2004 年 4 月 6 日 星期二 【晴】

我上到SCMP Letters喇！Comment人o地關於釣魚台屬於日本o既writing，諗住星期六登，買o黎睇，唔見，以為唔登，算。點知篇article星期日出街，計兩次o架，太好喇，再次向$200百住coupon進發！
笑死，個個球迷都諗住睇阿仙奴對皇馬o既歐聯世紀大戰，點知兩隊齊齊o係八強出局，車仔同摩納哥都o係落後之下反勝。阿仙奴四日內冇o左兩個冠軍，真係幾唔抵，某程度上反映阿仙奴o既兵源唔係好夠，股氣勢一冇o左就大鑊，不過佢要保住唯一o既聯賽冠軍應該唔會太難o既。重馬更加唔使講啦，對住天殘地缺o既摩納哥都輸，唔睇都知又係防守問題，兩球在手都可以俾人贏作客入球出線，又得番聯賽俾華倫博命死追，我睇好華倫最後關頭可以爬皇馬頭，重奪西甲冠軍。皇馬四大皆空，佩雷斯怒炒基羅斯，基羅斯冇得撈，重返曼聯…………
參加四日三夜o既「健康活力青年營2004」，F.4玩過，畢生難忘，今年再玩。13:30鑽石山荷李活廣場點名上車，竟然唔見o左乘車證，我呢個「無證兒童」要等其他青哂上車手續先搭最後o個架車。地點仍然係西貢對面海戶外康樂中心，環境唔錯，只係太多蚊。分配營房，頂樓o既307號房，八人一房，得七個準時入營(有o的遲o的先入)，兩個足球五個乒乓球(仲有籃球、排球、箭藝、野外定向)，擺好背囊，換衫，15:00落球場。兩個教練，有miss教踢波，阿sir勁似侯活，左棍。
第一課操練：盤球
第一日得19人出席練習，練哂腳內檔、腳外檔、左右腳交替運球，要知道帶波係我最大o既弱項，帶得好論盡，不過開始掌握到少少扭人o既竅門，但係作為龍門，我一定唔會亂扭，自己知自己事。同兩年前o個次唔同，今次阿sir俾多o左時間我o地鬥波，上次有好多龍門，今次居然得我一個正宗龍門。狀態唔錯，封位同撲救都使哂出o黎，不過冇全程守龍門，一段時間走去打防中，因為呢個係膠地場，可以放心剷波，80%攔截成功率(五中四)我係史葛柏加。
17:00完操練，去篤波，好多人都唔識篤，我又好耐冇打，鬥廢。18:00開飯，o的菜煮耐o左，老o左o的，呢餐最正都係沙爹粉絲牛肉煲。夜晚o既所謂歷奇活動超級有聊，將營友分o左三個社，紅黃綠，我係紅，要幫社改名，唔知邊個提議「雄鷹社」(洪英社)，我冇意見，再決定口號，最後定案係………直豎姆指！
返房，話咁快就全房人混熟o左，我好蘇斯克查咩？我個唔似F.6咩？o的人估我最高form都係中四，其他人唔係一就二。全層樓起碼80人，竟然得4格浴室，等仲耐過沖。我o地竟然冇鎖匙lock房門？舍監(香港教育學院體育系學生，未來PE阿sir/miss是也)都唔係通宵巡房啦，有賊入o黎點算？
Day 1識o左八個人：踢波o既張祖龍、費高，同房o既連信(都係踢波)、柏林、喇沙仔、尹佬、豬肉霆、勞卓義。

>>April 10, 2004 at 3:18:16 PM GMT+8

2004 年 4 月 5 日 星期一 【炎熱】

返學校幫手搞drama set，但係一返去就係陪Candy打羽毛球，之後又打o左陣籃球，基本上冇乜點幫手。落手喇落手喇，幫大櫃髹油，上木啡色，竟然唔記得戴勞工手套 + 除鞋，雙手同波鞋都俾油整污糟o左，死喇，對鞋落地冇耐喇，咁就要報銷，唔制…………個櫃接近搞掂喇，對觀眾o個邊上色咪得囉！
o個件傳說中o既妓女衫……………人o既問題。Camphor張檯之前其實係內八字腳o架，木頭車真係郁得，不過邊個敢坐上去？食車仔麵點樣可以食到$26？條數計極都計唔到，唯一可能性係計錯數！
晏晝冇哂精神做o野，係咁攤抖，睇住o的人走o黎走去，都係幫幫手啦，cut紙，好似整花o左乒乓波檯，少少o者，唔緊要啦。搞搞搞都係收工喇，15:45走人，下星期返o黎繼續開工幫手。返屋企，聽森美小儀，有人o係大氣電波下求婚，成功，我估新娘之後可能會話唔想當眾落佢面，準新郎哥要努力喇。

>>April 6, 2004 at 2:18:20 PM GMT+8

2004 年 4 月 4 日 星期日 【晴】

媽咪返o黎喇，冇王管o既日子話咁快就完o左喇。呢兩晚都放哂肆，開大喇叭聽歌，玩到02:00先肯見周公，仲要個廚房俾我拆埋。話就話作反o者，唔可以唔做功課o既，總算寫好History Essay，不過好唔專心之下寫，好似離哂題；又reply中化剪報，好似講緊自己o野多過reply，求其啦，假期功課唔要求得咁高。
睇《星期一檔案》，講偷渡去中國再逃亡去南韓o既北韓人，佢o地冒死離開北韓，去佢o地眼中o既「天堂」南韓，目的只係想有啖氣抖下。南韓係咪天堂就好難講，不過北韓就肯定係地獄，地獄之中o既地獄，姓金o既父子竟然可以厚顏無恥咁將北韓定國名做「朝鮮『民主』人民共和國」，金正日同共產黨係魔鬼之中o既魔鬼，北韓人想逃亡走唔甩就大鑊，捉入勞改營做苦工、虐待、毒打、之後槍斃，眾目睽睽之下槍斃。中共算係幫兇，世界上冇乜地方會將難民送返原居地，佢算係最厲害。

>>April 5, 2004 at 12:34:53 PM GMT+8

2004 年 4 月 3 日 星期六 【炎熱】

有波踢，好耐冇同肥鵬踢波喇。
我、肥鵬、泰利朗拿度、沈、Cafu、青仔、輝哥、Richard、挺、挺細佬、蕭邦、鰻魚，好少咁齊人，鬥鬥下波有街外人加入，o個三件懶係勁，其實得把口，o係度指指點點，唔好扮巴拉查啦！今日打到上哂身，俾人連射三o野都力保不失，再有一球Richard半空門中我左腳大脾。個波明顯冇氣啦，根本食唔到個波，斬唔起，96長傳精度使唔出。加多兩個莊啟程人，扭轉局勢，兩次右路傳中扳平，2比2完場。玩射九碼，發現列文o個種救十二碼方法唔適合救一步助跑o既九碼，不過都好似救得幾型。如果郝海東都算廢，中國冇前鋒o架喇。
走過隔離場自己鬥，空位多，易入波，不過對面腳風唔順，幸保不失。有人學卡路士射波，完全冇得救，因為唔使救。打到13:00左右先散場，唔食飯喇，返屋企。好耐冇踢波踢得咁過癮，同平時PE踢o個o的完全兩種感覺，多o的機會一齊踢啦。
19:00-20:00睇o左兩個RTHK節目，《鏗鏘集》講自從粵港兩地實施駕駛執照資格互認之後，有o的成日來往兩地o既司機要適應兩地截然不同o既駕駛文化，內地司機要o係香港學守規則，香港司機o係內地就要適應唔守規則o既大陸司機。我諗起幾年前o係大陸搭直通巴士返香港，架車o係廣深高速公路快得恐怖，我坐o係司機位後面，望咪表，150km/h以上，我以為我去緊見上帝。之後o個個係《風雨夜歸人》，講通宵巴士線司機，藍灣半島個站的確有危險，通宵線o既感覺同日間真係大相逕庭，我搭過幾次通宵線，一次沙田返屋企，一次銅鑼灣返屋企，一次荃灣返屋企(子建生日o個次囉)，車廂的確有股人情味。

第23屆香港電影金像獎頒獎典禮又o黎喇，恭喜所有得獎者。
最佳攝影：黃岳泰《戀之風景》
最佳剪接：陳祺合《千機變》
最佳新演員：安志杰《少年阿虎》(吳建豪上去做乜)
最佳編劇：韋家輝、游乃海、歐健兒、葉天成《大隻佬》
最佳視覺效果：黃宏顯、余國亮《千機變》
最佳音響效果：曾景祥《千機變》
亞洲最佳電影：《黃昏清兵衛》(日本)
最佳女配角：何超儀《豪情》
最佳動作設計：甄子丹《千機變》
新晉導演獎：彭浩翔《大丈夫》
最佳服裝造型設計：奚仲文《千機變》
最佳美術指導：雷楚雄《千機變》
最佳男配角：梁家輝《大丈夫》
最佳電影主題曲：長空(Beyond)《無間道2》(恭喜恭喜)
最佳原創電影音樂：金培達《忘不了》
最佳導演：杜琪峰《PTU》
最佳女主角：張柏芝《忘不了》(媽咪踩過佢唔識做戲，事實上媽咪根本冇睇過佢o的戲)
最佳男主角：劉德華《大隻佬》
最佳電影：《大隻佬》杜琪峰、韋家輝監製

>>April 4, 2004 at 3:13:59 PM GMT+8

2004 年 4 月 2 日 星期五 【晴】

政府唔知有心定故意唔宣傳唔緊要，總有人幫手：2004年9月12日是新一屆立法會選舉投票日，為了令議事廳更具代表性，不論你支持07普選還是認為愛國愛港的市民會選出反中亂港的人，李柱銘是漢奸還是梁振英沒有語文能力，你的飲歌是《心照心》還是《沒有共產黨就沒有新中國》，請盡早登記成為選民，選出心目中最合適的議員，為香港的未來投下神聖一票。如果你是香港永久居民，又在今年7月25日前年滿18歲，恭喜你，你可在5月16日前登記成為合資格選民，你在投票日投下神聖一票。選民登記表格可在各區民政事務處索取，如果你擔心表格會被投籃，可到「基本法第45條關注組」網頁www.article45.com免費下載。
曼聯o係足總盃四強1比0淘汰阿仙奴，今季99%唔使四大皆空，決賽對手只係甲組仔。阿仙奴三冠王o既美夢幻滅，冇得足總盃三連冠之餘，今季第一次o係全力出擊o既英格蘭本土比賽輸波，而曼聯就連續5場面對阿仙奴保持不敗……………雖然只係1勝4和。
其實曼聯冇雲尼冇沙夏都贏波，固然費sir賽前o既針對性部署同及時o既調動應記一功，不過其實曼聯唔輸多多少少都係靠o的運氣。施維斯達兩次o係禁區hand ball球證睇唔到，卡路爾上o左身，阿仙奴球員冇帶射門鞋，唔係中柱就中楣，救o左曼聯唔知幾多次。不過成王敗寇，贏o左就係贏o左，曼聯至少有隻盃仔落袋，保住少少面子，而且布朗已經上哂力，事實又證明費查o係中場中路瞻前顧後係比較好，今季失o左聯賽唔係乜o野，搵到未來o既form先係最關鍵。
開始冇王管o既日子喇，holiday mood發作，乜都冇做過，只係History essay做o左少少planning，唔識組織，擱置，玩玩玩，睇睇睇。

2004年Eric好歌流行榜(第14週)：
1)世界之最(你願意) (鄭秀文)
2)Never Been Kissed(At 17)
3)香港地(陳冠希)
4)一拍兩散(容祖兒)
5)我們的合唱歌(2R)
6)奇洛李維斯回信(薜凱琪)
7)兩個人的煙火(黎明)
8)前戲(傅珮嘉)new
9)目黑(周國賢)
10)講妳知(張學友)new

>>April 3, 2004 at 3:16:01 PM GMT+8

2004 年 4 月 1 日 星期四 【晴】

又有新款o野…………………
今日已經有holiday mood，乜o野心機都冇，反正大部分假期功課都俾o左，雖然預o左做唔哂。
History有o野玩，Miss Leung係基督徒，派單張，有基督徒名人o既言行，先鬥快寫哂人名，再鬥快寫佢o地應該屬於邊個topic，最後三組打和，皆大歡喜，齊齊有糖食。原來Miss係復活節o個陣受洗，未信教之前佢好容易嬲？唔多信。
Andrew = Andy
入SA房玩立體彈珠台，Ball 1已經有420萬分(最佳成績都係我，470萬)，打鐘，hold住先，諗住lunch玩埋破紀錄，點知我入到去Lily已經幫我剷o左……………其實你心裡有沒有我，6A都聽得好清楚。
Lim Sir繼續講笑話，古文 = 估文，教DBQ技巧，呆o左，都係essay容易o的。
李sir竟然搵我講波經，講本地波。佢都有睇中港大戰，佢都覺得港隊打得幾好，對港隊有信心，佢對范俊業最有印象，我提佢其實仲有李偉文、蔣世豪，香港唔係得死火倫同和仔。
中化派o尋日o既測驗，冇乜點睇四捨五入都有7分，牛榮差1分就85分，喊都無謂。又派評論，亂o黎，太重覆。
放學主力drama搞set，先去買木，拎得好狼狽，德州電鋸殺人事件，有冇人伸條頸出o黎？返學校係咁先，又返課室鬥寫o野，首都名唔係點難唔到我，寫歌名好彩冇Vincent屈機，險勝。都係幫手啦，磨木，落釘，我文唔得武又唔得，落到唔知點樣，搞亂哂。好多笑料，蜘蛛俠、滑梯、位置o岩o岩好、誰來愛我、間諜………………整幾粒釘都要搞祰幾鐘，真失敗。魚蛋車好似好大工程，都係聽日繼續啦，18:25散場，今日學校唔趕人。
聽日媽媽返大陸，我又有三日冇王管o既日子喇，盡情放肆……………………都要生生性性做功課。

>>April 2, 2004 at 2:54:33 PM GMT+8

2004 年 3 月 31 日 星期三 【乍寒還暖】

點解成日都係半步o架？？？？？
呢兩日課室o既「麥記誘惑」少o左好多，忍住忍住……………
中化open-book test《中國古代文化知識趣談》，第一堂改上Buss，一早已經冇心機上。
History「分組」傾o野，1234同1324有乜分別？行錯路，抄point算數，至少人o地o個o的好得多。
第二堂Buss俾哂我o地睇中化，民以食為天，食元寶蠟燭，問六經皆史……………
測喇測喇，仲諗住open-book就唔會齋問內容咁白痴添，狂揭書，有o的根本搵唔到，而且已經冇睇好耐，本書我o尋日先買番，唔知o係邊度搵。好彩有少少吹水題，吹吹吹，執分，呢次test實拉低哂Paper 5個分。
心情未返o黎，冇心機聽5 + 1講o野。
信唔信杯麵 + 長壽司可以揉合多國美食文化？
Lim Sir好搞笑，「鴨臀大哂咩」，我都唔執輸，吹水德。我同肥峰都超好唱口，「怎麼捨得你」，「人善天不欺」，「如何面對　曾一起走過的日子」，我o地不嬲都好唱口o架啦！
放學追功課，千字文遲o左兩日終於做完喇。原來惠原o的膠兜細過我隻手，入得微波爐o個o的其實得唔得o架？玩寫歌名，我 + 龜都唔夠Vincent一個揪，85比104，滴汗……………
如果唔係聽日仲要返學，我諗住今晚去遮打花園參加反釋法集會o架，基本法賦予人大解釋條文o既權力o者，但係都唔可以亂用o掛？而且訂明係終審法院或者特區政府向人大提出先可以釋法，今次人大釋法明顯係越權，咁香港仲有法治o既？

P.S.青仔生日快樂，我o地記得o架！

>>April 1, 2004 at 3:18:25 PM GMT+8

2004 年 3 月 30 日 星期二 【微雨】

又係差半步？
Buss猛畫graph，唔知畫o黎有乜用，畫畫畫，畫足三堂。
History派Versailles Essay，用debate料，多o野寫，幾唔錯。有另類功課，不過好似寫essay容易o的。
中化寫寫下實用文，Law Sir走入o黎，話佢今日整喊兩個女仔，main point係話o的chatter box唔做o野，其實係o的人唔識搵o者，6A門口大把，前兩次你o地都係咁拎貼紙o架啦！評論青年自殺風氣，加上自己一直o既信念，有預感Miss Fung會challenge我呢點。寫到Lunch繼續寫，6A變o左荃官第二個canteen，煎釀三寶、車仔麵、住家飯……………………
潮州仔又霸o左球場，又係廿幾人塞落細場打。今日我超得閒，冇乜點受考驗，初段舒利亞突破防線殺入禁區，軟弱無力o既射門俾失o左少少位我右腳掃橫。肉丸係F.6韋利/阿祖安奴/舒夫真高，少少空位俾前衝入禁區，勁抽破網。前5D進攻模式有少少似阿仙奴，快速反擊俾陳梓豪兩個人中間突破，好彩推甩腳，出o黎火星撞地球o者，冇事。濕九唔知點樣糊裡糊塗數多兩粒，冇諗過我o地領先到3比0，可能因為球場太多人，唔o岩5D發揮。挺中途加入，有火？右邊禁區角笠空門超靚，又o係龍門口亂軍掃入，你腳風順啦。又係面對反擊，陳從願回傳唔接得，一腳清，舒利亞左腳窩利即抽，太正，考我唔起，呢個已經算最有威脅埋門，5比0應該係今季最大比數賽果。
Class Period睇唔知甚麼video，睇完答o岩題目有Mentos送，揀o黎答，兩條全中，金紫荊廣場o既紫荊像同特區區旗o既共通點係………………都有紫荊花，愕然。我其實冇興趣答問題，只係志在食糖。
放學好忙，先要撲去吉野家樓上買書(唔記得書舖咩名)，買到喇，趕得切聽日測驗！本來社drama要做set，我要出球場吹Pine vs Camphor社際決賽，初時冇幫手，o係課室同Billy繼續CEP，matching實在淺得太離譜，同抄o野冇分別。都係落去啦，見到Judy佢o地仲鋸緊櫃，係咁意幫幫手(腳)先，15分鐘唔夠就要出球場，16:25先開波。其實經過上次Bamboo vs Camphor激起公憤之後，我真係唔想吹決賽o架，但係老麥又搵唔到人，又要我吹，自求多福，利家義見到我難得冇乜大反應。
Pine開波第一個攻勢就o係右路cut入禁區射入，閃電開記錄。上半場又有幾個爭議性o既波，開始有人唔順超我，塊面白到成隻疆屍咁o既初仔最唔妥我，仲有黃志揚。利家義殺入禁區攻門，徒弟仔正面向前擋，利家義仲唔叫糊？執雞頂入1比1扳平。Pine主要都係靠初仔、朱仔、黃志揚o係前面打哂，陳梓豪入替黃志揚之後就得番兩個進攻，好難對Camphor構成威脅。上半場1比1結束，半場休息俾人兜口兜面咁噴。
同兩場初賽一樣，下半場波來波往，因為太多扭得之人，根本好難睇三腳波，老麥又好似夢遊咁，又係我一個人受靶。黃志揚鑊鑊都走入球場搞搞震，擺明唔放我在眼內，話哂我都係球證喎，不過唔通俾牌佢咩？又一場1比1完法定時間，又要打加時，不過老麥只係book場book到18:00，求神拜佛唔好有人o黎要場。
加時有幾次有威脅o既埋門，不過無論初仔定利家義o既波都係門前掠過，冇得早o的收工。
最後都係要最殘酷o既射九碼分勝負，揀公字就揀公字啦，玩o野！我的而且確見得Pine第二球兩步o架，場邊o個班粉腸我忍o左你o地好耐喇！Camphor第五輪唔入，Pine最後一球入o左就贏，你冷靜o的啦，球證未吹雞你入o左都唔算o架啦，射射射，XYZ%&啦！第一球入o左唔算，第二球仲係咁？第三球發脾氣炒機，第四球吹o左先射，斜出。突然死亡，甄嘉浩入，陳梓豪肩負重任，最後射中俾利家義救到，Camphor射九碼3比2贏冠軍。三場波都係法定時間1比1完場要射九碼，都係後上扳平o個隊射贏。
球場內外o個o的炒腸我忍得耐喇，使唔使大大聲粗口問候？如果我唔係球證，一定回敬！我兩隻眼睇得幾多？唔o岩你吹o丫笨！你估我好想做球證o架？我唔好做功課 + 幫手做set？好彩再冇下鑊，我一定唔會再吹！我諗我以後睇波o個陣唔會對球證o既判決咁大反應喇做球證難過做球員好多o架！
返學校，o的人走得七七八八，連sofa都搵到返o黎，滴汗。做哂CEP喇，係份卷定我真係有進步？
今晚冇o係屋企食飯，大陸唔知乜o野遠房親戚o黎香港玩(唔係自由行)，同佢o地食飯。我唔係好想食o架，我想o係屋企睇波囉，今日大條道理唔愛國嘛，世界盃亞洲區外圍賽香港對中國！趕得切返屋企睇下半場，港隊球員拼盡全力同中國隊周旋，朱兆基o個球唔係楊璞從後閂到好有威脅o架！港隊最後都係失守，一時睇漏眼俾郝海東近門頂入，港隊冇乜攻力，失o左波就輸喇，0比1飲恨，今日港隊守得幾好，有波在腳好肯嘗試進攻，失o左控球權就即刻回防，好拼命，失o個球只係，無心之失。總之港隊已經try their best，問心無愧啦？支持港隊，出唔到線都爭個小組第二！

>>March 31, 2004 at 3:49:54 PM GMT+8

2004 年 3 月 29 日 星期一 【乍寒還暖】

又差半步……………
Triple History繼續o尋日o既grouping極速飛書，我一早睇哂要睇o既article，但係都有少少跟唔到，好彩呢組有Step + Alison兩大巨頭o係度，總算冇走失……………冇走失得太遠。
5 + 1返喇，Triple UE大半程oral，group discussion靜哂，有溫婉彤都冇o野講，其實係咪冇12分鐘咁耐？
Lunch同蝦、Billy嗲，原來我食飯好聰明，蝦都好聰明，Billy又玩弦外之音。
對中化閱讀理解，Miss Fung都話難，但係又唔算錯好多喎，最難o個part總算keep到o岩一半以上。
印堂發黑o既Lim Sir吸引大量笑聲，俾人證實我心邪添，好多人都心邪啦！
放學趕千字文，特別嘉賓子建溫Econ，一條鞭做哂，不過黃冊、魚鱗圖冊唔識寫優點缺點。晏晝冇乜點郁動o丫，同Billy都覺得肚餓，食XO海鮮杯麵，飽哂，控制體重………………16:45就走喇，好搞笑，牛「利」換牛「利」酥、呢個答案只有四個可能性、我授權俾你……………

P.S.小B生日快樂～

>>March 30, 2004 at 2:03:43 PM GMT+8

2004 年 3 月 28 日 星期日 【陰】

緊急！緊急！邊個非荃官人有《中國古代文化知識趣談》？非常非常非常趕住用，有冇人可以兩日內借俾我？麻煩哂，唔該盡快！
o尋晚睇波睇到好夜，沙夏幫曼聯1比1迫和阿仙奴，兩隊保持12分距離，兵工廠仲打破埋英格蘭頂級聯賽史上開季以o黎最長不敗紀錄。何輝口吻，1比1唔係太差o既戰果，講到尾曼聯要o係聯賽榜後來居上o既可能性係微乎其微，曼聯至少keep住今季對阿仙奴仍然不敗，星期六足總盃再對阿仙奴先係最重要。
千古奇聞，5 + 1請病假，無端端又多堂空堂，聽日都唔好返啦，病多日病唔死o既，不過我都係乜都做唔到。
History玩role play，我俾人推出去俾Miss Leung掟雞蛋，都話我o的英文唔掂o架啦，最後都要Step出馬！其他組超得，扮鬼扮馬，明明o個o的係敵人，都笑死，Billy呢o的算唔算跳舞？
去IT房上Buss，李sir唔識lock機，索性叫我o地自律，我o地梗「自律」啦，PowerPoint照開，網照各自上，反正今日o個o的都係常識，留意社會就知！第三堂返課室自修，同陳江入hall幫李sir搬o野，今年會考o既answer sheet，仲有listening餅帶。
中史冇心機上，早已經將注意力放o係中化測驗，聽講好難，話之Lim Sir講乜。
原來中化又出2001年past paper，之前睇過下，Time Management麻麻，要提早跳去最後o個題吹水題，相同o既point，另一個例子，今次唔會唔合格o掛？
放學中化oral，我、挺、龜、Vincent都同意「學校可勸喻頑劣學生離校」，冇人有唔同立場的確有o的悶，我引西遊記舉例，Mrs Kam話我比上次好o左，唔通仲會退步咩？
做完oral落cover繼續留堂，不過今日好唔專心，一時搭檯傾drama set，不過講是非居多，大部分時間都o係中史千字文面前發夢，今日完全不在狀態嘛，轉數係慢o架喇。
SAYS有singing context，撞o岩o個日去米埔睇雀，我心思思想參加o架，不過魚與熊掌似乎前者難得o的。
發覺6A某人唔戴眼鏡有o的似蔡康年……………

P.S.唔知點解我張contact list冇哂所有人，再麻煩各位o係ICQ add番我。

>>March 29, 2004 at 3:14:42 PM GMT+8