2003 年 11 月 16 日 星期日 【晴】

今日好正呀，正到爆！
一朝返到去要趕份UE Oral Report，原來都唔係咁難o者！同場有翻版佘詩曼o係班房周圍走！
Miss Leung又串人喇，不過好彩唔係串我，今日冇o野俾佢串！之後UE唔使presentation，全程做listening。可能因為打鐘前飲o左杯咖啡，超有精神，冇miss point，進步o左好多，希望可以keep落去啦！
o係七仔買咖啡順便買埋最新一期o既《進攻足球》，今期封面故事講奧雲o既去留問題。本來我諗住o係小息 + 空堂睇，Candy佢o地一見到有奧雲就埋o黎搶，結果本進攻成為佢o地o既獵物！
中史上o左好似冇上咁，掛住睇進攻，Lim Sir講市舶司好悶。
Lunch同Billy去美食軒食，今日唔知點解冇乜人幫襯，o的服務態度好唔得！
Buss笑足兩堂，原來李sir以前做過懲教署o架！中化都係好似平時咁發夢，幾時先唔會再係咁呢？
平時放o左學都仲有好多人留o係課室，不過今日好快就走哂咁滯。我要死埋份History Reading Report先走(唔想遲交)，走o個陣o係X位見到蝦玩結他………
聽日又要交UE News Cut，本來班房有份SCMP冇人要，龜要o左，我o係佢度剪o左第一版出o黎諗住做o尋日李國章同大學生o既談判。點知返到屋企先發覺冇拎番o黎，要落街買過份，$6白白冇o左！

>>November 17, 2003 at 2:23:38 PM GMT+8

2003 年 11 月 15 日 星期六 【晴】

今日係曼聯中場靈魂史高斯o既29歲生日，祝佢今季冇病冇痛，以最佳狀態先為曼聯重奪歐聯，暑假再幫英格蘭贏埋歐洲國家盃！

>>November 16, 2003 at 2:19:48 PM GMT+8

2003 年 11 月 14 日 星期五 【炎熱】

今日足球校隊o係海濱踢第二場，對手係呂明才。吳sir比平時早到，派番o的球員證，點解冇我o既？佢整唔o左我o個張！本來學校ban o左利家義同易子豪踢校隊，不過吳sir最後都偷偷地幫佢o地搞證件，荃官陣容總算完整番少少。我唔出得場，正選龍門繼續係吳向宇，新加入o既5B孖寶都o係正選名單之內，仍然踢4-4-2陣式：
　　　　　　　　1.吳向宇
12.潘政賢　16.林家禮　17.楊肇年　13.陳國榮
11.張浩勤　15.李文彬　10.利家義　14.鄭立初
　　　　　　8.易子豪　9.馮景昕
上半場戰況：吳sir係死硬派「不倫不類兩翼傳中戰術」o既支持者，開波唔夠一分鐘荃官已經攻到入對手禁區，可惜馮景昕唔敢起腳，對手大腳解圍。荃官球員似乎冇乜點吸引上場輸俾何傳耀o既教訓，走位仍然好亂，傳波永遠唔落位，有身型優勢o既呂明才守得好輕鬆。利家義一個人串起成個中前場，不過始終冇機會撕破呂明才o既密集防線，反而呂明才o係中場截糊可以即刻打快攻，好彩一對中堅包位一流，呂明才基本上冇射門機會。不過足球唔係少攻門就會輸o既，上半場中段呂明才o係右路禁區得到罰球，個左腳仔大腳扯去遠柱，個波突然o係巨乳手頂曲墜直入右邊死角，第一次射門就大開記錄，把握力o既分野！落後o既荃官積極反撲，初仔、黑柴係咁o係兩翼製造機會，不過馮景昕今日o既表現令人失望，唔敢衝、唔敢撞、唔敢起腳，荃官o係前場就好似打少個咁。利家義半單刀俾龍門封出，左路角球傳中門口大混戰俾對手解圍，初仔落底斬中冇人接應，林家禮扣過對手起腳又省到人彈出，結果同上場一樣，荃官半場落後0比1。
荃官o既整體表現已經比上場好o架喇，輸o個球咁靚，無話可說啦。不過李文彬o係中場幫唔到行家義手，致命直線都好似未放過，馮景昕更加唔使講啦。其實失o左波之後球隊o既組織力已經好番o的，不過就冇因應對手龍門唔識接波呢個弱點(呢個係我o既觀察)嘗試o係禁區頂放多o的冷箭，落後你有少少唔夠運。下半場吳sir冇再俾機會馮景昕就由阿沈入替佢，球員o既位置亦有少少變動：
　　　　　　　　1.吳向宇
3.沈宗傑　16.林家禮　17.楊肇年　13.陳國榮
12.潘政賢　15.李文彬　11.張浩勤　14.鄭立初
　　 　　　10.利家義　8.易子豪
下半場戰況：荃官呢場再輸就就會提早o係小組出局，所以唯有將利家義推上前場博殺，潘政賢o係右路放波，而林家禮亦多o左後上助攻，希望o係下半場谷盡追番兩球。利家義o係前線算幾活躍，離門廿幾碼右腳腳面窩利抽射柱邊出界。李文彬俾吳sir噴o左一輪，威脅會換佢走之後當正醒神番哂，o係林家禮出擊o個陣包番佢個位，呂明才下半場仍然係冇攻勢。不過荃官始終捉到鹿唔識脫角，幾次攻門都係掠門而過，兩邊龍門都係得閒到死。陳國榮打打下老抽，隨勢換埋7.梁銘智入o黎擺大個頭，可惜佢同隊友協調唔到，荃官都係破關乏力。球證長笛一鳴，荃官繼上場對何傳耀之後，再次以0比1飲恨，兩戰全敗得0分，小組排第四，就算下場對聖芳濟贏幾多球都要初賽出局！
其實下半場球隊已經打出應有o既水準o架喇，入唔到波係唔夠運，而對方又把握到僅有o既攻門機會，我o地唯有接受兩連敗o既現實啦！吳sir話幫我搞番掂張球員證，下場對聖芳濟一定會俾我出場。嘩，o係最強弱懸殊o既比賽先派我出場？不過都唔緊要啦，有得出場已經好滿足喇，將目標定o係失少過5球啦，場波o係20/12葵芳運動場打呀，大家o黎幫我打氣啦，唔該o丫！
完o左場之後返荃灣，約o左Candy拎番本diary，之後hea足兩粒幾鐘先捨得返屋企。

2003年Eric好歌流行榜(第46週)：
1)沙(何韻詩)
2)四月生日(梁詠琪)new
3)太想愛(劉德華)new
4)自由行(楊千嬅)
5)放生(關心妍)new
6)必殺技(古巨基)
7)幸災樂禍(陳奕迅)
8)出賣(容祖兒)new
9)我不會唱歌(李克勤)
10)一個鐘之後(鄧建泓)

>>November 15, 2003 at 2:34:26 PM GMT+8

2003 年 11 月 13 日 星期四 【晴】

朝早狂睇波，先睇NBA候斯頓對達拉斯，姚明打得唔差，不過達拉斯整體級數高o的、發揮好o的，最後達拉斯贏。之後睇車路士對紐卡素o既英超重播，場波上星期日打，最後車仔怒炒5比0，班球星個個著哂火，紐卡素條豆腐防線毫無還擊之力。車仔季前大灑金錢瘋狂擴軍，皇馬就唔使講啦，一季買一粒世界頂級巨星，兩隊都係「用錢撻人」o既球會，扭曲足球o既意義，人人得而誅之！o個陣我突然有個idea，o係車仔皇馬以外o既歐洲班霸當中每隊抽一個球員出o黎組成聯軍同佢o地砌，集天下之大成將「金錢足球」徹底摧毀！呢支聯軍仍然係用我越o黎越鍾意o既4-2-3-1陣式：
　　　　　　　保方
辛尼迪　　史譚　　捷禾　　艾殊利高爾
　　　　雲保美　　加度素
　　朗拿甸奴　波歷克　維辛迪
　　　　　　雲尼斯達萊
後備：杜迪克　盧斯奧　雲貝頓　沙比艾朗素　迪高　雲達華治　彭迪安尼
或者有人會覺得我好無聊，不過我個腦就係成日都諗呢o的o野，改唔到。
難得一日假期，我有做正經o架！睇o左少少History咁啦，下星期二測German Unification嘛，我唔想好似上次Italy咁戰死沙場呀！


>>November 14, 2003 at 1:05:39 PM GMT+8

2003 年 11 月 12 日 星期三 【晴】

唔知今日算唔算美好呢？
唔舒服，中化堂完全係發夢，根本冇精神聽書。之後一轉History蝦同Candy就入o左sick room，我繼續上堂，不過我越坐越唔掂，第二堂點都要入去抖下，Miss Leung話唔好，但係就俾我「恰」一陣，抖足成堂，果然好番好多。
今日6A特別多人入sick room，Buss堂又有Mina同楊晴旭入去，仲有長期住客蝦(有冇人探佢？)。兩堂Buss之後，我、肥峰同陳江決定入sick room避5 + 1兼溫中史，不過佢好似見到我行入去，冇問題o掛？不過我仲有問題，點解蝦佢o地咁戇居專登走番去上5 + 1堂？
本來Lunch之後Triple中史要測《史通》 + 《文史通義》o架，不過蝦同Mina佢o地動議將個test押後，最後都爭取到，Lim Sir仲好似話下次都只係測呢兩本書，《廿二史劄記》唔使測，萬歲！講完Billy最有興趣o既鄭和，Lim Sir話教多個細topic交通史呢part又就快完喇，如無意外下次係市舶司貿易，咁咪即係冇馬可孛羅？冇都冇所謂o既，反正都係唔識！
今日見到好多舊同學呀，先係聰返o黎拎會考cert，之後又見到小邪搵死魚補Maths & Stat，我、Billy同魚帶聰參觀下新翼，不過佢似乎最鍾意個新hall喎！走o個陣o係大門口見到周詠敏，燈位撞到何竣詩同吳家寶，傾o左幾句，過o左馬路就係Lily同芝士，七仔門口又輪到阿雪(我今朝都撞到佢)，真係好多，好難得，不過點解仲係冇肥鵬o既？
之後同魚、聰去麥記打躉，狂吹水，鬥講自己學校o既事，hea到差唔多1820先散。仲有撞夠人o架，返到屋企樓下又撞到溫海雲，小學同學o黎o既，原來佢o係原校做社長，佢竟然話唔辛苦！各位社長要學習下喇！

Re香港佬：我從來唔會睇小任何人o既～

>>November 13, 2003 at 2:03:57 PM GMT+8

2003 年 11 月 11 日 星期二 【晴】

Triple Buss終於教番書，不過李sir講得唔係好明，要concentrate多o的o係Buss喇！
History輪到最後o個組presentation，French Second Empire完o左，不過Miss Leung又串o左我一鑊！
中化講實用文，Miss Fung把聲實在太溫柔喇，差唔多全班人都冇聽，我爭o的釣到條大鱷魚喇！
Lunch蝦突然拎o左箱o野上課室，原來係Bamboo啦啦球，Lo今日有孫中山壽辰假放(勁羨慕囉，點解今年荃官冇？)，有時間搬返o黎。不過魚好似唔多高興咁喎？算啦，依家o的啦啦球冇穿冇爛咪得囉！
PE吳sir又一大輪廢話中o既廢話，好心你啦，冇o野講就唔好講！沙咀道好似搞緊小學校際五人賽，搞到我我o地冇波踢，唯有同阿釗打羽毛球，不過勁大風，成日打唔到！
Class Period又係自己做自己o野，冇人得閒睇o個套已經睇o左幾年o既video，當然我都冇睇，中化功課未做完o架，夜晚又要溫中史，聽日測《史通》同《文史通義》，o係學校做得幾多得幾多啦！
放學Academic Development Team第一次on duty，專幫F.3補，同場有馮景昕同阿沈客串。入得補習班，o的人真係厲害，完全唔讀書，係咁吹水、睇雜誌，不過其實呢o的o野我都成日做啦！老實講多數F.3都係o的理科有問題，所以今日阿釗踢哂腳，相反我同牛榮就可以做自己o野，但係其實我都做唔到幾多。同個F.3傾下計，發覺佢同我o既初中經歷差唔多，都係衰到貼地o個隻，我俾o左o的advice佢囉，當鼓勵下佢囉，希望佢得啦。

Re Cafu:唔知呀，不過一切已成過去…其實你覺得我守PK勁都係因為你衰o係我手上衰得多o者！
Re荃官神秘人：邊個？多謝抬舉先，事實上我自問o的位置感同長傳都一定好過胡文瀚o架，佢o地唔出我都有佢o地理由o既，始終我俾唔到人十足信心。
Re香港佬：……

>>November 12, 2003 at 3:50:25 PM GMT+8

2003 年 11 月 10 日 星期一 【微冷】

如果唔係隻o尋晚抽o左筋o既右腳仲好痛，今朝架地鐵o既天花板可能已經俾我頂穿o左！
身為Physics阿sir，張偉文連最簡單o既道理都唔識！企o係最前，後排o的人把聲自然聽得唔清楚啦，我冇掂Physics兩年幾都曉喎！試下企後面聽唔聽到最前排o個o的o丫笨！
Triple History要presentation，老實講我都唔知自己講o左o的乜，冇prepare過。
小息後又o黎Triple UE，先做Listening，o的感冒開始發作，狂打乞嚏，完全concentrate唔到，好唔掂呀。
Lnuch越o黎越頂唔順，決定miss中化，同歐羚、Alison入Sick Room抖。休息o左一堂，精神番少少，上番中史，終於講鄭和下西洋喇。點解咁鍾意鄭和？問Billy啦！佢對鄭和最有興趣o架(留意：係鄭和，唔係鄭和七下西洋)！
本來要上5B做DBQ Workshop，不過最後delay到下個再下個星期一。放學o係課室hea一陣，睇到乜o野叫「應有此報」，虐待得咁過癮？人o地虐待番你囉！o係度奉勸各位，如果你同另一半都有天生虐待癖，最好唔好生BB，禍延下一代！
返到屋企本能反應地即刻聽903，森美講o左o的o野，感觸良多添！

Re蚊：冇唔開心呀，有o的失望o者，因為係輸俾自己！

P.S.今日係我偶像之一，奧脫福第一門神舒米高(唔係巴夫斯)o既40歲生日！

>>November 11, 2003 at 2:38:58 PM GMT+8

2003 年 11 月 9 日 星期日 【微冷】

本來今日應該係美好o架，但係…
印象中Miss Yu好似話星期三先要全人類換哂冬季校服，而我屋企又得一年長袖恤衫(另一件簽哂名)，所以我今日仲係著夏季。o係長沙灣月台就有冬季荃官人歧我，沿途都唔見有人著夏季，返到課室，全班6A得我係白褲，標奇立異！
5 + 1又o黎喇，之前佢話唔想我burden太重，Subject Rep點都唔會係我做。點知佢今朝要我做住Subject Rep o既工作先，直到搵到solution為止。咁出爾反爾都有o既！
History同Polly、Mina一組睇French Second Empire，Mina成日stop我講o野，你使慌Polly聽唔切咩？
Triple Buss又有open book test做case study，又係做唔切o個o的位！
同子建牛榮去哈迪斯食完lunch之後返課室，同林挺講波經，講放學o既社際，講埋一份o既係…Step同思穎，仲有Judy？Grouping怪得極度離哂大譜！
中史同中化都係渾渾噩噩咁過，因為個心早就去o左社際Plum vs Pine度，放o左學就即刻落更衣室換衫。
4E胡文瀚口碑一流，自知好大機會繼續做後備龍門，所以好快出沙咀道熱身，希望熱身做好o的，博佢o地回心轉意投我一票。點知壓力越大表現越差，未投票都知結果，大比數通過胡文瀚打正選，Plum衛冕路第一擊o既正選名單：
　　　　　胡文瀚
34.景恆　17.楊肇年　10.潘政賢
　　　　13.徐紹峰
　　9.馬展峰　0.徐家樂
　　　　8.李業彤
一開波Plum就壓o係前半場狂攻，不過因為之前從未操過，走位好亂。馬展峰唔識落底，後防又支援唔到中場，所以其實只係波來波往，得連續第七年踢社際o既Zero同肥桶最活躍，Zero仲好快整球禁區頂窩利腳面拉入死角，先開紀錄！滿以為Plum一球在手會好踢得多，點知Pine一次所謂反擊左路傳中，徐紹峰右腳腳面一個世界級烏龍波慢流網仔，Pine毫無攻擊都可以閃電扳平！比賽重返起點之後戰局完全拉鋸，「Pine入球功臣」徐紹峰打到冇哂影，前又駁唔到腳、後又掃蕩唔到對手o既反擊，搞到潘政賢都唔敢谷得太上，結果Plum前後場就出現好大o既斷層，完全冇辦法撕破朱仔率領o既防線，最後上半場以1比1結束。上半場Plum打唔出應有o既水準，進攻冇組織，hold住個波都攻唔入，Pine冇乜攻力仲擺三個後衛，潘政賢連上都唔敢上，情況同上年一樣。
原來2號場有人book o左，下半場要搬去隔離場踢(據聞聽日Camphor vs Bamboo會取消，因為未book場)。開波冇耐，Pine後衛o係禁區hand ball，只可以一步助跑o既點球由肥桶操刀，射斜，錯失o左再超前o既黃金機會！Plum要作出調動喇，開始冇氣o既Zero由李文彬入替；o個邊箱本來話唔踢o既鄭立初最後都係落場，換出社長陳梓豪。呢個調動大大增加Pine中場o既控球能力，開始組織到直插Plum心臟地帶o既攻勢，好彩楊肇年同潘政賢全部清哂。Plum之後再由馮景昕、張立入替肥桶、馬展峰，反正攻唔入人o地禁區，就紮定炮台o係外圍攻擊啦！不過Plum始終冇乜點考驗到對手龍門，只係張立禁區怒射柱邊出。之後Pine又係左路傳中，潘政賢解圍撻Q爭o的擺老烏，撞右上柱角出界！最激唔係呢次，反而係初仔方圓十里冇人拍佢，俾佢o係中圈控波落地，180度轉身之後大腳笠胡文瀚，好彩佢打足120分精神擋出，中場搞乜鬼o架？點可以俾初仔轉身？球證甄嘉浩吹雞，法定時間1比1完場。
加時15分鐘，唔分上下半場。張立直線送馮景昕一程單刀，龍門擋橫李文彬趕唔切補中！加時完全係Plum控制大局，不過始終冇辦法撕破對手密集防守，又唔記得遠射，破關乏術之下維持1比1完場，要以最殘忍o既互射點球分勝負。
Plum射先，頭五輪順序係張立、馮景昕、李文彬、潘政賢同楊肇年，第一射張立同對面朱仔都入。第二射馮景昕冇信心之下射失，對面黃志揚射，佢柱邊o架，不過甄嘉浩竟然話佢未吹雞，要重射！好心你睇o左球例先啦，呢球「攻方得益」唔應該判重射o架！之後好彩第三輪Pine唔入，不過射到第四輪，潘政賢又宴客！呢鋪追唔番喇，隨住Pine第五輪射入埋，Plum最後總比數輸4比5，爆大冷衛冕失敗！
呢場波輸o係邊？唔係徐紹峰擺烏龍，唔係肥桶下半場點球宴客，更加唔係馮景昕潘政賢互射階段射失，我o地係輸自大！我之前約過人出o黎夾番下o架啦，甚麼「使乜練」、「落到場自然識踢啦」、「唔得閒喎」，結果一落場就靠打天才波，走位差、意識唔夠，本來高一皮o既水準冇哂！明知中場唔夠人就打四人中場啦，好似「雙中堅兩翼陣式」係毒藥咁，唔係話用我呢個陣一定贏，不過點解唔試下喎？算啦，完o左喇，講乜都冇用。
之後返哂入學校，發哂火咁瘋狂怒抽，盡情發洩，當然唔少得我o個份！社長「請」飲o野，慢條斯理咁換衫，1815先返屋企。一入屋，右腳小腿突然抽筋，依家仲好痛！

>>November 10, 2003 at 4:03:31 PM GMT+8

2003 年 11 月 8 日 星期六 【暴雨】

o尋晚睇波睇到好夜，睇住阿仙奴一世夠運咁執番三分，搞到今朝好晏先起到身。仲有UE份Practical Skills未做完，一定要搞掂先，唔可以唔交。5 +1叫我o地用1小時45分鐘完成，我用呢個時間…淨係做完Task 1，Task 2 & 3要多45分鐘先做得埋，係咪太慢呢？我發覺我寫o野太慢喇，中史又係咁、History又係咁，考試死硬喎！幾時先會有進步？

Re Su:某程度上都係係你陪我o地玩o架，Anyway生日大哂嘛！

P.S.小弟屋企電話壞o左未整，要搵我就chat我或者打我手機。

>>November 9, 2003 at 2:49:03 PM GMT+8

2003 年 11 月 7 日 星期五 【雷雨】

今日幫Su補祝生日，去力生「江戶前」食lunch，我、聰、小丸、單鳳、魚同陳慧都有捧場，不過小邪就最後甩底冇出現！江戶前o的o野又幾好食o既，不過o的waiter就尚待改善。大家講下自己學校o既o野、笑下、互相串下，$23就埋到單喇！
之後上o尋晚Su入唔到o既機舖hea，撞到林慧豪、Dodo同洪爺，不過我同聰冇打(Su、魚、小丸同單鳳玩賽車)。好快我o地又轉移陣地，去平o的o既City打，我以前未入過機舖打機，今次玩o左賽車，超廢，我果然係「打機白痴」。約o左1600深水埔飛髮，我玩o左冇耐就離隊喇。

2003年Eric好歌流行榜(第45週)：
1)自由行(楊千嬅)
2)東風破(周杰倫)
3)沙(何韻詩)
4)亂世佳人(Twins)
5)我不會唱歌(李克勤)
6)一個鐘之後(鄧建泓)
7)十個分手的理由(蕭正楠)
8)必殺技(古巨基)
9)獻世(陳小春)
10)幸災樂禍(陳奕迅)new

P.S.今日係金希文正日生日，祝佢生日快樂！

>>November 8, 2003 at 3:08:09 PM GMT+8