| 日記 | 日記主簡介 |
||||
2010 年 7 月 11 日 星期日 【清涼】 職業病 唔知係唔係職業病開始來喇 我左手臂開始陣陣痛 其實我地係用手來控制車既速度 而控制速度既果支桿叫Deadman Switch 我唔知點解個名會咁古怪叫Dead- man - Switch Dead- man - Switch (死人按鈕...) 當然照我不知所謂既書面解釋啦 我估咁叫係指....佢死都要有人壓下去Dead- man既控制器Switch
其實Deadman Switch有點微妙之處 每次推動呢支Deadman Switch時候 我地都要用少少陰力去壓下去先可以推前或拉後 假若鬆開手不壓下去的話 佢兩秒後會自動刹車 佢毎設計係保障行車安全 如果個司機行車時暈左失去知覺 都唔會因為Deadman Switch繼續推前...變成無人駕駛咁 因為人失去知覺應該係會出唔到力壓低呢支Deadman Switch 當唔壓低呢支Deadman Switch..車就會停 所以咁... 我地返工都要用陰力壓低佢開車 長久下去....攪到手臂開始痛 而家我雖然不算嚴重 只要搽下藥膏就OK止到痛 不過長此下去... 我唔知會唔會有大問題 不過每份工都會有佢隱藏既職業病 女友佢而家間中都會話腰骨好痛 因為佢要踎高踎低... 有時會頭痛...耳痛.....呢D大概係氣壓問題 但人要搵食...又可以怎樣呢.... 咪只有避重就輕...忍下囉... >>July 12, 2010 at 1:57:58 PM GMT+8 2010 年 7 月 10 日 星期六 【酷熱】 女同事.. 響早前已經收到風話有個好得既師妹 成班好色之徒都響度評頭品足 係咁講講講 當然我都八掛一份啦 問...真係咁掂...? 今日返工轉更時終於有機會見到佢 的確佢真係咁多個司機中最掂最靚果個 我地交更時好多時都會講一兩句 交代一下架車點點點 今日我同佢講野既時候真係有點面紅 佢講野又陰聲細氣..溫溫柔柔咁 最攞命係佢開過既車 響駕駛室留底一陣淡淡香水味 唉....唔怪得攪到班80後司機神魂癲倒啦 不過大家都心照吧 呢D貨色一定有男朋友架啦 我諗班宅男司機都冇行.... 咁掂既女司機真係第一次見 等女友返來時 我都要篤比女友睇.... 比女友見下呢個女司機先.... 哈哈.....我一定係搏打定喇.... 過幾日女友就會返來.... 咁耐見唔到... 好掛心呀... >>July 11, 2010 at 5:07:57 AM GMT+8 2010 年 7 月 9 日 星期五 【清涼】 慳... 今日一個人回家冇野好做 女友又唔響香港 食野都要自己攪掂佢 一係出街食、一係叫外賣、一係自己煮 呢幾日我都係出街食.... 一個人食野真係好鬼悶 真係好怕一個人 但自己又諗..如果佢係玩得開心既話 我悶幾日都冇咩所謂啦 反正女友都就快返來 好......我忍多幾日 今日我叫左個外賣pizza返黎食 一個人食一個批... 哈...真係第一次 原來真係食唔哂... 我諗我食咁多次pizza最苦悶係今次 仲要今個pizza係勁辣 內裡有D指天椒 我仲要唔覺意咬中... 辣到我飲水都唔得.... 我又飲汽水、凍水、橙汁.....但個口都係咁辣 最尾我要含住冰..我先止到辣 我諗我連半個Pizza都食唔哂既原因 係我飲水止辣都飲到飽 都好既... 仲有六件食剩既 明天又可以當一餐食 又洗少一餐飯錢 睇黎女友放底既零用 我自己都可以慳到一筆比自己 果然... 一個人真係唔使點用錢架... >>July 11, 2010 at 5:05:31 AM GMT+8 2010 年 7 月 8 日 星期四 【清涼】 獨想 冇左另一半個家好靜 唔知妳玩得開唔開心呢.. 唔知妳而家做緊咩呢 唔知妳有冇諗過一下我咁呢.. 放工我冇立即回家 因為我知返屋企都係冇人 我又唔睇世界盃 同D同事又冇話題 而家個個同事都講波..又哭波喪...!! 我跟本完全冇野好答咀 放工..有同事叫我一齊睇下波飲下酒咁... 我又拒絕左 因為我真係對足球一D興趣都冇 我可以知道答到你巴西輸波已經好叻.... 況且我要返早..... 我又唔想掂酒 雖然過時間應該足夠...過左陣酒氣 但一陣捉到吹波波就唔好啦 咁自己一個人唯有自己搵節目 行呀行....搭車不自覺又搭到東涌鐵路站 於是把心一橫... 搭S1機場巴士去機場睇下飛機 呢D睇飛機既病好明顯係女友妳傳染我啦 終於走左上天台睇飛機起飛降落 烈日當空咁曬住睇 好彩自己早知會干煎 早就買左兩大支水一路睇一路飲 平時同女友睇同講下呢架機係點... 停機坪D人做緊D乜....果度又係點咁..... 妳會講比我知... 因為停機坪情況妳好清楚... 但今日得我一個人睇 我焦點唔係放響飛機 我係毫無焦點咁望... 只係漫無目的咁諗野.....諗左好多野 好多事好耐既....我都會慢慢咁想起記起諗起 Irene話我讀書時點點點.....好多既舊事 我又好似記起.....又好似係喎 Ex女友既事....我好似當年有野應承佢但我又冇做過喎 又諗起細個時點"對付"我個妹....(當然佢會報串比阿媽知啦...) 我不其然咁笑出來 又諗起7年前我撞車時...ex女友點幫我解圍，點幫我頂左D賠償..(果陣真係勁冇用呀...嚇到六神無主咁) 想到其實ex女友開初唔係咁既... 點解會變成咁.... 又諗起ex女友分手時做既所有事 真係好感慨 當然..我又諗起Irene當日碰面時既樣啦 真係唔認得佢...但又奇怪佢叫得出我名...(梗係...返工時我有掛職員証嘛....白痴!!!) Irene比我見返第一個感覺就係紅噹噹利是封... 又突然記得佢果句...."我都係同你一樣做跟車啫..."只我架車曉飛啫(當時我同佢講細個唔讀書大個做運輸呢個道理...) 又諗起Irene當日比人蝦....當時Irene點縮埋不願意又要迫住向我講整件事 當日亦都係我背住女友去抱實Irene..... 諗起當日點同佢個男人講數.....(好勁我都覺得自己...點解我會有勇氣咁做..?) 又記起Irene響我將近分手時點樣關心我 又諗起我果晚流住眼淚同Irene講.....我同女友分手 我今日諗...或者我響好多事情發生之前...我已經對Irene有好感 我諗緊點解我分手好似冇人地咁..咁要生要死..咁痛苦... 或許我當時早已經心中暗地喜歡佢 我今日諗當初有冇盡力救過果段感情...?(答案係....冇....唔可以話冇....我認..我冇...盡力..) 其實原來我早可能心中暗地喜歡Irene...但又內心不肯承認 原來我都係一個會變心既人......(天下烏鴉一樣黑..) 果然...分手真係關兩個人既事....一個人係唔會成事 結果...自己分析自己都係一個衰男人....只係唔係衰到貼地果隻吧 之後我又諗同Irene一齊後既事 我第一次接Irene機時落雨兩個人一齊用一把細到死既縮骨遮(厄我冇遮....原來想兩個人用一把.!!!) 好浪漫咩??? 濕哂個身呀..記唔記得呀..仲要坐架鬼咁凍既冷氣巴..凍到我落車 又要比件風褸妳蓋怕妳凍親，其實我自己都凍到震..(點解男人要有風度...??) 回到家先話我知...我有把遮其實...但唔想攞出來....!!(我真係暈呀...呢世都記得果日呀..) 不過...今日諗起呢件事...我都識得笑既..(唉...妳個衰鬼丫...) 諗起開初妳經常怕我走左去.....(真係得啖笑...我點會走左唔要妳呢..?真係唔明點解要咁諗..要我解釋咁多次~) 又諗起妳因為我隨口一句.....妳就做左個一模一樣既蛋糕比我...(仲因為我唔捨得食..比妳鬧..) 又諗起我破壞過屋企幾多傢俱....(妳都算忍得...) 諗起我用熱水燙傷妳要入院...... 妳果撻疤痕...雖然冇人見到...但我諗起都覺得妳痛(我嚇到不知所措...要妳叫我定D啦...我冇事..) 其實我好怕妳在意果撻疤痕...但每次妳會笑住講..我把長頭髮蓋住冇人會見到...除左你 諗起上次我電話主題既事....第一次見妳會咁嬲，原來唔接電話唔出聲既妳係好恐怖 當我醒一醒望到飛機留意到佢個渦輪引擎時 我又諗起妳竟然背住我比人抱上去坐去個渦輪引擎影相....(哈...當我死的嗎..??我都會呷醋呀..) 最攪笑妳仲主動比張相我睇.....(唉....冇人收呀....咁夠薑!!!) 其實我唔止諗起咁少事 仲諗左好多.. 但係以上係我而家仲有記憶 我響天台足足企左幾個鐘 企到天都黑 黑到連架飛機飛到黎我都差D睇唔到佢係咩航空公司既機 不自覺我曬到由出汗到吹乾...直到件衫有汗味...(自己都頂唔順..) 毫無方法之下 只好著返件制服頂檔(好彩我懶冇返轉頭返底套制服....如果唔係一陣味都唔知點返屋企...) 行到T1客運大樓..... 望到好多妳既影分身....(利是封同火龍果拉住大細黑...不過以情快不再..遲D妳地會轉新制服) 望真D...先覺得..原來妳都算係靚既果批人 嘩...有D化左妝都好似好唔掂咁 係佢做機做殘左丫...定係點...唔知喇....(唔講...再講得罪好多女人...) 等多幾日妳先至返來.... 快D返來啦 一個人食飯好悶呀 講到底....我都係一個極怕悶既人.... >>July 9, 2010 at 7:22:25 AM GMT+8 2010 年 7 月 6 日 星期二 【清涼】 得妳一個 今日收到女友既信 但今次收既係明信片 一張風景好靚既明信片 睇到相片中既風景 攪到我都好想佢日本沖繩玩 去響受陽光與海灘...感受下水清沙幼兼海風 但係照睇時間表計算 我有排都冇得放大假 玩....真係暫時唔使旨意 真係好想放假陪下妳呀... 而正話放工後 去接Chloe機 呢個係妳既Order 因為妳托Chloe買左好多野 當中有食物調味包、書、同埋一D飾物 所以妳先會預知Chloe個大細黑都會好重 亦都係咁...妳先至會叫我幫一個"弱質女流"攞大細黑 的確....Choie個大細黑真係好鬼死夠斤兩 好不容易先拉到去答機場巴士 都唔知係唔係真係有心玩我 上到巴士見到個行李架既下中兩層都比人塞滿行李 我焗住要放上最頂一層 果然我一個人真係都攞唔起佢 要Chloe幫埋我手先可以成事 我就係咁塞住條路 令到D人上唔到巴士 我心急時又舉唔起佢呢兩件大細黑 果刻真係瘀到爆 因為我要個女仔幫手先至放到上去行李架 仲要塞住條路....阻住哂 唉...... 我睇黎都要得閒做多D運動先得喇 今次呢一躺係妳要我去既 妳未去旅行時已經叫我幫手 我問妳..... 我同另一個女仔出街喎...... 妳唔怕我會做D咩出黎呀... 點知..妳咁話... 話我今次都係同男仔去旅行..... 比我同女仔去... 當打個和.... 嘩.......我心諗.....呢D事都有得和數架咩...? 真係夾硬來呀....! 之不過我都相信...妳會相信我 我一樣會信妳 其實兩個人一齊有時都要講個"信"字 講真丫... 我對自己既女友好有信心架... 但係我假設地去諗... 如果妳真係背住我同其他男仔一齊我會點 我...我諗唔到 或者我冇諗過會有呢D事發生.. 因為打死殺死我都唔相信我女友會做D對我唔住既事 若真係要我諗反應的話 我估我會精神崩潰...我會唔信我係現實世界發生呢D事 我諗我真係會好打擊....我會真係痴線，真係入青山果種痴線 我已經肯定係自己百分百咁信任對方 如果女友行為否定左我之前既信任 我真係會精神失控 同樣地... 我估女友都係同我相似既 假若我背住妳同另一個一齊 妳反應都係應該同我一模一樣 可能妳既反應會更大 女人天性報復心咁強 可能.....妳會攞我命添 真係會向我乜都做得出 Irene....係唔係呀...? 如果係真.....睇怕妳都會殺左我吧 所以..... 我點敢背住妳做D對妳唔住既事呢... 其實妳咁好... 我仲可以去邊度搵另一個喎 有妳一個... 夠哂喇 唔知點解..我好想妳今次旅行可以玩得開心 但又好想妳快D返來 原來你咁樣去玩..同妳走去返工果種離開感覺完全唔同..完全兩回事 我真係好掛住妳呀! >>July 7, 2010 at 11:33:16 AM GMT+8 2010 年 7 月 5 日 星期一 【清涼】 多多包涵 女友去左旅行 呢幾天只好食自己 女友留底一千蚊比我攪掂 如無計錯數呢 我有賺兩舊水左右 計落條數有著數呀 咁當然我唔會得一千蚊走天涯啦 人人都以為我得雞碎響身 其實我要攞... 一樣可以攞到錢 唔好再話我女友係女魔頭喇 今日發生左件事幾好笑既 話說今日響樂湖輕鐵站 我架車就停左響度上客 見上完客就關門走人啦 點知見到個後生女....仲要幾靚女幾好身材添 即係要大地方大...要細地方細既靚女啦(作死喇...女友唔響度作反呀..哈哈) 人地話胸大無腦... 可能真係... 個靚女追我車... 佢搶住咁拍咭去八達通機 但佢又不停咁拍部出閘機 佢仲要維持15秒時間有多 仲係咁不停咁死拍爛拍 喂...妳上車係拍入閘機呀...唔係出閘機呀 拍出閘佢部機梗係唔比妳過啦 我其實呢個時候就關哂所有車門 只係獨立開頭門諗住比佢拍好咭上車 但佢真係實在蠢得交關....連80歲阿婆都醒過佢 佢攪左一大輪先知自己拍錯機... 不過...真係對唔住喇 我實在冇可能等佢咁耐 所以我關門由佢等下一班 見佢如夢初醒既樣先拍啱機..再見佢眼白白咁送我車尾 唉....愛莫能助....妳以為靚女真係大哂...一定等妳咩.... 真係後生細女... 拍左咁耐機知唔得都應該諗下發生咩事先得架... 死拍爛拍....機都比佢拍爛咁滯 下一班車要8分鐘 原本可以剛好上我車嘆下冷氣 而家佢要響月台曬住干煎咁等8分鐘 真係替佢辛苦... 其實我已經等左妳好耐 無奈妳蠢過隻豬 我真係想幫得幫妳唔到 我真係唔明白 入閘機係橙色...出閘係綠色 咁多可以分錯 而且機身大大隻字寫明出站同入站 妳咁都可以攪錯 個腦唔知係唔係...腦缺鈣呀?? 不過大家唔好以為我係靚女先等 其實我只要我見到佢趕上車既..我都會等佢 但如果我係趕時間....的話 我有時都難免要無情D.... 話比大家知啦 我呢個衰仔曾經連阿娘都唔等就開車走喇 無法啦....遲左時間誤點會連累到其他車 我都係迫不得以 希望做乘客既可以體諒下D司機啦 大家多多包涵... 總之...有時間我可以又睇到你......我一定會等你啦 >>July 5, 2010 at 11:08:44 PM GMT+8 2010 年 7 月 4 日 星期日 【清涼】 大熱.. 熱屎辣辣既天氣 真係唔想走出個冷氣房 返工時... 我架車廂既冷氣一定開到最大 務求做到兩個世界既效果 果D咩環保份子..咩25.5度.... 我向來都叫佢死埋一邊 試想下如果今日車廂係25.5度.... 加上咁多人堆埋一齊既車廂內 你會如何...? 唔死先怪啦.... 我會支持用少D膠袋 但係要保持25.5度我一定不會做 我可不想焗死上頭條呀 難聽D講...我一個人 環保都唔夠地球用多億份之一秒 真係環黎都多膠魚 真係唔知道何時先會天氣凍返一D 我真係頂唔順呀 我真係好怕熱呀 放工熱辣辣咁曬住送女友去機埸 好彩巴士冷氣夠勁..... 如果唔係真係等完車就變燒豬 嗯... 女友話想旅行玩 我又冇假 唯有將女友交比人.. 等其他朋友陪佢一齊玩啦 女友問我對方男仔喎...你放心喇... 咁我放心既... 我都相信妳唔會背我做其他事 況且都係幾日咁大把 得喇.... 我會好好照顧D仔女既 總之唔餓親佢就得啦 妳玩得開心點吧 其實我都想我地可以兩個一齊去 算吧啦 有機會既 我要手信呀.... >>July 5, 2010 at 12:22:40 AM GMT+8 2010 年 7 月 3 日 星期六 【清涼】 呆滯既擔心 見到妳仲可以咁輕鬆向我講笑 我都唔知點應妳好 妳真係一D擔心都冇嗎..? 妳話自己身體無咩異樣.. 我又唔係妳 我感覺唔到 每次一諗個心好忐忑 我心情唔知點形容呀 我知冇得擔心呀? 始終係我地兩個既責任 怎樣都好啦 我都會依妳想做的 我只係想像到 如果肯定了 咁樣會唔會委屈左妳 我好怕妳會因呢D事而唔開心 因為妳曾經傷心過 我唔想呢D事會發生我們兩個之間.... >>July 3, 2010 at 11:39:01 PM GMT+8 2010 年 7 月 2 日 星期五 【清涼】 渴望大假呀.... 今日女友一早返左魚翅學堂 而我一起身就發現女友唔見左 留底既係一張字條 內容大概係..食既響雪櫃、食自己啦...遲回呀..! 哈...真係當我係小朋友咁.. 但算啦..我習慣喇.... 我唔介意既.. 今日自己一個下午時間 約左雪兒出來 而家雪兒響湖康診所返工 間中我返工時駕507、614、614P線時都會碰到佢上我車 不過今日同佢食飯時就傾有關佢去留既事 其實做護士可能係好多人既志願...尤其係女仔添 但問開雪兒先知.佢入行係只為錢看 所以一直先只係做登記護士(EN)..不求上進做個註冊護士(RN) 不過...而家有機會比佢讀RN課程 RN人工頂點去到四萬蚊 而且仲有得升上去 比做EN有前途好多 但個課程要成七萬幾蚊 更大件事係原來護士唔係佢想做既工作 只想一心學投資...搵快錢咁 問到...而家應該讀唔讀好 做EN一樣搵到食..而RN就前途更好 但可悲在護士唔係佢想做既事 而家都唔知讀唔讀好 唉......呢D情況我點答你喎 我冇咩意見比佢呀 希望佢可以找到出路啦 如果比我打死都讀RN課程 有張RN證書點都唔會餓死丫 投資..可能會損手爛腳喎 比我一定選擇前者 食完飯..各有各回家 約左女友響魚翅城等 食埋少少野一齊返來屯門 女友又放幾天假之後 做FA真係好呀.... 我...明天又要捱喇 今日個假...不覺不覺就咁溜走左.... 回看我既大假..尚有一段長日子 真係有排捱 我...好..想..放..大..假..呀..! >>July 2, 2010 at 11:58:33 PM GMT+8 2010 年 7 月 1 日 星期四 【清涼】 遇上 今日返工第四轉車 駕761p 路線....往元朗方向 響"天耀輕鐵站"見到舊時女友 佢見唔到我 只係我見到佢 其實佢係有望過來的 佢望可能係因為睇有冇列車經過而橫過馬路 但我諗因為車頭玻璃窗反光佢先見唔到我 而我就清楚見到佢拖住另一個男人 一刹那間覺得有點心沉沉既感覺 分手都可做朋友.....我做到喇.. 但有D問題我到而家都唔知點解.... 點解當日說....說到要講分手...? 點解做咁多既乞我憎又不可理喻既事要我討厭妳? 我到底果時做左D乜要令妳咁對我 自問已經很遷就妳... 為什麼仲要難為我? 一大堆到而家都不能解開既問題 一一咁浮現在我腦海中....揮之不去 難受既....惡哽既....感覺走進我個腦 而家見到妳拖住另一個..... 但我又冇做錯....就係咁...不停問自己點解妳可以分手得咁瀟灑 我問自己 如果當日Irene不在我身邊出現...我會如何 我可能會了結自己..也許已經灰飛煙滅..不屬於呢個世界??? 因為講到尾我對妳都非常認真 或者Irene而家要多謝妳... 如果冇左妳狠狠咁對我... 我一定唔會捉得Irene咁實 我諗...我雖然由出世到而家都係頭頭碰著黑 做事冇乜運氣... 但係感情呢方面我覺得自己好幸運 當我最唔開心時... 竟然有個人會出現我身邊.....肯要我...撈起我 妳同我一齊時.... 心去愛另一個....想方法掉低我 但慶幸地呢段時間我早就遇到Irene..... 其實當初真的想和妳一生一世 但妳迫我放棄 我好慶幸天對我不薄 再一次安排Irene出現我眼前 這是上天的主宰安排..定還是我幸運呢? 天知曉.. 如果當年讀書我唔係同Irene坐埋前後左右的位置 大家有說有笑 我冇走去整估佢....玩佢.....令佢對我有印象 當日佢會月台上認到我嗎 而我又會認到佢嗎?? 是不是命運已經知我果日會分手 當年先會安排Irene同我一班、坐我前後左右... 先安排我地認識，再互相留下印象，跟住安排我將要分手的日子出現.. 而家諗 舊女友會唔會係人生中既一個過客 Irene係我響學校相識...再響月台相遇... 原來....戀人我早十幾年前已經遇上了 >>July 2, 2010 at 2:56:43 AM GMT+8
|
|
無事嗎?irene佢而家情況如何