| 日記 | 日記主簡介 |
||||
2010 年 9 月 19 日 星期日 【綿綿細雨】 返工之苦 女友今日做Turnaround 放工時我都照舊接女友一齊走 但係今日見到女友出來時雙眼又紅又腫 問下去先知女友響返工既時候 比個客用極其難聽既粗口問候 無論係女友既阿娘、全家都不放過 還問佢係唔係身體有問題有缺陷 即係話係唔係耳朵有問題 講左好多次都係咁....唔明白 而事實係個客講得唔清楚...甚至係講錯先會咁 事件中因為個客用英文答佢女友既問題 但佢係中國人香港人...係一個廿幾歲既女仔 公司指引...如果對方係用英文問同答Crew既問題 Crew就要用英文回應 基本上..女友英文係絕對冇問題 只係個女仔講又講錯..又要懶勁用英文 女友又唔知佢想講咩既..... 佢就不耐煩講多一次...當然都係用錯英文啦 最後女友明白... 女友話可能佢意識自己講錯 而佢又覺得女友好似暗示話佢"唔識又唔講"既意思咁 對方極為不滿 之後係咁嘈.... 魚翅最PK係"顧客永遠是對的"宗旨做事 Crew冇得駁斥對方....更慘係仲要笑住回敬佢話自己錯 可能女友既笑容令對方覺得自己比人笑 於是係咁鬧係咁嘈 事後佢個老總雖然好體諒同明白女友係冇錯 亦都唔使女友再Ser佢 但我今次見女友真係好唔開心 第一次見佢為呢D事去喊 我見到女友咁只可以氹下佢....話事情都完喇...也許永遠都不會見到佢 說時遲那時快.... 我同女友去巴士站等巴士既時候 比女友碰見佢響另一條線等車 女友明顯地係怕左佢唔想比佢見到 我亦都用個身擋住女友....免得比佢望到 但我眼見對方其實都好眼眉好貌..五官都好標緻 真係睇唔出佢係咁既人 果一刻雖然好想幫女友打佢一巴 當然冇咁做啦... 只覺得....世上點會有D咁野蠻既人...而且大家都係同種人 同時都深感體會女友工作既辛苦 >>September 22, 2010 at 3:57:38 AM GMT+8 2010 年 9 月 18 日 星期六 【酷熱】 相處之道 發覺我自己越來越冇主見 即係好似食野咁 女友每次問我食咩呀想 我就話"是但啦...隨妳啦...妳鐘意啦....我冇所謂" 答左完全地等於冇答過一樣 如果...你地既另一半永遠都冇回應你既問題 你會如何...? 屯門、元朗、天水圍都係我地常去既地方 講真...以上地方真係冇咩好食 我個人比較嗜好日本既食物 例如係刺身啦 基本上講得出既刺身我都會食....生蠔例外 但如果每次都係食日本菜 就真係多多錢都唔夠食 試諗下.... 賣單點都要過100蚊 有時明明唔係肚餓 但都唔知點解我都可以食例牌個幾碟 我食芥辣既程度可以話幾嚇人 有時我諗.... 若果奬門人呢個節目可以請我去食壽司就好喇 真係好想領教一下佢係唔係真係咁Q攻鼻 講返轉頭... 我成日都因為"是但啦".... 是但啦....呢三個字 今日終於令女友覺得唔耐煩 問我...可唔可搵一次唔好是但呀 其實我都唔想.... 事實上我都唔知食咩好 記得我仲係做7-11既時時候 有個剛比女友飛既男同事同我講 他日你有女朋友既話 千萬唔好成日都講"是但啦"...呢三個字 原因係女仔都係唔鐘意一D冇主見既男人 亦都係咁先攪到佢同女友分開 雖然前車可鑑... 但今日自己都係咁做 算唔算自取滅亡呢....?? 女友本身性格都算係好好痺氣既 而家都開始不耐煩我經常咁講.... 應該算得上係一個"警告"吧 睇黎我都要睇多D食譜... 等女友問我想食咩都有得答下 亦都要睇多D飲食雜誌.. 等下次女友問我出街食咩都會有得答 男女相處之道真係"深奧"呀.... >>September 22, 2010 at 3:56:43 AM GMT+8 2010 年 9 月 17 日 星期五 【清涼】 廿年珍藏 永遠響屋企搵野 都好似尋寶咁 有時搵返D野真係想笑.... 今日我又去執下有冇D野我可以攞走 一來可以空D位比屋企人用 二來...冇用既就掉左佢...... 阿娘今日放假 見到我執就幫我手 點知 執執下...執左一袋藥出來 雖然冇發霉 但已經係明顯地唔食得 阿娘見到....大叫 嘩....乜黎架.!!!!! 你"吸毒..啪丸呀" 唉......都廿幾...三十都黎喇 而家講睇怕阿娘都唔會籐條炆豬肉我掛 坦白承認..... 呢D就係細細個唔食偷偷地收埋既藥 因為我細個時好怕吞藥丸....藥水我反而多多都同你隊喎.... 阿娘話..唔怪得之你細個D病睇極都唔好啦.... 跟住阿娘仲話...正一死蠢...."唔食就掉左佢啦..收埋佢仲乜....真係無腦..!!!" 係囉..... 點解我細過唔沖入廁所算呢....?? 細個係咁天真架啦 永遠覺得收埋係最安全架啦 我都唔弱丫 到差不多廿年先比你發現 算係咁喇...... 再講..... 而我我吞藥既能力.... 唔係自誇.... 少少既水我可以一次過吞二十粒藥丸 唔信既話.... 我地可以試你睇 當然......要比錢輸賭啦 最少100蚊我先受呀 哈哈~ >>September 18, 2010 at 4:25:35 AM GMT+8 2010 年 9 月 16 日 星期四 【清涼】 一張"紙" 今日同女友出出下街 途中收到細妹電話 話返工時唔舒適 大概係講大傷風感冒啦 我個妹雖然算係聰明女 但有樣野佢係白痴既就係唔識摸額頭判斷自己有冇發燒 同埋白痴到唔識睇水銀探熱針 其實我真係唔明 支水銀探熱針咁細支 但水銀柱顯示咁粗都會睇唔到..... 唔明...真係百思不得其解 但呢刻咩都唔緊要喇 同女友一齊接個妹睇醫生先喇 一見到細妹 臉色一D都唔好 行路都好似要好小心咁 我摸下佢額頭 起碼都過101度以上啦 同細妹相處咁多年 我都知個妹係....一定要睇"睇開果個醫生"先會好 睇其他醫都係..白比錢!!! 幾經辛苦先扶到個妹去睇醫生 去到先掛號... 其間診所姑娘有用耳探 探出39度幾 咁攝氏同華氏我唔識都轉啦 總之都算係高燒啦 等左半個鐘先有得睇 原本想陪個妹入去既 但個妹而家都大個喇 唔係幾方便既 不過細妹呆病到傻傻咁 怕佢唔識表達同醫生講 最後決定叫女友入去同佢一齊睇 咁大家係女仔 無論對醫生同細妹都係好事啦 睇完出到去.....返到屋企 到夜晚...我發覺... 我問女友...病假紙呢....?? 女友..定一定神......講..哎呀...."唔記得左..." 最慘係我地夜晚先發現 診所關門....關21:30.... 我地21:20先發現冇醫生紙 可知有D"串串供"既醫生.... 只要過左一天就唔會補發醫生紙啦 就算比都只會寫今日..... 昨日既唔會再寫... 慌會怕病人厄病假害佢"身敗名裂"咁 只好立即打電話去啦 好彩佢地仲有幾個症未睇 肯定21:30都唔會收到工 但係怕佢真係一個唔覺意快快睇完症走人 我都係坐的士去先係上上策.... 唉... 為左一張"紙".... 要我比兩張廿蚊紙同一張十蚊紙.... 有時"紙"真係貴過黃金呀 人人都係為左呢D"紙",打生打死打份工.... 做人..真係為乜呢到底 半斤百両首歌講真係冇錯...."一生一世為錢幣做奴隸 個種辛苦折墮講出嚇鬼...死俾你睇" 看吧你同我真係....彼此也在捱...!!! >>September 18, 2010 at 4:25:07 AM GMT+8 2010 年 9 月 15 日 星期三 【清涼】 買月餅 臨近中秋 又係時候買月餅 記得細個時D月餅放到發霉都冇人食 但自從有左冰皮、雪榚月餅之後 就係家家不能少既應節食物 就多多都唔夠食 望真個價錢真係同傳統月餅差不多價錢 但冰皮已經買左五大盒 傳統既只係一盒.....買來放既擺既..!!! 既然冰皮價錢唔平 唯有四出問下人有冇得平啦 買平野途徑我得兩個....少朋友人臉唔廣既我冇法啦 分別問左教協、護協....優惠既朋友 去左睇過佢地D教協、護協既內部宣佈單張 計數計數.... 始終都係護協平D..每盒平廿蚊最少 不過去到佐敦護協上面...人山人海 你推我撞咁 呢班姑娘..除左件制服後.... 跟本同普通師奶冇分別 去到睇到真係嘆為觀止 或者我兩次都係大時大節前去啦 找天如果平日去... 可能會好一點吧.... 總之........今日就迫死人..迫死我...打崩頭咁滯..... 咩D月餅唔使錢既咩.... "姑娘們"..........使唔使咁狼死呀 如果..你去過現場都會令你 汗顏...!!! >>September 18, 2010 at 4:26:49 AM GMT+8 2010 年 9 月 14 日 星期二 【清涼】 異味既乸型 今日接女友放工 出來時...女友同個空少一齊行出Arrival Area 萍水相逢啦當然 只係今次做機時做同組既 我見到佢都禮貌地咁同佢打個招呼 但一稍為接觸...真係心中"嘩"出來.......!!!! 我真懷疑佢係"公公"呀...即係"太監"呀 講野陰聲細氣到呢 真係弱聽些少都唔知佢講咩 咁啱佢係住天水圍 見女友同佢咁好傾 我話...不如我地搭E34去天水圍啦 反正順手可以去銀座百佳入貨 之後我先返屯門囉 女友點點頭算叫應承吧 上到巴士我都好識做叫女友同佢一齊坐傾計..... 因為見到佢地咁好傾 唔知點解我好放心佢地兩個一齊 感覺上佢地都攪唔到D咩出黎 八掛既我都八下佢地講咩.... 點知佢地講 護膚、化妝品、買衫、面膜等等全部都係女人既話題 我真係立即冷得毛茸茸咁 開MP3聽歌好過喇 到左天水圍佢響天華邨站落車 禮貌地大家Say bye bye啦 佢走左之後我同女友講 佢係唔係"左手派"架 成個女人咁 跟住女友話.... "我諗女人都好少會有"腳臭"呢回事吧" 佢同我同一組做事 一齊同一間Crew bunk瞓覺休息 我比佢臭到瞓都瞓唔著..... 女友話... 唔知到底佢係唔覺自己有味...定還是自己嗅覺過份地敏感 真係頂佢唔順 佢仲響機做野時 又成日做錯又做得慢.....比佢激死又激心 呢D人真係...下次咪比我同佢同機...."殺左佢呀..!!!" 如果唔係去天水圍買野.... 我鬼打得閒同佢同行呀 你呀.....比我同佢坐...推我去死呀...仲好講...!!! 我點知妳咁唔妥佢喎.... 妳真係個心同個身既反應係兩樣架 心係討厭,,,,但個身可以同佢相處 妳既Emotional Quotient ......勁高囉... 如果下次同人唔妥既.. 打個手勢比我知道都好丫 咪等我戇居居咁嘛 >>September 18, 2010 at 4:23:08 AM GMT+8 2010 年 9 月 13 日 星期一 【晴】 冷漠車長 返工時響元朗站見到雪梅姨 正確講係佢見到我 夠醒目丫....響我差D開走一剎那 好似叫侍應點菜既手勢咁 提手一舉...成功吸引到我注意 好成功同順利咁叫停我車.... 打開前門比佢入 同一時間仲有幾個乘客因而受惠...上到我車 其實我唔太鐘意響西鐵元朗站等上客 因為D人一個一個接一個咁來 佢又唔斷人龍先慘 最痛恨係又比我見到佢追我車喎 咁你話等唔等佢好丫 等一個..下一個又到 下一個又有下一個....無止境下去 早期...我都會做下好心....等到就等啦 但我漸漸發覺咁唔係辦法 自始之後..... 我就以我關門為準 唔理你上到月台掂到我車都好 上唔到...你等下一部吧 曾經有個人因為追我車門.... 趕唔切個人衝入車廂內 佢就"報復" 隨手攞左D野擲向我車頭 你估下係咩呢...?? 就係一包名牌TAMPO紙巾 比喻可以話佢擲個"LV袋"比我...!! 嘩...貴野黎架...紙巾中既名牌呀(下次有冇考慮擲1000蚊紙比我呢...??) 果刻我心諗 你係男人就擲紙巾啫 如果你係女人會唔會擲衛生巾呀? 嘩........比馬會知道呢一世都唔會有六合彩中啦 不過好彩而家都暫時只係紙巾.... 人情味唔係冇既 非繁忙時候人唔多..我係會等既 但繁忙時間.....老老實實喇...除非我識你啦 如果唔係下部請早喇 開始我都發覺自己做得越來越無情 亦都開始明白點解D老手會咁冷漠咁Cool... 原來係咁"訓練"返黎既....
>>September 18, 2010 at 4:22:30 AM GMT+8 2010 年 9 月 12 日 星期日 【乍寒還暖】 明看、窺看定還叫偷看..?? 今日我電腦有D問題 唔知點解上網成日都斷線 無可奈何下只好用女友果部電腦啦 反正女友返左工都唔會用 不過.....打開電腦見到有D事 我真係唔知點咁 你話我嬲咩....唔係 唔開心咪.....又唔係 只係個心有D野總係講唔出...唔識形容 其實私人電腦好多時D密碼已經係唔使Set 可以直接入去 好似Msn、QQ、ICQ咁 都可以Save Password而直接Login...再Auto Online 就係咁.... 我一打開電腦 女友個Msn自己Online 一 Online就係咁收人地既Msn Messages 大多都係話"妳唔使返工咩"、"響度做咩呀"、"男友不在家嗎..?" 只係上線短短一分鐘...已經有三個係男仔既Message 對方唔知道係我.... 我唔應佢啦..我Set離開 但對方仍然強攻Message 而且D字眼....我會覺得佢係想追女友咁 我覺得我已經Set左離開....你想點..?? 其實我可以Set Offline mode....甚至Off左佢 但我又好想知呢個人想點 好奇心驅使下 所以我又特登唔Set Offline mode.... 就睇下D人有咩"符Fit" 有個"通心粉"網名既人......名副其實係"粉"人 好奇下....我最大化個msn果個對話視窗 咁變左可以睇到之前佢既對話 其實我好想打開個History睇 但最後都冇做到 因為我都相信都係會"冇野睇" 點解話冇野睇...??係因為我最大化左個Chatting Table之後 雖然只係見十多句既對話 我都知女友都係..好聽叫"應酬下佢"、難聽就叫"耍佢" 從字眼看到...女友對佢講野都幾"冷言冷語"下 即係答..."哦..係咩..."、"係呀"..."冇呀"....."ok 咁喇"等等 明顯係條"通心粉"死纏爛打咁啦 但係佢都仲係咁打Message過黎炸我..... 佢真係令到我好唔知點.... 真係好想打去問佢知唔知我係邊個...你講夠廢話未???? 不明白女友點解唔封鎖佢 但講到底...電腦係女友佢自己 佢有佢用既自由.... 正如女友都唔會干涉我既電腦...甚至Msn對話 不過今次我都唔知做得啱唔啱..過份唔過份 我算唔算打開女友既私人呢..?? 雖然我已經Send左Message向女友自首..話因我電腦有事...而開妳電腦見到佢D野 但比著你地又會點做...點算好..? 係男既.......你會覺得睇係冇錯 係女既.......係唔係會覺得我好多手兼多事? >>September 13, 2010 at 3:12:36 AM GMT+8 2010 年 9 月 11 日 星期六 【乍寒還暖】 入廚 女友一早自己靜靜咁起左身... 我完全察覺唔到 不能不承認自己係爛瞓 只不過我又總有十數天會比較醒瞓 所以我都唔知自己係爛瞓定係醒瞓 總知...今日我就係屬於懶瞓啦 女友響我瞓死期間... 佢自己一個人已經準備好哂返工所有野 包括大小黑... 今次係Long haul準備既野會多D 女友都好淡定 響返工當日先執野.... 我問...."妳有冇執漏架...?" 女友話...."冇呀....做左咁耐都執少野就抵自己死啦...." 見到佢頭都紮好 制服亦都著好 儀容一樣冇問題 攪掂哂仲夠時間食埋個早餐 女友從廚房個電子蒸籠攞出佢早既準備好既點心 雖然只係現成既公仔點心 但都有佢親自皮蛋瘦肉煲既粥 我真係覺得女友煲既粥係好好食架 而且煲既量都唔少 夠我之後食多一日 跟住仲講雪櫃有一煲已煮好既卥水雞亦 一大碟"通菜"、兩大碟既"冬菇碎肉餅" 仲有...一煲"苦瓜湯.."(我唔明點解女友會咁鐘意飲.....苦架...!!!) 呢D餸就係我既三日食糧喇 全部以上的...只要加熱就可以食.... 方便哩....似唔似"殘廢餐"呢...!! 不過...如果而家你叫我煮飯... 即係叫我拆左屋企既廚房 曾幾何時..女友向我講過 家中既廚房係重地.... "如果你敢掉亂D擺位....我手都拎甩你....!!!" 女友佢真係好重視個廚房 講真....如果我攪亂女友個衣櫃....佢都冇咁兇 如果我有心亂找野而整亂呢......!!! 哼...!!可有排嬲死你喇 一般人家中只個響書房、睡房先會放書 而我地家中廚房有一個小層架係放滿我睇唔明既食譜 睇唔明既意思包括係... 語言啦...有一半都係英文..有D係日文(因為好多都係外地買返黎....) 中文簡體繁體文都有 之但係中文我都睇唔明.... 因為佢書教D煮法真係麻煩到不得了 我真係見到都唔想煩 但據聞她口中知道有D步驟係"多餘" 不過你唔好理丫.... 佢能夠整到出來呀....你真係吹佢唔漲架喎 其實有好多野都會響出面買到 而且仲係好平... 好似豆腐花、豆漿、麵包呢D咁丫 幾蚊都會有交易 使乜咁辛苦去做呢?? 中秋節快到喇 嗱....今年又會整月餅 但今年唔好整"花生醬做涵"果個呀 真係食完想嘔呀 唔係難食到嘔.... 係D花生醬...好"餾".....食得好辛苦同頂肚...頂到好想嘔呀 假若我食完返工駕車呢 我諗一定會因架車郁動令我反胃 分分鐘嘔到部車都要"報銷" 真係諗返起個花生醬加花生碎再加兩隻蛋黃既冰皮..... "滯"果種感覺直到而家諗起都想嘔呀 太厲害喇...! >>September 13, 2010 at 3:10:18 AM GMT+8 2010 年 9 月 10 日 星期五 【溫暖】 妳係醒目女黎既 如果將心比己 當知道有意外發生時 事件受害者可能是身邊既人 但又不能確定 唯一方法係靠電話聯絡 如果電話都唔通...冇人接 你會如何.... 心情係唔係會急得要命...? 昨天 有意外發生 女友知我駕咩路線 女友知我會途經那裡 女友知我呢個時候在附近 女友打左12個電話、1段口訊、3個短訊 我完全冇接到 因為我電話放左上車個手袋度 任佢點響我都唔會聽到 事後我覆返電話比女友 第一句就係...."作死你呀..而家先打比我...!!!!" 我之前知有意外發生呀..心急得要死....電話又唔接 我聽到女友講完 我話...我之前真係在事發附近架.... 但我冇事喎..唔使緊張 女友話.....雖然估到應該唔會係你 但總想知道確得下嘛 明知你係駕615線....出事的係505線 但係總係聽到聲音先放心.. 其實我本身都想上車攞返部電話架 一來可以接來電..二來可以影相 但難道我要爬上車攞咩.....好怪架嘛..咁多人望住 我知妳係聰明既 妳會分析到斷然到我有冇機會出事既 睇返D來電都係好早時候連續打過來 最尾個短訊妳都寫"見信息就打比我" 咁証明妳已經放心啦.... 嗯...... 妳都知擔心掛心哩.... 上次妳地其中有架機兩個引擎半空冇動力 去到跑道打開滑梯 夠睇到我心急如焚啦 我都明白妳當時心情既 最多我以後電話跟個身 唔跟手提袋好未呀..? 咁就實冇下次啦 咁.....放心點未呀? >>September 11, 2010 at 12:38:11 AM GMT+8
|
|
無事嗎?irene佢而家情況如何