2004 年 2 月 16 日 星期一 【炎熱】

又唔記得帶中化書，今次諗住趁Morning Assembly完o左去6B問張嘉輝借，借到，點知今日唔用書，睇video，早知唔使走上走落，好埋哂o的冤枉路。
History勉強撐得住，Miss Leung已經習以為常，o的article好難明，咁都唔使見周公真係難得。
兩堂Buss做planning，同肥峰、Billy齊齊講笑，不過有o的o野都係唔出街好！
發作喇，好彩有蝦遮一遮，5 + 1唔覺我dup低頭釣魚，佢又補時九分鐘喇！裝到佢份talkback記錄表，點解佢count得我一次o既？我登o左四次喇喎！Lunch又o係課室食，5 + 1突然間撞o左入課室擺低o的o野，佢冇任何反應。
Lim Sir冇返，三堂中史自修。自乜鬼修o丫，三堂咁耐點打發？好無聊咁過，吹水都吹到悶，又唔知對面做緊乜，好渾渾噩噩，我寧願Lim Sir教書，其實已經走o左好多堂喇。
放學諗住走人之際，呢個朱基…………又搵我去睇社際女籃，睇乜鬼o丫？我都唔識佢o地，又有莊學謙教路，多我一個唔多，少我一個一個唔少啦。Plum對Bamboo戰情好激烈(唔一定多波入先激烈o既)，Plum第一節12比3領先，成個上半場都佔o左上風。下半場我o地越打越"lup"，身位絕對唔輸蝕之下都勁俾人o係三秒區狂爆 + 搶進攻籃板，第三節試過俾人追到1分距離，第四節Bamboo做Full Court Pressing，Plum幾次o係後場turnover俾人剷籃，好彩最後27比24險勝。唔識評佢o地o既表現，因為佢o地應該冇乜夾過，又唔係話真係好熟籃球，都係靠莊學謙啦。

P.S.真係該煨，黎瑞恩7個月大o既女曾凱栭竟然超似佢爺爺曾憲梓，依家似好喇，如果大個o左都係咁似仲有人要o既？

>>February 17, 2004 at 3:22:26 PM GMT+8

2004 年 2 月 15 日 星期日 【晴】

唔知咩事長沙灣月台有架地鐵閂o左門冇開走，搞o左兩分鐘終於開走，亦因為咁，計錯時間。
Comp & Compo Correction一齊交，我o的表達能力唔得咩？
Buss釣魚釣得好厲害，又冇帶計數機，乜都做唔到，魂遊太空。
History講講下講埋Titanic，原來Miss Leung都睇，我同佢一樣，聽Nicam好o的。
中化冇帶閱讀理解，要Billy share一半做，第三篇做o左一半就要入hall再影相。公民教育組同功課輔導組都影埋，爭足球校隊，不過要搵齊人落hall又談何容易？收哂檔都冇下文。
上次奇特o既lunch陣容今次再加埋陳江，阿沈成為眾人焦點，大量令人精神為之一振o既助語詞機關槍咁瘋狂掃射，小弟自愧不如。
仲有以為吳sir歷史性咁冇返，好彩佢只係朝早開會，我o地有得上！有超過40分鐘時間踢波，佢第N次講o野冇point都冇所謂啦。又係勁多人踢，又係平時o既對壘。林挺射入靚波，轉頭冇耐余寶兩次單刀，一次直射，一次橫射俾陳梓豪，我閃電連番失守。右邊擺定開o既龍門球落點靚絕，俾哂位阿沈左路屈速(佢都屈到速可想而知我o的長炮幾到位啦)落底傳中，陳梓豪o係濕九力壓下再入一粒…………不過係自己龍門。戰情拉鋸，兩邊都冇乜致命埋門，鰻魚突如其來o既禁區頂冷箭為我o地反超前。余寶右邊罰球傳中，企錯少少位，爭o的俾李天攝遠柱頂到空門，最後林挺完場前門口執雞，4比2完場。
Class Period派成績表影印本，難得咁o既成績(History Course Work出奇地高)都有唔錯o既評語，繼F.4 History之後，我再有First In Class喇！不過唯一唔計分o個科First In Class有托用？
返屋企邊播朝早NBA All-Star錄影帶邊幫Billy做剪報，全世界擺明俾機會O'neal贏MVP，人人爭住入寮仔部，Kobe唔通氣，如果東岸o既罰球唔係勁炒粉(一半)，西岸未必贏到o架。

>>February 16, 2004 at 3:16:40 PM GMT+8

2004 年 2 月 14 日 星期六 【晴】

屋企附近o既「五十嵐日本料理」有任食火鍋，$58冇加一，諗住今晚去食。
坐低，食客多，伙記少，連茶都冇杯，火鍋料到o左，不過叫o左豬骨湯底好耐都未到，揀一款免費小食，yup手好耐先有人見到，見到喳，五分鐘後終於落到order，罐gas冇哂，又要等，總之乜都要等。雖然o的火鍋料唔錯o者，$58都算抵食，但係咁o既服務水準點收貨？

Re G-man:邊個？係咩？唔使o架？唔知添～

P.S.何輝以前係球員喎，點解都會犯呢o的咁o既邏輯謬誤？龍門點可能唔企貼柱邊指揮隊友排人牆守罰球？驚對手快開可以o係自己行開o個陣搵條友企龍門口，再唔係咪棟條友o係正個波前面囉。

>>February 15, 2004 at 2:53:18 PM GMT+8

2004 年 2 月 13 日 星期五 【晴】

天黑了　還有燈　還有熱戀者擁吻　有情人鼓勵沒情人
為舊日幸運　投入到動魄驚心　絕不能成為愉快的犧牲品

情人節唔係只有愛情o既，朱古力都唔會只係送俾情人啦，情人節都可以講其他情o既，所以沒情人唔使唔開心，就算冇情人愛錫都有朋友關心嘛(有o的人幸福得多，魚與熊掌兼得)！
之不過，話哂都係為o左紀念幫人證婚而被處死o既Valentine而有Valentine's Day，有情人今日冷落沒情人係大條道理，所以我o地唔好怨佢o地有異性冇人性喇。
其實……我今日係十萬個唔想出街o架……

2004年Eric好歌流行榜(第7週)：
1)新聞女郎(梁漢文)
2)仰慕者(左麟右李)
3)女扮男生(At 17)
4)阿琴(鄧健泓)
5)相依為命(陳小春)new
6)假使我漂亮(關心妍)
7)調情(鄭秀文)
8)明天請早(許志安)new
9)2月14的約會(林嘉欣)new
10)避雨(Shine)

>>February 14, 2004 at 3:04:50 PM GMT+8

2004 年 2 月 12 日 星期四 【陰晴不定】

繼續係咁，冇辦法啦。
影相日，History有得走(一堂咁大把)，中化又唔使上，唔覺得今日係返學！
Triple UE派文 + 作文，坐足兩堂聽5 + 1唔知講o的乜。第六堂o既announcement救o左我，所有校隊入hall影相，仲唔乘機鬆人？迫爆hall，Grade A排球籃球校隊都到齊，得足球隊連11人都o黎唔夠，5B幾個全部唔見人，趕唔切打鐘前影，放學囉，不過放學一樣冇人到，都係星期一先影算啦。
中化唔使上，全班玩到癲哂，留意，係各有各玩。
兩堂中史又冇埋，影班相、影社相、影環保教育組、客串歷史學會，差唔多乜都冇教過。
UE Project下星期就要交，之前完全冇呢回事，放學先臨急臨忙開會傾o野。Mass Media主題，講操守，好似唔難寫，一人寫o的，我要寫最多(嗚…)，應該好難準時交o架喇，不過盡快啦。呢個weekend勁多功課，DBQ + Compo + Compo Corr + Project，忙死。

Re Kaka:一間80M有，其他80M都應該有啦。你數到邊七款？我將紅燈籠獨立計開喎，仲有G5樣板雞車。

P.S.曾憲梓真係識避重就輕，李柱銘、司徒華、張文光當然唔係「愛國者」啦，佢o地都唔係黑社會！

>>February 13, 2004 at 3:14:49 PM GMT+8

2004 年 2 月 11 日 星期三 【炎熱】

一年一次o既body check，今年中六，所以我去，中一、三、五七我係死都唔會去o架，唔明點解就算啦。
o係葵芳MTR行上去，上幾十級樓梯都唔係好辛苦o者，反正屋企附近冇車直接到診所門口。
又係年年一樣o既問卷，問題已經略知一二，機械式咁做。度高磅重，有冇搞錯？我o係學校度過我係173cm高o架喎，點解呢度會係169.5cm o架？身高體重比例越o黎越差，成個朗拿度咁，我太為食喇，我要減磅！視力仲好過以前，唔通因為我少o左睇書？
輪籌等見姑娘，10號籌，我Sports Day都係著10號社衫，開始鍾意埋10號，不過當然冇33號意義咁大，其實我Heat跑100m初賽著30號，都OK喎！我肯蹝錢蹝時間出o黎主要都係想問下耳仔o既問題，原來冇乜事，唔使擔心。
又話o個度一定要戴口罩，都唔係o既，我冇戴。一個鐘唔使就搞掂，又去葵芳新都會o既80M睇o野，俾我搵到冷氣雞車o既相，終於集齊五間巴士公司九款雞車o既相喇！

P.S.(1)立法會選舉民主派o既港島區參選名單出o左喇，第一張係楊森 + 李柱銘，第二張係梁家傑 + 余若薇 + 何秀蘭，正爆，不過次序未定。可能湯家驊真係肯去新界區參選，而吳藹儀就會留o係功能組別法律界(遵守遊戲規則去改變遊戲規則啦)，一於要哂民建聯鐵票以外o既所以票源啦！
P.S.(2)蕭蔚雲終於爆響口喇，「愛國即係愛中華人民共和國」！

>>February 12, 2004 at 3:59:59 PM GMT+8

2004 年 2 月 10 日 星期二 【晴】

疲態？咁算啦……
Sports Day Final，繼續o係城門谷，由大窩口上係快過o係荃灣上，不過我懶得一斜，俾多$0.5搭多一個站。去到石圍角見到Candy佢o地，唔知咩事走去公園玩，唔識佢o架。佢o地買o左SCMP，我又上o左talkback喇，第三次，距離$200百佳coupon越o黎越近！
今日我基本上係冇比賽，只係o尋晚同今朝都覺得大腿後筋冇問題，決定跑5000米。吸收上次經驗，一借o左釘鞋都即刻收埋，只係借俾熟人。大部分時間都o係終點附近近，距離睇跑手衝線，喜怒哀樂乜都睇到哂。
今屆陸運會特別多人o係終點抽筋趴低，熱唔夠身？唔會o既，有o的猛人都趴，唔關實力事喎，呢個係一個謎。今日好多人變態，Boy A 400m要重賽(有人話李文彬玩o野)，佢以100米o既步速跑400，幾乎完全冇對手，57.00秒打破保持o左13年o既學校紀錄，計average差o的仲快過我跑100！Boy A 1500m有Judy，跑第七，甄嘉浩最後80米先開行turbo放甩朱仔、魚寶衝線，又一變態之人！伍澤恆跑完Boys B 400m冇跑1500m，冇佢冇o左金牌，不過最失望都係Oscar最後都冇跑呀！
Boys A 200m又係Plum天下，包辦三甲，肇lin、李文彬、林嘉禮順序衝線，肇lin又袋金。最最最精彩都Boy A 4x100m，李文彬 + 馮景昕 + 楊肇年 + 林嘉禮唔係要玩，擺明要衝擊保持o左30年o既48.5秒學校紀錄，不過最後都係差些少，但係已經贏其他社成條街！
Girls A 4x100m交第二棒o個陣出o左意外，即刻大墮後，包艇返終點，意外o者，唔緊要o既。
以前對Club Relay冇乜興趣，不過今年係我o既焦點，因為我要親眼見證一個歷史時刻：子建落場代表Art Club跑！佢接第二棒，即刻將形勢扭轉－將領先優勢一轉變成遠遠落後，其實盡o左力跑咪得囉。
Boys Open 5000m喇，上年腳痛冇跑，今年對腳都好問題，不過照跑。好多人o係跑道，好多人o係場邊打氣 + 遞水，有o的人中途插入o黎跑一兩個圈，有o的人跑o左開頭幾個圈就冇再跑。大腿筋冇事，不過同以前一樣，小腿扯得好厲害，行下跑下咁去，最後唔夠時間跑哂全程，3400m喳，我以前曾經跑到4200m，依家少做運動，退哂步，跑唔番喇，一跑完即刻要去Red Cross搽松節油，記憶中上次搽應該係三年幾前遠足camp行天梯o個又抽到o個度。金牌好似又係李文彬，跑完400, 200, 4x100都仲咁有氣，怪物。
擔心乜鬼o丫？Plum最後都係再次o係Sports Day衛冕成功，肇lin、何景行分別贏埋自己組別o既Overall Champion，又係大贏家啦？不過唔知下年仲有冇呢支歌仔唱，靠佢o地自己爭氣喇。
解散，唔想返屋企住，同肉丸、賤迪、肥峰佢o地踢波，著住波鞋，除鞋踢囉。赤腳踢唔係咁盞o架，對腳好痛，又唔多敢擋波，都係算啦。

Re挺：係喎，搞錯o左添。

P.S.許愿當年都想李麗珍讚佢靚仔o既～

>>February 11, 2004 at 1:42:17 PM GMT+8

2004 年 2 月 9 日 星期一 【微冷】

中o左，不過好迫，時間好短。
超時o既Morning Assembly，甚麼教會講錫安教，梁日華者，病態聖徒也。一日十滴雙氧水，有病醫病，冇病強身，信不信由你。Overun唔緊要，講耐o的都仲得，反正第一堂係UE嘛！
UE上得20分鐘，5 + 1功力越o黎越勁，文化、宗教、哲學、神學…………乜都講，我唔敢笑呀，狂忍！
唔知點解上親History都會釣魚，就算我有幾鍾意都會釣，Miss Leung今次直頭當眾扮下我點釣，好瘀皮呀！
明明已經冇再讀Maths，都要計數，Buss做Standard Deviation，已經唔記得點做，勁慢。
兩堂中史勁講書，好快，差o的跟唔到，春秋戰國我多數唔會睇o架喇。
中化又係發夢，本書唔係自己，冇得寫notes，不過其實抄o左notes都唔會明。
問教協借o左兩條鐵通，今日前要拎去旺角山東街o既office還俾佢o地，今朝返學唔想拎住咁大碌鐵通，諗住放學返屋企再出(其實拎埋好o的囉，慳車錢)。上到教協，俾番人，搭lift走，o係lift裡面……………撞到Miss Fung，早知搵佢幫我拎啦(佢講o架)！

Re Pang:唔會少o左你o個份o既，你o既特殊口味我點會唔知o丫？你鍾意野外遊戲嘛！一於《大逃殺》啦！

>>February 10, 2004 at 3:05:34 PM GMT+8

2004 年 2 月 8 日 星期日 【乍雨乍晴】

等o左呢日好耐喇，肥鵬今日18歲生日！18歲o既來臨恨o左好耐啦？係時候睇片喇，鍾意本地定日本？《大逃殺》定《人肉叉燒包》？
一醒眼，竟然唔記得今日星期幾，諗住o係張床攤耐o的，不過未嘗唔係好事o既！
差唔多三分一班人朝早去o左drama，唔使上堂，避開UE，幸福！11個中史人6個唔o係度，Lim Sir都費事教書，俾我o地自修，不過大部分時間都係傾計居多，原來……我o地入錯課室！
UE冇印象，都係發夢，前面冇o左蝦掩護，唔敢搵周公，扮哂o野。中化聆聽又聽唔哂，out of standard得好厲害。
Lunch同子建、牛榮、馮景昕、阿沈去維苑食，見到Chem Sir兩個人，我o地諗住屈佢一筆，佢請！最後……都係算啦。
學聯有個反削資簽名行動，o尋日拎o左張簽名收集表返o黎，諗住今日o係學校搵人簽。History第二堂俾我o地睇Stephen Lee當自修，乘機俾Miss Leung簽，又俾埋Step佢o地，佢o地竟然幫6A其他人簽埋，谷數量。呢樣o野我有保留，我o地要以民間聲音俾壓力政府，不過我o地要o既係真民意，你o地想俾政府睇到多o的簽名，呢個本意係好，但係幫人簽埋名即係製造假民意，又有乜意義？
屋企人好大反應，再問埋tutor意見，我諗我都係要退出唔參與「2004青年高峰會」o既籌備工作喇，呢個會令我冇時間讀書喎。或者我要以另一個身分置身於呢個活動之內，參加者囉，做o個120個中學生，再暗中盡自己能力幫下SSU，因為o個邊真係超級唔夠人o架！所以好遺憾，荃官得番3個位俾有興趣o既同學競爭(其實我懷疑荃官根本有冇咁「多」)！

>>February 9, 2004 at 3:20:52 PM GMT+8

2004 年 2 月 7 日 星期六 【暴雨】

o尋晚睇愛華頓對曼聯，簡直係球迷奇遇記，少o的心血都嚇死。曼聯打o左30分鐘已經領先3比0，之後幾次機會都拉唔開比數，結果下半場俾愛華頓三個死球傳中連追三球3比3扳平，好彩完場前一分鐘雲尼斯達萊接應C朗拿度右路傳中門前飛頂破網，4比3完場，不致於好似週中o既熱刺咁輸俾自己！雖然曼聯贏波，但係相信冇人會滿意球員o既表現，領先三球就以為穩操勝券，俾人狂吊波入禁區都唔識驚，後防o既頂上功夫o係李奧費迪南缺陣之下明顯唔夠打，中場唔夠截擊力保護中堅，兩閘又阻唔到對手兩翼傳中，布朗不在狀態更加唔使講，唔係有侯活曼聯一早輸o左喇。費sir要諗諗計喇，調整防線o既佈陣啦。
為o左減少支出，政府打算削減教育撥款，今日香港中學生聯盟(SSU)諗住o係將軍澳寶琳新都城擺攤位收集反對削資o既市民o既簽名。嘩，中午o既新都城o既人流………完全唔似星期日o既香港！因為太凍？o尋日仲凍啦，不過聽o尋日有份o係屯門開檔o既話o個度超多人，有2000個簽名喎！咁少人，冇計啦，費事開檔，走人。
有留意SSU網頁(www.hkssu.org)o既朋友都應該知道，SSU同香港人權監察會o係暑假聯辦一個大型活動，邀請全港所有中學生參與，通過討論社會時事，俾中學生機會表達我o地(我都係中學生嘛)o既意見，以鼓勵青年人積極參與社區事務(呢個唔同政治)，仲希望提昇中學生對時事o既興趣，進一步加強我o地對香港社會o既關心，了解我o地o係社會o既角色、地位、作用，而且呢個活動可以訓練我o地o既辯論、表達意見、溝通同人際關係o既技巧。詳情因為未有最後定案，唔方便講，只可以話我o地會將活動詳情同時知會全港所有中學o既校方同學生會，一方面希望學生以學校名義參加，另一方面可以防止保守校長企圖封鎖消息唔俾旗下學生參與。呢個絕對絕對唔係政治活動，只係想俾機會中學生討論政制、教育、青年事務三大範疇，可以知多好多o架，我推薦各位踴躍參加！
o係將軍澳去人權監察o係上環o既office同佢o地o既Kit姐開會，早o左好多到(冇擺檔嘛)，傾下計先。SSU好多成員唔係F.5就係F.7，佢o地好快就要暫別，所以好多準備功夫都好趕，如果多o的F.6幫手就好喇，其實可能因為SSU上年8月先成立，未有完善o既系統，而且SSU前身係「中學生關注基本法23條立法聯盟」，當時o既發起人伍展邦、林正文同陳樺都係F.6，今日佢o地要面對AL，自然唔好意思要佢o地抽身搞呢樣青o個樣，SSU應該要過多兩三年先會正式走上軌道。
Kit約o左香港記者協會主席張炳玲上o黎，借地方俾TVB同「炳小姐」(Kit姐咁叫佢o架)做訪問，訪問佢o既係陳嘉儀，Ben鍾意佢o架，Alien鍾意有線o既莊安宜，William就o笞譚凱韻糖，似乎Cable女主播比較受歡迎。
夠鐘開會喇，呢個活動規模好大，好覺得人力嚴重不足囉，冇計啦，SSU會員雖然已經唔算少(超過200)，但係真正可以參與幕後統籌策劃o既唔多，我都要身兼兩職。搞活動真係要諗好多o野o架，單係經費已經頭都大埋，據聞至少要………20萬……囉。不過其實呢個活動好有意義，再辛苦我都好想可以參與其中。
要傾o既實在太多，19:45先搞掂走人，星期五又要出旺角教協再開會，月尾前要就某o的範疇達成共識。返到屋企，點都要將呢件事話俾娘親知，諗住佢不嬲都對我參加社會運動冇乜意見，點知佢竟然超大反應。佢話我今日已經全日出o左街，星期五又要出，之後亦都要成日出(係事實)，邊有時間讀書？固然我唔否認呢個活動會令我少o左時間讀書，不過我o係學校已經冇乜o野做，總唔可能齋讀書o掛？我唔信大學會收書呆子，而且我o既目標係demand學校多認為社會o既政政系！佢講下講下，竟然彈o左句「民主黨係成人反對黨，你o地就係學生反對黨」，唔識唔好亂講啦，我要澄清SSU唔係政黨，亦唔係政治組織呀！我都係做我認為o岩o既事o者，咁都有錯？

2004年Eric好歌流行榜(第6週)：
1)阿琴(鄧健泓)
2)女扮男生(At 17)
3)避雨(Shine)
4)悟空(古巨基)
5)調情(鄭秀文)
6)新聞女郎(梁漢文)
7)獨照(容祖兒)new
8)假使我漂亮(關心妍)
9)仰慕者(左麟右李)
10)A Better Day(EO2)new

>>February 8, 2004 at 3:27:35 PM GMT+8