2004 年 1 月 6 日 星期二 【晴】

可以keep住平時咁o既情緒返學，事實上過o左一晚我已經冇乜種感覺。亦唔覺得daddy好傷心，比想像之中平靜得多，希望真係冇事啦，我可以幫你o架！
兩堂History用o左一堂睇人o地o既《真係笑話 - 醫院篇》，李力持都笑我唔死，比卡超會笑得死我？
Triple Buss瘋狂自修，HRM進度緩慢………
放學輪到21-30考中化oral，lunch拎past paper出o黎tip題目，、「放棄邊種家具？電話，因為仲有『我看見你』！」(我)、「安慰失戀o既朋友：美好的　沉澱了　沒有火花不要燒」(Candy)，笑o既成份多囉！
兩堂中史想全副精力睇張騫班超，之後又去o左中化，「假如沒有了電腦…………………我會發明電腦！」(肥峰)！自修到完全唔似樣！
中化派番新聞稿，好似唔算低分喎，冇錯格式o者。
放學要考oral喇，幫手搬檯搬凳，蝦問我借locker鎖匙，之後佢應該係信得過我，兩張檯位掟番條匙俾我，點知……應該係我o既問題，有個頭o係傳「匙」路線中間穿過，我下意識縮手，但係把口又嗌唔切喎，結果……o彭，中頭獎，邊個中？死火，係Miss Fung！！
考試喇，全人類o係課室出面等死，一個一個咁入，一個一個咁出，我尾二o個個入，題目……我practice過o架，不過上次勁唔得！「試以『老婦』、『黃昏』、『情侶』組成故事」，之前太集中o係老婦身上，今次就講得太多故事背後o既意義，佔o左三分一。不過Miss Fung竟然俾到我9分(15分滿分)，我以為我得7分左右喳，不過佢話我仲有好多地方要改，嗯，老毛病！
有o的o野一定要返屋企換番便服先可以做，不過都係做唔到，俾保安截停查身分證！求神拜佛唔好俾我開口中，如果唔係我唔肯過隻食蕉！又去飛髮，點解條頸會咁o架？好彩恤衫遮哂！
本來我對董伯伯o既第七份屍正報告完全冇期望，所以亦唔會失望，不過睇過佢份報告，我都係要講o個句：「董建華，你太令人失望喇！」到呢個時候你仲要推卸責任，仲有拖延時間？唔好話乜o野「中央未有主意」、「要循序漸進」o黎藉詞推搪，我o地清楚知道特區政府係有權先就政制檢討作公開咨詢，到立法階段先需要報請人大，依家你呢o的咁o既敷衍即係當10萬元旦上街o既市民冇到，即係再一次與民為敵。我唔知你仲想拖幾耐，抑或你根本從來冇打算為香港人爭取應得o既民主！

Re Pang:你有心，依家我冇事，明日有明天！
Re Kaka:要你提起你o的家事添，我冇事喇，多謝關心。

>>January 7, 2004 at 3:16:30 PM GMT+8

2004 年 1 月 5 日 星期一 【晴】

今日一直都過得好開心，好開心，點知發生o的咁o既事，我冇可能唔係呢個表情…
兩星期前先半講笑咁話：「少擔心啦！」生命真係好脆弱。雖然好少相處，又好少傾計，但係話哂佢都係我o既………突然話走o左冇可能唔傷心……雖則未到喊位…………
點都好，Mina生日，祝佢生日快樂！
Morning Assembly吳sir長篇大論，聽得出佢有o的暗示，曾憲梓思維。
好難得兩堂中史可以睇哂成個佛教而冇同肥峰Billy吹水，不過當然又係唔記得哂啦。
中化講演講辭，排次序o個仲有o的唔明，應該曾鈺成排先定馬力排先？
Lunch成班人同Mina食飯慶祝，新開o既高比o的o野都OK，有人被屈(自願)！
History繼續自修 + interview，同Billy勁講時事同中國文化，share各自o既觀點，「和而不同」！
Buss做肥龜剪報reply + 同肥峰吹水，又同前面o個兩個勁笑，肥峰好多對白唔出得街喎！
放學同陳江迫不得已搵5 + 1，俾佢mark我talkback記錄，原來林敏唔知自己上到一次！
o係屋企認真咁做o野，做到19:45，娘親返到屋企，我o個陣先知發生咩事……………

Re前文科聯隊兩大後防重心：我都想快o的考完試，盡量就下時間囉，不過有o的o野仲未知時間，依家好難講。

>>January 6, 2004 at 3:05:13 PM GMT+8

2004 年 1 月 4 日 星期日 【晴】

要返學喇，好明顯又係長假後遺症，唔知醒！
距離考試越o黎越近，科科都教哂書，係咁俾我o地自修，當然我o地又做其他o野，最精彩又梗係中史Buss同肥峰吹水啦！李sir都覺得我呢個學期唔知搞乜鬼呀，我又真係太令人失望o既，唉，我好似連上進o既心機都冇，冇哂自我喇！
臨考試前測多次中化，我冇特登咪書，因為就算你背哂成篇課文都冇用，答問題根本就係老吹。真係一世夠運，今朝同Billy講開唔使點讀書呢個問題，提到做過2001年past paper關飲食文化o既題目，點知今日測驗就係撞o岩出呢題！不過好似都係唔知寫o左乜咁，亂o黎。

Re Pang:話明relax就梗係轉數開始慢落o黎先relax啦，我未有呢o的情況就走出房開電視，太差勁喇。

P.S.唔會唔記得o既，Cafu今日18歲生日嘛，生日快樂！

>>January 5, 2004 at 2:14:03 PM GMT+8

2004 年 1 月 3 日 星期六 【晴】

唉，兩星期Christmas Holiday咁就完o左喇，明知放完假就要考試，亦明知自己仲係迷失方向，我竟然完全唔知自己做緊乜！功課未做哂，書又好似冇乜點溫過，成個假都係渾渾噩噩咁過，點解我會咁o架？？？
又o黎喇，晏晝走去睇廣東對香港(唔係港聯)o既省港盃第二回合，港隊唔輸就可以捧盃。港隊以一貫o既5-3-2穩守突擊陣式應戰，結果o係身型輸蝕之下成功0比0守和廣東，第九次捧盃。接近全華班o既港隊以李偉文為首o既五人防線都算穩健，不過想更上一層樓，要o係進攻方面下苦功，冇o左「二傳王」歐偉倫，黃鎮宇、羅振邦、陳豪文要生性喇。好多人對香港足球有期望o架！
你話係咪o丫？溫溫下書都可以走去睇波，真係唔知自己想點。

>>January 4, 2004 at 2:01:25 PM GMT+8

2004 年 1 月 2 日 星期五 【晴】

之前有件曾鈺成，依家頂上o既係馬力。馬力一上場就話「我o地唔係保皇黨」，又話對政府會「是其是，非其非」，懶係豪情壯語咁。o車，前日元旦10萬人遊行之後，佢o係傳媒面對露出真面目：「話就話10萬人上街，不過見到佢o地好多都係不滿政府處理民生問題不力多過要求開放普選，所以幾日後董生o既施政報告應該集中改善民生，其次先係交代政改o既內容。」根據中大港大o係元旦遊行o既現場訪問，88.3%受訪者支持2007年普選特首，88.9%支持2008年直選所有立法會議席﹐虧馬力講得出「大部分示威者都只係要求改善民生」，咁同曾鈺成半年前話「上街市民其實係俾人誤導」有乜分別？路遙知「馬力」，其實都唔使好耐，佢已經原形畢露，「銀紙騙港聯盟」根本冇任何本質上o既改變，佢只係繼續愚弄我o地、欺騙我o地。冇所謂o既，繼續做佢o地認為冇問題o既事囉，香港人唔會介意，8個月後你就知味道！

2004年Eric好歌流行榜(第1週)：
1)伶仃(陳慧琳)
2)今年沒聖誕(許志安)
3)小星星(楊千嬅)
4)孤單公園(張敬軒)
5)再上車(梁詠琪)new
6)八二十八八十八(鄭中基)new
7)東涌日和(Shine)re
8)信望愛(梁漢文)
9)上癮(蔡一傑)new
10)冬暖夏涼(李克勤)new

Re Cafu:厲害，估唔到真係有人會post出o黎，都話有粒塵咁大啦。
Re Pang:咩料o者？《太陽報》頭條有幾難搵？

>>January 3, 2004 at 4:28:44 PM GMT+8

2004 年 1 月 1 日 星期四 【晴】

今朝打開《蘋果日報》，當然係大篇幅講o尋日元旦遊行啦，呢度揭o個度揭，好彩有張相鏡頭o岩o岩影唔到我，不過原來我上o左《太陽報》o既頭版，大家睇下中間有塊香港中學生聯盟o既綠色banner，舉起塊banner最左邊o個個係我o黎o架，雖然細過蚊滋！
繼續一系列o既2003回顧，今日講球壇大事。2003年o既世界球壇有悲有喜，喜o既係世界各地都有大批好有質素o既超新星湧現，而且唔再局限o係傳統足球強國，各國o既水平越拉越近，好事。悲o既係太多球員突然離開我o地，亦太多負面新聞喇，希望所以球員都做到潔身自愛，做真正o既足球員。經過對利物浦同皇馬兩場大戰之後，香港足球o既整體水平明顯提高o左，希望港隊o係2004再創佳績！

2003世界球壇十大新聞：
1)科爾o係洲際國家盃比賽期間暴斃
2)碧咸以2500鎊「低價」由曼聯轉投皇馬
3)多名英超球員牽涉強姦事件
4)俄羅斯富豪阿巴莫域治入主車路士後大燒銀紙瘋狂擴軍
5)李奧費迪南缺席藥檢被英格蘭足總重判停賽8個月
6)美國14歲天才新星艾杜成各大球會搶手貨
7)拉脫維亞異軍突起殺入歐洲國家盃
8)卡塔爾成為過氣球星安老院
9)香港球星張耀麟車禍身亡
10)曼聯阿仙奴奧脫福大毆鬥

2003球壇十大風雲人物：
1)阿巴莫域治
2)尼維特
3)亨利
4)華丹奴
5)英格蘭足總
6)喀麥隆國家隊
7)保方
8)白禮達
9)李奧費迪南
10)碧咸

Re Candy:真情流露，每個獎都得來不易，好難有爭議，而且有很多有實力o既歌手(林一峰、At 17)o係呢度先有機會獲獎，o個o的睇下獎項就知有邊個出席o既頒獎禮點會比得上？

P.S.我睇極都睇唔明究竟今日《信報》社評想寫乜………

>>January 2, 2004 at 3:45:42 PM GMT+8

2003 年 12 月 31 日 星期三 【晴】

二零零四，合皮扭耳！
元旦唔慶祝為o的乜？參加元旦大遊行！10萬人繼七一之後，再向政府高呼「還政於民」o既口號，CEPA、自由行、失業率下跌、股市回升，市民荷包脹番，不過對民主o既訴求並冇減退，香港人要經濟亦要民主，我勸港府同中央唔好再漠視民間o既聲音，儘快進行政制改革喇。
我1410左右一支公到中央圖書館，香港中學生聯盟o既集合地點，佢o地準備o左橙色短袖T恤俾我o地換，好喎，團隊精神嘛。不過今次參加o既中學生比七一少o左好多，上次號召到3000人，今次得20人左右(其實沿途其他遊行隊伍見到同我o地差唔多大o既青年人)，剩番兩箱衫就咁擺o係圖書館出面冇帶住行。有個中學教師o係我o地o個group，搵我訪問，我o既main point係「既然七一之後政府好似仲係聽唔到我o地o既聲音，我o地咪再講多次囉」，我唔記得問佢邊間呀！隔離有班公屋居民玩「卜卜齋」唱歌仔鬧政府鬧房署，勁好唱口，全班拍爛手掌。TVB部camara周圍影，係咁避鏡頭，不過塊大banner就避唔到鏡頭，塊七一用到依家o既banner竟然將香港中學生聯盟(Hong Kong Secondary Students Union)寫成Hong Kong "Secodary" Students Union，改唔到，索性成個英文名撕哂！
出發喇，要先入番維園草地join大隊，我負責拉最大o個塊設計有問題o既banner。行到皇仁對開燈位，同劉慧卿o既前線撞正，邦、跟我o地尾o既綠色和平同佢協調一輪之後，中間開條路俾佢o地反方向行，其他人就繼續入維園，去到草地，嘩，一區區分開哂，秩序井然。o係草地等到我o地行，點打發時間呢？跟大會唱歌，o的歌係七一人民批作o架(有個入o左人民批o既話我知)，又成班人講笑，雖然識o左佢o地唔夠一個鐘，但係幾玩得埋，都係唔熟唔緊要，玩玩下就熟咯！Anna上o左明報，俾我o地狂玩，中學生聯盟形象顧問！
離開維園喇，穿過糖街直入怡和街，Anna同邦輪流帶頭嗌口號，一時朱耀明牧師又幫手嗌，Anna走音呀！好感動，沿途好多人特別為我o地打氣，「中學生萬歲」、「我o地為中學生喝采」，多謝各界o既支持，我o地年青人絕對唔係淨係識打機唱K讀書o架，我o地對社會絕對有承擔！行經大公報門口，乾乾淨淨，證明我o地係理性o既香港人，有句說話好精警：「大公報？好睇，我日日都當笑話咁睇！」
沿途好多人嗌「董建華」，其他一定係一怡「下台」回應啦？我o地唔係，元旦嘛，我帶頭嗌「新年快『落』」！行到修頓球場，邦話龍尾已經出o左維園，要兩個鐘先走哂，仲唔多人？行到金鐘，唔知邊個話有人認為年青人出o黎係一時之氣，完全唔理智。我個腦突然送o左句o係把口彈出o黎：「如果話中學生冇理性，唔識分辦是非，咁豈不是向培育學生人格o既中學教育狠狠打一巴掌？」個阿sir要我講多次，錄低！
上到政府總部，好多記者，台上講o野o既好似係華叔，超乎想像咁多人，原來o既集會取消，到o左政府總部就唔停站即走。當時TVB訪問緊蔡耀昌，好似影到仲拉住banner o既我！其實我有冇出鏡？有冇人答到我？
中學生大隊右轉經下亞厘畢道、雲咸街落番(有幾個轉左落花園道)，兩邊meet番，傾下計，拎人o地o既咭片，俾下我對香港中學生聯盟o既意見，走下一個走下一個，1900左右散場喇。今日我好有得著，識o左邦、文、Anna兩姊弟、John、Kitty，又俾人認同我o地中學生o係社會運動o既地位，更加見証香港人好有記性，鄔醫生絕對比唔上我o地！雖然主題係「還政於民」，但係各界都有自己o既訴求，有人反對合併換肝中心，有人反對委任制，大部分我都同意，不過有o的人爭取居港權o既訴求………唔好意思，我不敢苟同。
好關心究竟漏o左o係中央圖書館門口o個兩箱T恤搵唔搵得番？

永遠係最好睇o既樂壇頒獎禮，商台叱吒頒發禮最新得獎名單！
專業推介－叱吒十大：
2)必殺技(古巨基)
3)十面埋伏(陳奕迅)
4)愛一個人(李克勤、陳慧琳)
5)獻世(陳小春)
6)我不會唱歌(李克勤)
7)我的驕傲(容祖兒)
8)落地開花(盧巧音)
9)下落不明(黃耀明feat.林憶蓮)
10)一步一生(許志安)
叱吒樂壇至尊歌曲大獎：
七友(梁漢文)
叱吒樂壇至尊唱片大獎：
10號(梁漢文)
四台聯頒音樂大獎－大碟獎：
10號(梁漢文)
雷霆樂壇班霸：
EEG英皇唱片集團有限公司
叱吒樂壇作曲人/編曲人/監製大獎：
雷頌德
叱吒樂壇填詞人大獎：
林夕(九連霸)
叱吒樂壇唱作人大獎：
金)周杰倫
銀)林一峰
銅)鄭中基
叱吒樂壇生力軍男歌手：
金)林一峰
銀)吳浩康
銅)蔡一傑
叱吒樂壇生力軍女歌手：
金)鄭融
銀)王蓉
銅)黃馨
叱吒樂壇生力軍組合：
金)Boy'Z
銀)大頭佛
銅)2R
叱吒樂壇男歌手：
金)許志安
銀)梁漢文
銅)陳奕迅
叱吒樂壇女歌手：
金)容祖兒(史上最年輕)
銀)楊千嬅
銅)梁詠琪
叱吒樂壇組合：
金)Twins
銀)Shine
銅)At 17
叱吒樂壇我最喜愛的歌手：
男)李克勤
女)容祖兒
組合)Twins
叱吒樂壇我最喜愛的歌曲：
必殺技(古巨基)

Re蚊：我o係你度搵到回顧自己過去一年o既經歷o既靈感～

P.S.敢問曾憲梓一句：如果上街遊行係激烈手段，咁係咪你話乜我o地都話係話o岩先算溫和？

>>January 1, 2004 at 5:39:55 PM GMT+8

2003 年 12 月 30 日 星期二 【晴】

呢個我係擺明抄蚊o既！2003係我最難忘最難忘o既一年，因為呢度o既常客幾乎全部都係呢年先識(雖然做o左好耐同學)，社交圈子一下子大o左好多，見識多o左。更重要係，唔知點解我今年o既成績係突然間進步o左好多好多，連我自己都有o的意外(雖然年尾好似打回原形)，令自己重拾信心。同香港一樣，我今年經歷o既實在太多太多喇！關於我同Octopus之間o既事，我費事再打，蚊寫哂。唔會有十大風雲人物，因為每個人對我都咁重要，冇高低之分！

24/1:諗住捐血，不過血色素唔夠，最後捐唔成。
24/2:破冰之旅展開
13/3:一世都唔會唔記得o既farewell，「我o地生性喇！」
24/3:考mock，爭o的要停課。
29/3:裝ICQ
2/5:做SARS會考生
14-15/6:參加「有線電視新一代足球評述員大招募」，入到複試！雖然最後被淘汰，但係不失為經驗！
1/7:今年最令我驕傲o既一件事，同50萬人一齊上街遊行！我為身為香港人而感到自豪！
8/7:Grad Din，冇乜離愁別緒。
11-12/7:人少，不過好開心o既camp。
13/7:參加民主集會，雖然冇七一咁多，但係好感動！
26/7:同小學同學失散多年後團聚
6/8:會考收榜，本身成績講唔上差，又返到荃官，不過好唔開心，太多人要走喇。
10/8:五年o黎第一次有咁多friend同我慶祝生日，多謝！
27-28/8:人多，不過玩得唔太開心o既camp……
1/9:開學喇，一間突然變得陌生o既荃官……
27/9:去中大open day，揀中政政系做目標學系。
10/11:社際俾人踢落後備，Plum射PK輸埋。
20/12:第一次打足球校隊對聖芳濟，累街坊……

逢星期三daddy唔使開工，一家三口食完dinner去維園工展會(其實我唔想去o架，不過難得齊人，去下囉)，搭102，未行到站頭見到架城巴Dennis Dragon 12m(Duple)掠過，望真o的……頭牌出171，尾牌102？架車編號849我記得o架！
去到維園，今年工展會比往年明顯少o左人，因為呢個係工聯會搞？其實我係為試食先去o架，今年主辦單位好有智慧咁將o的試食攤位擺埋哂一齊，我食唔哂咁多。o係Mr.Brown買o左o的咖啡，又玩攤位遊戲(贏到少少啦)，差唔多0000就過Main Stage迫住倒數迎接2004，不過主持講乜我完全聽唔到，佢一定係偷o左荃官o的咪去用。
0015就鬆人喇，o係興發街出口有102返屋企。九巴好搞笑，102同N102齊齊上，老虎都揀102啦，$8.9同$12.8之差！今晚巴士公司發生咩事，o係告士打道見到架九巴Volvo Olympian 12m(Alexander)，尾牌打914，我好奇怪。佢一直跟住我o地落加士居道出彌敦，卒之落車o個陣解開所有謎底，架車前牌打112！點解今晚咁多前後唔同o架？我淨係記得架九巴車牌係F? 87??，檢討下啦，人o地唔知頭唔知路搭落車你就一身蟻喇！
食宵夜，o係24小時營業o既茶餐廳買雞扎小籠包返屋企食，好多油……

>>December 31, 2003 at 6:07:58 PM GMT+8

2003 年 12 月 29 日 星期一 【晴】

前日講過十大港聞，點可以唔講世界大事？今年好似冇乜好事，周圍都有火頭，冇乜特別開心o既事，希望2004有得笑啦。反恐戰好似打極都唔完，下個戰場會o係邊度？伊朗？北韓？敘利亞？定係美國本土？台灣海峽會唔會開戰？暫時應該唔會，比曾鈺成有過之而無不及o既陳水扁惡唔出樣。

2003全球十大新聞：
1)SARS大爆發全球恐慌，共700人死亡
2)美英唔理國際反對攻打伊拉克，薩達姆逃亡八個月後被生擒
3)土耳其伊斯坦布爾恐怖襲擊再現，阿爾蓋達續禍全球
4)北韓核問題惡化，多國斡旋收效唔大
5)台灣通過公投法案，兩岸統獨問題白熱化
6)中國繼美俄後成為第三個送人上太空o既國家
7)伊朗大地震二萬人死亡
8)美加大停電
9)英國武器專家凱利自殺身亡，貝理雅政府受輿論指責
10)歌星米高積遜涉嫌孌童被捕

2003全球十大風雲人物：
1)抗SARS醫護人員
2)薩達姆侯賽因
3)美軍
4)喬治布殊
5)凱利
6)金正日
7)陳水扁
8)阿爾蓋達恐怖份子
9)楊利偉
10)米高積遜

Re Pang:忽然咁感性o既？正如曾志偉所講，希望佢可以「含笑上路」啦，我o地永遠都唔會唔記得佢！

P.S.延續七一的腳步，請支持元旦大遊行。區議會選舉後，政府再向100萬選民狠狠打o左一巴掌，委任全數102個委任區議員，漠視民間對委任制o既不滿。民間人權陣線會o係2004元旦日舉辦遊，以「還政於民，改善民生」為主題，向政府表達香港市民希望儘快開啟政制改革，達致2007年行政長官同2008年立法會所有議席都由普選產生o既意願。可能你o地會認為普選呢個topic好似冇乜迫切性，根本唔需要以上街o黎表達意見，不過諗深一層，如果七一唔係有50萬人上街，政府會唔強行通過23惡法？同樣，如果我o地元旦唔企出o黎，政府就會認為民間冇要求落實普選o既聲音，就會對政改拖得就拖，相信呢個唔會有人願意見到。既然唔願意見到，就應該再企o黎發出自己o既聲音，話俾政府知佢o地o既管治仍然不得人心。再一次呼籲各位出席元旦大遊行，同七一一樣，「香港中學生聯盟」會有自己o既集合地點(1430中央圖書館)，亦有自己o既遊行隊伍，代表青年人o既聲音。我知你o地唔係只係識吃喝玩樂o架，想去就join我啦，去啦！

>>December 30, 2003 at 2:28:54 PM GMT+8

2003 年 12 月 28 日 星期日 【晴】

Octopus除o左Mina同子建，全部上魚屋企打邊爐，不過蚊、聰、小邪去o左睇《指環王3帝王回歸》，得我、Su、魚同瑩妹去楊屋道街市買o野。魚o的bargaining power真係勁，又講價又搵著數，買肥牛送多幾粒丸、買雞送雞頸餚湯，一抽兩袋好多o野拎！羊頭、雞……
好多前置作業，拆袋、洗菜、餚湯底，唔好笑我！我o地算夠朋友喇o掛？等到蚊佢o地到齊先開餐，係咁食係咁講是講非，周展程萬歲！發覺當住人面前「帝」人係幾好o架，至少佢知我o地「帝」佢o的乜嘛！食到差唔多飽就玩True or Dare，dare要食o野，初頭大部分都dare，後來食唔落就多數揀true，爆o左好多鮮為人知o既o野，唔講都冇想像過，原來邊個邊個咁樣咁樣o架！
打完仗，執手尾都執好耐，做完o野再hea到1930先返歸，娘親竟然冇鬧，神奇。

Re肥鵬：或者對巴士迷o黎講，呢單車禍好刻骨銘心啦，而且佢又的確帶出o左香港好多路段都係危機四伏囉。o尋日我focus香港大事，國際大事我遲o的會講。

>>December 29, 2003 at 2:01:13 PM GMT+8