| 日記 | 日記主簡介 |
||||
2010 年 5 月 1 日 星期六 【晴】 魚翅城課程 今日放假.... 而女友就要返去魚翅城 上佢果個咩"安全飛行訓練班" 我問....妳地唔係已經一早上過喇咩...? 原來佢地公司每隔一段時間都要考試 當中包括有 職安講座.......(講有關工作自我安全保護啦，好似安全提舉呢D啦...一二三舉!!!!) 搜索爆炸品....(心諗搜到又如何...妳識拆咩..?定諗住三萬尺高空打開機門掉走佢呀?) 模擬機艙起火情況.......(我諗係..嘩..!!!!著火呀..走呀走呀走呀...咁啦..)
開機艙門逃生.......(好似上次咁玩充氣滑梯啦....我覺得勁好玩囉..我有冇得報名..最多我比錢跳...200蚊夠未)其實我真係好想知對機艙門到底有幾咁重..??
做心外壓...(按呀按呀1001..1002..1003..1004------1015..比兩啖氣吹呀吹呀...再按呀按呀1001..1002...哎呀...PK..壓斷佢兩條肋骨呀...) 學習用滅火筒救火.....(噴佢呀....射佢呀....!!!!仲著呀....再噴呀....嘩唔得喇.....教腳呀...走人喇) 模擬機艙緊急情況.....(嘩...洗手間爆屎渠呀...點算好呀??....攞D毛巾索哂佢啦...) 常見病症的治療....(頭痛呀...必利痛啦、肚痛呀...必利痛啦、牙痛呀...必利痛啦、經痛呀...必利痛啦、仲痛呀..?咪學人坐飛機啦咁...!!!)
當然啦...括號內的全部都係講笑啦....唔講..點有得笑呢 好...認真的 其實...我覺得妳真係好勁架 上到半空..."通渠又係你..清潔又係你...派餐又係你....急救又係你....警衛又係你....比客鬧又係你......總之上到半空咩野都係妳地做 如果仲有邊個果妳工作只係斟茶遞水的話 話我知.... 我幫妳要佢做哂以上所有野出來 証明妳係有幾咁有能力照顧大家 點都好啦...真架 妳真係好叻..... 起碼...我唔識用手扣丫..... 真係警察果D手扣喎 我掂都冇掂過呀 咁仲唔係妳叻D....哈哈 明天繼續努力比心機Pass左佢
知道冇.... >>May 2, 2010 at 4:26:06 AM GMT+8 2010 年 4 月 30 日 星期五 【晴】 你望我..我又望下你....!!誰好D呀? 今日同C4一齊食飯 講起一D未來大計 都說不上什麼大計 其實用擔心將來會更加貼切 C4共有四員..如計埋我5個...其實仲有6、7、8、9個 點解叫C4..? 因為佢地4條友仔都係姓陳...而陳氏英文為Chan...取其開頭字母..C 所以叫C4... 阿C1君做緊跟車...如果響實惠店賣傢俱做送貨部 若果買傢俱分分鐘係佢送貨比你架... 而份人工就...夠比自己食啦 目前單身.... 阿C2君做假雲石，佢有個英文學名但我唔識點串個英文 假雲石好鬼死貴 當年佢由低做起.. 而家都叫做師傅級人馬 人工就...唔定...多勞多得 目前單身.... 阿C3君做紡織廠果類 工作係睇住D機器等佢唔好有事... 聽聞悶到要死... 人工就十年都係咁..... 唔過一皮...順帶一題..佢係由我地16歲開始做.. 做到今時今日....我唔知大家點睇 在我眼中我就覺得佢好強喇 捱到咁咁咁多年 目前都係單身 阿C4君呢就做睇倉 睇住個倉D貨.... 人要咩貨..點單執藥 一日要執幾十轉 一轉係幾個卡板咁多 人工就唔過一皮... 事關佢係我地咁多中最肥最肥既一個 佢知自己事都不加強求.... 安於現狀 同樣目前都係單身 之後果D人要數呢就係我呀、輝仔呀、火其呀、成成呀咁.....呢幾個唔多介紹喇 計到咁多個朋友中 得我同輝仔有女朋友.... 今日講開話.... 你就好啦...過多年幾兩年就結婚啦 我地都仲係一支公..得閒北上..哈哈哈!!!!! 其實有女友在佢地眼中可能係件開心事 我唔係話有女友而唔開心 係有左女友響香港呢個社會上 男性要負上好大責任 好似結婚咁.... 計落條數真係勁貴 影婚紗相、禮金、又唔知咩男家要過大禮、酒席、立立雜雜咁、豪一點話要講埋旅行渡蜜月.... 加加埋埋..要成10萬差不多 試問而家既我點會有可能攞到10萬出來呢... 我真係學唔到人地咁叻 一買一賣轉手有10萬賺 呢D我唔識 我只係識返工出糧..食少D..玩少D..儲錢 最多做下功課睇準D買下幾手股..等睇下有冇得賺 我有Philip幫我睇實果價..而家都ok 但又唔敢出手重...攞錢摶 有時眼見原來自己睇得準而又唔敢買..但又羸左喎....果一下真係想跳樓死咁滯 事實上我係咁多朋友中 工作最好既一個 係大公司做有福利 其實車費真係公司幫我慳唔少 只但係要儲夠錢結婚仲有一段距離 有時又好難開口問阿媽 不如借錢比我結婚啦 講到底結婚係我們兩人的事 如果要結到問人借錢 我真係又唔係幾過得自己果關咁 有時真係好煩 眼見好多朋友都結左婚 女友果邊又係咁 女友做姊姐都做左幾次 我知..女友係心急既 我記得妳有暗示過話我唔細喇.....點點點喇 係係係..我明既....難道我唔心急嘛..? 有女友可以結婚... 大家一起將來有個照應唔會悶 但冇既... 起碼而家唔使煩我以上一大堆丫 C4口中成日話想要想要 你自己考慮下有冇能力喇 到要講到..談婚論嫁時先至話冇錢冇準備有問題 我覺得呢句真既 男既就冇所謂....30歲打後都仲叫有時間比你搵 但女既如果誤左人咁多年到差不多30先話冇錢攪唔掂 誤左個女仔青春..真係好糟糕呀.... >>May 2, 2010 at 4:24:36 AM GMT+8 2010 年 4 月 29 日 星期四 【乍寒還暖】 千奇百趣中既問題 嗯.... 果D制響輕鐵錶版上有咩用..? 開估比大家知先啦 大笨象個圖案個制係......"加強架輕鐵既馬力" 通常用響拖動一D壞左既輕鐵時用到佢既 好似如果有架輕鐵響路軌上壞左或者有意外令到是但一架車冇左動力 咁有動力既輕鐵會按呢個制..加大馬力去推前面架壞車或者拉走後面架壞車既 至於果隻烏龜圖案既按鈕呢 就係"龜速"咁解.....即係超慢車啦 通常會響車廠用到佢 按左佢呢.....無論你點叫部車快都係會得...."龜速"...無記錯好似得低於5km/h 因為車廠好多地方都要用慢車移動 同埋最主要用法係接卡....即係拖卡啦 一係後車龜速撞上前車接勾 一係前車龜速後波向後撞返後車既接勾 以上兩種方法都會用到呢個"龜速"按鈕 其實仲有好多古靈精怪得意既圖案按鈕 開初入行開車時真係好似小朋友咁 好好奇奇.... 因為細個我都會偷望司機駕車嘛 而家知道呢D制既用法... 我都會覺得佢個圖案表示得算係好貼切 點講都好啦... 鐵路比較神秘感多D....因為冇軚盆嘛 我都曾經好奇過架 講到呢D錶版制...就諗起女友第一次係咁問我有咩用有咩用 試下我睇啦...試下我睇啦 我話有D唔試得架....!!! 報站廣播呢..... 我話自動架.... 咁點令架車轉彎呀? 我話架車會自動叫路軌轉架.... 我記得話...除左報站可以試下比你聽下特別廣播之外.... 咩都冇得試呀..!!! 最終我開左一個廣播出來.... 係叫乘客攞定車票八達通比本公司職員檢查 果時.... 傻瓜女友咪好似傻瓜咁講..."好得意囉" 記得妳個傻瓜樣嘛..?
>>April 30, 2010 at 1:50:51 AM GMT+8 2010 年 4 月 28 日 星期三 【乍寒還暖】 惡性循環.... 公司成日都請人.... 所以有時見到好多同事都好似唔識咁 好似交車咁 都唔知講咩好 有D人就好好口...師兄前師兄後 有D就當你透明既....直行直過...識你係老鼠.!!!! 幾經我多次探究呢D人 通常越無禮貌果D呢... 就係讀得最多書既... 讀到大學畢業講真...邊甘心同你駕車丫 所以態度都唔係太好 比人投訴就係呢群人 反而好聲氣D既係D讀到中五呀、毅進出來果D 果D真係幾好 咁又係既我地D中五生既 大學既又點會睇得你起丫 咁當然唔係所有大專生都係咁.....有例外既 有D都好好禮貌既 所以我唔明公司點解請人要請D咁高學歷既 我覺得反而請D低學歷佢反而知道冇得走... 安安份份打工 公司又唔會白白培訓一個司機 D高學歷既你果頭訓練完佢..三個月唔夠佢唔做 公司咪仲浪費自己資源... 今日我先明白點解咁多大專生先入到來做司機 原來而家公司合併後... 而家在九龍灣總部考試 考既係一份全英文既閱讀理解仲要有四篇 再加多兩條Octopus既加減數同按金交收既題目 講真.... 一個中五生、毅進生....點考到你D題目呀? 口講中五畢業就得 事實原來攞份卷出來西走你班中五同毅進既 如果果個中五同毅進都西唔走既...咁一定天份高既人啦.....但呢D人有幾多個...?? 當年Light Rail通車前... 無車牌、無學歷都考得 點解今日要為難D有心入行既人..?? 攪到公司成日流失呢批高學歷既 但同時又請返一批高學歷既返來 惡性循環.... 唔怪得我成日都唔識得D同事啦
>>April 30, 2010 at 1:50:21 AM GMT+8 2010 年 4 月 27 日 星期二 【晴】 過關斬將 今日去港龍見工 其實自己一早知港龍大廈響邊 佢係一座建築物....左右各一邊一模一樣既設計 左邊果座係港龍既 右邊個座係中國航天 我唔知點解神經病咁去錯中國航天果座 可能有靚女跟入去我又入掛...唉 因為我係跟住一班..我估應該係D空勤訓練生上去 我以為佢都係港龍既... 所以先一齊上吧 雖然好快知錯左 但我始終都真係上左去.... 而上面係怡中唔知乜乜集團既...係大陸果邊...!!! 之後我落返去右邊果座 原來兩坐都咁多靚女.... 同樣都係一大班靚女同我一齊上同一層 我先知.... 呢班將會係對手..!!!! 嘩....個個都化哂妝.... 好熟悉既設計.... 同女友既一模一樣 只係冇左套制服而轉左一套Suit 心諗...In地勤之噃....In空勤咩...? 使唔使呀...!! 心諗...好彩我都係老西著上去啫.... 如果唔係我真係要掉頭走 開初會有個職員批核我地各人既Resume...身份証等等文件 Ok左之後 我地一班一班咁叫入去In 首先係一個Group討論話題 而我果Group係得我一個男..全部都係女共8個包括我 用英文討論"如果有個客因無左張機票而爭執"你會點解決同點睇 頂丫...我差D連佢個英文題目都聽唔清楚 一開波班女已經爭住講... 呢個情況似曾相識 就係當年會考英文Oral情況 嘩....果果係咁插住入口講 好彩佢地D英芠講得唔快.... 我都聽得明佢講咩... 大家都係講要大概係"顧客至上啦...會想方法出返張票同搵個位盡快比佢咁" 全部女都圍住呢個話題講... 我開初真係唔識點答點入話題... 只係不斷咁同意人地講法 我知咁樣一定死... 唔諗D唔同解決既方我一定拜拜係咁先 我唔知果一刻又會突然話講"有點不同意做法" 我大概話雖然要顧客至上..但要同時維護公司利益，作出合適既更改 唔知呢一刻我又會諗到，可否叫其他無需要既客讓個機會出來咁 反而補償一個唔緊張機位既客人咁...(大概多謝火山形響...國泰個代表係咁講過呢個方法...!!我突然想到呢個說法突圍...) 大家講左大概15Mins左右 完結呢一Part.有得留底 我又有得Second In喎 今次係5對1既Interview.... 其中一個人用國語問你，一個用英文問你咁..又係問一大堆假設性問題咁 仲有仲問我...我做開既工同呢份工完全冇關係 點解會見呢份工 又問我有冇信心面對不同客人...(佢窒我司機係一個人自己工作唔使對住D客傾計...) 我又唔知點解又識反駁佢話... 我曾經有小意外發生 我一下子要面對全車差不多一百個既乘客 所以我認為司機都唔係唔使面對D客...(大概要多謝早日既意外..要我一下子面對咁多客...我反駁成功...) 我都相信我呢份工都同樣有能力可以...to master顧客...(我自己都覺得呢一反擊不錯..好掂) 而用英文問我果Part雖然口有點窒...但我都應答到 我覺得衰係衰國語果Part.... 自己簡直亂來...我指既係我D口音呀...(一早女友已經話我國語係我最致命一劫) 果真應驗... 成個Interview約15-20mins左右 完左佢地話會如果Pass就會通知我...(即係等消啦...) 若果得會叫我去驗身同訓練等等...... 成個面試我一出門口真係腳都軟...(泄氣既一樣咁....) 我真係冇諗過咁難 好難想像空勤要過幾關點過呀...? 女友當年睇黎應該幾勇.... 雖然話我當玩既心情去 但我去到跟本唔記得自己係去玩玩下 真係出盡120%能力...超頻應付 回家同女友講返 聽到我D對答Point...已經話我講得好好 我諗如果唔係真係國語果Part.... 我真係"坐定六粒"等入行 當年我讀書時抱怨點解我得中文、中史先係母語教 其他科全英文教 今日睇黎我要多謝佢 起碼我D英文衰極都見得下人 因為我發覺我D學歷真係好低 自己真係最低要求去叩港龍對門 對手全是大學生 轉個角度睇我都算係羸左吧 算啦.....經過今次我都真係發覺我唔係好適合呢D咁既Face to face既工作 我始終唔係一個能言善變又善辯既人 看來都係駕車適合我多一D 況且....人地肯請我先算啦 哈.....27歲先學人In呢D工..... 對手全是後生靚女.... 我又點會係對手丫.... 始終呢一行....靚D係有著數既 比我都想有一個靚女黎Service我做登記啦 而女既都想有個靚仔既Service啦 我既不是靚女...更不是靚仔...點得呢... 點都好啦.... 深刻既一次面試...體會到一個打廿個既感覺 唔去感覺下感受下都唔知 女友妳原來當年係咁"堅" 仲要去魚翅爭崩頭咁爭... 嗯....妳係得既...真的服左妳...無言喇...詞窮喇.... >>April 28, 2010 at 7:35:43 AM GMT+8 2010 年 4 月 26 日 星期一 【晴】 嚇破膽 今日好驚險呀... 下午3:50左右 有架市區的士唔知係唔係唔熟識D交通燈關係 因為呢條馬路設計係咁 三條行車線 左手面果條係只可以左轉入另一條馬路進入嘉湖山莊樂湖居 而中間和右手邊兩條就可以右轉入天湖路往天瑞邨 咁右轉果兩條就要跨過輕鐵路軌先可以駛入另一條馬路繼續行車 而交通燈呢就唔係一著綠燈就三線同時間都可以行 佢設計係會左右是但一邊行先..... 左邊係入嘉湖山莊樂湖居 而右面則橫誇右輕鐵路軌從而轉入天湖路往天瑞邨方向 因為右邊係有列車過關係 所以左右既燈先會轉法唔同 如果要右左中三線都行車的話 輕鐵一定一定要停車比車過 相反輕鐵要過的話轉右邊的車一定要停... 驚險的事就咁發生 市區的士係想橫跨路軌右轉入天湖路 而咁啱左中右呢個時候都係紅燈 三線車呢一刻都要停下來 換句話...咁輕鐵就即係可以過得 過左一陣 左面既燈轉左綠色可以左轉入嘉湖山莊樂湖居方向 此時左面燈係可以行車同時...但輕鐵都可以過得係冇衝突既 因為右邊車仲係停車狀態嘛 就係呢一刻架的士就睇錯燈喇 以為左轉燈都可以右轉.... 可能的士司機以為綠燈就可以咩都唔理就咁開車吧 呢個時候我見到我係行車許可信號...我架車就沿路軌向前行 雖然唔快....大約30Km/h速度左右 我突然見到架的士衝住轉入黎我度...真係眼都凸埋..!!! 因為的士係由中線轉入向我果度 左中右三條線中 咁啱又有一架巴士停左響左線同樣都係等綠燈右轉 巴士遮住架的士... 我跟本察覺唔到突然會有架車響巴士旁邊中線突然右轉衝向我來 到我睇到架的士時我已經駛出左可以同的士撞車既範圍 我就打直向前行... 佢就右轉欄腰撞向我來 我個腦空白一片左四份一秒 立即刹車响大咹.... 呢個時候的士都見到自己將會炒車 同樣急刹停車 畫面定哂.....我倆都停車... 我知我車應該有人因我急停而跌低 無法...我都要跳落車睇 落到去望 真係差5吋左右就炒埋來 好在大家都停得切 此刻全世界都知的士係衝燈 因為人地巴士同樣都係轉右 人地巴士都仲停車等燈中 而且我輕鐵上好多既乘客都見到係佢衝燈 乘客雪亮既眼睛話我知.....我冇錯....太感動喇..!!! 唉.....但話雖車就冇事 你的士亦都無事.... 輪到我有事呀!!!! 問車上面有冇人跌傷..... 心知今次一定死梗.... 緊急剎車喎.....唔扶實扶手就一定仆低架喇 事關跌到人又要比上面D人問長又問短......照肺都有排照 慶幸跌親都係得三個人 三個都係男中學生 問佢地....只係純粹跌親向前仆左一仆 三個都話冇事 問到佢地使唔使Call白車 唉.........我一定要咁問啦 如果個客體諒既應該會算數吧....不是我錯呀..我無辜架!!! 好彩三個都話無事唔使...咩都唔使 但點都好....我拍左E-brake就一定要比上頭問點解 只好如實向OCC報告 都係黑架喇......我始終都要比人問比人查 不過...我又冇超速又冇衝燈...而且呢個路口仲有天眼 點都唔關我事掛..... 我諗都只係比人煩一陣子吧..... 樂觀D望都係一件幸運既事喇 如果佢真係炒埋黎... 咁就真係大大鑊 因為車身係最脆弱 而且咁多人... 炒入去一定會傷好多人 之後果D路程我真係開車開到手都震埋 再次經過個路口 我好似有被害妄想症咁 總係覺得有車撞埋黎 而呢個路口...我已經唔係第一次出事 上次有部車U-Turn已經嚇死我 點知今次仲大鑊....唉.....!!! 而呢一個路口..... 在我天水圍娘家係可以望到 小時候我仲讀緊書時候 我就見過有輕鐵又係因的士衝燈而比輕鐵撞到佢夾住輕鐵同燈柱之間 架的士變左三文治..比架輕鐵推到餅左 果次我真係好深刻... 因為聽到好大聲..."嘭"......之後見到的士三文治 真係估不到我都差D有同樣經歷 我真係嚇到傻 最慘我又要扮震定 因為唔可以比D客見到我"驚慌失措"個樣 話哂我都係叫車長.... 唔可以震到咩都唔識理唔識做 唉..... 總之而家諗起都好驚..... 事情告訴比女友知 感謝女友對我安撫我心情 其實明天係要見港龍航空呢份工 我本想諗住玩住見..冇諗過做 睇黎我係唔係要認真見呢份工 安份地做一個地勤...響機場Check下出下機票..磅下行李咁便算.... 我真係發覺我真係做呢份工 真係承受住好大壓力 我真係會痴線架咁..... >>April 27, 2010 at 4:17:09 AM GMT+8 2010 年 4 月 24 日 星期六 【晴】 Interview in Dragonair 前陣子見到報紙話港龍航空請人 於是貪得意填Form入紙 其實份CV我真係寫到亂七八糟咁 心想都係玩下啫 見咪見....唔見就罷 點知一個月差不多都冇回音 無到自己都唔記得左自己有見過呢份工 誰知佢打比我問我係唔係之前入紙申請做地勤..?? 諗一諗...好似係有喎又 約你27號..下午14:00...港龍大廈...四樓啦 到時我地會比你地資料比保安 佢會比你入架喇 帶齊所有工作證明...學歷.....!!! 下..... 我心諗我見KCR果時都唔使要咩咩工作證明 我去邊攞張工作證明比你呀心諗 果刻又唔識推話唔Interview 攪到 今日要打去童軍總會搵以前個上司 下.....佢冇做喇喎(唔係掛...第二把交椅都唔撈...!!) 咁..阿儀呢...請病假喎(係...Fanny真係一個藥煲...我唔柽佢...!!) 咁...阿植呢...出左去帶Team喎(有冇咁多野做呀...做SWA都咁多野做...以前係PC就冇得講啫...!!) 咁...阿大舊呢.....未返工喎(做老細喎....擺明遲返..你吹咩...!!!!!!) 咁....Cynthia呢....返下午時間喎(又有冇咁啱呀...!!) 咁Elaine呢...佢今日Off喎...(心諗你off啦....個個都唔響度...玩咩..!!!!!!!!) 咁有邊個響度呀...?(問到我個頭有點冒煙喇....) 講左一大堆人名.....(阿A、B、C、D、E.....!!!) 我冇個識...... 冇做幾年啫.... 使唔使人去面目全非 咁...Rainbow呢??...剛醒起她....!!!佢入左房開班...(我整你個計丫....!!!!) 唉.....激死呀...咁我留電話啦.... 卒之唔知Rainbow係冇睇message定係Counter條友留電話留唔到 都係冇覆我 最後我晏D打去 終於有一個識既聽....係阿蔡~(太好喇......終於有個識架....) 唉..... 問可唔可以叫老細寫張工作證明比我呀? 阿蔡問我......幾時要....27號呀 嘩....未必得喎.... 唉....咁點都好啦...幫我知會老細一聲會我會要一張咁既野啦... Thank you妳呀..阿蔡 只好今日早上再打比老細啦.... 而港鐵內部我有入紙申請 港龍果邊...其實打聽過人工仲差過而家呢份工 但勝在同女友一樣工種...可能大家會仲有話題 咁我所以都唔知去唔去好 我又應承左港龍果邊 問女友意見如何啦 話哂都係佢地國泰航空既分公司 女友話...見下好喇 地勤你D口窒窒既邊做到丫....(頂妳丫....直接得妳丫!!!) 而且返工時間又長 又Cut醫療同福利 你要平機票..我(女友)都可以攞到啦 但搭車呢D生活費先甘喎 諗下你計下你而家一個月可以慳幾多錢車費....??(原來有二千幾蚊....) 女友所言又係冇錯 咁我應承左人喎 In唔In好呀 照去囉.......攞個經驗當玩下都好架 哈..... 萬一人請我又唔做咪好玩野 咁係咁架啦 人望高處.....港龍事實真係冇港鐵咁多福利嘛.... 最重要...結左婚我會冇左家屬乘車優惠呀 哦......!!!! 講到尾...原來係為自己將來有免費車坐 妳個正一衰婆丫....哈哈 妳D數口..可真永不會死錯人呀... 2010 年 4 月 24 日 星期六 【晴】 厭倦的工作 今日返工見到公司內部請人 請控制室人員既工作 其實自己開始討厭呢份工作 因為壓力好大 我真係好怕終有一天撞傷甚至撞死人 唔係話自己手車唔得 係D人亂過馬路 我睇唔切反應 已經試過好多次 我亦都唔嚇得幾多次 真係好攞命 而且升職真係好難望 無十幾年經驗都唔使旨意 加上而家係地鐵接手 公司制度更加不堪 D人Cut得都Cut 單看看西鐵客務中心就知啦 關得都關..縮得都縮 大公司就係咁衰.... 其手段拍得上國泰 我地都應該罷下工先得喇睇黎 香港係一個餓你唔死既地方 亦都係一個飽你唔死既地方 唔係話多勞多得 有時真係做足百兩..倒頭來得半斤 如果我可以做到OCC.... 我就可以響控制室調下車做後勤安排 嘩....爽死呀真係 但係而家.... 你都係死去駕車吧..... 不知何年何月何日才有轉工的機會喇 果然... 細個唔讀書...大個做運輸..!!! >>April 24, 2010 at 2:17:17 AM GMT+8 2010 年 4 月 23 日 星期五 【晴】 假期的經歷 放工回家像死屍一樣 睡死了... 瞓到不知天日..天旋地轉 到外地玩左幾天得來一段快樂的回憶之外 仲得到一個好像不屬於自己的身軀 總之攰到不得之了 在台南墾丁玩左幾天再玩上台北 一場無準備的行程 拿住本書就行 真係幾好玩幾得意 仲有...今次係我咁大個仔第一次坐商務機位 之但係得一個鐘多D機程 響受??不見得囉.... 托女友既鴻福.... 我可以用平平既價錢去玩 還要多謝同事們捱義氣幫我調班 OK....之後既豬骨我包底...無問題 在台南我好想學一樣野 就係浮潛..... 有衝動去考個牌潛水... 去到台北再去食麻辣火鍋 太棒喇...又平又多野食 女友又大手入佢既面膜...!!! 而我都係食..食..食..!!! 去多一次淡水情人橋 其實今次真係走去行下 連酒店都係即時走去到Book 難聽D講句...Book唔到就真係聽瞓街 到回程到桃園機場之前book好左機票 最初還以為咁好彩book到大家一齊坐 到最後竟然出了岔子 有個客book左我們其中一個位 基於公司利益關係... 女友或者我是但一定要讓個機位出來 如果無機返香港 我同女友就要各自回港 幾經爭取....乜位都殺 女友勉強咁book到個Crew Seat..... 回程大家一個坐機頭一個坐機尾 都好既....起碼叫做坐到機返港 嗯.... 自從同女友一起... 我這個大鄉里多了機會出國見識 諗住下一次去阿姆斯特丹睇下 女友講到果邊鬼打咁靚又鬼打咁正 我都心郁想去 不過...講真.... 又要撞正我有假、碰正女友又有假、又有兩個機位等等、天時地利人和 去唔去得成都言之過早 現在發覺鐘意左燒銀紙的玩意.....就係旅行 唉......自己搵得少少...嗜好多多 真係麻乜煩呀自己 >>April 24, 2010 at 2:16:47 AM GMT+8 2010 年 4 月 22 日 星期四 【暴雨】 回歸 終於返來喇 同女友走左去玩左幾日 剛剛先腳踏實地.... 好攰呀 可悲係明早就要開工 傻瓜就好啦 還有假可以放.... 妳還可以大覺瞓 我要開完工先再可以瞓 不說喇.... 瞓喇.... 唔係朝早真係恰住眼開車咁就大大大鑊喇 >>April 22, 2010 at 1:13:55 AM GMT+8
|
|
無事嗎?irene佢而家情況如何