2003 年 12 月 27 日 星期六 【晴】

仲有幾日，2003年就會成為過去。香港今年絕對係多事之秋，「係最壞o既時代，亦係最好o既時代」，為歷史寫下新一頁。今年矚目o既新聞多數會同政府差劣o既施政扯上關係，會唔會同政府o既管治架構有關？香港人素質高唔高？佢o地「亂中有序」，o係危急關頭凝聚起o黎，敢於各當權者說不，唔再只係啞忍，就唔係真係好高都至少提升o左o掛？最重要o既，係連以前只係識吃喝玩樂o既年青人都對社會多o左份關心、多o左份承擔，香港前途有曙光。有人話2003係動盪o既一年，冇錯，不過有危就有機，2003係俾香港人反思o既一年，未來應該由自己決定，而唔係靠人拖捨，香港人唔係經濟動物，更加唔係民粹主義者。展望2004，希望香港人共同o既希望唔再只係希望。2003發生o既事實在太多喇，十大港聞、十大風雲人物根本講唔哂，唯有揀o的對香港整體影響大o的o既人同事。

2003十大港聞：
1)SARS大爆發全城恐慌，政府決策遲緩枉送人命
2)50萬人七一大遊行反廿三反政府施政
3)11.23區議會投票創歷史新高，親政府團體慘敗
4)梁錦松偷步買車，免被起訴
5)中央推出CEPA自由行挺港
6)維港巨星匯安排混亂，政府被轟浪費公帑
7)平機會王見秋事件爆豪門恩怨
8)政府部署大削大學撥款，學生罷課抗爭
9)維港填海事件，反填海英雄徐嘉慎受恐嚇辭職
10)屯門公路汀九大車禍，巴士跌落山21人死亡

2003十大風雲人物：
1)抗SARS醫護人員
2)七一大遊行示威者
3)曾鈺成
4)楊永強
5)王見秋
6)梁錦松
7)徐嘉慎
8)罷課學生
9)李國章
10)鄔維庸

P.S.新城分豬肉唔使分得咁離譜o掛？？？？？？？？？？？？？

>>December 28, 2003 at 3:23:06 PM GMT+8

2003 年 12 月 26 日 星期五 【晴】

話咁快球季已經過o左一半，曼聯力壓阿仙奴、車路士佔據英超榜首位置，又打入歐聯十六強，表面睇曼聯o係碧咸、華朗離隊之後仲係順風順水，不過曼聯其實仍然有唔少隱憂，今季唔係冇機會四大皆空。
先講後防，正選門將侯活可能o係2月返美國參加世界盃北美洲區外圍賽，而巴夫斯又差唔多會借去法國馬賽，咁曼聯就得番卡路爾一個稍有實力o既龍門，如果連佢都乜事唔打得，曼聯就焗住要用接近0經驗o既賓威廉斯或者史迪爾把關，試問邊個有信心佢o地有能力穩守紅魔大門？所以我唔明點解費格遜o係明知唔夠龍門o既情況下仲要送走巴夫斯，巴夫斯做錯乜o野？另外，李奧費迪南o既8個月停賽應該走唔甩，好彩布朗及時傷癒復出，不過整體上曼聯後防兵源係有增加o既必要，費格遜其實可以考慮將菲臘仔由防中調番落後防位置作為補充(反正球隊已經有四個防中)，當然亦可以低價收購老將修夫基，不過成事機會有幾大？
o係4-2-3-1陣式之下，中場o既掃蕩力絕對足夠，而且有堅尼、畢特、迪贊巴同卡巴遜輪流上陣，堅尼同卡巴遜甚至有後上參與進攻o既能力，兵源唔成問題。反而中場冇o左碧咸、華朗之後，組織力大為削弱，始終唔可能要求史高斯同時兼顧後上射門同組織攻勢，傑斯冇足夠o既創造力做keyman，C朗拿度得個「扭」宇，未有資格擔大旗，唯有寄望蘇斯克查復出之後令曼聯o既進攻更多元化，而堅尼同卡巴遜都可以做到後上駁腳o既功夫。
曼聯最大問題係前鋒兵力比後防更加不足。雲尼斯達萊o既質素唔需要懷疑，不過當佢狀態稍稍回落，曼聯就冇最前線o既傳送目標，就可以靠傑斯o既突入或者科蘭o既神來之筆(唔高難度佢都唔會入)，不過點可能靠呢o的食過世？曼聯絕對要收購一個可以頂替雲尼o既前鋒，500萬鎊趁火打劫撬走維度卡係唔錯o既選擇，佢o既頂上功夫o係當曼聯冇辦法以地面小組短傳推進o個陣大派用場，加上仲可以打歐聯，好使好用；或者再買個正宗輔鋒作支援，不過當今球壇又有幾多正宗輔鋒可以選擇？
以曼聯o既人腳，衛冕英超冠軍係絕對做得到，不過要重奪歐聯仲未係時候，曼聯o既兵力未可以同時兼顧多項賽事，唔好為本身未夠班贏o既歐聯而拖垮聯賽成績。為o左減輕主力o既負擔，放棄足總盃似乎係另一著，千祈唔好妄想重溫「三冠王」o既舊夢。

2003年Eric好歌流行榜(第52週)：
1)今年沒聖誕(許志安)
2)小星星(楊千嬅)
3)伶仃(陳慧琳)
4)信望愛(梁漢文)
5)落地開花(盧巧音)
6)孤單公園(張敬軒)re
7)重回布拉格(林一峰)new
8)三分鐘後(At 17)re
9)眼淺(Cookies)
10)傷心換日線(張智城)new

>>December 27, 2003 at 2:57:17 PM GMT+8

2003 年 12 月 25 日 星期四 【微冷】

朝早睇NBA湖人對火箭，O'neal大戰姚明。兩個鬥搶分，整體上O'neal仍然稍勝一籌，不過湖人最後o係Malone缺陣之下主場輸12分，防守太差。
入西貢菠蘿輋玲玲姨屋企BBQ，如果唔搭的士，落o左綠van就要行長命斜，不過唔多辛苦。都去過o個度N咁多次啦，樓下隻狗仲未認得我，仲狂吠？o係天台燒，傳統o既有芝士腸、雞翼、豬扒，特別o既有鱔、豬頸肉同豆苗(用錫紙)，又有麻辣醬、沙茶醬同蒜蓉牛油，好豐富。天未黑齊就狂打大風，o的o野起勢咁吹哂落地，執完又跌，跌完又執，狼狽。好快食飽，豬頸肉好滯，入番屋攤抖，睇電視兼同表弟吹水。嘩，冇見一排，隻貓肥o左咁多o既？做下運動啦，就好似冢前咁守龍門！姨丈拎o左三文魚刺身返o黎，又食，食唔落喇。
2230先走，姨丈車我o地落西貢，再飛綠van出九龍。癲o架，11分鐘o係西貢直出彩虹？清水灣道至少飛120呀，西貢公路佢都夠膽飛70，玩命！不過如果唔係踩咁行油，我邊有咁「早」返到屋企睇曼聯半力贏波？

Re邪：Thanks~

P.S.發生同簡尼沙利斯一樣搞笑o既受傷事件，右邊膝頭超痛，路都唔行得快……

>>December 26, 2003 at 5:21:58 PM GMT+8

2003 年 12 月 24 日 星期三 【炎熱】

Merry Christmas to everyone!!!!!!!!
夜晚有Christmas Meeting，一早約o左去尖咀。之前早估到會多人，好難搵位食飯，所以決定o左買o野o係海旁食，而我就特登早o的出門口睇下邊度仲有位。點知我就o黎o係尖咀落車(留意：我搭o既係巴士)o個陣，子建打o黎話佢o地改o左去青衣，嘩，10分鐘前先約o係清真寺等喎，依家先改？Firm o左N次去維港兩岸o架喎，係改地方就早o的啦。有個situation令我唔可以唔join佢o地，所以我唯有o係天星碼頭飛去地鐵頭撲入青衣城。
好好笑o既笑話，原來所謂「食壽司」係o係百佳買壽司o係海旁食，咁同之前講o既「o係尖咀join埋之後買o野o係海旁食」有乜分別？算，我、子建、六叔、Kambo、蝦、死魚、Lo、Fan同琪琪九丁人擒欄坐哂o係海邊開餐，又講鬼故又出推理題，o的o野清哂就商議下一站，去添馬艦環球嘉年華。
諗住o係香港站行過去，o係大會堂開始多人，要慢慢迫迫去金鐘MTR再過番添馬艦(我計錯數，其實有人提議o係金鐘落)，太多人喇，入得去都差唔多閂門，最後決定放棄行程，搭(迫)船過番尖咀睇燈飾。中環o的燈飾好靚呀，最衰我冇數碼相機啦。揀坐「少」o的人o既下層，見到o的疼皮o野，下次睇清楚o的先落手呀。
夜晚o既尖咀比黃昏仲多人，好難郁，沿海旁行，近藝術館出去o既海皮整路，要行番入名店城，點知咩事突然間一離開o左海皮就有人話解散(我o地根本未到尖東)，解散囉。行番去地鐵站都要花一段時間，地鐵又多人，好彩件o野唔係易碎品o者，迫o左成晚都冇事，只係個底俾人係咁踢，爛爛地！

Re Kaka:你有心o者～
Re Cafu:Hope it's your last lonely Christmas.

>>December 26, 2003 at 3:01:41 AM GMT+8

2003 年 12 月 23 日 星期二 【晴】

今日係乜o野日子？唔止係平安夜，今日係本diary開張一週年呀，一年話咁快就過o左喇。
我諗我知點解o尋日病到五顏六色喇，可能係因為星期六日踢波o個陣「攝」親，始終唔慣作客莫斯科火車頭！好彩病痛走哂，朝早有番精神做o野，不過犯o左個極愚蠢o既錯，好彩唔係太明顯！
普世歡騰o既平安夜，男男女女都要小心，為免發生意外，事前應該做足安全措施…………………例如銀包、貴重物品一定要跟身，提防扒手，免招損失。
Daddy唔使開工，一家三口夜晚去食自助火鍋，埋單每個$50有找，食得好飽……

Re蚊：多謝關心，今日精神番好多喇，放心啦。

>>December 24, 2003 at 1:57:21 PM GMT+8

2003 年 12 月 22 日 星期一 【晴】

o尋晚突然間扎醒，勁肚痛，朝早起身又屙又嘔，好辛苦，完全冇精神，唔通冷親？今日乜都做唔到，差唔多全日都攤o係張床度，連起身都冇力，手軟腳軟，好似就o黎冇命咁，救命…

P.S.冇o左個橙都執番個桔，尼維特贏歐洲足球先生絕對係實至名歸。

>>December 23, 2003 at 1:47:39 PM GMT+8

2003 年 12 月 20 日 星期六 【晴】

夜晚入屯門Family Meeting同爺爺食飯，又係之前我大彈o既「X橋」，今次好番o的，冇乜好彈。
走o個陣daddy叫扶爺爺落樓梯，daddy成日話有少少始老人痴呆，不過我唔認同。據聞佢三朝唔埋兩朝就o係老人院搭的士(電召o個隻)返佢以前屋企附近飲茶，又搵番以前o個間老人院o的公公婆婆打牌，完全唔似97歲o既老人家，更加冇可能有老人痴呆，佢扮傻喳！
孻嬸問我讀書讀成點，我話「麻麻地」，又話o黎考試o既成績應該唔會太好，因為自己仲未跟得上。一返到屋企娘親就審犯咁審我，話我認為自己唔係最叻即係「放peir」，又話我掛住玩，冇心機讀書，最離譜都係o個句「通常你話溫書o個陣我都唔o係屋企」。咁我知自己絕對唔係top class材料嘛，唔通向謝彥丰下戰書咩？你又咁夜返屋企，唔通我要等到你返屋企我先可以溫書？你憑乜o野認為我一定偷懶？

P.S.原來我今朝o既預感真係冇錯…………………………

>>December 21, 2003 at 2:55:43 PM GMT+8

2003 年 12 月 19 日 星期五 【颳風】

Talkback再登我篇article呀，前晚我send之前check寫o左自己名同地址，今次出o既係"Eric Tsui Kwok-fung, Shamshuipo"，5 + 1會count我第一次呀，向$200百佳coupon進發！唔好唔記得林敏o個篇都有登o架！
足球校隊最後一場對聖芳濟，o係葵芳運動場踢。天文台話今日得9度，所以我諗住今日係作客對莫斯科火車頭，原來都唔係太凍，反而個場寸草不生，似o係「沙地」阿拉伯多o的！今場又新加o左朱沛謙同甄嘉浩，易子豪同林家禮冇到，鄭立初o黎o左唔打，吳sir仍然盡量出番o的主力，後段先再換人。一早肯定o左我呢場打正選，所以之前問o左吳向宇借胡文瀚件龍門衫，點知巨乳今日根本冇o黎，我焗住著住去街衫落場，當0號球員！同聖芳濟撞衫，人o地名義上主場，我o地又唔想著橙衫，結果改著綠色龜背。正選陣容同球員擺位都有變動：
　　　　　　　　　0.我
3.沈宗傑　　2.楊肇年　15.李文彬　12.潘政賢
11.張浩勤　13.利家義　8.甄嘉浩　　4.朱沛謙
　　　　　　9.馮景昕　7.梁銘智
上半場戰況：當局者迷，o係球場唔係點睇到戰局變化，只係知荃官俾聖芳濟圍攻，連反擊機會都冇乜，聖芳濟9號仔竄擾力極強，包抄型o既肇lin都要睇住佢。不過其他後衛成日冇睇實後上o既球員，加上潘政賢踢唔擅長o既左閘，聖芳濟o既ex-荃官人右翼好生，右路角球吊去禁區頂勁射高出，要我同肇lin成日大聲提場。聖芳濟博到25碼罰球，我排四人人牆企大細邊，curve近柱我左右移步快，考唔起我。我平時o係沙咀道硬地細場習慣o係後場大腳吊波去對面心臟地帶，我今日無論開生波定龍門球都好似o係沙咀道咁開去正中間，不過又冇留意呢個係大場，次次都斬o左去近中圈位，人o地10號仔頂哂，即刻再俾人攻。我咁o既開波終於出事喇，馮景昕抽筋出o左場邊，未有死球可以俾劉瑞釗入替，之後我接到波，理論上我應該踢出界先，不過當時唔係好知發生乜o野事(好似聽到有人提我踢出界o架)，照繼續開中，俾10號仔頂到，接應回傳之後o係30碼大腳一笠，我企出o左兩步，回唔切身，再次俾人笠死！荃官其實守得幾好o架，只係我一個嚴重犯錯就失守！之後荃官盡力反撲，不過都冇乜進攻板斧，只係利家義30碼罰球柱邊。結果上半場因為我一個出錯，一球落後。
我主動向吳sir say sorry，不過佢冇怪我，只係remind我斬兩邊o既好處，唔好再犯錯就得。其實上半場荃官o既整體表現唔係太差，只係聖芳濟o既體能同組織力都o係我o地之上，佔o左大部分控球時間。阿沈同甄嘉浩都話冇氣，陳國榮同余寶至入替。下半場o既擺位亦都作出一定o既改動：
　　　　　　　　　0.我
12.潘政賢　2.楊肇年　15.李文彬　14.陳國榮
5.余寶至　11.張浩勤　6.劉瑞釗　　4.朱沛謙
　　　　　　7.梁銘智　13.利家義
下半場戰況：聖芳濟都o係位置上作出少少調動，攻得比上半場急。同肇lin溝通出o左問題，直線傳中佢專登頂漏俾我(佢好似真係有嗌keeper)，不過我冇即刻出o黎，俾人攝入小禁區一篤，好彩省到我個身出底線。我都想好似當年舒米高、布魯士咁同肇lin溝通o架，不過我上半場已經嗌到口乾，出唔到聲！有番正宗左閘陳國榮，潘政賢又打番右閘，不過都阻唔到聖芳濟o係中路放斜直線俾翼鋒cut入禁區攻門，全部俾我擋出。o個邊廂荃官唔係冇攻勢，不過利家義、朱仔同黑柴殺到入禁區都冇辦法起腳，注定荃官三場都冇波入。聖芳濟左路地波傳中，肇lin漏油，我出到快，不過俾對方24號撞低，佢執番o係潘政賢趕到前送入空門，不過球證判「詐糊」，犯規左先，梗係啦，咁樣撞龍門仲唔吹？呢球大話夾好彩，不過完場前兩分鐘都要再失一球。聖芳濟快速反擊，24號壓過肇lin右腳腳趾尾拉西，我飛身左手擋到少少，都要束手就擒，輸夠兩粒，呢球實在射得太靚，冇計。得番兩分鐘，荃官連再壓上去都做唔到，最後0比2完場，分組賽三戰皆北，失四球冇波入！
吳sir同隊友都話我第一次打校隊踢草場，表現算幾好，失第一球都係輸經驗，而成隊波都好對辦，0比2係超額完成，話哂我o地本身唔夠班。總算過o左校隊癮，我F.7唔再打喇！
邊執o野邊睇第二場可譽對章馥仙，可譽好似仲勁過聖芳濟，開波分幾鐘就開o左記錄，好彩唔係同組！之後過隔離行o左一陣新都會，入80M，買o左張方頂寶o係八年前被「處決」o既相。

2003年Eric好歌流行榜(第51週)：
1)信望愛(梁漢文)
2)今年沒聖誕(許志安)
3)落地開花(盧巧音)
4)小星星(楊千嬅)
5)東涌日和(Shine)
6)伶仃(陳慧琳)new
7)玻璃少女(Boy'Z)new
8)終生學習(鄭融)
9)出賣(容祖兒)
10)眼淺(Cookies)new

P.S.陳小春o係勁歌季選唱《獻世》o既新唱腔可以學下～

>>December 20, 2003 at 3:15:23 PM GMT+8

2003 年 12 月 18 日 星期四 【乍雨乍晴】

今日talkback終於post我o既writing，不過我send o個陣未打好地址，SCMP寫article係"Name and address supplied"呀，5 + 1唔count我呢個第一次呀，唔抵！不過不失為一個好開始！
搞Christmas Party，o尋晚只係切好o的菠蘿腸仔，諗住今朝同陳江一齊串，點知佢明明應承o左早o的返，佢打鐘前五分鐘先返到，搵埋林敏幫手o係Staf Room C用10分鐘時間搞掂哂。再問Miss Fung借Home Econ Room鎖匙搬o的汽水入雪櫃，先入番hall join自己班，因為唔夠位，我同陳江分開坐，佢隔離o既係…………Oscar！
有Eng. Drama同弦樂四重奏睇，都幾精美o丫，drama好笑。小B唔知o係邊度搵o左首懷舊歌唱，笑到全場反檯！
今年hall assembly比以前短得多，可能學校想慳錢，每班要慶祝就自己搞。返入課室就開始擺o野準備，我拎番兩盤菠蘿腸仔同汽水上去，點知一擺低行開陣返o黎，有大半盤俾人食o左！Party都未開始，咁心急食乜鬼？
開始喇開始喇，好多o野食，有我o既菠蘿腸仔、春卷 + 糯米「池」(Candy)、三文治 + o者喱(Judy)、朱古力(肥龜)、咖哩魚蛋(魚)、汽水 + 薯片(買返o黎)，太多喇，最後食唔哂！太公分豬肉咁派禮物(16份)，皆大歡喜！又有人玩「獎門人排排坐」，飽死佢o地！Miss Fung走o左，差唔多執哂o黎o個陣，阿沈佢o地突然玩鋤dee，輸o左要飲汽水，我玩o左一局咁大把，力保不失！
本來話同人去唱K，不過……又俾人撇甩！又同上禮拜一樣！我諗住又冇人理我，唯有返屋企啦，突然蝦打俾話唱K預埋我，太好喇，同Candy、小妹佢o地一行八人去荃勝Greenbox唱。好耐冇唱喇，勁唱新歌，鍾意o既《獻世》、《必殺技》同《我不會唱歌》全部唱哂，Vincent呢個「荃官巴伐洛堤」o的高音…………全人類趴地！Cindy扮Theresa唱，得小妹一個趴地！本來唱到1545，不過我o地唱到大概1615先冇得繼續唱，點o左《傷信》唱唔到呀。不過咁耐冇唱，唱番o既感覺好正！
唱完我返屋企喇，o係地鐵站月台撞到小桂，傾o左幾句，大家都要努力喇，考試喇，要發奮喇！

P.S.聽日對聖芳濟o既例行公事唔會有觀眾……

>>December 19, 2003 at 2:10:06 PM GMT+8

2003 年 12 月 17 日 星期三 【晴】

中化做個人短講，Miss Fung要我o地人人都幫手做評語，不過佢o地講勁快，明明preparation時間少o左都照即刻出去，o的comment我亂寫o架喳！
我次次上History都冇乜精神，今日我決定主動改變狀況，勁答問題，令自己保持清醒，呢招果然有效。
Buss唔再教書，自修。陣間測中史，測玄奘、周達觀同鄭和，放棄周達觀，狂睇notes，不過肥峰係咁爆笑，前面o既楊晴旭、李綺蘭都歧我o地！有乜好歧喎？不嬲都係咁o架啦。
UE對前日o既CEP答案，做o個陣唔多夠時間，結果虎頭蛇尾，同之前一樣。
Lunch要食快o的，趕返學校ADT開會，我發現當6B人有三急o個陣，佢o地都會變哂傷殘人士。
Triple中史俾足堂半我o地溫習，不過我、Billy同肥峰講笑講哂o的時間，依家發覺有肥峰就會有笑彈！題目又係問生平事蹟同影響，一早決定唔寫周達觀，玄奘鄭和好多o野寫o架，不過又係老問題，唔夠時間，鄭和o既影響寫唔切。肥峰傻o架，又話冇溫，最後竟然要加紙？低o架！
放學幫班會買o野，聽日開party，仲要等電話。嚴重超支，我要出住先，冇哂水。又要包禮物，又要臨時決定o係邊度cut，真係幾煩o架。我、陳江、李綺蘭、楊晴旭、阿魚、Polly同鍾靜怡打完1715鐘都仲o係課室趕工，突然有o的超激爆笑料出o黎，阿魚笑得勁過癮，我呢粒笑彈當然不甘不弱啦，幾乎趴地，「你用手定不求人o架？」呢句超抵死！楊晴旭李綺蘭知道o左o的o野，一路講到走都仲係咁講呀！
夜晚，要打個電話，o下？？？？？？？？？唔係o掛？？？？？？？？可能因為我冇交帶清楚啦……

Re Cafu:對你o黎講就話方便o者，不過個站事實上的確係隔涉嘛，o係富昌咁遠。

>>December 18, 2003 at 2:34:21 PM GMT+8