| 日記 | 日記主簡介 |
||||||||||||||
2010 年 5 月 21 日 星期五 【晴】 半日長洲行 今日同女友去左長洲睇下飄色 幸好我有個姑媽係響長洲住.... 要睇既都唔使同人迫爭位睇 我地反而可以坐既人地D鄉公所度睇 起碼有部風扇吹下唔使曬 反而係去長洲段路程先難 去到碼頭真係多人到個碼頭好似要下榻咁 D船一班接 一班都係咁多人 大船坐無虛席.... 呢D情況真係除左清明重陽之外真係冇幾可 坐左成粒鐘去到長洲碼頭 又封鬼哂D路 都唔知點入去姑媽度..!! 幾經辛苦先叫到差人同佢講話我係住果邊姑媽間屋呢度架 咁佢肯開一開個欄比個虛位我地入去個範圍上去姑媽間屋度 之後...後面D人大叫.."嘩咁都得呀...我都識人呀..!!!" 當然冇理佢啦...過海係神仙嘛.....況且我真係有人住響果度架 由碼頭去姑媽屋企用左我四十五分鐘....本來只係十五分鐘乜都到 去到之後見到今晚搶果座包山 其實我姑娘就住響北帝廟隔離D三層屋 如果係要睇搶包山.... 我地跟本入屋睇係可以清楚見到 但呢D係今晚既事啦 而家當然跟大隊即係飄色既工作人員一齊混入去啦 混到個好位就停.... 最後我地響佢地最後會搶灘..果一條街其中一間鄉公所睇 其實飄色由細我都睇到大 真係冇咩好睇 而且我細個果陣都係唔使同人迫街睇 有個親戚響果邊住有呢度好處吧 女友呢....都係唔係睇過好多次..兩三次左右 以前同前女友每年都會去睇下 記得第一年重辦搶包山時候 我仲係同佢連夜入我姑媽家現場睇 果陣現場當然真係一流啦...我仲記得最尾有煙花睇呀 最後我地要睇到坐加開船走 不過之後我都冇去現場睇過喇 今日都有諗過既 但女友明天要返工 我又要返工 只好睇完飄色....就算 去買下熱烘烘既平安包、麥記既素菇包、一D應節既小飾物咁 黃昏時段就返香港喇 今日天氣幾好.... 黃色個日落海景幾靚 見到大船冷氣位冇咩人買位坐 我地比多10蚊左右上左去露天吹下風睇下日落景 上到去原來都唔少人...仲以為得廿幾個人添 大多都係鬼佬遊客 女友又唔知點樣又可以同人傾到計既 真係頂佢唔順... 咁你地有你地講 我有我邊聽MP3....邊吹下風返中環啦 返到家.... 攰到想死....眠左一眠而家先好左D 起碼我都打到字諗到野丫.... 我..算係咁架喇... >>May 22, 2010 at 8:45:11 AM GMT+8 2010 年 5 月 20 日 星期四 【晴】 幾多次..? 今日家中食飯時候 又見到新聞話國泰飛機出事 而我都跟住話...係喎..又出事呀? 女友話.."咁又點呀..?" 我話..."冇...講下啫...呢排你地公司成日出事嘛!!" 問到女友你返左咁耐工 到底妳搭過幾多躺飛機呀..? 估唔到女友真係攞左本簿出來計 呢本簿係女友自己mark既返工時間表、地點、日期、飛行時數、飛機型號.... 其實我早就知女友係有本野寫佢返工既做自己既記錄 但我一直都冇睇過 一來佢收埋左 二來我睇黎都冇用... 而今日我有機會望下佢寫咩喇 八掛下先... 咦.....好似Excel格式咁 例子如下﹕
最後我見到佢係寫 第259次出走 即係已經返左259次工 飛左259躺 女友自己再計一計話 如果計次數總共係537次(呢個應該係準確數目) 因為當中有轉機... 所以次數會有出入 聽到咁我真係...只可以話 仲好似多過我搭的士咁... 係....雖然係話返工需要 不過我都話真係令人幾羨慕呀 講講下....喂 你好似仲未計你自己旅行果D喎 咁即係唔止添啦... 女友笑一笑話又如何..? 仲話我地係....飛咁耐就企咁耐 飛得越長途就越要做得多 飛得短途又要做得急... 問我...難到你會嚮受呢D飛行工作嗎..? 應付奇奇怪怪既客 由開初做比客鬧到喊....到而家鬧住都識笑 呢D工又有幾好..? 腰骨、手、小腿都有D毛病出現 的確女友真係成日叫腰痛手痛咁 若果要轉工 空務員工作又唔當做工作經驗 幾十個不好做既理由 咁又係既... 未同女友一起時..我都覺得佢地真係好閒咁 又可以週圍去 但一齊之後 我真係見到女友係辛苦、落機出來真係一個殘樣 放工上到巴士會不顧儀態去"踪眼瞓"...頭撞車窗撞到砰砰聲... 咁每份工都有佢既辛苦既 但女友仍然果句... 辛苦都好啦..到而家我都仲好鐘意飛... 嗯....呢個我早知好耐喇... >>May 21, 2010 at 12:25:56 AM GMT+8 2010 年 5 月 19 日 星期三 【颱風】 教訓Msn宅男 原本話同女友一齊出街 點知佢突然落狗屎 立即打消出街念頭 大家都係覺得留在家中比較好 在家中 女友在Msn 我就上網睇戲 各自修行..互不相干 如果要比較Msn個List多人呢 女友真係多我好多好多好多人 基本上佢個List長期都會有20人以上Online住 咁當然啦 當中有一半係外國人.... 時差問題.... 我地早佢地晚 所以女友個List先會咁多人Online 再講講佢D人既分類 好明顯有一班係宅男啦...女友一Online就..不斷炸不斷炸... 有一班係..上班族朝9-5、6都會定時Online既...呢班最正常 有一班係曾經返工既同事....方便大家互相Swap返工時間 仲有D唔識分類喇我 而今日介紹呢個呢..... 長期都唔會用真樣見人既... 只係用個"貓"樣見人.... 因為Msn原圖片有一張係貓既相片 呢條友呢...好早時期我都會過佢喇 吹水吹到不得了 又話自己打政府工...返工只係玩msn等食飯唔使做有錢收 女友問佢返咩工呀 佢又講得唔具體...都唔知佢做乜 仲話讀完書升職一個月可以搵10萬以上....心諗你做鴨賣身賣血賣埋肉都唔得啦....神經病 ok.....女友一聽已經知係吹水 但女友有度好....陪佢癲...一直都唔穿佢 對方又會相信女友相信佢既大話....係咁話自己幾好幾勁幾強 而女友有時又扮到好軟弱咁.....佢就會用文字教佢點做..指女友點行...懶係勁咁...做女友既軍師..巴之閉 女友都由佢....由得佢自己滿足下 一直都係咁..... 女友都係敷衍佢..但又唔拆穿佢 問到女友點解唔拆穿佢? 女友話...呢個人十成係超級自卑格啦 咪由得佢玩囉 反正我打死都唔會見佢既....!!! 要講下女友D受歡迎指數.... 女友佢係可以...令到人響國泰城等佢出現.... 仲夠Pop話想追佢.....(當時我地係未一齊...) 果個人就慘啦....大大隻檸檬當眾食.....據知女友要佢知難而退係令佢當場好難堪下 咁暫時都係得一個咁癲啫....等女友出現 講返呢個吹水王 佢知女友已經有男友..即係我 佢問我做咩工 女友如實回答 佢又問我咩學歷 女友照答 但得出來係佢覺得我咁既學歷唔應該有一份咁既工 因為佢話佢自己(佢話呀)係大學生... 都係搵多我幾千 話我唔值......呢個價...呢次女友就嬲嬲地 同佢講"關你咩事呢咁" 講到講到尾..原來又係鐘意佢...唉....又係宅男 想打擊我...等佢可以做到男朋友....(呢D先叫天真先叫傻呀......!!好笑哩) 女友當然睬佢有味啦 唔理佢.... 誰知佢又係咁叫佢喎...響Msn度 今次女友真係反擊佢(真係忍佢唔住...真係過份...) 女友今次用全英文炸佢問佢問題 點知佢好似唔識睇咁.... 佢好明顯係查字典答....答到D文法錯哂 女友問..你英文咁樣都上到大學既...? 佢話...佢只係英文唔合格..英文弱....其他係OK 但心水清既人都知...英文唔合格點上大學...? 問到佢HKCEE幾分..唔講 最終都講話9分.... 女友問9分入到大學...?? 女友比路佢行....問佢係唔係讀IVE上呀...? 佢立即話係...我係讀IVE....攞高級文憑讀上去架 但讀咩高級文憑..佢又牛頭唔搭馬嘴..9唔搭8咁 女友問....IVE讀書好多試考好急好趕架喎D課程 唔見你讀書既....一日到黑可以Msn既...?? 你仲咁勁可以半工讀返9-5時間讀....又唔使溫書 其實咁講..呢個大話已經爆左9成..... 只係女友幫佢兜話....."算啦.可能我唔識啦...我都唔知點IVE係點讀上去..我係直上中七上大學..我咩都唔知" 仲有 之前佢又話自己去過好多地方..見識過 我發覺佢都有病.... 要吹都唔好同個空姐吹..去過咩地方玩丫(白痴都知空姐週圍飛....邊個夠佢地見識多呀..?) 女友問....佢答非所問 前言不對後語......最尾話自己搭過一次飛機......(妖....女友都費時再篤爆佢..) 跟住女友繼續玩佢 跟本知佢係死靚仔一名.....扮哂野..完全分分鐘仲係雙失添.. 查實佢應該係個一事無成.....整天靠Msn用大話..講到自己好勁而得到滿足既人 之後既日子... 女友主動好似教細路咁...不停Msn叫佢...叫佢讀好D書....咪發咁多夢.....(佢只敢回答..."唔..我知道..我會..我明白..我會努力..) 講到佢直頭唔敢主動MSN叫女友傾計 亦都冇哂當日果種"氣勢" 女友都想做個了斷.... 講講下...直頭令佢講到佢係主動話...."我已經唔敢向你抬頭見人" 女友話佢知...暗示佢之前吹水吹得太勁先冇彎轉 而今日係講到係對方話 "我會響你面前消失，我唔會再煩你等等呢D說話" 之後呢...冇見佢Online喇 女友都Black List左呢個人..... 呢件事亦都完結 而家MSN個Info...女友自己寫..."我係蠢但唔係傻....." 難怪既...女友Msn張相..真係影得佢好鬼傻架 其實最騙得人既係女友個樣......佢真人都不知幾咁醒呀 我都怕左佢..唉!! 好揀唔揀...揀正女友佢黎吹水 一知道係空姐就咬住唔放係咁吹水......注定佢都冇運行喇 唔知個吹水王..而家做咩呢...? 可能搵另一個再開始吹吧..... 點都好..... 呢個人....完左..消失左...唔會出現.... 一切回復平靜.... >>May 20, 2010 at 1:54:05 AM GMT+8 2010 年 5 月 18 日 星期二 【酷熱】 一個低能仔的行為 世上原來真係有D唔知死既傻人 今日開工時候 我停在月台開門上客時 眼見有個細路響行人紅綠燈範圍企左響度 佢企都好串 雙手叉腰..雙腳微微地咁分開咁企..成個人咁楝左響度 咁當時係行人過路...綠燈..我唔理佢丫..反正我都要上客 當我上完客準備開車時 前面都仍然係行人過路...綠燈 個死仔包都仲係好串咁企響度 由於係行人過路...綠燈關係.. 我只可慢車咁駛到行人過路停車線前 等佢轉燈轉成行車許可訊號...我先行得 呢個時候個死仔都仍然賴死唔走... 保持住佢個串串既企樣 好...當我到我行車許可訊號亮起時 個死仔先慢慢縮返雙腳轉身走 哼.....我當然唔會放過佢啦 當我一轉燈... 我立即"砵"佢 可知輕鐵個響咹係幾咁勁幾咁響幾咁大大大大聲...真係大聲到耳都聾 佢更加唔好彩係 我今次係駕駛第四期最新既新車 果個響咹...完全冇漏氣...運作正常咁大大大大大聲"砵"...反擊佢 講真我冇留手 我長按個響咹左兩秒左右 我眼見個死仔比個咹...震到跌左落地下 當堂我笑左出來 其實唔係個咹勁到咁.... 而係佢剛剛轉腳想走時我呢個時候響大咹 佢站不穩...咁咁啱我又響大咹....砵死佢 佢先會跌吧.... 哈哈 等佢個死仔包咁串咁大膽以為冇車咁撞佢丫嗱 係....我地真係唔會撞佢 但我地係會"砵"佢 睇下個死仔包仲敢唔敢下次再咁做 真係正一低能仔 玩到冇野好玩 企響馬路既路軌中心丫嗱 今次我就咁教訓佢 哈哈.... 我心都涼哂....等佢咁Q串丫嗱 抵死抵死抵死..!!!!!!
>>May 18, 2010 at 10:23:28 PM GMT+8 2010 年 5 月 17 日 星期一 【晴】 我定很賤格吧 返工前上網睇一睇報紙係我既習慣 新聞紙又買國泰既機又出現問題 話有人打電話恐嚇機上有炸彈 雖然最終証實係個詐彈 但呢個恐嚇足以嚇死人啦 加拿大軍方接到通知叫出兩架戰鬥機護航 原來......假若真係飛機有問題有炸彈 軍機會主動開火擊落架飛機 呢一次 我好清楚女友唔係上呢架機 但係聽到呢D新聞我就會嚇一嚇到 為什麼作為一個打工仔要受呢D恐嚇 記得女友有向我提過 講如果我真係擔心既話...可以申請轉做地勤 不過未同女友一齊時我已經知女友好想見識多D個世界 空服員呢份工即使係辛苦又受氣 女友都唔想放棄 只係女友知我擔心而自願話可以轉做地勤 作為男友我應該支持佢繼續做才對 如果咁自私為自己去毀左別人既心願..可以話罪大惡極 所以我開口講支持女友留下 況且我都鐘意女友拖住大小黑返工既模樣 我覺得返工既佢真係好有自信....由內至外我都感覺到佢靚... 畢竟拖住個空服女友時 雖然我真係有點怕羞咁 但同時我又會覺得有點自豪感 別人的眼光我不知代表住什麼 或者人地會諗"係一朵鮮花插在牛糞"吧 但我都相信有人個以羨慕的眼光看我 點講都好啦....我內心都會鐘意女友做呢份工作 咁我又點會再加以阻撓女友做呢份工..而叫佢轉做地勤呢 我都可以話自己口不對心 為左讓人羨慕眼光而叫女友留下.... 我竟不再計較旁人點諗我...用女友喜歡見識世界為由繼續比女友做下去 我真的很自私呢.... 有時我都好憎恨自己點解為呢D心態而咁諗 我是不是很賤格..?? 是不是男人都是"天下烏鴉一樣黑"呢..?? 呢種心態不知何時浮現出來... 我一直埋藏在心中..不說出來 現在我講左出來舒服很多 要罵我賤格又低俗、低等.......即管開火罵我吧 因為我都覺得自己好Cheap 到呢一刻..我內心的魔鬼都係仲叫我咁諗 我自己真係真真正正切切實實無容置而不折不扣的一條死PK仔..!/font> 我有咁思想真係好對唔住自己女朋友..!!
>>May 17, 2010 at 10:42:35 PM GMT+8 2010 年 5 月 16 日 星期日 【酷熱】 我....還可以嗎..?? 明天女友會返來喇 我覺得當別人離鄉別井回來時 人人都會在機場等待佢返來 當見到佢就會大家開心興奮地擁抱著 呢D感覺自從和女友一起後 我經常都感受到 當然我們未至於要興奮地擁抱著 但見到女友拉住行李出來時 可以幫女友拉行李拖住手走出機場時真係會開心 感覺真係好似"妳平安咁返來喇...!!" 有別於女友在香港地方放工既感覺 真係有種...難用文字形容的感覺 咁當然啦 每次女友要飛幾天...Long haul的話 我心情就好似放走佢去左個我去唔到既地方感覺 有一種...係....我唔可以隨時搵到她的感覺 雖然唔係親眼睇到佢上機 但知道她一踏入國泰城的那刻 即係代表..你會有一段時間找不到她 就算找到她....傾計時間會好短 好彩既果邊上網Ok既 大家先會Msn到 碰正女友去一D落後國家 真係會失去聯絡 比著你.... 你喜歡既人會同你失去聯絡你會點..? 和女友一起時間耐左 我都學精左 我會留意女友去咩地方..留意果邊有冇咩暴動 有D地方出名酒店係危險既...自己會千叮萬囑女友小心點 早D睇女友會飛邊...早D上網睇下果邊天氣如何 女友一向勁怕凍....我會去買定一堆暖包比佢 呢D事.... 在和她一起開頭我係唔識 明明女友已經暗示左我想點 自己都唔會醒目.... 呢D板撞得太多喇 而家我會醒水一點啦 我不敢講我現在做到最好 但我會學懂點樣先會體貼一點啦 其實...我明白女友都好辛苦返工 有時唔知點先可以令佢開心一點 唯有響呢方面做比女友睇啦 我不介意再撞下板既 唔撞過我又點會醒喎 如果女友妳有咩要求可以講架.... 做到的我都會做 老老實實講明先喇 大富大貴既生活呢.....怕且呢一世都難比到妳喇 平平淡淡既體貼生活呢....嗯...我怕且我都還可以既 諗起明天我放工後可以見到妳 很想明天我可以而家快D開工我可以快D放工呀... >>May 17, 2010 at 3:20:23 AM GMT+8 2010 年 5 月 15 日 星期六 【酷熱】 It's all because of you...,Thank you! 很少可妳要飛幾天 每次都係咁 家中少左妳真係會好靜 其實我真係唔想一個人在家 返工時...冇人叫我起身 我總係要將鬧鐘較5、6、7 個 我先會放心 明明係返10點鐘 我就要由8點半開始較.... 每15分鐘響鬧鐘一次 怕既係我會再瞓唔知醒 以前未同妳一起時 我係好醒瞓 而家... 我習慣左妳會拍我起身 返工會有人比我更早起身準備早餐我食先返工 返晏.....就會由得我瞓... 瞓到我夠等我安樂醒 如果唔識安樂醒..妳又會拍我起身 一起身梳洗好就係食晏 食完先返工 呢D事...每當妳在家唔使返工時都會做 放假....如我要返工時..妳又會少出街 會在家中左執右掃.... 家中可以用一塵不染來形容 妳真係一放假就為我同個家做野 而當你要返工時..就會為工作而工作...服侍D搭客 見到妳有時真係我都覺得妳辛苦 認真諗....妳好似真係從來冇怨過要做家務同返工 妳又係返工..我又係返工 妳就好似要打多份工咁 妳成日都話我既工作要費精神 休息係好重要 所以妳先會背起所有事做 有好多人話我.... "你係唔係傻架...比哂份人工比女朋友，你又未結婚，使唔使做到咁順攤...." 更衰既說話我都聽過...."你呀咁都夠膽同人講你D錢比哂女人管...你呀..真係影衰我地D男人呀..!!" 每日得一百蚊唔夠做零用錢....你仲細呀...?!(講真...我每日要使用錢咩..?飯又有得食...跟本唔洗用錢..) 總之好多男人都話我... 你比個女人食住.......未結婚已經係咁...結婚仲得了..?! 總而言之...我在所有男性眼中...大部份人都話我"有冇攪錯..你咁都得..?" 但女同事聽到就會話..."嘩...真係好男人呀..咁聽老婆話..!!"(或者呢D係男同女思想既分別) 有時真係不輪到自己相信現實 男人真係唔識儲錢 真係有幾多會用幾多 所以我先會交比女友管 而事實証明...我真係咁樣我可以儲到錢 為什麼我甘心比女友呀? 自己問心在家中..我有咩做過..? 冇.... 家中煮飯既..自己有份食.... 比錢好應該丫 唔通要自己女友出錢煮飯....仲要煮埋返工食果餐咩 我自己知如果唔咁做我永遠儲錢都儲都唔會快 而當我知女友連自己返Long haul果份Allowance都唔捨得用儲起去時 我就更加覺得我自己咁做係冇錯 其實我倆都為左將來 咁我又點解要計較錢誰交比誰..? 呢個年代還會有男外女內嗎? 我唔覺得我係比女友食住囉 大家一齊有咩話邊個食住邊個呢 如果我還是會比其他男人笑 我會由他囉 我鐘意得喜歡得呢個女朋友...交什麼比佢又有咩所謂 喜歡笑我的 咁你就笑飽佢吧 >>May 17, 2010 at 3:19:43 AM GMT+8 2010 年 5 月 14 日 星期五 【晴】 夜闌人靜 今日望住貓咪 見到佢困住個籠好慘 但係我又怕放佢出來 反轉個家 女友又要幾日先返 我真係唔識照顧你 講起女友要幾日先返 有點掛心 我經常擔心佢一個人在異地有事我唔可以立即到 我又會怕果邊會唔會唔安全 為何個個朋友都會恨有個空服做女朋友? 為工作經常都要離開自己 明明一齊住...有時為左工作只可以用Msn傾計 難道咁都會令人羨慕嗎..? 當睡在床上....旁邊冇左個人 係....我可以反反反瞓都得 一個人睡得著時就當然無所謂啦 如果眼光光的話 就會深深感受到... 什麼叫做..."寂寞"、"寂寥" 今日係第一天..... 仲有兩日"寂寞"捱 >>May 17, 2010 at 3:18:57 AM GMT+8 2010 年 5 月 13 日 星期四 【炎熱】 制服的威力.. 今日返工放食晚飯 交車落地係天水圍西鐵站 一個咁大既站得一間美心買既係包 同埋一間7-11 跟住咩都冇得食(佻....大車站喎呢D...!!!) 最近都要行到出天耀邨先有得食 呢個情形唔係第一次 每一次我停呢個站放食飯都想問公司 你響呢度放底我 而呢度咩都冇得食 我難道要跳落路軌執石仔食呀? 最衰我又唔記得帶飯盒 我似乎平時真係好倚賴女友(無妳真係唔得呀..!!!) 因為平時女友係執好野比我一袋帶返工 家下佢身在異地(唔知佢去到羅馬有冇去許下池許下願呢...????) 只好靠自己... 咁...下場咪係要自己搵食囉(無端端又要用錢....!!!) 明明可以輕輕鬆鬆入去叮個飯盒睇電視食飯 而家我就要由天水圍西鐵站搭去元朗西鐵站搵食 果度最平都要35蚊一個飯... 仲未加一加飲品 即係賣單都要40蚊先有得走 大家知我幾窮架啦 40蚊喎.....!! 仲要等成10mins先有得食...(Set dinner乍喎都要等....真係執笠啦..) 攪到我食得鬼咁急 又怕遲到..遲一班西鐵又要等4mins 因為要接返人地車輪到人地去食飯 食完去搭返西鐵返天水圍 我企響中間果Car車廂.....我地稱佢為"C Car"(每一Car車廂都有個名..有佢既功能..要集齊咁多Car架車先會行) 但因為天水圍輕鐵站係近西鐵車尾出口 即係一出車門一出去就可以搭扶手電梯落去輕鐵站 所以我都係貪快...貪一陣可以快D落車 我都響車廂內由中間果Car走去尾果一Car.... 正當我走到P-Car..(即係尾二果Car時) 我見到一個人做出一個好攪笑攪鬼既動作 就係... 一個食緊野既乘客一見到我立即好快手咁將佢件食物塞入佢個手袋內(整個動作唔使3秒...快哩!!) 最勁既係連個口都唔郁.....唔咬又唔吞...好鬼抵死 兩秒後我明白了 原來佢見我住制服就以為我係捉人食野 哈........我真係想笑出黎...!!(差D想扖響地下拍地笑笑笑...!!) 其實我都唔明公司點解唔比人響架車食野 如果人地食飯盒開飯食就話過份啫 有時人地食個包、朱古力、零食...一啖過既... 整得你架車有幾污槽丫.... 仲有我覺得有邊個人會鐘意響車響食野丫 打工仔學生哥有時返工返學時間趕到死 連早餐都冇時間食 響坐車呢D空檔點解唔比人食下野....比人善用一下時間 如果佢食到通地係..你咪罰佢囉...罰飽佢囉 但香港人好多都好自律.... 大部分人都食得乾淨既 放寬一下大家唔好咩..? 入行時....係有守則要我地見到人食野就要向對方作出警告 若果係客運助理更加冇情講...見一個捉一個 我入行前...我響月台送水食藥.... 我竟然比人警告叫我出去月台食 我話...我食藥喎..!!! 佢話...咁唔該你出去月台外面食 當然..我當年血氣方剛..立即問佢叫咩名...投訴佢啦 最後....當然係佢地錯啦...!!!! KCR向我道歉話會向個職員作多點培訓.... 而今日貴為公司一份子的我啦.... 我既作風 平日..尤其係早上時間 我見到有人響我車食野我會由佢 基本我係任何時候都唔會理....除非食得好過份啦(你食三餸一湯當然插你啦) 有時如果我睇到有人查票時 我仲會收慢架車，比人準備收好D食物，跟手開咪廣播話有人將會查票，請大家準備八達通比職員檢查 當然如果你醒目仔女..食野食得醒目...聽到我咁叫你就好收埋佢啦 我做咁耐我係有一次有條友響我車食雪榚 對方真係打去公司即時投訴話我架車有人食野 之後到上面話我知.."喂...你架車有人食野,唔該你叫佢唔好食" 望一望......喂..!!!人地小朋友黎架喎(要我出面蝦細路...你講我做...我要做醜人喎!!) 如果我咁講響D客眼中我真係勁Cheap....(小朋友食野都唔比...!!!) 但冇法我都要叫佢唔可以上車食野 呢個係我唯一一次 投訴果個人真係屎忽鬼...仲要係金牌屎忽鬼 多墨魚、多舊魚...正一膠人!!!! 我話比你地知啦 捉人食野果D職員...係便衣隱形人..如果唔係咁...點會有機會比你斷正丫....(等你斷得口服心服..)( 你都唔會咁笨見到有職員響度...你咁夠薑去食野啦(你夠薑你咪好野囉...你最叻..!!) 同樣地...捉人車票都係一樣 都係便衣職員 唔好以為佢咩都唔知... 佢地D機有聲音去分別 佢地一聽就知你用咩票 你係唔係買小童票..用長者八達通...一定會比佢知 佢唔會一個人做野 起碼兩個人(據我知就係...) 佢係務求要你一野斷到正...去比告票你 你以為自己好精會走得甩...?? 你精..佢仲精呀..!!! >>May 14, 2010 at 3:05:49 AM GMT+8 2010 年 5 月 12 日 星期三 【酷熱】 又多一單..A330意外 女友今日返工 放左工既我...衫都唔換就接佢返工 講開... 以前我真係我好介意人地望住人肉利是封既佢 我硬係覺得我實在襯佢唔起 無論點講都好 佢一身做型真係好突出 若肯留心望下週圍男性路人甲乙丙丁 真係甲乙丙丁唔多唔少都會打量佢全身 我阻止不到同時 我而家都睇化左 而我我反而會想方法用我身遮住她保護佢唔好比人望 也有好處既 我遮住佢的話..我一定要唔多唔少都要攬一攬她先可以做到"遮"既效果 我可以得到"遮"既效果同時...女友又會鐘意呢個小小既親密動作 一舉兩得 陪女友上左巴士... 比女友挨向我小睡片刻 到魚翅城站....我幫她拉大小黑同埋衫袋...共三件行李 而佢個正正方方返工專用既包包 我曾經幫過佢揹上自己肩膀 但有一天我無意中照到鏡見到我揹佢個包包個造型 我自己都想嘔 原來男人揹佢個包包係勁核突 唔怪得空少冇得用個包包啦 從果日起...我話過女友知 我唔揹佢呀 我情願揹妳都唔揹個包包呀 好喇 送完返工我回家開電視 又聽到新聞講又有"空難" 得一個人生還 飛機型號又係空中巴士A330廣體式客機 果刻我多手又開女友部電腦佢返工Account睇佢返工詳細資料 今次女友搭既機又係A330型號 早排法國航空公司響大西洋空中解體又係A330型號既民航機.......呢一單全部人都無一生還 近D既就係國泰航空公司既又係A330型號民航機半空兩個引擎冇左動力....要滑翔方式高速降落跑道 雖然只係有人輕傷....但係呢單野我開頭唔知頭唔知路....攪到我返工心不在焉...擔心得我要死咁滯 今日又整一單空難...又係A330型號既民航機，降落時墜毀，全機完全解體....得一個小朋友生還 我真係諗.... 到底係A330既機有問題定係咁啱又係呢個型號 其實女友一早向我講話公司永遠都將安全放在第一 出事機會好細好細 但意外呢D.....真係叫我點估..點放心..?? 自從和女友一起後我都會好留意呢D新聞 當每一次出事...我都會好唔舒服唔安樂 喂...打工乍 好似搵命搏咁 妳不斷話我知飛機係世上安全率最高既交通工具 但妳唔好當我唔知飛機亦都係世上死亡率最高既交通工具呢 妳真係講得輕鬆呀 見到呢D新聞.....妳教我點輕鬆呀? 我內心真係唔多唔少都會好擔心妳呀...妳又知唔知丫...?? >>May 13, 2010 at 4:33:40 AM GMT+8
|
|
無事嗎?irene佢而家情況如何