2003 年 12 月 6 日 星期六 【晴】

o尋晚睇曼聯對維啦睇到好夜，睇住科蘭一世夠運咁入多兩粒。本來諗住今朝晏o的先起身o架，點知娘親話今日西鐵南昌站開放日，幫阿姨拎o的甚麼紀念車飛，所以被迫0830起身。o係長沙灣MTR搭免費巴士出填海區，仲要排隊先入到車站。呢個轉車站太隔涉喇，又貴，唔使旨意我會搭西鐵，不過個站又幾大o既，又光猛，好地鐵格局。行行下撞見兩個巴士迷朋友加卡(即係以前曾經o係度留言，跟紅頂白o既李華度)同阿俊，佢o地一個住土瓜灣、一個住堅尼地城，不過都o黎襯熱鬧。
蕩足兩邊車站，1200就散喇，再join番娘親去西九龍買新衫，買o左四件，好阿巴莫域治，不過我o地燒銀紙行動未結束o架！再入CD舖買《無間道2》DVD，隨時得閒就有得睇，記得等我睇完先睇《無間道3》呀！

Re Candy:幫下人o者，不過下次都係多o的熟人好o的。

>>December 7, 2003 at 2:08:41 PM GMT+8

2003 年 12 月 5 日 星期五 【炎熱】

應承Candy今日幫仁濟醫院賣獎券，之前返學校睇下社隊練波，不過得李天、老麥同林偉昌準時到(記得好似約o左0900)。老麥明顯有針對弱點苦練過，而林偉昌會係球隊o既秘密武器，李天落埋場啦，我o地需要你……o既五次犯規(講笑喳)！
去JPC會所報到，咦？搵我o個個冇參加o架？有四個F.4女仔，佢o地話識我不過我真係唔識佢o地，仲有三個上葵o既男仔。o係仁濟set所謂counter之後，一pair pair拎住一疊20張o既獎券出去搵人買。初時我同個上葵人都係冇目標咁四圍行，不過後來鎖定主要獵物係小巴司機同35樓下o既本地女士，呢招果然奏效，o的飛一張一張咁賣出，最後兩張自己買埋，諗住返去拎過第二疊。嘩，原來有pair F.4齋企熊貓酒店出面o既燈位都賣到四疊，癲o架！第二疊我o地轉移陣地o係華都、荃豐o個邊商場同商場之間o既行人天橋賣，業績麻麻。諗住直掃去MTR大把人買啦，點知o個度已經有成村公公婆婆賣其他獎券，我o地根本冇位企，唯有食番老本行，繼續兜小巴司機生意，不過比上次差好遠。我o地都冇乜心力行落去，所以返去仁濟交差。我o地坐o係counter兜人買，當然佢o地多數踩係都傻。o的F.4好勁呀，頭先o個pair一共賣o左九大疊，佩服佩服！1245收檔喇，今次幾好o丫，吸收經驗，又識多o的F.4，不過下次都係多o的熟人好o的！
o尋晚FIFA幫各大洲o既2006德國世界盃外圍賽進行分組抽籤，香港o係亞洲區同中國、科威特、馬來西亞一組，盡力啦，結果唔重要！我又分析下最矚目o既歐洲區o既八組分組形勢先，每組首名同兩隊成績最好o既次名可以買定機票去德國，而其餘六隊次名要打附加賽爭三個位。

第一組：捷克　荷蘭　羅馬尼亞　芬蘭　馬其頓　阿美尼亞　安道爾
真係冤家路窄，捷克荷蘭連續第三次抽籤撞正，捷克實而不華，尼維特同真高拿仍然可以支撐大局，相反荷蘭永遠係「好睇唔好食」，如果荷蘭再搵唔到後防新兵同固定o既前鋒組合，應該會再次屈居捷克之後，而單靠捷禾同梅度o既羅馬尼亞仲未夠班。
出線心水：首名捷克　次名荷蘭

第二組：土耳其　丹麥　希臘　烏克蘭　格魯吉亞　阿爾巴尼亞　哈薩克
混亂o既一組，丹麥兩翼側擊煞食，球員實而不華，有力壓倒入唔到歐洲國家盃o既土耳其，希臘同烏克蘭唔係善男信女，亦唔可以輕視。哈薩克o係亞洲都冇地位，依家轉o黎歐洲更加唔使旨意佢o地會有乜成績。
出線心水：首名丹麥　次名土耳其

第三組：葡萄牙　俄羅斯　斯洛伐克　拉脫維亞　愛沙尼亞　列支敦士登　盧森堡
我始終覺得拉脫維亞淘汰土耳其係虛火，呢次會打回原形。葡萄牙「黃金一代」會淡出，而後起之秀未俾到人信心，打法機動攻力強勁o既俄羅斯甚至曾經兩次力迫英格蘭o既斯洛伐克都有機會偷雞。我反而有興趣列支敦士登同盧森堡兩隊歐洲魚腩邊隊廢o的。
出線心水：首名葡萄牙　次名俄羅斯

第四組：法國　愛爾蘭　瑞士　以色列　塞浦路斯　法羅群島
唔使講，法國就算施丹真係退出都o係呢組超哂班，愛爾蘭絕對唔係對手，分分鐘o黎次10戰全勝。愛爾蘭再同瑞士同組，奧沙、羅比堅尼、杜夫開始成熟，應該可以報番一箭之仇。
出線心水：首名法國　次名愛爾蘭

第五組：意大利　斯洛文尼亞　蘇格蘭　挪威　白俄羅斯　摩爾多瓦
同法國一樣，只要o係戰術上唔好再咁保守，意大利出線唔會有問題，相反斯洛文尼亞、蘇格蘭、挪威o既次名之爭非常激烈，挪威青黃不接，斯洛文尼亞攻強守弱，曾經主場贏過荷蘭o既蘇格蘭可以睇高半線。
出線心水：首名意大利　次名蘇格蘭

第六組：英格蘭　波蘭　奧地利　威爾斯　北愛爾蘭　阿塞拜疆
一班英格蘭小將越o黎越有大將之風，o係碧咸、史高斯、奧雲呢o的大哥lead住之下出線冇問題，甚至有實力問鼎冠軍。威爾斯經歷爭半步就打入歐洲國家盃之後，痛定思痛可以捲土重來，波蘭同奧地利都唔見突出。
出線心水：首名英格蘭　次名威爾斯

第七組：西班牙　比利時　塞爾維亞及黑山　波斯尼亞　立陶宛　聖馬力諾
冇大實命o既西班牙連「外圍賽之王」塊招牌都俾希臘拆o左，今次點都要威番鋪，西班牙明日之星多，出線前景光明。塞黑o係歐洲國家盃外圍賽後後開始上力，只要基士文同高華斯域發揮出o係球會o既入球能力，壓過比利時絕對有可能。
出線心水：首名西班牙　次名塞黑

第八組：瑞典　克羅地亞　保加利亞　冰島　匈牙利　馬耳他
瑞典實而不華，克羅地亞防守力強，保加利亞鹹魚翻生，甚至冰島話哂都曾經o係歐洲國家盃外圍實領先德國，四隊混戰亂過亂世佳人。瑞典同克羅地亞實力比較平均，大o的優勢，不過邊隊首名或者真係要打到最後一輪。
出線心水：首名瑞典　次名克羅地亞

2003年Eric好歌流行榜(第49週)：
1)出賣(容祖兒)
2)落地開花(盧巧音)
3)信望愛(梁漢文)
4)放生(關心妍)
5)三分鐘後(At 17)
6)身外情(黃耀明)
7)東涌日和(Shine)new
8)沙(何韻詩)
9)痛由自取(鄭希怡)new
10)小星星(楊千嬅)new

>>December 6, 2003 at 2:33:16 PM GMT+8

2003 年 12 月 4 日 星期四 【晴】

呢排好多人病o左，要小心保重身體喇。盡量休息多o的，唔好食咁多熱氣o野(真係有用o架)，工作太忙可以搵人分擔下，唔好攬上哂身，再係覺得唔舒服就儘快睇醫生喇，記住「病向淺中醫」呢個道理。身體健康點都係最重要，冇狀態就乜都做唔到，要知道病唔單止係自己辛苦，關心你o既人都會為你擔心o架！
始終搵唔到人玩debate，5 + 1話算喎，棄權唔參加囉，不過放學Step代我同余雪瑩講，好似話點都要搵人參加喎，睇下禮拜5 + 1點搞啦，再唔係咪抽籤，睇下邊八個咁「好彩」囉。
History狂睇primary source，我o地轉數勁慢，睇極都唔明篇article講乜，Miss Leung都好似有少少微言咁，不過佢好似堂堂都要暗串下我先舒服！
Triple Buss分組講short question，開始get番多o的theory，希望依家重新起步唔會太遲啦！
中史又要抄notes，又係抄唔完，又係版權條例o既問題。
經過三個月，今日中化終於開齋喇，咁遲先開齋應該係歷年o既紀錄！
放學有人問我o野，我當然唔會直接答佢啦，唔知佢get唔get到呢？

>>December 5, 2003 at 2:01:38 PM GMT+8

2003 年 12 月 3 日 星期三 【晴】

今日History測"Imperial Germany"，人人都掛住刨書，冇心情上堂。
中史勁抄notes抄到手軟，版權條例之禍！
UE要做oral presentation，第一堂教生字同俾我o地prepare，小息後第二堂就要o黎喇！o係自己o個group講完之後，5 + 1抽人出o黎對住全班講。佢抽o左我呀，仲指定要我用佢個format講，四個當中(金希文、謝玉蓮、我、歐羚)我應該講得最差，不過都有$10 M記coupon落袋。o車，我都唔食M記o既，俾我有鬼用？佢仲未玩夠我，post-exam有班際英文debate，佢要我搵人參加，呢份簡直係「優差中o既優差」，Step、Alison呢班怪物唔想玩(本身係debate人唔encourage玩喎)，咁唯有聽日上堂抽籤睇下邊個咁「好彩」啦！
中化做listening，仆直，僅僅合格！
原來早退唔測history o既Mina原來唔記得要交practical skills，lunch佢要我幫佢交俾5 + 1 & 解釋。嘩，又有今日咁多「優差」o既？擾攘一輪先求其掟落簿架算！相反楊晴旭特登lunch後返o黎測history喎！
"Imperial Germany"呢個新topic好多人都唔識，臨開波前搵到新晉History名師Stephanie Lam惡補！條essay好大路，不過唔知點解硬係覺得自己好似漏o左o的point未寫，只係唔知真定假！
Buss李sir插o的上次test低分o既人(即係我)，叫我o地努力o的，你估我唔想咩？好似有心無力咁o者！
好難得放學可以即走，一支公行千色店，嗯，要儘快騰出足夠o既資金喇，得番三星期喳！行完返深水埔再行下西九龍，車仔檔太行貨，點解先施乜都冇o既？

>>December 4, 2003 at 1:21:29 PM GMT+8

2003 年 12 月 2 日 星期二 【晴】

今朝遲o左少少起身，爭半步！
UE又要做listening，我o的狀態起起伏伏，呢鋪又差o左喇！12月都好似未適應到，我唔要再係咁！
小息後o既空堂，校長走o黎同我o地傾計，問我o地對學校各方面o既意見。佢擺明係想我o地插5 + 1，不過最後冇人敢出聲，淨係反映課室空氣唔流通呢類問題！
1B唔用得，中史轉去Geog Room上，我o地11個無聊人將四張檯打橫拍埋一行過咁坐，Lim Sir都覺得我o地白痴！
Lunch照舊o係課室食，照舊有Camphor人入o黎傾debate，今日多o左個Head Prefect余雪瑩，佢見人就叉呢樣我一早知，不過佢淨係歧我喳喎，相反佢好大細超咁唔俾林挺拎o野返課室食！
都話我Buss test必死無疑o架啦，李sir今日開到口話我大倒退，之後派番卷，真係好得分呀，真係唔知考試點死！
中化Miss Fung講講下提到大紅人Oscar，話佢本質唔係壞，只係唔識o係適當時間控制自己，仲提我o地呢o的高form要睇實o的佢。記住照顧下佢喇，「姐姐」！
放學有Camphor vs Bamboo社際籃球，又要ADT on duty，好彩今日班人冇功課做，阿釗好早放人，我落去睇下Camphor打成點。照計Camphor應該o係Bamboo之上，不過今日Bamboo一直都咬住對手，Camphor上半場又得利家義交足功課，偷波之後打快攻，不過整體FG%偏低，半場Camphor只係領先18比12。下半場Bamboo突然打出段小高潮，一度追貼到19比20，不過Timeout之後Camphor重新掌握節奏，Bamboon回後場又太慢，如果唔係個26號打last guard成日頂番頂利家義，Camphor最少可以o係快攻入多10分。o個邊箱Bamboo進攻冇乜章法，賤迪同小強都係靠1 on 1追分，又搶唔到進攻籃板，Camphor十九o係重要關頭打出水準，最後Camphor有驚無險41比35小勝，下星期二同Plum爭冠軍。
其實Camphor唔係想像中咁強，只要Plum集中多o的內線攻勢，派專人mark死利家義，Plum係有機會開齋o架，我同李天依家研究緊o係有限人手之下o既戰略，忙死！

>>December 3, 2003 at 3:19:44 PM GMT+8

2003 年 12 月 1 日 星期一 【晴】

今日第二次調位，個位越調越後，今次同肥龜坐角位，正！
中化好似好無聊咁，已經唔記得o左發生咩事。
History又o係藥力發作之下死捱死捱，入到腦o個下神奇喎！
Buss冇抄notes，李sir兩堂都講書，勞資關係唔算太難o者，睇新聞都有得學！
UE又殺到喇，5 + 1癲o架，兩日內要做齊News Cut同Practical Skills，人都死！佢仲解釋番上次份CEP我o地有問題o既部分，我同冇帶o野o既肥龜o係後面發夢吹水，最後我仲將另一項5B文化帶入6A，就係上堂睇進攻，果然膽大包天！
Lunch例牌o係課室食，不過今日多o左班Camphor人，佢o地傾debate。放心啦，Camphor人即係自己人，我唔會爆料o既，況且我根本唔知你o地講乜！
Triple中史o係1A上，o的人成日都就咁擺哂o的書、外套同長褲o係凳面、檯面，搞到我o地一係執餐死，一係要調位，最後我o地寫o左o的「為閣下財物安全，請不要把物品放在桌上/椅上」o既紙仔，我仲加多句"Be good to yourself"添！
放學社際男籃初賽(女籃未開波呀)Pine vs Plum，其實唔係我負責，不過都有去俾意見同打氣。Plum勁過Pine，至少多o的後備，不過了能同老麥班高佬唔打內線，走位又唔多靈活，得卡達(我淨係記得佢著15號，唔記得咩名)打得最好，非正式統計佢今日交出9 rebs, 3 blks；好彩我o地後衛贏哂，莊學謙最交到功課，得分助攻防守控制節奏樣樣做齊，上半場散手波多o的，只係領先6分(唔記得比數)。下半場食住Pine差唔多係人後備，開始冇氣，我o地越打越順，快攻、剷籃(佢o地唔會爆)、外投樣樣有，最遠拋離20分，完場賽果至少贏15分(又係唔記得59比幾)。
對Pine就贏得輕鬆，其實Plum仲有好多問題。班高佬死都唔爆籃，淨係棟o係外圍射，對Camphor一定輸哂籃板；次次進攻完都唔識即刻返後場防守，俾機會人打快攻，今日何狗唔係正宗PG都有11分，下場對屈速利家義隨時冇命！加油啦，Plum開齋冬你o地o架！

Re Candy:呢首係上次你同小妹都唱唔到o個首嘛，chorus我幾鍾意。

>>December 2, 2003 at 3:24:57 PM GMT+8

2003 年 11 月 30 日 星期日 【晴】

好似好番好多咁，而且今日有PE，決定返學。我呢個龍門真係……位都可以企錯！
第一堂就測Buss，o的藥力太勁喇，我根本完全冇精神，都唔知自己寫o左o的乜，應該會死得好慘！
今期進攻足球冇奧雲冇謝拉特，不過金希文照搶o黎睇，佢睇o既係……杜夫？佢話佢comprehensive喎。
History仍然係發夢，好彩Miss Leung知我病，放我一馬！
中化做閱讀理解，第一份簡直不知所謂，好彩o的狀態o係第二份返緊o黎，分數acceptable啦！
Lunch同子建、牛榮食維苑，話過感冒未好番，唔好食得咁熱氣，不過公仔麵都好熱氣喎！
沙咀道未開番，冇得踢波。吳樹穩哥哥收買人命o架，跑完樓梯仲要做sit-up同掌上壓，早知跑樓梯o個陣唔去盡！好無聊呀，同肉丸佢o地初時打排球，地方太細打唔到，玩玩下變o左玩馬騮搶波，我好掂呀，輸兩次喳！
Class Period睇電視，睇海洋生物，睇謝玉蓮同陳江o既A*旁述，好似平時咁渾渾噩噩過埋呢堂。
放學要落cover拆board，好彩有陳江同兩個F.4幫手，不過初時手腳太慢喇，其實可以做快o的！
原來今日係世界愛滋病日，呢個暫時仍然係絕症，我一直諗如果有朝一日有得醫會點呢？如果有得醫，好多經母體染病o既BB可以唔使死，不過同時o的人就唔會再驚中招，會更加放肆亂o黎。世事總有好壞兩面，愛滋病有得醫係好處多o的定壞處多o的？

>>December 1, 2003 at 1:53:03 PM GMT+8

2003 年 11 月 29 日 星期六 【微冷】

o的唔知傷風定感冒未好過，今朝卒之要睇醫生，使o左$130。食完藥完全冇精神呀，根本溫唔到書，聽日Buss Test死硬！
娘親捉我出旺角買新書包，佢話點都唔會俾我繼續用出街袋(執著)。不過佢想我用o個o的out到唔out o既當然搵唔到啦，而我都相當俾面，作出少少讓步(其實我不嬲都有讓o架)，最後o係間運動用品舖$190買o左個超大類似行山背囊o既袋，大家滿意啦？
買完即刻趕返屋企，睇歐洲國家盃分組抽籤直播，一步一驚心，死亡之組始終走唔甩！又分析下最後o既抽籤形勢先。

A組：葡萄牙　希臘　西班牙　俄羅斯
東道主葡萄牙有主場之利，費高為首o既「黃金一代」會o係今屆把握最後機會，但係太多同類型攻擊球員，最大對手西班牙年輕新星雲集、俄羅斯打法機動，會出到線不過未必係首名。希臘繼外圍賽再次同西班牙碰頭，不過冇大賽經驗，多數陪跑。
出線心水：首名西班牙　次名葡萄牙

B組：法國　英格蘭　瑞士　克羅地亞
英格蘭抽到中上籤，整體實力或者比唔上法國，不過有能力o係其餘兩隊身上盡取6分，要睇球員o既心理質素。法國係奪標大熱，主力仲當打，後備兵源充足，絕對唔係克羅地亞同瑞士所能應付。
出線心水：首名法國　次名英格蘭

C組：瑞典　保加利亞　丹麥　意大利
表面上意大利出線牌面最高，不過意大利o係外圍賽面對塞黑同威爾斯都吃盡苦頭，表現唔出應有o既霸氣，加上瑞典同丹麥都係正宗豬頭骨，「冇能力贏冠軍但係有能力贏任何球隊」，有力左右大局，意大利一唔小心可能連出線席位都不保。
出線心水：首名意大利　次名丹麥

D組：捷克　拉脫維亞　德國　荷蘭
完全係死亡之組，相信拉脫維亞會係其餘三隊o既搶得失球對象，可憐。雖然德國好似再次沉淪，但係話哂上年世界盃都o係一致睇淡之下打入決賽，絕對唔可以睇小佢o地o係大賽o既成績。荷蘭內部問題實在太多，又未搵到最佳陣容，兼有前冇後，撞正外圍賽對手捷克，隨時陰溝裡翻船。
出線心水：首名捷克　次名德國

>>November 30, 2003 at 1:06:08 PM GMT+8

2003 年 11 月 28 日 星期五 【微冷】

o尋日生日o既係Tracy，今日o既係Ryan。30歲喇，希望你最終得償所願，o係國際大賽亮相！
o尋晚開始有o的傷風，今朝一起身就眼水鼻涕係咁流，好辛苦…
今朝睇湖人對馬刺o既NBA重頭戲，以為場波會好緊湊，點知Lakers由頭帶到尾，一度領先31分，Malone再食大三元，最後Lakers以103比87怒炒對手！四大天王輪流發威，甚至其中一件發唔出都唔緊要，Lakers係夢幻之中o既夢幻！

2003年Eric好歌流行榜(第48週)：
1)出賣(容祖兒)
2)沙(何韻詩)
3)放生(關心妍)
4)落地開花(盧巧音)
5)身外情(黃耀明)new
6)三分鐘後(At 17)
7)信望愛(梁漢文)new
8)必殺技(古巨基)
9)太想愛(劉德華)
10)自由行(楊千嬅)

Re肥鵬：唉，又係名氣問題，老實講皇馬o個兩件今年都唔係好突出o者，反而我會揀尼維特、亨利同馬甸尼入最後三甲，希望尼維特贏到歐洲足球先生啦。

P.S.何輝同江忠德好適合o係6A立足～

>>November 29, 2003 at 3:59:54 PM GMT+8

2003 年 11 月 27 日 星期四 【晴】

今日係蝦生日，祝佢生日快樂！唔唱生日歌喇，呢o的粗重功夫邊係我做？
o尋晚到肥鵬chat到好夜，今朝死狗咁款，全日都冇精神，不過又冇去捉鱷魚喎！今日係school open day，打鐘前兩次幫Miss Fung搬o野，博佢升我conduct嘛(佢口頭上應承o架)！
Triple History勁講imperialism，我係咁死捱死頂，總算入到腦，不過都送唔過俾Miss Leung第N鑊串！
差唔多半班人有o野做，令人發癲o既Triple UE佢o地唔使上，好羨慕佢o地，更加羨慕Candy，佢帶李鄭屋官小o的小六參觀學校呀，我好想會一會o的師弟師妹呀！最慘係冇得走o既要俾5 + 1狂炳，先係出到聲唔妥o的冇上堂o既人，之後又話我o地o的Practical Skills太多廢話，要be concise喎！我o地寫得多你話lengthy，寫得少就話concise，你想我點？
Lunch同Billy食大家樂(平)，食食下佢娘親突然撲出o黎，塞o左支沐浴露俾佢，叫佢拎番屋企！
Miss Fung唔得閒，中化唔使上，不過硬性規定要落library，又唔用得電腦，悶足成堂！
中史得番七丁人上，不過Lim Sir話人少都要上3B，仲趕番唔係讀中史o既思穎返課室！要做佛教o既WS，不過唔係寫o左好多！
今日冇乜精神，5 + 1又一次過叫我收三樣o野，o的人又未返齊，收唔哂，叫人交o野o個陣語氣重o左o的，o係度講句sorry先！
夜晚有幫蝦慶祝o既Regualr Meeting，返屋企沖涼換衫先再入荃灣。1750出門口，一時又話荔景站有訊號故障，一時又o係隧道停低，差唔多搭正1830集合時間先到！蝦果然人緣好，今晚出席人數應該破o左紀錄，準時到o既有我、子建、Kambo、Lo、死魚、Kuto、蚊、Su、梅玲同一個陌生人，Fan、壽星女婿、琪琪同六叔就遲o的join，而Mina就唔知算唔算有join(佢o地短暫出現)。大軍殺去Pizza Hut食，要分兩張檯，我要被迫周圍坐！我o地o係窗口位，出面有個勁可愛o既BB，佢係咁hi我o地，好過癮呀！
食完又係好似平時咁，問有冇人會直落或者返屋企，結果又係根本冇餘興節目，送蝦返屋企就各有各走喇。

Re魚：o的孕婦問題唔係我問o架，陳江同牛榮呀。而Oscar單o野……認衰仔，人性o既醜惡。

P.S.尼維特最後都係無緣角逐今屆世界足球先生，好冤枉！

>>November 28, 2003 at 4:09:14 PM GMT+8