2004 年 10 月 22 日 星期五 【晴】

今天和廢Dull佢地去中環飲茶, 由於遲左出門口, 於是即刻疾步仆心仆命咁趕去中環...
但辛苦準時到達之後, 竟然又係一條友都無...
有時真係幾慶, 約親朋友次次都無一個準時的...(特別是快步走來赴約, 白忙一場到左都係要等時)
雖然三成自己有時都會遲到...haha, 但自覺都算十分守時的.

不過齊人時竟然係地鐵站內巧遇無巨陸, 見到當然要質佢幾鎚喇^^

之後一行人俾廢Dull帶左去蓮香樓飲茶, 好多人, 一睇就知係老字號.
d 野算唔錯, 不過亦冇咩太特別既地方.
食物樣樣d 水準都好平穩, 樣樣都唔難食同入得口咁喇.
埋單位位50, 價錢算ok, 始終食左唔少野, 不過最後都食唔到飲茶必食既鳳爪.

回到家就睇早幾日DL 既漫畫, 一睇就睇左成個下午.

>>October 23, 2004 at 6:41:35 PM GMT+8

2004 年 10 月 21 日 星期四 【晴】

由於搞錯了日子的關係, 原定充實的一天變得遊手好閒到非常, 早知係咁就同松松去銅鑼灣喇!!

忘了今天是公眾假期, 老爸整天在家行行企企, 煩到爆,決定冇野做都出去行下!!!
但冇喇喇都唔知去邊好, 想約人又已經太遲了, 於是決定去圖書館睇書^^

大會堂真係超唔方便, 鳥不生蛋, 狗不拉屎, 去親都好麻煩...
特別係離三成屋企唔近又唔遠, 答車仲耐過行, 真是...

去到睇書借書, 咁又磨左兩個幾鐘, 本來想借d 小說睇下, 但都係算, 睇返歷史書算, 借左5本書, 有排睇了.
圖書館d 死人書排得好亂, 好冇系統, 真係唔多掂...同一個系列的書都分開來擺, 麻鬼煩.
本來想搵本論語來睇的, 但都廢事找了.

回家就幫手做苦力同阿媽去超市搬野, 再次購入大量零食, 肚皮有福了^^

>>October 23, 2004 at 4:14:25 PM GMT+8

2004 年 10 月 20 日 星期三 【晴】

今天早上9點便起床了~~~完全莫視通宵睇波的疲勞.
點解?因為今天要去見"乜春都殺", 昨晚寫了稿, 中英文各一篇, 今天便一早起身, 沖涼醒神+練稿.

間公司係三成屋企隔離, 行十分鐘都唔使, 真係方便.
都好耐冇正式interview了, 一來有綜合招聘考試, 找工不太積極, 二來都係剛辭工無耐...
今次in 間公司都幾大, 首先in左間母公司先, 傾完一輪計之後見我果位小姐就俾左個地址我, 叫我去間子公司度再in, 好在都好近, 行兩步就到.
haha.

不過估唔到冇in 一排, 冇咩點生疏到, 唔知係唔係準備過呢, 今次interview覺得自己既表現好過以往任何一次, 可能係全程用中文喇...不過份稿最後都冇用到, 但係寫左既野會組織哂起個腦度, 有用時就搬返出黎, 所以大家見工時真係最好寫定份稿先呀...

請唔請就不知了, 一來三成經驗不足, 而且這份工還要求做一些公關工作的...

返到屋企先12點, 10點9走, 12點回家, 真係快過打針...

講起上黎...仲未收到公務員試既通知...奇怪...

個Hotmail 呢一年黎一直有d問題, 成日話個mail box 入面有1.9mb 容量既東東, 話個mailbox 就爆云云, 但del 哂所有野問題仍然存在...
上星期再次腥email 去佢個客戶服務部投訴, 但佢回左一次email 之後事件又再次不了了之.
真係激死人.

mailbox d 位已經唔夠用, 但仲有d 麻煩友好似劉x東咁就係咁腥d 三級email 黎, 徙哂個maillbox d 位..真係激死人...
佢d email 屋企有人果陣真係唔方便開, 都唔知幾時係正經野, 幾時係核突野...
諗起佢上次腥黎果兩件麻甩佬...就...嘔...

>>October 21, 2004 at 2:55:58 PM GMT+8

2004 年 10 月 19 日 星期二 【晴】

今天要去柴灣做筆試, 昨天亦溫習了不少時間...
溫什麼東東?其實都是翻看報紙的副刊, 較平日更仔細地咀嚼文章, 記記難寫的生字罷了.

不過近來又取返隻侍道出黎玩, 再玩一次又另有一返樂趣, 不斷斬人, 斬呀斬
用一招牙突就殺左千幾人, haha

答788真係好快, 20分鐘就到, 個筆試亦頗為簡單...自覺文章寫得一般, 但尚算條理清楚, 應該都唔錯既...

回家答780, 諗住好快喇, 點知
zzzz

用左成個鐘先返到屋企.

身邊不少朋友都是處於失業的狀態...想不到找了工的諸位這麼快便和三成一樣, 打回原形.
唯有努力 & 加油喇.

小剛又因為工作無聊, 天天無所事事而想辭工...
真係要辭工就快了, 不然做耐左先想走就麻煩了.
混吉的感覺確是不太好受的><

>>October 20, 2004 at 12:49:41 PM GMT+8

2004 年 10 月 17 日 星期日 【晴】

修茲中校死了...完全想不到他會死的...

鋼之鍊金看到了中期故事好像有點失控了, 特別是愛德華(兄)手腳的問題...
三成實在不太喜歡現時故事發展的方向, 應該有更好及更合理的解釋才是.

經過了星期六的玩樂及勞累, 結果星期天到了四時半才起床, 破盡過往的紀錄...真是非常痴線.

今天收到了叫三成去筆試的電話, 只有一天的時間準備, 還是明天再搞吧.
愈來愈懶了.

這幾天一有空便打文, 經過了一返努力, 終於把作品完成了.
有興趣的朋友可到這兒參看:
http://www.ran2001hk.org/forum/viewtopic.php?t=6867
不過寫的不太好便是了.

中超再次出現群毆事件, 令足球蒙羞!!

>>October 18, 2004 at 4:37:19 PM GMT+8

2004 年 10 月 15 日 星期五 【晴】

昨晚睡覺時因為某變化的出現終於令三成發現了腳麻乏力的原因...汗...
真的要小心保養身體啊.

昨日再因為那些自己煩自己的無聊事而失眠, 起床打機至5時才能入睡, 真是無聊.

由於要回校取畢業袍, 所以要早點起床...11時多便起來了(這不算早?而是很晚起床?試試失眠一晚吧)

由於掛住上網同打機, 遲左出門口, 趕頭趕命死返去喇, 點知西處未算西, 一西還有一西高.
去到一條友都冇...等等等等...zzzzz
巨B先生遲到達一小時...幸好冇等佢到就去左食飯, 唔係餓死都似.

返到去做完份好煩的問卷, 取左件爛鬼袍, 影左幾張相就去新校閒逛一返...
原來可以伸請免費入圖書館看書的證件, 一直都不知道, 真是笨了.

之後係大學鋤啤鋤到7點...
無巨陸受到嚴刑拷打, 仍然口密, 上次講d唔講d 擺明故弄玄虛, 搏成眾人焦點,
放心喇, 你唔講, 我地會幫你延續個故仔嫁喇...你安心去喇.

之後和巨B及巨剛去左大滿貫大飲大食, 一路食一路傾, 餐飯食左成兩個幾鐘, 都唔知點解會咁多野講同咁好傾, haha, 由兩點半開始就未停過, 傾傾傾傾傾, 傾到9點幾散場為止...

奇怪的事情是...回校一整天, 只是撞過三個同學...

>>October 16, 2004 at 6:18:22 PM GMT+8

2004 年 10 月 14 日 星期四 【晴】

無無聊聊又一天...
今天終於看哂鋼之鍊金part1, 實在是太好看了.

剛巧約了至愛女神, 便順道到灣仔買part 2來看好了^^
辭工後已經有很多天沒有真正出過街了, 落街都只係寄信同買雜誌...
haha, 一行出街個人都好似有d 豁然開朗, 日日在家真係會自閉的^^(真嫁, 係屋企太耐就真係會唔多想出街同見人嫁...)

估唔到係灣仔仲見到最新既愛與誠喎, 仲係得果間漫畫鋪先有咋^^lucky
不過故事發展到後期, 已沒有初那麼好看了.
鋼之煉金又只得散裝, 本來個人是比較討厭散來買的, 但實在太好看, 於是也忍不住一併買了.

之後行左一陣就去會合至愛女神, haha
帶左佢去間好遠的餐廳, 因為貪佢少人同座得舒服, 但佢好似行到就黎死咁.
女神: 到0米嫁!!!
三成: 就到...

女神: 到0米嫁!!!
三成: 行多陣就到...

女神: 到0米嫁!!!
三成: 下個街口...

女神: 仲未到既???
三成: 前面...前面...

真係驚中途俾人斬殺嫁^^

之後都座低傾左好耐...haha
仲出現左唔少搞笑鏡頭tim

至愛女神提到佢又見到d 神神怪怪野...唔通元朗真係咁邪?

唔知係唔係三成平日經常鍛鍊, 而且多是集中上半身的關係(其實近來已經愈來愈懶了),
近來好像不太能控制雙手的力道呢...經常都會出現力度拿扭不好的情況...
而且身體好像不太平衡的樣子, 雙腳經常有發麻的情況出現...
是不是應該做一做身體檢查較好呢...(汗)

>>October 15, 2004 at 7:21:21 PM GMT+8

2004 年 10 月 13 日 星期三 【晴】

呢幾日都冇做過d 咩有意義既事, 都係打機, 睇動畫.
好似浪費緊生命咁...haha

不過每日一夠11點就起身, 唔通係返工早起日子有功?
平時3點訓真係冇一點都唔會醒.

鋼之鍊金仲有兩集就睇完, 已經慢慢睇, 但真係太正, 有時忍唔住一日睇四集.
要快d 去買埋下半部先得.
故事真的十分出色, 真係必買之作呀!

煩惱總是自己找的, 有時也不知自己到底在煩些什麼.
過份沈醉於自己的世界反而讓自己看不清實際的情況.
看到事事被動的自己, 真的有點無奈的感覺.

求神指引我正確的路.

>>October 14, 2004 at 2:39:39 PM GMT+8

2004 年 10 月 11 日 星期一 【晴】

今日突然找返細個睇果d常識書黎睇, 估唔到又幾好睇喎...
好似原子, 中子果d份子構造咁, 原來我細個會睇d 咁深既書, haha
不過大左就咩都唔記得哂...仲有d 空氣, 自然生物既益智書...
本來是找出黎俾三成既表絰仔既, 但找左出黎就忍唔住睇埋一份, haha

全日做過有意義既事係得咁多, 都學到唔少常識.

其他時間都係沈醉係winning, 文明3同鋼之煉金既世界中.

另外, 發覺部機原來有個玩相既程式, 即時樂此不疲...haha


太過得閒...得閒到找工...
haha...搵d 工見下都好, 起碼可以見多d 世面先, 之後就再準備個公務員試...
而家已經後悔細個讀書唔努力了, 阿爸阿媽冇話錯的, 真係細個懶惰, 大個後悔.
如果細個果陣讀書肯認真少少就好了, 而唔係玩玩下咁...
結果而家搞成咁...唉唉唉...

>>October 12, 2004 at 6:59:47 PM GMT+8

2004 年 10 月 10 日 星期日 【晴】

今天係失業的大日子, 唔知公司既同事點呢?
haha, 有d 掛住松松同Raymond tim^^
返左兩個幾月工, 突然冇工返, 好似好唔慣咁.

昨日一玩就一玩到4點, haha, 今日一起身望下個鐘...3點半!!!唔係呀麻, 昏迷呀!?
廢事訓咁多, 拿拿臨起身刷牙洗面之後...
先發覺......

原來個鐘係壞既...不過係十一點幾...haha

由於昨日無後顧之憂, 可以瘋狂玩樂, 加上星期六,日英超休息,無波睇大把時間, 想做既野一次過做哂, 好似睇完名劍風流喇, 睇柯南喇, 打文明3喇, 要玩同睇既都搞哂, 今日即時百無聊賴...

講返名劍風流套書, 一書3冊, 頭兩冊半都好好睇, 睇到三成狂追...
但點知尾部就亂哂龍, 直情好似換左另一條友寫咁, 真係衰d講句, 我寫都寫得好過佢...
失望之極...

精神支柱既鋼之煉金已經睇左一半, 希望佢快d 出埋果十幾集喇...唔係睇埋e一半就冇野睇了...
不過實在太精彩喇, 而且e 套野仲肯定係人人都鐘意睇果隻, 唔似得十二國記e 類動畫唔係人人鐘意睇...

今日同曹viv姐姐傾左陣電話, 俾個女上司咁話又係慘d既, 不過妳都搵唔少喇, haha
0米當係"等價交換"囉^^

果陣三成決定辭工之後, 由於知道開開心心, 認認真真咁做埋幾個星期之後就唔使再做, 無休止既生活好似望到終點咁, 心入面不知幾踏實, 舒服...
但到而家辭左工喇, 但三成仲未對明天有咩打算, 即時又好似冇哂目標咁, 行屍走肉...
個公務員試一直冇咩大期望, 又有排先考, 考左又唔係一定做到公務員, 都係用幾日溫下就算果隻...
其實三成e d所謂大學生競爭力真係冇乜, 英文又唔係超好, 普通話更加係爛, 專業知識亦冇, 工作經驗又少...
雖然想好好充實自己, 但一時間亦唔知點落手好...
突然諗起一句野黎形容自己...
色厲膽薄, 好謀無斷...寄望明天會更好喇.

ps. n月前買的成吉屍汗, 終於看完了^^
實在是不錯的一部書^^

>>October 11, 2004 at 5:33:07 PM GMT+8