都知道 近來元朗出名既唔單止係B仔涼粉(其實我覺得B仔涼粉D糖水好普通....好多元朗人都唔會幫襯...) 而家響元朗既日本菜都開始打出名堂 當中有一間叫"田中"既日本食店 星期一到星期七都係咁多人.......排隊等位 我成日開工駕車時 當車駛經到"大棠道"站前 都會不自覺咁望下間舖 每次望我都係咁問自己 "今日唔使錢任食呀...?咁多人既...??" 真係想試下點解咁多人 終於今日放工我地去"認真地"等位 等左個幾鐘..仲要搭枱食 我地係咁叫.... 叫到成枱都係 唔好誤會 因為有兩枱人 我同佢地....兩家人 一齊食物差不多同時間上枱 攪到好似滿漢全席咁 真係唔覺意都會夾左人地果件 果然..... 阿小妹妹.. 果真係個好鬼可愛女孩子(我估佢得六、七歲左右...) 真係夾走左我地件壽司 當人地家人知道攪錯食錯後 係咁幫佢個囡道歉 仲話...呢碟入佢數啦 以女友既性格點會入佢數丫 女友仲同小妹妹講 "鐘意食..食多件啦.."姐姐請妳食丫 我心諗....... 呢碟係我叫架.... 本應係我食架 咁我食咩呀....? 得一碟係三文魚刺身壽司拼盆 妳豪左比人 之後人地媽咪同佢個女講... "妳應該點做呀...?人地請妳食食喎...?? 個細路女講..."多謝" 佢媽咪話...咁多謝邊個先得架...?? 個細路女再講..."多謝姐姐" 佢媽咪之後向個囡"更正"話要咁講... 多謝"靚靚姐姐"啦......姐姐咁靚靚..!!(阿Irene姐姐...妳果刻有冇飛左上月球呀..?) 小妹妹講左多謝"靚靚姐姐"後 就連最後果件都比埋佢食 一句"靚靚姐姐"就比左碟人(好明顯係中左"靚靚姐姐"既降頭啦....) 我之後話.... 阿靚靚老婆呀.....我可唔可以叫多碟呀 我暗示少左一碟 女友就話.... 食乜丫....生冷野呀 食"蟹子沙律"好喇....(緊係啦...差三份之二價錢喎.....) 就係咁樣..... 我碟"三文魚刺身壽司拼盆"變成"蟹子沙律"......(無陰公囉同委屈囉我果刻覺得...) 唔知呢D算唔算大細超呢......?? 人又讚妳靚 我又讚妳靚 人有三文魚食(心諗...有時妳都會買三文魚比肥貓咪食啦....) 我就食"蟹子沙律"......... 仲要唔係"蟹子沙律壽司"連舊飯都冇埋.....係淨"蟹子沙律"..... 唉..... 食完呢餐真係心都淡呀.....!! 不過....食完之後 都肯主動叫我返我去"石磨坊"食個甜品 算妳啦~
>>September 6, 2010 at 2:43:13 AM GMT+8 2010 年 9 月 4 日 星期六 【颱風】 團結既同事們 其實呢單"馬尼拉人質"事件 都已經算係告一段落 生存既我相信佢地會努力活下去 受傷既我亦都信佢會捱到好為止 過身既...都已成事實..不可改變 雖然係殘忍既答案 但事情點都要面對 或者針唔拮到自己肉唔知痛 我不可以代表佢地講說話講感受 有句話好老土既 "時間可以沖淡一切" 千真萬確的名言 受害者當中有個姓汪既 係港鐵職員 公司內部已經設置左個捐款箱 比所有有心同事出一點心意 當女友知道有呢個捐款箱後 比左200蚊我..叫我入落個捐款箱... 咁同樣地我都入左200蚊落去 前後400蚊 我眼見個箱都塞入滿滿既錢 証明大家同事們都好關心佢 我眼見有好幾張1000蚊紙呢 人地話香港人... 人情紙咁薄 其實都唔係既.... 我地都有團結既一面呀 看到大家同事就知啦 大家素未謀面.... 但都肯盡自己既小小心意 在此希望公司真係講信用講口齒... 會盡力照顧同支援佢地仔女啦 唔好講一套做一套先好呀 >>September 6, 2010 at 2:42:24 AM GMT+8 2010 年 9 月 3 日 星期五 【乍寒還暖】 我信我可以做到 今日返工.... 做388既車 即係不載客..發達車 走遍全線收錢箱 其實我幾鐘意呢個Duty 走遍全線唔會悶 當架車行到"山景北"站時 我就諗起以前既事 當年....我就係響呢度同前女友搬新買既電腦去我地錦田間屋 我眼前既 所有景物不變 但人面全非 早排返去錦田舊居探包租婆 望到自己間屋已經租左比一對新婚夫婦 據悉佢地係等抽公屋 用呢間屋住到....抽到公屋上樓為止 我八掛從窗望入舊居 D間隔冇咩大改變 同時令我諗起好多以前事 其實...我好想忘記以後既野 但自己個腦不由自主咁諗起 "我不可以咁架...不可以...唔得...." 而家呢個先係我屋企 我實在唔應該去諗呢D事 因為我知咁會令人唔開心 比多點時間我吧 我會努力Delete自己呢D記譩架.... 我知我可以做到既 >>September 6, 2010 at 2:41:57 AM GMT+8 2010 年 9 月 2 日 星期四 【乍寒還暖】 Expiration Date 一起身....覺得有點不妥 覺得對眼好痕好痛...仲好滾.. 望一望塊鏡照下自己 嘩....左一大聲.... 我對眼.... 係我對眼...唔係隻眼 即係兩隻眼都係咁 紅得好緊要 立即去滴D眼藥水 因為對眼好熱好滾既感覺 我於是將D眼藥水放響冰箱雪左10分鐘 之後一滴入眼 一個字形容......"爽" 仲要搏命咁滴..... 務求要眼睛降溫 滴到好似大喊一場咁 眼藥水好似眼淚係咁流出來 這時 女友從街外買左野返來 一打開門口見到我咁.... "你攪咩呀...?" 我話......滴眼藥水囉 女友話.....支眼藥水好耐架喇 我就...............望一望 My God....!!!!Exp左一年有多(心諗...咁妳又唔掉左佢...??!!) 我正話仲係咁滴添 女友見到我眼咁 問都唔問我就幫我打電話掛號睇醫生 跟住仲話我 "你好鬼死蠢架" 唉........我知(至叻至巴閉係妳嘛...) 但都唔使咁直接架...... 我仲有的多自尊心呀 仲要捉我睇醫生 當我細路仔咁 我覺得似阿媽帶個仔去睇醫生咁 呢個就係家中既"我" Anyway....睇完醫生滴左醫生開既眼藥水就好快冇事 診金當然"媽咪"出啦 大拿拿20蚊呀....我邊有錢呀...!!!!! 話時話...點解滴完眼藥水之後 條喉嚨會咁苦....?? 好惡頂呀..!! >>September 6, 2010 at 2:41:18 AM GMT+8 2010 年 9 月 1 日 星期三 【清涼】 十數年前的暑假 九月一日.... 對我黎講冇咩特別 或者早十幾年前就會對我有影響吧 因為我放完暑假嘛 講起暑假就諗起以前 讀書果陣我真係好憎學校 點解要比暑假作業我地做 話明放假放假 你咁即係叫我放假都要做功課 年年都係三本作業加一個三千字既讀書報告 Form Two果一年仲多左一樣添 就係叫做Daily Writing..... 暑假放幾多日就寫幾多日 當日記咁寫....係用英文寫 當年係阿Miss Chan教.....無錯...當時既佢仲未結婚... 所以叫Miss....而家仔都有兩個喇 好記得當時我響課室 全班同學仔包括我都係苦瓜死老豆咁口 心中係咁問...點解要做咁多功課 Miss Chan見我地反應咁就話 我都唔好過架....你估我改你地D作文唔辛苦架....我唔係只教你呢班...只改你呢班功課呀 我地心諗...咁樣你嫌辛苦又叫我地做...損人不利己.......簡直係毒婦作為呀 我同Philip講...邊個咁蝕底會娶佢做老婆呀...???? 呢句外話啦...當年Miss Chan結婚...向我地公佈....阿Philip真係向Miss Chan咁講.."嘩...邊個咁蝕底呀...!!!"...笑到我丫當時.... 好...講返以前暑假.... 其實由小學到中一我都好有心機做暑期作業 但有一日我醒覺.... 醒覺咩...? 咪係當年有一日佢派返D暑期作業比我地時 我一睇....版版都係一大個"剔"號 老師完全冇認真去改 咁我咁辛苦做為乜 自從果年開始 我就亂咁做.... 尤其係Maths...我直頭九唔搭八既數字都寫上去 只要寫得有條理..好好睇睇咁 懶係好有公式咁 內裡其實完全"不知所謂" 因為我真係"亂做" 亂做既情況係... 例如﹕3 X 3 = 幾多 我會答85x + 32 = 106 , Ans is 120.65....咁樣 果然....我照交亂做..年年都係一個"大剔"....... 呢個行為我係完全冇失敗過 咁除左Maths亂做之外... 英文...3年都係Miss Chan教.... 佢地咁盡職既....我冇得偷雞啦 Daily Writing我寫到手軟 咁講真....我唔討厭英文科 而中文係母語.....如果都亂做就真係豬狗不如啦 所以我年年Maths都唔合格 而Irene呢.....佢年年都有最低分都攞個C返黎.......巴閉囉.... 到中四中五呢...我就冇作業做喇 唯獨係中四中五呢兩年我係最開心過暑假 回想起..... 我應該多謝Miss Chan既 冇佢逼我地日日用英文黎作文 我而家D英文一定衰到貼地 家下我衰極都可以大概溝通到 而搵工用英文介紹自己、對問對答我都暫時應付到 上次去Dragonair見工..... 都係多得當年Miss Chan逼我而應付得到 亦都係多得Miss Chan..... 我可以內部調職由輕鐵轉重鐵都過到關 今日返工見到好多學生 真係好懷念細個讀書果陣 無憂無慮...開開心心 日日都可以整估坐我後面既Irene先夠盞鬼嘛 同時亦都証明世界真係有"山水有相逢"呢回事 今後我咪比Irene玩返轉頭囉 邊個話呢個世界冇報應呀...? 但係...我甘心既... 題外話啦.... 多得Miss Chan....當日改日誌名我都唔知改咩名好 咁啱就係諗起Miss Chan....當年比我地既功課叫做"Daily Writing" 所以....自始我既日誌都叫做"Daily Writing"喇.. >>September 2, 2010 at 5:06:38 AM GMT+8 2010 年 8 月 31 日 星期二 【清涼】 還是自己個好 Annie 今日飛返香港 約左我女友食飯 兩個好姊妹又響度八埋D公司謠言...是非多多 妳一句佢一句 人地講三個女人先一個墟 家下....兩個女人已經一個墟....口水多個茶 頂佢地兩個女人唔順 Annie男友George今日Dayoff 昨日先同George一陣做同一條線....706線 大家同工既..都係司機 佢就可以放假 我就返工做到死 唔公平呀 都唔知邊個契弟編更架.....!!! 女友同我講.... 過多幾日你都放假啦 羨咩慕人地放假呀...? 我話......邊個話要我放假啫....??? 我要佢同我一齊都係返工...冇假放......咁就公平喇...!!!! 女友聽罷睬我都嘥氣......眼尾都費事望我 講返起George啦...佢都同Annie拍左好一段時間既拖喇 當日攪Party諗住可以令阿Pat同George一齊 點知反而綴合左Annie同George佢地 不過...阿Pat咁好樣.....大把男仔追啦 而家阿Pat好似同個空少一齊.......(我都唔係好肯定...據好早期女友咁講既...) George今日到機場接Annie 所以George同Irene兩個一齊出機場先 到我放工先至出機場會合大家 最後大家去二號客運大樓食飯 唔覺唔覺大家傾左幾個鐘 我地問到George幾時結婚呀?? Annie即刻話...."你地未結我地點敢結呀..." 我話...妳仲以為自己十八..廿二呀 點知...比佢"過左我兩楝" 話我......妳兩個都年紀大過我呀 問返我...."你地幾時結至真呀...??" 我就....."哈哈哈哈哈哈哈哈哈哈"......咁當係答左 呢個答案擺明hea佢啦 其實真係有D壓力呀..... 不過..真係喎 四個之中..最大係我(我講年紀呀...) George同Irene...同年同月唔同日 阿Annie年紀最細.... 不過我都唔係省油燈架 我都話返阿Annie..... 妳個樣都好似同我同年咁乍..... 唉....... 今日先知.....阿Annie都幾粗魯 聽到我咁講真係起飛腳踼我 好彩佢制服條裙係條窄身既裙 挾制住佢踼得唔高 如果唔係我屁股都真係中招.... 嘩......比佢果對高踭鞋伸我一腳 我真係聽廁所都唔使去呀 真係替George擔心 相比之下..... Irene就斯文好多喇 嗯......都係自己既女友好...... >>September 2, 2010 at 5:08:16 AM GMT+8
|
|
無事嗎?irene佢而家情況如何