| 日記 | 日記主簡介 |
||||
2010 年 6 月 20 日 星期日 【晴】 混吉....又如何?! 今日.... 女友放假 我放工 星期日 無無聊咁... 又唔知去邊 又唔想浪費呢一個星期日 父親節... 我地倆個都冇話去慶祝 因為我家風格唔興慶祝父親節 或許...世上只有媽鎷好啦 因為我地反而會母親節同阿娘食飯... 而老竇真係冇呢回事 唉....自己係男人都係咁對待我老竇... 咁對待呢個神聖既父親節 看來將來我一定有報應呀... 比雷劈呀 可能老竇曾經做過一件事而令我地咁吧... 算啦.... 不要說呢D喇 今日我地兩個又走左去機場 無錯.... 我地又係睇飛機 之後又去二號客運大樓行街 女友又係咁試人地果D陳列既Tester 香水...試下噴....係咁試....試到差D成個機埸都聞到呢D香水味咁滯 粉底....我雙手背完全地遭殃咁塗滿左厚厚既蜜粉.... 仲有眼影、唇彩等等.....可以試塗既都試哂...玩哂 我雙手背亦同時無一地方可以幸免 但呢個傻婆就樂在其中.. 不停話...
最慘...妳試完之後只係幫襯人地 買左一盒眼影..仲要係40幾蚊...咁大把 比40幾蚊都冇所謂 都叫買野 但係妳又Show張職員証出來攞折扣 仲要慳埋果幾蚊.... 不過就玩左人地百幾蚊Tester... 最後買得30幾蚊野 擺明混吉啦... 雖然今日冇著住利是封出街 冇人一眼知妳身份 但妳又衰在Show張証出來攞折頭 張証有齊妳名同Staff No.... 妳今次仲唔比人Black List.....!!!! 嗯..... 我知我咁講妳一定會咁答 "佢放得出來就預左比人試啦.....使乜同佢客氣喎..." 但係妳有D都唔係試過第一次呢 對上幾次妳都有試過.... 我話妳係貪玩.....就真... 比我講中妳就傻笑笑笑.... 有時真係頂妳唔順呀.... 要我響妳身邊陪妳一齊癲 雖然... 我承認的確係好玩..好刺激... 冒住比人狂睥既危險同壓力 響度實行..我地有我地玩...佢地有佢地睥 我地噴完呢隻...試呢隻 但比果個"食蕉"超超下咁... 我好唔自在呀 妳係女人就話大哂啫 我唔同喎 男人都玩埋一份 唔知有冇"戰地記者"拍左我片添呀 而家D手機有高清...好勁架拍片 妳知啦.....我地玩得咁癲...流連忘返..樂在其中咁喎 諗諗下 查實我都唔知點解我會陪妳癲咁耐呀 比人起底的話真係 前途盡毀呀 到時.....我咩都冇 妳要負責任...養起我呀 哈哈..... 講笑啫 其實間中同妳癲下真係幾開心架 尤其係最喜歡見到妳個開心樣呀 哼..... 就算比人Black List... 又如何.... 未驚過.... 下次放假...我地再去混吉過 下次我地仲要乜都唔好買 好唔好...?? 好... 就咁話啦 就下一次 我地就響食蕉面前混吉玩Tester..... 哼......女人大哂架嘛....使咩同男人食蕉講原則喎 Irene姐姐惡哂呀...!!! 梗係啦 Irene姐姐...響惡哂城畢業架嘛.... 點會唔惡... >>June 20, 2010 at 11:44:57 PM GMT+8 2010 年 6 月 19 日 星期六 【晴】 矯視手術 今日女友班姊妹來到我地屋企食飯 成班女人嘈到我耳到聾 吱吱喳喳咁個個把聲都高8度 不過我略略都聽得到佢地講咩既都 原來Annie想做激光矯視手術 已經臨門一腳先話想縮沙 話比份同意書嚇親 同意書即係生死狀... 大概係會盲同有生命危險啦 最好笑佢仲要上網睇下人地個手術係點做 眾所周知手術唔係血淋淋就係核核突突架啦 睇完話唔敢做喎 真係頂佢唔順我都要話佢 全部手術都係咁架啦...睇到短片就唔做就怕死...呢個世界冇人做手術喇 又要貪靚又怕死...真係頂咁多個靚女唔順呀 講下講下....攪到個個都話想做矯視手術 女人為左靚都真係一擲千金咁為自己改變 連我都見到女友都有D心郁.... 呢班真係女友既損友呀..哈哈 曾幾何時呢 我真係有話過女友妳帶眼鏡時都好靚女架 而家都係 其實有Con帶已經好足夠啦 點解仲要比幾萬蚊去做喎... 到左夜晚借左Pjilip架車做司機車哂佢地返去 不過今日架車唔夠位載埋女友一齊 我自己一個走哂港九新界沙田 唉.... Irene姐...妳識D朋友可唔可以住得唔好一個東一個西呀 返工做唔夠司機咩 放工仲要做... 查實做男既.... 係唔係一定要做到咁有風度呀 而家交通好方便啫 鐵路、巴士...話咁快到啦 係係係.... 大方D嘛.... 不過最開心既聽到妳話 "我都冇諗過要做矯視手術...我講下之嘛...唔使錢咩..." 哈.....你真係永遠都唔會要人擔心 其實遲D有錢剩有機會...先至做都唔遲喇 講真架....妳戴眼鏡個樣都幾靚丫 我鐘意架.... >>June 19, 2010 at 11:46:22 PM GMT+8 2010 年 6 月 18 日 星期五 【晴】 管接管送的原因 今日有人問我.... 你成日咁接送的女友唔煩唔厭架...? 我第一個反應就係 吓.....?! 其實響埋日子耐左... 唔等於可以有D野要刪改唔去做 好似送返工接放工咁 我就算返工點攰都會去接 只要我就到時間 當然我唔會特登請假做呢D事啦 但都有例行..失手失約既時候既 有時候女友以為我會等放工 會坐左響我地所謂老地方等 有兩次我係話左接 到最後我係瞓唔醒冇出去 要女友響機場白等呆等 有一次我知遲左 去到機場見到女友已經等到呆左定左格咁 其實我真係好唔好意思... 我向女友講sorry既次數有如天文數字 但係...我遲咁多次..爽約左兩次(如果冇記錯...) 女友都冇話鬧我同比面色我睇 反而會問我...好攰...?返早唔夠瞓哩.... 還會沿途叫我下次你打比我知等我自己返去啦 或者我承諾過女友... 我話我會每次都會接機送返工.... 做到既我都一定會做 或者呢個原因... 有時我就算遲都會仆到咁去接返女友回家 我知道女友口中話"唔使唔使"(點會想唔使丫..個個女仔都會想有人等佢放工啦...) 但係每一次見到她.... 當響接機大堂大家見到大家時 女友呢一個開心喜悅既樣真係令我又會覺得..值得既(上氣唔接下氣都係值得既) 有時我真係趕到一頭汗... 女友從手袋攞紙巾幫我抹一頭汗時... 真係好窩心架.... 我會覺得佢又唔嫌你遲到嬲同時仲幫你抹汗....(乜都抵返哂啦...) 如果真係愛一個人..... 只要見到對方..大家都會開心 雖然.... 女友每次總會要求.....臨入國泰城之前...要抱一抱 記得傻瓜話.... 如果我今躺機有咩三長兩短... 起碼我臨去前我都記得我曾經抱過你...(真係好唔利是呢D說話...) 我會冇後悔嘛 仲有..女友條頸個帶住一條頸鏈....頸鏈度係扣住一隻介指...有刻名 傻瓜曾經講如果真係墮機又係有咩三長兩短 死狀都會面目全非..... 唯一靠呢條頸鏈來認出來(真的很傻的說話呀....) 呢D話女友都係笑笑口咁講出來 但我聽得出....呢D係女友好認真的說話(笑中帶著認真的話..) 之前我會覺得...為什麼臨入國泰城都仲要抱一抱呀 在家中已經見到....抱不夠嘛? 仲要在街上咁比人見到.... 好害羞呀 不過當知道女友講左以上呢D 我覺得女友呢D都唔算得上咩要求吧 只要抱過一抱....就算有咩事都會不後悔 又係既 真的咁唔好彩出事 才諗...點解當時唔肯抱一抱佢....我諗我都會後悔一世 其實我倆都知..工作上好安全 有時計下數..我仲危險過佢 但我始終覺得...只要女友鐘意、想的話 而我又可以做到 做一做又有咩所謂 反正你都真心的愛她... 抱一抱不算困難的事吧 所以....而家女友返工前 我地都會習慣地抱一抱...挨一挨大家咁先會目送女友入去拍咭 到回來香港時 我地一見到又會挨一挨..靠一靠對方 可能大家未必感覺到 當見到鐘意既人出來既時候既感覺 大大話話都我都接過佢數百次機 每一次當見到女友出來時 我都會有種感覺 "妳安全腳踏實地咁在我面前喇" 也許未必個個都會明白 當自己愛既人走到好遠好遠時 那種掛心係點 得閒無事我就會成日都諗.... 如果佢有咩唔舒服..有咩事我都唔可以立即見到佢 有時起上來...我點算好?? 所以我先會話.. 點解當見到女友步出接機大堂時 我種心情係如何地開心 幫女友拉大黑小黑(行李)都係一種樂趣 其實行李要拉得好..好難架...(因為佢係一個大黑扣住吊住另一個小黑...攪得唔好會"翻車"架..) 有時問...喂"大細黑咁重既"又買左咩呀...? 沿途估估下又買左咩...都幾開心架(有次買左23本書、幾10罐流質飲料..加埋其他立雜野，重到我都託唔到上巴士行李架) 其實我知佢工作係辛苦既 好多時巴士上女友都會撞玻璃窗瞓覺 咁既然都接得女友放工.... 做佢一個半小時人肉枕頭都冇壞啦(所以我地鐘意坐機場巴士) 的確.....好多人都話...你接慣姿勢..如果有一天唔接 女友一定嬲死你.... 係架.... 但鬼叫當初我應承過女友呢一件事咩 有時做男友既應承得女友...就唔可以食言既 或者冇太多人知道女友既過去係點唔開心 我亦都唔會講比人知 當初女友真係好脆弱.... 什麼事都會怕同擔心 或者我只有做呢D事 女友才會安心.... 得到安心..女友先會知道..呢個男朋友真係在乎佢..喜歡佢 女仔始終都離不開"安全感"三個字 安全感不是可以口講可以做到 日子有功地咁建立出來 我都有滿足感架 由當初女友咩都會怕..咩都驚失去..直到而家.. 女友會放心我出去同女仔交往 有時要得到她信任.... 男仔做多一點點都冇壞既 既然係愛佢.....我又點會厭悶"接送"工作呢 呢個就係我堅持盡量去接放工、送返工既原因... >>June 19, 2010 at 2:05:54 AM GMT+8 2010 年 6 月 17 日 星期四 【晴】 呢隻咩止痛藥...?? 今日一起身 頭有點痛...係一下又下咁既陣痛 唔單止係頭痛 我喉嚨都感到好"萌" 又未去到痛程度 但已經知道再唔理佢...下一階段就係喉嚨痛同發炎 我一定要先下手為強 趁未發病要Stop左佢 問女友攞止痛藥食之餘 我仲聽聞咸柑桔係得喎.. 止喉嚨痛嘛... 問女友.....妳有冇呢D野呀... 女友話...咁偏方..我邊有呀 必利痛感冒熱飲就好似有.... 等等啦 咁女友入房找時.... 我在客廳聽到女友大叫問 咁你又冇少少痛呀喉嚨...? 咁我話少少少咁啦 良久女友出來 熱飲...我找不到可能用哂 但必利痛得返呢盒 我一看下..... 自問自己對必利痛每隻藥都試過 D咩....特快、特效、快兩倍、普通原裝、傷風止咳等等 無一未食過未買過 但....今次呢盒我好似未曾買過呢款喎 好少見.....紫色盒包裝 望真D......經痛用架!! 差D向住女友講粗口咁滯... 心諗...整妳個計丫....係咪玩野呀 跟住最攪笑係 女友完全唔覺得係問題 話男人都食得架 仲話做左研究喇 市面上果D必利痛..之所以有咁多款 完全係捉消費者心理 等消費者以為呢一隻真係可以止咩痛..止果D痛 其實全部藥配方一樣 雖然係咁啫 妳都搵另一盒丫 經痛呀....點食呀.. 雖則話藥係一樣啫 我始終覺得有點怪 一個男人走去食女人既止經痛藥喎 變態咩..!!!!! 最後我都係冇食到 過左一陣 我都係好頭痛 女友話明明記得係有其他止痛藥... 話走去幫我搵多一次 之後我聽到女友大叫話 有喇有喇.....原來放左落最底果一層架內 女友仲拆左兩粒藥同一杯水比我送藥... 過左半個鐘左右 我真係冇再頭痛... 好左好多 只係有少少喉嚨唔係太舒服 女友問我喉糖啱唔啱用呀...我自己都有私伙架... 返工時用來看門口架... 但係止喉嚨痛既藥就冇喇 女友又從自己個袋度攞左一包6粒既"得果定"比我 好過冇啦....我就食左喇 我食喉糖冇一次會跟指引食 我係會食完一粒又一粒... 食到完全食哂先會收口..先會安樂 過左一陣.... 我喉嚨痛又好似好左一D咁 哈哈 我呢個女友..呢個傻瓜呢 真係有D辦法有D計仔 當然要立即讚下佢..話傻妹妳好勁呀 好有潛質做私人看護呀.... 始時...女友先向我講 正話食果D必利痛 就係必利痛經痛藥..... 我真係反哂眼...只係掙我未跌落地暈啫.... 我問..... 妳攪乜鬼呀...? 女友佢果刻又表現得好委屈個樣咁... 話..."見你痛嘛"....唔想你咁辛苦..所以咪咁做囉 女友話...."咁你都話頭痛..." 況且食左後都都止到痛係事實嘛.... 個傻瓜係咁講話...只係想你好D唔好咁痛咁辛苦乍.....仲向我講Sorry..冇心去厄你呀 還問我...真係嬲呀...!! 其實我一D都冇嬲 只係比眼前既妳吹漲....真係冇妳收.... 我話...妳又咁好戲既.... 我真係以為妳搵到其他止痛藥呀 之後傻瓜係咁向我講Sorry呀...... 好喇...夠喇Sor咩ry啫... 其實... 妳識我咁耐 我點會為呢D事嬲妳喎 響我心目中... 妳真係好似咩都識..咩都好叻咁 我成日都同自己講... 話比自己知... 信妳就冇死架喇 無論在家...妳煮野係最好 出到旅行..妳好多時都會識路 我有D睇唔白既英文信件...妳會解釋到出黎 遇著D物品說明書係日文...妳會識解我知 出到街有人問路傾計..妳唔多唔少都會應付得到 我唔開心時有時諗野諗得個方向唔好令自己唔開心... 妳有好幾次用好巧妙既方法同我傾計向我開解 等我可以唔好亂諗野 最有印象係我跌錢果次 妳教我用另一個方法諗...令自己舒服又好過 響妳身邊時.... 出街果陣... 路人雖然係眼見我呢個人拖住妳...係保護妳 其實暗地裡我反而要妳保護 我感覺得到有時妳為左令我好過一點 都會經常扮傻扮低能....扮冇記性 我同妳一齊開初真係有點介意 都唔係有點.... 係好介意... 我真係好唔想有個強自己咁多既女朋友響身邊 不過..... 之後想通左 有既咁既女朋友都好丫 是妳向我解釋尊嚴同大男人既分別 我諗呢一生我都會輸比妳...點都冇妳咁叻 放心啦 我冇介意呀 我會將希望放響我地將來既小朋友度 妳話嘛 將來大家好好咁教導自己D仔女 用妳同我自己方式教導出來既仔女來超越妳呢個媽咪 我記得架... 嗯...傻瓜 從我知果兩粒藥係經痛配方藥之後 我真係一D都冇嬲架 相反我反而覺得妳好鬼馬呀...古靈精怪咁 出口術....咁好表情....我完全以為係其他藥呀 我果一刻唔出聲....仲有用唔太友善眼神望住妳 妳知嘛.... 果時我個心...係咁笑緊呀 睇到妳覺得自己做錯....果個樣呢.... 真係好可愛呀 哼...... 等妳知道...我都會識得"變臉"呀 妳以為得妳識哩....哈哈哈哈 今日...我羸左....嘩哈哈哈哈哈哈.... Sorry呀... 我只係玩下玩下乍 知道妳為左我想盡方法去搵藥比我食 淨係咁呀.... 已經唔可以用其他理由去嬲妳啦...係咪... 多謝妳咁關心我 如果下次到妳有病 我都會好好咁照顧妳睇實妳 還有呀..... 妳話想去杜拜玩幾天 我冇可能陪到妳喇....我冇假呀 有個男仔陪妳去....我會放心妳既安全既 得喇....個男仔我又識得 我更加相信妳唔會背我做其他事.... 我唔會亂諗野既 妳想去玩....就去吧 好多時我都因為冇假..而成日擱置我地既旅行...我都好唔好意思呀 難得有人陪妳一齊去 咁妳就放心玩幾天啦 但去之但要放底咁多日..我既零用錢先好呀 唔係既話....我會餓死架.... >>June 18, 2010 at 4:17:23 AM GMT+8 2010 年 6 月 16 日 星期三 【晴】 今日陪女友一齊執房 間房內最多既就係女友既 衫、裙、鞋、內、外衣、披肩、手袋、各種各類既襪.... 另外仲有、好多好多既化妝品、好多支唔知咩既水、大量髮夾、護膚品 分別放左響衣櫃..床既暗格、抽屜內.... 仲有好多好多小說、英文書、證書等等 全部通通都執出來 想話...掉得就掉、捐得就捐 但到頭來見到好多都係好新淨.... 有D我懷疑都係仲咩用過著過既 雖然我知女仔天生係貪靚..咩都要新 衣服每一季都要更轉 我真係唔明點解每一季都要更新.... 過左一年妳會肥左唔啱著嘛 女友既答案係 衫...著左一季就完成佢既任務啦.... 再著多一季就已經係超值..... 況且我呢D衫件件都唔係好貴....幾廿蚊咁 哦......幾廿蚊 不過有D係響外國買....咁幾廿蚊對返港幣咪.....!!!! 妳好折墮呀...!!! 女友一路分衫一邊同我講 唔好咁啦....咁女仔係咁架嘛....我著得好D你唔會開心D嗎...? 講真 妳件件都係差唔多.... 我真係睇唔出有咩唔同 好啦...算.. 咁鞋呢..?? 妳一個人得對腳.... 妳呢度大大話話有四十幾對...... 有D鞋盒仲標左價出來 最貴果對2000幾蚊 我問...咁又點講呢妳...?? 女友答...鞋呢...!!平既會好容爛、刮腳呀.....一千個理由..... 講到鞋呢.....女友這時攞起其中一對出來....舉住響手話 呢D歀呢.......永遠都會啱用...唔怕買丫..自己著得舒服貴D都無所謂啦 唉....吹漲..!!! 好...咁呢D護膚品呢...? 女友話...有時見佢平咪買囉 咁用得呢支就要配呢支..呢支..呢支..果支..果支..果支....先得架嘛 所以先會咁多囉..... 唉....咁多....妳塊臉有新界咁大塊咩...? 總之.... 我哦女友一樣.....佢就辯駁一樣..不停維護自己.... 講到無得講就話...."咁女仔係咁架啦...而家你係唔係唔鐘意我丫..唔好要我囉咁!!" 唉.... 咁得啦冇得講啦..妳咁惡... 我知.... 女仔係貪靚嘛.... 況且呢度好多野都係未同我一齊時已經買下 而家我已經乖左買少好多好多喇..... 我用自己錢買之嘛 我又冇攞你錢買.... 扭哂計咁為自己講說話....講到我好似千錯萬錯咁 嗯....唔係呀... 我又冇鬧妳咩.....唔使咁喎 而且我又點會鬧妳喎.... 只係我從男仔角度睇事物講說話之嘛 所以呢.....妳唔好嬲啦 我真係冇意咁講妳說話架 咁我以前都經常買D唔等使既野啦 只係我買既野同女仔唔同吧 我真係冇咩意思架 以後妳鐘意妳咪買囉 我知妳用錢方面有分數既 正如妳話...而家既妳已經買少左好多好多野 我有眼見既... 況且妳而家每次買野都唔會只係買比自己 好多時我都會有份 總之我話過我唔會干涉妳呢方面既野啦 而且錢都比哂妳管 我知妳會心中有數既 嗱.... 我而家真係呢...妳用錢既買野呢.... 真係唔理妳架喇 錢用多用少妳自己控制喇 咁將來食粥食飯坐樓定瞓街都係睇妳喇 而我呢 只要我每日有足夠錢用..我Ok滿足架喇 不過講到最後"執房" 可以捐同掉既只係有限.... 其實我知....妳都係珍惜物件既人 妳都係口硬....掉既.... 妳有幾多係捨得丫.... >>June 17, 2010 at 1:56:05 AM GMT+8 2010 年 6 月 15 日 星期二 【晴】 一個惡夢 我不知我這樣算不算預感 係夢到我炒車 而咁啱今日亦有同事現實中發生D咁既事 雖然只係前後車輕微碰撞...仲同我個夢差十萬倍咁遠 但算唔算都叫實現我所夢的...? 我都不知算唔算 但同事未發生呢件事之前 我今日的確臨瞓醒前發左個咁既夢 嚇到我整天返工都有陰影 個夢有點天馬行空同嚇人 但係好入我腦 個夢係......話我返返下工炒車 唔係炒路面D車 係炒向自己前面架列車 炒到車頭都摺埋一大堆 炒完之後我唔知點解又會有事行得返出來 仲走去前面架車睇下點添 跟住我又唔知點解又見到前車係冇人 跟住唔知點解我又走去前面被我撞既車 去駕走我撞果架列車 跟住唔知點解我又會開住前車又會見到自己架爛車 跟住又見到好多白車圍住我架列車 我又見到我架爛車前車門打開有人跳車逃生 但我又唔知點解我又會冇幫手 得個望字 最可怕我又見到再有一架列車再撞向我呢架爛車 而我感覺到....再撞車既人又係我 我自己見到自己撞車 總之..我只係深刻見到自己炒車、自己架爛車、自己 之後我就嚇到醒左 我個夢我記得...我出事三架車個外觀係一期列車 其實我夢..我都經常會發 但通常過一兩個鐘我會完全唔見得.... 唔記得意思係忘記到冇印象 依稀只會記得我有發夢 我將呢個夢話比女友知 女友安慰我...傻啦只係夢來...唔好咁擔心啦 但我同女友講...我話唔知點解我好有預感 我總有一天會炒車 女友話我傻...唔好亂咁諗啦 話我一向都唔會咁唔小心 話我都成日坐你車啦...你開得好好..好過好多司機 話我又唔會衝燈又唔會貪快 係...我既格言係我情願遲到都唔會超速 但意外....好難講 今日我返工時好驚 因為咁啱我又係駕一期車..仲要拖Car 頭兩轉車好緊張 我係咁望緊路面情況 到總站時收到女友信息問我如何... 仲叫我有時間打個電話返去 第二轉車我回覆電話比女友 女友電話度叫我輕鬆點啦 如果真的不行就請假一天啦 但我知我又未致於緊張到要請假 我婉拒女友呢個提議 女友聽我咁講....就話好啦...你自己決定啦....放鬆點啦 傾左一陣我夠鐘要開車走 當我回程響尾二站停車時 突然有人拍我車窗 原來係女友.... 原來佢買左張全日通跟我車 就係咁.... 坐足咁耐...坐到我放食晚飯 原本我係帶左女友既飯盒 但女友話不如陪住我一齊出去食啦.... 女友又陪左我食飯 晚飯時....女友坐在我身邊貼住我身旁撓住我手臂安慰我話冇事架....只係一個夢吧 仲話..我坐左咁耐...你開得好好..好定丫..冇問題喎! 食完飯...我叫女友回家吧 不過女友都堅持話陪多我一陣啦 雖然我每個總站都叫佢坐埋今轉回家啦... 但女友都每次答我..."好啦應承妳...如果我兜到頭暈我就走啦..!!" 點知陪果一陣....原來係陪到我放工 我知其實咁坐法係好苦悶既一回事 甚至我從後鏡見到女友有恰眼瞓"中下中下"..頭仲貼住車窗 我知佢一定係好辛苦好倦好悶 有幾轉我去到總站....女友都冇醒到 我果刻又唔想嘈佢 難得瞓到....我心想...瞓著就唔會知悶啦 可能唔嘈醒佢會對佢好D 到尾果三轉車 女友醒左....在總站我叫佢返去瞓啦..我無事喇 而事實上我真係好左好多 因為我反而在意女友會唔會悶親 擔心佢坐到暈..話哂我都叫一條線來來回回不停咁兜 我既擔心.....反而令我冇諗自己發夢一事 強烈撞車感覺開始慢慢從腦淡化 我反之而真係好在意會悶親佢 臨尾女友話都陪到而家..咁掙在啦 結果...女友今日真係陪左我兜左一天 臨回家前...女友陪我食左個糖水 當一回到家...女友立即梳洗 好快就瞓左覺 我知佢今日一定好辛苦 屈左我車咁多個鐘 就係我一個無謂既夢...要攪到女友咁辛苦 害得她要咁做 而家諗返起今日我都唔知點解要咁在意呢一個夢 但今日呢件事真係証明左女友真係好關心我 而我頭果幾轉車雖然口講話叫佢回家 但內心真的很想女友陪住我 而當我後鏡望到她時 女友都會同時望住我後鏡 大家眼神都會見到大家 而當我每次從後鏡見到女友向我輕輕咁搖搖隻手...笑一笑時 果一段既站與站之間我就只會記得她笑容..而冇諗到個夢 漸漸地我真係開始冇諗...直到開始淡忘 夢開始反而冇諗起.... 反而每一次都想下一站從後鏡望望她....見到她 直到見到她恰著左 擔心會悶親佢...恰著後我又唔敢拍醒佢.... 其實我... 唔知今次冇女友陪我車才會唔會咁快淡忘發夢呢一件事 但肯定係有她在旁....我安心好多 或者她今次的存在是令我分心去想著她而忘記個夢 我都不知應該怎說 女友的出發點是怎麼都好啦.... 無論是擔心而陪我或是來分我心都好..... 她真的很努力幫我捱過今次既恐懼 而令我更想感謝係.... 平日女友一定點都會化一化妝出來 今次女友從電話收線到出到車站 只係半個鐘既事 女友雖然知我咩路線..但要一直要等到我車先上 咁証明女友係立即收線就落黎 平日要女友素顏仲要帶住紅膠框眼鏡咁出來真係"唔使旨意" 今日女友竟然為我咁做.... 我真的很感動 可能呢個在某D人眼中不是咩大事 但我了解她.... 要她咁走出來就等於"要佢去死"一樣無分別 女友肯為我咁做 我都不知怎說先好 我知今日真係辛苦妳、難為妳、委屈妳的 但如果有一天妳同樣不開心...有恐懼的話 我都會不顧一切去幫妳..陪著妳 無論如何.... 今日幸好有妳陪我 我不會忘記...今日有個傻佬比個夢嚇親要個女友陪足一日 我不會忘記呢一日....希望到我們老左既時候... 我妳同我地仔女...大家一家人 講返呢一段經歷會係我們一家既一個笑話 Irene....今日真係多謝妳...我愛妳..! >>June 16, 2010 at 7:49:31 AM GMT+8 2010 年 6 月 14 日 星期一 【晴】 Cute版鎖匙扣 大家今日都放假 無無聊聊又出左去魚翅城行街 真係得個"行"字 除左食既...乜都冇買過 夜晚走左去魚翅餐廳度食晚飯 食完飯 諗住返屋企啦 點知...女友又話想Check下信箱有冇公司信 一看下.... 信就冇喇 反而公司派左一件咁既"迷你飛機"比大家 收到後女友攞左黎送左比我 我覺得佢細細架Cute版咁既樣 真係好可愛又得意 最終.... 回到家後...女友就響我個用既出街袋上做手腳 將架迷你飛機掛上我個出街袋度 而家我一袋都係公仔匙扣 女人到不得之了..... 笑死人喇.... 但..... 妳敢掛..我敢揹 哈哈.... 嗯........多謝妳送比我 今日我又食又攞..一文錢都冇出過 唔使比錢唔使煩...真係開心....哈哈.... 今日女友返工既信箱收到一架咁既野，係一架迷你飛機鎖匙扣，幾得意同趣致. 
細細盒...架迷你飛機好可愛... 
女友二話不說就扣在我個出街袋喇...唉..我一袋都係匙扣... 
人地以為我傻架...一個男人掛咁多呢D野響個袋度.... 
迷你得黎有燈著..仲有聲出..咩聲..??咪係飛機引擎機聲囉... 
>>June 14, 2010 at 8:48:04 PM GMT+8 2010 年 6 月 13 日 星期日 【暴雨】 FSX 有幾個朋友問我玩隻fsx係咩野黎 其實係Microsoft既一隻遊戲 係高度既模擬駕駛飛機 難玩程度300粒星 但只係睇佢畫面同效果 已經覺得好好享受 原來仲可以改飛機塗裝 今日研究到點改 都OK靚呀 有興趣可以借我DVD玩下 大家問我畫面點好難用文字形容 比D圖大家睇下啦不如 港龍20週年既塗裝 
當然要捧下女友埸啦..後加既機"國泰既747-400"、"777-300ER"飛機 
國泰既"亞洲大都會"既塗裝 
飛機既模擬控制室內情況 
有世界各地機場...呢個係其中一個香港既機埸..正在泊響GATE外 
>>June 14, 2010 at 1:00:17 AM GMT+8 2010 年 6 月 12 日 星期六 【暴雨】 盡興.... 今晚我漏低女友在家 同C4一齊食飯 哈哈..... 唔好話漏低啦.... 其實係問准女友比我去架 仲可以比我玩到夜一夜呀 好開心呀 先食飯..再落BAR....後宵夜 全晚 大家都問我同一問題 真係每人都問我一次 "你幾時結婚呀...?" 嗯...快喇快喇... 仲拍心口咁....大大聲當住街大叫....做你既兄弟..玩死佢地班姊妹.... 當然啦 佢地飲到醉哂啦...好明顯 我呀 一杯都冇飲到 只係飲什果賓治 唔係我乖仔 係我一陣要返工呀 返工前飲酒....想死頂呀!!!! 話時話....好耐都落過BAR 多左好多玩意 去到咩都唔識玩 好瘀呀 最後回到家凌晨一點半 瞓覺時兩點... 瞓幾個鐘返工 就係咁...開開心心過左一天喇 多謝女友一口答應比我去玩啦當然要....Thx呀~ >>June 14, 2010 at 12:15:16 AM GMT+8 2010 年 6 月 11 日 星期五 【酷熱】 妳的回憶 女友今日從朋友手中攞左兩隻DVD既PC Game 遊戲名﹕Microsoft Flight Simulator X 係一隻駕駛飛機既遊戲 像真係度很高 模擬架機既控制 真係同真飛機冇咩大分別 同樣到可以用Printer...印張飛行數據出來 真係靠呢D咁既數據 去控制飛機來往升降 我同女友今日研究左好耐都唔知點玩 我地選擇香港國際機場做起點 首先....架機已經直撞平地...到知佢點令佢飛起時 我地撞穿哂香港所有建築物..包括會展、中銀大廈、修頓球場、機場、美利樓等等 完全撞到哂 當然唔會顯示爆炸啦 架飛機只係好神奇咁會穿牆過壁 到我地真係知佢點可以令佢由跑道上起飛喇 我地就模擬航線...駕駛波747-400由香港去台北 真係足足飛左我地一個鐘多先到 當然係飛左一D冤枉路啦 但整個過程真係好真實 無論時間、景物都好似 咁一個鐘最後我地都係墜機台北個桃園機場啦 因為飛到都唔知點叫入Runway同點叫佢停定入Gate內 其實個Game係OK好玩 只係我地水平低唔識玩 之後我地上Youtube見人玩 人地可以飛到好好...落得好好之餘 仲係可以改左架飛機機身塗裝 我地見到有JAL、ANA、華航、國泰、聯合等等好多好多既飛機機身塗裝 真係好靚好神似... 其實自同女友一起後 我對航空呢方面認識左好多好多 我之前都係覺得佢只不過係交通工具的一種吧 但我記得女友有一日響機場同我睇飛機升降時 講左幾句話..好深刻記得 "其實我開始對佢冇咩好感特別，但自從飛過之後，自己身在三萬八千呎高空，你諗下...一大舊咁重既物體可以升在高空喎...你唔覺得好神奇咩..?" "我覺得一大舊咁重既物體可以升在高空喎".....呢一句 諗真D... 又係喎 點解一舊咁大咁重既野響半空可以唔跌... 咁輕咁細既葉片都會由樹跌下來 更何況咁大咁重既飛機...!! 我真的好有深刻印象 女友講"好神奇"呢三個字時個樣 那時係黃昏時間..在機場一號客運大樓7樓外面...妳臉向住東涌方向、妳頭上仲係紮住馬尾辮、身微微向前靠雙手向欄杆上借力咁企，用文字好難形容妳那一刻... 總之那一刻的妳真係深深吸引住我 那個時候既妳真係深深印響我心我腦度 就是那一刻開始我發覺自己真係確實喜歡妳呀 其實那時我地已經一齊左 但果一刹那個感覺好似有D野話我知咁... 話我知自己冇揀錯對象 而自己又的確真係鍾意妳 諗起黎.... 呢個機場都比左我好多好多妳既回憶比我 我呢一刻諗 會唔會有一天我地會帶住我地既小朋友 在同一位置睇下飛機呢 如果將來有小朋友 我讚唔讚成會帶佢地一齊黎呀...? 雖然長遠的事....但心想一想真的會笑一笑呀 >>June 12, 2010 at 3:12:21 AM GMT+8
|
|
無事嗎?irene佢而家情況如何