2003 年 9 月 3 日 星期三 【微雨】

今日第一日上足全日堂，不過科科都係齋講syl，未正式教書。中史OK啦，Lim sir應該都幾好。之後上英文，係伍家恩教！兩堂佢都勁講廢話，完全唔明佢講乜，全班嗌哂救命，死得咁滯！
Lunch之後上History，正呀，係Miss Leung教！始終都係佢最好，氣氛最好係呢堂！
放學同子建去英皇拎章程，又係得中英文，冇其他科！

Re Cafu:我唔係講o個方面喎，真係唔多識人嘛！BS未知，不過英文就的確好唔得！今日o既狀態已經稍有提升…
Re魚：周公叫我我都冇法喎，「季初病」我都唔想有o架。
Re蚊：冇喇！

>>September 4, 2003 at 1:36:05 PM GMT+8

2003 年 9 月 2 日 星期二 【微雨】

杜鵑走o左，今日要照返學。今日到Plum House開AGM，簡直…唔想提！大樹總有枯枝，不過最慘呢鋪係枯幹！冇o架喇～
晏晝終於正式上堂，不過有好多人行開o左。先o黎BS，李sir未正式教書，只係講解下個syl。我o既「季初病」又發作，聽聽下始終都要去見一見周公！之後上中化，呢科都咪話唔惡啃！
依家先返o左三日學，已經開始覺得悶，有排捱…

今日係第二次世界大戰爆發64週年，願世界和平。

>>September 3, 2003 at 1:46:24 PM GMT+8

2003 年 9 月 1 日 星期一 【寒冷】

杜鵑旋風式襲港，o尋晚先掛一號風球，今朝已經殺到o黎，教統局嗌晏晝停課，仲未使正式上堂住，避開連續三堂中史！
全校一齊放學，同子建、魚、Mina & 小B、死魚同蝦去濠江食飯，之後聰、Fan、Lo同六叔都join，由1145食到1300，各有各散。大人細路齊齊放工放學，搞到架地鐵超迫，抖唔到氣！

>>September 2, 2003 at 10:18:47 AM GMT+8

2003 年 8 月 31 日 星期日 【清涼】

今日終於要開學喇～
同樣o既校服、同樣o既路，只係已經有半級人走o左，感覺到有點兒孤單…
6A班房同以前一樣都係hall隔離，不過學校好多地方都仲有工程，籃球場、新翼、hall都未用得，連小食部都易埋手！知道o左邊個係班主任喇，係以前都教過我o既馮淑儀，而其他教我o既係…
中文化：馮淑儀
英文：伍家恩
History：梁路得(Yeah~~~~~~~~~)
B.S.：李文哲
中史：林均耀
睇番頭幾日o既安排，嘩，第二日就要正式上堂教書！依家我係完全冇狀態囉！本來以為第一日返學，一定會中途見周公，但係我竟然捱得住！班會投票選內閣，未爆分o既自然搶手，不過都仲有人可以保持「清白之身」，而我又胡裡胡塗咁俾主席李綺蘭推o左去做總務！
之後有o係課室睇電視o既School Assembly，1215就放學。Meet番其他學校o既人，本來去稻草人等位，不過太多人，最後竟然係去Pizza Hut食，貴到我同阿聰都出哂聲！
食完就同阿聰上子建屋企，搞秘密工程，又傾下計咁，等1900第一次Regular Meeting。見到人，被勁啤，我都知衰喇！今次去「客家好棧」食客家菜，價錢「嚇瓜」人，$45！差唔多食完o個陣，唔知邊個突然提出玩o野，o係一兜未食o既飯加鹽加醋，然後轉俄羅斯輪盤咁抽人食！o的人一路食、一路加、一路轉，越o黎越有分量，我都要食添！其實唔係太難食o者，冇乜味o既！坐到差唔多2100就散，要準備聽日正式上堂，晏晝連續三堂中史喇！

>>September 1, 2003 at 4:04:47 PM GMT+8

2003 年 8 月 30 日 星期六 【酷熱】

話咁快，三個月o既特長暑假過埋今日就完喇。呢個暑假應該係我最難忘o既一個暑假，發生o左太多事喇！有開心亦有唔開心，不過都已經寫入我o既生命裡面！
最後一日，朝早同阿聰、R7同周展程去城門谷游水。R7同周展程都遲到，我同阿聰要o係門口等佢o地。等等下，有個身影o係我o地面前掠過，o個個著比利時T恤o既咪係有線o既Keyman？
我呢個暑假第一次游水，要慢慢操番起o的狀態，今日o既我要游50米蛙式已經再冇難度，不過我係唔會參加100蛙o既！我o地都係吹水居多，去玩滑水梯，有個o靚仔懶醒咁助跑跳落去，結果撞到爆缸！游到1200就清場，我冇跟佢o地去打機，番o左屋企先。
晏晝俾媽咪捉o左去上環文武廟還神，同上次一樣，o的煙又搞到我標哂眼水！之後落o左維園，因為聽講o個度有live band show，結果真係有，少爺占帶o左幾隊band出show，咁當然唔少得佢自己o個隊野仔啦！o的音樂好勁，全場起哂哄，不過我媽咪就唔多識欣賞！

2003年Eric好歌流行榜(第34週)：

1)飛女正傳(楊千嬅)
2)忘記歌詞(陳奕迅)
3)她比我醜(陳慧琳)
4)17歲(劉德華)
5)啼笑姻緣(陳小春)
6)任天堂流淚(古巨基)
7)妳聽得到(周杰倫)new
8)窮爸爸(許志安)
9)錯愛的呼喚(郭富城)new
10)你想我點(蕭正楠)

Re聰：我諗拜仁都幾難出唔到線喇；多蒙得就真係意外o的，不過咁都好，足協盃多隊我o地識o既球隊！
Re小B：冇咩？我o係出面，又點會知你o地搞乜呢？有聲o個陣咪光明正大囉，你o地都有一段長時間dead air喎！
Re Cafu:痕有痕o既幻想，痛有痛o既幻想，你想要邊種幻想先？度門閂得埋，又鎖得，唔算壞o掛？不過好彩冇追究！

>>August 31, 2003 at 1:25:02 PM GMT+8

2003 年 8 月 28 日 星期四 【酷熱】

o尋晚歐洲足協為歐洲聯賽冠軍盃o既分組賽進行o左抽籤儀式，32隊分成8組，打雙循環賽，每組頭兩名可以出線十六強淘汰賽，代替上幾屆o既第二輪分組賽。結果…

A組：
拜仁慕尼黑(德國)
里昂(法國)
些路迪(蘇格蘭)
安德列治(比利時)
簡評：拜仁o係呢組實力超班，理論上應該唔會重蹈上季覆轍，可以首名出線。次名會係里昂同些路迪之爭。

B組：
阿仙奴(英格蘭)
國際米蘭(意大利)
基輔戴拿模(烏克蘭)
莫斯科火車頭(俄羅斯)
簡評：兵工廠同國米應該可以攜手出線，阿仙奴面對歐洲班霸都會力不從心，而且後備力量不足，國米首名可以睇高半線。

C組：
拉科魯尼亞(西班牙)
PSV恩浩雲(荷蘭)
AEK雅典(希臘)
摩納哥(法國)
簡評：拉科o既實力因為馬卡爾離隊而削弱，PSV有能力挑戰小組首名，摩納哥同AEK都未成氣候。

D組：
祖雲達斯(意大利)
加拉塔沙雷(土耳其)
奧林比亞高斯(希臘)
皇家蘇斯達(西班牙)
簡評：闊別歐洲賽多年o既皇蘇係上屆亞軍祖記爭首名o既最強對手，高華斯域同尼赫治o既組合足以威脅祖記老化o既後防。

E組：
曼聯(英格蘭)
彭拿典奈高斯(希臘)
格拉斯哥流浪(蘇格蘭)
史特加(德國)
簡評：以曼聯o既實力，出線可以話係毫無難度，要睇都係睇邊隊會同佢一齊出線。其餘三隊實力都幾接近，可能要到最後一輪先有答案。

F組：
皇家馬德里(西班牙)
波圖(葡萄牙)
馬賽(法國)
柏迪遜(塞爾維亞及黑山)
簡評：雖然碧咸加盟令球隊失平衡，但係皇馬始終擁有地上最強o既攻力，絕對唔係波圖所能應付，塞黑冠軍柏迪遜只係陪跑。

G組：
拉素(意大利)
車路士(英格蘭)
布拉格斯巴達(捷克)
比錫達斯(土耳其)
簡評：呢組斷開兩截，車路士同拉素明顯高兩班，大灑金錢o既車路士實力可能比財困o既拉素更強，首名之爭非常激烈。

H組：
AC米蘭(意大利)
切爾達(西班牙)
阿積士(荷蘭)
布魯日(比利時)
簡評：切爾達阿積士唔係善男信女，衛冕o既AC要出線考驗重重。

Re Fan:兩度房門我o地未o黎就已經爛o左，好難閂埋，唔關我o地事。o個邊冇打過o黎，應該係良心發現o掛。

>>August 29, 2003 at 9:50:58 AM GMT+8

2003 年 8 月 27 日 星期三 【清涼】

繼續講個梅窩camp…
我o地番哂入屋，發覺兩間房已經被每間兩個人occupied，一間「紅白配」完全死寂，一粒聲都冇；另一間「黃白配」就high到拆天，我o地o係房門口成日聽到o的嘻嘻哈哈聲，一時又「喂！唔好呀！」、一時又「好痕呀！唔好搞呀！」，不期然令一o的心有邪念o既人產生十萬八千里遠o既聯想！
肚餓，開薯片、煲滾水煮杯麵，整整下，0130都冇乜人提議到玩乜好，結果Lo同Fan最先捱唔住，不敵睡魔。冇幾耐又輪到我同子建舉手投降，得番六叔、Kambo、Su同死魚繼續吹水(死魚仲要淋水)。到o左0300，o個「四人幫」決定出去行下。接近0400，佢o地番o黎，而全廳人，仲有蝦都起哂身，所以我o地決定齊齊出去踩單車。我以前未係夜晚踩過單車，我feel到自己有少少似o的「夜不歸」o既暴風少年，成條大馬路完全俾哂我o地亂咁踩，呢o的o野日抖一定做唔到！到差唔多天光，齊齊過沙灘睇日出，不過又好似上次咁，只係睇到天空越o黎越光，就係睇唔到太陽！
一天光，Fan就要趕番出市區上First Aid，而蝦同朱基又要1000早走join另一個camp，朝早除o左食早餐就冇出去，o係屋執o野，又玩UNO，做o左大輸家。被玩唔緊要，搞到其他人尷尷尬尬就唔好啦！
1145退房，還單車俾人。頂！還車o個陣，一架架車輪住排好咁還，Mina只係唔小心擺埋一邊，之後架車就唔見o左，佢o地就話我o地還少o左一架。哥仔，我o地個個都係踩單車o黎還，點會有少？數清楚o的啦，唔好屈我o地呀！之後渡假屋又call番我o地，話度門爛o左。大佬，度門我o地未o黎就爛o架喇，好彩佢o地冇追究，如果唔係我同小B就真係怒氣沖天！
我o地成身散哂，又再搭$21一程o既快速船出中環，之後仲要過牛頭角拎o野，成1530先番到屋企。

>>August 28, 2003 at 12:19:51 PM GMT+8

2003 年 8 月 26 日 星期二 【清涼】

去camp，應該玩得開開心心至o岩，不過呢次有o的同，我都知自己算係開心定唔開心！
唔好以為我乜都唔知，就可以為所欲為，自己係點o既人自己心照！
有o的人唔值得我為佢蹝咁多墨水，都係講番個camp好o的。今次我o地一行12人，有我、子建、Mina、Lo、Fan、蝦、Su、Kambo、六叔、小B、死魚同朱基入梅窩，陣容之龐大前所未見。
朱基、蝦、Lo同Fan會遲o的先到，所以其餘o個8個人約好o左o係1200香港機鐵站裡面等，我好準時，有機會見到一個人去camp可以幾輕便！點知其中一o的就誤打誤撞一早去o左碼頭，結果meet番佢o地，發覺8個人當中加埋只係得7款衫o個陣，班普通船已經走o左，所以要搭貴成倍o既高速船！
去到梅窩都未到1400，小B帶路去搵一早book好o既渡假屋，擾攘一動之後先搵到。一入門口，嘩，好過上次長洲o既東來苑多多聲喎！起碼o的o野整齊得多，$500絕對值！Settle down之後又出番碼頭接蝦佢o地入o黎，然後Kambo…竟然拎o的差唔多完全冇做過咁滯o既暑期作業俾我o地代佢做，從冇諗過入camp係要做暑假作業，係幫人做o個隻！
渡假屋距離碼頭同沙灘太遠，所以我o地決定$30租單車租到第二日交車，方便哂！
接埋最遲入o黎o既Fan之後就出沙灘行下，銀礦灣都真係幾正，水清沙幼，風景又靚！全人類一齊出o黎食din，幫襯o左一檔$288十菜一湯套餐，以為好抵食，點知原來碟碟都係細細碟，到喉唔到肺！
食完飯，大圍人落哂沙灘玩兼睇火星，我o地有幾個入屋擺低o的o野先。再到沙灘，見到好一對痴男怨女，鴛鴦戲水，仲要係去到水深淨係突出個頭o既地方，又攬又錫，完全當其他人o既目光(包括我)冇到，佩服！
不過，全部人到齊哂之後，一o的話要番去沖涼，一o的又話要留o係度，結果當初唔知邊個提議o既game完全玩唔到，淨係一個二個攤哂o係度睇星星(當然某o的人完全唔係睇星星)。o個段時間，完全挑戰我所能忍受o既極限，好想一搥窩落條友度！
中途一o的人走o左，一o的人又join番我o地，最後到o左差唔多0000，我o地就執哂o野，番屋先，打算夜o的再出o黎。過o左0000，係另一日…

>>June 26, 2005 at 11:16:15 AM GMT+8

2003 年 8 月 25 日 星期一 【晴】

最近日本o既右翼團體再次o係登陸釣魚台列島，修葺島上o既燈塔同神社，公然侵犯中華民國主權。話哂中華民國都係中國，雖然我係under另一個中國，但係我極力反對日本入侵中國領土！好明顯釣魚台列島係屬於中華民國，不過日本一直以o黎恃住有美國撐腰，明目張膽咁霸住釣魚台列島；而中華民國o既陳水扁李登輝就有求於日本，唔敢出聲；中共又問日本借錢，又唔敢出聲。結果日本就當正自己係釣魚台列島o既主人！
請日本面對歷史責任，好似德國咁對o係第二次世界大戰中對外侵略道歉；亦要面對現實，將釣魚台列島o既主權歸還俾中華民國！

>>August 26, 2003 at 11:27:21 AM GMT+8

2003 年 8 月 22 日 星期五 【晴】

病患中…
希望早日康復！

2003年Eric好歌流行榜(第33週)：

1)17歲(劉德華)
2)飛女正傳(楊千嬅)
3)轉(傅珮嘉)
4)忘記歌詞(陳奕迅)
5)窮爸爸(許志安)
6)啼笑姻緣(陳小春)
7)任天堂流淚(古巨基)new
8)私房菜(鄧健泓)
9)你想我點(蕭正楠)new
10)她比我醜(陳慧琳)new

>>August 24, 2003 at 2:42:06 AM GMT+8