| 日記 | 日記主簡介 |
||||
2010 年 12 月 7 日 星期二 【颳風】 瞓唔到覺.....!! 最近唔知發生咩事 坐巴士送女友返工放工時 真係無論係送返工定放工 我都可以響巴士上瞬間瞓著覺 以前我真係唔會上車瞓覺 因為我怕有意外時我來不及反應 但而家...!!! 咁都唔打緊喇 返到屋企竟然瞓上牀係眼光光等天光 想瞓...瞓唔著 響巴士唔想瞓....就瞓得著 最慘情係自己夜晚瞓唔著時 Feel到個胃好似好多胃氣咁 覺得想嘔想嘔咁 自己都唔知自己想點 總之我就好辛苦... 今日本來諗住做盡所有家務 做到倦就容易瞓 點知.... 係做到倦呀 但都係因為個肚唔多舒服 瞓覺又瞓唔到 我開始發覺係唔係因為D藥問題攪到我咁 我真係出院之後冇好過 唔係呢度唔舒服就果度唔妥 呢一刻.....凌晨三點三 我諗住開電腦睇到我倦 希望可以幫我入睡... 而家冇野望 望有個人可以一棍扑Q暈我 等我可以好好地咁瞓一覺 有邊個肯做"棍手"?? >>December 8, 2010 at 3:19:24 AM GMT+8 2010 年 12 月 3 日 星期五 【颳風】 Office Hour....我受夠喇 放底成個星期冇掂過既日誌 差D連網址都唔記得(Feel到個腦得返386...Load唔到任何野....) 查實唔係自己字窮冇野寫同記底 若要記底既話就真係三百頁原稿紙都記唔完 講下點解自己咁耐唔上黎喇 事關我實在難以適應九半五半既生活 一早起身同人迫車.... 扒街....地鐵真係多人企到呢....(唔好諗有位坐....有位企已經要感謝主...) 有一次夠膽死要我等三躺車先上到 去到九龍灣站仲要同人鬥快.....勁步咁走返去 返工日日對住部電腦... 返到屋企我跟本討厭電腦呢件電器 莫講話要我打日誌... 我連按制開機既意欲都冇 到Lunch Time又係屈響Office過 放工...又同人迫車 咩...彈性上班時間喎...!!! 我咁搭車法.....點彈返工放工呀...開玩笑啦 有時遲到三、五分鐘 個死女人問我"咁遲既...??"(笑笑口問....藏刀果隻..) 我心諗......咁搭"趕鐵"...我九點三十幾分都彈下彈下咁彈到返來咪算係咁囉 仲想我點呀...? 有時發覺個女上司真係有病 我真係..好懷疑佢係荷爾蒙分泌失調、內分必失敗....一出世佢就更年期....!! 唔怪得佢三十到尾都冇人要......嫁唔出..!! 呢排Office又有同事病 一個傳一個 終於都傳到我身上 鼻水、喉嚨痛、頭又似發燒咁 我真係想問....."我有冇得賠工傷...??!!" 而家我先服左D返朝九晚五既打工仔.... 有朋友問我....你舊時返444..又唔見你阿吱阿咗..(444即係凌晨4點44分) 點同呢..... 我唔使同人迫.....成條街我行..霸鬼哂打橫行都得...鬼影都唔會同你爭路 我返444仲會有精神動力喎.... 下午點半鐘可以收工 加上做繁忙時間...時間快過到..不知時日 好....就算要我返下午時間...我可以瞓到中午....太陽高掛日上三干先返工 放最尾車又少人D......飛站都冇人理(果次係好彩啦....連飛三個站..冇人投訴!!) 一句講哂..... 我唔鐘意甚至討厭Office既生活 好想快快手食哂D藥.....拿拿臨歸位(好想掉哂D藥...再賄賂醫生開醫生紙証明我係Ok...) 聽同事講已經有一架第一期列車返新左..... 據悉架車改到好九唔搭八咁.....(我真係好想睇下有幾九唔搭八...) 但我連返去屯門Depot既機會都冇 來緊星期六 我短週呀 好想好好咁瞓返一覺 今日女友叫我陪佢行旺中 當然心中十萬個不願意 但好清楚女友唔得罪得..你夠Pop就Say No..!!!(女友保祐你Say Die...黎丫黎丫..試下Say No丫) 但係又鑋係好似好耐冇陪過女友行街 頂硬上啦 卒之咪冇左半條命囉.... 感覺仲短左兩年命添 唉...... 呢個幾月賺既人工..... 有血有汗有淚呀.......陰公..!!! >>December 4, 2010 at 2:28:03 AM GMT+8 2010 年 11 月 24 日 星期三 【微冷】 打算、計劃未來 前幾天同女友一齊執大細黑 比佢準備做呢一"水"機 將會三日兩夜唔會見到女友佢.... 執行李時...女友問我 喂...其實而家我飛走左..你仲會唔會掛住我，想我快D返架? 嘩.....妳想我點答喎 答有.....一聽就知係講假啦.. 答冇.....就聽死添啦咁講法 咁我會點答好呢...?? 我話......我會擔心妳去到會點囉，如果妳冇事我咪放心當係妳去旅行囉 話到尾..呢份係妳既工作...我都冇得擔心太多嘛 況且妳一向好有交帶 妳會上網Msn或者E-mail我嘛...冇得上網妳都會打個電話比我架嘛...呢D我地一向有共識啦 女友又問我...如果我冇打電話返來呢...?? 我話..咁我咪打比妳囉 電話搵唔到我呢咁....? 嘩...玩野呀..!!!邊有咁多如果呀..??? 我話...如果再如果都有任何問題..三長兩短呀咁 我最多咪不顧一切咁溜夜飛去搵妳囉 還以為呢個答案會令女友不滿添 點知女友聽到我咁講竟然會微笑....仲話"使唔使咁認真呀..??!!" 但到底女友內心真係滿唔滿意呢個答案呢... 我唔知...!!!問...女友佢都唔講... 哈.....果一刻真係唔知女友想講乜同想點...?? 不過.....呢一條問題令我諗起以前..好早果時...應承佢既事 總之都係果句..."對佢好D啦" 始終應承左...承諾左既就要做嘛... 放工後.......我同D"新同事"出去Starbucks飲杯咖啡 對方話將會結婚而家想話睇樓買樓.... 我就同佢一齊睇下價啦 結論係﹕點買得落手呀...?? 其實應該咁講﹕點買得起先啱 我睇過一個最誇張既係...22800幾蚊一呎 間屋仲要唔係淺水灣同半山區喎 只係座落響柯士甸道西.... 高層望到個海咁...最記得佢係標榜"煙花海景" 無敵海景都唔夠Power呀...鑽石海景都Out喇....而家要"煙花海景"(心諗...一年有幾多分鐘煙花你睇丫....!!!) 呢個單位1400幾呎....7年樓齡 閣下自己乘下要比幾錢先買得起...?? 31920000..!!!!三千二百萬咁滯 痴線架... 扖佢個街丫......呢個時勢都有錢買起呢個單位...呢D人因住收尾果兩年囉....!!!(唔抵得人有錢買...純粹...!!) 我同女友都諗過買樓 死慳死儲而家都仲係"掹車邊"都未必上到車 就算上到車都唔知架車仲唔會等埋我咁 有時諗....做人為左乜呢..?? 真係呢生呢一世為個錢而去做奴隸嗎... 2011年我地要諗結婚既事喇 望真自己....年紀都唔細喇.... 當80後既我地真係慘..... 做乜都難過人...買乜都貴過人...但係得到既又少過人 但難都要做架...!!! 已經商量好婚紗相去邊影、留意酒席、問下過來人點攪個婚禮...有咩傳統...!! 仲係唔係要抽住個椰子掛住個金豬既年代呢...?? 而家仲流行度蜜月嗎...??如果真係度蜜月去邊好呢..?? 女友果邊既朋友大多數都係去日本、韓國 但係我有提議.....我想去荷蘭..!!呢個係我一直好想去既地方 大草原、趕羊、睇風車......一個我好渴望既旅行 似乎...一切好似想得太早咁... 但自己又聽到自己講...."諗定都啱架喇...!!" 女友點對自己..心知啦!!! 自己應該點對返人....識做啦..!!! 呢一刻我又諗..... 假若我煩完結婚...之後又會煩D咩呢....?? 生BB...??真係想得太遠咁喇... 若然可以娶到呢個女友做我太太既話....... 將來會唔會好幸福快樂呢...?? 能唔能夠擁有自己個憧憬既婚姻生活呢....?? 嗯....."女友"......妳點睇呀又...?? 正話同女友出左尖沙咀睇燈飾 今年D燈飾好靚好童話Feel咁 拖住女友一起海旁漫步 沿途見到好多小情侶拖、抱、攬、錫...... 女友指指人地向我講...."睇下人地幾咩咩乜丫......." 老老實實....要我當眾做呢D事真係好難為情 但我最後有冇當眾咩咩乜.....你地估下啦!! 不過我同女友都好同意一件事 當我地望住維港夜景時都會好慶幸自己生於香港 真係望住個景...自己真係會覺得作為香港人...而感到驕傲 這一刻..... 女友身體挨向我..手執住杯熱騰騰既咖啡 而我就撓住女友手臂.....一齊望住呢個夜景 講﹕"點解冇帶相機呢.....!!!"(嘆氣....) >>November 25, 2010 at 2:17:04 AM GMT+8 2010 年 11 月 18 日 星期四 【微冷】 蕃茄肉碎通心粉 返九龍灣開9放5呢D時間 覺得生活有規律左 其實響醫院已經習慣左佢地既時間 7點食早餐.. 12點食午餐... 17點食晚餐 19點會派個所謂"宵夜"比你 其實都只係一包脫脂奶同一包梳打餅..係咁多!!!! 以上就係政府醫院病人既食飯時間... 陰公呀....我足足捱左一個月有多呀響醫院...!!! 以前(即係個零月前啦..)...若果女友在家不用返工就會煮好出黎..... 我真係可以話係..."等食...." 而家放工有時間可以陪女友一齊買餸..... 咁都算係拍拖丫..係咪..? 行行下買買下餸口痕既我地都會食DD野 多數食一個蕃茄肉碎通心粉.....兩個人食一碗(18蚊兩個人食...茶都蝕埋比我地呀...餐廳老世心諗..) 唔係我地懶煙韌....你一啖我一啖...唔係唔係 我地好衛生既 係問侍應攞多個碗.....一人半碗Half and half..... 點解食咁少....?? 每人食一碗返去仲使食飯既....???(女友佢開始成個阿媽咁喇D口吻...) 嗯..... 就係呢一碗"蕃茄肉碎通心粉"既問題...開始喇 每次食我都覺得好好食.... 咁本身我都鐘意食蕃茄既 於是我昨日照版煮碗咁整一個"蕃茄肉碎通心粉" 當然係失水準啦....女友話直頭係失敗啦....(好大打擊呀...) 唔好食係因為....太過水...冇左蕃茄本身既味、又煮到爛哂D蕃茄、肉碎又真係碎到無可再碎 總之一句講哂....食香味完全唔合格....(連我自己都覺得) 但我唔認.....!!!!!!!! 於是我歸根究底係話...."人地個廚房夠大可以做到我做唔到既野..." 女友問...."例如呢...?" 我話人地個爐都大D...煲都多個人...佢地可以一次做哂好多野嘛 我響屋企得兩個爐頭......邊有得煮呀...?(我都知我擺明係賴啦..) 其實到而家為止我都覺得"蕃茄肉碎通心粉"係好易整 深信自己雖然有問題..但係我唔係最大問題果個 我都係覺得廚房唔同人地餐廳廚房..先係最大問題 我雖然屎...但都冇咁屎到貼地..... 我相信...最大問題"唔係我" Ok.....隔天(即係今日啦) 女友佢唔比我入廚房 但係比我睇有咩預先既材料去整一碗蕃茄肉碎通心粉... 唓....!!!D材料咪同我一模一樣.....!!!(仲少左一隻蕃茄添呀...) 女友佢趕左出廳...仲叫我入房....要我廳都唔准出 荒死我會偷師咁 半個鐘頭後....有得食 我望住女友個完成品...雖然唔可以同餐廳比較 但個味都有9成似.....而個樣都好好睇 起碼我仲見到D蕃茄先...(真係可以有蕃茄碎肉醬響個通粉上面咁...) 而食落去..我係會唔介意飲埋D湯既..... 我好懷疑女友的我入房係...方便佢叫個外賣.. 叫個蕃茄肉碎通心粉外賣上黎 我頂....!!有冇差咁遠呀....離哂譜呀 我真係咁唔掂...? 我從來都覺得自己係不過不失喎..煮飯呢方面 但點解我整既可以煲到D蕃茄肉碎爛哂...攪到D湯好濁..好難睇 我整既食上黎就知係落左好多雞粉... 但係女友整既真係仲夾到蕃茄之餘....湯係比人感覺係"飲得架"(真係蕃茄清湯咁架...) 而果D通粉真係入到D湯係有味既..... 我唔識用文字形容.... 我只可以話同我果D真係差好多好多倍(地球同火星咁遠既距離...) 唉....連我親手整果煲通粉既湯..我自己食都會係避湯只食通粉.... D蕃茄湯我係要倒架......係唔飲得架.... 我問女友點整.....死口都唔肯講 要我自己諗下響咩地方改善下再入手做 之後講講下仲話..... "咁都好喎...如果你自己整唔到整唔好..我就唔肯唔會嫁比你..!!!" 喂....好大件事呀!!! 有冇人幫手..好心話我知有咩竅門架... 我唔想死響碗蕃茄肉碎通心粉度呀!!!!! >>November 18, 2010 at 9:38:04 PM GMT+8 2010 年 11 月 13 日 星期六 【微冷】 改變模式的工作 自從暫時性轉左職位後 每日既生活都好似好死版咁 你問我係唔係真係一D事都冇發生呀咁...? 我可以話你知.."係"..真係平淡工作得離譜 以前Train Captain就話多事幹面對同發生(好聽哩!!自從MTR接管後，我地唔係叫司機咁普通架...我地叫Captain架...唔講人地以為我係飛機師添呀...) 而家響個Office度真係可以用無驚無險又到五點來形容 唯獨有D野唔同就係放屁比較麻煩D(雖然係核突D，但呢個係最大對比....) 以前響車..放得幾響幾大陣味都冇人知 就算知....係我放架...又如何 落左窗簾又隔住玻璃門窗.. So What...吹咩....入來笑我打我一身嗎!! 但而家就... 放都唔敢用力 忍到都忍... 忍唔到就走去洗手間攪掂....順便交水費添呀..!! 係囉....,而家既分別就係唔使等埋站搵廁所囉..方便好多..!! 但比我選擇...我都係寧願駕車冇咁納悶 而家.....咪日日打電腦做最簡單既野 資料整理存檔、Hard Copy轉Soft Copy咁 不過有時D資料仲係Confidential...巴乜閉架 開頭都會八掛下...嘴嚼下D文字..睇下有幾咁Confidential先.... 睇睇下都冇心機睇..冇興趣睇 有時都唔明點解果D普通文件都要叫做Confidential.... 呢D日子我學識用影印機...放大縮小、底面影、A4紙印成A8既大小、用影印機FAX....冇所不能 走下印表機法律罅...即係如果想印好多通告... 咁可以用A3影個Double再用機切成一半....成為兩張A4紙 因為影印機都有數要開..慳得就要慳 響Headquarters知道左好多MTR部門既人同埋事 舊底我地呢班KCR既舊人可謂對佢地MTR原有作風一無所知咁.... 只知佢地做事作風"麻麻煩煩..多多事實..懶有制度..有原則...有規律"等等 真身體驗後只可話MTR果邊真係確實係"麻Q乜X煩" 仲有呢....我個Staff Login多左好多功能 可以查到好多野同做好多野 雖然話呆響Headquarters做事係悶 但係另一個角度看我會知道同埋學到好多野 咁第時轉工我都叫有呢D經驗丫.... 學多樣野..冇壞既... 只不過...我仍然個心仲係想走想離開 咁...我亦都唔排除我自己做耐D會唔會鐘意呢個Post 或者可能有野令我唔想走都未定 今日唔知聽日事嘛... 出院後有幾個朋友都問我.... 我係唔係真係咁多藥食...要食咁耐...?? 攪到要暫轉職位咁麻煩呀 咁我就比D相你地睇 睇下我係唔係真係咁煩咁頭痛 順便都比下我住院照過你地睇下吧 呢個係我住既Ward...影呢一日係得兩個人住...包括我在內 
我呀....藥物敏感呀...!! 
嗱....藥呀...多唔多呀..大部份都係食完唔可以駕駛同操作機械呀!! 
哈...!!我住院時..我表弟知我鐘意飲呢隻烏龍茶，一口氣買左5支比我，真係感動@@ 
睇下D茶...900ML架...差唔多一升咁多呀!! 
呢一餐係我請假出院，女友同我食飯慶祝我生日既一餐，呢碟係我既...!! 
而呢一碟係女友既!! 
>>November 14, 2010 at 7:50:27 AM GMT+8 2010 年 11 月 11 日 星期四 【微冷】 新工作環境Headquarters 心情真係麻麻地.... 出院後心裡都係唔太開心 響工作上因病而影響左我自己 我暫時唔可以掂列車載乘客 因為我食藥....法例上我響公眾地方係唔可以駕車 而家我每日都係返去做文職工作 仲要出到九龍灣總部開工 唯一好處只有唔使著制服 只要掛住張証響身就可以在總部打滾 但係我真係好唔習慣用著住套老西返工囉 西裝著suit真係一D都唔襯我... 就連自己都覺得著左好似"篤眼篤鼻"囉....好唔自然... 開初只係以為會死守響屯門Depot內工作 估唔到隔數天就調我去Headquarters返工 做聽電話、整理內部文件存檔 例如係職員既車務時間表、維修記錄等等好多呢D"濕星"文職工作 亦都因為咁我先知自己打英文字係好慢 見我身旁果D靚靚又後生既OL同事打字打到好似機關槍咁快 當堂無地自容...直頭要搵窿捐咁滯 真係後悔我寫CV果陣話自己熟用Microsoft Office......!!! 而Lunch Time晏晝就同D靚靚既OL....一齊同枱食飯....(羨慕哩...嘿嘿嘿) 我覺得只係以上個Point、同埋返9-5時間係好之外...其他對我來講都係不濟... 我真係唔適合做文職呀..... 真係做到有如老鼠拉龜咁辛苦 返工地方又遠...(屯門出九龍灣喎..!!!) 而來到報道左先知九龍灣德褔商場食野係幾Q咁貴..(每日我得60蚊零用錢乍..我要加零用錢呀!!) 咁的話....睇黎我都要千里帶飯去食喇 但係我而家返工呢層個茶水間係連微波爐都冇(得部水機、乾糧、沖劑..) 然而帶飯去食... 若果要翻熱的話... 我要一個人攞住盒飯去搭Lift上去兩層叮熱佢再搭Lift落去Office食... 一個男人攞住兩個花花圖案既飯盒..... 比男同事同埋D靚靚OL見到...前途盡毀啦我 不過如果你係鐘意做文職工作的話.... 呢個工作地方係一個唔錯既選擇 但...但如果.....若果我一直都要食藥咁點...?? 我係咪以後都會面對呢D文職工作..!! 真的話就真係...My God喇 坐Office工作真係令我勾起當年我響社區中心活動助理既日子 令我回味到好多當年差點兒就忘記既畫面 現在同呢班同事一齊共事..... 感覺佢地個個都好Nice...好肯幫我同教我 只可惜我始終唔鐘意呢類型工作 要我長期投入用心做...冇可能..!! 但從另一個Point睇令我開心既係...識到呢班新同事 試諗下...一向在屯門元朗天水圍穿梭既我 竟然可以識到九龍灣Headquarters既人 感覺有點神氣同得戚添呀 昨天食Lunch時佢地都對我屯門Depot既事好有興趣 因為佢地冇幾可可以響屯門返工嘛 佢地又會講下Headquarters既事我知 大家都會好有話題傾計 不過三個女人一個墟 即係話我工作既地方係好多個"墟" 工作時候既我有時都會留意下D同事做D咩 發覺個個女仔都係成日照鏡補粉 我先知原來女友都係"正常"...而且唔算過份添喇 之但係我工作既地方得三個男人..(計埋我) 而當中兩個都已經結左婚 心諗...唔通係難到係特登化比我睇...?(發夢啦..!!!!!!!) 話說回頭.... 我包藥仲要食足一個月有多.... 仲要唔知覆診完仲使唔使繼續食喎... 如果繼續食...我就要一直留響呢度...!!! 我真係唔願同甘心做文職工作 其實我都有目標架 我想我有一日可以做"教車"既阿Sir 如果不幸我要一直坐Office下去 我的目標就泡湯喇 但我昨日聽到就算我可以駕車 都要進行溫習訓練合格後先得.....(我有信心啦.....話哂都有幾年經驗嘛...) 真的話....我又要再次掛B牌出去做學神(路線牌寫住"司機訓練"四個大字) 唉....但係我感覺比D師弟師妹見到我做"BB".... 一定瘀死我囉 要開工喇....... 返工時間打日誌....(我想死頂搏炒想攞大信封頂喇) 講到尾..論知排輩始終呢度最細最卑微係我(但論年紀就....!!!!!) 打日誌呢D事.... 寧比人知莫比人見吧.... 對嗎.. >>November 11, 2010 at 11:21:11 AM GMT+8 2010 年 11 月 7 日 星期日 【微冷】 呢一刻的感覺 終於都肯動手打字... 瞓左咁耐醫院 體驗到好多事 見到有人去世....家人喊到呼天搶地 見到D病人好痛好辛苦.....晚晚不停咁呻吟叫痛 亦見到有D人....打止痛針打上癮 每隔四個鐘就要叫姑娘開針打.... 政府醫生比我感覺唔係太好 問佢幾句..答一句 仲要答D我都知既答案 我向女友講...醫生咁咁咁...都唔願幫我咁.... 女友立即走去Nurse Station找姑娘約醫生見佢 好記得女友果句..."咁串..!!等我會一會同佢交下手..!!" 好似講到要打架咁 是自己太笨不懂得急轉彎去問問題吧 我見女友真係句句都啄住佢問....客氣中又住強迫既技巧...!! 醫生都比佢問到...怕左佢話"好吧...我寫底比姑娘知..叫佢聯絡其他科專科醫生跟進我啦" 醫生都再唔敢怠慢對我... 我亦都好記得女友向醫生講最後幾句...."唔該你呀醫生..真係唔該哂...咁你就跟緊D啦...麻煩哂....今日見到你真係開心....真係唔該你麻煩哂你喇醫生..." 說畢時...已經係探病時間 女友安慰我.."得架喇..醫生已經好清楚講得...會有幾個專科黎見你...安心點休息啦...唔好諗太多野喇" 住院期間...女友真係好頻撲探我 放工立即黎又試過...探完我返工又試過...放假探足我兩段探病時間都試過 咁多日...除左不在香港的日子之外 呢段住院日子...女友都會探我 有時仲會好似入貨咁買好多零食比我 我既儲物櫃內......從未缺過糧 入院初期.... 我經常要打針、吊水、做檢查.....真係好辛苦 有一次係要入手術室做....要抽身體內組織，需要全身麻醉做檢查 出到來吊住一架機兩包水一包血一個BP機，仲要聞氣.. 那刻好辛苦...我都唔知點解我要咁 病..真係好辛苦 我仲要係唔知咩病...去搵原因就更慘..咩都要檢查 有一日我記得女友向我講左句..."我見到你咁都唔知可以點....我都好心痛...我真係唔知可以做D咩.." 那一刻好都好想講...."放心啦..我冇事"，但係....我咁樣點說服自己話冇事丫.. 過左好多既檢查.... 得出其中一個結果係先天性血液缺少其中一隻蛋白質 而且會有遺傳下一代既機會都好大 有一日既探病時間我問"咁點算..?" 第時我地生既仔囡都會有機會咁...點算好? 女友話.."而家好多野都可以懷孕前知道會胎會點...有咩事都會知...呢D遲D先講啦...最多我地咪唔要BB囉" 唔知點解我覺得女友要講呢句話....我覺得佢要好大勇氣 一個好想要自己仔囡既女人...講"最多我地咪唔要BB囉".........我真係唔知女友心情會如何難受...我心好唔安樂 我覺得好似比命運作弄.... 女友將來要懷孕都已經係一件唔容易既事，再加上我呢個遺傳......真係想我們放棄嗎..? 我硬係覺得女友自從跟我一起後....我帶左好多霉運比佢...佢真係從來冇好過咁 或者我覺得女友佢唔應該受呢D苦.......陪我捱，我好似係一個比唔到幸福比另一半既人咁 真係好氣餒囉 出院後.....十幾包藥要我食 藥物標明"藥物或影響駕駛或操控機械之能力" 我而家唔可以駕駛...!! 返到公司做埋D行行企企...點數目、Mark保養既工作......每日對住三四十部車...Mark,Mark,Mark.....check log book 有醫生紙又如何...?? 發生咁既事我下一次....我都唔知公司會唔會仲續我約呀 如果真係到時冇野做我都唔知點算好 而家只希望呢D藥可以快D完左個療程 唔使食呢D藥.......我先可以再投入工作...復工有望 多謝我入院時探過我、打電話向我問好既朋友 入院呢一個月真係辛苦左家人.... 辛苦左自己既女友 妳向我話...呢D係"我應該架嘛" 其實我都不知"應不應該"....但真係呢37日裡面真係好感激妳 呢37日妳為我做左好多好多大大小小既事 其實.....好想問多妳一次.. 比妳揀多一次..妳仲會再咁揀嘛.......?有冇丁點兒的後悔....? >>November 8, 2010 at 3:56:31 AM GMT+8 2010 年 10 月 31 日 星期日 【微冷】 2010 年 10 月 30 日 星期六 【微冷】 2010 年 10 月 30 日 星期六 【微冷】
|
|
全身都好痕呀……好辛苦呀……藥丸又未夠鐘食，藥膏又搽哂,新既藥膏又要等朝頭早先可以叫藥房開……痕到想死呀…！
無事嗎?irene佢而家情況如何