2004 年 4 月 16 日 星期五 【乍寒還暖】

今日保安道街市門口有民建聯o既攤檔，佢o地倒緊自己米：幫人登記做選民，呢點佢o地內部多少一定會認同。其實唔使佢o地做戲，更加唔使政府唔情願咁宣傳，自然有人呼籲市民、幫市民登記。民主發展網絡聽日會o係全港超過100個地方設立選民速遞站，未登記o既合資格選民(7月25日前年滿18歲o既香港永久居民)可以即場登記，我唔係太知荃灣邊o的地方有，不過來來去去都係o個幾度，總有一間o係左近。
WE7 International繼續玩Master League，一路贏波一路有獎金落袋，一有錢就擴軍，連自己都唔放過(唔平o架)，呢支明星隊實而不華，強！

　　　　　　　我(全隊最矮)
　　　波頓　艾耶拉(巴拉圭)　佩奧爾
文仙尼　　艾比達　　巴拉查　　　捷禾
　　　　　　　　加卡
　　　　　杜格巴　　利耶斯
後備：尼美、歷基(Lequi阿根廷後衛)、高路托利、謝列美、艾比亞、李榮杓、中村俊輔、域陀、米斯達(我本來打費蘭度托利斯主意o架)、艾列頓
基本上大半隊西班牙國家隊都砌得出，呢隻game用3-4-1-2非常之咁好，捷禾踢左翼衛效果仲好過打中堅，同文仙尼或者謝列美甚至域陀o既雙翼齊飛威力無比，全力進攻o個陣差不多可以有六七個球員o係前半場。今集o既我撲波姿勢真係超似自己，成個禁區控制哂，打30場聯賽只係失o左11球，仲包辦埋兩個12碼。中場中路攔截力極強，華倫孖寶玩哂，有艾比達o係前面，佩奧爾不知幾咁得閒。巴拉查、加卡、利耶斯o係杜格巴周圍做策劃，又有得後上攻門，杜格巴通常o係龍門口只需要做最簡單o既工作。後備兵實力其實同正選差唔多，好多都可以打幾個位置，要變動真係好有彈性，隨時可以出域陀改打4-2-3-1，又或者艾列頓、杜格巴4-4-2雙箭頭，甚至用6個中場鬥搶。
不過球隊仲有地方要補充，尼美成日冇態，萬一我又唔打得，後備席得一個信唔過o既固有龍門Inorov，所以要搵定個咁上下o既龍門做我副車；另外後防左路調動空間唔夠，如果撬到賀夫蘭過檔就好喇。

2004年Eric好歌流行榜(第16週)：
1)一拍兩散(容祖兒)
2)講妳知(張學友)
3)Never Been Kissed(At 17)
4)我們的合唱歌(2R)
5)一秒(Mini、方力申、何韻詩)new
6)奇洛李維斯回信(薜凱琪)
7)一加一(胡杏兒)
8)前戲(傅珮嘉)
9)找我(梁漢文)new
10)洗剪吹(吳浩康)new

Re香港佬：你估o岩o左球隊，佢算係主力o架，不過所謂似陳友可能只係我一時間o既感覺啦。

>>April 17, 2004 at 3:13:01 PM GMT+8

2004 年 4 月 15 日 星期四 【微雨】

一朝早就要返學校，1000萬個唔想離開張床呀。
幫圓tum tum上螺絲，唔識用力，都係其他人做埋啦，托起塊鏡o的木甩釘，要重新落過，Judy超識出力。Miss Yu提我o地到時係第一組出場，可以乜乜物物，照計時。Dress Rehersal全世界埋位，scene 6塊鏡擺錯位，個台太暗，睇唔清楚地板o既貼紙，下次睇位囉。排完落cover繼續練set，速度開始快，因為有哂指示，之前o係hall之所以慢，to a certain extent燧因為我唔太清楚每個scene大概幾時完，未準備好。
10:00左右已經收得工，走落球場同小鳳佢o地打籃球，身高優勢=/=籃板優勢，我都係安安份份打防守做分波算啦。o係cover發夢，完全唔知想做乜，History做唔得幾多，唔再諗Stalin邊年出世，同余寶講波經，10年前o既南華、東方陣容佢都記得，記得希福特喳，有種就買今晚列斯聯4比1贏阿仙奴o既波膽！之後唔知點樣玩槍，BB彈射唔低汽水罐，紅外線指住人o地…………最後又玩駁歌名，Vincent屈機，我事後先諗到大把歌名還擊！Hea到12:40先走人，都係返屋企食飯算啦。
NBA季後賽星期六開波喇，西岸形勢比以前更亂，丹佛、候斯頓、孟菲斯都係季後實新丁，木狼、湖人、馬刺過關應該唔會太難，木狼爬得上一號種籽個位應該唔會連續第8年首圈玩完o掛？三隊之中冇一隊明顯佔優，西岸決賽分分鐘要打到第七場，反而西岸四強當中帝王最危險，Chris Webber復出之後表現每況愈下，面對達拉斯最多都係鬥射波，可能又重演上季o既結局。Kobe著哂火，如果湖人其餘三大天王keep住平穩狀態，o的後備交到功課，郵差下季應該唔再派信喇。
早幾年「西高東低」o既現象好似有o的變化，東岸o既印第安納溜馬、底特律活塞都有實力同西岸球隊一戰，尤其底特律季中交換Rasheed Wallace過o黎之後，內線力量冠絕東岸。東岸貧富懸殊o既情況比以前闊o左好多，得勝率唔過半o既仲有兩隊入到季後賽(西岸兩隊贏多輸少o既入唔到)，低種籽球隊(5-8)當中Hornets應該會最博，下季打西岸冇o架喇，今季拼盡博入東岸決賽啦，雖然機會麻麻。

Re香港佬：o尋晚o係亞視國際台見到佢o架～

P.S.(1)阿叔o個班TVB講波佬水準拍得住黃興桂………………
P.S.(2)見到阿婆掃地好辛苦，好心o既你會同佢講乜？(猜英超球員)

>>April 16, 2004 at 3:43:42 PM GMT+8

2004 年 4 月 14 日 星期三 【晴】

朝早o係屋企睇上星期阿仙奴對利物浦o既英超重播，明明阿仙奴疲兵上陣，利物浦自掘墳墓，奧雲單刀都可以飛機，謝拉特攔截唔識收腳。以佢o地咁o既狀態，有o的擔心英格蘭o係歐洲國家盃o既命運，柏加有冇實力代替謝拉特o既位置？奧雲靠唔住，比亞堤 + 阿倫史密夫會唔會係另一對尖刀？只可惜艾歷臣o係前鋒線上o既排陣有o的死硬派，似乎只係得泰利頂替李奧費迪南o係中路同蘇金保合作俾到我大少少o既信心。
晏晝返學校，Plum有hall期，set & prop做好哂，今日不斷試擺位，分好工，但係未人齊，要搵住替工先。簡直靠害，個圓tum tum幾日前髹好油，今日都仲未乾得哂，一拎起，我同小鳳四隻手齊齊中哂，有冇人肯同我做朋友？比起其他社，我o地貼膠紙好似冇咁多，不過初時set組轉scene搬o野反應慢，俾人狂噴。何king友情客串魚蛋佬，我同小鳳建議佢on stage踢人字拖，扮到十足十街邊檔，搞下guest都唔錯啦！失哂魂，有鑊衝o左出去，但係開o左幕，要"lay"塊鏡後面避，笑死。
完o左hall期落cover，見到聰o係樓下，一支箭衝埋去，跟住蚊、小丸又o黎埋，實在太耐冇見喇。Bamboo發生流血事件，某社員被社長錯手擊傷，頭破血流，小丸坐o左一陣就走，我、蚊、聰o係花園坐，原來學校仲有地方俾到人抖氣。之後蚊繼續坐，我o地join埋Billy o係學校周圍走，同校工傾計，今年F.5的確比往年差，Heidi Lo可唔可以保住「優良傳統」？
今日o既drama總算做完，去tea，難得大忙人Mina得閒，join埋聰、魚、蚊，去吉野家打躉。得我、聰叫o野食，甚麼美蓮達橙汁以前未飲過…………今次都冇飲。有人大吐苦水，o的人太歲頭上動土，唔識死，「難道要對著你力竭聲嘶」？大講人際關係網，你交遊廣闊囉！唔想返屋企住，一齊行街，真係得個行字，Mina走先，都係o係舖頭門口等，hea到19:00各有各散，同蚊一齊走，呢個問題真係值得我深思。
有人俾我一個重大任務，雖然係開正我o個瓣，但係一時間要諗20條問題的確唔容易………………

Re同版主一樣唔識解題o既人：呢題都好似寫唔多幾版喎～

P.S.(1)有冇人今日o係cover發現一個曼聯7號簡東拿o既鐵章？一節手指頭咁大o架，拾獲請與小弟聯絡，無酬。
P.S.(2)有個NBA球員有o的似陳友～
P.S.(3)董建華，我忍o左你好耐！

>>April 15, 2004 at 4:24:07 PM GMT+8

2004 年 4 月 13 日 星期二 【晴】

返學校繼續drama搞set，原來冇返一個禮拜仲未完成。今日係星期三，點解會有旗賣o既？
上螺絲，差o的觸傷o係camp俾陳狗整親o既右肩傷患，痛。幫燈柱、扶手髹油，學精o左，戴手套，跪o係度髹包唔會整污糟手手腳腳，享受髹油o既過程，可以乘機諗其他o野。其實overall冇乜o野做，想做中史DBQ，不過唔識做，有o的人好似連題都唔識解，唯有放棄。渾噩渾噩咁過o左成個上午，小妹請食西餅，鮮果撻，好正忌廉味，放o係西餅蛋糕布甸裡面o既芒果幾好食，不過一個個o既芒果就唔知點解硬係好似好難食咁。跌過落地o既菠蘿好好食咩？
Daddy約o左我入屯門青松觀拜祖父母，晏晝留o係學校hea，等電話鬆人去o個邊會合。o的香差o的燻盲對眼，拎o野出去燒(我終於知邊兩個係冥都銀行o既正副行長喇)，返o黎擺o係度o既兩包檸檬茶都唔見o左，唔係$3.5都要貪嘛？
反正入o左屯門就順便打斜行去大興村，睇下遲o的考oral o個間宣道中學o係邊，原來地圖睇到o既路線唔一定係最快，地圖都有好多o野show唔到。其實宣道中學差唔多係夾o係良景村同大興村之間，兩邊都有車返屋企，決定揀大興。

>>April 14, 2004 at 1:44:56 PM GMT+8

2004 年 4 月 12 日 星期一 【晴】

聽歌，聽歌，聽歌………………
o係camp唱K已經好多人問我點解唱o黎唱去都係Eason，多好歌嘛，o的人唔多熟o既都係好歌！

〔我甚麼都沒有〕
我沒有我沒有沒有　從運氣到信心到天空宇宙全屬某某　未明何處有售
我沒有理會有沒有　連伴侶也要花費多幾倍力才望個夠　但仍然難擁有

曾愛惜的總要放手 難接手的又來等候 如我愛你你愛的他都要走
同樣犯不著哀求　遺憾夠　還要去張開笑口

連夢裏也會覺得快樂難求　連淚光都光不過黑夜盡頭　不過不過我不用難受
像我對你也不敢講永久　連天都知這瑣碎悲哀背後 Oh no~　一切都不算得罕有

我沒有我沒有沒有　從樂趣到痛苦到悲歡愛恨全被折扣　亦沿門去聽候
我沒有理會有沒有　連玩意也要花費多幾倍力才玩個夠　命途無奇不有

連夢裏也會覺得快樂難求　連淚光都光不過黑夜盡頭　不過不過我不用難受
像我對你也不敢講永久　連天都知這瑣碎悲哀背後 Oh no~　一切都不算得罕有

連夢裏也會覺得快樂難求　連淚光都光不過黑夜盡頭　不過不過我不用難受
像我對你也不敢講永久　連天都知這瑣碎悲哀背後 Oh no~　一切都不算得罕有
其實我跟你都不算得罕有

〔黑暗中漫舞〕
為何未能學會起舞便已抱緊你　誰料到資質不配合你　左腳舉起了便要別離
為何未能讓我衰老便要放開你　陪你跳通宵都夠力氣　請鑑別姿態美不美

學跳舞　有福氣　手差點撲地　猶如自卑水銀瀉地
學愛你　美不美　天黑黑到地　朝著了壞的燈泡舞著別離
其實地球沒有你　站到虛脫便會飛　何必怪責雙腳　未夠伶俐　不比你優美

為何未能待我差到讓我去憎你　捱到這傷口激發士氣　左腳高舉到白髮齊眉
為何未能待我好到沒法捨得你　頑固的車它追了萬里　先發現一早洩光氣

學愛你　美不美　天黑黑到地　朝著了壞的燈泡舞著別離
其實地球沒有你　站到虛脫便會飛　何必怪責雙腳　未夠伶俐　不比你優美

為何未曾讓我得夠便要損失你　捱到那一天參透佛理　手會鬆燈會滅有限期
為何未能讓我死去便要認識你　難道你很想天使問我　我的舞步跳得可美

>>April 13, 2004 at 3:45:32 PM GMT+8

2004 年 4 月 11 日 星期日 【炎熱】

左腳腳面o既傷口仲好痛，行路仲要拐下拐下咁，唔會係發炎o掛？
對腳出到力，都算復原得幾快，不過短時間內唔好搵我踢波！
Camp完仲去埋遊行，連續幾日都唔o係屋企，o的功課進度相當緩慢，中史DBQ完全唔識做，睇睇下success走o左去搵周公，都係算啦，可能呢個假期會就咁白白渡過喇。

Re Candy:ET當時o係305房俾成村人枕頭圍打～

>>April 12, 2004 at 2:19:53 PM GMT+8

2004 年 4 月 10 日 星期六 【晴】

參加民間人權陣線主辦o既「反對人大釋法大遊行」，雖然經過四日三夜o既camp令對腳軟哂勁痛，但係眼見香港最引以為傲o既司法獨立受到嚴重o既蠶食，一國兩制名存實亡，我不得不上街發出聲音。
去到遮打花園，人山人海，點知點解俾新城財經台o既記者揀中做訪問，覺得自己講o既point好亂，最有自信都係呢句「唔理中央同特區之間係分權定授權，人大釋法肯定係越權」、「三步曲變五步曲係多餘，無中生有」，後面個阿伯勁appreciate我。
一條以前未試過o既遊行路線，由遮打花園遊行去西環o既中聯辦總部後門(中聯辦身有屎，唔敢俾我o地去正門)，連阿公阿婆都出埋o黎示威。一轉出德輔道中，民主倒董力量嗌「董建華下台」，長毛話「董生訓緊晏覺，我o地去嘈醒佢」，不如就去嘉慧臺啦。經摩利臣街出干諾道西，沿海傍慢慢行入中山紀念公園，突然停o左好耐，因為龍頭同警方有爭拗，據聞警方冇一如事前傾好o既安排咁o係西區警署對開窄到無輪o既行人路開多條馬路，搞o左一大餐先小題大做咁拉人鍊開一條線。由正街轉入德輔道西，18:20去到中聯辦後門(你話死唔死o丫，佢連五星紅旗都唔敢掛)，o係欄杆綁上黑絲帶，交簽名信表達反對釋法o既訴求後就返歸。
今日見到好多名人，o係遮打花園見到吳藹儀、梁家傑、余若薇(佢遞表叫我簽名支持07直選，我唔記得問佢要簽名)，倒董力量o個度見到長毛、曾健成、黃毓民、蕭若元，再過幾個街口有李柱銘(有簽名喇，我講o左句「安民講o野唔使理佢」)，o係中山公園睇住湯家驊、何秀蘭過頭先，終點有蔡耀昌、李卓人把守，最後仲同司徒華搭同一架巴士，佢出旺角！
遊行人士好多都不滿羅范椒芬「學生最冇資格(least qualified)批評特首」o既言論，鬧飯焦可恥，睇錯人。老懵董投資教育，我o地受惠，所以唔應該批評佢？報恩咩？一單還一單，你管治無方係事實，我o地有批判思考能力，識明辨是非。佢注重教育，你唔講猶自可，教育政策朝令夕改，一榻糊塗，仲好意思話我o地受惠？

2004年Eric好歌流行榜(第15週)：
1)我們的合唱歌(2R)
2)講妳知(張學友)
3)一拍兩散(容祖兒)
4)Never Been Kissed(At 17)
5)世界之最(你願意) (鄭秀文)
6)香港地(陳冠希)
7)目黑(周國賢)
8)前戲(傅珮嘉)
9)奇洛李維斯回信(薜凱琪)
10)一加一(胡杏兒)new

Re Candy:又好似係喎，"open secret"呢兩何字有骨喎，好似祭ET咁祭你旗o架！

>>April 11, 2004 at 5:47:53 PM GMT+8

2004 年 4 月 9 日 星期五 【晴】

Day 4(Last Day)
時間真係快，四日三夜o既camp已經到o左最後一日，有o的唔捨得添。對腳經過o尋日已經軟哂，幾乎起唔到身。職業球員最密都不過係三日打兩場，六日打三場o者，我o地竟然要連續兩日踢80分鐘！
繼續係黃社對綠社，對手有9號傷癒復出，陳狗守龍門，1號同ET都上哂力。相反我o地博o左o尋日就已經少少跌watt，俾對手控制戰局，好彩我包中路都算包得穩。連信又o黎喇，明明前面大大條路俾佢走，佢竟然次次都轉身控波先再轉身再走，o的波唔係到佢腳位都唔追，我o地一早交位俾你跑o架啦，波唔會自動送落你隻腳度o架，蝸牛都mark到你啦。人o地頭搥好，我o地唔夠頂，唯有食位唔俾人跳。打o左兩場11號都仲未識睇位，企o係人o地前面mark唔到人o架，你根本睇唔到人做乜，一下過頭波就追唔到。人o地又玩手榴彈，11號就係唔識點防守9號，俾佢飛將軍任頂，又先失波。俾人屈兩翼，我剷唔到1號個波，俾佢傳中，解唔到圍，ET補中掛網，半場落後兩球o既黃社已經散散地。下半場o個球我又要負o的責任，睇到o尋日1號o係窄角度射死紅社係射網角，佢今次起腳o個刻我跳起擋，點知原來佢射地波，龍門又冇封近柱，咁就失埋第三球。其實由失第二球開始、下半場開波同呢球我都試下中圈射波偷雞，一次龍門救到兩次僅僅柱角出界。後上推順遠射越楣而過，之後吊波入禁區得個亂字，最後淨吞三蛋大敗，爭標無望，如果唔係1號仔失機頻頻可能輸得更多。
之後係紅對綠，綠社有陳狗胃痛入廠，紅社有屈宇軒唔打得。綠社呢場只要唔輸就肯定冠軍，而紅社要贏哂餘下兩場先有機會贏得失球。黃社內部一早有共識，個個都唔想綠社冠軍(因為我o地大部分係由紅社轉過o黎)，所以如果紅社贏到呢場，之後o個場我o地特登放水，輸多幾球，俾機會佢o地爭取得失球。紅社角球攻勢，個波經過白界，其實唔入，不過我o地o係場邊嗌入，阿sir亦吹入網，綠社粗口四起，俾牌啦！諗住紅社乖乖地保住勝局就冠軍袋袋平安，點知貪勝不知輸，綠社三次快攻俾1號入兩球，ET入一球反超前，紅社再谷唔起，綠社最後4場10分贏冠軍。
基本上最後o個場黃對紅係例行公事，紅社又有人受傷，7個人都唔夠，迫住6打6。冇喇，全隊都開始冇氣，回唔切防，俾曾禧林射空門。下半場有機會接應角球窩利抽射，又柱角高出，入唔到波之餘失波陸續有來，失多兩球，再一次0比3大敗，紅社4分亞軍，黃社2分包艇。其實都有所交代啦，打出戰意，球隊落力，對得起自己，估唔到自己兩日拼足160分鐘都捱得住，體能好似有o左進步，希望係真啦。顏料最後訓話一番，話大家o係呢個camp都冇乜保留，敢於表現自己，又暗串某o的人玩針對，其實持平o的睇，ET本身都有問題，兩邊都幫唔落。
o尋晚已經執好哂行李，o係房有時間撻落床攤抖，四日三夜o既camp真係搞到成身散哂，不過好刺激。最後o既lunch先o黎咁豐富，canteen好鍾意煮牛肉，又幾好食o既。去會堂出席閉幕典禮，ET代表足球部全體拎證書，火星人代表地球人。最後紅社贏o左團隊精神大獎，我話哂都係半隻「雄鷹」，開心o架！
終於要離營喇，足球部坐同一架車走，臨走拎哂呢幾日o既話題講笑，「ET話人樣衰都係想轉移視線o者」、「細窿唔係窿咩」，又交換o左ICQ，以後有機會就約出o黎踢波啦。總結呢個camp，世界好大，出面o的人身型高大，身位玩哂，腳下功夫亦好得多，絕對唔係荃官o個o的可以相比，好享受同咁高水準o既比賽，周身傷都係值得(我都整傷人啦)。不過硬淨之餘佢o地好似唔太識收腳，張祖龍傷得最多，腳眼腫哂，連埋我至少有六七人掛彩。我呢幾日打龍門o既「神勇」演出未必可以o係沙咀道重現，因為渡假村個場係膠地，放心剷波，o係沙咀道你剷俾我睇。
西貢對面海戶外康樂中心除o左多蚊，整體環境相當唔錯，絕對值得一去。

>>April 11, 2004 at 5:16:51 PM GMT+8

2004 年 4 月 8 日 星期四 【清涼】

Day 3
朝朝起身刷牙洗面之後要落球場做早操，未食早餐邊有力做運動？今次仲要做跑狗添！求求其其敷衍了事等過canteen，改食西式早餐，o的阿華田超香，不過太大份，冇乜人食烚蛋。
未落球場練波住，先o係會堂睇碟，睇世界各地唔同o既技術訓練，o的日本細路個頭都大過個波就學控球，不知幾咁純熟，團隊合作係足球最終極高深o既技巧，五項足球範疇當中佢排第一。
第四課操練：空中控球
齊哂24人練波，最後加入o個兩個好似都好勁，不過唔太鍾意練習。先係大脾控波，用大脾撞波唔難，不過要個波準確落到腳位就非常之難，控到大脾好痛。之後練心口控波，又係難落位，而且成日唔覺意移步就位用腳面控，冇辦法，慣o左。其實對龍門o黎講，控波都好重要，隨時要準備隊友大腳回傳俾我解圍，控得唔好就論盡。
第五課操練：凌空攻門
隊友o係底線拋波入小禁區，唔控波即刻窩利抽射，呢個唔難，咁近對住咁大個龍門都射唔入你唔好踢波(世事無絕對，BB漏波，雞王幫手解圍)，我特登半車身抽網仔，又試左腳，彈楣底入。之後試頭搥攻門，我守龍門，呢個幾考功夫，因為小禁區頂其實得四碼左右，基本上頂中就冇得救，好講反應。顏料一眼睇穿我弱點，話我成日只係將個波擋出，o係真正比賽就大把機會俾人補中，但係我又係習慣o左，因為夾硬接但係接唔到彈出仲危險過大力擋走。
晏晝就開始社際比賽，朝早先俾各隊鬥波熱身。對綠社，佢o地好多人都好扭得，我呢個清道夫都要追o黎追去包位，但係有心留少少力，真正比賽先係最重要，先入一球，中圈開波我偷雞快射搞掂，阿sir竟然話唔算，一腳波得o架！
Lunch前又去唱K，時間唔係太多，只係solo《低等動物》，朝早嗌得多，把聲沙沙地，觀眾死哂。
晏晝開始正式社際比賽，三隊分兩日踢雙循環，第一場先係黃社對綠社，我o地黃社明知實力唔夠所以先求穩守，著16號龜背(冇33號嘛)我o係最後踢清道夫包位，11號同羅子亨打兩閘，後者間中要助攻，其他人都要協助防守。對手o既陳狗好扭得，我唔敢標波，一直都係用阿sir教o既mark人步法迫我埋邊，然後夾擊搶波，好彩佢o地打o既係天才波，雞王走得前但係冇速度冇控球，唔算太難守。我o地最有竄擾力o既10號矮仔開波冇耐俾人撞傷，焗住換BB入o黎，連信要踢最前o個個，佢竟然成日走返o黎禁區o係我身邊，話我o地要防守，哥仔，防守唔係塞哂o的人o係龍門口o架，要多o的人幫手我自然會出聲，你走到咁後我o地搶到波交俾邊個？又行行企企，人o地1號仔o係後場根本可以慢慢睇定o黎交，我o地受o既壓力更大，壓迫佢啦！對方下下炒波上天，我o地總算0比0守住上半場。下半場10號返入o黎，繼續死守，得o的零星反擊，ET差o的近門建功，好彩我出腳快過佢。要講佢o地最厲害之處應該係身位，我根本埋唔到去搶，一次對手大腳送上前場，諗住頂走，點知俾陳狗成份「郎」起攤落地，右邊膊頭落地先，起唔返身，亦睇唔到之後發生咩事，原來跟住雞王o係龍門口又一次執雞成功，最終都要失波。冇辦法啦，推上o的攻啦，一次截到波沿右路推進甩腳出界，6號仔禁區頂柱邊出界，久攻不下，差o的俾人快攻擴大比數，好彩回防閂得快。最後一擊，迫到右路角球，原定戰術，10號仔開，我企o係左邊K角位再後o的後上，扯到對方ET同5號埋o黎些少，就係呢少少空位，角球吊入龍門口，一輪混戰，連信轉身抽射扳平！入o左波即刻就完場，太夠運喇，面對「流氓部隊」執到一分，當贏啦！
竟然猜贏o左，要即刻打第二場對紅社，連打兩場我真係驚自己體力應唔應付到。紅社其實比綠更難應付，張祖龍守後頂哂，屈宇軒有速度，曾禧林控球更加唔使講。次次俾曾禧林扭死，唯有再做陷阱防守，而且佢太自大，有波唔交，我花多o的功夫牽制佢其實就安全得多，不過始終都要失守，已經唔記得點失。落後o左但係攻唔到，繼續死守，一時要睇實曾禧林，又要提防張祖龍後上，有o的吃力，好彩10號返o黎幫手，如果唔係早就輸夠第二第三球，半場0比1落後。邊個後衛防守會唔用超技術？之前o個場已經有少少拉衫，肘頭頂腰唔俾轉身，今場遇上仲勁o既曾禧林，冇得唔出術。試過上半場俾佢走甩少少輸埋身位，轉身倒掛解圍省佢波餅(呢個冇心)，下半場BB兜踢佢要害，嗌哂救命爆哂粗(好彩佢不嬲都錫BB)，最正都係我俾佢變速過o左，我扮反方向轉身，右腳後腳kick低佢，佢當堂發哂火，話我打茅波，我唔否認，但係冇計。佢話「係你撩起我把火o架」，咁仲好，一有到腳，扭都費事，幫我做埋清道夫解圍。下半場成條防線推前，爭取到多o的攻勢，不過都送唔到個波入網，時間越o黎越少，更加要冷靜，完場前右路界外球，手榴彈戰術，龍門都走埋上o黎，我大力掟入小禁區，6號撞甩，10號仔勁"ben"掛網，連續兩場完場前追平！以我o地o既人腳，兩場和哂算有所交代啦，原來我打清道夫都算稱職，而且有力踢足80分鐘(一場40分鐘)，幾滿意，只係我知聽日仲有冇氣博多80分鐘。
呢日最後一場紅社對綠社，曾禧林群眾壓力轉守龍門，兩隊實力相當接近，綠社仍然各自為蹲，全隊仍然唔多肯交波俾ET，紅社組織唔到乜o野攻勢。綠社o的人超爛口，郁o的就爆粗，流氓。1號仔抽筋傷出都仲要咁大聲，o的對白好有生意，連信串ET都不惶多讓，笑到死哂。最後綠社憑1號窄角色射門1比0贏波，暫時4分排榜首，黃社2分緊隨其後，紅社1分。
自由時間約o左柏林佢o地射箭，兩隻手激戰過後已經冇哂力，靶都唔到，仲俾弓彈傷埋左手。
呢晚安排o左BBQ，跟自己o既項目坐埋一齊，遲o左上去其中一個爐已經坐爆哂，焗住坐流氓o個邊，ET俾陳狗佢o地狂針對，1號仲要用叉對頸，BB估今晚之內七成機會開片。ET又係低能o既，雞翼、香腸、魚蛋、魷魚點拮埋一齊燒？
流氓坐o左一陣就執o野鬆人，拎o的o野俾canteen幫佢o地煮埋，$5喳！我o地過多陣都唔燒喇，join埋柏林佢o地散場，又去唱K。先solo《我代你哭》，吊唔起把沙哂o既聲，之後唱《昨遲人》狀態返哂o黎，K房情緒高漲，再同柏林合作《大懶堂》，兩個女仔懶醒走埋出o黎冇所謂啦。本來《與我常在》諗住solo，有個三唔識七o既想唱，一齊囉，呢個名銜我受唔起o架！
趁仲未多人極速沖涼，超快，乾淨o架！返房，見到流氓們爬上營舍後面o既山坡唔知做乜，懶得理。俾BB批中o左，ET真係o係305房俾人祭旗，枕頭o者。平時23:00就要熄哂燈早抖，今晚last night特准只要唔o係走廊嘈住其他人，玩幾夜都得。柏林拎o左我手機，話要影女，最後咪又係乜都影唔到！
經過今日，全身一共有五個傷口，其中三個o係左邊膝頭對落，好痛。

Re Candy:唔一定o架，熟o既人一早知哂你o的o野，冇乜好問，而且有o的問題會唔好意思問。反而同o的唔係太熟o既人玩會敢言o的，少o的保留，又冇顧忌，暢所欲言o的。我又冇乜印象有冇同你玩喎～

>>April 11, 2004 at 5:15:56 PM GMT+8

2004 年 4 月 7 日 星期三 【晴】

Day 2
天公造美，之前天氣預報話呢日會狂風暴雨，點知風和日麗，正。
雖然係三保床，但係都好舒服，半夜好似冇醒過。打電話問賽果，拉科4比0怒炒A米出線，嚇o左一大跳，公告天下，全層樓傻哂，顏料、峰哥兩個負責足球o既舍監仲問我係咪講笑！我都想係聽錯，我捧A米衛冕歐聯o架，依家三大熱門出哂局，唔通車仔最後可以高價收購歐聯獎盃？
記得兩年前o既早餐o的豬腸粉凍冰冰，食o左一定肚屙，所以當時冇食。今次o個o的熱辣辣，正！
第二課操練：傳送 + 走位 + 盯人
09:00開始o既呢課操練多o左幾個朝早先入營o既「插班生」加入，22人。唔好以為呢幾項好容易，其實要傳落位而唔係傳落腳係有一定難度，好講默契，有好多好波之人，就係冇呢種意識。我平時傳波都唔錯，仲識o左盯人有乜技巧，因為我唔算快，所以一定要引對手落陷阱，帶佢o地落死位。阿sir又俾o左好多時間鬥波，分三隊跟隊，有o的勁人o係埋同一隊，我o個隊真係唔算強，但係有個屈機拼命三郎門將，出近封單刀剷波超快，打多個清道夫，其他人又分工分得清晰，靠雞王執雞已經連贏四場。不過足球始終講氣勢，輸o左一場之後就係咁輸，o的波完全救唔到。
Lunch前o既自由時間又走去篤波，其實都冇乜心機篤，o的人根本唔識打。
晏晝又操喇，一日操六粒鐘真係人都死。
第三課操練：腳面射門
阿sir認為冇乜必要掃把腳同死球，教o黎冇意義。最緊要腳面食得應個波o者，呢個我控制到，左腳都試埋，都係唔試好o的。之後又試邊走邊射，我負責守龍門，阿sir示範點做，一腳省埋o黎，反應該超快，大脾撞橫，痛。搵o左教院o的人(即係舍監)同我o地鬥波，我o地拆開三隊打，因為冇乜龍門，我要打幾場。3號o個個死肥仔廢o架，下下踢空氣，又唔識mark人，仲要走去我砷前遮住我，想唔輸都難啦，不過教院o的人又係勁o既，話哂都係今屆大專盃亞軍(當然落場o既唔係佢o地)，身位超勁，顏料一個o係後防打哂，完全攻唔到，1比3慘敗。曾禧林由前打到後成個盧斯奧咁，係就係好波，但係太獨食，又自大，下下自己一個人帶埋死位，考唔起我，一次右邊殺入禁區單刀，出迎，佢快半步起腳，不過就火星撞地球，左腳腳趾公俾佢撞到腳甲邊o的血升慢慢慢慢出，好痛。職業球員都不過係一日操個幾兩個鐘啦，我o地一操就係前後六粒鐘，對腳已經軟哂，行路都冇力。因為太多人o係埋紅社，其他兩個根本連人都唔夠，所以有o的人轉組。我要過黃組？唔好o掛，唔係話隊波廢，只係呢隊連埋我有兩個龍門，另一個蕭芳亭(307房遲入o黎o個個)少少傷唔係點可以出去踢，咁我咪即係唔可以守龍門，要出去踢？ET同其他人已經開始有牙齒印，唔知班友係咪特登針對佢，其實ET本身人格有問題，又爛賭，玩足球機都有得賭，$0.5隻o既鋤dee都可以輸舊幾水，仲要輸極都賭，抵你。返火星啦，地球唔o岩你o架。
Dinner有好惹味o既咕嚕肉，但係早已經冇乜胃口，食唔落，大半碗飯算喇。去室內體育館玩團體遊戲，又係有聊，係咁同祖龍、連信成班波友o係埋一邊攤抖，懶理甚麼估電器，請體諒我o地o係太陽底踢足成日。
營地活動時間，join柏林佢o地去唱K，K房人好多，不過唱o既好少，而且五音不全居多，其實我踢波o個陣已經嗌到聲沙。先同喇沙仔合唱《取消資格》熱身，再solo《綿綿》，因為夠膽一支公？全場歡呼，又嗌encore，講笑喳嘛？同其他人唱埋《安靜》、《失戀王》，今日係咁多先啦。
去遠o的o既浴室沖涼，低能，校極都校唔到凍水，點沖？最後唔知點樣又整到凍水，爽哂。
o係房玩truth or dare，因為大家唔算太熟，反而敢於將心底裡最真o既說話講出o黎，唔怕俾人知，人o地亦唔會笑你。唔係話依家o的朋友信唔過，只係o係o個度更加放膽盡吐心聲囉。

>>April 10, 2004 at 4:44:21 PM GMT+8