2004 年 3 月 7 日 星期日 【晴】

早o左起身都冇用～
Miss Fung好風趣，肥峰未做齊實用文冇俾佢鬧，齋窒，真係情緒化。
原來Miss Leung仲未同Oscar交手，好難想像兩個正面交鋒o既震撼程度會點。
5 + 1唔記得listening，叫我o地睇多o的信報，不如推介埋文匯大公啦，間中笑下都好o丫！
空堂冇入SA房打機(我都唔知點解唔去)，o係課室睇唔關我事o既笑料，決定唔關自己事。
中史講市舶司，甚麼「倒果為因」，我同Billy終於搵到中國傳統「關聯感應」思維方式冇乜唔好o既地方喇，因為以雙向思考為主，冇主客先後之分，容易產生混淆，甚至顛倒是非黑白，民主派同中央o既關係就最好例子啦。
好耐冇食粥，邊食邊睇Billy踩地雷，我又玩立體彈珠台，我總有一日要重返1400萬分，今日竟然最叻都不過得200萬左右，太耐冇玩，要慢慢操起。
再入Geog Room，再join釣魚團，漁獲冇上次咁多。
中化繼續presentation，連Miss Fung都拉埋落水，冇上次咁好笑咁有氣氛。
冇功課，冇留好耐，返到屋企，果然又係冇心機做o野，中史essay完全未開工。
o的大陸球員真係狼，又冇職業道德，打打下波打埋人，仲要係圍毆o個隻，唔知香港足總敢唔敢罰佢o地停賽 + 唔俾佢o地主場作賽？後者可能性微乎其微，前者應該要內地當局出手相助。

P.S.王敏剛、李祖澤，終於原形畢露喇！

>>March 8, 2004 at 3:51:06 PM GMT+8

2004 年 3 月 6 日 星期六 【晴】

以前去開o個間豪華酒家上星期重開，改o左名叫嘉豪，幾乎換哂人(只係認得煎蘿蔔糕o既阿姐同以前一樣)，裝修佈置同以前完全兩回事，易o左手改o左名o的o野的確好食o左，款式都多o左，唔錯唔錯。
李柱銘今朝o係美國返o黎(我一直都唔反對佢去美國)，支持同反對佢o既人o係機場造成混亂，o的反對者拉哂banner嗌哂口號鬧佢賣國，示威者80%上o左年紀，維園阿伯o個類，佢o地向記者講係自發o黎呢度聲討賣國賊。我一直都唔知原來o的維園阿伯咁厲害，原來佢o地有錢搭車山長水遠入機場，仲有閒情逸緻天都未光就一個二個仆o黎機場問候Martin老母；佢o地好齊心，自發性入機場都識得一o的帶示威牌、一o的拉大banner，拉雜成軍o的口號都可以嗌得咁齊，七一都冇哂齊，原來維園阿伯咁厲害，佩服！

Re無名氏：唔小心爆嚮口添，其實你又係邊個？

>>March 7, 2004 at 1:51:12 PM GMT+8

2004 年 3 月 5 日 星期五 【炎熱】

要入屯門，終於擺埋一齊。好耐冇搭巴士入屯門，坐上層前排睇屯門公路風景永遠都係咁靚，雖然屯門公路實在太多死亡陷阱。今次齋道教冇佛教，乜教都係o的煙薰盲對眼，唔以為食齋好清淡，好多油鹽，分分鐘仲高卡路里過普通餐。間屋好靚，連阿叉看更都有，又有仿酸枝傢俬，不過好似冇雪櫃。

2004年Eric好歌流行榜(第10週)：
1)明天請早(許志安)
2)相依為命(陳小春)
3)孩子王(吳浩康)
4)嫁妝(陳慧琳)
5)娃鬼回魂(何韻詩)
6)香港地(陳冠希)new
7)愛神(古巨基)re
8)步步高(梁漢文)new
9)甜蜜租約(鄧健泓)new
10)不要對他說(葉蒨文)

唔經唔覺，原來已經……
〔一周年〕
我最多 原諒你 在那櫥窗外走過
留下我 面對比我愉快的百貨
原諒你 在這一年 開心比我多
我一個 敵不過 耀眼燈飾太多

我最多 遺憾你 未唱聖詩便分手
連累我 每當天冷便要穿風褸
連累我 在這關頭 慌張一個走
這一晚 行人路滿目挽手

＊忘記了忽然一周年
卻似失戀一萬年 那燈飾以為我開心一點
誰也在未分手之前 趁快樂痴纏＊
原來這夜不見 我可以
天天都不見

我懂得 原諒你 就算毛管不溫暖
其實我 太多手套若我肯挑選
能共你 熱戀一年 此終不算短
最多怕 寒夜被困在戲院

Repeat＊

寒流太耐不見　我早已　沒緣份
做你的戀人一周年　卻似失戀一周年
那燈飾以為我開心一點　全世界甚麼都痴纏
我卻未脫險
但求回家總可以　忘記你盡努力睡眠

Re Pang:我完全唔覺得安歷卡跑得快喎，佢頂多算係步大力雄，韋利、舒夫真高、沙夏都係差唔多呢類型啦，奧雲、沙維奧拿、米高利呢o的老鼠仔會慢過佢？不過如果要「尖嘴猴腮」先跑得快，我寧願做蝸牛。

P.S.黃興桂再現功力，我又俾佢笑死，「邊隊能夠取得入球，就有機會取勝」，原來佢識咁多球員。

>>March 6, 2004 at 3:17:24 PM GMT+8

2004 年 3 月 4 日 星期四 【晴】

小妹o個組中化presentation，帶小組討論，中國人對大自然o既觀念係咪令中國冇近代科學o既最重要因素？可以咁講，不過中國傳統o既社會結構同超過2000年o既抑商政策o既影響可能更大。
History有過期糖食(好明顯Step唔係傳統中國人)，me送o架，你慌食得死我o地咩？
Buss去Geog Room上，好耐冇去o個度上喇(前後剛剛一年)，個個出哂海，今日漁獲豐富。
UE好無聊，填blanks十個九個唔識，我懷疑自己係咪文盲。
Lim Sir帶隊入camp，三堂中史上得頭一堂，之後兩堂終於搞掂漢武帝 + 王莽千字文，效率出奇地快。手多多口多多o既肥峰觀察能力真係差，人家一睇就睇到。
要補習，又想「自我留堂」做耐o的都唔得，不過一粒鐘都夠我寫版幾History essay，我o既立場冇變，唔公平！

Re Candy:第一次玩o者，都食到幾條啦，唔老實咁講：你煩到我。

>>March 5, 2004 at 2:24:07 PM GMT+8

2004 年 3 月 3 日 星期三 【微冷】

o尋日收到今年CE重考英文o既准考證，今次我離開深水埔，轉移陣地返荃灣考，Paper 1, 2, 3上李城壁考，oral就25/6入屯門大興村o既宣道中學，有冇人同我一樣？
又唔知醒，又遲o左出門口，又撞見趕頭趕命o既蘇兄，今日o既topic係tip中史題目！
李綺蘭、楊晴旭終於做到presentation喇，全場鼓掌！三堂都o係度發夢，歐羚唔肯借報紙。
講History，我o既強項係記年份，一次都冇錯，不過年份再熟都冇乜用。
Miss Fung心情靚，講o野生鬼o左，原來佢都唔愛國！肥峰打機就打機啦，咪手多多口多多喎！
同肥峰、Judy猛開三人咬耳仔會議，吳sir出聲，肥峰咁回應咪盞蹝時間？Miss井又病o左唔返，冇手球玩添，繼續踢波囉。冇林挺都唔係大問題，加o左件Camphor白痴仔先最大鑊，釗平時防中清道夫踢哂，就係因為佢而要再推前o的，好彩牛榮 + 陳從願 + 肥峰尚算守得穩。陳梓豪禁區頂冇人mark住怒省，雙龍出海，門口混戰，用龍隻腳幫自己接波，自己都覺高招。叫o左十九企前o的o架啦，又係以我o既96長傳精度龍門球放長炮，十九一轉身就控定快放推橫，過埋Danny起腳，小B漏油，我又一個間接助攻。轉頭冇耐舒利亞中路突破單刀，好彩我o既封單刀特殊能力，柱邊。都話個白痴仔陀衰家o架啦，唔知點樣高波吊入禁區頂，佢一招金雞獨立，幫埋人控波，壽星仔余寶一句唔該打荷包落底，我焗住，漏o左波就返禁區包位啦，企o係度睇波，壽星仔橫傳入中路，舒利亞對住大大個空門又點會唔入？或者我應該再狠o的衝出去殺低壽星仔啦，不過係有o的懷念肥鵬包抄o既位置感同青o既大刀闊斧，我當年不知打得幾舒服。肥峰又幾好波喎，佢唔再o係足球場打籃球，拍住釗o係中場掃蕩 + 支援左路o既阿沈，又返到o黎幫波，一於以後都踢波啦，不過佢一次小禁區射柱邊，一次炒機，打唔慣前鋒係咁o架喇。十九開角球好廢，得一次斬到去阿沈頭頂斜出。兩隊都有人出錯有人門前失機，1比1合理。
Class Period種菜心，夠唔夠我o地食o架？又或者到o左deadline仲有幾多盆倖存？
我又做o左件蠢事喇，呢單o野仲要足以俾人笑足十年(唔係歌名呀)，好彩我o係6A基本上係隱形人，唔會有幾多人知／留意發生咩事，我認為，不過真係好樣衰。
o係屋企根本集中唔到精神做o野，所以今日決定放學留o係學校做o野，先係課室有魚陪，16:45打鐘落cover搭陳江檯，係咁做係咁做，真係比o係屋企有效率得多，搞掂中化預習、中史千字文做o左大半，我o係屋企肯定半樣都做唔到，o係學校真係幾好，有唔識都可以問，有時間又有人陪我一定會繼續「自我留堂」！

P.S.邊個有興趣俾我add落我隻WE7請報上名來，附上身高體重，如果有鍾意o既波boot顏色麻煩講埋！

>>March 4, 2004 at 3:07:34 PM GMT+8

2004 年 3 月 2 日 星期二 【微冷】

Debate準備o左好耐，終於開波喇。
今次topic係"The Treaty of Versailles was a fair settlement to Germany"，同上次唔同，今次冇o左Step、Alison、金希文、蝦呢o的猛人，上次冇份講o既今次大部分出動。History班第二梯隊陣容：
Affirmative Negative
1st speaker Candy vs 林敏
2nd speaker Judy vs 魚
3rd speaker 楊晴旭 vs 小妹
Floor 蝦 + 思穎 vs 金希文 + 李綺蘭
Captain Billy vs 我
唔知re定mi走o黎睇我o地debate，affirmative係咁掟史家之言，我o地基本上以point還擊，不過似乎對於針對對手o既argument仲差些少(或者我都聽唔清楚人o地exactly講乜我o地exactly點回應)，我o既conclusion太長，初頭o的point又掉轉o左次序，好彩cut o既都唔係精華，反而Billy就真係太長，講唔哂。最後Miss Leung判affirmative贏少少，其實真係好難講邊隊performance好o的，老實講我覺得表現唔算太差，其他隊友更加係超水準，台上台下幕前幕後都盡o左最大努力，好俾心機咁準備一切，問心無愧啦？吸收o左呢次寶貴經驗，我會得到o的乜？
要返回現實喇，5 + 1再次發功，唔知No.?又踩親佢條尾，Bi Li Ba La係咁連珠發炮，我應聲投降。以為listening有進步，原來因為淺，同其他人比仲有段距離，冇計啦，我一早俾5 + 1射低！
我成個星期未交中化剪報，Miss Fung竟然冇發嬲，女人果然係善變，牛榮忍唔住要頂撞下佢。
中史project抽籤喇，Polly就好啦，抽到五四運動，我要做魏晉南北朝清談玄學，唔識做喎。以為做o左件極愚蠢o既事，最後先發現原來唔係；之後又有呢一單o野足以引人發笑，算啦，發瘟！
又第三件蠢事喇，上楊屋道拎form做乜鬼o者？蹝氣！白痴！
一個人o係屋企好難集中精神做o野，反而o係學校大班人o黎得更有效率。

P.S.土共左仔大發神經胡說八道(猜意大利球員)

>>March 3, 2004 at 3:45:22 PM GMT+8

2004 年 3 月 1 日 星期一 【晴】

我竟然睇唔到……………
Morning Assembly播國歌冇用o架，要洗我o地腦就播《沒有共產黨就沒有新中國》啦！
History開Russia，好多o野都唔多記得，我連野史都拎埋出o黎講，Miss Leung雜咁遠都好似明明地我講緊乜。小息離開1B課室竟然聽到有F.1仔爆o左句「ＣＳＬＫＬＣＣ」！
Triple Buss做Case Study，甚麼聖誕老人電腦化，乜都諗唔到，一版唔到就收貨，李sir省硬我。
Lunch開始debate最後準備，驚間諜，入SA房，都唔係傾到o的乜。
中史六星連珠，鬥搞笑，笑到趴地，Lim Sir第N次話我o地胡鬧，搞笑o的唔好咩？調劑下嘛！
中化功課要交哂俾學校，我o的預習……………………好似除o左第一課就冇再做過。
放學繼續傾debate，我o地霸課室affirmative霸Geog Room，不斷諗呢樣諗o個樣，16:45落cover講到Miss Yu趕人，仲差好多，先搞掂，移師麥記，affirmative跟埋。我話過唔幫襯麥記嘛，今日算唔算破禁？份講稿好難寫呀，結辯唔使乜o野新point，最重要係講齊ＸＸＸ、ＸＸＸ同ＸＸＸ重申自己o既立場，希望聽日唔會累街坊啦。
搞到20:15先解散，返到屋企媽媽竟然乜口黑面黑，佢平時唔係唔理我有乜o野理由，o係冇任何point之下破口大罵咩？

>>March 2, 2004 at 3:58:32 PM GMT+8

2004 年 2 月 29 日 星期日 【炎熱】

真係唔捨得，除o左前o的，其實同Billy呢個位好得，周圍都識，不過快樂時光過得太快喇，調去同思穎坐，陳江、牛榮、肥峰o係後面，又有計傾！
Billy冇返，一支公上中史，Lim Sir終於醒起要交file，一早準備好啦，「準時」！
挺入sick room避5 + 1，佢唔記得group discussion，買大開細買細開大，呢個位發夢易得多！
小息，你以為自己係邊個？
中化繼續個人短講，人人都俾Miss Fung打得幾低分，佢心情唔靚呀，遲大到o既Alison仲要突然撞入o黎，被省。
Lunch子建爆笑料，關於男主角o既問題，我樂意提供幫助！
History傾debate，大家weekend都做過o的o野，不過好似好亂，要準備自己守尾關講乜喇。
放學見到好耐冇見o既Zoe同Logan，大家都冇乜點變。

Re Cafu:彈起o左你未必可以即刻就位，可能彈上心口，而割「沙」式飛埋o黎易o的預到位。同我爭食？以沙咀水平o黎講，你都係打翼衛啦，如果我有時間或者會create哂成隊麗新草草o既，不過出o左International喇喎。我又唔覺得遠程炮難救喎，因為通常前面有後衛遮少少，反而兩邊傳中最難搞，出與唔出之間。
Re邪：你o地唔識，由F.4開始幫我補到依家o既tutor。
Re Candy:唔該哂 + 唔使客氣

>>March 1, 2004 at 2:23:14 PM GMT+8

2004 年 2 月 28 日 星期六 【炎熱】

阿姨買電話送兩張免費去高級餐廳o既coupon，日法意任揀，不過佢唔要俾o左我o地，今日係deadline，一家三口去食意大利菜(日本o岩口味o的o架，不過o個星期日唔用得)。
間Papa Razzi有o的僻，o係尖沙咀諾士佛臺，見到好多平時100%唔會o黎o既人拎住coupon幫襯。點解？打開餐牌，$428二人set lunch，你可唔可能幫襯？唔係好識點菜，有備而戰照顧我o地呢o的大鄉里o既部長教路，甚麼鴨胸、鱒魚o個o的，電視睇得多，食就以前根本冇諗過。一分錢一分貨，幾好食啦，白湯勁香野菌味，鴨胸好爽，不過熱咖啡唔夠熱，連糖都溶唔到。$202埋單，睇落好「抵」，set lunch唔使錢嘛！其實意大利菜唔o岩我食，又咁貴，都係一次幫襯咁大把o架喇。

Re Cafu(1):即係有o的波會踢離地面平飛埋o黎，又或者割「沙」式貼地碌向龍門，而舒利亞o個就接近前面，不過個波到我手前三四個波位落地彈起，呢o的波好考龍門o既反應，如果唔係好易彈琵琶。
Re Cafu(2):咁多人，set樣好麻煩o架(我set極都唔似自己)，而且我o地咁o既身型點同人打？173cm打龍門其實根本唔合格，你同肥鵬尚且可以打閘，但係阿青就冇可能打中堅。你o既最佳位置係龍門、兩閘定防中？

>>February 29, 2004 at 2:10:31 PM GMT+8

2004 年 2 月 27 日 星期五 【炎熱】

同tutor去書店揀listening exercise，o係佐敦行落尖咀，少少收穫咁啦。o係海運城o既書店有個西洋婦女(唔好叫佢鬼婆啦)，佢將放滿貴重物品o既手袋掛o係BB車度就行開o左睇書，5分鐘後返o黎個袋就唔見o左，要勞煩老闆報警，喊哂。足足行開5分鐘咁耐，我係賊都唔好意思唔偷啦，「貴重物品跟身」咁簡單o既道理都唔識，俾人打手袋唔怪得人。不過我有兩個問題：通常呢o的舖頭都有閉路電視(記憶中我好似見到鏡頭)，點解事發後老闆唔即刻睇帶認賊？而且BB車裡至少三歲大o既女仔點解會唔知有人o係佢身後撻o野？
星期六又係上舅父屋企打PS2啦，玩WE7越玩越過癮，將自己create入game，保留自己o係現實大部分o既特點，巴夫斯、舒米高、芝拉華特、甘保斯o既混合體！
位置GK　擅長右腳　逆足精度4　長時間短袖　身高173　體重59　體格3(同冇體格差唔多)
身體平衡83　最高速71　加速88　反應91　敏捷性89　短傳精度87　長傳精度96　射門精度83　射門力86　射門技巧84　罰球精度89(有冇)　弧度82　彈跳力90(極具爭議性)　技巧58(龍門要咁多做乜)　攻擊性74(有眼你睇)　精神力85　比賽安定度5(max8)　GK技術89　狀態安定度4
特殊能力：傳球、1 vs 1單刀封位、救12碼、射12碼、罰球、後防統率
咁o既能力值o係WE7算係相當強o既龍門，反應超快兼身手敏捷，華朗禁區頂抽射俾我飛身救出；88加速 + 封單刀特殊能力基本上冇人可以單對單射入我，奧雲都唔得；高得恐怖o既長傳精度o岩哂我o係後場策動反擊之餘，有親死球、12碼一定係我親自處理，只可惜玩家(又係我)仲未識射罰球。要數我o既弱點當然係身型，又矮又冇身型，接傳中波好輸蝕，好彩依家仲未遇上史譚、真高拿！

2004年Eric好歌流行榜(第9週)：
1)相依為命(陳小春)
2)明天請早(許志安)
3)女扮男生(At 17)
4)嫁妝(陳慧琳)new
5)仰慕者(左麟右李)
6)娃鬼回魂(何韻詩)
7)孩子王(吳浩康)new
8)Girls(Boy'Z)new
9)獨照(容祖兒)re
10)不要對他說(葉蒨文)new

Re蝦：三段論係西方哲學思想o既根源，而哲學思想係直接影響文化o既特質。

>>February 28, 2004 at 3:38:08 PM GMT+8