2004 年 1 月 26 日 星期一 【晴】

本來年初六約o左人去許願樹，不過太多枝節橫生，最後乜都搞唔成，下次先算啦。
全日都同兩個堂哥一齊，先約o係佢o地15年前移民去澳洲之前住o既九龍灣德福花園食lunch，15年喇，乜都變哂喇，仲以為自己去o左青衣城添。之前話去「茜X」(唔係唔開名，只係唔記得個名)食西餐，不過實在太貴喇，最平o既都要$63！雖然請客o既爹娘話冇所謂，鍾意食咪食囉，一餐半餐o者，但係博文、俊文哥哥首先堅持AA制、之後又話唔好食咁貴，o係雙方o既拉鋸之下，最後結果係去間OK靚o既快餐店食，爹娘請。
今日出o黎o既主要目的係去觀塘o既工廠大廈睇開倉衫 & 波鞋，食完飯就過觀塘。我都冇執輸，掃o左幾件短袖板tee，鞋就未買，難得娘親冇乜嫌三嫌四，佢不嬲都係「懷舊系列忠實fans」嘛！去o左間運動倉，竟然有本地球隊o既波衫賣，澎馬流浪、晨曦同以前o既東聯二合都好靚呀，晨曦9號(馬斯奧)、愉園8號(蔣世豪)同南華7號(歐偉倫)都有！
中途daddy去開工，其餘人行到16:00，肚餓，搵tea食。工廠區o的o野好平呀，雞翼沙律 + 菠蘿冰你估幾多錢？$13喳！原來佢o地諗住去長洲同班friend玩番晚，我帶佢o地去信和睇房 & 睇價，俾o左o的親身經驗佢o地。之後娘親帶佢o地去上海街，伯父叫博文哥哥幫佢買錶，不過唔知買邊款好，其實我有個問題：旺角有好多o個o的掃之不盡o既場所，我o地豉油街轉入上海街，行到窩打老道，開始o個段都真係好多好多，不過點解一過o左登打士街就一間都冇？
開始出現疲態，不過唔好意思表現出o黎死撐。直落去廟街，都係o的行貨，佢o地買o左幾件衫，好迫。行完成條廟街，已經20:00，搞o野食，俊文哥哥對吉野家o的牛肉飯好有興趣，入去囉，又唔貴，AA制。食完o野傾o左一陣計，我講下我o既預科生活，佢o地講下澳洲o既大學生活(其實香港都係差唔多o者)，都幾「他調」喎，俊文哥哥考試前三日先開始溫習都過到關！我都知讀大學可以好「他調」，至弊我o地有三年時間「他調」之前要忙兩年先o者！
博文、俊文哥哥返o黎香港玩，對我唔係冇得著o架。由食lunch呢個例子，我了解到少少中西文化o既差異！

>>January 27, 2004 at 3:06:24 PM GMT+8

2004 年 1 月 25 日 星期日 【微冷】

我、肥鵬、Cafu、雪、Richard五丁人一齊，咁o既配搭，會做乜？踢波？咁容易就唔使你o地估啦，我o地竟然係去………………………唱K！我之前係完全想像唔到呢班人可以去唱K囉。
o係地鐵站見到Cafu，過荃勝Greenbox，見到兩公婆，原來雪約o係地鐵站，又返去。Richard遲到，1100先開房，唱3粒鐘。來回兩程都見到o既人都應該係同一group(有錯澄清)。
全男班唱K唔好在好多歌都唱唔到，合唱歌要搵人反串(我扮Stephy)，根本唱唔到高音。《東涌日和》、《冬暖夏涼》、《飲歌》都係第一次唱；《獻世》、《必殺技》呢o的當然都走唔甩啦，唱到力竭聲嘶；同呢班人唱，點都要作反o既，尹光；《上癮》超好聽，不過我唔多識唱。太多人o係門口等房，準備1400就要走喇。
雪同Richard有下一站，約o左呂崇傑去雅麗珊打籃球，我、肥鵬、Cafu唔知點解玩埋一份。N年冇打籃球，已經唔記得點打，進攻防守都唔掂，淨係識做單檔同籃板，中距離手感冇哂，仲話咁快就扯乾。速度唔夠，陷阱防守都使唔出，即刻俾Richard放甩，我諗我好難再打籃球喇！

P.S. o尋日o既diary加o左新內容，之前一時醒唔起！

>>January 26, 2004 at 3:50:41 PM GMT+8

2004 年 1 月 24 日 星期六 【微冷】

今日得7度？唔覺喎，OK暖啦！
約o左表弟去睇賀歲波，今日o個兩場分別係季軍戰港聯對瑞典、決賽挪威對洪都拉斯。成功將蒸餾水同薯片「偷運入境」，$140坐角球旗後面，低o左少少，不過都OK啦，有o的人o係塊面度畫區旗，免費o者，睬佢都傻。初賽0比1輸俾洪斯拉斯o既港聯有龍門范俊業(勁歌頒獎嘉賓)因傷缺陣，教練黎新祥話下半場會以「全華班」應戰，o係慣常o既5-3-2穩守陣式之下，前中後三線各有一個外援助陣：
　　　　　　　　　　　 1.陳達燊
25.司徒文俊　18.李偉文　5.高尼路　4.吳偉超　16.陸冠邦
　　　　　　22.郭裕洪　 23.卓卓　 14.沈國強
　　　　　　　　　7.羅振邦　9.馬斯奧
港聯其實唔係冇攻勢，開波冇耐已經做到波入禁區，不過始終受身型所限，加上港聯把握力弱，考唔起全場因為成日「dum波鐘」俾球迷噓o既瑞典龍門。反而瑞典就搵國內球員o黎香港踢都好有水準，14分鐘第一次攻門右路傳中，即刻俾人頂入。落後下o既港聯傾力反據，郭裕洪同羅振邦都好敢挑戰瑞典後衛，屈速快放，不過唔知馬斯奧想點，佢係港聯前場最高o既球員，竟然成日走去左邊控波，封死陸冠邦o既落底線位，港聯唯有靠死球戰術由高尼路同卓卓後上攻門。高尼路想學盧斯奧？成日帶波上前助攻，又俾佢做到o野喎，帶去中線橫傳俾卓卓再放長傳同羅振邦半單刀，中網……………………側。半場港聯落後一球。
下半場未有調動o既港聯繼好似上半場後段咁谷盡咁搶，不過馬斯奧始終未發揮自己o既優勢，之後11.李健和入替22.郭裕洪，全場即刻high哂，和仔一落場就跑狗咁追波，o的fans唔知o係邊度彈哂出o黎幫佢一個打氣。瑞典同港聯都唔知做乜，和仔成日o係右路方圓十幾碼都冇瑞典後衛睇住佢，不過港聯竟然塞哂o係左邊進攻，永遠唔轉邊，俾人勁噓。15.陳偉豪、16.劉志強、8.蔣世豪、24.潘文迪(點解佢可以入選o架)先後入替，不過都幫唔到港聯扳平，反而因為換走o左右閘司徒文俊，李偉文移去唔擅長o既位置當然效果麻麻啦，所以瑞典o係左路有好多反擊機會。瑞典16號仔最似科蘭o既地方唔係髮型，係把握力，小禁區頂面對空門射網側，不過又一世夠運咁俾佢o係下半場中段同補時o趙兩粒喎，吹漲。最後港聯淨吞三隻光蛋，連續第N年o係年初四輸波！
其實港聯都唔算打得差o既，又係把握力弱o既老問題，又輸身型，加入馬斯奧、卓卓同今屆港聯最佳球員高尼路都幫助唔大。攻力太弱係港隊o既致命傷，o黎緊o既世界盃亞洲區外圍賽冇馬斯奧、佩迪里同卓卓幫手，唔通靠羅倫士咩？其實仲有個問題，黎祥唔係話下半場全華班咩？卓卓同高尼路打足全場o既？
附加內容：「場波仲有15分鐘o個陣，見到耶穌居里o係球員通道行出場邊睇比賽，有o的老一輩o既球迷認得佢。完場之後好多港聯球員都走去看台邊答謝球迷打氣支持，卓卓、和仔、李偉文同吳偉超簽名簽到手軟，10.伊藤壇冇出場，不過對佢好有印象，因為佢掟boot上看台！」
決賽挪威對洪都拉斯，開波前有o的肚餓，想買o的o野食，嘩，仲貴過海洋公園，忍口！
挪威身型完全贏哂，基本上控制住成個中場，左右翼11號同7號係咁快放落底傳中，三分鐘唔到就送o左入網，不過越位在先，挪威先開紀錄o既入球唔係傳中波，係11號個人突破禁區頂放冷箭得手，幾分鐘後香港球迷最識o既洪都拉斯前鋒馬天尼斯一次個人表演推入禁區窄位扳平，全場勁yeah佢！上半場快打快，冇耐挪威一次角球攻勢又超前，半場挪威o係身型佔盡優勢之下領先2比1。
下半場球迷玩厭人浪，摺飛機飛落球場，有隻o係上層直插球場草地，不過更多飛機失事墮毀！洪都拉斯圍剿挪威，不過挪威o既4號仔一夫當關，馬天尼斯都要行埋一邊。洪都拉斯快o的，挪威身位勁o的，下半場尾段挪威8號仔食哂身位單刀拉開比數，判o左洪都拉斯死刑，o的球迷開始鬆人喇。最後挪威保住3比1勝局，繼2001年之後再贏賀歲盃。
我同表弟冇贂頒獎禮，趕住搵o野食，因為知道銅鑼灣一定多人。真係周圍都搵唔到位呀，最後Delifrance搞掂，$25唔夠飽，唔抵食o既！
趕住返屋企，因為今晚TVB播《我的野蠻女友》，之前睇過一次咁大把，不過已經好鍾意，雖然有笑位，但係我都睇到喊，好感動，車太賢好偉大。

>>January 26, 2004 at 12:38:31 PM GMT+8

2004 年 1 月 23 日 星期五 【乍雨乍晴】

年初三本來想o係屋企抖下，娘親一早就拉我落床，又係去上環文武廟。我肯定大個之後唔會係煙民，因為我頂唔順o的煙，o的香好難聞，不過又要周圍上香喎，我都想好似老懵太咁著法。o係文武廟門口見到兩個7-8歲o既o靚仔，佢o地好勁，欲佢o地o既年紀算好識波，成隊皇馬竟然講得出(唔單係6條A喎)，仲連「貝迪斯雙翼」都識，簡直汗顏。我10年前先o岩o岩開始睇世界盃，都只係識羅馬里奧 + 白必圖o既夢幻組合、巴治奧、史度捷哥夫同奇連士文，仲連越位都唔知係乜，依家o的細路真係勁。

2004年Eric好歌流行榜(第4週)：
1)悟空(古巨基)
2)假使我漂亮(關心妍)
3)阿琴(鄧健泓)
4)飲歌(Twins)
5)調情(鄭秀文)new
6)冬暖夏涼(李克勤)re
7)元神出竅(何韻詩)
8)小星星(楊千嬅)
9)蘭花草(葉蒨文)
10)新聞女郎(梁漢文)new

Re Kaka:有人話o左我知啦，另一架dart仔係Plaxton；換o黎o既兩架NC分別去o左九龍灣廠同沙田廠，九廠o個架據聞2月中會派去296A，沙田廠o個架未知。

P.S.(1)原來張丕德o既All-Star東西岸選擇同我o既幾乎一樣～
P.S.(2)有線班講波佬搞guest好唔掂，唔識笑。

>>January 24, 2004 at 1:43:14 PM GMT+8

2004 年 1 月 22 日 星期四 【颳風】

去公公屋企拜年，食開年飯，明明溫度高過o尋日，不過感覺今日上寒得多。好齊人，好熱鬧，開年飯好豐富，日日都狂食o野，放完假分分鐘肥幾個碼！公公屋企有PS2(表弟擺o係o個度o既)，好耐冇打喇，WE7好過癮，即試沙夏 + 雲尼斯達萊呢對攻擊組合，各入一粒2比0掃低車仔。
1600左右，娘親佢o地話去車公廟喎，咁大煙我梗係唔去啦，我同表弟返佢馬鞍山屋企hea下先，不過冇o野玩都係好悶。姨丈同佢妹夫開紅酒飲，飲到好似飲利賓納咁，令我諗起大半個月前陶傑o係蘋果o既專欄，話中國人根本對飲紅酒o既文化根本一竅不通，好多法國酒莊都堅持唔賣紅酒俾淨係識糟蹋紅酒o既中國人。
娘親打牌唔知打到幾夜，我返屋企先。
終於組織好我之前講過由年三十晚行花市所得到o既足球理念喇：
好多人(就算唔係球迷)都認為一隊波要有固定o既陣容、固定o既隊型先可以成功，阿仙奴同曼聯就係咁橫掃英超。當然我對呢個講法冇好大o既異議，因為就算車路士板凳極深都有林柏特、馬基利尼同布歷治幾個必然正選，好似巴塞咁o既星期美點式排陣只會一敗塗地。不過我又發覺一個陣容冇乜變動都唔係一件好事，三冠王時代o既曼聯由傑斯、史高斯、堅尼、碧咸組成o既中場線加上黑白雙煞o既前鋒線合作無間，近乎完美，不過正係因為太合拍，新球員根本好難join得入呢隊波。華朗明明有質素，但係兩年o黎都冇辦法融入曼聯，相信唔單係因為佢適應唔到英超節奏；雲尼斯達萊係入球機器，不過加盟之後從來冇同任何前鋒拍檔取得默契，因為o的舊人夾得太熟，新球員就算身處隊中都好似同舊人格格不入咁。所以我認為球隊應該o係一個既有陣容上適當咁加入新血，保持一定新鮮感，唔通食老本，來來去去都用o個班球員咁寡，食過世咩？

Re好日記推介：你是誰？

>>January 23, 2004 at 4:15:41 PM GMT+8

2004 年 1 月 21 日 星期三 【微冷】

今日係農曆甲申猴年正月初一，過年咁多祝福語，其他都係廢，呢個最實際：祝大家心想事成！
以前年初一都係例牌指夫動作，不過依家再冇呢支歌仔唱。我同娘親約o左孻叔、孻嬸、駿軒、駿熙兩個堂細佬，仲有o係澳洲返o黎堂哥博文、俊文，去海洋公園玩。依稀記得我對上o個次去海洋公園係小學三年級，五年級o個次只係學校請我o地睇海豚only，$180入場費想叫人多o的o黎都幾難。
所謂冬季O運會原來係搵o的外國室內滑雪高手表演花式(室外滑假雪)，對佢o地o黎講好明顯係低難度。海洋公園大部分都係大陸自由行o既遊客(80%)，佢o地o既暴發戶樣一眼睇得出、佢o地身上o個股銅臭十里外都聞到，著住西裝只係外表斯文，內裡根本從來冇文明過。
o係「山下」玩攤位遊戲，贏到幾隻公仔，最精彩o個o的o係「山上」，所以搭吊車上去。食飯前兵分兩路，我同兩個堂哥係「激進派」，玩機動遊戲；其他人係「溫和派」，去海洋館睇魚。可能博文、俊文哥哥o係澳洲玩得機場遊戲多，佢o地想玩盡哂，先玩跳樓機。我最大o既恐懼o既對腳冇o野俾我踩住，所以唔敢玩，我認我冇膽o架！不過過山車就當然冇問題啦，三個空翻如離心力其實都唔係最驚，最驚係去到某o的位，你會覺得你個頭會砍到o的柱，過山車太正喇！我提議玩越礦飛車，有camara影我o地個樣，睇落越礦飛車冇咁刺激，其實因為冇o野固定上半身，所以其實都好激，而且又有幾個位係驚砍頭埋柱囉。架車fing完幾個圈就到鏡頭，我俾唔切反應呀，張相冇o野睇！落車o個陣有幾個西裝友，一睇就知邊度o黎，當正出口條樓梯佢行哂咁，兜膊頭撞埋o黎，滿身銅臭o既暴發戶。
諗住玩埋勁濕身o既滑浪急流，不過唔夠時間，join番其他人去集古村間酒家食飯，$66 per head算抵啦，$13汽水、$40燒味飯、$39比KFC茶餐大份少少o既炸雞餐、$25燒魷魚。食完o係集古村行下，有屈原、秦始皇同法顯o既像，法顯o既intro寫錯和尚名囉(唔係寫錯法顯)。除o左駿熙(佢4歲未到)，四個堂兄弟走哂去玩滑浪急流，我坐最後，到o左跣落去o個下，指定動作係dup低個頭，點知俊文哥哥頂住我，dup唔得低，中哂！
跟住又返去玩越礦飛車，人人都想影張相靚o的，駿軒、孻叔都玩埋一份，又o黎喇，又係未準備好，fing完之後唔知自己o係邊，反而兩個堂哥話「等住到camara」，買o左張相！我同兩個堂哥冇睇海洋劇場，未夠喉，再玩過山車。之前玩過，不過都係驚砍頭，不過呢次都係坐得後，所以即刻走返轉頭坐最前玩多次，激爆呀！
坐吊車返o個邊，1800左右走喇，孻叔訂o左盆菜，上佢o係上水o既屋企食。孻叔架車載唔哂咁多人，我同娘親自己o係搭車香港最南去香港最北，孻叔就先車哂其他人返屋企，再去元朗拎盆菜。
巴士 + 東鐵 + 村巴 + 等車，原來80分鐘係可以o係香港最南撲去香港最北，孻叔都仲未返o黎。盆菜好大盆呀…………………雖然有好多芋頭、太少魚蛋豬皮，六個大人兩個細路都食唔哂，好滯。
睇電視，同駿軒玩，hea到好夜先走。南至北要80分鐘，o係上水返屋企…………連等車要65分鐘。

>>January 22, 2004 at 7:26:06 PM GMT+8

2004 年 1 月 20 日 星期二 【颳風】

阿魚生日快樂！
54年o黎最凍o既年三十晚(其實我覺得冇o尋日咁凍囉)撞正魚生日，同子建夾錢買禮物，佢好唔環保。晏晝Octopus全體 + 香港佬同佢去江戶前食飯慶祝，好難得Mina終於回歸，Octopus齊哂人。大家有講有笑，好似返去F.5最開心o個陣咁，Mina中途走人，我o地埋o左單仲要賴死唔走o係度睇電視，好彩o個陣o岩o岩落場！
食完香港佬都走埋，我o地去南豐打機，我齋睇，賽車同打鼓都好刺激，不過對街機冇乜興趣。
打完就hea去麥記打躉吹水、玩公仔，子建坐o左一陣就去補習。我之後冇耐都返o左屋企行埋團年飯先再出荃灣join人行花市。
團年飯好豐富，好飽，食完飯碗都未幫手執就出門口再撲入荃灣行年宵，我想行維園o架，不過好多人驚好似上年咁迫法，唔肯去，所以都係行沙咀。我、子建、死魚、Kambo、Lo、Fan去千色店兜個圈先，再o係麥記join埋六叔就過沙咀，好迫，人可能冇上年維園咁多，不過比上年亂，o的人亂行，我o地好快就打散o左。之後有兩公婆帶路，不過中途都係分開兩邊，我、子建、Kambo、死魚「攝」去全軍出動o既大團圓趁熱鬧。佢o地好落力拉客呀，感染埋我o地，我都幫手嗌兩聲，不過好似………有人嫌我o地阻地方。
另外o個group都入埋o黎，打發o左冇幾耐又行開陣，原班人馬 + 兩公婆去稻草人食宵夜，其實我唔肚餓o架，所以食串燒就算。睇電視新聞，嘩，維園好似唔算太多人喳喎，至少冇上年咁迫，早知去維園啦，我想買高官啤牌o架！我個位對住窗口，望住大河道天橋，AA2幾時變o左黃老太o架？佢幾時過o左檔？
食完宵夜，Kambo走先，其他人返年宵，死魚要買花。o係花檔完全郁唔到，子建要返大團圓搵人泵汽球，第六街人流管制，我o地扮工作人員捐返去。悟空金剛棒一早賣哂，公仔枕頭都係賣剩四個喳，佢o地好得囉！初時我都諗過參加，問daddy意見，佢話搞年宵一定蝕，我又唔想亂跿屋企錢，所以最後決定唔參加。點知依家佢o地個勢好似好勁，就算真係回唔到本都應該唔會勁蝕，佢o地太勁喇！Join番買花o的人就走喇，通宵地鐵冇乜人。
之前我一直都相信一套足球理念，經過今晚行年宵，我更加肯定我呢套足球理念唔會有錯，我組織番好o的先show出o黎啦。

>>January 22, 2004 at 5:21:33 PM GMT+8

2004 年 1 月 19 日 星期一 【乍雨乍晴】

凍到變雪條，聽日會仲凍，小心身體。
晏晝考中化小組討論，o係屋企食埋飯先出門口。本來諗住o係地鐵七仔買exam，突然發現進攻足球早o左4日出版，exam反而未有。朱基、死魚、大頭、Vincent同我一組，嘩，乜題目o黎o架，「電視操控人們的生活方式」，靜o左，呆o左。唔知自己講乜，完全冇point，都係唔掂o架喇。Polly就好啦，「你是否贊成2007年普選行政長官」！
考完過沙咀道「大團圓」年宵檔襯熱鬧，入埋去吹水，又幫埋手拉客，有o的人o係度玩，玩互扑，有o的被扑。生意唔知算唔算好，我o係度個半鐘，做到幾單生意，突然有人話想擺o的貨o係度寄賣，最後大恩姐好似拒絕o左。我冇參加，覺得好似有o的衰仔，所以臨走前經濟上支持佢o地，買o左o的o野o架，不過就絕對唔係大豪客！

>>January 20, 2004 at 1:42:51 PM GMT+8

2004 年 1 月 18 日 星期日 【乍寒還暖】

去西九龍食lunch，o係停車場門口見到有架萬寧貨車o係中線冇打燈就突然cut入門口，不過俾架的士頂住，轉唔哂入去。的士後面又有o的車，駛唔走，理論上應該係貨車"tun"出o黎讓位，點知佢唔o岩在先仲聲大夾惡，連人娘親都唔放過。至少擾攘o左10分鐘，隔離係差館，幾個「黃腳立」出o黎調停，最後的士後面冇哂車，佢"tun"少少，貨車又"tun"少少，一人讓一步咪解決到囉！
夜晚睇「星期一檔案」，講食物回收，志願機構收集食肆食剩o既o野分俾有急切需要o既人，不過成效仲未係好大。香港人實在浪費太多食物喇，仲有超過20000人連三餐都成問題，所以大家平時如果明知自己食唔哂一個餐就一係同人share、一係落單o個陣叫廚房整細份o的，唔係好多地方o既「廚餘」有回收o架！
反轉成間屋先知原來我冇頸巾………………

>>January 19, 2004 at 1:47:48 PM GMT+8

2004 年 1 月 17 日 星期六 【乍寒還暖】

今朝睇番叱吒頒獎禮o既錄影帶，真正百看不厭，許志安唱live《活在當下》好有台型，千嬅冇乜儀態。
早排o係中學生聯盟o既website知道今日晏晝o係旺角街頭會有政改街頭論壇，諗住就算唔多人都唔會少o掛？點知o個度除o左記者就冇真正o既「觀眾」，附近o的人都係望兩眼就行開o左，跟住又落雨，我扮等人咁企埋一邊聽forum，不過途人太多，唔係點聽得清楚，有o的覺得自己白行一趟。

Re蝦：叫o左你唔好reply…………

>>January 18, 2004 at 1:58:05 PM GMT+8