2003 年 10 月 16 日 星期四 【晴】

絕對美好o既一日，有PE冇UE，正爆！History Miss Leung搞debate，辨題係"The German Empire was created more by coal and iron than by blood and iron."，18個人9個一組，我呢組有Allison呢張皇牌，仲有其他勁人，掂！
Lunch上過6B o係新翼o既新課室，又大、又光猛、30人用一間40人o既房，好羨慕呀！點解唔將其他F.6搬哂去新翼o者？
之後PE堂又係平時o既對戰，雜牌軍o係進攻上o既分工清晰o左，再加上肥峰救我一命，最後結果係大比數o既3比0！
放學入Store Room撻波，原來裡面仲有幾對boot，我依家呢對太細喇！

Re蚊：幾o架，如果可以搞「超級聯校function」就好喇！
Re邪：佢係F.2打乒乓超勁o既Plum人，呢句係佢o係比賽o個陣同林偉昌講o既。
Re Cafu:咁早o既？其實我o地都係X'mas之後就考試，所以我o地都係冇時間o架。

P.S.繼呂明才、裘錦秋同廖寶珊之後，依家連聰o既梁省德學生會都係荃官人o既天下！

>>October 17, 2003 at 3:52:07 PM GMT+8

2003 年 10 月 15 日 星期三 【晴】

次次Day 5都要做足心理 & 生理準備，因為又有三堂UE連堂！5 + 1真係有鋪串人癮，今次又串番我，我冇wisdom又點o丫？
放學有兩個會要開，先係Academic就快開工，要親自落場，面對o既係以前o既自己！之後6A開會，經濟日報幾日前介紹o左個「年宵兵團」計劃，我o地有$10000資助搞年宵(當然要approve先有啦)，小妹佢o地決定玩，今日開會傾下賣乜。大家七咀八舌，好似只係講好多數會賣玩具，不過詳情要再開會傾。其實講真搞年宵多數係貼錢收場，而且我o地冇乜經驗，可能仲死得慘，所以依家我仲未tick名玩埋一份！

Re Cafu:馮景昕搞o架，我以為得荃官o的人踢添呀！

P.S.恭喜蚊贏廖寶珊學生會選舉，荃官人大舉向外入侵！

>>October 16, 2003 at 1:14:53 PM GMT+8

2003 年 10 月 14 日 星期二 【微冷】

o尋日係History，今日到Buss要test！老實講上o左個半月我都仲未完全掌握到呢科，淨係呢度睇下o個度睇下，結果今日份卷淨係識吹水，寫Essay完全冇point，睇o黎死硬！好羨慕Geog有得出去考察，搞到我都想讀Geog！
Lunch勁瘀皮，向梅玲say sorry & 祝Polly生日快樂！
放學係社際乒乓球初賽，Plum對Bamboo。女子隊係拉雜成軍，最後總場數輸1比3已經有所交代！男子隊就唔同哂，林偉昌 + 吳子健 + 黃俊杰o既配搭將Bamboo打到落花流水，雖然最後o個場有少少驚險，但係都可以直落贏3比0！如果有個隔離社o既人打氣，可能會發揮得更好！
返屋企睇電視，楊利偉為中華民族開創歷史o既新一頁，自己作為炎黃子孫都為佢感到驕傲。

Re聰：我知o丫，其實我狀態都唔好得去邊，有o的擔心自己會累街坊。
Re蚊：應該去，不過遲o的先firm到你。

P.S.吳子健語錄：「輸唔緊要，最緊要贏！」

>>October 15, 2003 at 12:58:22 PM GMT+8

2003 年 10 月 13 日 星期一 【微冷】

美好o既今日要測History，測1848 Revolutions。寫Essay對我本來已經冇乜難度，不過今次o的point就諗到好多，但係隻手就唔爭氣，寫得勁慢，最後只係寫o左唔夠四版，得CE水平！中史又係咁，History又係咁，我要練下寫字寫快o的喇！大家有冇好建議？
放學同馮景昕佢o地去踢波，好難得洪爺、淫漢、鄭堅鋒同就o黎要走o既精蟲都到，仲有久休復出o既阿聰添！好明顯我今日完全不在狀態，好患得患失，好彩仲有三個星期社際先開波，有時間谷番起！
好多F.5都有打，我又可以觀察觀察。潘政賢同李文彬仲係打得好高章，希望佢o地社際唔好再係咁，我心血少唔嚇得(其實我最嚇人)！鄭立初成個李華度咁，同朱沛謙都好多上腳，「三腳波」已經足以玩死佢o地。利家義又係由前打到後，不過足球始終係團隊運動，不足為患。
星期六因天雨取消o既荃官對何傳耀o既校際賽會o係10.26(星期日)補賽，而社際足球會o係11.3(星期一)開波，大家記得o黎睇呀！

>>October 14, 2003 at 2:30:15 PM GMT+8

2003 年 10 月 12 日 星期日 【陰】

今朝娘親霸住個toilet，搞到我好遲先出到門口，我唔制！
o係IT房上History堂，Miss Leung派番o的Essay俾我o地，所以可以乘機偷雞寫diary(呢兩段就係o個陣寫)。佢讚我o個份有好大膽o既嘗試，不過最後兩段counter-argument就略嫌畫蛇添足o左少少，To conclude係一篇好唔錯o既Essay，我要keep住喇！
Camphor今日o的社衫到o左，的確靚過Plum多多聲，我終於解開o左半個「英格蘭史高斯之謎」喇(唔明我講乜o既人可以留意各社高層o既社衫)！

歐洲國家盃附加賽最新抽籤形勢(連分析)：
蘇格蘭對荷蘭(福士帶領下o既蘇格蘭無甚佳作，荷蘭單憑平均質素就足以出線。)
西班牙對挪威(最矚目一戰，西班牙始終經驗豐富，挪威大有可能繼2002世界盃再同大賽緣慳一面。)
拉脫維亞對土耳其(土耳其實力超班，完全冇得打。)
俄羅斯對威爾斯(威爾斯本來已經係強弩之末，不過最後關頭將士用命，傑斯有希望一圓大賽夢。)
克羅地亞對斯洛文尼亞(兄弟兵對決，斯洛文尼亞全靠同組對手弱先有次名，克羅地亞假假地都贏過意大利。)

P.S.潘源良 + 陳欣欣…

>>October 13, 2003 at 2:04:13 PM GMT+8

2003 年 10 月 11 日 星期六 【晴】

o尋晚睇電視睇到好夜，睇歐洲國家盃外圍賽最後一輪，土耳其對英格蘭o既生死戰，雖然奧雲因傷缺陣，再加上碧咸起腳一刻PK搞到PK宴客，但係英格蘭最後捱得住土耳其o既攻勢，0比0完場，以小組首名直接打入下年o係葡萄牙o既決賽週。話就話英格蘭出o左線，不過如果要問鼎冠軍，國家隊仲有好多地方需要改善。首先我心目中o既英格蘭決賽週最佳陣容應該係一個冇正宗兩翼o既鑽石型4-4-2陣式：

　　　　　　　　　占士
加利尼維利　蘇甘寶　李奧費迪南　艾殊利高爾
　　　　　　　　謝拉特
　　　　　碧咸　　　　　林柏特
　　　　　　　　史高斯
　　　　　　奧雲　　　比亞堤

占士打國家隊從來冇令球迷失望，就俾佢打埋個歐洲國家盃，到2006世界盃外圍賽先交棒俾羅賓遜啦。固然英格蘭因為人腳所限，只可以以穩守突擊為主，不過其實o係穩守之餘都應該盡量o係進攻上有多o的變化，而林柏特聯繫前後場o既能力強過畢特，派佢出場可以加強攻力；朗尼同奧雲始終踢法上太相似，唔適合一齊打正選，而希斯基可以係支援奧雲o既最佳拍檔，不過要增加進攻瓣數，艾歷臣應該要o係之後o既友誼賽試用比亞堤同奧雲組成一高一矮o既雙箭頭。
打大賽最重要係後備兵源，艾歷臣不妨考慮重召舒寧咸o係決賽週候命，無疑佢差唔多38歲，不過有睇上年世界盃就知佢控制比賽節奏o既能力，派佢o係最後15分鐘出場絕對幫到球隊。而祖高爾o既分波能力同戴亞、華素爾o既突破力分分鐘係球隊處於劣勢下o既秘密武器，當然仲有畢特o既截擊力啦！
只要艾歷臣o係踢法同人腳調動上花多o的心思，英格蘭o既實力(尤其係防守力)絕對足以稱霸歐洲，且看碧咸同奧雲兩大球星o既造化喇。

>>October 12, 2003 at 2:12:24 PM GMT+8

2003 年 10 月 10 日 星期五 【乍寒還暖】

完全係一場鬧劇…
話說今日荃官足球校隊o係城門谷打何傳耀，領隊(絕對係領隊，唔係教練)吳樹穩叫我o地0900之前一定要到球場，於是我0815就出o左門口，o係大窩口行上去，途中撞到馮景昕同鄭立初。我o地一到球場就拿拿臨入更衣室換衫，換衫上看台，楊肇年、楊啟傳、李文彬同林家禮佢o地都到o左(兼換埋衫)，成班人o係看台等吳sir到。未有阿sir我o地唔可以落草地熱身，因為佢過o左0900都未到，唔單止咁，連何傳耀o的人都唔見，所以我o地打電話問吳sir咩環境，講電話o個幾個話唔知吳sir講乜，淨係聽到話叫我o地去球場office問下，馮景昕落o左去之後好快就跑番上o黎話乜o野「何傳耀話取消場波，今日冇比賽」。咩話？取消？幾時話取消？點解取消？係咪真係何傳耀單方面唔踢o架？如果係咁，應該判荃官贏3比0喎！我o地乜都唔知，淨係知今日收工，阿沈班人當堂粗口四起，梗係啦，o黎到球場準備好哂先話唔打，我都爆啦！既然今日冇得踢，唯有換番衫，散場囉。不過我想講o既係，我走o個陣，運動埸隔離o既硬地場有大班好似係著何傳耀校隊波衫o既人踢緊波囉。
記得今日蚊佢o地會去理工Open Day，依家冇比賽，所以我諗住join佢，join得喎，今次去o既人有蚊同上次中大o的同學、Fan同陌生人Joe。相比起中大，Poly細得多，不過就成個迷宮咁，成日唔知自己位置，搵個演講廳都要行錯幾次。Poly都係以理科o的o野為主，o岩我文科人o既得應用社會科學院同工商管理學院，呢度貢下o個度貢下，得出o既結論係：我唔會入呢間U，我暫時o既目標仍然係中大政政系。不過下星期HKU我會照去，有冇人肯陪我？
Hea到1400左右，出尖咀搵o野食，不過Fan獨愛吉野家，所以最後都係o個度食tea。仲未到下午茶時間，所以同蚊去o左無印買o野先，之後再返去食。食完Fan要去旺角補習，而我就為人為到底，陪蚊行信和，等Fan補完習接番佢。就係咁，呢個星期六又胡里胡塗咁打發o左喇。

2003年Eric好歌流行榜(第41週)：
1)好心好報(方力申)
2)獻世(陳小春)
3)一步一生(許志安)
4)我不會唱歌(李克勤)
5)兩個人的幸運(梁詠琪)
6)死性不改(Boy'Z)
7)長空(Beyond)new
8)錯愛的呼喚(郭富城)
9)亂世佳人(Twins)new
10)不是校花(Kary @ Mini Cookies)

P.S.寫恐嚇信o既簡直係人渣敗類～

>>October 11, 2003 at 2:51:34 PM GMT+8

2003 年 10 月 9 日 星期四 【乍寒還暖】

今日係辛亥革命爆發92週年，當時o既「三民主義」，幾時先可以完全o係中華大地落地生根？
朝早挺一個電話呃左我返荃灣踢波，冇錯，的確係呃，勁少人o係球場，早知唔o黎！
Regular Meeting改o左o係星期五搞，今日係改制後o既第一次。仍然係1930 MTR A等，不過我1830就去到荃灣，因為要借徐家樂對pat聽日用(其實我應該係打後備，多數唔使戴pat)。言語上o既少少誤會，我o地各自o係唔同地方等，到1910左右佢先o係City趕o黎千色店，Sorry + 麻煩哂！
今次Regular Meeting多番o的人，有我、子建、正副社長、Kuto、死魚、六叔、Fan、Lo、蚊同琪琪去，Lo覺得個「社長」鐵章樣衰，所以搵本書遮住個章。你個章都叫樣衰，咁我o地件社衫算點？我o地去沙嗲王食，因為要等張大檯o的人埋單、食甜品同執o野，我o地足足等o左成個半場(45分鐘)先有位！
因為我係瞞住娘親出o黎Meeting，所以我要趕o係佢返到屋企之前返到屋企，食完飯之後o既甜品節目我好唔願意咁冇join到，走o左。最後我成功趕到番屋企，不過…我踏入家門o既一刻突然諗到我今晚根本有個大大o既理由可以遲過佢返屋企！唔制！我要時光倒流兩小時！

>>October 10, 2003 at 2:54:48 PM GMT+8

2003 年 10 月 8 日 星期三 【晴】

一年一度水運會　各社健兒齊聚會
精英盡在樟社中　梅社包艇冇陰公

今日o既水運會，已經連續五年包艇o既Plum全社上下一心，希望以團結o既力量打破宿命。可惜o係最關鍵o既「最佳啦啦隊獎」只可以同排尾二o既Bamboo平分，結果都係過唔到頭，逃唔過連續六年殿軍o既厄運！
已經慣o左o係一個特定時間出門口，所以今朝好早就到泳池，之後子建、Candy、歐玲同Cindy都著住新社衫o黎，得我一個係著校服，超唔合群添！東張西望咁等三支旗升哂之後就即刻趕去換衫，爭取時間落水熱身。試o左兩次跳水，都變o左「撻水」，最後淨係游兩次50米就算。熱完身冇換衫返上看台，o係池邊同更衣室hea，等夠鐘報到比賽。Boys A 50米蛙式第一場有四個Plum(劉景霖、我、鄧思偉、廖家能)，之前緊張o既心情即刻輕鬆番哂。熱身o個陣跳水唔掂，正式呢次就好得多，至少唔係撻水，之後按照策略，最後25米開行turbo去盡，我好似哮喘發作咁死衝，游出o既時間…1分06秒，雖然仲慢過上年一秒幾，但係反而冇覺得好失望喎！之後一樣冇返看台，o係更衣室同得番唔夠半條人命o既阿沈「攤抖」o左好耐，到差唔多放lunch先上去幫手嗌下啦啦隊。
事前唔知晏晝要做helper，所以社衫、牛仔褲、拖鞋，我全部冇帶。我唯有又一次麻煩daddy幫我拎o野去青衣俾我，真係好麻煩佢！一個全新o既食飯grouping：我 + 子建 + 牛榮 + 歐玲 + Janet去仙跡岩，超肉痛！晏晝換番33號社衫，不過原來唔使我做helper，咁我幫手嗌啦啦隊。晏晝o既比賽係唔係決賽就係接力賽，本來Boys A Plum Relay有我份，不過最後就換o左劉景霖代替我，全靠佢 + 江天俊 + 廖家能 + 楊肇年個個博盡，最後力壓Bamboo執番塊銅牌！雖然o的獎牌我冇份，但係都好恭喜佢o地！
嘉如同梁均銘今日都有o黎泳池搵我o地，解散o左之後就同嘉如、子建、Candy同金希文去KFC食tea，大家有講有笑，知道原來金希文都可以好搞笑！食完就去運動家買波襪，買o左$35，不過好彩徐家樂應承借佢對pat俾我，唔該哂！

Re Cafu:我要o既係pat同襪，依家齊哂。

>>October 9, 2003 at 2:56:49 PM GMT+8

2003 年 10 月 7 日 星期二 【晴】

翻閱手機　前世我見過你　跨越世紀　天天追你索哂氣
一旦跳起　埋怨我嚇怕你　攪盡腦汁　誓要接觸你

今日絕對係美好o既一日，high到上天！有人o係言語上又得罪我，不過本大爺今日心情靚爆，放佢一馬！
仍然冇冷氣，課室仲焗過o尋日，唔緊要啦，冇所謂！社衫今日送到，Lunch去幫其他6A同學拎。今年o的社衫…老實講…的確好樣衰！唔知點形容點樣衰法，總之呢件全紅，左邊心口一個標楷體o既「梅」字，後面數字頂，Plum底o既設計，冇乜社員鍾意！
今日又要測中史，今次測《後漢書》同《三國志》，吸取上次o既慘痛教訓，我今次o的字寫疏o左，不過…都係寫得兩版多o的？《後漢書》冇o野寫！實死多鑊！
校隊星期六就要比賽，不過佢仲係乜都未有，波衫、波boot、pat同波襪都要問人借(除o左襪會自己買)，諗住搵吳sir借Store Room鎖匙，點知反轉成間學校都唔見人。之後楊肇年搵到對boot俾我，唔該哂！之後終於俾我搵到吳sir，不過原來學校冇pat呢o的咁私水o既o野借俾人，因為驚唔衛生 + 唔安全，咁我應該去邊度搵pat返o黎？我連龍門衫都冇喎！
蚊佢o地今日返o左o黎，搵o左胡sir傾下計，分享下唔同學校o既生活，胡sir勉勵我o地「中史人」要加油！

P.S.麻煩大家update我o既ICQ info！

>>October 8, 2003 at 2:35:29 PM GMT+8