| 日記 | 日記主簡介 |
||||
2010 年 8 月 30 日 星期一 【清涼】 痛得很呀 無錯架 霉開真係有條路呀 確實唔想多講 因為而家仲鬼死咁痛 連食野都有困難 件事係咁既 傍晚時候我駕住架孖仔 如果有坐開706線都會留意到 於天富站呢 車長會下車休息直到下一班車來為止 即係咁... 全線合共有6躺車..行走706循環線 6躺車...現在暫叫A、B、C、D、E、F 如果我駕B果一躺車時 當到天富站時我就會下車 比之前駕第A既車既車長接手我架車 而我就會等C果躺車來 接手C既車 如此類推咁.... 車長落車等駕下一架咁喇 就係呢個等車時刻 我就打開個袋攞香口膠出來食 一直食到車到我都照食照咬 一邊開車一邊咬香口膠 正當我咬得很暢快之際 我一唔自己咬到自己既嘴唇 呢一下無情力 咬到我自己立即係咁流血 咁我駕緊車架嘛 唔開以停車幫自己止血 但佢真係流得好厲害 雖然我自己既血係可以吞回下去 但可惜我本身自己好抗拒吞自己既血 唯一方法我只能不斷用口兜住D血 最後都兜唔住流出黎 仲要整到自己件制服都係血 個天都唔係唔係玩野 行車路面仲要支支燈都要停車 停車都唔打緊 正當我想攞紙巾出黎時 佢又轉行車訊號 一直係咁我要捱到天水圍西鐵站先有得幫自己止血 但係此時已經整到件衫有幾條血漬 都算數喇 我仲要止極都流血 但呢一刻又要趕住開車 我狼狽得要自己咬住舊紙巾 塞到一口紙巾 勁痛苦又勁辛苦 最慘既.... 我仲要大熱天時著件風衣遮住自己D血漬 免得我人地以為我殺人呀 但換來係焗到我一身汗.... 苦上加苦 好不容易又輪返到我去到天富站 我先叫做有D時間整理自己 到情況穩定好自己睇睇 個嘴唇內面腫哂 變左一粒好大好大既痱滋 而家我連飲水都痛 回到家女友見我件衫咁就出手幫我洗左攤血漬 我開頭還以為一定洗唔走 點知乾衣後新既一樣冇分別 大讚女友妳好叻呀 女友話....... 呢D事情...女性一定會識得點洗 因為佢地經驗豐富 開頭我還唔知女友講乜 諗左諗先知..... 哦.......原來係咁..怪不得咁熟手啦 唉...而家我都仲係好痛呀 可知我刷牙時D牙膏點到粒痱滋一剎 真係痛到眼水直流 嗽口水更加可能用到 我估咁大粒一定有排先會好 之不過呢個時候能夠有女友親手幫我搽藥膏 都蠻有點幸福既感覺 謝謝妳呀..... Email中阿芯女問我架多啦A夢飛機係咩樣 影左相比妳喇... 咪就係咁囉
Japan Airline 多啦A夢"人魚大海戰"拉花，上面果架係1:200，下面果部係1:500. 
空運返黎既JAL Boeing 777-300ER 多啦A夢正面既"人魚大海戰"拉花 
呢架係1:500既模型 
呢架係1:200既模型 
>>August 31, 2010 at 3:18:29 AM GMT+8 2010 年 8 月 29 日 星期日 【乍寒還暖】 繼續黑下去 昨日工作上...先入錯線出事 今日我娛樂上都出事 女友今日返工 我自己一個人放工就去機舖打下機啦 我玩灣岸DX賽車 呢個Game要用咭玩 一張咭可以玩60次 玩夠60次就要比錢Re-new張咭 今日我Re-new時 部機中途死左機 攪到食左我咭之餘 分分中會令我辛苦打返來既記錄化為烏有 無可奈可之下向職員求救啦 職員話未必可以幫到我還原返張咭 因為要睇供應商果邊既技術支援出手先可以 有可能還原又可能會冇哂所有野 此刻我問自己 我得罪左咩人呀 黑到咁 無法啦 只好留電話號碼等資料....等消啦 唉....返工又係咁..玩都係咁 好唔開心呀 夜晚接女友放工 告訴女友知 女友同我講.... 咁咪好囉....以後都可以唔使玩 咁大個人仲去機餔玩.... 我話..... 我又冇咩朋友 熟果D佢又要返工 而且大多人知我拍拖後都少左搵我 我一個人好悶架 況且我玩都係玩10蚊啫 咁都唔算過份吧 咁等妳放工.... 返屋企出黎又趕時間 但放工直接去接妳又早過頭 咁我先去機舖之嘛 女友聽罷後 講...... 下次去圖書館睇書仲好啦.... 我無言呀..... >>August 30, 2010 at 2:36:31 AM GMT+8 2010 年 8 月 28 日 星期六 【颱風】 入錯軌事件 今日返工做錯事 唉...... 自己又係衰既 臨收工時 我架車係收返去屯門車廠 但自己冇轉返個路線牌之餘 仲冇Set返電腦個方向 攪到架車仲係載客狀態 卒之我電腦出錯而入錯軌 果一刻...發現轉錯彎...我先如夢初醒 雖然係吉車冇客..冇影響 但就要報比OCC知...已經夠麻煩喇 焗住我架車響元朗兜左個大運先返屯門 慶幸我個底算係乾淨唔花 亦第一時間滙報上控制室OCC...冇隱瞞 呢D算唔算老貓燒鬚呢 我都做左好幾年啦 真係估唔到衰響呢舖手上 仲要比師弟妹知道好瘀呀.... 回家向女友訴苦..... 最後女友見我死哂狗咁就請左我出街食飯 比我拍板去邊食都可以 我後來選擇左去食扖王之王 賣單都唔平呀 食完仲要返屋企寫報告 合拼左既公司真係好麻煩 要用英文寫.... 明明以前可以用中文架嘛 大家知我咩料啦 英文始終都要女友出手幫我寫 我一邊講事發經過.... 女友佢邊聽我講...就起個稿比我 最後...我親筆寫返出黎 兩個鐘唔使 攪掂..得左 謝謝妳呀... 無限無盡既感激.... 冇妳真係攪唔掂....我什麼都會攪不好 >>August 30, 2010 at 2:36:02 AM GMT+8 2010 年 8 月 27 日 星期五 【乍寒還暖】 過馬路 女友今日返Turnaround 我要返工....送唔到女友去返工 我地兩個各自各返工 女友響天招呼D客 我就響地面招呼D客 講真.... 有時都幾厭份工作 D壓力大到呢..唉 好似今日咁 又有個阿婆亂過馬路 我差D就賣佢單喇 有時真係唔想話D老人家 但係我真係頂佢地唔順 咩D車會唔識撞D老人家架 大家可知道嗎 有一次個響元朗某一條街等燈過馬路時 條路D車出名又快又急又多人衝黃燈 呢個時候有個阿伯拖住個小朋友 衝紅燈... 咁小朋友天真無邪當然會話..."紅燈呀"唔過得 之後你估個阿伯講乜.... 如果當時聽到你都會側目 "過啦....D車呀唔會撞阿公阿伯架" 嘩....... 呢D為老不尊咁教細路 心諗你唔好響我返工先過馬路 我車死你真係冇命賠比你呀 香港真係多得呢D咁既馬路阿伯唔少呀 願我永遠都唔好見到佢 真係講難聽D唔係佢死就我死呀 害人精....唉! >>August 28, 2010 at 6:25:11 PM GMT+8 2010 年 8 月 26 日 星期四 【暴雨】 這一次人禍 今日同女友佢出街諗住食野 正頭痛去食咩好時 女友佢提議不如去酒樓飲茶 同女友一齊咁耐呢 我地飲茶既次數真係十隻手指數得哂 去到酒樓就係代表有排坐啦 唔坐到屁股爛都唔捨得走 呢D先係嘆茶嘛 飲茶不可少既野就係報紙 但當舉起報紙一睇 女友佢一路睇.......一路鬧 鬧乜...? 咪鬧挾持人質流血既事囉 又真係既...佢地D救人方式..真係不知所謂 報紙既圖片真係令我不自覺想起當日直播畫面 開初話D人死哂已經心都寒一寒 但我始終都半信半疑 佢既籌碼係人質... 殺哂佢搵咩同人傾呢 所以我都唔信當時係死哂人 當見到警察強攻巴士 我以為...掂喇....終於肯攻入去救人 但估唔到係佢地係去巴士下面拾下拾下咁 好似去到巴士旁邊先相討點做咁 佢地比我感覺對話係咁 我地去到巴士度....不如試下打碎玻璃窗啦....幹佢丫.....原來扑唔穿架喎 唔打緊..我去拉車門.....拉呀.....妖...原來拉唔郁既 去到太平門....喂你地邊個識打開佢呀??掂...打開左...我隻身上去睇下先 嘩...走呀..佢亂槍掃呀....!! 我覺得佢地似係D十幾歲小朋友去玩野外戰既遊戲咁 冇策略、冇部署、冇默契、冇裝備、冇腦....一D都唔果斷 就連普通市民都睇得出有問題..... 有咩理由會攞咁大支槍入去救人 架車咁細咁窄.... 咁大支槍跟本自己阻自己 呢幾天都係呢D報道 每睇一次就鬧一次 雖然我唔識佢地.... 但心真係好難過 睇到呢D新聞 真係連叫左既點心都冇胃口食 同女友不斷討論呢件事 大家既結論只有無奈 天災冇得好講 人禍係可以避免 就係人禍而處理不當咁先叫人痛心疾首 有誰會估到十幾個鐘頭前仲開心去旅遊..影相留念 十幾個鐘頭後就已經離開塵世 如果我係受害生還者.... 我估我呢一生都唔敢打開相機睇呢次旅行影既所有相 只係代入佢地心態已經知咁痛苦... 何況係親身受害者 真心地同女友講 自己一個人響外面要小心D 女友歎氣咁講... 有時候...."是福不是禍..是禍注定的話都躲不過" 教我點去避呢? 飲完茶我地都特登去民政事務處簽弔唁冊 算係比人地一個支持啦 我都想佢地可以快D過到新既生活 忘記不快事 >>August 28, 2010 at 6:28:31 PM GMT+8 2010 年 8 月 25 日 星期三 【雨】 舊物件 今日放工回阿娘家 驚見阿娘放假 平日阿娘放星期四或星期五架嘛 而放假見阿娘響度執屋 係大執果隻 反轉間屋咁執 良久阿娘比返D野比我 望一下係我D超舊既野 全部都係我中學時代既、做兼職既時候、我第一份正職既時候既物件 真係唔見返都唔記得我們有D咁既物件喇自己 中學時代既有.....地鐵乘車證、紅十字會既Booklet、人手登記圖書証及後電腦化既借書咭 返工時代既有我做七仔既....名牌(而家已經冇架喇呢D款) 仲有係我做第一份正職既..返工照片、另一張係當年同事Annie離職送比我既咭 見返呢D野... 我就諗起以前喇 過去既事真係令人回味.... 睇返個7-11便利店個職員膠制名牌 我就諗起舊時的她 當時既她真係幾好性格架 仲有名牌既背面係D條碼既代數 係用於收銀機既 尤其係報紙係冇得過Code.....就係靠呢D數字喇 而且我地入單都係靠佢 不過我記得當時既我係已經背哂佢所常用既Code 到而家我有D都仲記得 有D而家用既Password都係用呢D數字做同代替架 有成13個位既數字.....夠哂保密呀 跟本我攞起本Red Cross Booklet就諗起讀中學時 就係Red Cross令我認識到當時Form One 校花阿熹同埋慧玲呢兩個孖公仔 而家阿熹都結埋婚有埋個BB喇... BB仲係過等五個月就出世喇 慧玲而家就響中學教書.... 各自各精彩 而女友都記得當年我著住Red Cross既制服個白痴樣 緊係記得啦.... 全班得我同另一個同學係Red Cross既成員 睇返本Booklet先知道我出席既活動真係少得可憐 真係為左入Red Cross接近一下校花吧 圖書証未電腦化時 只可以借三本書 睇到呢三張粉紅色咭我就記得我申請既時候 我記得係同我表弟一齊申請既 當時仲有阿娘簽名添 後期電腦化左就變左"區域市政局"既版本 其實我開初仲以為唔見左 仲走去申請過張新既 就係而家大家用果一張喇 望見以上既物件真係令人回味呀 諗起10幾歲既我都算係開心同快樂 如果能夠比我行多一次呢段時光就好喇 7-11名牌背面既貓紙. 
名牌既正面..當年好求其...只係攞印仔蓋個名 
嗱...呢本就係紅十字會會員既booklet!! 
紅十字會會員既booklet...1995年架..轉眼都10幾年喇..!! 
紅十字會我當年訓練過咩都唔記得喇....最有可能應該係步操考核訓練 
地鐵學生乘車証、當年既工業學院既學生證..而家叫IVE啦、仲有Annie送比我張咭 
粉紅色係未電腦化既政府圖書証...綠色係後期第一代既電腦化圖書証 
Annie寫比我既說話呀...!! 
當年童軍總會既同事......左邊果個係明阿Ming..中間係Mui Mui...右邊係阿琪 
>>August 28, 2010 at 5:19:53 PM GMT+8 2010 年 8 月 24 日 星期二 【雨】 估不到 今日..... 冇睇錯日子喇 放工走左去接女友放工 一去到機場.... 嘩...... 人呀、警察、機場保安...記者多到呢... 大概大家都爭住採訪馬尼拉一事吧 終於都有機會見到D新聞主播 眼見好似佢上電視顯得佢靚女一D 但......我只認得呢個人...就唔知佢叫咩名 哈...認人唔認名嘛 抬頭望下塊"抵港飛機顯示版"睇下 女友佢應該已經到左閘口喇喎 再望下時間遲左半個鐘都未到 心諗....唔係嬲到而家嘛...? 嬲到要混路去避我嘛..? 電話又唔通.....!! 最後我都係選擇企定定等 過左一陣終於見到女友出來 第一個感覺女友好似已經冇咩咁喎 諗住開個講題試探下佢之際 女友佢話買左D野比我 佢連隨響大黑度攞比我 份野用個紙袋包住 女友佢叫我估係乜.... 用肉眼跟本冇可能估到 長方形一盒既野 之後...佢比我摸下個盒... 都冇可能摸到 完全都係一個普通既盒 最後女友叫我睇....... 原來係一架日本航空既1比200既飛機模型 佢特別在係印上叮噹..即係多啦A夢既...最新上畫電影既宣傳廣告 真係估佢唔到....女友佢會突然買呢D野比我 有點摸不著頭腦 幾日前女友仲嬲到我咩咁 返來又買野比我 終於我忍唔住問女友 妳唔嬲我喇咩....? 女友反問我....."你係唔係想我一直嬲下去呀..?" 其實...女友佢真係對我好好既 雖然果頭話嬲... 但始終個心都會諗起我... 都會有心思咁諗買野比我 上到巴士我同女友講Sorry....關於上次果件事 女友話..算了吧..過去喇 呢一刻....真係好覺得對女友唔住 上次我私自咁向女友父母講 我的確冇諗過女友既感受 我的確係幾抵死既....係抵比人嬲呀... >>August 28, 2010 at 5:17:20 PM GMT+8 2010 年 8 月 23 日 星期一 【乍寒還暖】 難忘既823 睇錯日曆今日我.... 還以為今日係24號 工....當然都返錯時間啦 不過好彩係我睇錯時間而早左返去 如果遲左呀....哈哈哈哈哈...聽死等照片啦你 看錯日子..... 什麼都錯哂 女友明天先返香港至真 但對某D人黎講... 今日真係今生今世都會記得 早上打開電腦講外地有人脅持旅遊巴人質 一睇到有關香港既 第一下我係諗....咁唔好彩..??應該好快冇事吧 我都相信當地警方會好好咁處理 所以我都再冇理佢...冇留意佢 到左放食晚飯 去餐廳叫左個晚餐食 餐未到我就睇餐廳部電視 真係睇到我火都黎 我個餐黎到係冇心情冇胃口食 原來呢D叫特種部隊.... 掉螢光棒.....仲乜.中秋節呀...比佢形造氣氛呀..? 用條短命繩拉車門....白痴都知冇可能拉得開啦...車門係向入面推架...拉邊拉得郁...? 用鎚打極都唔爛既玻璃窗.....我想問佢冇食飯定係車窗係特制..? 睇返之前既片段... 個槍手Show up咁多次出黎.... 點解冇人可以冇人做野......辣底佢 真係好多機會可以置個槍手死地 我覺得個槍手見到班差人咁做野都笑呀...唉... 最後都要有人死而收場留哂血做結尾 一向都覺得自己冇咩血性既我... 睇到D人係抬出黎真係睇到我心都酸 試諗下一家人去玩 一家人完整咁搭飛機去當地 去果程..坐響你身邊仲會有講有笑... 返果程..身邊少左幾個 假如其中一個團友係我 我真係唔知點算好 回家上網睇返D片段見到 早期既人打開窗簾向外望出無奈無助無援既樣 真係我都唔識講 見到咁既情況 我對當地既警方完全冇信心 我話過別冇選擇下我都唔會去呢個地方 成班差人都係正一飯筒..... 係唔係冇人比錢佢做野呀...? 我深信件事響香港發生一定唔會出現呢D結果 望返轉頭..人真係化學 今日唔知聽日事 當中有邊個會估到 呢個人一個鐘前正同你講野...一個鐘後佢已經比人殺死響你面前 但係事情都發生左 人總要向前行同望既 希望當事人會振作啦 其實談何容易丫..?? 只係要醫個心理都有排醫 唔晚晚發惡夢就假喇..... 望望個鐘呢一刻 女友應身在NRT既酒店應該都會睇到呢單新聞 其實能夠生存都係一種褔氣 我地仲要響香港呢片樂土生存 不知妳睇完呢單新聞有咩感覺呢... 我,既感覺係...珍惜而家既擁有囉 可知呢一刻真係好想見到...可以觸到妳呀 >>August 24, 2010 at 3:22:49 AM GMT+8 2010 年 8 月 22 日 星期日 【酷熱】 到底..有幾了解? 返工...等放工 今日仲要響天水圍兜足八個鐘 真係人都癲 本身已經煩 兜埋呢D路線 我果刻直頭想咬人想打人 咁啱今日George又係同我一條線 706線每一躺交車時....總會有幾分鐘大家碰到面 問到George同佢女友如何呀? 見到佢笑笑口咁... 得啦得啦.....唔使講喇....我唔想聽反正 果然George都唔係傻 佢都知我大概發生咩事 我諗睇過我email既人都知咩事吧 George講...女仔都要時間去氹既 比D心思啦....諗下心意嘛 試諗下佢鐘意D咩...? 我真係有諗呀.... 先發覺自己...女友最鐘意同需要既野都唔係好清楚 平日每事都係佢Take care我多 而家要我諗女友最鐘意咩 我好似真係唔多"肯定"咁 呢樣好似鐘意..又好似唔鐘意咁..... 唉....我都攪不清楚 難怪女友有時對住我都搖搖頭 還有一晚時間 我楔高枕頭諗下啦 希望明晚女友返工時我可以趕得上吧 >>August 22, 2010 at 11:57:43 PM GMT+8 2010 年 8 月 21 日 星期六 【清涼】 教我怎做好 我係唔係真係好討妳厭 明明妳都唔使返工Dayoff兩日 而家妳就Swap走兩日去返工...星期一先返..!! 連制服都唔換就出家門口 好似想有咁快走咁快咁樣 記得妳話返公司換衫係好唔方便 但係妳情願唔方便都要返去換衫 我氹又氹過喇，講又講過喇，解又解釋過喇 妳還嬲我什麼喎.... 只係告訴妳父母知就對我係十惡不赦咁嘛...? 告訴我怎做妳才會嚥下這啖氣呀? 在家中妳真係唔同我傾計 妳可知道妳唔作聲真係好可怕 我又唔敢再亂講說話 怕講多錯更多...到時妳仲更嬲 我真係好想同妳好似平時咁 有說有笑呀 而家我冇什麼期望喇 只想妳今躺行程可以撲滅妳既怒火 回來時會理睬一下我 一句傾計既說話也好丫 現在既我連返工、放工、無時無刻都想著點去氹回妳開心 無論如何 妳放工返黎..我會在我地等候妳既老地方等待妳放工出來 真係好盼望妳回來見到我會肯同我說話 我響度肯定地講妳知 就算發生呢件事咁樣對我我都唔會離開妳 我點都唔會走 我一定會氹到妳向我說話為止.... 朋友們 大家如果當我朋友的話 可否教我有什麼方法氹回我女友 我會好感激你架 有誰可以教我點做呀? >>August 22, 2010 at 9:49:57 AM GMT+8
|
|
無事嗎?irene佢而家情況如何