2003 年 8 月 7 日 星期四 【晴】

今日番學校F.6 Orientation，聽校長背台詞，同埋選新一年o既社內閣。新o既Plum House社長分別係朱銘基同何心怡，雖然唔係好熟佢o地，而且我唔係投票選佢o地，不過都希望佢o地可以好好帶領Plum House做出好成績啦！之後我自薦做o左Sports Cap.，同老麥、江天俊並肩作戰，我仲諗住搵Miss Leung，睇下佢俾唔俾到歷史學會o既Vice我做到，再加上我o係班會都應該仲會有post。7-8分應該夠喇，我都唔想太困身，影響自己讀書，就咁算啦！
食完lunch之後上聰屋企篤波，佢搵到梁省德讀中六，祝佢好運啦。吳國倫同阿沈係咁猛講賤o野、奶明處於「求卵期」，o係度溝姐姐，俾人狂串！

Re蚊：多謝，我會當呢個係一個新開始，你o地都要努力呀！約定o係大學重聚！有機會一定會多o的一齊食飯，聯絡感情！

>>August 9, 2003 at 6:48:51 AM GMT+8

2003 年 8 月 5 日 星期二 【晴】

會考終於都放榜喇，我o既成績…其實係比預期中差少少，History好令人驚訝咁連B都保唔住，中英文都cred唔到，最後得17分。我認為自己咁o既分數一定冇得原校，所以按原定策略，一報o左原校就即刻飛的去莊啟程報名。報完之後再趕番荃官睇收生結果，我出乎意料咁仲入到Waiting List，有人荃官收o左都唔讀就有機會頂上。不過我o係Waiting List都排第五，應該都冇乜機會，所以即刻拎表報聯招，揀無可揀之下報廖寶珊。我o地諗住食完lunch就趕去莊啟程睇，不過之前就睇一睇荃官o係註冊期限之後仲有冇位俾我呢個「候補生」，結果Cafu放棄個位，而第二、三、四個候補都唔番荃官，而我唔太敢博莊啟程，率之我搭上尾班車，文科最後一個位由我所有！亦因為我揀荃官而放棄莊啟程，肥鵬就頂o左我o係莊啟程個位！
跟住幫蚊去聯招睇有冇得interview，搞o左成個晏晝，最後總算人人都搵到中六學位，不過…
可以原校升當然開心啦，但係o的friend就從此各散東西，廖寶珊(蚊)、姚連生(小邪)、莊啟程(肥鵬、青、Su)、甚至裘錦秋(Fan、Lo)都有，大家見面o既機會少o左好多喇！慶幸o既係我o係番荃灣讀，見面o既機會總算大過o係九龍讀。
為o左令最後要離開荃官o既半級同學覺得欣慰，我應承大家，我會好好o係荃官讀落去，盡力考好個A-Level，唔會令大家失望，更加唔會俾你o地話我冇料到又霸住個位！
我達到o左其中一個要求，不過o係咁o既情況下達到，我寧願達唔到…
自己好冇用，乜都做唔到…

>>August 7, 2003 at 1:30:09 AM GMT+8

2003 年 8 月 4 日 星期一 【晴】

唔經唔覺，話咁快聽日就係會考放榜o既大日子喇。話唔緊張就呃人o既，不過都對自己有信心。
今日番學校聽鄧太講解聽日荃葵青聯招o既流程，好彩我有聽，依家計劃又要一改再改，總之一切都係睇分數做人啦。
聽完talk同好多人去Neway唱K，多到要開兩個房。之後上琪琪屋企「打發時間」，完全唔知做乜好，蝦同我玩o左個占卜，信則有不信則無啦！
差唔多1645就一大班人去Pizza Hut食tea，再meet埋Candy入黃金海岸個沙灘玩，o係沙灘坐下玩下，勁尷尬o個o的位，多得Kambo同六叔囉！0930先搭車番屋企，好好準備聽日o既放榜！今日玩得好開心呀！
各位同伴，加油啦！俾信心自己，我o地係得o既！

>>August 5, 2003 at 4:50:31 PM GMT+8

2003 年 8 月 3 日 星期日 【晴】

今日係七夕，牛郎織女鵲橋相聚，願天下有情人終成眷屬。

>>August 4, 2003 at 3:37:41 AM GMT+8

2003 年 8 月 1 日 星期五 【晴】

去o左莊啟程聽talk，聽佢o地介紹自己o既學校、簡介收生程序同選科選擇。最令我陣腳大亂o既係收生程序，我o既計劃係報o左原校之後即刻飛的去莊啟程報名，本來諗住莊啟程會好快通知收定唔收我，如果收，就算荃官1100通知收我都唔番；如果莊啟程唔收，我就會o係1300之前番荃官註冊。點知原來莊啟程要1400先有收生結果，即時註冊，即係話如果我要入莊啟程，我就要完全放棄荃官，如果莊啟程最後唔收我就會好大鑊，我要o係第二階段報聯招！依家我o既如意算盤打唔響，究竟我應該入番原校好，定係冒險等莊啟程好呢？

2003年Eric好歌流行榜(第31週)：

1)玻璃之情(張國榮)
2)同班同學(梁詠琪)
3)披頭四(梁漢文)
4)啼笑姻緣(陳小春)new
5)大暴走(鄭秀文)
6)17歲(劉德華)new
7)三千零一夜(李克勤)
8)落雨路(野仔)new
9)總有一站愛上你(Boy'Z)new
10)離開是為了回來(林一峰)

Re聰：其實我係o係同一隻碟裡面o既《失戀太少》同《黑暗中漫舞》之間對揀，因為《黑暗中漫舞》比較滄海遺珠，所以揀o左呢首。

>>August 3, 2003 at 4:43:48 AM GMT+8

2003 年 7 月 30 日 星期三 【晴】

早o個排買o左《Sammi完全擁有》精選碟，今日終於有時間慢慢聽。其實Sammi唱歌本身都好OK，而且好成36首歌，所以隻碟都算幾好。其實Eason有咁多好歌，都可以出番隻超級精選碟，我揀o左心水o既36首Eason出道8年o黎o既經典金曲，我仲嫌36首唔夠添！《失戀太少》、《低等動物》、《我不好愛》同《兩名男子街頭相遇》都好鍾意o架！

1)專家話
2)1874
3)黑暗中漫舞
4)十面埋伏
5)Shall We Talk
6)時光倒流二十年
7)防不勝防
8)衝口而出
9)黑夜不再來
10)綿綿
11)明年今日
12)活著多好
13)我甚麼都沒有
14)隨意門
15)天使的禮物
16)天下無雙
17)第五個現代化
18)阿士匹靈
19)貝多芬與我
20)單車
21)每一個明天
22)如果這一秒你跟我講你不愛我
23)少見不怪
24)我的世界末日
25)傷信
26)大開眼戒
27)打得火熱
28)反高潮
29)King Kong
30)K歌之王
31)與我常在
32)熱帶雨林
33)當這地球沒有花
34)幸福摩天輪
35)時代曲
36)人來人往

P.S.小弟o既財政問題日益嚴重，需要出售心頭好套現，如果各位對過期o既《進攻足球》有興趣，小弟可以每本$15割愛，多謝！

>>July 31, 2003 at 10:28:13 AM GMT+8

2003 年 7 月 29 日 星期二 【晴】

約o左子建、聰、蚊、蝦、廖記、六叔、Fan、Fiona、Su同Lo去睇書展。點知原來佢o地唔係一早買好哂1300入場o既飛，搞到要o係灣仔o的7-11周圍撲飛，最後都只係買到1500入場o既飛！
o係大家樂食晏，子建唔知講o左o的乜。1500先入場，中間呢段時間做乜好呢？我o地過o左尖咀吹海風、曬太陽，仲有入文化中心開四人秘密會議，之後先搭船過番灣仔會展入場。
我可以調動o既資金唔多，最後淨係o係次文化買o左兩本《建華之亂》同《孽留屬兒》、o係進攻足球買o左幾張球星相同進攻曼聯特刊。我仲睇中o左曼聯歐聯poster、二十世紀九龍區巴士路線發展、人名鎖匙扣……都冇錢買！
我o地行到差唔多1900先走，有人遲到添！祝琪琪生日快樂！

Re魚：咁…我都知原來你係得閒o丫嘛，對唔住囉。
Re蚊：你估我唔係咩？依家唯有安守本份啦。
Re邪：Who is R.A?
Re Cafu:入中六梗冇問題啦，不過如果最後入唔到U，讀預科有鬼用？呢條不失為一條出路o丫！

>>July 31, 2003 at 3:03:01 AM GMT+8

2003 年 7 月 27 日 星期日 【晴】

上星期四聽o左個talk，今日帶埋子建、蝦、蚊、聰、死魚同聰再聽多一次。講師仍然係Frankie，原來佢係play緊帶，講o既o野同上次完全一樣，冇分別。
蚊好似對個course幾有興趣，我自己都有少少心思思，不過我都唔知自己想升預科多o的定行呢條捷徑多o的，總之好迷惘！

>>July 28, 2003 at 12:09:17 PM GMT+8

2003 年 7 月 26 日 星期六 【晴】

冇o野做，開電視睇利物浦對香港。利物浦最後壓倒性咁6比0技術擊倒港隊，不過奧雲o既表現就乏善足陳，印象中得一次頭搥攻門，奧雲迷相信會好失望！
雖然港隊淨吞6隻光蛋，不過話哂兩隊o既級數實在相差太遠，佢o地已經盡全力迫利物浦出真功夫，算係交足功課啦！黃鎮宇完半場前一次中柱、仲有「健力士世界紀錄保持者」蔣世豪兩次撻Q抽射都已經係最有威脅o既埋門，可惜可惜！
睇番呢場波利物浦o既表現，佢o地o既攻力仍然有待改善，上半場港隊後衛仲有氣有力o個陣完全老鼠拉龜，奧雲一俾人mark死就大鑊，巴路士或者會係利物浦危急關頭o既救星。結論係：利物浦o既實力仍然唔足以挑戰聯賽錦標！
今日Eason 29歲生日喇！祝佢生日快樂，事業更上一層樓！

Re蚊：其實我都係恨到發癲，一於食過番尋味！

>>July 27, 2003 at 3:19:41 PM GMT+8

2003 年 7 月 25 日 星期五 【晴】

同小學同學「失散」o左差唔多五年，今日終於重逢喇！有人發起約哂班小學同學出o黎食餐飯聚下舊，因為真係已經好耐冇見過佢o地，所以好期待同佢o地見面。荃官o個3個都有去，大部份人都冇乜大變化，只係個個都話豬紅高得好離譜，而我同肥鵬都冇乜大變化。死肥鵬，又o係人面前爆人大鑊！冇見班同學咁耐，有種一見如故o既感覺，乜都傾一餐，互爆自己學校o既秘史，原來有人同子建一齊補獎勵！好難得同佢o地有番聯絡，得閒再約！
大家都搵番o的小學同學出o黎聚下舊啦，好正o架！

2003年Eric好歌流行榜(第30週)：

1)同班同學(梁詠琪)
2)三千零一夜(李克勤)
3)龍爭虎鬥(楊千嬅)
4)披頭四(梁漢文)
5)多謝失戀(Twins)
6)大暴走(鄭秀文)
7)十面埋伏(陳奕迅)
8)玻璃之情(張國榮)new
9)窮風流(黃耀明)
10)離開是為了回來(林一峰)new

Re邪：慢慢睇下先～
Re聰：係囉～

P.S.通常o的人睇《我的野蠻女友》都會笑到收唔到聲，不過…我係有少少想喊囉。

>>July 26, 2003 at 5:59:29 PM GMT+8