2004 年 6 月 11 日 星期五 【晴】

今日要去second, 但三成昨日照樣打機打到好夜...
三成而家愈來愈唔願意訓, 因為一訓醒就要面對新既一天, 新既挑戰, 隨住時間既流逝, 三成唔理願唔願意都要進入社會工作, 但心理上仲未適應呢, 始終返學太舒服, 時間又free, 焉是返工可比?

唔知係0米太淡定, 遲左起身, 搞到即時好趕, 好在上次模熟左d 路, 好快就上到去, 唔使遲到...

入到去, 已經有條女座左係度等in, 仲有條西裝友係入面in緊...
三成就戇居居咁座係度, 但唔知點解, 好快就到三成入去喎...入到去...
件老細話: 我俾三分鐘你介紹自己...
當三成滿腹偉論, 正待發表之時, 件老細個秘書冇喇喇殺入黎話: sorry, 我唔記得俾你做test, 麻煩你出黎做完先再in 0y...
真係麻西煩, 唯有出返去再test過, 上次test 翻譯加英文, 今次就test iq, 咩鬼野工黎嫁, 咁煩既...

做完之後又座係度乾等, 開頭黎仲從容不迫, 風度遍遍, 但而家愈座就愈緊張...真係麻鬼煩.
三成仲懶成咁認為條友應該唔會再問同一條問題, 點會咁荀俾你準備定再入去答0y...
於是三成覺得佢會用英文叫三成介紹自己, 腦海即時練習定先...

好喇...等到發哂毛, 終於到三成in 喇, 點知條老細又真係問返同一條問題, 轉唔切線tim,
唯有隨口up, 當秘笈喇, 仁義道德, 講講下連孔明老爹都出埋(三成當時既思緒已經陷入混亂狀態)
真係諗返都頂自己唔順...今次second in 就咁收皮...

三成既心理質素仲有待改善, 今次表現差劣, 只怪等太耐所致, 愈等愈急, 影響發揮...唉...
一定俾人當傻仔了, 相信要過一段時間先再敢係則魚涌出現...

in完即時勁down, 唔係因為覺得自己衰左, 而係覺得好瘀, 好樣衰...
三成自覺自己都算係一個樂觀豁達既人, 但就非常怕瘀同樣衰, 更加非常在意他人對三成既睇法, 對一面眉頭眼額, 三成可是非常敏感的...
這次表現如此差劣, 立時無哂心機, 行屍走肉一輪, 潛左入間車仔麵度食完野就返歸...

回家睇之前買果套吸血姬美歹, 發覺套野都幾好睇喎, 近似既作品有鬼太郎, 大家都係講d 神神怪怪野, 而且主角都唔係人類...比起樣衰既鬼太郎, 三成當然更加鐘意美麗既美歹喇...

套野d 內容其實都有d公式化(睇左3,4左右喇...), 都係有神魔出現, 人類遇害, 美歹消滅佢...
而且都係一野絕招就搞掂隻野(當然出招之前要例牌劈幾下喇).
雖然係咁, 但三成都覺得套野好好睇, 人物很有性格呢, 而且故事性也很不錯...
每隻神魔都是突顯了人類內心某些脆弱的部份, 加上很cool的美歹(如果係香港播, d 配音員一定破壞哂套野), 實在很有趣呢.
唯一不喜歡的, 便是片頭沒有主題曲, 而只有些純音樂了.

歐國杯終於開鑼, 買左兩條首次名過關, , 以小搏大, 中哂都有幾舊水...hahaha

>>June 13, 2004 at 5:47:43 PM GMT+8

2004 年 6 月 10 日 星期四 【晴】

今日約左中華同flora 去swim, 不過三成就晨早起身同王dull打陣cm先...
之後就做觀音兵, 送對鞋俾曹小姐, 搞到三成幾乎遲到...haha, 好在都只係遲左幾分鐘...
但由於china 早到左十幾分鐘既關係, 真係等死佢...要怪就怪曹小姐咁遲先落黎地鐵站喇...

第一次去彩虹斧山道e個池游水, 明顯係一個玩水池多, 根本唔係for 人游水既..
但d 遊玩設施真係幾正既^^

不過三成就好似做左中華佢地既超級電燈膽咁, 真係唔好意思...haha
如果可以多幾個人一齊游就好喇.

游完例牌肚餓, 食完tea就去左旺角行陣先點家, 終於買到本pretty face 既最後一期喇.wakakaka

去地鐵站途中見到架寫住往堅尼地城既104, 即時跳左上去, 諗住答下巴士喇.
但即時便後悔了, 車費好貴, 條街好塞, 架車好慢...
用左成個鐘先返到屋企, 地鐵先係三成既至愛.

終於出左gpa, 個gpa都算ok, 但d 科既grading 就令三成非常失望...
完全達唔到想像中既成績...冇哂mood.

收到電話叫我second in, haha...但民建聯果邊又麻鬼煩...
都唔知點好tim...
不過如果間trainee請, 三成幾大做trainee, 因為三成好鐘意佢個老細呢...haha
有一種父親的感覺...hehe

>>June 11, 2004 at 12:08:06 PM GMT+8

2004 年 6 月 8 日 星期二 【晴】

晨咁早就收到民建聯電話叫我明天second in, first in 都查哂三代, 又問哂d 基本資料,
second in 都好大機會請, 隨非佢又咁得閒搞個小組討論西人喇, 但睇間office 既面積, 明顯搞唔到咩group discussion.
睇黎都係直接俾三成睇下要做d咩同三成既反應黎決定請唔請.

三成好想做果份trainee, 好鐘意間公司(唔知點解...)但又要星期五先有消息, 而且只係second in既消息.

魚與熊掌, 皆吾之所慾也...十分矛盾...
用拖字訣又非義士所為, 唉唉唉.

民建聯要日曬雨淋, 點都係office 工好嫁喇...而且晉升機會又少, 經驗又冇咩用...
真是請亦難, 不請亦難, 怪只怪份trainee太吸引我喇...

之後上左陣網就出發返bu 打波, 本來想打羽毛波的, 但竟然因為考試而無場喎...
算, 壁球亦為吾之所愛, 可能仲好玩過羽毛波tim...
不過今日都係亂咁打, 亂打仲開心, 廢事理佢有冇出界...haha
一打就打左兩個鐘, 最後果半個鐘大家都冇哂力,而三成就好似俾人輪咁...搵人接下力都冇...haha
打到成個人散哂...

不過真係好好玩^^

>>June 11, 2004 at 11:46:16 AM GMT+8

2004 年 6 月 7 日 星期一 【晴】

wakakakaka
咁快又一個星期了, 如果係平日既暑假就好了, 無憂無慮呢...
而家就成日要忙找工了...

今日去in 份trainee, 係則魚涌既東港中心, 都唔知邊度黎...
查定地圖先去都幾乎找不到...因為三成e個路痴行左反方向呢...
好在覺得唔對路掉頭走...hahah
過左北角就幾乎唔多認得d路了...

先前以為東港中心係d 類似商場既物體, 但原來只是一橦不起眼的大廈...
in三成我間係一間貿易公司, 以為係勁野, 但入到間公司, 原來只是很細, 得兩,三條友, 但比三成既感覺好舒服...
以為interview, 仲準備定d 對答, 點知只係填表加做test, 不過個test 好過隱...
特別係畫flow char, 三成以前都用visio 畫過, 而家就用人手畫, 都唔知畫得0岩唔0岩...
一路畫一路笑...

個老細好好人, 態度好友善, 仲有禮貌過我, 好想做e 份工呀...
不過又要等second in 消息...

夜晚約左王dull, 肥丸, gali等人去食京菜...但仲有時間, 就去旺角行陣先..
pretty face 第6期明明出左, 但又周圍都找唔到...真係令人失望.
去買卡通, d 鋪頭又關哂播, 搞錯...但當三成想走之際, d 鋪頭又神奇地開返先, 令三成既願望得以實現.
好多卡通想睇呀...又想買北斗之拳, 又想買果套咩咩玫瑰學園, 係少有既百合卡通, 但又驚係d 少女到爆既作品...唔敢買住...
仲有大量h game 改編既純愛系卡通...
最後三成都係買左套吸血姬美歹.

去到集合地都係得3條友...ha..不過今次遲到問題唔嚴重, 5分鐘內d 人就黎哂.

間野好隱蔽呀, 唔係睇副刊我都唔知有間咁既老字號, 更楻論係介紹俾大家了.
d 山東燒雞同北京填鴨都頗有風味, 食得幾開心...
一個飯都冇叫, 已經飽哂...
係埋單貴左d 0者..位位130...
但間野真係頗有特色...

回到家又再大戰老屁, 為其所敗.
係中間雖然好, 但邊線班友次次都守唔住, 都係要由三成親自守邊先頂得住佢地d 快攻...

>>June 9, 2004 at 3:50:44 AM GMT+8

2004 年 6 月 5 日 星期六 【晴】

今天去西貢黃石野餐, haha, 好耐都未去過郊外玩了...
昨日打左成晚機, 一樣咁精神, 起身執左d 野就出發.

會合眾蟻民就去買野...買左一大堆冇咩可能食得哂既食物...
麵包e d 咁頂肚既都買左兩大條...真係睇到都飽...

去到之後都冇咩人, 早知bbq喇, 天又陰喎, 不過野餐都好既.
但係好多蟻呀...

大家食飽之後就唔知做咩, 都係吹哂水, 仲玩左一次刺激既潛烏龜...
不過見到女神屍人獨潮碎...有d 悶咁...仲有全日都好無禮貌既肥雞仔...

阿榮狂掃薯片, 仲有連d細路食完都吐返出黎既極品綿花糖...
野餐途中三成仲俾人屈係觀音兵, 幫下人都俾人話...人善被人欺, 三成真係慘.

其實久唔久咁聚一聚都幾好, 那怕是做d 無聊野, 但同d 朋友仔及部下見面已經係一件開心既事喇....有左今次既經驗, 如果再有類似既活動, 相信會準備得好d^^

回程去左滿記食甜品, 只是ok, 價錢就貴左d, 而且份量很少...

之後大雨暴下...眾人落荒而逃...

回到家就係咁肚痛...

>>June 7, 2004 at 11:27:05 AM GMT+8

2004 年 6 月 4 日 星期五 【晴】

今日神咁早就要去in 民建聯, interview 之前多數都會訓得唔多好.
但今次就一覺訓天光, 真舒服.
之後上網找左陣資料就出發去佐敦.

間野好up du 0者, 真係唔講都唔知有間辦事處係度, 仲要係橦大廈入面.
interview次次都早d 去, 但今次去到就等到發毛, 隔離已經有個唔知等左幾耐既阿姐座係度.
填完資料之後就等到成11點先到我in, 等既中途又有另一位阿姐黎到, 睇佢填野(太得閒...)就知佢都係in e 份工, 三成填9000人工, 佢就填6500, 阿姐, 唔好做爛市喎.

入到去就見葉國忠同楊子熙座係度, 葉生用把好難聽既聲問左一大堆野, 我覺得答得都算ok.
唔係佢問咩, 三成就答咩, 三成都好主動咁拉開話題同報上自己既工作經驗...
例如佢問你第日可能要xxxx嫁播, 有冇問題呢. 答: 問題應該不大, 因為我以前係小00都有小xx既經驗..xxxxxx.

不過三成覺得自己講野始終都係太快, 如果可以講到不徐不疾, 唔單止大方d, 仲可以有多d時間組織...咁就very good la.
三成俾自己既表現60分...

回家就午睡...zzzz

>>June 7, 2004 at 10:58:13 AM GMT+8

2004 年 6 月 3 日 星期四 【晴】

今日係紀念六四既大日子, 三成決定在家打機
套x 終於睇到尾聲, 正如科拿所言, 套野太做作, 成日想營造d 感人場面出黎, d人扮哂野...
唉...clamp 既功力只至於此? 雖然有哂觀眾鐘意既元素, 但未必就一定好好睇...

不過套野都ok既, d人物描寫得都ok, 如果再用多d 平凡既事件去襯托果d感人既場面仲好.
而且班奸友又太勁, 明顯屈機, 亦令套野既趣味打左折扣.

下午又突然收到new york life 既電話叫三成去interview, 但明明冇apply過保險嫁...
都唔知咩工黎既, 由於聽唔清楚, 以為可以由公司名查返咩post, 原來係唔可行既...

之後去左打決戰, 打得正開心時, 又收到民建聯call, 叫三成去interview...
見步行步....都冇咩點準備, 一日通知, 時間太少了.
三成真是懶了許多呢...(汗)

>>June 4, 2004 at 7:30:02 PM GMT+8

2004 年 6 月 2 日 星期三 【晴】

今日返bu 同王dull等人打波, 估唔到羽毛球咁旺場, 俾人book 到full哂, 許士分又唔開,
只能打一個鐘, 王dull打唔夠幾分鐘就叛變去左打藍球, 得三成同阿剛, 中華科拿 玩雙打.
好耐未打過羽毛球了, 對上一次打已經係中四,中五既事, 渣左好多. (雖然以前都好渣...汗)

其實羽毛波都係睇準個波既來勢再打就得, 而且個波又唔多快, 可惜三成一樣成日睇唔準, 打空氣...haha...

之後打完一個鐘, 就去打big球, 王dull提供個波勁快, 勁彈, 超級難打, 好似俾撇亞人練工用果d 波咁, 超快, 打3下就斷(亦可能我太屎...haha)

之後王dull同阿剛兩個互抽, 令人嘆為觀止.

打完波就去拉記print哂d 履歷同resume, 順手去島仔印埋d 學歷同考試成績, 之後買埋信封就寄信找工, 希望有回音喇.

回家與皇子共戰老屁, 大敗於綠州, 慘哉.

>>June 4, 2004 at 7:04:25 PM GMT+8

2004 年 5 月 31 日 星期一 【晴】

今日要去interview...
但昨日一樣打機打到4點幾至訓...真係好驚一日咁快完...
一醒就要去interview...hha...三成自己都知自己未有interview既狀態...當試下, 熱下身都好.

成晚發夢都夢見自己interview, 醒下訓下, 總之發黎發去都係interview既夢.
例如夢見突然收到電話話改期喇(證明三成本身唔多想in), 又突然唔見左套老西, 全屋周圍摷, 又發夢同大佬打cm打到過哂鐘, 唔記得左interview.
總之咩夢都係同interview有關.

睇黎三成既閱歷真係太少.所以先會發e d咁既夢, 睇黎一定係有d緊張先會咁.

12點起身, 睇左兩集X 就上網找間公司既資料, 做下功課.
真係好似係度溫書咁, 學到好多野.

之後阿東打黎, 同三成傾左一陣, 佢教左三成好多interview 既技巧, 使三成獲益非淺.
雖然佢係無義之人, 但三成都好感謝佢既幫忙....haha

大熱天時, 著套老西真係好鬼熱, 好在今天天氣陰陰地, 先唔會大出汗.
in三成間野都幾近三成屋企, 行一陣就到, hha,就係貪佢e 樣好.

入到去接待既counter 竟然無人, 其他人又各自做野, 唔理三成, 三成唯有座埋一邊等下先.
最後都係多得個清潔阿嬸幫三成通傳先掂(聽到好似係佢幫手通傳...)

in三成果個阿姐個樣麻麻, 但態度就幾nice, 三成都自我介紹左一輪同講左一輪對間公司既理解之後就到個阿姐present...講左一大輪份工做d咩同要點點點, 又加好多比喻, 可能三成又成日問題多多, 搞到個阿姐愈講愈起勁...

其實e個trainne post 都幾好, 又提供免費課程, 又有免費clamp學野, 真係有得食, 有得玩.
但份工既內容就唔多0岩三成, 而且又要溫書去考過financial planner 牌先可以開工.
實在比較麻煩, 而且學左一大輪先發覺唔鐘意就太遲, 於是三成都拒絕左, 唔做.
不過三成相信e份工應該幾有前途同幾好賺, 但靠分佣, 自己找client, 真係要有好強既interpersonal skill 先掂.

三成自問唔多想做e 類唔多穩定既工...會唔會就咁錯過一個飛黃騰達既機會呢..
haha

in 完本來想去買d 野俾阿婆, 但找唔到, 不過都買左一大堆零食以供享用.
回到家已經成身汗...好熱.

返到家, 突然上唔到網, 打去嘈一輪之後約左師傅明天來整, 夜晚佢又冇喇喇好返.
真係吹漲.

到底咩工先適合自己呢, 仲未知tim.

>>June 1, 2004 at 6:30:57 PM GMT+8

2004 年 5 月 30 日 星期日 【晴】

套X 不知不覺咁都睇左十幾集, 如果唔係d角色成日扮哂型, 真係幾好睇.
到到故事中段, 女主角又冇離頭咁俾人吉死左...真係睇到頭都大埋.
又真係死得幾無離頭, 好似有d 刻意營造悲劇場面咁...扣分.

不過套野對每一個角色既背景, 性格既描寫都非常仔細, 值得一贊, clamp 既作品始終唔會太差既.

下午改下自己份cover letter 同 resume 之後又開始找工...
部printer 唔知點解set 唔返, 搞到唔可以寄求職信住...突登回校print幾張野...真麻煩...
都係等打波果日先順手回去好了.

昨日被東爺訓斥三成找工太唔積極, 三成自己都覺...受教了.
希望找到份好工喇.

估唔到腥完份resume 一個鐘唔夠, 就收到電話約interview...
但我都唔知係邊份in我...唯有又一份一份慢慢對來找...haha...
interview 呀, 緊張緊張...

>>May 31, 2004 at 11:02:25 AM GMT+8