2004 年 4 月 17 日 星期六 【晴】

終於看完了整套 君望之永遠 了, 故事的水準相當不錯, 但中段的故事發展真是相當抑鬱和灰暗呢... 看到眾人的無奈及痛苦...及愛恨交織的複雜關係, 真的令人有很深刻的感覺.

君望之永遠 的故事內容大概是這樣:

主角 嗚海孝之就讀某某高中, (父母又是行縰不明, 為何日本動漫畫的設定總是主角一人獨居的呢? 難道在日本父母的存在感真的這麼薄弱?), 雖然快上大學, 但仍是整天遊手好閒.

涼宮瑤在好友 速瀨水月的幫助下, 向主角告白, 兩人順利交往.

但好景不常, 在一次約會中, 由於主角的遲到, 瑤在等待的地方遇上車禍, 昏迷不醒.

感到深刻自責的主角, 放棄了大學..放棄了生活, 整天行屍走肉地生活著...
一直暗戀主角的水月順理成章地照顧了主角平日的生活, 慢慢發展成戀人, 並幫助主角重新振作.

但三年後的某一天, 一直昏迷的瑤突然甦醒了...但她的時間仍是停留在3年前車禍發生的那一天(即是她不知道時間過了3年, 而由於身體受不了刺激, 所以家人仍是瞞騙著她, 讓她以前車禍只是不久前的事...)

瑤的突然甦醒會對主角和水月的關係構成什麼影響呢? 主角和水月又會怎樣面對他們昔日的愛人和女友 瑤呢?

故事發展便是這樣了...算是值得一看的作品^^
有興趣的可以問我借^^

>>April 19, 2004 at 10:34:02 AM GMT+8

2004 年 4 月 15 日 星期四 【晴】

Yeahyeahyeah, 得到各方好友支持, 甲陽軍鑑既人氣指數終於突破一萬大軍.
為左紀念e件事, 知盛決定改名.

將大威 山城守 次郎知盛 易名 為 大威 三山 清海入道...以後大家識點叫喇...haha

今日約左欣欣姐食飯, 唔知點解勁好訓, 長訓長有, 訓極望下個鐘都仲係好早, 真係幾乎十點就可以起身, 但太早起身又唔知做咩, 於是選擇繼續訓...

下午出門口, 次次去親欣欣姐間office 都覺得好鬼遠...慢慢行都會身水身汗...
去到都未座低佢就俾左杯水我, 真係細心...haha...

之後去左間 叫做翠華既茶餐廳食飯...唔使咁多人下華, 結果搞到要答台先有得食...
其實真係唔多鐘意咁, 又嘈又迫, 不過時勢如此, 無得揀...

一路食飯一路傾計都傾得好開心...d 野又幾大碟, 結果兩個都食唔哂, 下午我一向冇咩胃口, 幾舊牛柳落肚已經有d 頂住既感覺...食哂d 牛柳, d飯剩少少就算...

結果呢餐竟然係佢請, 令小弟真係不勝感激^^

本來想一回家就做陳峰的, 結果都係遊手好閒居多..夜晚又同王dull打返cm, 真係唔多夠時間tim...

之後又有人嬲我打AOC, 呢場真係打得好過隱, 全程係咁攻, 步步進迫, haha...
爽呀...Terry肯玩就係8人大戰了...最後結果係6人打(7條友實力唔平衡, 令一條友走左)...
但都打得好過隱...

部機好似中左毒, 成日restart, 結果清毒又用左唔少時間...在此多謝王DULL 先生既協助...

但近來愈玩愈顛, d 時間愈來愈唔夠使, 做野就愈來愈冇心機...
三成先生的教誨: 思維大義的人, 無時無刻都要珍惜自己的生命, 所以他才要遠離毒害...
這些我都忘記了...

順帶一提, 三成先生的這句話是被處斬前的數刻鐘說的...享年41歲...

>>April 17, 2004 at 8:31:03 AM GMT+8

2004 年 4 月 13 日 星期二 【晴】

如果唔計余伯伯果個呃人既present, 今日呢個中史既present 將是我校園生涯既last 一次...
一早就回校print outline...但圖書館好多人...唯有去左中醫果度print, 中醫果度d 電腦全是win98,
真係好驚print d outline 出黎會出現d 怪獸字, 好在print 左堆outline 又冇事喎, 只係print 余伯paper時便慘了, 有兩張d 字走哂樣, 但又聲時間, 唯有下次再print 過...

下午同丸and gali 食飯, 好耐冇同阿丸lunch 了, 餐飯食得好開心...
唔知第時仲有冇機會再一齊食飯呢, 希望套綠里奇蹟0岩佢睇喇^^(再次推介, 本人最愛電影之一)...

食飽飽之後就出發present去, 今次present係個人上準備得最差, 但整體上準備得較好既一次...
因為我只係練過兩,三次稿就唔理...但就試過成組人排過一次...對上一次present有咁做如果冇記錯已經係RP present 時既事...

雖然整體準備唔錯...但堂tutorial竟然冇人返咁滯...冇觀眾...
今次份稿寫得好求其...講講下望一望d 現場觀眾就搵唔返講到邊...於是全程都係幾乎冇望稿既情況之下完成...

總結今次present...pre 得一般, 唔算太差...又唔算太好...
自己既表現亦只係係水準以下....我俾自己60分...整體65分(因為組員間夾得都幾好...亦有前後呼應...)算比預期中既結果好...

之後迪迪堂...又冇聊左3個鐘...不過debate都算有趣...而且成堂都係同阿東傾計...都唔算難捱...
跟住就直落王dull, 丸等人既present...

王dull pre得流暢...可惜太細聲...
大丸pre 得有d 照讀feel... 英文已經悶加聽得辛苦...讀得太平板就更加...
好難吸收...
感覺上曹viv pre 得最好...

另外...康怡成堂都好似係度發緊夢...都有d 懷疑佢有冇聽個present...

放學同蛋哥佢地食tea...食得好開心...有講有笑...
可恨既只係Emma太惡, 成日蝦蝦霸霸...
惡人終會被教訓的...

今日多次俾人話我係或者似日本仔...完全係百思不得其解...
paper成日做日本, 都唔代表我係日本仔0者...

大丸話三成似日本名...梗係喇...
三成根本就係一個日本人既名0y麻...笨!!!

>>April 14, 2004 at 2:14:54 PM GMT+8

2004 年 4 月 11 日 星期日 【晴】

時間過得很快, 這麼快便是4月12了, 還有不到一個月, 便要告別正式上課的日子...
對茫茫前路, 總有點不安和迷茫呢, 比升大學時的不安感強烈多了...

今日也是in 東方的日子, 今次算係自己正正式式既第一次interview, 早幾次唔係暑期工就只係internship, 感覺應該好唔同.
開頭以為自己會好緊張, 會訓唔著, 但估唔到會咁好訓喎, 真係長訓長有, 非常之舒服^^
最重要的是上床果陣唔好諗, 咁就可以訓得好好...

晨早起身就著哂成套suit...其實gali 話見報紙工唔須要太隆重, 只係我買左套suit都未正式著過,
想著黎開心下0者...haha...好型仔啊...真係應該影幅相先得^^

出門成日都有過習慣...如果早左出門, 就會特登周圍行黎行去徙返d 時間...
自己最憎早到同遲到...但往往因為e個習慣...會搞到自己好急同好趕...
今日亦都係...見到有車都唔上...見太早...寧願等下班...好在冇出事...
仍然好早就到左...仲找左gali 傾左一陣計tim...

in 果陣問d 野果然同我諗既差唔多...但話雖如此, 自己都係冇咩點準備過...
加上個阿姐拙拙迫人...答佢d 問題都好考邏輯... 但其實in 左十分鐘就in完...
好快, 仍然係一貫水準, 但呢次interview 一問一答都好流暢, 但總覺得自己既表現麻麻,
可能冇諗過會做e 一份工...亦都冇諗過竟然有得in...所以d態度好似唔多投入...唔夠肉緊咁...
d 答案全都是大方有餘... 不過當取個經驗都好...
難得既係...竟然一d 都唔緊張...

in 完之後...發現左幾件事...
就係夏天著套suit 將會超熱,
第二就係對鞋著得耐會好括腳...(括到生水泡)

之後就去左同d 組員傾present...巨B哥唔知搞咩, 成日都成個潮州怒漢咁...
真係得人驚...好擔心個present...真係...希望唔會出事...

之後同阿剛兩條西裝友去左行街, 仲係街鋪上演無間道...
d 眼界好差...熗game 既命中敵人數竟然係個位數...一定係支熗有問題...

夏天...感覺令人好庸懶...回家就午睡...zzz

體能差左好多...前日幫大佬搬部舊電腦去信德中心...只係一段路仔, 隻手就幾乎抽筋咁滯,
之後回家時隻手仲有d 唔多聽使既感覺...點會渣成咁....唉...
太少運動?

>>April 12, 2004 at 10:08:37 AM GMT+8

2004 年 4 月 9 日 星期五 【晴】

昨晚場阿仙奴大戰利物甫真係精彩, 真係好波不停播, 成個星期都係咁睇,
唔好話d 球員會累, 我地d 球迷都睇得好辛苦嫁, 足總呀, 足總, 唔該你d 賽期排疏d 喇...

但講開又講, 今個星期d 波真係場場精彩, 些路迪對維拉利爾都好似打到7彩, 可惜冇時間睇...
其他好似阿仙奴打車路士, 拉科戰ac, 皇馬打麼落哥, 場場都咁正...
如果有得重播, 大家一定要睇呀, 套用著名球評家王興桂名言: 好波不妨一睇再睇!!!haha

呢幾日先發覺好鬼多野做, 交左hon pro 就解脫? 而家先開始咋...
中史present, ipe paper, world order issue...多野做到暈...
到底一星期前既決定是對是錯?...雖然帶黎好多歡樂...
但時間上好像並不恰當...

君望之永遠 原來是 你所希望的永遠咁解...
開頭以為個故事好普通...但估唔到個故仔發展落去會變成咁...
真係愈睇愈有味...果然..名牌即是名牌...套野出名係有佢既道理既...
大家見到都應該買返套黎睇...只是一百大元...
蔗渣般價錢, 燒鵝般味道嫁...haha...

蛋哥...多謝你既留言, 但下次打aoc 你0米再放飛機, 明明約左一齊屠Terry 城...
haha...Terry 真係渣, 但都多謝你既寶貴意見^^

>>April 10, 2004 at 5:39:21 PM GMT+8

2004 年 4 月 7 日 星期三 【晴】

呢兩晚既歐聯大戰真係場場精彩, 很好睇啊...
雖然阿仙奴出局, 但車仔亦是我的一杯茶, 只是有點登阿記唔抵...
成季打得咁好...竟然如此...

但3場歐聯...場場都震動人心...反而最鐘意睇既就係完場前果一刻, 正如決賽, 我好鐘意睇捧杯一刻一樣...果種感染力真係好正, 睇到d人咁興奮都登佢地開心...
相反, 亦可以感受下輸波一隊既失落...
呢d 真情流露真係唔係成日見到嫁...

聽完波, 訓幾個鐘...又要早早起床回校交hon pro...
d 時間就用哂係份咁既野身上...print 又麻煩...又要釘..又要set 封面...
返黎真係無鬼聊...

阿剛病入膏肓...情況令人擔憂...

之後同蛋哥佢地lunch...阿東又講埋走向共和d 無聊事...
唯有膚衍下佢囉...睇電視劇都睇到咁...唉...

食完飯就各散東西... 之後就去左逛街...

唔知點解...食親學校d 野都肚痛...

期待已久既君望 永遠(唔知譯名係咩...)入手...亦見到十二國記既新一章...本來好想買...
但都係等一陣...睇佢會唔會整多幾集成個box set 咁出先...
本來同人名作 月姬都有d 興趣...可惜聽聞係一套垃圾...決定唔買...
另一感興趣的是果醬少年...但少女味太重...有d 驚唔0岩睇...
但實在係出名既名作...搞到有d 心陏...

君望 永遠 俾人既感覺都算唔錯...人設算係ok...故事比較普通...
內容明顯以青少年為主, 沒有DN Angel 那類幼兒向一點的主題...
但個人覺得DN Angel 幾位主角既關係描畫得較好...那種淡淡的感情...看得很舒服...

君望 永遠既故事發展到底會係點呢? 呵...

突然有感: 和女人交往很容易, 但要明白她想什麼卻很難...
佢同你講一樣野...可能係出自真心真意...亦可能係為左試探你...
亦有可能佢自己都唔知自己想點...
所以...男士們...一定要小心應對呢d 情況呀...
萬不經心既話就後果自負囉(汗...)

>>April 8, 2004 at 6:05:32 PM GMT+8

2004 年 4 月 6 日 星期二 【晴】

haha, 因為忙住做某d 事...搞到hon pro 都荒廢左tim...
真係勤有工, 戲冇益呀...

丁偉介紹本書唔單止有用...而且仲幾好睇tim...即使係d 唔關事既資料都寫得好好睇...
早佢又唔羅出黎...得一個星期先介紹黎俾我...真係0y><

最憎改自己d 文...覺得first draft 其實已經寫完左, 再改, 都冇咩問題.
但second draft 仲要加加減減就真係麻煩, 而且佢既要求仲唔係d具體既要求tim.
雖然話唔做都得, 但叫到, 點都要加dd既.
希望唔會影響哂成篇文既結構同流暢性喇.

本來做完hon pro 都好有滿足感, 但睇報紙睇到每次有突發野發生時,人地果d 專題報道...
就覺得自己d 文唔算得係d咩...人地咁短時間都整到篇野出黎, 而且仲洋洋數千字, 有紋有路.
自己份hon pro 萬幾字就搞幾個月...真係慚愧...

你話寫得好好咩?我又唔多覺...只係寫到可以讀同可以接受既水平...
唔錯別字...唔累贅...寫得流暢已經係萬事大吉...
都唔敢點話自己中文好囉...

睇報紙話而家d 青年, 即使係大學畢業...但d 語文能力仍然勁屎...又眼高於頂, 唔肯由低做起...
遲到, 請假當閒事...夠鐘放工就走人...
eee...咁似返暑期工既我既!!! 多做多錯...唔做唔錯...有少少野做又唔多忙就最好...
自己一直既工作心態都係咁...
真係唔要得...

>>April 6, 2004 at 7:49:15 PM GMT+8

2004 年 4 月 4 日 星期日 【晴】

好耐都冇寫daily了...
近排真係唔多得閒...因為開心既事實在太多^^(實際上只係得一件, 但已經用哂我所有時間...haha)
搞到功課...hon pro...搵工...咩都未做...
真係慘...

haha...

死火囉...好鬼多野做tim...趕呀....><

但昨日都用左d 時間寫信...haha...
仲自己用咭紙摺左個信封tim...不過...唔多靚(整得靚你都驚...haha)
快d 寄左佢先...^^

>>April 5, 2004 at 11:39:10 AM GMT+8

2004 年 4 月 1 日 星期四 【晴】

呢排都係遊手好閒, 混混鱷鱷...日日一起身就係開電腦...戇居居...
曾經唔止一次, 我認為我既人生係毫無意義, 生活毫無樂趣可言...
每日都係食完就訓, 訓飽就食...

但昨天, 我得到了寶物^^ haha (看得明白的自會明白^^ haha)

在這個階段...十分忙碌的時候並不是一個理想的選擇...
但現在一切也沒有關係了,,,

真的很久沒有試過這樣興奮了...急不及待地渴望明天的來臨...

可能太興奮了...結果一直睡不著..典到7點幾就同阿媽落街食早餐...
食完之後可能太眼訓...覺得愈來愈辛苦...
好似就快瓜老襯...

本來約左一齊lunch的...對唔住呀...yanyan姐...
多謝妳咁諒解我^^...下星期一齊再食過喇...
haha...

雖然很辛苦...但精神仍是處於極興奮狀態...

不過諗諗下, 而家當然好開心...但遲d 冷卻左之後...仲會唔會有呢d 熱情呢?
冷靜和務實一向是我的優點(係自稱自贊...咁又點?)

點都好...心情大佳...相信會持續一段時間^^

>>April 2, 2004 at 7:15:17 AM GMT+8

2004 年 3 月 30 日 星期二 【晴】

昨日成日留連裸體團, 又同蛋哥chat, 搞到好夜訓,
之後又典左成個鐘先訓到...唔夠訓呀...
蛋哥咁多野做, 都賞面同我傾計, 希望佢星期四個present 掂喇^^

一早起身就覺得有d 寒意, 仲有d 腳浮浮tim(唔係腳尖行路果種浮呀...)
真係唔多舒服.

病病地...但陳x欣又竟然又遲到...太可惡喇, 要病人等!!??
Joey 又派餅, 點解佢成日會派d 咁滯又會食到口乾既野既呢><
等齊人就去打波...

病病地, 開頭走唔陏打得好屎, d 波打得唔到位, d 距離感又冇乜...
但打完一輪, 出左一身汗之後身體既狀況明顯好轉^^
Joey 仲問我係0米秘密練兵tim, 但都覺得上次同David 佢打果次水準好d...
陳x欣又扮唔識打, 但都打得幾好0y^^ 廢剛更加唔使講...
打波真係開心^^

點都好, 今日既奮勇作戰已為我留下"大威雖病, 不可擋也既勇名"
ps. China d 球技真係有d奇怪...

迪迪堂, 雖然好留心...但一直冇發言...始終個氣氛唔太鼓勵人講野...好死氣沈沈咁...
3個鐘...座係度等時間過, 呢d 就叫虛渡生命喇...
但debate 都唔難...遲d 一定會踴躍d 參與...

IPE 堂到Terry 哥佢地present, 佢地pre 得都幾好...
剛剛前幾日我備課又睇完e個topic, 咁難免要插死佢地嫁喇...
但廢東條死仔轉移視線, 唔正面回答問題...死奸仔...
Terry 就出奇沈默...唔唔...唔通大限將至(爆...)

借完書就回家, 途中一陣清風, 但覺精神爽利.
可惜係地鐵迫沙甸魚既過程中, 體力被嚴重消耗,歸家即一睡不起...

>>March 31, 2004 at 3:54:41 PM GMT+8