2003 年 12 月 16 日 星期二 【晴】

都係還原基本步好o的，的確係。
Triple Buss做埋最後幾個Essay Plan Presentation，o的Past Paper亂哂呀，有排執！最後o個堂自修，同Billy、牛榮講西鐵，原來佢o地唔知南昌站o係邊，總之就勁隔涉，勁唔方便啦，都話唔好搭西鐵咯！
History講考試範圍，仲未教哂(其實o的o野我o地一早知)，兩條短DBQ + 六條揀兩條essay呀，每條45分鐘內做完？Miss Leung似乎太睇得起我o地喇！7個topic出6條essay，邊個topic冇essay出？我估French Second Empire唔夠料出，貼唔中唔好怪我！
中化寫實用文，吸取o尋日o既教訓，題目叫我寫我先寫，一隻字都唔寫多，一堂多o的就做完，預時間繼續趕三條Buss Case Study同兩條Essay，星期五要死哂呀！
Lunch有個科蘭o係課室出現，不過真正o既科蘭型得多！
PE踢番波喇，僵局，濕九同林挺兩個符碌o既入球贏波(濕九o個球係我o係禁區放超級長炮助攻o架)，對面冇乜有威脅o既埋門，不過我有兩次明顯判斷錯誤呀，希望呢o的o野唔好o係星期六出現啦，瘀皮o架！
Class Period由Miss井代課(Miss Fung入hall)，同Billy、肥龜、牛榮諗考試打氣口號，我諗到好多o架，「偷懶膚淺，吞pok naive」、「偷懶好容易，發奮先至要更大o既勇氣」、「o的考試期間上街打機o既人其實係俾人誤導o架」、「XXX溫書！XXX溫書！」、「如果科科唔合格都唔能夠令你改變主意，你要差到乜o野地步你先會聽？」，不過全部冇出街，得啖笑。
放學去JPC補簽義工記錄簿，明哥唔o係度，不過o個個人信得過我，幫我簽，仲有47個鐘。

P.S.頭先《衝上雲霄》講Belle太掛住Vincent，活o係Vincent仲在生o既幻想世界，爭o的返唔到轉頭，其實每個人都應該會有自己幻想o既世界，當然我都唔例外，獨處o個陣點幻想都唔緊要啦，不過要分清楚自己身處邊個世界呀，唔係會勁瘀o架！

>>December 17, 2003 at 2:57:30 PM GMT+8

2003 年 12 月 15 日 星期一 【微冷】

調整過都係唔得，都係還原基本步好o的？
一返入課室，勁香豬腸粉味，好耐冇食過喇！
陳友o係Morning Assembly講考試細節，我get到o既重點係：考試進行期間唔好擰轉頭望壁報板o既model answer！
Triple History做Miss Leung話比上次淺少少o既DBQ，係就係淺o的，不過都做o左好耐，而未完全做哂就要交！考試要做40分加長版DBQ + 兩條essay呀，三粒鐘內做完，以我咁o既寫字速度……危！
Triple UE唔使聽5 + 1講廢話，因為要做Section C，跟足考試模式o個隻，個半鐘做完。好似冇乜態咁，做做下都可以搵周公(好彩最後約唔到)，勉強臨收卷前做完，繼續沉淪走唔甩！
中化對實用文，我同肥龜都俾參考範文誤導，寫o左成段無謂o野，Miss Fung即刻打個唔合格俾我o地，救命…
中史又俾肥峰搞到笑到收唔到聲，開始有人歧我o地喇。我懷疑裝宗教史個file係咪唔見o左，係就大檸樂！
放學再傾Christmas Party，李綺蘭搵我整菠蘿腸仔，好o既。之後再出西九龍行三聯，呢個聖誕使o左我唔少錢，不過每個仙都使得值！

Re Cafu:冇話好唔好食o既，都OK啦，不過main point係要食120粒…

>>December 16, 2003 at 2:38:30 PM GMT+8

2003 年 12 月 14 日 星期日 【颳風】

History互改DBQ，o的point好似夠又好似唔夠，其實第二題我仲諗到多o的o野寫o架，Miss Leung話呢篇算係比較難，所以唔使太擔心今次做得唔好，不過我係好擔心o架！
Buss繼續Essay Plan Presentation，到Alison講o個陣李sir突然同我o地講道理，話我o地唔係入硬U，加上比起之前幾年，我o地係仲需要更多進步，不過佢話有三分二同學都算跟得上，我諗…我冇可能唔係o個三分一！老實我依家係開始驚自己唔好講中大政政系，甚至連U都入唔到o架，我根本有好多都未跟得上，唔到我唔驚！
Lunch去維園食，行經報紙檔見到今期Exam已經出o左，我梗係買啦，而我又一早帶埋最新一期進攻足球返學喎，結果我今日犯o左兩條相同o既校規，不過當然啦，o係6A係唔會被叉！
中化……派測驗卷，勁低分，逃唔過大懲罰o既厄運(依家唔一定齋吞燒賣，好似仲有Pizza同意粉)。不過明明話最低分o個三個都要食，點解因為有好多個尾三最低分就唔使食，就要最低o個兩個頂哂？咁即係好多人同時拎最低分就可以唔使玩啦，呢個係乜o野道理？

Re Kaka:你講你自己？

P.S.施丹今年做過乜？咁都贏到2003世界足球先生？亨利輸得好唔抵，不過我心目中今年只有尼維特有資格贏。

>>December 15, 2003 at 3:11:53 PM GMT+8

2003 年 12 月 13 日 星期六 【乍暖還寒】

平時去開飲茶o既「豪X」內部裝修暫停營業，裝乜鬼修o丫？最後咪又係連招牌都裝修埋，唔叫「X華」o架啦！搵其他酒樓，不過間間都爆哂棚，最後去o左保安道市政大樓頂樓o的大排檔食，雞扎好大隻。行到順寧道永隆街口o個陣，前面個男人突然閃開，有個四五歲，到我條腰o既細路，唔知係扮超人定扮泰臣咁一個右直拳飛埋o黎，好彩我身手敏捷，避開o左。扮超人好，扮泰臣都好，唔好o係街扮啦，你咁o既身高出右直拳害死好多人o架！
今日睇o左《無間道2》DVD，緊張刺激，好睇。我依家隨時可以去睇《終極無間》喇，千祈唔好唔記得我喎！

P.S.諗住侯賽因一係俾美軍殺死一係永遠人間蒸發，點知最後係被生擒收場，有段歌詞幾o岩佢。

被你無情出賣　由細個到大　就算再偉大　仍恨你太像猶大

>>December 14, 2003 at 1:43:43 PM GMT+8

2003 年 12 月 12 日 星期五 【乍雨乍晴】

凍到黐肺，唔想一起身就做功課，不過再坐o係屋企一定凍死，所以決定出去跑步暖身。上面打邊爐(勁厚，因為想出多o的汗)，下面食涼粉(波褲 + 船襪 + 白飯魚)去以前小學對面o既李鄭屋球場跑圈，諗住跑15個圈(3500米左右)，球場有班同我差唔多o既踢波，腳痕痕添。跑跑下佢o地個波碌o左去場邊，我忍唔到喇，左腳後腳控停，轉身右腳腳內檔直扯遠柱(留意：當時我o係大概對住禁區線o既邊線)，死角，我都估到自己咁都射得出。
跑完15個圈企o係看台底抖抖，頭先班人問我踢唔踢。好喎，難得有得踢，唔識都冇所謂啦。踢o左一陣(我冇守龍門)，冇氣喇，之前跑步用哂o的力，唔踢喇。大家好o岩傾，原來佢o地讀張明添o架，仲留埋ICQ添！唔熟又點o者？玩玩下咪熟囉！

2003年Eric好歌流行榜(第50週)：
1)落地開花(盧巧音)
2)信望愛(梁漢文)
3)放生(關心妍)
4)出賣(容祖兒)
5)東涌日和(Shine)
6)今年沒聖誕(許志安)new
7)孤單公園(張敬軒)new
8)痛由自取(鄭希怡)
9)小星星(楊千嬅)
10)終生學習(鄭融)new

>>December 13, 2003 at 2:42:47 PM GMT+8

2003 年 12 月 11 日 星期四 【颳風】

今日Speech Day，淨係上頭三堂，理論上應該好正好過癮……當然係理論上啦，好戲在後頭。
朝早返學撞見Ip Ming，講是講非，嗯，「以主觀思想反映客觀事實」，同意！
o尋日聽Lim Sir講英文，今日見佢打呔，勁型呀。中史終於教哂考試範圍喇，下禮拜又要test喇…
5 + 1又勁講道理，我同肥龜，仲有成個最後排都o係度等夠鐘，等放學後o既Happy Hour。
我梗係想啦，之前總算約過下人唱K嘛，不過呢邊又唔識，o個邊又唔熟，呢邊又唔得，o個又唔得，咪唯有全人類happy，我一支公lonely囉，冇所謂o既，鬼叫呢間荃官唔再係以前o既荃官咩？依家好似我係唔知o係邊度空降落o黎o既外校生，無謂人一個！或者有人講得o岩，唔係個個都適合返原校！
好，發洩完，冇事。
o係荃灣四圍蕩，行完千色店再hea愉景，其他人全部有哂節目，當然搵唔到人啦。去自修室打發時間囉，做practical skills，做淨task 1，唔知題目要我寫乜，做哂task 2 & 3就去食飯。
食完返學校，1255，當然一個人都冇啦，o係課室攤抖。之後Billy、陳江、思穎、肥峰一個個返，有dee鋤！陳江千年道行一朝衰，俾人雙炒，難得6A咁多prefect都冇俾人叉，課室o係正Prefect Room隔離，不過從來唔會有人prefect入o黎，一早話最危險o既地方係最安全啦！
1400點完名入hall喇，唔知邊個揀坐upper最前排，o的嘉賓睇到哂我o地做乜！o係hall坐足成粒鐘先正式開始，奏完走音「國」歌係校長演講，校長o既水準差o左好多，成個講錯字！頒獎，F.5 & 7每班都派代表拎cert，5B代表……陳樹寧？？？？？？？？？？明明5B今年有7個入得番，點解搵個9A代我o地拎，唔係有人以為5B冇人返到o掛？？？？？？之後係guest青年事務委員會主席蔡元雲演講，佢本來話講15分鐘o架，最後講講講，一時講「溫渣包(溫家寶)」，一時講謝婉雯，一時又講Shaq同姚明，雖然同場好多笑位，但係最後講o左超過30分鐘！見到5 + 1聽聽下o係度釣魚，佢終於感受到我o地o既苦況喇！西樂團、中樂團(殺雞唔係o係廖寶珊o既咩？點解我會見到佢打鼓？) + 肉丸最「心儀(怡)」o既舞蹈表演完埋，成1720先解散。
未走得，李綺蘭搵o左我放學開班會傾Christmas Party玩乜，會議結果，機密！唯有可以透露o既係會好精彩！
返到屋企，扭開電視，歐聯16強抽o左籤喇，以前係分組賽，依家縮短為淘汰賽，賽事更加刺激！
拜仁慕尼黑(德國)對皇家馬德里(西班牙)：唔會有人認為呢個唔係16強最矚目o既對戰，皇馬拜仁5年內第4度碰頭，拜仁千辛萬苦先壓過些路迪出線，不過話哂都係大賽球隊，簡尼爛船仲有三斤釘，相信皇馬6條A要使出九牛二虎之力先可以過關。
切爾達(西班牙)對阿仙奴(英格蘭)：切爾達一直被遺忘，其實呢支西班牙中型班防守力極強，阿仙奴最後奇蹟出線，亨利完全主宰球隊成敗，加上球隊從未o係歐洲賽證明自己，切爾達絕對有力一戰。
拉科魯尼亞(西班牙)對祖雲達斯(意大利)：拉科實力唔差，不過太依賴彭迪安尼，祖記攻守平均，過關唔難。
莫斯科火車頭(俄羅斯)對摩納哥(法國)：場波二月先打，到時俄羅斯聯賽已經歇o左冬好耐，火車頭球員o既狀態好成疑問，除o左冰天雪地o既主場，火車頭冇任何優勢，淘汰o左國米已經交到功課啦，仲想點先？
波圖(葡萄牙)對曼聯(英格蘭)：理論上曼聯只要唔輕敵，加上冇嚴重o既傷兵問題，波圖好難爆冷。
布拉格斯巴達(捷克)對AC米蘭(意大利)：獅子撲兔，通常東歐球隊入到第二階段就行人至步，而A米又開始上力，冇使打。
皇家蘇斯達(西班牙)對里昂(法國)：里昂可以壓倒拜仁些路迪，絕對有料到，皇蘇冇後備，又要兼聯賽護級，里昂啦。
史特加(德國)對車路士(英格蘭)：一隊多新星，一隊多球星，車路士始終未搵到合拍o既雙箭頭，史特加i既銅牆鐵壁唔係講笑，呢個組合會打得難分難解。

>>December 12, 2003 at 4:18:57 PM GMT+8

2003 年 12 月 10 日 星期三 【颳風】

張床太暖太舒服喇，勁遲先知醒！
今日第一次測中化，全人類都狂刨書。
History做BDQ，好似做得幾快，頭兩題一共8分加少少第三題20分鐘就做完！
UE listening又好唔掂呀，好多都聽唔到，繼續沉淪，繼續o係無間地獄掙扎，永不超生。
空堂主力溫書，加插同肥峰講事講非兼改編歌詞，俾楊晴旭聽到添！
中史o係1B上，Gyokery用o左o黎做oral，終於聽到Lim Sir講完整o既英文喇(以前聽得多佢講英文不過都係單字wording, conclusion, customer-oriented, Cambodia..........)。祆教、摩尼教呢o的細o野好似仲易過佛道喎。
Lunch邊o係課室食邊溫中化，不過都唔係好識應該點溫。原來溫莉琪佢o地搞緊個「鬥低分大賽」，最低分o既會俾其他人一人請食一樣o野，所以越多人參加就越慘！臨打鐘前佢搵我，我猶豫o左一陣就決定參實，有信心唔使食！
Buss雖然有講essay，不過我o地已經冇乜心機聽，掛住傾o的大懲罰，最後好似劃一全人類都係請食樓下維他1包10粒o既燒賣，即係話輸o左o既要食250粒！依家o既奪標大熱係肥峰(封盤)、我(1.5倍)同陳江(2倍)，希望一係大熱勝出一係爆大冷啦！未諗好節目名，之前有個「紀律精英怒雪狂奔」，我即刻諗到「中化精英燒賣狂吞」，全班第一時間笑到反檯(冇笑o既請報上名來)！最後最抵死都係o係白板寫「Miss Fung特約：中化精英燒賣狂吞　11/12強勢推出　6A領銜主演」，李sir唔多明，之後o既Miss Fung都唔明！
中化test開波喇，o車，純吹水o既？早知唔使狂刨啦，都使點講書o的理論！兩題一共吹o左兩版幾紙，留意係用中史寫o架喎，會唔會太少？我驚我要食呀，會唔會有日報紙頭版係「預科生狂吞250燒賣暴斃」o架？
o係屋企樓下突然吹o左陣強風，我感受到乜o野叫寒氣喇，冬天到喇。

P.S.今晚「香港熱鬧」一定好精彩，食力簡大戰何秀蘭為首o既女權分子！

>>December 11, 2003 at 2:14:13 PM GMT+8

2003 年 12 月 9 日 星期二 【晴】

有得做又做唔到，想做就冇得做。
Miss Fung俾中化功課我o地X'mas做，又提我o地聽日測驗，救命，依家仲係一o的都唔明！
History連續第N堂睇條文，Expanded Version of Triple Alliance好難明，只係feel到德國好驚死，周圍搵救兵。終於有DBQ做喇，條條至少5分，仲有題10分，即係寫mini essay！
Buss要report番各自負責o既essay plan，我第一個出o黎，講2002關於full-time & part-time題目，o的point都OK，不過李sir好似話我part b未仔細咁分得清楚，不過寫得出完整o既essay plan已經好好喇！
UE繼續係爆肚時間，我頂唔住去o左釣魚，5 + 1講乜我聽唔到！
Lunch後唔使上堂，入hall睇Speech Day Full Rehearsal，坐upper又迫又悶爆，睇住陳友一身兼四職笑爆咀！其實我全場都同肥峰、肥龜同陳江勁嗲，甚麼肉丸最「心儀(怡)」o既跳舞環節懶得睇。
放學本來ADT要on duty，不過o個度冇人到，最後冇去，走人。

P.S.我禮拜五99%去唔到Regular Meeting呀，我始終都唔明點兩個星期一次都算密！

>>December 10, 2003 at 3:22:39 PM GMT+8

2003 年 12 月 8 日 星期一 【晴】

氣氛問題？環境問題？定係人o既問題？
Triple Buss講case study，要肥峰叫醒我添，不過我答到o架！
History繼續講條文內容，Triple Alliance好毒呀根本唔係我o地以前所諗得咁defensive，擺明要打！
中化講新聞稿，發夢位。要做短題目，講校慶音樂會，肥龜勁過癮，「為慶祝香港中學建校十周年，該日前舉行校慶音樂會，應邀出席的嘉賓包括董建華、Twins、碧咸、布殊、拉登、侯賽因、希特拉、毛澤東、孫中山、諸葛亮、秦始皇…」，抵俾A*佢啦！
吳哥哥同Miss井去o左帶隊玩校際陸運會，冇得上PE。我把握時間做中史essay(講玄奘｜義淨西行求經o既經過同對中西文化交流o既影響)，聽日交喇，做做下寫字樓趕人落library，點知仲有成村人偷雞唔落！早知我都stay啦，唔知點解我o係library反而集中唔到精神！
Class Period睇電視，講甚麼中共架構。之後分組討論匯報，第一題好有爭議性！肥峰講錯Alison個名，黃凱芹？
放學社際男籃決賽對Camphor，了能同梁景威兩個正選遲遲都未到，因為佢o地去o左陸運會，點解兩個會撞期o架？Sports Ass搞乜？好彩臨開波前總算齊人，決戰！
Plum主要策略係以梁景威o既速度人盯人貼身「服侍」利家義，其餘四個o係三秒區四隻角位打聯防，進攻方面就盡量拖慢節奏，打多o的內線迫Camphor翁子建好快就要落bench。不過梁景威成日不自覺咁走落罰球線打三二聯防，完全倖唔到壓力Camphor，三個高佬又懶得頂位，勁俾人搶進攻籃板，如果唔係了能o係左邊中遠距離著哂火，可能Plum唔會拉成均勢，情況唔妥即叫暫停。Timeout之後換後衛組合，牛奶仔key波、8號仔(我竟然唔記得英雄個名)守利家義，呢個調動即刻令Plum掌握進攻節奏，而搶籃板都主動o左。最精彩都係8號仔將利家義徹底凍結，連波都唔俾佢接，令佢上半場好似交出0 FG，再加上Camphor內線俾唔到壓力我o地，結果上半場o係調動得宜之下Plum以26比17領先。
下半場用番o的正選打，Camphor突然o既高潮一度將分數追貼至3分之差，其實都係因為梁景威又冇跟貼利家義，o的高佬又成枝竹咁棟o係度唔頂位，勁輸進攻籃板。Timeout後又放番8號仔入o黎，不過就繼續用梁景威打三後衛陣式，一個跟利家義、一個跟濕九。了能又著火，8號仔出乎意料咁o係進攻都交到功課，時間越o黎越少，Camphor越打越急，我o地擺齊番三個高佬落場控制籃板兼將進攻拉到最慢，結果Plum順利帶番終點，53比41贏波！聖誕Plum總算o係細頂開齋，戰術取勝！

>>December 9, 2003 at 3:37:47 PM GMT+8

2003 年 12 月 7 日 星期日 【晴】

雖然天氣又轉涼，但係o的病痛應該已經走得七七八八喇，咁都好o的！
Tirple History先幫Dual Alliance埋尾，再花淨番o個兩堂有多分組dicuss之前從未掂過o既Second Dreikaiserbund(1881)，Article 3好深，睇極都唔明點解會拉埋Turkey落水，呢個Alliance好無聊囉。
小息問肥龜借《Milk》睇(其實本o野應該係小妹)，呢期有歐洲國家盃決賽週抽籤形勢分析，不過未免太高估意大利而低估o左丹麥同瑞典喇，有句最可圈可點：「拉脫維亞應該最鍾意呢個抽籤結果。」
Triple UE一o的去hall綵排Speech Day，一o的晨早去o左大會堂睇投年宵o既結果，最後得20丁人上。Dictation by Heart少少出術過關，之後派番Practical Skills，5 + 1又話我o地犯埋o的白痴mistake，你想話乜咪乜囉。佢又講o左一輪道理，今次我又幾buy佢喎，至少認同啦。
Lunch同好耐冇一齊食o既魚去愉景，o的雞未煮熟。中化派番個幾月前o既參觀報告，僅僅合格！
今日中史第一次測交通史，測張騫同班超，得兩堂Lim Sir照教一陣書，我冇乜點聽。最後o個堂先開始測，加多放學後10分鐘，張騫o既貢獻同班超o既經過就超熟，掉番轉就寫唔出o的乜，總算嘔到三版紙。
放學再去千色店行，真正要自己燒銀紙喇，本來諗住好似上次咁行埋西九龍，不過最後唔使喇，多謝Candy、Polly同蝦o既寶貴意見！

Re聰：o的錢係我娘親o架，睇完一定借俾你。
Re Kaka:我唔否認佢係世界最佳新星，重點係你不嬲都捧李華度嘛，依家佢失寵你就貪新忘舊。

P.S.呢個世界真係多人渣敗類～

>>December 8, 2003 at 3:19:12 PM GMT+8