2003 年 10 月 6 日 星期一 【晴】

課室冷氣o尋開始已經壞o左，今日返到去都仲未有人o黎整，結果全日我o地都冇得o係課室嘆冷氣。頭三堂BS已經覺得焗到黐肺，課室出面仲涼過入面，兩次break都同Billy出去「乘涼」！
之後上中化，要寫實用文，以旅行社公關經理o既名義寫公函去消委會，反駁團友對行程o既投訴。簡單o的講就係要「禮橫折曲」、顛倒是非，好明顯絕對唔係我呢o的「正義之士」o既強項，諗好耐、寫好耐先搞得掂。
放學第二次社際乒乓球選拔，結果…冇人到！有冇搞錯？依家好似淨係選o左兩男一女喳喎，社長你執手尾，佢o地唔o黎我冇辦法！
足球校隊星期六就會打第一場波，潘政賢佢o地放學入Store Room拎自己想要校隊波衫返屋企洗，其他人著白衫，我決定著另一款橙衫當係龍門衫。我比較鍾意短袖龍門衫，貪佢夠爽之餘，亦夠野性，o岩哂我o既風格！我冇預學校會有33號(我依家勁鍾意o既號碼)俾我，我改摷16號(巴夫斯o係法國國家隊著16號)，不過竟然摷o黎摷去都係搵唔到！想要14號(侯活)，鄭立初一早要o左，依家未決定著幾多號！咪住先，點解連1號都冇o既？

Re魚：此話當真？

>>October 7, 2003 at 1:55:16 PM GMT+8

2003 年 10 月 5 日 星期日 【晴】

上History最大o既特色係你永遠唔知呢次會o係邊度上，平時Day 5 Triple係Library，不過今日o個度有人用緊，又冇其他空房，結果去o左個發夢都想像唔到o既地方上，就係DT房！都係o係o個度一堂o者，因為我o地之後會玩role play，我o地o個堂用o黎做Rehersal。之後第二堂上3A，正式「演出」，我o地o個組派林敏，另一組就係Polly。兩組唯一o既共同點係…搞笑！我o地有阿魚、佢o地有小妹，全世界都笑到人仰馬翻！
放學要做社際乒乓波選拔，比起隔離都做緊選拔o既Bamboo，Plum少人得多，我o地要揀三男三女出賽，o黎選拔o既…得四男一女，人o地揀勁人，我o地只可以踢廢人走！聽講聽日又要再選過，希望多o的有實力o既人o黎啦！

Re聰：係o掛，我都好似高o左少少…
Re Candy:唔緊要啦，記得下次預埋我囉。我Swimming Gala會盡力o架喇，做到最好！《自由行》都唔錯o既，不過我都係鍾意《咬唇》同《飛女正傳》多o的。
Re無聊人：係玩都玩其他o野啦，你當我白痴？
Re Cafu: 我BS都完全迷失哂，點算？好遺憾，我冇辦法查到邊個咁無聊。

P.S.恭喜Fan同Lo大比數勝出裘錦秋SU選舉！

>>October 6, 2003 at 2:41:05 PM GMT+8

2003 年 10 月 3 日 星期五 【晴】

基於一個溝通上o既問題，有人朝早去o左睇我超想睇o既《無間道2》，冇預我！
晏晝同聰、Fan去青衣泳池游水，呢個池我五日後o既Swimming Gala又要再o黎，今日先熟習下。開始掌握到成段50米蛙式o既節奏，希望可以幫到我同小B keep住九條街o既距離啦！
游o左兩粒鐘就上水，陪聰去工廠大廈o個o的「玩具大平賣」，不過唔知係咪因為太遲去，佢想要o既貨已經冇哂，所以我o地打o左兩個round，hea唔夠10分鐘就走人。
我o地好肚餓，所以齊齊返荃灣吉野家食tea，最精彩o既事發生o係食完走人o個陣，聰高得滯、又一時唔留神，個頭撞o左落樓梯個天花度！聰，唔好mind我爆你瘀o野喎！

2003年Eric好歌流行榜(第40週)：
1)獻世(陳小春)
2)兩個人的幸運(梁詠琪)
3)好心好報(方力申)
4)一步一生(許志安)
5)死性不改(Boy'Z)
6)錯愛的呼喚(郭富城)
7)不是校花(Kary @ Mini Cookies)new
8)透視(莫文蔚)
9)傻大哥(鄭中基)new
10)我不會唱歌(李克勤)new

Re Candy:我o地就齊齊入U，等佢冇聲出！
Re Fan: 我諗我已經答o左你～
Re邪：佢點惹你？不過算啦，我o地大人有大量，唔會同佢計o既！
Re Cafu: 當然！佢要睇死我，我偏係唔要俾佢睇死！

>>October 4, 2003 at 3:22:41 PM GMT+8

2003 年 10 月 2 日 星期四 【晴】

簡直忍無可忍，踩人唔使踩到咁盡！死人5 + 1，平時講廢話，我咪唔聽囉，今日佢無端端彈o左句「o個o的唔夠19分o既，都唔知點解你o地返o黎。俾你揀你寧願去其他學校，定係留低，不過冇JUPAS offer喇？o係荃官，冇19分唔使旨意入U，唔夠分照返o個o的正戇居！」當然佢係用英文講，我嘗試原文翻譯。我好記得佢最後兩三句係望住我o黎講o架，如果我唔好脾氣，我一早拍檯起身爆粗鬧佢喇！阿伯，當初你又同我老豆講「最好都係原校，免得過都唔好走」？唔夠19分又點o者？你話出去讀就有U入，返o黎就冇U入？你即係睇死我唔得啦！我就揀第三個選擇，o係度hea多兩年之後入U！死老o野，記住甩頭髮好喇，千祈唔好甩牙，你棚牙係留番俾我兩年後剝o架！
發夠脾氣喇，受完氣之後上History堂，今日氣氛好番好多，分兩組做discussion，幫o的歷史人物改個靚o的o既中文譯名，例如Victor Emmanuel = 維他義賣奶！笑到我o地全檯人趴低！
Lunch要環保教育組on-duty收廢紙，唔知邊班個箱竟然係用粉筆裝飾，搞到條褲中哂招！
放學本來朱基搵o左我幫手劈友………應該係劈啦啦隊o的竹，搞到我要o係課室呆等到1600，佢先透過「某副社長」o既手機話唔使我喎，早講啦，我要幫Plum做其他o野o架！T朗拿度搵o左我同班F.5踢波，即刻撲出沙咀道join佢o地，之後連淫漢同鄭堅鋒都o黎埋，我依家先知淫漢都係裘錦秋o架，而鄭堅鋒好似係圓玄一中。原來已經好耐冇試過著住校服踢波，幾有意義，可以乘機觀察Plum球員o既表現。我打o左幾場都保持清白之身，仲prove到自己的確大隻o左，同人夠撞，冇人同我爭正選龍門！
講防守力，Plum簡直係無敵，楊肇年 + 潘政賢 = 唔失波o既保證，我o係球場最多都係閒角。不過因為佢o地太勁、太屈機喇，超輕佻，成日o係後半場玩橫傳(仲要係短o個隻)，呢o的一定要戒，如果唔係遲早玩出火！Plum最大問題始終係攻力薄弱，冇乜板斧，我再花多o的心思呢個問題上。經過今日，我o既腹稿社隊陣容會有少少位置上o既調整，我仍然有十足信心Plum可以衛冕！乜o野利家義(Camphor)、鄭立初(Pine)、張浩勤(Bamboo)？不足為患！

Re Cafu:我都一樣…

P.S.為港隊代表張耀麟o既離去而默哀…

>>October 3, 2003 at 11:57:02 AM GMT+8

2003 年 10 月 1 日 星期三 【晴】

呢日好冇精神，Lunch之後撞正最鍾意o既History堂，都…捱唔住，趴低。全班18人，個個都好似死哂咁，完全冇反應，我feel到Miss Leung又有o的黑口黑面，Sorry呀！
放學，又係例牌唔願走住，留o係課室玩，同小妹、龜龜同牛榮玩網球…的確好無聊。有兩個人非常唔知「死」字點寫咁玩人，擺明博打！
中六文科o既特色係…不斷寫Essay，之前有中史同BS，依家…最精彩o既History，連理解條題目(What were the main obstacles to the development of liberalism in Europe during the period 1815-1848? Give example.)問乜都已經花o左好多時間，足足寫o左3粒幾鐘，嘔5版紙出o黎！救命…

Re聰：噢，悲哀…

>>October 2, 2003 at 3:05:06 PM GMT+8

2003 年 9 月 30 日 星期二 【晴】

今日係中華人民共和國建國54週年，老實講我對呢日冇乜感覺，呢個「某某政權建立週年紀念」，關國家咩事？我寧願慶祝9日後o既「辛亥革命92週年紀念」！呢日唯一俾到我o既係一日假期！
o尋晚拜仁和波、皇蘇贏埋，三關斷o左兩關，o個$10去o左鋪草皮！
5 + 1份死人Listeing Report，要聽英文電台o既節目，我揀o左個時事清談節目，聽足三之先寫得成份Report！之後份BS Essay，救命，唔知題目想問乜，唔識寫！

Re聰：阿仙奴 + 紐卡素 = 大量壞孩子。我估最初你情我願o既係艾殊利高爾，之後夾硬o黎o個o的係戴亞(呢個經典)、贊拿斯、比拿美、保耶、活基治、班納、巴布爾同艾美奧比。
Re對號入座之人：一切責任請向當事人追究！
Re Cafu:保良局同公益金都係慈善機構，點解唔協調下，籌多o的錢？我o個條2000年Past Paper Case Study第9題。
Re邪：哈，擺明搶錢！

>>October 1, 2003 at 1:34:40 PM GMT+8

2003 年 9 月 29 日 星期一 【清涼】

請留意，以下內容已得當事人特許報導，一切責任請向當事人追究！

今日的確好熱，o係課室以外o既地方著外套o既一定係唔正常／有苦衷！
一年一度o既便服日，我梗捧場啦，我揀著阿聰送俾我o個件英格蘭T恤(因為冇乜其他衫好著)。入到班房，窗口數過去第三行第四個位…嗯，唔錯唔錯！果然合拍！
原來今日超多人著波衫，曼聯、利物浦(黑仔唔係有件7號基維爾o既咩)、皇馬施丹、紐卡素活基治、曼聯碧咸(已成過去)，好多好多，早知我著英格蘭8號史高斯啦(其實我根本冇)！
正所謂「吃得鹹魚抵得渴」，你估著o左外套o的人就會唔知咩？遮唔到o架，咁仲「無私顯見私」！
BS堂李sir派番o的Case Study俾我o地，佢話我仲未扣得緊個situation，我要improve下喇，雖然好難，完全唔明條Essay問乜，都唔知點死！
放學，約o左Lo交換diary，不過…唔好意思，超長時間做o左電燈膽添！我都話我冇講錯啦！"no uniform, after scholl, everything can happen"
睇報紙，一單牽涉8個英超球員o既醜聞，好多人都估佢o地係邊個(其實我都大概有o的頭緒)。事實上英超太多年輕球星喇，年紀輕輕就名成利就，稍為唔潔身自愛就會行差踏錯。

Re蚊：你o的同學幾好喎，或者可以聯絡下o架！
Re Cafu:我o個個係「小組討論」o既題目，「個人短講」o的題目我都超唔掂！

P.S.搵老豆幫我落注買馬會波，贏o左係拎得番o的本，完全冇肉食。所以我今日第一次搵牛榮幫我落o左條莫斯科斯巴達和阿仙奴 X 拜仁慕尼黑贏安德列治 X 加拉塔沙雷和皇家蘇斯達o既過關飛，有20倍分頭o架！如果買埋三串七仲和味！

>>September 30, 2003 at 2:36:34 PM GMT+8

2003 年 9 月 28 日 星期日 【晴】

空歡喜一場…
上BS堂o個陣李sir話lunch前o個堂會走火警，lunch前o個堂咪係UE？太好喇！不過唔知5 + 1係咪真係撞聾，打o左鐘佢都繼續o係度同我o地對答案，對完仲叫我o地turn to next page，要我o地提佢佢先知打o左鐘。大佬，如果真係火燭o既話我o地一早燒死哂啦，明知自己撞聾當初就唔好翻閹！
Lunch之後，唉…測中史！o尋日已經狂煲，不過煲完即刻蒸發哂，個腦一片空白！測驗o係死寂同恐怖o既氣氛下進行，兩題揀一題，我揀答「試綜述史漢兩書之體例，並解釋兩者在歷史觀和史學思想上的分別。」唔係我o的字太細定係我真係冇o野寫，我狂吹水都寫唔夠兩版紙，想唔肥都難啦！
放學要做中化說話訓練，本來我揀有Regular Meeting o個兩日去o架，最衰其中一日一早full哂！同Billy、思穎、肥峰同陳江做小組討論，題目…「男女之間的友情和愛情有何分別？」我水準好似幾唔錯咁，都諗到好多point。例如…
友情可以由好多人分享，朋友越多越好，不過愛情永遠只可以有兩個人，愛人一個就夠。
愛情o既層次比較高，通常情侶係以朋友為基礎慢慢發展，但係當一段愛情完結之後，通常都好難還原番做友情。
朋友之間可以有好多o野講，無所不談，要講幾耐有幾耐；面對你鍾意o既人，一樣會諗到好多話題，但係就永遠講唔出口。
其實仲有好多好多point o架…

>>September 29, 2003 at 12:56:56 PM GMT+8

2003 年 9 月 26 日 星期五 【清涼】

今日係中大開放日，同Lo、Fan、兩個社長(一正一副)一齊去。首先去最近火車站，唔使搭校巴o既文學院同社會科學院，即刻埋去最有興趣o既政治與行政學系(政政系)個攤位了解了解。原來比起新聞及傳播系，「政政系」o既requirement都唔算好高，社會科學院咁多系，呢個最鍾意！跟住再過隔離o既文學院睇下，其實都係純粹為o左歷史系。本來有個《我們的文學院》o既video，不過冇人想睇，所以我唯有同佢o地一齊上o左理學院先。
中大中大，超大超大，去理學院要落番火車站搭校巴。上到平時o係電視成日見到o既林蔭大道，o的完全唔關我事o既乜o野Bio-Chemistry、Statistics、Environmental Science攤位擺哂o係度，又勁多人喎，話咁快o的人就兩個兩個咁唔見哂，結果就o係o個度乾蒸咁等佢o地唔知幾時再出現。佢o地返哂o黎，原來話去隔離個邵逸夫堂聽BBA talk，中大BBA出哂名，聽下都好o丫。個講師勁搞笑，話「沙田商學院」o既水準冠絕全港，「薄扶林大學」同「清水灣商學院」都唔係佢o個皮喎！
BBA都完埋，仲唔到我去聽政政系？o下？原來全世界去哂自己要去o既地方，走o架喇？點解之前冇人同我講過o既？我一個都未去，淨係陪曬太陽喳喎！
冇計啦，我唯有一支公搭校巴落謝昭杰室聽政政系個talk囉！我o個場係第二場，坐爆哂，我o地先睇介紹政政系o既video，之後再有負責唔同範疇(政政系大致上可以分成五大部份)o既講師further explain，到o左Q & A環節，主持黃偉豪助理教授講o野勁生鬼，笑到我o地趴哂地！經過呢個talk，我相信自己的確係好有興趣，好有熱誠去讀政政系，我決定以呢個為我o既目標！
聽完talk，諗住過Canteen搵廁所，又咁o岩撞到Candy佢o地一行五人！之後meet埋蚊同佢o既新同學食lunch，因為趕住上文學院聽歷史系talk，食食下就走。系主任簡朗基教授介紹呢個混合o左中外古今歷史o既歷史學系俾我o地聽，原來有勁多以前聽都未聽過o既範疇(古希臘及中國神話比較史、公眾歷史之定性及定量分析方法導論、內陸亞細亞文明、共產國之性別文學表述)，唔知點解聽完之後就冇以前咁想修歷史。
聽完talk又join番蚊o個group人，陪佢o地聽多次政政系o既talk，不過由周保松講師主持o既呢次就悶好多，我o地最後早走！已經1600打後，我o地o係水池附近行下，影下相，行到出火車站，呢次「中大一日遊」就完o左喇！
今日中大真係人山人海，撞見好多熟人，o係火車站有徐家樂(之後政政系talk又見到)、理學院離遠見到李天班人同Vincent，Canteen撞到Candy佢o地啦、上緊文學院又見番Vincent，仲多o左Kathy同大恩姐佢o地(社工系攤位又撞番)！
小弟暫定o既目標：中大政治及行政學系！

2003年Eric好歌流行榜(第39週)：
1)兩個人的幸運(梁詠琪)
2)一步一生(許志安)
3)錯愛的呼喚(郭富城)
4)獻世(陳小春)
5)遇見(孫燕姿)
6)好心好報(方力申)new
7)死性不改(Boy'Z)new
8)透視(莫文蔚)new
9)春泥(庚澄慶)new
10)假如愛有天意(谷祖琳)

Re蚊：唔係中化，唔係BS、唔係中史，當然更加冇可能係History啦！

>>September 27, 2003 at 4:28:35 PM GMT+8

2003 年 9 月 25 日 星期四 【晴】

今日B.S上Triple，兩堂之後有個break，我又好似平時咁同Billy「做我們愛做o既事」－去廁所飲水。落cover個男廁，突然發現o係男廁可以睇到Organization Structure裡面o既Matrix Structure！
我 + 子建 + 蝦 + Mina & B + Kuto + 死魚 = 全新o既食Lunch grouping，去濠江，不過我淨係掛住睇西班牙聯賽精華！
上PE堂，吳sir俾3個班主任詐型，所以我o地改流程，跑完樓梯踢完波先聽吳sir講耶穌。又係前5D決戰雜牌軍，雜牌軍雖然人腳超級唔整齊兼毫無隊型，不過都憑阿釗一個「符碌」頭搥打開記錄，之後5D大舉反撲，陳梓豪一個近門抽射、魚寶一個中楣罰球(其實我係有少少判斷出錯，個波突然o係我手底曲墜)爭o的收死我，最後力保勝局！話雖如此，雜牌軍其實問題多多，贏到只可以係好彩，如果有鰻魚o係度就會好好多！
放學o係課室留多陣先走，好熱鬧，大概get到點同莊姑娘相處，就係要夠癲！

Re挺：冇？「苦樂全在主觀的心，不在客觀的事」，之後又要狂抄《敬業與樂業》喎！
Re蚊：荃官一堂35分鐘，三堂加埋係1小時45分。

>>September 26, 2003 at 2:05:55 PM GMT+8