2004 年 6 月 25 日 星期五 【晴】

日日都通頂睇波, 好累, 特別是到了8強, 雙方實力接近, 分分鐘加時, 真係唔天光都冇得訓...
好在唔使返工住0者^^

一起身當然又係睇動畫喇(汗...)
haha, 睇d 輕鬆既動畫真係令個人都輕鬆唔少^^, 故事真的很不錯, 而且經常有些惹笑場面出現^^

夜晚捱左好耐肚餓, 去到觀塘同大丸等人食飯, 眾所周知, 三成唔係一個捱得餓既人, 一餓就冇精神, 而因為種種原因, 差唔多要到10點先有野食, 咁當然手羅命喇><
於是成晚都冇咩mood同精神, 食飽左個腦都係一片空白, 其實三成並唔係一個鐘意講野既人...
兩條友食飯自然要多多野講, 唔通大家唔出聲咩, 但大堆頭食飯三成就唔多鐘意出聲...
搞到d人又以為三成係0米覺得好無聊或者唔開心tim><

歐國杯繼續大戰連場...瑞典輸波, 三成鐘愛既球隊得返捷克同丹麥, 但可惜天意弄人, 8強佢地是但要死一隊, 但由另一方面睇, 就係4強點都會有支三成鐘意既球隊撐場, 咁都唔錯0y^^

最好就係捷克捧杯喇^^

>>June 27, 2004 at 2:17:30 PM GMT+8

2004 年 6 月 24 日 星期四 【晴】

HEHE, 新買果套動畫好好睇呀, 睇opening果陣覺得少女味好重, 仲有d 擔心tim><
不過套野d功仔靚之餘, 故事又非常之輕鬆有趣, 一d都冇做作同難頂既感覺(Clamp 套X就...)

haha, 真係睇到上隱, 睇動畫已經成為三成既生活意義(笑...), 始終覺得日常生活實在十分無聊呢.
遲點返工的日子應該會更加枯燥, 但也沒有辦法喇...

英格蘭竟然臨尾香, 球王比利真係勁, 搵人贊下佢老婆仔女等佢快d 封0米喇, 正烏鴉咀.

今日返左BU 同王dull and 肥佬等人打波, 打羽毛波真係唔多識, 反射神經一向都唔多快,
王dull d 殺波次次都恰死我, wakakaka, 不過打左兩粒鐘都好happy, 仲打爛左幾個波tim><

夜晚歐國杯繼續爆冷, 強隊紛紛下馬, 好在無買0者, 買左就係咁先...

>>June 27, 2004 at 2:01:19 PM GMT+8

2004 年 6 月 22 日 星期二 【晴】

哇卡卡卡, 留係屋企實在太悶喇, 所以今日三成呃左小剛同偶游水...
但今日天氣真係麻麻, 同小剛食完KFC, 入到泳池游左7,8個塘之後諗住出去曬下太陽喇,
點知出去一陣就落狗屎...(汗), 不過原來係泳池淋雨都幾正播...
今次游水又係傾計多過游, 講講下變左偽民主派同清流派既論爭~~~XD...

睇完戲之後就去左睇木馬屠城, 妖, 唔好睇既, 套野成套都係睇畢彼特表現, 真係屈哂機...
雖然係改篇自神話0者, 都唔使咁勁掛, 完全唔make sense, 而且套野畢彼特只係一部殺人機械, 再唔係就係一d 做作既感情, 好難頂...
回家找左d 關於特洛伊戰爭既資料, 先知套野好多無謂情節既意思...
如果唔知神話故事, 套野好多情節都會覺得好無聊, 例如支箭點解要特畢彼特隻腳呢, 佢阿媽同佢講果返話有咩意思呢, 唔知神話真係覺得無無謂謂...
套野唔值得推介, 雖然場面浩大, 但缺乏主題同靈魂, 睇完之後都冇咩感覺...

去信和買返套新既動畫先...卡卡卡~~~XDXD

>>June 25, 2004 at 12:13:55 PM GMT+8

2004 年 6 月 21 日 星期一 【晴】

wakakaka,
昨日英格蘭同法國一齊贏波, 作為球迷當然開心喇, 場波快上快落, 真係睇得好爽嫁...
仲中左條首次名過關tim, 又有本俾我今晚重鎚意大利囉...
wahaha

昨日終於有蟑螂出現, 好冷靜咁消滅左佢(完全係因為佢冇周圍飛...)
無損我睇波既雅興...

下午醒左, 食埋飯就同王dull打機, 失落左冠軍tim, 真係慘><
一路打就一路再睇吸血姬最後幾集, 再細味每個人物既表情同對白...
真係次次睇到最後心入面都有d 想喊既感覺...真係值得一睇再睇, 特別係片尾首歌, 我好鐘意...
唉...就係要d 咁樣既結局先可以令人一再回味, 如果冇左最後幾集, 呢套野不過係一套消閒既輕鬆小品(雖然有時有d 陰暗...同集集都有d閒人死...)

>>June 22, 2004 at 9:37:38 AM GMT+8

2004 年 6 月 20 日 星期日 【晴】

X 那聲, 真係唔爆粗都唔得...
昨日西班牙踢到成PAT屎咁, 大家都知(亦可能唔知)三成一向都係捧開西班牙,
02年世界杯更因西班牙俾球證屈出局而首次(亦係唯一一次)而傷心落淚, 估唔到昨日佢地對葡萄牙會打成咁, 真係睇到火起, 佢輸出局都真係抵x死...

都未試過睇波睇到咁慶, 一路睇一路爆粗, 之後仲悶到訓著左, 成場不思進取, 求求其其, 咁既態度, 麻煩你成隊返屋企食蕉喇, 連打e個杯既資格都無...
睇到心淡, 真係, 肥仔領隊無q用, 麻煩你即刻辭職...

隔壁希臘果場買佢無波入, 點知開波一分鐘就入波, 累三成回饋返d錢俾馬會tim, 咁就收手唔買波住喇...都係等買聽日場意大利喇><

睇完套吸血姬, 真係好鬼寂寞, 次次睇完一套好好既動畫都會咁...
真係百無聊賴, 肥雞本曹操又就快睇完, 真係遊手好閒...
下午無聊之下打左電話俾肥雞叫佢打cm, 一打就打左成個下午,
肥雞又一路打機一路打電話黎, 大家都知三成好憎講電話嫁喇, 次次一渣起個電話就想快d 收線...
但肥雞一有人重傷或者輸得大大獲就打黎...傾電話好傷神咁麻...
三成有時間都打電話俾三成既至愛完美女神談心喇, 估唔到d 時間就花係呢隻死雞身上^^(汗...)

一路打機, 一路成日渣住個電話, 真係搞到頭都痛, 亦可能係對住部電腦太耐...真係眼都突,
打左4個幾鐘就收機抖抖囉...開始為左消磨時間而打機, 發覺本身打機既意慾係不大的...

而家愈來愈懶做體能, 都係得閒做十下引體就算, 根本咩都練唔到...
好似大佬咁, 竟然可以係屋企玩成粒鐘, 又計時, 又盛...真係無咁既毅力...
天氣咁熱, 真係唔多想陏tim...><

>>June 21, 2004 at 6:31:00 PM GMT+8

2004 年 6 月 19 日 星期六 【晴】

昨日真係睇左兩場好波呀!!!
雖然條2串1斷左, 但一樣睇得好開心...
頭關德國已經唔爭氣, 買佢贏竟然和鬼左, 但拉脫維亞再次證明佢唔係魚楠...
係, 場波水準唔係高, 但一樣好好睇, 竟然守得咁好, 如果有d 運, 真係贏埋德國都有機...

尾場捷克對荷蘭, 更加係上演左一場扣人心弦既精彩比賽, 肯定係本屆至精彩, 至經典既賽事之一...90分鐘, 全冇冷場, 真係搵個位抖下氣都無...正!!!

三成特登落街補飛支持佢既捷克, 竟然開波幾分鐘就輸1:0, 真係個心都即刻涼一捷...
再睇十分鐘, 竟然輸到2:0, 真係諗過訓覺就算, 但點知2分鐘之後又追返一粒...
此後賽事就掀起高潮, 雙方搏鎚, 真係捱眼訓都抵...
鬥到下半場, 捷克射入追平一球, 真係high 到震!!!好想大聲歡呼, 但又驚嘈到屋企人...
唯有細細聲嗌喇...估唔到完場前仲俾捷克贏埋, wakakaka...
果種興奮真係非筆墨可形容...但其實荷蘭唔值得輸, 和合理d, 好在佢有個好領隊, 唔係三成都唔可以去馬會收錢, wakakakaka...

之後咁high當然訓唔著, 唯有打陣機消弭左d 興奮先^^

醒返已經係12點幾, 又一路食lunch 一路睇卡通, 吸血姬終於睇哂,,,
個結局, 真係估佢唔到!!!!!好touch, 爭d 睇到流眼淚咁滯...
好好睇既一套卡通...睇完之後, 真係失哂神...
再次感到無盡的空虛及寂寞感...咁好睇既一套卡通, 又黎三成而去...

>>June 20, 2004 at 7:36:31 AM GMT+8

2004 年 6 月 18 日 星期五 【晴】

前幾日開返icq, 收到系統message先記起今日原來係gali 生日,
佢地成班人去bbq同佢慶祝, 但由於時間關係, 又要買波, 又要通霄睇波...
所以三成就唔去了, 希望佢地玩得開心d吧...

下午睇左陣吸血姬, 就快睇哂成套了, 先前以為套野好似叮噹咁, 無咩連貫性,
但估唔到睇到後幾集, 終於有d有連貫關係既劇情出現, 死喇, 剛剛先睇到入肉, 但仲有3集就完了, 唔夠喉呀...
真係愈睇愈開心, 可能女主角是三成喜歡的類型吧^^, 看得十分投入呢.
不過現實中如果遇到像女主角這樣的人, 三成反而不太懂得和這類人打交道呢...
真是矛盾...

夜晚就落街食野兼去馬會取錢, 咁就梗係順手買返少少嫁喇...
用贏返黎既錢買左條2串1過關, 輸左都唔肉痛...

但回家之後, 都未座定, 又落街補返兩舊水讓波盤, 等今晚可以睇得更加刺激...
單係買波已經用左半個鐘...haha

>>June 19, 2004 at 12:55:11 PM GMT+8

2004 年 6 月 17 日 星期四 【晴】

今日真係...好好好好黑仔呀...
約左李柏豪同肥雞游水, 本來都好happy的, 但走果陣竟然漏左隻錶係泳池><
到發覺時, 再去找已經找不到了...到底是如何消失的, 到現在仍是百思不得其解...
只能怪自己太操心大意了罷... 隻錶是家姐送給三成的, 很有價值>< 現在不見了, 真是很不開心呢.

不過今日游水都游得幾開心既, 又猛太陽, 可惜一齊黎果兩位先生都唔多肯游, 寧願曬太陽同傾計, 有點慶幸那次海灘之旅取消了, 以肥雞今日的表現, 真係浸死左都冇人知...游半個池就要停低抖氣...ha, 出海游仲唔死咩....

之後發生唔見錶既不幸事件, 傷心既三成同佢地食完tea之後, 路過馬會, 忍唔住買左場波...
跟住就去左同李先生打機...
打高達, 但都係唔多慣打機街, 好似渣好多咁, 幸好李先生既技術不俗, 反而三成成日累死佢, haha
但用左廿紋唔夠都打左個幾鐘...

返到屋企, 就收到民建聯既電話, 剛想唔再等消息既時候, 佢先打電話黎...
搞到差唔多夠時間就睇波, 一連睇兩場...
買左場瑞典, 點知一開波就俾意大利圍攻, 真係嚇到心都跳埋出黎, 仲要失波先tim,
好在最後都追平, 令三成順利贏半個盤...
發覺買左波之後真係睇得肉緊好多, 睇黎三成以後都會細細地玩返兩手...
追平果刻真係勁high, 如果唔係唔見左隻錶, 今日真係會好開心^^

>>June 19, 2004 at 12:46:48 PM GMT+8

2004 年 6 月 15 日 星期二 【晴】

昨日本來打算去海灘swim, 但因天氣不佳而作罷, 今年的夏天沒有什麼太陽呢.
就像三成的前途一樣一片黑暗(汗...)
自從second in 完之後就冇找過工, 都係等過埋e個星期先, 順便等下民建聯果邊有冇消息喇.
佢唔請亦都唔急, 返工始終只是無奈人生的一部分, 三成恨的只是每天無無聊聊浪費自己的生命罷了. 其實找到咩工都冇咩緊要, 找到份好工, 並唔代表你成功與否, 人之慾是難以滿足的.
三成很早便理解到這一點, 對什麼都不強求, 只是做好自己的本份便算了.

今日找到李柏豪同三成去睇史力加...(正確來說, 是他找了三成去看史力加才對...汗)
去左IFC睇, 果度d 位真是座得十分舒適呢, 史力加亦十分好睇, 冇咩冷場, 好搞笑.
比起前日果套睇到訓著既"笑片", 真係天同地比.

同李先生食過tea再行一陣就去左找家姐同阿媽食飯, ha, 家姐仲買左隻表送俾三成,
隻表好靚, 仲有要好靚既咭tim^^
餐飯食得好飽, 不過上菜就慢左d...等到家姐好似就黎死咁, haha, 係咁吹個waiter.
間野真係幾好環境嫁, 我地仲要book左窗口間房, 真係幾正^^
成家人咁都傾左好耐^^
返到屋企打陣cm, 又睇波囉^^ 西班牙慘被迫和><

BU張學生證就到期了, 真係孤鬼寒, 去到6月咁少, 以後又要游貴水...
成廿紋游一次, 好唔抵播.

吸血姬亦都就快睇到尾聲...

>>June 17, 2004 at 7:10:38 AM GMT+8

2004 年 6 月 13 日 星期日 【晴】

好耐都無打過日記了, haha.
日日都係閒賦在家, 遊手好閒, 已經好耐無找工了, 掛住睇波.
每日起身唔係打機就睇卡通, 吸血姬真是不錯呢, 但劇情沒有什麼連貫性便是了, 但也是一套十分有趣的作品^^

今日終於找到人同三成睇師奶殺手, 劏漢屍真是三成的至愛, 找到肥雞同肥Gali同三成一齊睇,
可惜套野就令三成十分失望, 廢片一套, Gali既回水之聲不絕於耳.
之後肥雞帶左我地去一間cafe 食tea, 環境ok, 只是份量極少, 都係sell 高檔, 杯野亦只是普通...

夜晚當然又係睇波喇...真係驚會暴肥, 因為一路暴睇, 就一路暴食, 屋企既零食以光速消耗...

>>June 17, 2004 at 6:55:12 AM GMT+8