2004 年 5 月 29 日 星期六 【晴】

昨日同老屁大戰3小時...打到精疲力竭...今日又一早起身(其實都唔早...係十一點幾...haha)
去同中學班友仔食飯...

約12:15 金百利...點知去到鬼影都冇一隻...真係無奈...過左3個字左右各人先陸續出現,
而迪比更加係遲到近半小時(遲太耐就唔知喇...總之就等左好耐喇)
令為左準時到達而係地鐵怒跑樓梯既我變左做傻仔...

齊人之後去左gali介紹果間台灣野食lunch(其實都唔可以話係介紹...只係求其提議去果間野度食...) d食物只係ok, 但都唔要求得咁多...一路食都有傾有講, 都冇因為唔見太耐而生疏...
haha...久唔久出黎聚一次餐都唔錯.

食飽飽就去莦萁灣會合眾人再上老屁間豪宅...點知其他人又遲到...
睇黎遲到對7Wisdom 眾人黎講係理所當然既事...但遲到15分鐘以上就確實離譜也.

上到屁全屋企, 誰知佢家有猛犬, 兇暴成性, 成日圍住人周圍咁聞, 打打下機又突然閃埋黎, 真係嚇到幾乎掟制(突然有野閃埋黎...都0米話唔驚)
夜晚食完飯又係食糖水(指定動作!!???)...吹左一輪, 回到家中已係十一點了...
如果照原定計劃BBQ就肯定仲夜.

有關是次活動詳情及評價, 由於三成受到身邊親密朋友既壓力, 故決定封筆.

回到家又即刻同王dull, china 等人打機至深夜.

>>May 31, 2004 at 8:55:57 AM GMT+8

2004 年 5 月 27 日 星期四 【晴】

話咁快就到月尾~~呵

下午食飯時就播套X黎睇...點解套野要改e個名呢...
真係睇左幾集都唔明...
不過clamp d 畫功的確唔係唔須要懷疑...睇片頭知係clamp 既作品就已經知道係信心既保證.
套野都幾好睇既...除左有時d人物太做作之外(例如點解d人講野要企係電燈柱上便?之後又跳返落黎?點解d人一定要雙手插住袋黎打交?) 雖然好型...但明顯係扮哂野...

套野既故事大概係講述守護世界既天龍七封印同希望改變世界既地龍七封印戰鬥既故事...
而且故事鋪排都幾有心思...算係佳作...到底故事既發展會點呢(不過其實個主線發展都估到)...

夜晚同腐皮等中學同學舉行失業會議...去左王dull高度評價既果間Pepperonis Pizza & Cafe食pizza, 不過覺得都係冇咩特別...除左個雞卷好食d之外...其他都係一般...而且價錢仲唔平tim...
不過久唔久食下都冇壞...

之後例牌機鋪, 糖水...(唔知點解..而家出親去同朋友食飯...食完野之後都要飲糖水...但實際不過係想搵個地方繼續吹水...)

大家找工都唔多積極咁播...但相信三成係最唔積極既一個...

>>May 31, 2004 at 8:35:42 AM GMT+8

2004 年 5 月 25 日 星期二 【晴】

haha, 今日9點幾就要起身, 因為約左東哥返BU 游早水...
第一次游10點半咁早...但竟然咁早又有少少太陽喎, bu 個池雖然細, 但勝在少人, 所以都游得非常舒暢, 平日我同其他人游, 真係游既時間好少, 例如同廢剛游, 會係水中深發顛, 用哂d力,
同醫師游, 就會傾計多, 但今日一野游左十幾個堂, haha, 真係未試過...
可能個池少人, d水又清, 所以長游長有, 平日去公眾泳池, 游游下撞幾次人便沒心機游了.

游完陪東爺去影印佢d 學歷同工作證明...一見到就話: 咩咁多既...
竟然連中學校內試既成績表都帶埋...haha...正傻西...
不過學佢話薺, print 多樣無蝕底既...

之後會合左廢剛, david 同巨B就去lunch, 食飽飽就打波...
今日打壁球打得極差, 一局都未贏過...好在...打得咁渣對應付東爺同david e d小腳色都已經卓卓有餘.

打到一陣東爺條麻煩友又話要試下做gym, 唯有陪佢做...

打波閒暇時, 有人不斷露體, 仲要係露俾三成一人睇...
好核突呀...有核突野當然係俾大家一齊分享喇...hahha

玩左成日..仲係精力旺盛...
深夜睇場期待已久既歐聯大戰...
點知係悶戰一場...旁證又差...打得又差...
真係zzz

開頭捧阿仙奴...點知俾車仔踢出局...
車仔打得好...轉捧車仔...點知又俾摩落哥踢出局...
摩落哥打得好...轉捧摩落哥...點知又俾波圖隊悶野大勝...

真係不斷俾人打沈...

蛋哥: 都係各人有不同意見0者, 你自己又好清楚人地d內情咩(不過一定清楚過三成既...^^)
之後三成同martin 都傾左好耐...
件事三成又唔清唔楚, 又唔關三成事, 你地圍內傾便最0岩了...誰叫當時三成不幸在你們的對話框內呢. haha

>>May 27, 2004 at 6:20:00 AM GMT+8

2004 年 5 月 24 日 星期一 【晴】

今天同醫師去九龍仔游水, 我第一次去e個泳池, 感覺好新奇, 原來咁近BU嫁喎...
可惜, 朱醫師效應再次出現,陽光成日都俾舊雲蔗住, 不過唔緊要, 游到累, 訓係池邊傾計一樣咁開心...
不過個池塊地唔多舒服, 唔多好訓...但d 噴水設備的確幾好玩...
但點解中池同大池要整條橋隔開呢?
一係就離遠d....個設計唔多美觀...

最好玩都係柴灣同上環的泳池, 設施好也...

游左兩個鐘(其實係傾計傾左兩個鐘...)
不過都好累...個身好重...感覺上...而且胖了很多...

之後就同醫師去食tea, 唔知點解俾佢屈左個下午茶, 但一餐, 半餐, 都冇咩所謂了...

去左信和..發現好多卡通都想買, 北斗之拳新版亦好吸引, 不過最後都係買左套x...
呢套野三成完全唔知係咩黎...亦都未聽過, 只係見到佢個名...同佢個封面...就好想買...

回家已經好夜了...上裸體團同政宗就諸葛亮進行激辯...HAHA...
真係打字都打到手累...

食完飯之後...就睇大漢天子, 套野的確頗有趣呢^^

夜晚欣逢王dull點港...立時打cm...再加china 3人混戰...
但進度很慢呢...新version賣人真麻煩...
一路打機...一路同gali及女神icq, 睇黎佢地既台灣之行幾有趣咁播...

深夜時份, 同martin 討論bbq既事時, 唔知點解會拉左去朋友的私人問題上...
三成始終覺得, 人不能事事計較金錢及利益的, 為何要受商業社會的法則支配?

人與人之間的交往更是講一個信字...若一個人不值得你信, 你便不要相信他好了...
有懷疑...覺得有問題就要問...既然佢話冇問題...就應該信...
唔信又有咩用?又可以點?人與人之間的誤會, 便是由彼此不信任開始, 願各位戒之, 免之.

若人家騙你, 便讓他騙好了, 那更好, 讓你認清了他的真面目, 事事懷疑, 何益之有?

人無義而不生, 無信而不立, 三成實在很討厭這個事事以功利為先的社會...
蛋哥竟稱三成所言為歪理, 沒有仁義, 人又為何而生呢?只是為了錢嗎?
跟朋友的價值觀原來分歧如此之大...真是有點不高興...特別是蛋哥offline前的一句...

可能三成是看太多歷史書了...對史上的高風亮節之士有很大的憧憬...並以他們為榜樣...
三成很希望自己可以成為一個不謀私利, 只為義理而活的道德完人...
一切行為都是發自內心的善...
不幸三成不材, 做很多事很多時都是為了自己的方便...妄顧他人...
所以很多時...三成都認為自己是一個大賤人...
但三成會不斷地反省...訓斥自己的過錯...痛恨自己的無能...鄙視自己的自私...
這都是三成做人的動力也...

人生匆匆數十年...成功...失敗...也不過是化作一堆黃土...
想到這一點, 得與失也沒有什麼所謂了...

捨己為人...慷慨就義的精神...是三成最希望擁有的...

>>May 25, 2004 at 7:46:32 PM GMT+8

2004 年 5 月 23 日 星期日 【晴】

終於睇哂成套monster了, 但感覺上套野到左後段拖得比較長, 早六,七期完感覺會好好多.
故事拉得太長, 看到後來, 感覺已愈來愈淡了, 亦失去了追看的慾望, 但整體上monster 亦算是一套優秀的作品.

發了多封email, 只有一封有回音, 而且也只是叫我到他們的網post 上自己的resume.
不過時間尚早, 應該沒問題的, Dolly先生亦同我講佢試過send 左mail成兩個星期先有人通知佢面試...所以都係唔好太心急...
發覺好多工都要LCC e類會計文憑, 自己讀果科真係搞到冇咩用咁...
自己開始陷入找工的兩難, 冇得in, 又唔開心, 有得in, 又唔知份工係0米真係想做, 好似騎牛搵馬咁, 真係同一個PK仔無咩分別...發覺冇目標真係一個好嚴重既問題, 都唔知自己奮鬥既方向係咩, 想做咩都唔知...真係慘也...

原來Dolly先生同GC先生都註冊左裸體團, haha, 咁以後就有多d 朋友一齊參與討論囉...
呵呵...

>>May 24, 2004 at 6:09:01 PM GMT+8

2004 年 5 月 21 日 星期五 【晴】

haha, monster 真係好睇呀, 每日都要在家睇3,4期先安樂.
但就快睇完了...睇完之後, 又去邊度搵另一套咁好睇既漫畫補上呢?

係成報份招聘圈左幾份工, 腥左幾封mail, 希望有回音喇, 真係好怕找工.
好似迪迪所講咁去做既話, 根本就係係度推銷自己(雖然找工確是一個推銷自己的過程).
但這種感覺太令人討厭了, 得就得, 唔得就唔得...明明唔得, 但就令in 你條友覺得你得, 咁豈不是呃人...即使過左骨, 請你..但做落唔掂就仲樣衰.

發現好多工都要求良好普通話...真係死火過死火囉...
好似冇咩工作技能咁tim, 不安,不安.

>>May 22, 2004 at 6:20:33 AM GMT+8

2004 年 5 月 18 日 星期二 【晴】

wahahahaha
終於考完試了...
雖然d 題目非常奇怪..唔多好答...但我都盡左最大努力, 搏命咁寫哂自己識既野落去..
成績點都算囉...最緊要盡左力...

希望有B以上喇...今SEM應該可以B哂...如無意外...

考完試就同班同學仔去左食最後的聚餐...之後都唔知要過幾耐先有機會再同班同學仔一齊食飯囉...
不過真係好鬼累...zzzz

之後去左睇狙魔人...仲搵到完美女神米米米同學同我及gali一齊睇喎...
實在太感動喇~~~
套野都算ok...但點解d彊屍女人會咁搞笑...搞到冇哂d 緊張感...
隔離既米米米同學係d 緊張情節仲笑到收唔到聲...
套野有d 位都幾驚嚇嫁...我同gali兩個"朋友仔"當然會即時好gentleman 咁蔗住米米米同學對眼
喇...><

ps. monster 真係好好睇呀...多謝科拿借俾我...
真係狂追...

>>May 21, 2004 at 6:38:42 AM GMT+8

2004 年 5 月 16 日 星期日 【晴】

今天終於是考中史的日子, 考完這一科, 便只剩下IPE 一科了...

一早起床...食d野就出門口赴試場去也...

一路答車一路重溫...回到校又一路溫...
終於到考試的時間了...出的題目和上堂既貼士完全一樣...變都冇變...
真是始料未及也...相信大家睇到份卷都烈嘴而笑...

三成亦唔例外...一開波侯寫呀...寫呀...
寫了整整9版一題...很久沒有試過答這麼多東西了...手都軟...
希望可以座B喇...

同廢剛食完飯...就回家打機...
答車既時候又溫IPE...呵呵...真係一分鐘都唔徙...唔係玩...就係溫書...^^

>>May 17, 2004 at 6:44:58 AM GMT+8

2004 年 5 月 15 日 星期六 【晴】

呀呀...呢兩日都係為左準備考中史而努力...
係就係話溫書, 不過都係玩既居多, 玩既時間多, 溫書既時間少...
點會咁懶嫁呢...

中史其實考既範圍雖大, 教既內容雖多, 但其實真係要讀既話都冇咩野讀...
基本上睇一個鐘已經足夠合格有餘...
但三成希望考好少少, 所以都用左好多心機自己整notes, 抄古語, 爬課本...

咁搞下搞下都係得3張notes, 你話幾少野讀喇...

背熟d 古文之後就打機...

其實考試都幾好, 起碼可以操下自己...等自己睇多d書, 學多d野...唔使成日咁頹掛住玩...

下午都同王dull打左陣cm 先溫書...
夜晚溫完又打陣機...

呵呵...快變機王了

>>May 17, 2004 at 6:23:42 AM GMT+8

2004 年 5 月 13 日 星期四 【晴】

今天和gali, 大丸等去了看無痛失戀, 由於是占爺主演的作品, 還以為會是一套笑片..
誰知...竟是一套劇情片來, 全片的笑片絕無僅有, 但亦不失為一部佳作也.
劇情不錯, 劇力迫人, 看後使人有很深刻的感覺, 可說是一部好電影也.

次次睇完一套好片之後, 都唔多想出聲, 希望一個人靜靜咁思考同回味劇情...
於是睇完之後就匆匆咁告別gali同大丸...歸家去也...

近排都唔多想講野tim...死喇...

>>May 17, 2004 at 6:11:06 AM GMT+8