2004 年 7 月 12 日 星期一 【晴】

haha, 好得累呀...
今日去見工, 但昨日只訓得4個鐘, 唔知做咩事, 又唔係第一次見工, 但竟然咁緊張,
咁興奮, 可能真係太耐冇interview la, 好多野諗, 真係同心儀既美貌少女單獨約會都冇咁緊張~
其實點幾兩點都開始眼訓, 但又唔願訓, 打機打到4點先上床, 明明好疲, 但又訓唔著...
於是典左一個鐘又起身打機...打到頂唔順先訓得著...唉...
真是不正常的生活~~

係床下底終於搵返個鐘喇^^太好喇...運氣加5
起身換衫就去interview, 好在今日唔熱太熱0者, 好耐都未著個恤衫了...
慢慢黎, 都早左5分鐘到, 間公司都唔算大, 不過in 三成既姐姐都幾nice...
一黎就講明會玩哂兩文三語, 三成仲睇到佢有張分紙mark 分tim, 好似考oral 咁, 分哂項目.

第一關: 用英文讀出一段文章.
攻略重點: 英語技能必須達到3級以上才可以把句子讀通...5級以下時會有一定機率發音錯誤

結果:三成十隻字又7隻唔識讀, 而且舌頭有d打結...發揮一般.
評語: 頻頻食字, 表現失色

第二關: 英文介紹自己
攻略重點: 英語技能要求三級, 若習得技能演講, 會有額外加成.

結果: 發揮較第一關理想, 但後勁不繼, 思緒愈講愈亂, 欠缺準備之過, 士氣下降5點.
評語: 開始上力, 可以更好

第三關: 普通話測試
攻略重點: 捲莉發音雖達三級以上才可達到理想成績. 面試官會發問不同問題, 而玩家必須於限時內選擇合適答案, 才可望過關.
裝備了零格瘋自學語言卡式帶會有額外加成.

結果: 識聽唔識講, 膽粗粗亂up.
評語: 實力所限, 已盡所能

第四關: 廣東話口試
攻略重點: 禮法及弁舌達4級以上即可過關.

結果: 發揮理想, 盡展所長.
評語: 表現出色, 對答如流.

in 完都不過係11點半鬆d, 又未肚餓住, 於是係灣仔遊盪一返~~
打左俾joey 傾左一陣, 佢又係0岩0岩做哂d野, 冇野做, 又會咁0岩既...haha
傾左一輪就走左去298行一陣, 都好耐冇買過動畫了,
今次買左套魔偵探黎睇, 走果陣個靚女sales 仲俾左張咭三成, 話儲夠10個印花就可以當100紋洗...買翻版(其實d 動畫香港都冇正版的, 都唔知算唔算翻版)都有咁多優惠(汗...)

終於食到哈迪屍喇, 都唔知幾多年冇食過囉, d 薯圈真係好食過M 記d 薯條好多
熱狗又大隻, 好好食^^

回到家, 同dolly傾左陣電話就大覺訓, 訓左一輪, 又俾dolly既電話嘈醒...
佢話要問我一條問題喎, 佢條問題真係...(汗...)
之後又傾左一輪, 醒哂...

計埋昨日同joey 傾既時間, 今個月傾電話既時間多左好多, 又多左打俾dolly~
haha...
雖然三成唔多好講電話呢一家野, 但同d熟人傾電話真係幾開心嫁,
起碼唔會冇話題先~特別係joey, 唔知點解講極佢都仲有野講^^真係非常健談^^
三成都有咁健談就好囉^^

明天係三成既第一次...group interview, 咩都冇準備tim><

>>July 13, 2004 at 6:21:46 PM GMT+8

2004 年 7 月 10 日 星期六 【晴】

話說昨日同dolly, gali等人盡興而返後, 回程路上, dolly邀三成同行...
其時夜深人靜, 四野無人, dolly含羞答答地對三成說: 今晚我屋企冇人...

就係咁...三成就去左dolly屋企過夜了~~
之後將軍都黎埋, 我地就3p...大玩winning, ha
一班人傾下計都幾好~~

玩下玩下都成5,6點先訓~~呢排都咁夜訓tim...真係唔多健康
仲食左dolly屋企好多野tim~~(三成一路食...dolly就一路話:乜你咁大食嫁~~)
係呀...係食得多呀...吹呀^^

回到家又大覺訓zzz
夜晚取左隻三國志戰記黎玩, 好好玩呀^^
早知一早玩喇^^

>>July 12, 2004 at 8:08:41 AM GMT+8

2004 年 7 月 9 日 星期五 【晴】

昨日同dolly gali等去dinner, 本來以為會多d人的, 但點知人人都話要陪家人食飯,
下次先喎... 突然做哂孝子, 真係講都冇人信...
不過今次晚飯都係即興, 唔得閒係好自然既事~~

上次行過見到間門面好靚既焗飯, 於是今日難得有機會, 當然去試喇...
點知...間野門面係靚, 侍應亦靚, 就係d 食物唔靚...
價錢又唔平, 但食物又只得大家樂水準, 仲冇野飲tim...咁就真係唔掂喇...
以後都唔黎呀!!!

食飽飽(其實唔飽)之後就去行街街...
往西走, 進入298旁的馬會, 會引發dolly填錯波飛事件...
係灣仔牛左一輪就去sogo食日本燒餅...都幾好食...
再飲杯野...今日就洗左成舊水喇~~

>>July 12, 2004 at 7:51:16 AM GMT+8

2004 年 7 月 8 日 星期四 【晴】

呵呵, 今日同dolly 去左柴灣游水, 好耐未同佢游過了~~
估唔到柴灣咁鬼多人, 游水之前想搵個地方食lunch 都唔得咁滯, 係大家樂食都要答台...
不過鬼咩, 人地返工都要食飯嫁...迫d 都冇法...

唔知係唔係氣管有咩問題, 而家次次游親水換多兩次氣個喉嚨就好唔舒服...
次次游完一個塘之後就開始有d辛苦...兩個塘就係咁咳...真係慘

不過今日都同dolly游左十幾個塘...
真係手腳都軟哂...真係渣, 要多d練下先得...點解會差過以前咁多~~

游完之後就上左dolly家大飲大食, haha, 好鬼飽, 仲打左陣winning先走tim...可惜係舊版...

成個星期既唯一一次運動...好累...

終於等到interview 既消息...好過無喇...老虎都試下先...
雖然機會不大~~

>>July 12, 2004 at 7:17:54 AM GMT+8

2004 年 7 月 7 日 星期三 【晴】

首先感謝各屆好友對三成的關心, 三成感激不盡...


執屋行動到了昨日終於進入尾聲...發展了不少中學時代的舊書, 唔知仲有冇人要呢...
亦找到了不少益智類的書籍, 如中國神話大全及十萬個為什麼等等...

特別是找到一本成語辭典及不少英文語法書, 看來有排看呢^^

整理大學notes, 得迪高利博士notes, 三成大喜, 立刻毫不猶豫, 珍而重之地置之於精美膠袋之中...
藏於屋外的寶物箱中, 送往堆田區公諸同好...
成功銷毀迪高notes---> 三成等級上升, 攻擊力, 智力及命中力上升5點...

清理了家中向處, 感覺上屋中的空間多了很多呢^^
但相信過了不久又會重新推滿雜物了><

每天下午都在找工, 但現在的工少了很多, 而且腥了很多mail都沒有回音呢...
但記得那時也是要找了差不多一星期才有得in, 還是耐心點找吧...

自己的英文和普通話實在差勁, 現在開始自學中...希望會有點成果吧~~

下午吃飯時再度重看一次蜘蛛俠, 三成真的覺得套片很有趣...沒有什麼冷場...

>>July 8, 2004 at 9:18:45 AM GMT+8

2004 年 7 月 5 日 星期一 【晴】

呢幾日都係係度執屋...D 櫃塞滿哂野, 真係好辛苦...但係當做EXERCISE 都唔錯, 一定出到一身大汗...之後再去沖涼...真係幾爽...
執野其實唔多難, 最辛苦係要抹乾淨d野, 布又得一塊, d 野又鬼死咁多塵, 真係過一陣又要洗塊布一次...

近排醒覺到自己實在太懶, 終日係屋企自命不凡有咩用?
歷史上只有兩種人會成功...一種係學識好好既人, 另一種就係果d 好積極...好主動既人...
但三成兩種人都唔係...唯有自己努力d...
執屋找到好多好書, 有英文語法喇, 有成語辭典(e本真係好野)喇...好多野學, 好多野睇..
不過又努力得幾耐呢...自己d 熱情成日黎得快...去得快...
在深夜d時份自己的感情總是特別豐富, 點子特別多的...
例如下決心向喜歡的女孩告白, 一定是在深夜...總是會有很多計劃...
但醒來後, 熱情便完全減退, 不想做了...總是這個樣子...三成也不知道為什麼....

總覺得自己常常過份地冷酷和冷靜...但也是沒法子的事...
三成可也是不想的...

最近發現了一點...在自己一個人的時候, 腦內經常都會有兩把聲音以一問一答的方式說話(精神分裂!!!?????)更出現了自言自語及發出怪聲的症狀(懷疑患上孤獨老人綜合症...汗...)

>>July 6, 2004 at 7:22:23 PM GMT+8

2004 年 7 月 3 日 星期六 【晴】

今日起身終於一口氣睇哂套動畫...睇完之後(其實未睇完已經有)又再次浮現出一種好空虛既感覺...始終睇完一套好既作品...好既電影...多少總會有D寂寞, 因為唔知幾時先有另一套咁好既作品出現俾三成觀賞^^

E家D 電話調查員好冇禮貌...今日打黎條女唔該都冇聲, 把聲死下死下咁, 都唔問你願唔願意接受訪問就講野...咁差既態度, 真係想爆粗小佢!!!

下午冇野做, 終於執下間屋, d櫃就好似雜物箱咁, 好多古怪既野, 十幾年前既杯喇, 已經過左好耐期既食物喇, 茶葉, 涼果, 同d 好舊既錄影帶...

清理左幾個鐘頭先搞掂, 即時多左好多空位擺野...屋企永遠都冇人執野, 人人d 野都隨手亂掉...
次次都係同一個人執...d 漫畫睇完亂放好易唔見嫁麻...可惜大佬永遠唔會放返係原位...

夜晚又睇波..希臘竟然捧杯, 簡直係奇蹟...相信決賽周前會買佢捧杯既人都唔會多(可能一個都無)
希臘人自己都唔信國家隊會打得咁好...雖然過程有少少運氣, 但佢都係值得既..
起碼佢d波死守得黎都有d 攻勢, 肯定好睇過德國先...
睇到e個歷史性既一刻, 真係令人感動, 不過始終覺得如果決賽係英格蘭對捷克就好囉...

>>July 5, 2004 at 8:49:38 AM GMT+8

2004 年 7 月 2 日 星期五 【晴】

真係慘, 本來今天約了dolly 游水的, 但可惜天公不做美, 大雨連場, 活動唯有取消...
咁係屋企有咩做好呢????太得閒, 於是再毅然去換左果套壞壞地既動畫
上兩次都有特登去換, 但e個政府好做唔做, 掃哂人地d 動畫場, 你掃咸片就算喇...
老少咸宜既動畫都殺埋, 唔怪得有五十幾萬人上街示威, e個政府殘民以自肥, 剝奪哂我地d 小市民既娛樂, 實在可惡!!!!

好在, 今次終於俾三成換到, haha, 真係開心, 走果陣順手買左本死亡日記既第一期黎睇, 又幾好睇播.
haha

一個人去嘆陣下午茶之後, 就返屋企, 期間dolly都有打電話黎, 原來佢都悶到發哂瘟喎...
呵, 但三成有動畫睇播...haha^^

回到家睇左陣漫畫就即時開機, 真係等到頸都長呀, 到底結局係點呢...
睇左3集...仲有2集就大結局...忍下手, 唔睇住, 聽日先再睇...

不過都係頭半段好睇d... 最後d 劇情開始明朗化既時候, 就冇咁好睇...雖然都睇得好開心...
e個亦都係三成唔鐘意睇香港電視劇既主因, 一開始未播d 劇情已經明朗化, 有咩好睇...砌劇情咁...zzz

今日開始又要重新為前途而打拚...嘿嘿

>>July 5, 2004 at 8:14:22 AM GMT+8

2004 年 6 月 30 日 星期三 【晴】

Dolly先生回來了!!!
今日約左佢出去睇蜘蛛俠加一齊dinner, haha, 人人都去遊行, 我地就去玩...
記得上年71泳池免費, 即旳約左朋友去游水, haha

今日真係好鬼死熱, 先頭以為由於遊行既關係, 銅鑼灣會好迫, 但點知又冇人喎...
去左同dolly 食飯之後就去睇蜘蛛俠2, 估唔到今日竟然會有咁多人睇, 唯有座側邊,
但一樣影響唔到套野既可觀性, 三成真係覺得e個蜘蛛俠系列(其實得兩集...)拍得唔錯,
冇咩冷場, 仲好好睇tim, 只係個主角冇喇喇喪失異能果度有d 無聊, 唔整好過整...
個八爪博士仲非常變態tim...

ps. 一路睇, 隔離既dolly就一路係度講: 套野d 女角咁樣衰既...
pps. 有近鏡影住d 女角既大特寫時...dolly: 妖!!!好樣衰!!

唔唔...

同dolly講買左捷克, 佢即時話: 我又買, 答沈你架船先...

結果真係俾佢答沈左...捷克出局...佢要負全責(爆)

明天第一日返工...但睇波睇到5點...zzzz係玩左成日既情況下訓得3個幾鐘...

>>July 3, 2004 at 11:49:41 AM GMT+8

2004 年 6 月 29 日 星期二 【晴】

太耐無打過日記, 因為實在load太耐, 原來不知不覺已經成個星期冇打...呵...
今個星期都發生左唔少事, 但都忘記了, 最慘既一件事當然就係套動畫後幾集睇唔到喇...

剛睇到最興奮既時候, 佢就黎搞事, 想取去換, 但政府又掃哂d動畫鋪, 真係要連我地e d小市民既娛樂都剝削埋...但又唔俾代替品我地, 咁叫我地點先可以睇到想睇既動畫呢...
睇動畫已經成為三成既生存意義, 而家冇得睇, 真係好傷心...

昨日回左聖記, 但由於肥佬遲到(又十五分鐘....唉), 上到去菜(笑)太已經走左...
結果都係3條友同一個老師食飯...人丁單薄...

夜晚回家睇前日買左既蜘蛛俠一, e, 又幾好睇播, 即刻好想快d 睇第二集...卡卡卡

荷蘭出局, 三成興奮, 女神心碎, wa卡卡卡卡

就快返工, 有d 惶恐同不安tim...點算...未開始已經唔多想返...人真係有惰性...

>>July 3, 2004 at 11:42:03 AM GMT+8