2004 年 4 月 26 日 星期一 【晴】

起身o個陣仲落緊雨，出門口o既一刻即刻停哂，不過俾我揀我寧願繼續落雨。
隔o左N年又有Morning Assembly喇，小妹 + Kuto搞guest水準頗高，不過我冇乜留心聽，一陣測中史喇。
市舶司題目超級難寫，除o左definition就乜都唔記得，而且唔知點解寫唔得快，Lim Sir實鬧死，兩版三行交貨？
5 + 1太膚淺，講o既我唔太認同，可能佢當時都係咁諗，米埔後遺症發作，2004太空漫遊，佢唔覺o既。
中化分group傾唔同類型o既個人短講題，肥峰o個題「十年後的我」笑到全班趴哂地，「今日係2014年4月27日，我依家27歲」，讀中大神學系，做牧師，陳日君接班人，推廣神愛世人，Miss Fung肥佢。
Lunch係兒歌串燒環節，飛天女公安，呢個年紀o既男仔最耳熟能詳o既歌始終得一首：撒亞人生於這個地方　稱呼叫悟空　無論力氣　步法　身手彷彿一片疾風
冇乜精神之下上History，好彩備o左課唔使點聽，希特拉都一早備，做Reading Report唔使左揭右揭。
有新鮮出爐o既2004 AL Buss題目，今年o個o的好straight forward，咁仲死，即係下年可能會好深！慶幸o既係今年Case Study出o左Financial Mgt，總算鬆一口氣。
呢幾日放學SA有3 vs 3街霸籃球，6A聽日會出戰3C同1A，正選定哂o架喇，我聽日做後備，幫對手！

>>April 27, 2004 at 2:59:42 PM GMT+8

2004 年 4 月 25 日 星期日 【晴】

曼聯、車路士相繼輸波，阿仙奴俾熱刺問題十二碼迫和，但係都足以提早四週重奪英超冠軍。老實講我對阿仙奴再次擊倒曼聯唔感到驚訝，因為由開季到呢刻阿仙奴o係兵源嚴重不足之下都發揮出非常穩定o既高水準，英超未逢敵手，雖然最後關頭接連失去問鼎足總盃同歐聯o既機會，但係就可以吸取上季o既教訓，即時收拾心情專心應付英超，o係聯賽榜越拋越遠。睇呢個走勢阿仙奴極有可能以史無前例o既全季38場不敗o既無敵姿態完成球季，期待緊佢連曼聯三季前以最高分數完成球季(91分)o既紀錄都破埋。
晏晝去米埔睇雀，朝早o既堂完全冇心機上。Miss Leung講o個o的我o係屋企全部mark低哂，5 + 1竟然冇話我o地好唔去上次oral，listening聽o的唔聽o的僅僅有一半命中率，諗住叫Lim Sir俾埋第五堂我o地換衫 + lunch佢唔制，我都冇乜點聽到佢講乜，反正個topic唔太重要。
12:15集合上車，第六堂就放我o地走，各有各食吉野家，我o既選擇非常之咁愚蠢，俾多$4就有埋Jelly + 汽水我竟然唔要，低能仔。以為今日會涼涼地，所以著牛仔褲，不過短褲可能會舒服o的，反正可以問人借蚊怕膏。
12:25左右上車，搭車呢part我要特別講多o的，o係荃官出發，海壩街出大涌道上荃灣路、屯門公路、三號幹線、新田公路，o係落馬州轉落青山公路好快就會到米埔，30分鐘左右。個司機改行城門隧道o係吐露港公路、粉嶺公路兜個彎都算啦，佢竟然行錯兩次路！去到落馬州交匯處轉左一陣就到目的地，佢轉右，沿古洞、燕崗返上水，你返上水做乜？最離譜都係到o左青山公路o既盡頭仲夠膽轉右落粉錦公路，越行越遠，我同Billy已經開始靜偷偷鼓譟，公告天下話司機100%行錯哂路！o係蓮塘尾U turn原路打回頭，我o地真係想捉個司機出o黎公審兼圍毆，本來可以好快o既路程結果要70分鐘先完成，拜司機唔識路所賜。
去到米埔自然保育區(sth like that啦)，接待處隻lego熊貓捐款箱好得意。原定4粒鐘完成o既路程要o係更短時間內完成，步伐要快o的，好彩呢個下午雖然OK猛太陽，但係算係風和日麗，沿途景色又怡人，行落唔算辛苦。1500公頃o既米埔冇全程行哂，因為o的候鳥都飛哂返西伯利亞，今日見到o既唔算多，主要睇橫跨粵港兩地呢個咁有生態價值o既米埔一帶，o係兩地唔同城市規劃之下，環境有乜唔同。香港呢邊係世界級保育區，附近o既發展受到非常嚴格o既限制，因為人為干擾o既程度極低，所以保存得相當之好；而冇乜規劃o既大陸就兩回事，福田海岸一樣係國家級生態區，但係佢隔離有高速公路………………
經過英界2R廣東語水平水質o既私人魚塘，唔記得跳落水捉條龍躉上o黎今晚加料(今晚冇魚食)，仲諗住搵水芒果汁送飯o架。o係觀鳥屋靜雞雞咁睇雀，驚嚇走哂佢o地，行得好cute囉。新聞見得多英界o既邊境鐵絲網，今日我o地闖入邊境禁區，穿過紅樹林睇魚睇雀，行浮橋好過癮呀，好想扮蒙迪拿過橋添。
行o左成個晏晝，一o的都唔覺得辛苦，汗都冇乜點流幾滴，$6.5芬達橙汁完全係揮霍。今日行o左8公里唔到，已經算係濕濕碎，以前未o黎過米埔，今次親眼睇到香港都有咁o既世外桃源，靚爆鏡，如果唔係冇數碼相機，我一定大影特影。米埔係香港人絕無僅有o既一塊寶，身為香港人，我o地個個有責任保護佢，好好保存新界西北一帶o既世界級生態地帶。
準時17:00走人，好多都好似散o左咁，但係都好熱鬧，o黎o個陣兜錯哂路，走呢程都唔好得幾多。唔再兜大彎吐露港，新田公路錦繡花園直落，以為佢會上三號幹線啦，錯，靠左上元朗公路，迂迴曲折咁屯門公路出荃灣，又係唔知個司機想點，Step想屯門落車唔得。好彩今次總算冇行錯路，不過係兜遠路，50分鐘先返到學校。Singing Contest完o左，如果我唔係要出去，我一定會玩。
人大正式打茅波咁判o左「雙普選」死刑，只希望香港唔會有太多鳥籠民主派，希望香港人係會成熟咁堅持到底，令普選早日o係香港出現，香港市民，9月立法會投票站見！

>>April 26, 2004 at 3:25:04 PM GMT+8

2004 年 4 月 24 日 星期六 【晴】

曾憲梓呢個人真係厲害，70歲人都可以咁好火，我懷疑佢其實知唔知自己講緊乜。身為港區人大代表，我o地已經唔要求佢向中央如實反映港人o既聲音(事實上人大代表好似冇權就香港事務發言)，佢冇咁做不特止，仲要一而再再而三危言聳聽、含血噴人，抹黑民主派人士，中央漠視民意係理虧在先，民主派人士據理力爭就俾佢話食o左老虎膽，咁o既說話都講得出口。所謂o既香港內部未有共識唔適宜普選，係佢呢o的土共活化石死都唔肯放棄手上o既政治特權，同主流民意背道而馳，先係胡說八道。香港人的確係成熟、理性o既，我o地唔會o係佢office淋屎，亦唔會捉佢出o黎打，我o地只會用選票表達我o地o既意向。

Re Billy:你終於出現喇，我都好感動o架！我好似見過golf用品，咁我唔知你唔知小邪生日嘛，Pine就咁睇未必個個明囉(我蠢所以都唔明)。
Re估到係邊個：愛係抽象o既概念，愛唔愛根本好難define，你算唔算愛社更加冇得講。醒唔起嘛，你可以21:00屋企撲落o黎麥記o既。我屋企依家俾我o的口水浸哂………

>>April 25, 2004 at 2:08:16 PM GMT+8

2004 年 4 月 23 日 星期五 【晴】

朝早睇湖人對火箭第三場，開始懷疑湖人有冇走錯線，火箭有少少食住湖人，下圈o既馬刺更加唔使講。
往年都係星期日去拜婆婆，不過載人o係油塘MTR山腳上山o既14S今年所有星期日都唔開，要自己行，唯有揀星期六。先去買婆婆最鍾意o既潮州粉果，個阿姐聽錯哂，我係要六隻，唔係六籠！先去大角咀join公公、媽媽、彤彤表妹、玲玲姨拎o野再去將軍澳，佢o地怕麻煩，係都要飛的，其實巴士都唔見得會慢幾多。一出旺角道即刻大塞，我當機立斷咁叫司機屈落山東街兜返上亞皆老街，巧妙咁避開塞車地帶，話咁快就到山腳o既巴士站。好似好多人，其實一架架MK咁載人，15分鐘左右就上到車，再o係山上o既墳場辦事處行去婆婆o個度，如果唔係要就人，8分鐘唔使就行到。其他人陸陸續續o黎到，準備化俾婆婆o既o野，依家o的祭品越o黎越古靈精怪，連一籠籠蝦餃燒賣都有！好彩今日涼o左o的，冇上次去和合石咁熱，相當舒服，幾滴雨粉唔算得乜。17:25就開落山o既尾班巴士，要好快手咁完成，我懷疑燒金銀衣紙係咪其中一個重要o既空氣污染來源。o的人排隊冇乜秩序囉，前面個男人一肘兜心口鋤落o黎，氣門中哂招，一時間抖唔到氣，條友竟然望都冇望返轉頭。
小邪早排生日，同佢dinner慶祝，所以落到油塘就MTR入荃灣，冇跟大隊出旺角。半天吊時間，18:35到荃灣，有排都未夠鐘，所以周圍行，o係千色店睇中o左新款英格蘭短袖龍門波衫，$199喳；另外tick牌o既荷蘭主場球迷版(冇落場版o既彈珠人號碼圈)都好搶眼，包括價錢($4?9)。
去雪國食日本o野，蚊提議o架，以前從未去過，見舖入面冇乜人，o係門口等到差唔多夠鐘先搵位…………原來Su早o係另一個「正門」等緊。今晚出現o既有我、聰、Su、蚊、魚………當然仲有主角小邪啦。o的o野相當唔平，不過一次半之冇所謂啦，唔識點叫，搞好耐先一人一個飯/麵各食各。食飯其間已經大量笑話，有o的o野聰完全估唔到，o個o的o野都係多得魚搞o既淫窟(佢咁講o架)，似乎我的確將男女位置掉轉o左，有個人o既壞話唔講唔得，唔講個心唔安落。最後埋單$50有找，不過未來一星期o既水頭會相當相當之緊，盡量唔出街食喇！
去麥記繼續hea，玩UNO，好刺激，呢o的game都有得笑料百出，係又嗌cut唔係又嗌cut，鬥draw牌，洗牌整跌哂o的牌…………收唔到聲。又食雪糕，仲激，根本食唔到，Hello Kitty型雪糕你捨唔捨得食？好耐冇試過玩得咁投入咁開心，同冇見一段時間o既朋友一齊o既感覺非筆墨所能形容，快樂不知時日過，連曼聯對利物浦都懶得睇，23:15先肯走，其他人直落。原來星期六夜晚o既荃灣真係咁多金毛仔，好彩我唔係住荃灣，社會風氣仲未嚴重影響我。

2004年Eric好歌流行榜(第17週)：
1)講妳知(張學友)
2)奇洛李維斯回信(薜凱琪)
3)找我(梁漢文)
4)一拍兩散(容祖兒)
5)冤家(張國榮)new
6)洗剪吹(吳浩康)
7)你是我老婆(任賢齊)new
8)一秒(Mini、方力申、何韻詩)
9)一加一(胡杏兒)
10)思覺失調(劉浩龍)new

Re Camphor人：誰？唔係話唔服輸，因為自知表現唔算突出，不過做得評判唔係應該要有時間觀念咩？

>>April 25, 2004 at 2:13:53 PM GMT+8

2004 年 4 月 22 日 星期四 【酷熱】

今日係drama正日喇～
唔使著校服住，件黑衫本來好唔錯，只係有個唯一缺陷。我o地再冇機會練習，o的o野擺哂上hall，08:10齊集cover，都有人遲到，最後briefing注意事項，其實大家都已經進入作戰狀態。Plum第一組演出，後台見到阿嫂，終於原來佢係MC之一。台下o的笑位o係唔太適當o既時間出現，自問搬set算OK快聽唔到乜o野聲，已經發揮得最好啦。火速搬哂所有o野落台，呢一個月o既努力正式劃上句號。Billy大吐苦水，MD機突然又壞o左之餘，馮sir竟然o係我o地表演期間整機兼login，製造不必要聲響，台下聽到哂，佢好唔"gir"馮sir囉。
上upper睇Camphor演出，佢o地每幕都比我o地長，觀眾的確o係後段有少少唔集中，趙正康扮盲拿捏得幾好，不過轉場搬set大聲o左少少(可能我o地都係咁啦，唔知道)。小息後輪到Bamboo，中槍其實可以再迫真o的，一個中o左槍應該係成個向後彈，唔會就咁打直跌落地，一睇呢套戲就feel到有o的問題，但係唔識講。壓軸出場o既係由小妹擔正o既Pine，戲服好華麗，情節好出位，阿姨原來係女高音，不過成套戲講乜，可能我蠢啦，睇唔明。
等評判計分，MC搵人上o黎搵guest拖時間，演員社長扮鴨、鬥摑，俾得小B上台就預o左俾佢搶咪。拖夠時間喇，新鮮出爐o既賽果出籠，先o黎兩個評判o既評語。四社當中佢o地好似冇講Plum有乜不足之處，唔通呢個後之後賽果o既伏筆？三社o既問題佢o地大講特講，o的問題有o的人應該feel到，就係唔識具體描述。賽果逐個出布，低能仔分唔到優秀演員獎，Camphor同Pine瓜分三個演員獎，阿慈激動到收唔到聲。私下o既睇法係Plum唔會有乜o野成績，set組只希望執個幕後英雄大獎，點知最後又俾Camphor食埋，咁我o地就食硬白果喇。陳從願爆小冷贏最佳導演，Bamboo唔係有三個導演o既咩？Pine係今日o既大贏家，袋o左幾個重要大獎，而全場總冠軍當然亦都走唔甩啦，三連霸！而且Plum今年o既大型比賽已經係第三次包艇，前排o的人已經黑哂面。恭喜哂小妹先，雖然o係upper基本上係聽唔到對白，但係完全feel到佢戲裡面o既情緒。
今年學校真係…………難得drama竟然要晏晝繼續上堂，遲o左放lunch，同子建、牛榮、沈食KFC，前面個師奶慢到離哂大譜，由$117就咁叫叫到$179，牛榮隔離行仲快過我。子建今日Last Day喇，你又要面對一次難關，今次要得呀，我支持你！返到學校已經冇乜時間，要即換校服準備上堂，原來我漏o左皮帶。
三堂中央係冇心機上o架，7A七國咁亂，可以再去7S上喇！Lim Sir好耐都未到，Mina提議玩遊戲，好喎，「o下？咩話？」講反應，林敏、Candy大輸家；「誰是殺手」俾Mina睇到我隻手太大動作，識穿o左添。好似Discussion Group咁上堂，Lim Sir唔好計較咁多啦！老實講我o地根本冇心機上堂，Lim Sir講書唔好講咁快啦。Break又玩，教哂書又玩，總之今日就係不停咁玩，掟蜥蝪、寫歌名，唔識計分。
社高層大部分去o左未聽過有瀕臨絕種動物o既長沙灣睇o野，放學唔知有冇功慶，有冇都算啦，自己去唱K，請埋Judy唱啦，佢呢排貢獻良多喇。我、Candy、Cindy、Vincent、龜上Green Box唱先，未去過上層，間房好正，有類似DJ檯o既物體。狂唱新歌，《愛神》、《相依為命》原來唔係咁難唱，不過Edison的確好難rap，同佢o地唱歌係嚴禁尹光出現。發覺平時o係屋企o既tone入到K房就唔記得o左，老實講，以自己o既角度出發，o係campsite雖然冇咁多歌揀，但係好似適合自己多o的。Judy之後都o黎埋，以為有o的歌得自己識唱，其實人人都識好多歌，都係唔好拐o野，乖乖地做和音。我好想好想好想唱到19:00 o架，最衰要補習，好多從未唱過o既都好想唱，下次啦！下次即係幾時？

>>April 23, 2004 at 3:44:37 PM GMT+8

2004 年 4 月 21 日 星期三 【清涼】

走上7A上Buss，凍檸水，睇presentation，下次到我喇，第三堂返課室，又同李sir講波經，結論係波圖對摩納哥會係今季歐聯決賽o既戲碼，不過我覺得拉科會有機會一報3比8之仇。
唔知2A都開o左冷氣，繼續凍檸水，Miss Leung令我可以睇少半課Stephen Lee，不過真係好多article要睇呀。
中化講會議紀錄，我要食鰻魚，我估老周應該係周新恆，唔知有冇人和議，好無聊咁打發埋呢兩堂。
要練drama，lunch未有得食住，不過有真o既魚做蛋道具，Sunny搶先偷食(其實已經係明刀明槍o架喇)。o的o野搬哂上hall，Run Through兩次。唔太齊人，魚蛋佬同企街都要搵小鳳同Zoe替工，超好笑，後台有馬展o既有味IQ題，竟然仲有人唔識。o的鏡要移前o的，仲係擺得好大聲，而方煜輝又係咁發夢，聽日on stage醒定o的喇。13:20先練完，唔可以唔食o野，十萬火急衝落cover食杯麵，狼吞虎嚥咁食，6分鐘清哂。
Prove到去完camp體能進步o左，跑樓梯冇氣喘，雖然都有少少留力。冇潮州仔，不過有女仔打手球，所以仲係成村人塞o係八人場圍埋一堆亂o黎，今日有Judy久休復出。超級極度100萬個瘀皮，諗住雲達沙式碌波俾鰻魚慢慢打上去，點知唔為意老麥睇穿o左，截糊，當時我仲o係禁區頂，走返入去，都要俾佢射入遠柱網仔，之前o既都係間接助攻，今次終於有直接「助攻」喇！吳國倫截陳梓豪o既傳中出街，又要我跑出去執，衝燈。我o地有威脅o既攻勢少之有少，靠楊家俊龍門口符碌到冇得再符碌o既入球扳平，之後終於可以少o的人喇。人少o左，弱點盡露，第二球我又要負o的責任，雖然擋到舒利亞近門抽射，但係之後o既左路角球龍門口落，我竟然冇出o黎接，老麥輕輕鬆鬆再頂入一球；俾人打反擊，龍突破防線禁區頂怒抽，企哂出o黎雙手擋高，個波仍然向龍門飛，再輸多粒。o的攻勢凌亂無比，完全冇組織可言，各自為戰，輸波理所當然。
踢完波成身汗好熱呀，成隻乾蒸燒賣咁，完全唔想換衫囉。朝早派o左o既性向測試，證明我原來係…………人格分裂，外向、內向、理性、感性、直覺性、辨識性…………乜都一半一半，係萬能定萬萬不能？Class Period上六樓後座，5 + 1開talk講JUPAS，聽唔明，只係知佢又有心串姓高o既，又係「不要做好人」，又係踩City嶺南，據聞帶頭唔俾面5 + 1傾計o既係Sunny。尖子今日放榜，10個派到第一志願，Step最後如願以償入到港大Law喇，恭喜哂先，咁我AL又少個對手喇。如果你問我Band A第一志願係乜，我仍然會答：中大政治及行政系！
放學要練oral(5 + 1開到聲叫我o地去)，我懶理，落cover繼續幫手，最後準備喇，不過嚴重唔夠人，有機會練多一兩次，pack好哂o的細set，修補下o的大set。16:30時間到，全人類抬哂o的set上台，擺好scene 1幾塊鏡落台位，撕膠紙，速速返落cover。可以做o既已經做哂，依家只係等聽日on stage喇，希望我聽日唔會犯錯啦。
好熱，唔想返屋企住，做電燈膽，睇Stephen Lee，成課League of Nations睇哂，明明地啦。吳國倫用Lily部notebook打機，屠殺，同阿沈鬥串，知你醒知你勁知你冇得頂。Hea到18:25，無聲無息地返歸。

>>April 22, 2004 at 3:35:10 PM GMT+8

2004 年 4 月 20 日 星期二 【酷熱】

冇次得喎～
History上六樓後座睇video，納粹思想o既根源係重新將亞里安人淨化為神人o既血教，優生計劃o既BB好似o岩o岩孵化o既雞仔咁擺埋一齊o係輸送帶上面，冇得同父母生活。SA好慘，一手幫希特拉扶搖直上，當再冇利用價值o個陣就落得被剷除o既下場，最精彩係臨死仲要「希特拉萬歲」，讀歷史係要借古鑑今，一時o既風光唔代表一切，如果你係踩住人上位就仲死，你終有一日係俾人踩o個個。其實唔止Miss Leung，我都以為有人去o左搵周公o架！走o個陣黐住Miss Leung，黐住佢有lift搭嘛！
Triple UE唔使聽o野，compo好難寫，甚麼基因改造食物，反對，不過o的point好似…………超級嚴重唔夠字，我估我會唔合格，可能只係比severely penalised o既陳江好少少！
Lunch有人講東講西，不過聽唔明之餘，似乎係唔准聽居多。
對上次o既評論，唔算太差，思穎改得手鬆o者，呢排我最拿手o既argumentative有少少跌watt跡象。
改去7S上中史，不如以後都去o個度啦，有超得意o既玩意，從未想像過咁o既反應，好好玩！
提早一節放學，早些少練drama，改去X位練。唔齊人喎，差唔多正常放學時間先正式開始，set組有o的散漫，10秒轉場，腳步聲同放o野聲都超大。塊鏡出事，扑到Cindy個頭，哎呀，唔通俾o野打到唔出聲咩？Scene 3勁多NG take，笑笑笑，對白講到亂哂籠，個個都收唔到聲。有o的人返o左o黎，不過點解二缺一o既？o係籃球場踢波，你估細哨o個o的咁易學咩？諗住打3 on 3鐵籠足球，不過散哂場，成身汗，返歸喇。
我頂唔順喇，我決定提早o係聽日換季，最後一次由冬季轉夏季！

Re WE7玩家：開名啦，唔識都可以交流下嘛。我係根據球員狀態同體力去調整出場陣容，我間中都會打類似你所講o既隊型，將4-3-3 A陣式o既兩翼向後向邊各移三格，排排出近乎4-2-3-1陣式。至於點解我3-4-1-2行先，係因為我control防守唔係咁叻，成日都好亂，所以三人防線互相補位會比四人防線更加穩陣。我買杜格巴之前有諗過伊巴謙莫域o架，不過我唔記得佢邊方面o既數值差些少，唔o岩隊波。

>>April 21, 2004 at 3:18:19 PM GMT+8

2004 年 4 月 19 日 星期一 【酷熱】

小邪生日快樂！！！！！！！！！
唔知咩事得罪o左周公，兩晚01:00佢都仲未肯見我，今朝真係頹頹地喇。
5 + 1提我o地後日o既Oral Practice一定要去，但係大後日就on stage，你去埋我o個份。
History睇essay report，出面o的人真係離哂大譜，Stalin係意大利人都寫得出，又要印note，終於收齊錢喇。
Triple Buss睇essay presentation，抄抄抄，我肯定自己同周公有仇，佢呢個鐘數先o黎搵我。
子建返o黎考oral，肥峰慘遭虐待，子建真係花心。
中史notes好亂，今日o既主角又係肥峰，流口水，諗起當年…………………
中化本來睇video，冇聲，改用power point，冇聽書，掛住reply剪報。
放學drama練set，目標係5秒，好似好難，成日火星撞地球，魚蛋車都係何hen自己推啦。同小鳳、馬展玩波，笑瓜人，高比o的波真係好難射，個畫架好化學，都係唔掂好o的。

Re挺：你死喇，我o地o既阿嫂你都唔識，好多人都知邊個o架，我肯定你同佢有一面之緣。

P.S.我tip馬勒當拿會o係一年內死～

>>April 20, 2004 at 3:23:08 PM GMT+8

2004 年 4 月 18 日 星期日 【酷熱】

終於要返學喇，o尋晚00:00就走去見周公，不過佢01:30都仲未肯見我，但係朝早又出奇地準備起身喎。
中史測唐代稅制，之前完全冇溫過，一返課室就即刻開工。兩份兩稅制o既notes俾人拎走o左，但係最後都唔做比較題，齋答兩稅制，又好似真係吹到下水喎，o岩o岩好三版交貨，只係另一個聲稱冇溫o既三分之二！
UE冇聽書，乘機發白日夢，發現SKB出o左個極大o既謬誤：摩納哥(Monaco)雖然係獨立國家，但係呢個世界上係冇摩納哥國家隊o架，當地得一間打法甲o既球會，o的球員踢法國國家隊o架。
中化listening僅僅D到，好多人都識霍金老鼠，佢太聰明，完全聽唔明佢想講乜，唔亦唔明點解「外星人不屑與地球人交往」拎唔哂一分，只係認為聲帶裡面朱女士o既言論太理想化。
子建返o黎，同佢食稻草人，叫白菌石斑意粉，隔離檯o既陳江佢o地都叫o左同款，點知我o個碟勁遲先到，牛榮差唔多食哂我o個份先到(佢杯o野都好耐先到)，十萬火急咁食，咩味都食唔到，少少想投訴。
History係唯一做得哂所有功課o既一科，分組傾essay outline，好人o既Miss Leung擺我同Step、晴旭同組，Step主導就得喇，我言之無物，冇人明我講緊乜，包括自己，Step驚自己唔夠串，其實可以做余若薇嘛。
好彩Buss Essay唔係今日交，放學先開工都仲得。本來要練set，但係超級唔齊人，乜都做唔成，結果有時間做Buss，Billy陪，我堅持做o左planning先正式落筆。邊寫邊嗲進度緩慢，走去X位睇切圓形，崩哂口，重新作答問題，已經唔記得o左以前點答，其實講o黎講去main point都係順其自然。
留自己堂留到06:20先走，教Billy嫂做DBQ，應該係令我History B唔到o既掃把題，依家睇又好似唔難。

>>April 19, 2004 at 2:22:29 PM GMT+8

2004 年 4 月 17 日 星期六 【酷熱】

一朝早就要起身，今日先o黎今年第一次拜山，拜太爺(媽媽o既爺爺)。目的地係和合石，09:00就出門口，事實證明先搭巴士入大圍，再轉KCR係最平之餘又OK快o既途徑，以後都咁去。o係粉嶺KCR集合，截的士去山腳，警察封哂上山o既所有路唔俾車行，我o地只可以慢慢行上山。其實段山路一o的都唔算難行，完全冇氣喘，因為我比其他人快，中途停低等，o係山腰望住康樂園同少少大埔，諗起《我的野蠻女友》o既一幕。行o左40分鐘左右終於到喇，附近有好多綠色o既毛毛蟲，步步為營，唔敢踩死佢o地，愛護動物嘛！好曬，不過其實唔算太熱，仲有少少涼風，overall都算舒服。上香化寶呢o的留俾大人做，我同表弟o係埋一邊講東講西，佢真係好信心爆棚囉。拜完，開餐，o的橙勁甜，燒豬唔食住，我食o左半隻蛋 + 一個橙就算。好瘀囉，cum住o的袋o個把遮吹跌o左，諗住反正都差唔多走，收起佢，唔為意上面擺o左o野，拎起，個蘋果彈下彈下咁跌落樓，爛哂；唔止咁，仲有個袋好o左o既鬆糕沿去水渠碌埋落樓，跌o左出o黎，報銷。
上山容易落山難，落要小心控制速度，繼續同表弟傾計，講唔同報紙o既tip波水準。我詩興大發，即興作o左六句：「估波睇東方，輸到心慌慌」，「唔睇東方揀太陽，遲早陷頭撞埋牆」，「即管睇apple，一定有你so」，都係蘋果o既青蛀仔、華度最準，東方o既邪神一定要留意，買佢對家包冇死。飛的返粉嶺KCR，出旺角飲茶，未試過o既點心，「o的醋點解酸o既？」，「蝦餃裡面有蝦o既？」，好似係大舅父請。
隻燒豬仲未肢解喎，點算好？上公公屋企食埋dinner先囉，我表弟舉腳贊成，因為又有得玩WE7 I。買到李雲在做我o既第一副車，洽購緊卡斯達積、高路斯、捷雲頓，米斯達取代杜格巴o既正選位置，聯賽拋離第二位11分。
話咁快兩個星期o既Easter完o左喇，我好多功課都未做，去完camp仲沉醉o係玩o既氣氛當中，心機做正經事，難就唔做，甚至有功課根本唔知要做，今次懶惰會唔會帶o黎無法彌補o既後果？

Re香港佬：都係開估啦，我覺得Theo Ratliff有幾分似陳友喎，唔知係咪眼花啦。我已經想像到個畫面……

>>April 18, 2004 at 3:29:19 PM GMT+8