2011 年 4 月 3 日 星期日 【晴】

開心與痛苦之間

近呢幾個月真係冇咩好心情

唔好話打日誌

連做任何事都冇心機

本應一心諗住睇下醫生

誰不知叫我入院Check清楚點吧(使唔使咁認真呀醫生....??)

我想話....唔使喇

點知...女友搭嘴話﹕『好呀....醫生...幫佢Check清楚啦』(我呆傻眼抬頭望實女友....妳攪乜呀想...)

我一刻間真係....

我心諗....

我唔使返工呀?

唔使食呀...﹖

我同女友講....醫院住好悶架

女友話...我一陣出去出部Iphone比你入院玩啦...!!!(我要出院..我要自由...我唔要Iphone呀....住入去我真係..."I瘋"喇)

我.......我唔係貪要部電話呀

我係好悶呀響醫院

女友話....忍下啦...你都想好架..﹖

咁......

我仲有咩好講丫

上到病房....

環顧病房....個個都係上年幾既

唯一令我可以留意係

有個學護....化左個好濃既妝

呢個都唔緊要.....我理解既

但係..佢化完都唔係好樣得去邊

佢仲要條裙鬼打咁短添

阿姑娘仔....妳Year Two乍喎

咁快想釣個醫生仔，做醫生太嗎﹖

但點都好啦

佢兩個星期響病房...都令好多男病人"賞心悅目"既(包括我....饑不擇睇、饑不擇望嘛..)

講到我個Case Medical Officer.....簡稱叫主診醫生

我比醫生點我Check呢樣同果樣

打針打到我麻目哂

插喉都插到我怕

我諗我響醫院照片既輻射

仲多過我而家去日本走一轉

最後.....住左咁多日

醫生話

你呢.......暫時呢....都....一切正常.....其他呢......報告冇咁快出

但我地同其他醫生都開過會.....都認為你既報告都應該係樂觀既

果D野(組織)呢....大多都係良性既

住咁耐....成個月咁滯

我究竟做左D乜

驗完我都唔知得到D乜

唉........

不想再提呢班醫生喇..(失敗....!!)

而我住呢間病房

絕對係陽盛陰衰

全部護士得6個係姑娘.....其他全部係男護士(有兩個仲係學護...兩星期後走....實數得4個姑娘...)

但不得不讚既係

個個男護士都咁靚仔(我都佩服....)

女友黎探我......有一日突然問我

哩......果個呢...果個呀...高高地....戴眼鏡...果個...

今日有冇返工呀...??????(心諗....作死你呀....!!!!)

可想而知...幾多靚仔呢

相反.....D姑娘真係

得兩個比較OK(即係冇得比較下得兩個係OK咁解)

不過.....

全個病房既姑娘、男護士都幾好

唔單只係D護士

連D阿姐都好好人

都唔可以叫阿姐

而家既HCA、GSA都好多後生仔女做(HCA、GSA..我唔知中文叫咩職位...)

早果10幾年.....邊有後生仔女肯入去倒屎倒尿呀...做執床同換尿片丫

世界難撈...難怪而家後生既...都要入行

為世所迫既......

講返我呢....響呢間房住左28日(冇數錯手指的話)

我係同其他同房病人一句說話都冇

卒之第27日個阿伯主動問我野

講多兩個....

佢話....後生仔呀...你唔好介意我咁講呀

你呢...有D似"電車男"...(阿伯...你唔係阿伯..我打左你好耐喇....唔介意丫嗱...)

你成日都唔出聲既....!!!!

只係一日到黑睇書

我心諗....有乜計好同你傾啫.....

我同你年紀差咁多....你搵同你差不多年紀既傾啦..我心諗

我呢D"年青人"有咩辦法同你傾啫

我傾呀...都搵姑娘仔陪我傾啦......都係心諗

但係阿伯果刻好唔比面呀

佢話我似電車男果陣...係有個全個病房最靚既姑娘響度

我承認我有一刻係想..."殺人滅口"

講起呢個阿伯.....

唉..........一個字形容"煩"喇

每日都唱歌.....

唱埋D......六七十年代既歌

咩...."賭仔自嘆"呀、"禪院鐘聲"呀

我只識聽到以上兩首

其他果D三四五六七八九十首..我真係聽都未聽過

最可怕..阿伯好鬼愛國

每晚六點半準時唱無線播果首"國歌"(佢差在未肅立同行禮乍....不過若果唔係佢腳有事我信佢真係做得出...)

每晚都唱....風雨不改

你話......我有咩可能仲想同你傾計丫

真係講起呢個阿伯....講一日都會講唔完

其實我仲有同其他病人傾

但全部都係我出院前一日先開口...大家傾

話題....呢堆就正常D喇

可能新入呢一批病人都只係....爸爸級和準婚級

大家年齡距離近D

話題都係....咩病呀、做咩工呀、問下探你果個係咩人呀等等等等

而事實上有幾次女友放工後、返工前來探我

女友個Look呢....連姑娘、男護士都問我

佢係你邊個...???

阿伯當然又唔放過我女友啦

又撩我女友傾計

哈......女友又同佢傾到好幾廿分鐘喎

証明女友心境係幾咁老呢.......

講笑啫.....正常既...佢工作需要就係同陌生人交流

同任何年齡陌生人傾計....都冇問題

不過呢....

響我響醫院最尾幾天

我房有個病人割痔瘡而住院

痛到佢要生要死

佢夜晚要求打Pethidine(止痛針)

但姑娘出去就自行攞支Normal Saline(生理鹽水)

點解我會知哩....(其實經驗之談，好難用字來解釋...點解我會知...)

因為我病床角度可以睇到佢地工作

所以我先知佢

攞支Normal Saline當係Pethidine打落病人度

可能在醫護人員角度睇....我見慣...割完痔瘡邊有咁痛呀

加上佢真係隔6個鐘準時叫打止痛針

覺得佢有玩野...打針打"上癮"之嫌

因為Pethidine真係會打到令人上癮

但如果人地真係痛呢...??

最終個病人典床典足一晚

唉........可憐

個病人又係笨既

半夜打針要護士長對針

跟本冇可能一分鐘前叫

下一分鐘有針打

但.....日頭就未必係...因為有護士長當值返工

咁的確可以話打就有得打

但半夜.......三分鐘內有針打喎(焗一個杯麵時間乍喎....)

做病人都要經驗架......

希望下次佢有機會咁唔好彩...學精一D啦

愚人節我出院

女友要返工

我阿妹黎接我

果個死人阿伯呢就話

"睇下你女友幾錫你丫，工都唔返一早等你出院"

我個妹立即大嚷澄清我係細妹呀

唔係女友呀

我心諗....死人野丫

臨出院都屈我"亂倫"呀

當然我知佢冇心啦

但我知將可以唔使聽佢唱歌

開心死喇

仲有令我開心既係其他病人都會祝福我出院

話...出到去要小心保重呀

叮囑我....出到去要戒口呀....

仲有呀...出到去唔好望返轉頭呀.....

哈哈哈......好似坐完監...出察咁

點都好啦.....我都希望佢地早日出院啦

其實住院咁多日我最開心係出院前一日

我果日先後悔自己點解當初咁自閉.....唉

而更開心係我可以唔使再食其他藥(醫生話可以Cut得之前既藥....)

止痛消炎藥都係有需要時服

仲有醫生紙證明我冇事

我可以返回屯門既懷抱喇

相比起Office...我都係喜歡一個人駕車

而家只係等我幾時可以重新試車...作熟習訓練....俗稱"補鐘"

Pass左我就可以駕車喇

2011 年 2 月 9 日 星期三 【晴】

新既一年又開始

已經忘記年廿六定係年廿七去醫院覆診喇

總之...一去到

大夫話...."你D血指數麻麻地喎..要過一星期再來"

但大夫睇一睇個Time Table

唔得喎.....初一二三都唔開..唔睇症喎

咁你初五先來啦

最後我都要食多一星期多既藥...自行打一星期既針

來到覆診日子

終於聽到醫生話...."嗯....今次D血就靚仔哂喇"

我急忙問..咁仲使唔使食藥打針呀?

醫生話....食多一陣子藥先啦....針可以唔使再打

佢仲好奇問...你好怕食藥咩...?

我話..."唔係.....但若果下次覆診我報告都係咁靚仔...就可以停藥呀...?"

醫生話..."係...."

我只好再等到三月先算吧

話時話....我真係好厭返總部...又遠...都唔打緊...

最惡梗係要對住個日日都係更年期既女人嘛

瞬間又過左新年既一半日子喇

年初一去長洲拜年

見唔到大伯.....(係囉..你年初二去咪好囉....費時見到眼冤啦..)

冇佢既出現...頓覺得呢一年我一定有運行呀...哈哈

只不過

阿嫲嫲就同往年唔同喇

嫲嫲已經唔記得我女友係邊個..叫乜名

但唯一令我安慰係.....嫲嫲一見到我女友....高調咁話"咦....呢個你老婆呀???"(其實我心係不斷咁點頭話係呀..係呀..!!)

女友頓時有點臉紅話...."唔係呀...仲未係呀...!!!"

有一刻我真係懷疑嫲嫲係唔係玩野架.....??

因為嫲嫲又識講...咁你地結婚啦...(臉對臉同我講)

由於屋內人全部聽到"催婚呢回事"

我立即話"係呀.....我等緊佢娶我呀...等緊佢比個名份比我架"(我隻手指向女友話~)

逗得大家都笑左笑...(我反應都Ok丫....)

其實我只想唔好有人再講呢D話題

初一當日響長洲食完晚飯後

我同女友都急住走

因為女友要返工

送完女友返工...我返到家已經成點鐘....

晏呀.....沖個涼...就瞓

初二得我一個去拜年

去婆婆家食飯...團拜

而去婆婆家團拜最重要新年既飯後娛樂當然賭下錢啦

十三張、魚蝦蟹、馬吊、廿一點、三公.......我總共輸左過百蚊

但係新年流流......大家開心....輸錢都開心啦(況且都係輸比D表弟表妹吧....小朋友贏下錢會開心D吧)

回到家又大覺瞓

天光...年初三

我同C4、劉生兩公婆、火麒、成城、輝仔同佢女友....一齊食飯

之後又去左橫州間屋賭錢

同呢班人賭錢真係要既小心又留心....仲要打醒十九分精神

事關個個都係高手高手高高手

十三張......擺得又快..明明副牌好弱架啦...但D牌個勢仲可以嚇到人(起碼嚇到我先丫....)

打馬吊......人地係摸完先打一隻出來.....佢地就唔係...係打一隻出去...再摸一隻返黎

好似預知會摸到咩牌咁

同呢班人打....打得大時...輸得甘

所以我都好小心咁打

講到唔信....我D黑仔打馬吊...打左足足八圈

我D運氣摸手都一直咁順(要乜牌都好易摸得到...手風順到不得之了)

我贏左三千幾蚊

曲終人散時....最後我都好識做

請大家搭的士...(兩架的士架...兩部都係我比錢...)

再請大家飲個早茶

大家又傾左一大輪

輝仔嘆氣話.....都唔知幾時大家先會好似今日咁齊人喇

今日真係難得....響茶樓大家以茶代酒大叫.."飲杯"(四方八面既檯都以為我地呢檯人傻吧...哈哈)

飲茶...埋單....新年價.....一個字...."貴"到離譜

埋單六百幾蚊...(我仲以為我地正話每人食左幾盅魚翅灌湯餃)

總之.....當我睇到張單睇到我好High....張單D銀碼簡直係Big Surprised

但都係果句啦...

大家開心...新年有幾可呢~~

比錢咪比錢囉...最緊要係高高興興

我始終都係開開心心咁埋單

一踏出酒樓門口

個個都帶住疲憊既身軀回家

大家都各有各散...

我地大概係"兵分五路"左右啦

而我.....仲未可以返去瞓覺(雖然我好想瞓...)

因為我仲有任務就係要去接女友放工

我響等女友放工既"老地方"恰著左

到我醒時....係女友拍醒我既

女友問我係唔係做賊...呢幾日...??

我向女友講....我賭左一晚錢...玩左一晚呀

了解我既女友問...."今次輸幾多呀又...??"

我話...我有贏喎今次..

女友果刻真係唔客氣咁話....

咁一定要請我去食個"上午茶"啦咁

我話..."又食...????"

卒之我又食多一餐

飽到上頭殼頂

但呢樣都唔打緊....

因為我仲夠錢買消化餅食

最慘痛係我要將贏返黎既錢

扣除呢一餐後

都要上繳女友

無天理...天理何在呀..??(講笑啫......)

因為年初四要去女友D好姊姊拜年

女友話...佢地都係走唔甩要打牌

你包我輸...贏就我自己既

唉........算吧

回家大覺瞓完起身希望唔好記得呢D"慘劇"啦

大約16:30左右去到佢地D姊妹度

收左佢地幾封利是

大家就開始打牌

其實我唔係太鐘意同佢地打.....

因為全班姊妹都係冇腦

個個名副其實打"天才牌"

女友打牌都係麻麻地

但當日表現真係....唉

女友個舖咁既爛鬼雞糊

竟然去博人地舖清一色

最後....當然慘輸收場啦

我響後面見佢打...真係睇到眼都凸埋.....

最慘旁觀者...無得出聲.....焗住睇佢送錢人家

女友一輸呢舖我立即話佢..."你呢舖爛鬼雞糊學人博乜呀....都摸到尾啦....!!!!"

誰知女友話..."好在有錢墊我輸啫......"

我想講....女友大人呀....呢D錢我都要用三分精神、五分運氣、兩分技術去攞架

不過鑑於"女權至上"...我只好由佢啦....哀哉也..!!!

到開飯既時候

佢D姊妹話.....

下年好派利是喇

回想起呢幾天

我比人講得最多...聽得最多就係呢句...."下年好派利是喇"

咁我都希望可以有資格派下利是

但係....最快都要後年吧

結婚前準備既野.....我地一件都未完成

好難下年既....

我期望...後年啦

如果大家後年仲見到我存在

你都可以嘗試恭喜下我...

可能到時我真係會雙手奉上利是乙封架....

初五.....

開始返工

一切好似回復正常咁

我希望今年大家都順順利利、開開心心

最緊要....當然係身體健康啦

2011 年 1 月 29 日 星期六 【乍雨乍晴】

病足一週咁滯

前排真係好忙

忙住起身返工...放工...再去醫院探病....

嘩...東區醫院呀....

響柴灣尾呀...遠都唔打緊

搭車冇位坐先至攞命嘛

大佬....我已經做足一日

搭車冇位坐

雖然我冇比錢啫...!!!!(你都知你冇比錢哩....仲想有位坐...??坐車頂啦...再唔係車底都得...公司話...)

所以...我都唔理咁多

響中環站....一見到有位吉左

一打開車門.....就衝入去我既目標坐位

跟住...坐定定"扮瞓覺".....

目的係唔想讓位比任何人...(我坐到尾站架...)

我都知自己係好賤...(我終於都明白咩叫人不為己..天誅地滅喇)

無法啦.....打工仔係咁架喇

而事實上大把後生仔女都係同我一樣....(果D所謂OL仲狼死....完全不顧儀態爭位坐...頓時將我對中環OL既幻想幻滅得蕩然無存...)

一上車就爭櫈仔.....

我覺得如果奧運有"爭櫈仔"呢一項比賽項目....

香港返工放工搭地鐵既打工仔...一定會羸..

同一時間我亦發覺響繁忙時間最大敵人唔係"人群"

而係一D上車唔合時既...推住BB車既家長(扖街...你個BB得3個月大都唔知有冇...你攞架旅遊巴咁大既BB車...呢個媽咪係唔係找死丫..??)

你留心望既會感到有過百甚至過千對眼望住佢...

大家心中都暗罵佢.....

名乎其實係....繁忙時間既"鐵路公敵"

不過呢幾天唔使再去喇

嫲嫲已經出左院

但係仍然都係認不到任何人

總之....見到男既....就話"我既男孫"

見到女既...包括女友在內...嫲嫲都話係自己既"孫女"

唉......算吧啦.....有時諗嫲嫲都咁老喇

唔記得野...都係正常既...

無憾係我自己響嫲嫲仲有記憶果時都經常探佢丫

不管嫲嫲記不記得.....我都叫做好做孫既責任吧

呢個病值得慶幸係雖然只係認唔到人

但係仲可以自己照顧自己...(指既係日常生活...如食飯、著衫、如廁...)

人老左.....不能再向老人家奢求太多....要求佢能夠做太多吧

前幾日我開始發覺喉嚨唔舒服

罪魁禍首係Office班大哥大姐啦

以前空氣唔好...自己有病又好..人地有病又好

自己躲在駕駛室內打開兩邊窗

吹呀吹...讓這風吹....

空氣勁流通....仲點會有病毒病菌呢..

而家...

大姐...咳咳咳咳

大哥...乞痴乞痴乞痴

大家一齊困獸鬥在Office之中(睇下邊個中招..最快請病假先..!!!!)

唔中招就有鬼啦

我已經好叻喇

係第五個人請病假

之但係我真係病得好嚴重

我真係完全出唔到聲

講係講到野....但你係唔知我講D咩囉

我要一個字一個字咁講....對方先勉強聽得到

我在家中一直要戴口罩

我稍為見焗除低個口罩...

女友立即大叫......"你仲咩野..你仲咩野"

你仲咩野唔戴口罩

我話...好焗呀....抖下都得掛

女友話....你唔戴...我戴..!!!

好似我有H5N1 加 H1N1 咁

做到咁保護

女友咪又係病.....嘥乜氣

呢件事我同女友都証明

公司醫生係冇鬼用

收你幾十蚊

比包糖你....(阿名醫師!!....我要糖..我自己曉走糖果屋夾丫.....)

呢D糖永遠都醫唔好既(你最值錢咪得張"醫生紙"囉)

最後我要自己比290蚊打針再攞特效藥

仲要比醫生話...."你咁好野...咁忍得辛苦...捱到而家先睇醫生既...??"

醫生呀...我冤枉呀...!!

我之前已經睇過醫生架喇

只可惜我有口難言....只有向醫生苦笑

醫生主動比三日假我

醫生話三日都唔好要返來執多劑...!!!!

而家我地兩個...好似沙士咁日日都戴口罩

我估再嚴重D的話

遲D實聽一個瞓廳...一個瞓房喇....

但睇個勢.....似乎女友會好得快D

睇到女友個更表....年初一二三

女友都要離港返工

年初四返回香港，年初五六七就放假

而我年初一二三都放假

年初四五六七都要返工

真係大整估呀

昨晚女友同我講.."唔知我地仲可以收多幾多年利是呢...??"

呢句話擺明有骨啦...

我話....你想問"我地會幾時結婚吧...?"

女友厲一厲我咁講...."咁你想點丫...??!!"

差D想殺左我咁滯....(妳以前冇咁惡架喎....妳以前明明係好溫柔架喎...!!!)

好喇好喇....講左好多次啦....兩年之內嘛...

我話..."妳呢D咁既眼神...咁上機對住D客....妳肯定比人一腳伸出去機外呀.."

女友話...."你少擔心啦...我睇人蝦既...!!"(講到出口添喇....係只蝦我一個...我以後仲有好日子過既...???)

其實女友仲講左好多好多.....

不過我較有記憶係以上既對話.....

新年之前....

同女友出街....

女友不停咁買新衫....新鞋....新乜新物....總之咩都要新..

差D想問..使唔使換個新男友呀..?(講笑啦....我點敢咁問丫...我諗既啫...我都知有D野係唔講得既...!!)

我問....妳D衫唔係買左好耐乍喎

妳著得哂架嗱...?

咪成日嘥呢D錢啦

女友一句話...."女仔係咁架嘛"

衫著一季就要換架啦....!!!!!(咩道理...即係D衫一季就會自己毁滅架嗱...!!)

好似你咁咩.....

一年都唔到三件衫

唔買比你既話....你一年都唔會買一件衫呀..!!!!

其實...我覺得冇問題架喎

我D衫又未爛...仲咩要換...??

雖然我咁講....

但我知...呢D就係男同女既分別

好簡單.....

有個著得好靚既好潮既身材好正既美女走過來

女既會話.....呢件衫、呢條裙個款...今年最Updata...手上既手袋係今季咩款咩款

但係...

男既會話.....呢條女......上面起碼冇36都有35啦....仲要係咩Cup數添....呢D搵佢做內子一流啦....

分別就係咁喇

上帝真係大整估呀

仲有唔知女友幾時學會呢句..."辛苦搵黎自在洗"

唔係做得咁辛苦....甚至做到死..為乜..(大概話上次有同事猝死單野掛..)

我....當然無話可說啦

我同阿George講開呢D問題

George都話佢女友都係咁...(George女友同我女友係Friend黎架...)

不過George安慰我話....

"佢肯同你去行街買野咪好囉，唔通你想佢同另一個男仔行呀...?"

"況且...佢唔鐘意行街買野...你先驚呀..."

這刻....我覺得George....真係一個

付出多..得到少...不介意..又豁達既人

唔怪得行內有女同事稱你為..."絕種好男人"啦(阿屯門大家姐話...佢真係連粗口都唔多句呀...)

我真係要向你將個"服"字.....反轉寫喇....

2011 年 1 月 17 日 星期一 【乍雨乍晴】

嫲嫲

昨日收到姑媽電話

問我老豆去左邊...電話唔通

"我唔知喎....返工未返屋企掛....仲咩事呀??"我問

你阿嫲入左醫院呀....!!

"咩事呀....仲乜入醫院呀...咁嚴唔嚴重呀...?"我又問

你阿嫲唔識得人囉....

"咁我盡快搵老豆....同佢講啦....!咁去左咩醫院呀...."我再問

東區尤德醫院呀....響柴灣呀

收綫過後...我打爆老豆電話都冇人聽

心諗...已經急死人啦....你死左去邊呀???呢D時候先唔接電話

最後我都係選擇留言(但我唔知老豆識唔識咁黎聽)

始終...到我食完飯都冇比電話我

我又打比老豆

今次有人聽喇

告訴老豆嫲嫲入院一事啦

我唔鐘意我老豆每次一聽到嫲嫲入院都話"睇黎差唔多喇"

每一次阿嫲入院都係咁講.....無論大病小病都係咁講

雖然語氣係帶住嘆氣又無奈

但畢竟都係你阿娘....你好想佢快D走嗎?

當然我冇兜口兜臉話老豆啦....

但心中有點不快

每次聽到嫲嫲入院我都會心中一沉

擔心嫲嫲過不過到呢一關

但每次都好好彩

每次都可以識行識走識食咁出院

對一個九十幾歲老人家黎講

仲能夠自己活動...真係不容易

我嫲嫲住響老人院....

仲住三樓....仲要冇升降機...要自行上行落

果條樓梯...唔好話老人家

我行我都覺得驚.....簡直一步一驚心

因為條樓梯每一級都係好細級而且仲好鈄

我每次探阿嫲都會好小心落樓梯

我自己都怕自己失足跌倒響樓梯

更何況係一個老人家呢

但我嫲嫲可以住左幾年..每日都咁上咁落幾次...冇問題

次次我探阿嫲都會心中暗讚嫲嫲....好厲害....九十幾歲仲行到呢D樓梯

咁証明嫲嫲身體都算係好好丫

我心想....今次入院會唔會只係暫時認唔到人吧

但我始終都法立即探嫲嫲.....最快都要來緊朝早先可以探

今日去醫院途上我心中仲懷住希望....

只係小事....老人家毛病要入院Check下吧

不過我今日見到嫲嫲....嫲嫲對我既反應係"零反應"

完全唔識我咁

我不斷向嫲嫲講我自己咩名...阿軒呀....

嫲嫲就....."哦...阿軒嘛"

但唔使三十秒又唔記得

雖然嫲嫲係完全既清醒.....

可惜總係問非所答...語無倫次....不停重覆講"個個身體健康啊...要返工/返學啊..早D返去喇..等等"

來來去去都係果幾句

我用盡全力去不斷重覆我叫阿軒呀....

都係一陣就唔記得

也許嫲嫲腦內只得點點好零碎好零碎既記憶吧

那刻我心中.....都不知怎形容

剛好見到主診醫生...

我地問嫲嫲大概出了什麼問題

醫生話.....初步判斷係腦內爆血管

我地都知....人都咁老..冇可能再做到手術...

因為一定捱不到手術風險

咁只有係睇下會唔會影響到有生命危險....

要再次深入檢查先得

即係話....就算嫲嫲冇事出得院...

嫲嫲已經唔會點再記得我..認得我....

我探到七點九左右就離開醫院

心中諗....明明個幾星期前...

嫲嫲仲同我講.."天氣好凍啊...著多件衫啊....新年先同阿嫲拜年啦...要身體健康啊"

我打開手機睇....

睇返已接來電

2010年12月25日...17:05分....嫲嫲就向我講左以上說話

只不過係二十多天就變左另一回事

我知.....要嫲嫲再自己打電話比我講說話已經冇乜可能喇

新年話向佢拜年....我都不知道嫲嫲知唔知我係邊個...係我向佢拜年

記得嫲嫲話....大個喇...要結婚囉同阿妹(嫲嫲一向稱呼女友叫阿妹)

也許嫲嫲都想等我結婚那一天

但現在嫲嫲咁樣....

好似向嫲嫲什麼事都無意思咁

我心好想知...嫲嫲到底而家心內係諗D乜.....係唔真係乜都唔記得

定係心中記得...但用口不能隨心咁去表達

我已經不知道喇

很念那一個能夠向我對答既嫲嫲

如果有一天...

我手機能夠顯示來電係來自長洲老人院的話

我會放低所有去接呢個電話

真係不知道有冇可能喇....

回程回家路上....在街的暗角位..我執到一百蚊

比著平日我一定會開心咁大叫好運呀

但我彎腰攞起張一百蚊紙上手...

一點開心感覺都冇..

的確...心係好沉...仲有點酸溜溜既感覺

最少直到而家我都瞓唔到

想找個人傾計....女友又返左工....明早先返

明天...等女友放工直接去醫院再探嫲嫲吧

這是現在唯一只可以做到的事

2011 年 1 月 14 日 星期五 【乍雨乍晴】

閒事三四則

近呢個星期....

生活都過得係咁上下啦...個人冇穿亦冇爛

不過近排天氣凍

女友佢就大傷風...(日日係咁乞痴..乞痴..乞痴..咳咳咳咳...)

佢D傷風勁到我都怕左佢

大家齊齊響屋企帶口罩(差D要買N95戴呀)

睇左幾次醫生..針都打過兩次

三日前終於都好返D喇..(謝天謝地喇...)

告別口罩既生活

屋企兩隻貓日日伏響暖風機度

嘆得佢丫....

有一日我就攞左佢部機......我用(哼....唔係咩係...呢D叫霸道呀..知冇)

喂....我都會凍架嘛....

我冇你D貓咁多毛喎

最過份你兩隻貓幾時有交過電費嘛.....

暖都應該暖我先啦....(我係主人...大哂...知道未...)

最後比女友發現我"虐待"D貓

卒之要物歸原主....

我頂丫.....(太可惡喇...感覺到D貓去告御狀.....真係膽大包天呀...)

正一客家佔地主.....屋企D貓真係矜貴呀

怕左佢地...!!

唔知呢一段時間我日日夜夜都對住電腦

攪到我頭昏腦脹都算喇

最慘係令我對眼好辛苦

我真係日日都要滴幾次眼藥水

上星期左右我去驗眼

左眼深左50度...

右眼深75度

又要我配新眼鏡

果日女友陪我一齊配

終於都配左一副"全視線"眼鏡

一見陽光就變太陽眼鏡...入到陰暗處又會變返普通眼鏡

我想配呢款眼鏡好耐喇

如果第日有機會駕返車的話

我連太陽眼鏡都唔使帶....

一副攪掂哂

哈哈.....真係要多謝女友呀

因為係佢出錢配比我

大家都知啦....

我窮都不特止..仲要窮到燶果下先折墮嘛....

8號果日同女友去睇劉華演唱會

一睇就睇左三個鐘

看看手錶......00:05....死得喇

因為00:10係尾班車....

由紅館飛出黎都係送車尾

唔係...我係連車尾燈都見唔到....佢直頭係開走左..無影亦無踪

好彩仲有東鐵

搭一個站去到旺角東...

再轉巴士出屯門

無啦啦要比錢搭車.......好冤枉呀

我已經冇錢架啦...

好彩近日D股票都幾生性

滙豐升到上87蚊....

我80蚊入....升左7蚊

哈哈.......而家同女友相量放唔放隻股票好

人係貪心既....

個市睇個勢會繼續升....真係人生交叉點

大家都知啦....

炒股票都有方程式架嘛(師奶專用既股票方程式...)

而最強既方程式係.....

升.....唔放

跌.....又唔放

究竟我地想點...??唔知道

咁幾時放好呀...??

唔跌...咪放囉...!!

其實我同女友都牙痛咁聲

因為而家通脹得好緊要

買乜都貴過人

而家我地都少左出街食飯

而唯一感到安慰係......我唔使出交通費

咁錢...相對地都比人地鬆動一D

但係話去旅行就.....

唉....一折機票都冇用啦

出去旅行去玩都要消費架嘛.....

好似酒店咁.....通通都係錢

旅行...??真係好難

我地上星期先咁講

前日女友就買本首爾既旅行介紹書睇

話不如四月去旅行...去韓國玩...!!!

我地好似發左達咁喎.....!!!(我仲以為我發左達呀...!!!)

唯有響有生之年....努力搵錢啦

我又搵...女友又搵

為既都係為將來

近呢一兩年都開始我地都好認真咁儲錢結婚....

錢真係多麼的重要呀

問女友會唔會去參加公司"按章工作"

查實好多朋友都咁問

但問既方法係....."喂...佢地班野...新年會唔會玩野罷工呀..??"

我點知喎....!!

就呢件事問過女友因由

而事實上加薪4.5%...

佢地平均時薪係103蚊至200零幾多蚊左右啦

咁所謂話加...即係加幾多錢呢....大約每個小時加五至十蚊左右

不過魚翅今年盈利有百多億(咁即係幾多個零呀..好似係10個零...我有冇錯呢...??!!)

咁你地覺得合理嗎...?

魚翅話我地已經好慷慨...咁我都好想聽下你地既解釋.....解釋下何謂孤寒

當然我都唔知魚翅點計佢條數啦

大公司有個共通點係...永冇死錯人(同港鐵一模一樣...)

只但係我問女友會唔會按章工作

女友話..跟大隊囉只好....

如果人地咁做..自己唔咁做又唔知點咁.....(唔合群..分分鐘比人排斥...!!)

不過女友大歎謂...空服員工會今次弄巧反拙

因為次次空服罷工都會得到大眾支持

但今次工會響農曆新年攪工業行動

比市民覺得空服員擺明玩野

市民反而支持魚翅公司....

而家令到人地都覺得係空服員攪攪震攪工業行動

不但只冇市民大眾支持

反而比魚翅過左一楝...比僱主有機可乘

覺得錯既唔係公司...係你地班攪攪震員工

真係百分百既失策.....絕對既失誤

勸大家到時都唔好選乘魚翅喇

女友話"老實講丫......但打工既當然想越加得多就越好架啦"

而家有工會玩野同我地爭取喎...

所以女友最後都係話..."睇情況...如果大部份人都咁做...佢都會跟大家一齊按章工作"

昨日係13號

女友會從NRT到HKG.......

今晚終於有飯食又有人陪我又有人陪我傾計喇

可知道女友妳一出左去幾日

心總係想著你做緊乜...係咁諗住妳

而我那一刻回家可以做既係...

日日放工返黎對住四面牆

遲早我都會變成自閉仔

我諗妳都唔想嫁比一個自閉得老公掛....??

睇天氣報告話星期日又凍過

我放工買左兩大Pack暖蛋芯比妳喇

嗱......我都算係咁喇

暖蛋芯.....係我自己出錢買架....!!!(我窮嘛..冇錢...所以要強調"窮"....哈哈)

2011 年 1 月 4 日 星期二 【乍雨乍晴】

回望與展望

回望整整呢一年

諗左好幾分鐘都唔知寫乜好

感覺呢一年完完全全沒有建樹

腦海一片白濛濛

好似冇乜事發生咁

或者我失憶日漸嚴重吧

我最記得都係最近入院住左成個月

同埋響元旦我同女友加上女友一班同事們響維港倒數睇煙花啦

再跟住記得係..比人轉左去九龍灣返工

雖然話係暫時

但都唔知捱幾耐

日日都對住一個內分泌失調....荷爾蒙分泌失敗既阿Head

之前都話過佢...佢似乎真係一出世就係更年期...

唯一解釋就係....."佢有病"

病到係頭筋痴手筋，手筋痴腳筋，腳筋痴孖筋

講到底都係一句..."惡哽"

講到自己娘家.....

呢一年.....

我返過娘家多少次呢...??

真係少之又少

唯一感到安慰係阿娘住認得我

呢一年我都激親過女友無數次

尤其係我住院期間

當時我心情好差...

我記得有幾次女友探我...我係說話都唔多講

女友問我兩句....我膚顯咁答半句(我都知係我唔啱...Sorry..)

多得女友處處忍我同照顧

女友最近多左講一句說話

"你唔好成日要我好似阿媽咁提你啦....我仲未做人阿媽呀..."

得得得.....我會改善一下

今年將功抵過......好嗎??

呢一年當女友幾日不在家既時候

我比前年多左響屋企對住四面牆.....玩自閉

講到朋友....

好似冇乜咁

明明電話有一大堆人名

按按下都發覺個個都係有事做唔得閒...一係返緊工....O緊T

你有你工作..佢有佢忙碌

無他既...我地呢D年紀個個都係要頻撲搵食架啦....(講到我好鬼老咁呀)

好似元旦咁....

以前我地一定會去橫洲間屋玩通頂

去把酒言歡、響度想當年、醉醺醺咁講下男人心事

最重要係我地一定賭下啤牌...."十三張"大戰

好懷念我地玩十三張D術語....廿蚊七、兩草硬掘、每邊買十蚊油菜.......

期望到農曆新年可以大家得閒抽個時間聚一聚啦

突然諗起要提提既係

女友真係主動問我....

喂....你幾時先會同我結婚呀..?

女友好興奮咁講結婚時要點點點例如D酒席..去邊到攪個婚禮....

結婚前又要點點點....例如影婚紗相呀...飛去邊度影咁呀

結婚後呢....會去邊度渡蜜月呀...?

每諗到呢D呢....女友就好興奮好興起

但女友唔知我心係幾咁恐懼....

因為女友一邊講...我心就計緊所需要既錢

但我無一次計得到....

事關我計到一半已經比個天文數字嚇壞

不過...放心啦....

一生人一次既...我會盡力而為...盡量滿足妳既希望

跟住老老土土咁講下2011有咩展望啦

我希望可以快D儲到錢.....(股票呀唔該你生下性啦...入左你就跌...放左你就升....咁算點??)

我希望自己可以識得分配下時間....

唔使女友變到好似我阿娘咁........響度係咁哦我.....

我希望可以工作時可以開開心心啦

如果可以快D回巢就更好

我希望我身體好D啦.....唔想再帶比女友擔心

因為...撲返工之後去醫院探我...又或者係放工之後撲去醫院探我

我知係好辛苦的一回事

同時我都希望可以比少D麻煩女友啦

我又願女友可以工作時快快樂樂...身體健健康康啦

我又祝願我倆可以開開心心

2010 年 12 月 29 日 星期三 【颳風】

乾塘喇我...

唉....上次覆完診

醫生話我暫時仲要食住藥先

見醫生果刻....

我死哂狗咁問醫生

"咁我係唔係無了期咁食藥咁落去呀??"

醫生答....唔會既...呢D藥唔可以長期食

我話呢D藥令我無法做返我既原本工作

我好淒涼好痛苦呀...!!(咁呢一句我又冇講出口.咁樣衰..!!)

希望早D可以同藥講拜拜啦

近排天氣比較涼..對我黎講

我發覺自己怕凍左....

因為我要著三件衫(連埋風衣)

舊底時...我都係一件T恤加一件風衣...無論天氣點涼點凍法都好..我都係咁著

果然...人開始老喇

但呢D天氣對女友黎講簡直攞佢命

有時見女友煮飯時要沾水上手都替佢凍

我可以幫到只有幫手洗菜洗碗咁

當然我都會靠自己碩果緊存果幾毫子

買一大堆暖包比女友作出街返工用啦

呢一期好多人都買 iPhone4

iPhone4未出時女友已經話好靚好想要

但耐何實在貴得離譜....

次次都只係去Windows Shopping部電話

每次見到 iPhone4 女友都會望一望咁

最近公司有人黎Sale iPhone4....

員工價平左好多

算啦......就襯呢一段時間買一部比女友啦

ok....嗱....我真係冇哂錢架喇.....繳哂械架喇

話雖如此....我都仲有D錢係長期冇用既......三毫子囉.....

12月26日..女友個Friend結婚擺酒(我又冇左500蚊人情)

佢當然係做姊妹團啦

所以一早就出左去遺下我呢個孤兒仔

我就一個人悶到....只好搵周公捉下棋打下牌啦

到八時入席時....

我大約七點就到

我入左新娘房坐....

勁唔好意思....

因為全房得我一個係男性

仲攞命係佢地竟然就地咁換衫換裙

咁梗係仲有一塊薄簾隔住啦

但都夠尷尬啦

我只好一個人去行街

行到差不多入席先返上去

又見証左一場千篇一律既婚禮

飲完之後我都要幫手收拾殘局

入再次入新娘房

點知佢地又係換衫

今次仲要一個一個姊妹排隊咁換

我真係怕左佢地...只好出去睇下送客情況

原來客早已經送完

餘下只見到一班"兄弟"互劈酒

聽到只係一種大大既聲音就係...."飲"、"斟"、"好野"、"再黎"、"你醉喇..."、"我冇醉...飲"

我一出來比D兄弟見到....

三唔識七都要飲

咁當中都有個熟既人....其中一個就係新郎

見佢比人灌到人事不省咁滯

呢個時候酒樓經理出來客氣咁叫新郎找數

新郎哥佢連VISA個名都醉到簽唔到

結果簽到一個同VISA筆跡都唔同既名

經理都無理照收可也

兄弟們又飲過

最慘係我都要比人捉佢飲

紅酒、啤酒、烈酒我全部都飲過哂

奇怪既係...我竟然唔覺好醉

我幾個對手都冧左我都仲企得到站得穩

新郎哥比我成功營救

我仲扶返佢搵佢老婆交人比佢

最後我仲要幫手扶我D隊酒冧左既對手返屋企

一共送左三個兄弟返去

本來都有D多酒氣上腦既我

扶完三個完全唔識用力行同企既麻甩佬之後

我完全醒哂

雖然係咁.....

我返到屋企都好好瞓....始終都叫飲過嘛....點都好瞓D既

第二朝起身

女友不屑咁向我講

仲話冇醉

"一返來我衫都未換好你已經瞓到死豬咁喇"

"你而家拿拿聲同我走去沖個涼呀....!!!"

"尋晚又唔沖涼瞓覺...我而家要換哂所有床單被單呀..."

乜.......我尋晚真係有醉咩...

女友話..."你話呢...??你叻..識得返到屋企先醉...!!"

哈哈.......我乜都唔知...咩都唔記得lu....

嗯...仲有

多謝女友上星期買多一架飛機模型比我呀

1比200..既A340-600好大部呀(魚翅已經冇左呢部機喇....好似賣左比海南航空)

其實我幾時開始鐘意儲飛機模型架...??

諗真D....咪識左妳之後囉....

妳傳染我架....妳要負責呀

我下次要部1比200既A330-300型號(CX機或者KA機..我都收貨架~)

我等收禮物架喇

2010 年 12 月 20 日 星期一 【微冷】

買介指

昨日.......星期日

算係比較好瞓一日喇

我瞓到8個鐘多的的

查實我都好想瞓

話哂呢D凍凍地既天氣鑽進被窩係人生一大樂事

但.....我唔得

係醒就係醒

或者係女友之前同我講有關第時結婚之事宜啦

要準備乜乜乜.....

我一諗就瞓唔著

瞓唔著又去諗

心中總係有好多事好似未解決咁

我知...我都唔係傻既

女友想暗示我買一對介指嘛

但係一萬二千幾蚊喎

係.....真係要咁價...唔知對閣下呢個係咩價啦

但對我呢D窮鬼來講......攞左我命架喇

我知阿Eden同我女友話架...."使乜理佢丫..間中一次先劏佢一頸血之嘛"(Eden妳呀...我記住妳呀...嗚嗚..!!!)

呢D好明顯唔係叫劏一頸血.....呢D直頭係叫做"放血"

Ok啦.....其實我都心中有數既

呢D錢遲早都係要用....我都理解既....

係睇下係遲定早吧用呢D錢吧

就係咁我...瞓唔著在牀典下典下咁我就諗...同唔同女友去揀好呢...??

唔買又掛心多一件事...令我瞓唔著

買既又怕自己唔捨得一舊錢咁拋出去...又係攪到我瞓唔著

心諗....會唔會買左了件心事我會無咁多野諗....好瞓D呢...??

卒之......今日去買左

但我Feel到我會從此都瞓唔著........(如果唔係點會凌晨4點58分仲打日誌呢...!!!)

好肉赤呀...萬四蚊呀....真係比Eden講中..."放血"

呢一次係買左一對介指之外...仲買多左一個掛頸吊墜

8折之後再用3000蚊現金券先係實價比一萬四千幾...(心水清可以自己計下呢個悲壯既原價...)

到今日先知...鑽石除左分卡數...仲有係份數

卡數級別...我就買唔起喇....閒閒地都30000幾蚊一小小小粒

大風都會吹得走....放入魚缸比金魚見到都會當左係魚糧食左既Size

買介指時候.....全權比女友去揀....(最好唔好問我意見...隻隻在我眼中都係一樣...)

最後選擇左一隻冇咩手工既好簡單既款式

但係佢係咁多隻可選擇之中"最大粒石"既...(真係識揀....)

到比錢Look咭簽名....認頭..!!!

咁MaBelle可能都知我肉痛啦

所以請我地去睇劉德華演唱會.....

咁正...??

一望之下......山頂位...仲好近出路口

保証可以好順利好快捷咁首先走出紅館搭車返屋企

嗯......

我咁大個仔都冇試過送咁重禮比女朋友呀

妳真係第一個呀....當然亦都會係最後一個啦

買完比完錢唯一令我值得安慰既係

見到妳由心笑出黎果種開心啦

比兩日時間我啦....

比我肉赤埋今日啦

比我睇多D妳個開開心心樣啦

其實呢D野遲早都係要買

嗱.......只係仲欠妳一對求婚介指乍

唔好敲詐我喇.....我有幾多妳知架....

不過妳想敲詐都冇喇

因為我真係冇錢架喇

雖然介指要訂造...一個月先有得攞

但係個吊墜兩日後有得攞.....

帶住個吊墜止下咳先啦

臨返工時又多一件小飾物比妳選擇喇.....

而家我望望個鐘差不多6點3喇....

真係羨慕妳可以咁好瞓呀

睇下妳個樣丫...真係瞓得咁鬼甜既可以..!

唔知係唔係發夢又再買野喇...!!

2010 年 12 月 18 日 星期六 【晴】

一個星期既雜記

從來我都覺得洗衫要分開深淺色衫洗係多餘

但....經此一役.....唉...!!!

明白女友點解麻煩D

都要洗兩機衫

呢個星期有一日...趁佢返工我就係貪方便

一野放入洗衣機洗

洗呀洗...洗呀洗

洗完...一攞起一件...點解咁古怪既D色

果一刻諗....

光線唔夠先顯得我件衫暗色吧

拿拿聲走去陽光下睇一睇

不愧係天然光線

照得好清楚添仲

女友件制服果一件白色恤衫......染成一灘灘多層次既淺又深既顏色

知道中招後.....

自己真係開口同自己講...."SHIT"

中文譯做..."今次仆街喇....!!!"

心諗你個死人洗衣機

有三七二十一件衫你唔染色

你染件白色既制服...!!

立即Send Message比女友知....

我"奶"左野啦

女友話.....唔使緊張...又唔係得一件...可以報銷既

之不過女友又叫我攞彩漂

用一比五既分量去漂返白佢

果然又Ok喎

下次....我真係乖乖咁洗返兩機喇....

呢幾日凍到震

返Office Hour而家既我

頓時又有D幸災樂禍既心態

心諗住我仲響被窩時

你地返4點44既仲唔凍死

其實我藥都差不多食完喇

來緊廿幾號就去診所Follow Up

如果唔使再食果D藥

我都係想躲藏響駕駛室內工作

我真係唔想再同人迫車同慘死響Office處

其實講迫車都遠遠未及女友晨早返工之苦

最凍果日...我懶勁咁話送女友一早一齊返工

一早意思係天都未光果隻

寒風刺骨.....

結果我同女友都凍到...講唔到野

真係兩個一齊膝縮一團...唯一可做既就係互相取暖

差在未兩個緊抱一齊

東涌真係凍都凍過人

記得當時我背向空郵中心....臉向魚翅城時

我果刻係凍到手腳僵硬....比冬日寒風吹到扖街

好羨慕女友件黑色大褸...

當然唔係自己買啦

係魚翅公司供應既...

港鐵係唔係應該向人學下野善待前線員工呢....

送完女友返工....

順路..自己一個人出左去維港睇下日景..

每次我都係咁諗

望到呢個"百萬風景"我都會覺得自己生存響香港係好幸福

其實我人生都算係咁

有份工、有一個好好既女友、有家人、有朋友、有屋住、有公司福利又可以享受社會福利

起碼我有病都有醫院住同埋享用得到香港先進醫療服務既丫

世界上好多地方都冇先進既醫療架......

我地既祖國已經係其中一個啦

你話我地生存響香港係幾咁幸福呢

哈.....比女友思想感染...

女友之前成日都叫我知足下啦

叫我好似以上咁諗就會覺得自己好幸福架喇

女友再補充一句話.."有自己鐘意既人響身邊更加應該感恩添啦..."

原諒我真係堅持唔到咁學妳做一個基督徒

我真係做唔到每餐同早晚都祈禱

如果真係要我感恩的話..就係感恩妳冇強迫我去感恩而去感恩

我都感恩女友每次放工時都有小禮物比我

響巴黎女友既一躺機中

女友買左一支男裝香水比我

真係幾好聞

但我真係唔識點用

亦唔習慣去用

妳叫我試下學下用啦咁.....

我盡量啦

昨天女友問我.."你幾時同我影結婚相呀...?"

又幾時會買結婚介指比我呀

仲強調話結婚介指同求婚介指係唔同架

係兩隻不同既介指黎架....

仲有話....

妳要向我"求"婚我先會應承同願意架

仲話如果講"愛的宣言"的話..

妳要我講埋做唔到或者反口..又或者對唔住老婆會有咩慘痛收場

睇黎....我既婚姻路上都幾咁波折重重

我........

大家認為我應該點做同點算好...??

2010 年 12 月 8 日 星期三 【乍雨乍晴】

新人既工作態度

今日真係谷鬼氣

我真係冇諗過...

我坐輕鐵都可以比司機請我食"閉門羹"

望清楚.....

呢一個司機...我係一次都冇見過

或者係新人吧

話哂兩個幾月冇返去

生臉口既司機...我唔識既...唔出奇

但係......

呢一個新仔真係離哂譜

我個人已經到車頭第一對門

我欠半秒就可以入去

若要我肯衝門的話

我一定入硬去

通常呢D情況..

做司機都係會先關中門及後門

再獨立開前門比人入....

最後先關埋前門再開車

不過今次係響我門前"嘭"一聲關門

即刻火都黎....(心諗....你唔識我呀...?????)

我趁佢後鏡未收就眼神互望....

佢都唔識做...去開頭門

我一手大力拍佢對頭門.."嘭"一聲(車內既人都比我嚇一嚇....大概估不到會有人無情情咁拍響對車門...."嘭"一大聲)

要佢立即開門(你夠膽就唔開門兼開車走....!!!)

最終佢都肯開門

入到總站....

我走去外面車頭駕駛室...."啤"佢

佢又好唔順氣咁望向我咁

我Feel到眼神係唔友善

本來我都想算數....

見條友仔咁串我就拍佢窗...示意佢打開窗

我問佢叫咩名....(聽左都唔知佢係邊個...名副其實呢D叫識你係老鼠呀....!!!咁我都知對方都會咁諗我...)

再向佢講我既不滿

點知佢話....我見你唔到果陣...!!!!(有冇攪錯呀...冇可能見唔到囉...你當我傻架...??)

我頂.....

個月台當時得幾丁友

你頭門鏡未關都話睇我唔到

你盲架....??(咁你盲既點做司機呀..?成幾百人條命響你手呀....)

我直頭咁問佢...."你眼有問題呀...?"

我真係估唔到有司機咁夠薑

敢咁樣同客做"互動"

我真係火中燒.....

我開初諗住你肯講聲"唔好意思"就算

睇黎都唔可以作罷我覺得果刻

我就同佢嘈....

嘈到有另一個司機上佢車接佢車時

嗱....呢一個接車既司機....我就識喇....

佢問我咩事

我整件事講一次出黎

同時對方都知我身份(佢都估唔到係自己人..愕然左4份之1秒)

咁師兄就笑笑口話"咪玩D師弟啦...."

師兄都響我面前講左佢幾句

我始終覺得佢真係好唔妥我咁

我大佢話..我咪同Occ講囉

唔知點解呢個時候佢又肯死死氣咁向我講"sorry"

仲低聲下氣咁話...唔好玩我啦..冇下次喇....師兄

我話...比自己人玩都好過比出面D客玩呀...!!!!!!

跟住問....你跟邊個阿Sir學車...??

原來都係同我一樣既阿Sir

我話...咁得啦..我都係只想知邊個吧...

轉身就走

師兄為左調停解決左呢件事已經遲左開車

過左差不多一個鐘師兄打電話比我

你真係諗住"做"佢呀...?

試用期都未過佢死梗架...

我話...我先冇咁得閒打上去講呀(打一打上去又講件事真係...麻煩到要我死)

只係想嚇下佢吧

都係果句啦....

比自己人玩總好過出去撞D乘客板

師兄話...咁都啱既...等佢珍視下份工作

起佢底先知佢係毅進畢業生

用毅進成績入來大家都心中有數啦

憑毅進....呢個時勢都可以找到一份不錯既工作(我覺得呢份工只要訓練合格就得...任何學校成績多乜餘....)

我唔同意顧客永遠是對的(咩今時今日咁既服務態度係唔得架...!!!!!!你去死吧)

我自己都曾經遇過D扖街客

但有時做得服務性行業就要忍

有時可以方便到人既咪做囉

喂...今次你擺明係響我面前關門..仲話見我唔到

試想下公司會接受呢D解釋嗎...

或許仲係KCR打骰都可以過骨

但係而家係MTR出糧比你

MTR最顧及係前線服務態度

你係老闆試用期都未過你估會有咩下場...

今天不用心工作...明天用心搵工作吧....

唉......

我呀....

無數次等客攪到我廁所都去唔到呀

做新人做到咁冇工作態度同忍耐能力..點攪呀...??

遲早都會出事

只係睇下自己出事定係自己令人出事

希望佢都可以明白我咁既反應係某程度上都係為佢好啦

呢句真架

出面D客真係投訴..冇臉比架....加鹽加醋任佢講

衰衰地今次"嚇"精返啦

比我玩..好過比真係乘客玩呀.....